Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Turizmi kosovar promovohet në Paris

by

PRISHTINË, 17 Mars/.- Ministria e Tregtisë dhe Industrisë në kuadër të promovimit të turizmit dhe vlerave turistike që ofron Kosova, së bashku me operatorë turistikë vendor janë duke marrë pjesë në panairin e turizmit “Destination Nature”, i cili po mbahet në Paris të Francës.

Në komunikatën për media të MTI-së, thuhet se prezantimi i bukurive natyrore, vlerave kulturore si dhe aktiviteteve të ndryshme, kanë zgjuar vëmendjen e shumë vizitorëve, të cilët kanë ndaluar te stenda e Kosovës në panair.

“Interesimi për vendin tonë gjatë këtij panairi është i konsiderueshëm edhe nga ana e operatorëve turistikë të cilët po shfaqin një interes të veçantë për Kosovën si destinacion turistik”, thuhet në komunikatën e MTI-së.

Panairi “Destination Nature”, është një prej panaireve më të rëndësishme në fushën e turizmit, në veçanti udhëtimit dhe aktiviteteve në natyrë.

“Pjesëmarrja e Kosovës në këtë panair vjen si rezultat i bashkëpunimit dhe mbështetjes së përbashkët nga Ministria e Tregtisë dhe Industrisë, përkatësisht Agjencia për Investime dhe Përkrahjen e Ndërmarrjeve në Kosovë (KIESA), me Ambasadën e Francës në Kosovë, USAID-Empower Project dhe Swisscontact-PPSE”, thuhet më tej në komunikatë.

Në kuadër të panairit do të bëhet edhe promovimi i guidës turistike për Kosovën të Petit Fute, në gjuhën frënge. Panairi i Turizmit “Destination Nature” mbahet në Paris të Francës nga data 17 – 20 Mars 2016./KosovaPress

Dyshime për një varr masiv të diktaturës

by

Punëtorët e një firme ndërtimi gjetën disa ditë më parë në afërsi të Pogradecit mbetjet mortore të një varri që dyshohet si varr masiv, pasi gjendet pranë një poligoni stërvitor të ish-ministrisë së brendshme të diktaturës komuniste.

Zyrtarët ende nuk mund të deklarojnë nëse ky është apo jo një varr masiv derisa ekspertiza të bëjë punën e vet, ndërsa mbetjet mortore u sollën në kryeqytet për të parë nëse u përkasin një ose më shumë personave.

Dyshimi se ky mund të jetë një varr masiv lidhet me faktin se ai u gjet pranë ish poligonit të qitjes së ministrisë së punëve të brendshme gjatë diktaturës në Pogradec dhe pranë një lumi të zonës. Kjo është një skemë e ngjashme me 32 mijë pikat e tjera të ekzekutimeve masive, që u kryen nga diktatura komuniste në të gjithë territorin.

Drejtori i përgjithshëm i Institutit për Integrimin e të Përndjekurve Politikë, Bilal Kola, thotë se Instituti ka përgatitur një hartë me 32 mijë pikat e ekzekutimeve që bënte diktatura dhe shumica e tyre janë pranë një lumi dhe një insitucioni të diktaturës.(Ilirian Agolli VOA)

Zoti Kola thotë se nga fillimi i viteve 90 janë gjetur dhjetëra varre masive deri tani, por asnjëherë ato nuk janë studiuar profesionalisht nga një strukturë shtetërore me analiza shkencore ADN, por janë kryer me nisma private.

Shqipëria ka ende rreth 6 mijë persona të zhdukur gjatë diktaturës komuniste. Ata janë të pushkatuar me gjyq dhe pa gjyq, si dhe të burgosur, që kanë ndërruar jetë nëpër qeli dhe kampe, që nuk u janë dhënë familjarëve.

Për rastin e Pogradecit ekspertiza është siguruar, tani po kërkohen fonde dhe interesimi i familjarëve është i madh për të gjetur njerëzit e tyre, duke dhënë kampione ADN.

Verifikimi i mbetjeve mortore duhet kryer me analiza ADN të krahasuara me familjarë sa më të afërt me viktimat.

Këtë proces Shqipëria vetë nuk e kryen dot plotësisht dhe për ta cuar përpara zbulimin nevojiten fonde shtetërore.

Autoritetet kanë marrë mbështetjen e Komisionit Ndërkombëtar për gjetjen e të Zhdukurve, i cili ka kryer me sukses gjetjen e të zhdukurve në Kroaci, Bosnje, Kosovë dhe shumë vendet ë tjera.

Zona pranë lumit Terhan në Pogradec është përdorur si poligon stërvitor nga ministria e brendshme për shumë vite gjatë kohës së diktaturës.

Ashtu si edhe shumë poligone të tjera, ai u përdor si vend ekzekutimesh për kundërshtarët e regjimit komunist.

