Komente – Page 349 – Dielli

Venecia miraton opinionin për reformën: Tani fjalën e ka Kuvendi

March 11, 2016 by dgreca

Komisioni i Venecias miratoi sot draftin përfundimtar të reformës në drejtësi duke e lënë topin në fushën e politikës shqiptare për kalimin e saj.Delegacioni i Bashkimit Europian në Shqipëri përmes rrjeteve sociale konfirmoi miratimin e raportit. “Komisioni i Venecias miratoi opinionin përfundimtar për reformën në drejtësi dhe falenderoi delegacionin e BE-së për mbështetjen dhe bashkëpunimin. Tashmë është përgjegjësi e Parlamentit të bëjë reformën historike në drejtësinë që kërkojnë qytetarët shqiptarë”, thuhet në njoftimin e delegacionit të BE-së në Tiranë.Raporti përfundimtar i Venecias është ‘zyrtarizim’ i draftit të ndërmjetëm të bërë publik në fillim të këtij muaji. Top-Channel siguroi dokumentin prej 20 faqesh të draftit të ndërmjetëm, nga ku ekspertët e Venecias kanë renditur konkluzionet përfundimtare. Debateve të forta politike, se cili do të jetë fati i mëtejshëm i Prokurorit të Përgjithshëm, Adriatik Llalla pas miratimit të reformës, Venecia u jep këtë verdikt:

“Nëse prokurori i përgjithshëm kalon procesin e vetingut dhe del i pastër prej tij, atëherë pyetja është se, ku qëndron justifikimi për ta larguar atë më përpara nga zyra, duke e veçuar nga mesi i të gjithë atyre zyrtarëve tek të cilët aplikohet vetingu? Në të tilla kushte, Komisioni i Venecias nuk shikon asnjë arsye për përfundim të parakohshëm të mandatit”, thuhet në paragrafin 81 të faqes 18 të opinionit.

Për zgjedhjen e 3 anëtarëve të Gjykatës Kushtetuese, të cilët i zgjedh Kuvendi, Venecia rekomandon: “Duke marrë në kosideratë krijimin e vendeve vakante në Gjykatën Kushtetuese, Komisioni rekomandon krijimin e një rregulli zgjedhjeje me shumicë të cilësuar për 3 anëtarët e Gjykatës Kushtetuese që zgjidhen nga Parlamenti”, thuhet në paragrafin 39, faqja 9.

Venecia rekomandon se i duhet kushtuar vëmendje mënyrës së zgjedhjes së organeve të reja në drejtësi. “Nëse forcat politike të përfshira në këtë proces nuk dakortësohen për zgjedhjen me shumicë të cilësuar, anëtarët e 3 institucioneve të reja duhet të synojnë një opsion të ri, që i garanton opozitës përfaqësim në të gjitha këto institucione, apo një model tjetër i cili do t’i sigurojë opozitës një influencë të caktuar në procesin e zgjedhjes”, sugjeron opinioni.

Ekspertët e Venecias kërkojnë bërjen kujdes me procesin e vetingut për gjykatësit dhe prokurorët. “Komisioni Special i Kualifikimit dhe gjykatësit e Këshillit Special të Kualifikimit janë përgjegjës për procesin e vetingut, i cili do të jetë 9 vjet pa të drejtë ribërjeje. Ndërsa i gjithë procesi i vetingut supozohet të zgjasë 11 vjet, apo më pak nëse Shqipëria do t’i bashkohët BE-së në një datë të mëhershme. Kjo kohështrirje është e gjatë. Komisioni e pranon nevojën e vetingut, por me kushtin se duhet të jetë diçka e jashtëzakonshme dhe në mënyrë strikte, një masë e përkohshme. Komisioni i Venecias nuk është në pozicion të parashikojë se sa kohë nevojitet për të kaluar në sitë një gjyqtar apo një prokuror. Në rastet komplekse, procedura merr më shumë se 3 vjet, apo më gjatë”, thuhet në paragrafin 55 të faqes 12.

