Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova, anëtarësim të shpejtë edhe në FIFA

by

-Presidenti Thaçi priti Vokrrin, kërkon ndërtimin e stadiumit të ri në kryeqytet – Prishtinë/

PRISHTINË,  6 Maj 2016-B.Jashari/ Presidenti i Republikës së Kosovës, Hashim Thaçi, ka pritur sot presidentin e Federatës së Futbollit të Kosovës, Fadil Vokrri.  Fillimisht, presidenti Thaçi ka uruar presidentin Vokrri për anëtarësimin e Kosovës në UEFA, duke shprehur bindjen edhe për anëtarësimin e Kosovës në FIFA.“Unë dëshiroj të falënderoj edhe një herë presidentin e Federatës së Futbollit të Kosovës dhe legjendën e futbollit kosovar, por edhe më gjerë, Fadil Vokrrin, për punën e tij të jashtëzakonshme që ka bërë për anëtarësimin e Kosovës në UEFA, dhe mbetem me besim të plotë për anëtarësim të shpejtë edhe në FIFA”, ka thënë presidenti Thaçi.Ai ka theksuar se, pas anëtarësimit të Kosovës në UEFA, sa më shpejt duhet të fillohet me ndërtimin e një stadiumi të ri në kryeqytet, në mënyrë që të krijohen kushte evropiane për talentët kosovarë.Sipas tij, ndërtimi i një stadiumi është interes nacional dhe për këtë tashmë ekziston një mbështetje dhe konsensus politik dhe mbarëshoqëror.  “Duhet filluar me ndërtimin e stadiumit të ri, edhe nga ana ime, kjo përkrahje do të rritet çdo ditë e më shumë. E di se ekziston një konsensus i plotë i të gjithëve në Kosovë për ndërtimin e këtij stadiumi”, ka shtuar ai.Në anën tjetër, presidenti i Federatës së Futbollit të Kosovës, Fadil Vokrri në emër të bashkëpunëtorëve, të gjitha klubeve, futbollistëve, gjyqtarëve, personelit teknik dhe administratës, ka falënderuar presidentin Thaçi për mbështetjen që i ka dhënë FFK-së në procesin e anëtarësimit të Kosovës në UEFA.“Ju premtoj se ne asnjëherë nuk do të ndalemi. Krahas përpjekjeve të Qeverisë dhe të institucioneve të vendit, që po e potencoj prapë kanë qenë krah i fortë, dhe falë ndihmës së tyre edhe më lehtë e kemi tejkaluar këtë rrugë të vështirë. Edhe njëherë ju falënderoj dhe ju dëshiroj sukses në punën tuaj”, ka shtuar Vokrri.Në fund, Vokrri ia ka dhuruar presidentit Thaçi një top të futbollit me nënshkrim të tij, i cili mban datën e anëtarësimit të Kosovës në UEFA.

Kryeministri Mustafa në pritjen e organizuar me rastin e pranimit në UEFA

by

 

Kryeministri i Republikës së Kosovës, Isa Mustafa,ka marrë pjesë në ceremoninë e organizuar nga Federata e Futbollit të Kosovës me rastin e pranimit të Kosovës në UEFA.Kryeministri Mustafa ka takuar sportistë, drejtues të federatave si dhe personalitete të shumta nga Kosova, Shqipëria dhe vendet tjera.

Të pranishëm në këtë ngjarje ishin edhe presidenti Hashim Thaçi,  kryeparlamentari Kadri Veseli, ministri i Kulturës, Rinisë dhe Sportit, Kujtim Shala, kryetari i FFK-së, Fadil Vokrri, Kryetari i Federatës së Futbollit të Shqipërisë, Armando Duka, nënkryetari i Federatës së Futbollit të Gjermanisë, Rainer Milkoreit, e shumë personalitete të tjera.Kryeministri Isa Mustafa ka vlerësuar rëndësinë e pranimit të Kosovës në UEFA.Duke qenë në Budapest me rastin e pranimit të Kosovës në UEFA, kryeministri Mustafa tha se e ka përjetuar edhe më shumë këtë ngjarje të madhe.“Ju uroj të gjithëve këtë fitore shumë të madhe, anëtarësimin në UEFA. Unë isha së bashku me ju në Budapest, e përjetova gëzimin por edhe frikën me ju. Mirëpo, jam shumë i lumtur që sonte bashkërisht po kremtojmë këtu. Urime dhe shumë suksese”, tha kryeministri Isa Mustafa.