Një nga dyshimet kryesore është se aty mund të jenë ekzekutuar pa gjyq persona që kapeshin në përpjekje për t’u arratisur nga kufiri i Maqedonisë.

Viktimat e pushkatuara aty mund të jenë persona të humbur nga e gjithë Shqipëria.

Poligonet anës lumenjve shërbenin për të groposur të pushkatuarit buzë ujit dhe për të humbur gjurmët sa më shpejt, pohojnë dëshmitarët dhe studiuesit e asaj periudhe të errët të diktaturës komuniste.

Mogherini-Mustafa: Promovim progresit në axhendën BE-Kosovë

by

-Kryeministri Mustafa u takua me Përfaqësuesen e Lartë për Punë të Jashtme të BE-së, Federica Mogherini, e cila tha se shpreson që dialogu i gjithëpërfshirës politik do të ndihmoj në tejkalimin e ngërçit në Kuvendin e Kosovës në periudhën e ardhshme/

Bruksel, 17 mars 2016/ Kryeministri i Republikës së Kosovës, Isa Mustafa, është takuar sot në Bruksel me Përfaqësuesen e Lartë të BE-së për Punë të Jashtme dhe Politika të Sigurisë \ Zëvendëspresidente e Komisionit Evropian, Federica Mogherini, të cilën e joftoi për progresin e gjithanshëm në Kosovë.

 Njoftimi dëruar nga Brukseli thekson se, kryeministri Mustafa theksoi përmbushjen nga ana e Kosovës të rekomandimeve dhe kritereve për liberalizimin e vizave, duke shprehur besimin se BE së shpejti do të marr vendim pozitiv për liberalizimin e vizave për qytetarët e Kosovës.

 Gjatë takimit, është diskutuar për zhvillimet në Kosovë.

 Përfaqësuesja e Lartë, Mogherini tha se shpreson që dialogu i gjithëpërfshirës politik do të ndihmoj në tejkalimin e ngërçit në Kuvendin e Kosovës në periudhën e ardhshme.

 Mustafa dhe Mogherini vlerësuan progresin e vitit të kaluar në marrëdhëniet në mes Bashkimit Evropian dhe Kosovës, duke pas parasysh që Marrëveshja për Stabilizim Asociiim do të hyj në fuqi nga 1 prilli.

Mogherini theksoi rëndësinë e kësaj marrëdhënie të parë kontraktuale në mes të BE-së dhe Kosovës, dhe ripërsëriti përkushtimin e saj për të punuar me kryeministrin Mustafa dhe autoritetet në Kosovë për të promovuar progresin e mëtutjeshëm në axhendën BE-Kosovë.

 Ajo konfirmoi gatishmërinë e BE-së për të ecur përpara me liberalizimin e vizave për Kosovën, pas përmbushjes së kushteve./b.j/

**********

Në linkun me poshtë mund të gjeni videon nga takimi i kryeministrit të Republikës së Kosovës, Isa Mustafa, me Përfaqësuesen e Lartë të BE-së për Punë të Jashtme dhe Politika të Sigurisë \ Zëvendëspresidente e Komisionit Evropian, Federica Mogherini.

http://ec.europa.eu/avservices/video/player.cfm?sitelang=en&ref=I118375

Kompania nga Kosova nderohet me çmim në SHBA

by

Kompania nga Kosova, KEDS, e cila merret me shpërndarjen e energjisë elektrike, mori dje në Uashington një çmim për angazhimin e saj në trajnimin dhe punësimin e të rinjve në Kosovë. Përfaqësuesit e Kompanisë ishin të martën në Uashington ku morën çmimin për kontributin e tyre në shoqëri nga Klubi Kombëtar i Shtypit.

Si pjesë e përgjegjësisë ndaj shoqërisë, kompania e Shërbimit të Shpërndarjes së Energjisë në Kosovë, KEDS në vitin 2014 krijoi projektin Akademia KEDS. Ky projekt çdo vit organizon trajnime për studentët e universiteteve të Kosovës dhe shkollës së mesme “Hasan Prishtina” në Prishtinë. Kompania përmes një konkursi të hapur zgjedh 50 studentë të inxhinierisë elektrike, të cilët më pas i trajnon për një vit. Pas mbarimit të kursit të trajnimit, shumica e studentëve punësohen nga kompania KEDS. Dëri më tani 75 nga 100 studentë që kanë mbaruar këtë program, janë punësuar nga kompania.

“Kjo është pjesa më e mirë e programit. Të gjithë në Kosovë e dinë se niveli i papunësisë është tepër i lartë sidomos mes të rinjve, 60 për qind e tyre janë të papunë. Unë besoj se ne jemi në rrugën e duhur”, thotë Serhat Inç, nismëtar dhe themelues i projektit Akademia KEDS.