Opozita në draftin e saj ngulmon për zgjedhjen me 2/3-tat të organizmave të reja në drejtësi, ndërsa Venecia mendon se: “Është e kuptueshme dëshira e opozitës për zgjedhjen me 2/3-tat, megjithatë Komisioni i Venecias në raportin paraprak nuk rekomandoi 2/3-tat. Të dyja shumicat e cilësuara janë legjitime dhe një metodë zgjedhjeje e propozuar në draftin e rishikuar. 3/5-tat në parim është një zgjidhje e pranueshme. Edhe kërkesa e zgjedhjes me 2/3-tat e votave në të cilën opozita insiston se mund të jetë inefiçente për t’ja arritur qëllimit, siç tregon shembulli në Hungari. Kërkesa e 2/3-tave pa një mekanizëm efiçent zhbllokues mund të sjellë çimentim e si pasojë rrezikimin e procesit të reformës. Komisioni nënvizon se nuk është detyrë e tij të bëjë propozime specifike kushtetuese për zgjedhjen e Këshillit të Lartë të Drejtësisë”, thuhet në paragrafin 14 të faqes 5 të opinionit. Venecia i tërheq vëmendjen autoriteteve shqiptare në bërjen kujdes në mos kthimin e ndryshimeve kushtetuese në një “precedent” përgjimesh të pafundme nga shërbimi sekret për njerëzit e drejtësisë. TCH

Kosovë-USAID-i, partner për fuqizimin e sistemit të drejtësisë

March 11, 2016 by dgreca

-Këshilltari i Përgjithshëm i Agjencisë së Shteteve të Bashkuara për Zhvillim Ndërkombëtar, John Simpkins, theksoi se USAID do të jetë gjithnjë në pozicion të ndihmojë Kosovën në zgjidhjen e problemeve dhe do të kontribuojë në fuqizimin e sektorit të drejtësisë/

PRISHTINË, B.Jashari/Ministri i Drejtësisë në qeverinë e Kosovës, Hajredin Kuçi ka pritur sot në takim Këshilltarin e Përgjithshëm të Agjencisë së Shteteve të Bashkuara për Zhvillim Ndërkombëtar, John Simpkins dhe përfaqësues nga zyra e USAID të udhëhequr nga drejtori i këtij misioni, James Hopes, me të cilët ka diskutuar për prioritetet në fushën e sundimit te ligjit. Gjatë këtij takimi, ministri Kuçi i ka njoftuar rreth të arriturave në sistemin e drejtësisë, ndërsa është përqendruar në konsolidimin e kornizës ligjore dhe përmirësimin e infrastrukturës fizike për personelin gjyqësor dhe prokurorial.

Ministri Kuçi gjithashtu e ka njoftuar Simpkins për fokusin e veçantë të këtij mandati në avancimin e fushës civile. “Puna e Ministrisë së Drejtësisë gjatë këtij mandati po përqendrohet në konsolidimin e kornizës ligjore për të drejtat pronësore dhe hartimin e kodit të parë civil të Republikës së Kosovës”, tha ai. Ministri Kuçi dhe Këshilltari i Përgjithshëm Simpkins gjithashtu diskutuan për projektet e përbashkëta që ka Ministria e Drejtësisë me USAID-in dhe kontributin e USAID-it në fuqizimin e sundimit të ligjit në Kosovë. Këshilltari i Përgjithshëm i Agjencisë së Shteteve të Bashkuara për Zhvillim Ndërkombëtar, John Simpkins falënderoi ministrin Kuçi për punën e bërë dhe theksoi se ky bashkëpunim dhe marrëdhënia e ndërtuar gjatë kësaj kohe do të vazhdojë të jetë funksionale dhe të rritet. Simpkins gjithashtu theksoi se USAID do të jetë gjithnjë në pozicion të ndihmojë Kosovën në zgjidhjen e problemeve dhe do të kontribuojë në fuqizimin e sektorit të drejtësisë.

