Komente – Page 405 – Dielli

MARRËVESHJA E BRUKSELIT , JA PËRFITIMET E QYTETARËVE TË KOSOVËS DHE SHTETIT

August 13, 2015 by dgreca

MINISTRIA PËR DIALOG: PËRFITIMET PËR QYTETARËT DHE SHTETIN NGA MARRËVESHJA E BRUKSELIT PËR NJOHJEN RECIPROKE TË SIGURIMEVE TË AUTOMJETEVE/
PRISHTINË, 13 Gusht 2015/ Ministria për Dialog njofton opinionin lidhur me përfitimet për qytetarët dhe shtetin nga Marrëveshja e Brukselit për njohjen reciproke të sigurimeve të automjeteve.
Marrëveshja e Brukselit për njohjen reciproke të sigurimeve të automjeteve e njohur si Memorandum i Mirëkuptimit (MM) për njohjen reciproke të sigurimeve të automjeteve mes Republikës së Kosovës dhe të Serbisë është nënshkruar me 23 qershor në Bruksel, ku si palë lehtësuese dhe garantuese është nënshkruar nga Byroja Evropiane e Sigurimeve dhe Bashkimi Evropian. Kjo Marrëveshje ka hyrë në fuqi dje me datën 12 gusht 2015.
Marrëveshja në fjalë shënon një hap përpara drejtë normalizimit të marrëdhënieve ndërshtetërore mes Kosovës dhe Serbisë me ndërmjetësimin e Bashkimit Evropian. Rëndësia e kësaj marrëveshje është e shumëfishtë për qytetarët dhe shtetin dhe përfitimet janë si në vijim:
Përfitimet për qytetarët e Republikës së Kosovës
1. Qytetarët lirohen nga pagesa shtesë për sigurimin e automjetit (policën e sigurimeve) gjatë kalimit në Serbi.
2. Qytetarët tani kalojnë në Serbi me të njëjtin policë të sigurimeve të cilët e përdorin gjatë kalimit në Maqedoni.
3. Qytetarët duhet ti drejtohen kompanive të sigurimeve prej nga e kanë blerë policën e sigurimeve për Maqedoni, në mënyrë që të pajisen me formularin e ri të policës së sigurimeve, në të cilën shënohet që vlen edhe për Serbi. Ky shërbim bëhet pa pagesë nga ana e kompanive të sigurimeve. ( Shih formularin e bashkangjitur)
4. Lirimi nga pagesa shtesë për sigurimin e automjeteve gjatë kalimit në Serbi është i plotë. Kjo do të thotë se qytetarët e Republikës së Kosovës NUK KANË NEVOJË MË TË BËJNË PAGESA SHTESË gjatë kalimit në Serbi. Prandaj qytetarët e Republikës se Kosovës për të hyrë në Serbi nuk do të paguajnë më në kufi sigurim për territorin e Serbisë, i cili ishte për 1 muaj – 105 €, ndërsa për 1 vit 600 €.
5. Prandaj, përftimet konkrete nga kjo marrëveshje janë se qytetarët nuk do shpenzojnë më 600 euro në vit ose 105euro në muaj për të blerë policën e sigurimeve për të hyrë në territorin e Serbisë.
6. Spekulimet mediale se qytetarët do të paguajnë 40 euro për sigurim të automjeteve gjatë kalimit në Serbi, nuk janë të vërteta. Sepse kjo shumë prej 40 eurosh është çmimi për një policë të sigurimeve për një automjet për periudhën një vjeçare, të cilën qytetarët e kanë blerë për të hyrë në Maqedoni dhe tani kjo policë e njëjtë do të vlejë edhe për të hyrë në Serbi.
7. Byroja Kosovare e Sigurimeve ka hapur dy pikat shitëse në pikëkalimet kufitare Jarinje dhe Bërnjak për herë të parë pas vitit 2011, gjë e cila është mundësuar në saje të kësaj Marrëveshje.