Pamje të Marinës amerikane gjatë natës

by

Flota Detare e SHBA është forca dominuese në oqeanet e botës. Përveç misionit të saj ushtarak, kjo Flotë e fuqishme mban hapur rrugët tregtare në oqeane dhe dete, në cdo cep të globit, lufton piraterinë dhe kryen misionet humanitare, gjitha këto janë pjesë përbërëse e detyrave të Flotës amerikane, {kujtojmë lexuesit se viktimave të tërmeteve të ndodhura në ishujt Malajzi-Indonezi e gjetkë, vitet e fundit,  ishte e para Flota amerikane që i erdhi në ndihmë}. Këto përgjegjësi të mëdha kërkojnë nga anëtarët e ekuipazhit të cdo anije që të jenë gjithmonë të gatshëm për të vepruar. Për të njohur më mirë këtë mision fisnik mbarëkombëtar “Businessinsider” ka publikuar disa foto fantastike të Marinës amerikane të realizuara gjatë operacioneve të zhvilluara natën. {SH.K}.


Kosova, mikpritëse e mbledhjeve vjetore të Konstituencave të FMN e BB

by

Foto Gazeta DIELLI – Behlul Jashari: Kryeqyteti i Kosovës, Prishtina, në mbrëmje pret vizitën e Përfaqësuesve të Konstituencave të Fondit Monetar Ndërkombëtar dhe Bankës Botërore/

-Ceremonia e pritjes protokollare në Prishtinë me rastin e vizitës së Përfaqësuesve të Konstituencave të Fondit Monetar Ndërkombëtar dhe Bankës Botërore zhvillohet në ora 19:00/

PRISHTINË, 5 Maj 2016-B.Jashari/.-Ministria e Financave dhe Banka Qendrore e Kosovës do të organizojnë sot në mbrëmje pritje protokollare me rastin e vizitës së Përfaqësuesve të Konstituencave të Fondit Monetar Ndërkombëtar dhe Bankës Botërore. Ceremonia e pritjes zhvillohet në ora 19:00.

 “Për herë të parë pas anëtarësimit të Kosovës në Fondin Monetar Ndërkombëtar dhe në Bankën Botërore në vitin 2009 si anëtare me të drejta të plota, në Prishtinë do të zhvillohen punimet e mbledhjeve vjetore të Konstituencave të Fondit Monetar Ndërkombëtar dhe Bankës Botërore. Punimet e Konstituencave të FMN-së dhe Bankës Botërore po organizohen nga Ministria e Financave si dhe Banka Qendrore e Kosovës”, bëri të ditur për Gazetën Dielli ministria kosovare.

 Pritja e përfaqësuesve  të Konstituencave të Fondit Monetar Ndërkombëtar dhe Bankës Botërore do të bëhet nga ministri i Financave Avdullah Hoti dhe guvernatori i Bankës Qendrore të Kosovës Bedri Hamza.

Ministri Hoti dhe Guvernatori Hamza takuan dje drejtorin ekzekutiv të Bankës Botërore, Franciskus August Godts, me të cilin  kanë diskutuar për marrëdhëniet bilaterale. Të dyja palët u pajtuan se bashkëpunimi i deritanishëm është i shkëlqyer dhe u zotuan për vazhdimin e bashkëpunimit edhe në të ardhmen.

 Drejtori Ekzekutiv i Bankës Botërore Franciskus August Godts po qëndron në Prishtinë si pjesë e delegacionit të Bankës Botërore, me rastin e mbledhjes së Konstituencës në të cilën bënë pjesë edhe Kosova, që pritet të fillojë të premten, në 6 maj 2016.