Përvoja e Gardës së New Jersey-it

March 11, 2016 by dgreca

Përvoja e Gardës së New Jersey-it për ruajtjen e mjedisit dhe trajtimin e mbetjeve në ambientet ushtarake e civile/

Nga Shefqet Kërcelli/

Në zbatim të planit të bashkëpunimit midis Forcave tona të Armatosura dhe Gardës Kombëtare të New Jersey-it, një ekip i kësaj Garde i përbërë nga zoti Chuck Appleby dhe N/Kolonele Viviene McNamara, nga data 8 deri më 11 mars 2016, zhvilluan një vizitë në Repartet kryesore të FA Shqiptare. Qëllimi i kësaj vizite është njohja me gjendjen e infrastrukturës së reparteve dhe punën që bëhet nga efektivat e Forcave tona të Armatosura për mirmbajtjen e tyre mjedisore dhe procesin e menaxhimit të mbetjeve. Më datën 8 mars, ushtarakët amerikanë vizituan Komandën e Forcës Detare, ku u pritën nga Zv/Komandanti i Forcës Detare, Kapiten i Rangut të I-rë Adnand Agastra dhe kuadro të shtabit të FD. Mbasi i uroi mirëseardhjen, Kapiten Agastra, fillimisht vlerësoi bashkëpunimin shumëvjecar të FA me Gardën Kombëtare të New Jersey-it si dhe ndihmën konkrete që ka përfituar Forca Detare nga ky bashkëpunim. Më pas Ai i njohu specialistët amerikanë me punën, strukturat dhe mjetet në dispozion të FD për mirmbajtjen e mjedisit dhe infrastrukturës jo vetëm në bazat e FD, por dhe mjedisin detar. Ndërkohë personeli i Forcës Detare gjatë vitit 2015, ka kryer disa operacione në ndihmë të komunitetit për pastrimin e mjedisit si në tokë dhe në det, theksoi zoti Agastra. Specialistët amerikanë të mjedisit vlerësuan masat organizative dhe teknike që ka zbatuar Komanda dhe repartet e FD për ruajtjen e mjedisit brenda kazermave dhe në teatrin detar. Në vijim të vizitës në FD, specialistët amerikanë vizituan Vendbazimin e Kepit të Palit. Këtu kolegët amerikanë panë anijen antindotje “Rodoni”, të destinuar për operacionet në det si dhe u njohën me gjendjen e infrastrukturës së vendbazimit të Kepit të Palit dhe trajtimin e mbetjeve mjedisore. Gjithashtu ata vizituan dhe godinën e Komandës së këtij vendbazimi, ku u njohën më historikun 45 vjecar të bazës së Kepit të Palit dhe traditën e detarisë së popullit tonë në vite. Mbas largimit nga Vendbazimi i Kepit të Palit, specialistët amerikanë bënë një vizitë të shkurtër në qytetin e Durrësit ku u njohën me disa objekte muzeale të këtij qytetit të lashtë, por dhe me bukuritë e resurset turistike të lagjes së vjetër dhe bregdetit të tij. Në zbatim të programit specialistët e Gardës së New Jersey-it vizituan dhe Reparte të Forcës Tokësore, Ajrore dhe Mbështetëse të FA, ku shkëmbyen eksperiencën në lidhje me trajtimin e mbetjeve në kazermat e tyre. Më datën 10 mars, në Qendrën e Menaxhimit të Materialeve dhe Laboratorin Qendror të FA, u zhvillua seminari me temë:-Trajnimi i personelit në mirëmbajtjen e infrastrukturës dhe mjedisit në FA, procedurat që ndiqen për mbylljen e bazave dhe procesi i menaxhimit të mbetjeve”. Në këtë seminar morën pjesë specialistët e mjedisit nga cdo Forcë dhe personel të strukturave përkatëse të FA. Bazuar në përvojën e tyre disavjecare zoti Appleby dhe N/Kolonele McNamara, sollën në vemëndjen e specialistëve tanë gjithë procedurat që ndiqen në Gardën Kombëtare të New Jersey-it për menaxhimin e mbetjeve të ndryshme në ambientet ushtarake dhe civile ku operojnë strukturat ushtarake. Specialistët amerikanë shpjeguan me detaje të gjitha procedurat që ndiqen për menaxhimin e mbetjeve që shkaktojnë ndotje të ajrit, mbetjeve të rrezikshme, të lëngshme e të ngurta, ato natyrale, trajtimin e mbetjeve kulturore-historike, pesticidet, hidrokarburet, mbetjet radioaktive, kimike, toksike, përpunimi i ujërave të ndotura, mënjanimin e zhurmave dhe ndotjes akustike gjatë trajtimit të tyre, hartimi i politikave efikase për menaxhimin e mbetjeve mbas suprimimit të reparteve ose operacioneve të ndryshme ushtarake, etj. Niveli teorik i gërshetuar me eksperiencën e pasur dhe metodologjinë pedagogjike solli që pjesmarrësit të përfitojnë gjerësisht nga përvoja e Gardës Kombëtarë të New Jersey-it në praktikat që përdoren për mbajtjen në kontroll të mjedisit. Gjithashtu gjatë seminarit u shkëmbyen mendime për trajtimin e rasteve konkrete në repartet tona, eleminimin e tyre, mbështetjen financiare si dhe përpjekjet për hartimin e masave ligjore dhe administrative për gjithë ndotësit e mjedisit në cdo ambient ushtarako-civil. Në zbatim të standarteve në kuadrin e NATO-s, Forcat tona të Armatosura kanë një plan masash për menaxhimin e mbetjeve të ndryshme në infrastrukturën dhe ambientet ushtarake. Pikërisht përvoja që sollën specialistët e Gardës Kombëtare të New Jersey-it i shërbeu më së miri realizimit të synimeve e objektivave që kanë Forcat tona të Armatosura në lidhje me këtë cështje. Duke e parë më larg, eksperienca dhe aktivitete të tilla janë pjesë e atij programi të madh që presidenti Obama dhe Shtëpia e Bardhë kanë hartuar për ndryshimet klimaterike dhe ruajtjen e mjedisit në planetin tonë. Së fundmi dua të sjell në vemendjen e lexuesve të “Diell-it” një fakt se, bashkëpunimi i Forcave tona të Armatosura me Gardën Kombëtare të New Jersey-it ka filluar që në vitin 1993, në kuadrin e PfP, në gjithë fushat. Ndërkohë që vendin tonë gjatë këtyre viteve e kanë vizituar të gjithë Komandantët e kësaj Garde, përfshi atë të janarit 2015, ku vendin tonë e vizitoi Gjeneralbrigade, Michael Cunniff. Në sajë të këtij bashkëpunimi të frutshëm, gjatë këtyre 23 viteve, Forcat tona të Armatosura kanë përfituar miliona dollarë ndihma në arësimimin e trajnimin e ushtarakëve shqiptarë, asistencë teknike, pajisje, etj. Mirënjohje dhe respekt për Gardën Kombëtare të New Jersey-it!