Përfitimet për shtetin e Kosovës

1. Marrëveshja për njohjen reciproke të sigurimit të automjeteve (policave të sigurimeve) mes dy shteteve, Kosovës dhe Serbisë, ka një rëndësi të veçantë politike sepse shënon një hap përpara në vendosjen e marrëdhënieve ndërfqinjësore mes Kosovës dhe Serbisë që është një standard evropian në rrugën e integrimit evropian për Kosovën.
2. Marrëveshja në fjalë nënkupton njohjen e policave të sigurimeve të Republikës së Kosovës nga ana e Serbisë, dhe bazohet në parimin e reciprocitetit, që ndër tjerash nënkupton se qytetarët e të dyja shteteve janë liruar nga pagesa shtesë dhe se mund të udhëtojnë me policat e sigurimeve të cilat i disponojnë për kalime jashtë shtetit.
3. Kjo marrëveshje është sidomos e rëndësishme për shqiptarët e Luginës së Preshevës të cilët janë liruar nga pagesa shtesë për sigurimin e automjeteve të tyre gjatë hyrjes në Kosovë, pagesë kjo që është subvencionuar nga Qeveria e Kosovës për të liruar shqiptarët e Luginës nga kjo ngarkesë financiare. Me këtë rast, Qeveria e Kosovës po ashtu lirohet nga kjo barrë e subvencionimit.
4. Roli i Byrosë evropiane të sigurimeve për ndërmjetësimin dhe garantimin e kësaj Marrëveshje ka hapur perspektiva të reja të bashkëpunimit mes Byrosë Kosovare të Sigurimeve dhe Byrosë Evropiane të Sigurimeve, dhe kjo do të ndihmojë edhe në anëtarësimin e Kosovës në këtë organizatë.
5. Roli i Bankës Qendrore në arritjen dhe zbatimin e Marrëveshjes në fjalë si rregullator në fushën e sigurimeve kufitare ka qenë qenësor duke dëshmuar seriozitetin e shtetit të Kosovës në marrjen e përgjegjësive shtetërore për përmirësimin e jetës së qytetarëve dhe lirisë së lëvizjes për ta.
Sqarim shtesë/
Marrëveshja për sigurimin e automjeteve nuk trajton çështjen e targave të automjeteve por vetëm çështjen e njohjes e policave të sigurimeve të automjeteve mes dy shteteve, Kosovës dhe Serbisë. Çështja e targave/tabelave të automjeteve është pjesë e Marrëveshjes për lirinë e lëvizjes të arritur më 2 korrik 2011, me ç ‘rast pala serbe ka pranuar që të lejojë kalimin nëpër territorin e shtetit të saj vetëm të automjeteve me targat KS ndërsa edhe për kundër trysnisë tonë dhe të BE-së ende nuk i pranon targat e automjeteve me regjistrimet RKS dhe kjo për arsye të pastra politike edhe pse arsyetimi i palës serbe ka qenë se këtë nuk mund ta pranojnë për shkak se mund të jetë e ‘rrezikshme’ kalimi nëpër territorin e Serbisë me targat RKS. Marrëveshja për Lirinë e Lëvizjes bazohet në parimin e reciprocitetit dhe ia njeh të drejtën palës tonë që automjeteve me targat të shtetit serb tu kërkohet që ti zëvendësojnë ato me targa ‘provuese’ por ne nuk e kemi zbatuar atë pikë që të dëshmojmë që jemi njëmend për lëvizje të lirë dhe të eliminojmë pengesa dhe pagesa shtesë sidomos për qytetarët e Luginës së Preshevës.
Çështja e tabelave RKS, dhe tema tjera që janë pengesë e Lirisë së Lëvizjes për qytetaret dhe ngasësit e automjeteve të Kosovës, do të jetë temë diskutimi nga fillimi i shtatorit të këtij viti në Bruksel me kërkesën e Ministres për Dialog, Edita Tahiri. Është qëndrim i Qeverisë së Kosovës që tabelat provuese duhet të hiqen dhe tabelat RKS duhet të pranohen nga Serbia, në të kundërtën pala e Kosovës në një kohë të caktuar do të merr masa reciproke.
Memorandumi i Mirëkuptimit (MM) për njohjen reciproke të sigurimeve të automjeteve dhe marrëveshja për lirinë e lëvizjes janë në ketë link http://www.kryeministri-ks.net/?page=1,191

Një udhëtim me shkas!