Për angazhimin në këtë projekt firma KEDS u nderua me një çmim nga Klubi Kombëtar i Shtypit në Uashington. Në ceremoninë e ndarjes së çmimeve morën pjesë dhjetëra kompani dhe organizata amerikane e ndërkombëtare të cilat kanë dhënë kontribute të ndryshme për shoqërinë. Sipas organizatorëve të kësaj ceremonie, nderimi me çmime ka për synim të nxisë angazhimin e kompanive dhe organizatave për të bërë ndryshime pozitive në shoqëritë e vendeve në të cilat ato operojnë. “Në një kohë kur retorika politike, dhe problem të tjera të ditës mbizotërojnë diskursin publik, është mirë që të kujtojmë kontributin e mirë që shumë organizata dhe kompani japin për çështje për shoqërinë”, tha në hapje të ceremonisë, prezantuesi i Klubit Kombëtar të Shtypit.

Menaxherja e Departamentit për Marrëdhënie me Publikun në KEDS, Naxhije Arifaj, thotë se kompania do të vazhdojë anagazhimin e saj në këtë drejtim.

“Çmimi ka një domethënie të veçantë për ne, për programin tonë KEDS Academy. Në të vërtetë, është një shtysë shumë e madhe, një motivim për ne që të vazhdojmë tutje, ta avancojmë programin tonë në të mirë të rinisë kosovare, por mbi të gjitha në të mirë të shtetit të Kosovës”.

Kompania KEDS në vitin 2013 është blerë nga kompanitë turke Çalik dhe Limak të cilat kanë investuar në infrastrukturën dhe mirëmbajtjen e rrjetit shpërndarës të energjisë në Kosovë. Drejtori i KEDS, George Karagutoff thotë se pavarësisht se Kosova ka burime të pasura energjie, mungesa e investimeve në infrastrukturën energjetike po dëmton nivelin e prodhimit të energjisë në vend.

“Për shkak të vjetërsisë së sistemit të prodhimit vendas të energjisë, i cili shpesh përballet me prishje, Kosova një vend i pasur me linjit, detyrohet të përmbush nevojat e saj përmes importit të energjisë elektrike. Ne kemi bërë përparim në përmirësimin e rrjetit të shpërndarrjes së energjisë brenda vendit dhe në rrjetin e importit të energjisë. Ne duhet të balancojmë shumë sektorë në mënyrë që të sigurohemi që sistemi i energjisë në vend të funksionojë dhe çmimi i energjisë elektrike të ulet”.

Megjithëse, Kosova vazhdon të përballet me probleme në sistemin e energjisë elektrike drejtuesit e kompanisë KEDS besojnë se përmes investimeve të duhura vendi mund krijojë një sistem të qëndrueshëm të prodhimit të energjisë, i cili mund të ndihmojë edhe në zbutjen e papunësisë në vend.(VOA)

VATIKAN: Audienca e përgjithshme: Shqipëria, përsëri në këmbë, pas persekutimit

by

… Shprehje e  re e afërsisë shpirtërore të Papës me Shqipërinë e shqiptarët, që, me martirizimin, besnikërinë e  qëndresën e tyre  ia fituan zemrën gjatë shtegtimit të tij apostolik në trojet tona.  Vetëm një ditë pas njoftimit aq të pritur: Nënë Tereza do të shpallet Shenjte të dielën e 4 shtatorit 2016”. ../

Sot në audiencën e përgjithshme të së mërkurës, gjatë katekizmit kushtuar “Mëshirës e ngushëllimit”, Papa foli për mjerimin e popullit të Izraelit në mërgim. E quajti përvojë shkatrrimtare. Feja e besimtarëve – kujtoi – nisi të lëkundej, sepse në dhe të huaj ishin pa tempull, pa kult, njerëz që kishin lënë pas vendin e tyre të shkatërruar. Vështirë e kishin, prandaj, ta ruanin fenë e të besonin në mirësinë e në mëshirën e Zotit.

E  duke vijuar të kujtojë Izraelin e mërguar e të rrënuar, mendimi i Papës, me një paralelizëm prekës, shkoi në Shqipëri. Tek një popull tjetër i vogël, që gjithashtu e pati tepër vështirë ta ruante fenë e të besonte, edhe në rrethana mosbesimi, në mirësinë e në mëshirën e Zotit.

Duke u shkëputur nga teksti zyrtar, Françesku shtoi:

“Më shkon mendja tek Shqipëria fqinje që, pas shumë persekutimi e shkatërrimi, ia doli mbanë të ngrihet përsëri në dinjitet e në fe. Kështu kishin vuajtur edhe izraelitët në internim”. Shprehje e  re e afërsisë shpirtërore të Papës me Shqipërinë e shqiptarët, që, me martirizimin, besnikërinë e  qëndresën e tyre  ia fituan zemrën gjatë shtegtimit të tij apostolik në trojet tona.  Vetëm një ditë pas njoftimit aq të pritur: Nënë Tereza do të shpallet Shenjte të dielën e 4 shtatorit 2016”. (Koretezi:Radio Vatikani)