Shënim: Shkrimi do jetë pjesë e librit, “Bashkëpunimi ushtarak Shqipëri-Amerikë gjatë një shekulli”.

Ja si rekrutohen pjesëtarët e ISIS

March 11, 2016 by dgreca

Investigimi i televizionit britanik “Sky News” ka arritur të sigurojë mijëra dokumente që përmbajnë 22 mijë emra, adresa, numra telefonash dhe kontaktet e familjarëve të xhihadistëve të Shtetit Islamik. Para se të bashkohen me ISIS, shtetasit nga të paktën 51 vende të botës, ndrrojnë komplet identitetin e tyre. Por nuk mjafton kaq për t’u kthyer në një xhihadist. Ata bëhen pjesë e organizatës terroriste, vetëm pasi plotësojnë formularin me 23 pyetje të hartuar nga krerët e Kalifatit. Për autoritetet, shumica e emrave të përmendur janë të njohur. Ndër terroristët që rezultojnë në këto dokumente janë reperi 26-vjeçar nga Londra, Abdel Beri, po ashtu Junaid Hysein, i cili kishte planifikuar një sulm në Mbretërinë e Bashkuar së bashku me dhjetëra të tjerë, që shpesh janë bërë protagonistë të episodeve famëkeqe të ISIS, të cilat më pas kanë bërë edhe xhiron e botës. Por, risia e këtij investigimi është se bën një hap të madh përpara në zbardhjen e identitetit të një numri të madh xhihadistësh të panjohur më parë në Britaninë e Madhe, në të gjithë Europën Veriore, pjesën më të madhe të Lindjes së Mesme dhe Afrikën e Veriut, në Shtetet e Bashkuara si edhe ne Kanada. Megjithatë vendndodhja e tyre është më e rëndësishme se gjithçka, pasi ajo parandalon organizimin e sulmeve të mëtejshme terroriste.
Shumë prej tyre kanë shkelur në territoret e shteteve të ashtuquajtura “pikat e nxehta të xhihadit”, të tilla si Jemeni, Sudani, Tunizia, Libia, Pakistani dhe Afganistani, dhe në mungesë të monitorimit e kontrollit ata kanë patur mundësinë edhe për t’u kthyer në shtëpi, sikur të mos kishin bërë asgjë.(SHK)

Gjela Mhilli, 116 vjeçarja mirditorja nga Tarazhi

March 10, 2016 by dgreca

Nga Ahmet ZANI/Kjo e moshur, sic e shihni në Kartë Identitetit të saj mbanë mbi supe më shumë se një shekull jetë. Duket si e pabesuesueshme por Gjela Mhilli e cila jeton në fshatin Tarazh të Mirditës, ka festaur 116-vjetorin e lindjes së sajë. Ajo rezulton të jetë njeriu më i vjeter në Shqiperi por edhe në planet, ndërsa nga paraqitja ajo nuk të jep përshtypjen e viteve që mban mbi supe. Nënë Gjela e cila ka rreth 100 niper dhe mbesa ka kujtesë të fortë, shikon dhe dëgjon mirë, ushqehet pa ndihëm e të tjerëve dhe lëviz në oborrin e shtëpisë madje përpiqet të ushqejë dhe bagëtitë. Torta me mbishkrimin ” Urime në 116 vjetorin e lindjes ” ka qenë supriza më e bukur që miqtë dhe të afërm i kanë bërë kësaj të moshuare në këtë përvjetor. Ata kanë festuar me të, duke e uruar për ditëlindjen. Prej disa ditesh ajo qëndron në krevat, përshkak të një viroze gripalë, ndërsa shprehet se për herë të parë në trupin e sajë do të provonte barnat që i ka sygjeruar mjeku, nga gjendja gripale që ajo kalonte, por dhe nga problemet e shikimit. Historia e kësaj nëne të rrallë është e pafundme nga sa tregon, ndërsa shprehet mjaft e gezuar në këtë 116-vjteor të lindjes “Sistemi i Enver Hoxhës ishte më i mirë sa i përket qetësisë. Berisha ka një gabim të madh, nën pushtetin e tij janë armatosur popullata gjë e cila e ka shqetësuar më së shumti atë. Sistemi i shtetit mbretëror në kohën e Zogut ishte shume i varfër dhe kam vuajtur për buken e gojes. Jam ushqyer duke ngrënë disa llojë gjethes si hithrat, apo dhë rrënjë që gjindeshin në këta zona. Unë sot jamë shumë e gëzuar që sot mes të afërmve të mi, po festoj ditelindjen” thotë Nënë Gjela Tashmë kjo nënë e rrallë do të përfitojë pension prej 5 mijë lekësh si fenomeni i moshës së lartë, pasi asnjëherë nuk ka përfituar pension pleqërie ngaqë nuk ka patur mardhënje pune.Ajo ka mbajtur familjen e saj duke rritur fëmijet, por dhe niperit dhe mbesat e sajë. Gjoka është fëmija i dytë i Gjelës pasi më i madhi nuk jeton dhe ai duhej të ishte sot plot 96 vjeç, ndërsa Gjoka është 75 vjeç i cili tregon për nënën e tijë duke rrëfyer se është një rast shumë i rrallë. “Ka kaluar një jotë plot me mundime dhe vuajtje. Babai im ka vdekur në një moshë shumë të re dhe nëna na ka rritur jetima. Dua të them se ajo gëzon shëndet të mirë dhe nuk ka probleme, ndërsa kur e shikoj duke lëvizur kam një gëzim shumë të madh. Hera e parë që po ajo po konsumon ilaçe është kjo periudhe përshkak të një viroze gripale. Ajo është ushqyer në hithra dhe gjethe dhe ato kanë një veti shumë të mire në shëndetin e njeriut” u shpreh Gjok Mhilli i biri i Gjeles Moshen e kësaj të moshuare e dëshmon edhe karta e identitetit të sajë me të cilen është pajisur në vitin 2015. Madje në zgjedhjet vendore të vitit të kaluar nënë Gjela ka votur.