August 12, 2015 by dgreca

Para selisë së Parlamentit evropian dhe selisë së NATO-s në Bruksel. “Kryeprokurori” i Republikës së Kosovës, libri: “Terrori i Serbisë Pushtuese mbi Shqiptarët 1844-1999”, për shkak të përgjumjes së thellë të Institucioneve kompetente të Kosovës, Akademisë së shkencave dhe arteve të Kosovës e Shqipërisë, ka ‘ngritur’ aktakuzën ndaj Serbisë fashiste, për themelimin me urgjencë të Gjykatës Speciale për gjenocidin serb mbi shqiptarët, për shkak se ajo (Serbia) ka vrarë më shumë se gjysëm milioni shqiptarë, në periudhën e viteve 1844-1999, fakt ky që e argumenton ky libër i botuar në 7 gjuhë botërore: shqip, anglisht, frengjisht, gjermanisht, turqisht, serbisht e maqedonisht, fatkeqësisht me vetfinancim të autorit. Ribotimi i gjashtë i plotësuar, tani i pasuruar edhe në gjuhën japoneze e suedeze, del nga shtypi në fillim të tetorit të këtij viti.

Dr.N.PLLANA
Datë: 12 Gusht 2015

REAGIMI I PRONARËVE TE BREGDETIT NDAJ KOMPENSIMIT TE QEVERISE

August 4, 2015 by dgreca

Nga Merko Bozhani/*
Diskutimi në takimin me Ministrin e Drejtësisë, z.Nasip Naço datë 31 Krrik 2015, nga Merko Bozhani, perfaqësuesi i Shoqatës “Krahina Jonë”
Kanë kaluar 24 vjet që qeveria e parë demokratike që mori pushtetin, miratoi ligjin 7501, një ligj, çkombëtarizues, anti njerëzor e vrastar, që mbron padrejtësinë. Kuvendi pluralist, në vënd të miratonte ligje për zbatimin e lirive e të drejtave themelore të njeriut, punën e parë që bëri me këtë ligj shkeli rëndë lirinë e të drejtën e pronës. Kjo s’ka ndodhur në asnjë vënd të botës, pavarësisht nga forma e regjimit. Ju kërkojmë të amendohet ky ligj ogurzi, të vejë prona tek pronari e shpronësuar nga diktatura, ne nuk ju kërkojmë as mëshirë e as lëmoshë. Ne dëgjuam në fushatën elektorale te 2013-ës z.Edi Rama, që u bë Kryeministër, që na premtoi se do të zgjidhte problemin e pronës, por tani na paraqitet një ligj tjetër më i keq se 7501 gjoja i mbështetur nga B.Botëror dhe KE , që i thotë Gjykatës së Strasburgut që të mos marrë parasysh kërkesat dhe ankimimet tona se nga dënimet do falimentojë shteti. Përgjegjësinë e keni Ju, që mashtroni, duke na quajtur partnerë me qeverinë, kur deri më sot s’na ka pritur njeri përveç zëvëndësit të zëvëndësave dhe më tej akoma, gjoja jeni konsultuar edhe me grupet e interesit, gjë që s’është e vërtetë.
Ligji është anti-kushtetues, megjithëse qeveritarë e parlamentarë betohen për kushtetuten. Ky ligj është në kundërshtim me nenin 41, 42, dhe 181 të kushtetutes. Ky i fundit e shkruan e zezë mbi të bardhë, se ligjet dhe amendamentet për problemet ekonomike të miratuara para datës së miratimit të kushtetutës (d.m.th. viti 1998), brenda një periudhe 2-3 vjeçare të anullohen. Qeveritarë dhe parlamentarë çdo ditë përgjërohen për kushtetuten. Nga politikanët nuk ka asnjë ankesë sepse ata kan pervetesuar pronat tona . Nuk është zhvilluar asnjë seancë parlamentare për pronat apo qoftë dhe një diskutim i vetëm në media, ku përballë pronarëve të jetë përfaqësuesi i Shtetit, mbasi të gjithë këta qeveritarë dhe parlamentarë që nga fillimi e deri më sot I kanë zgjidhur problemet e tyre për pronën. Madje në media u njoftua se në Gjirin e Lalëzit ishin vjedhur vilat e Ristanit, Nokes, Kodres etj, dhe mësuam se Gjiri i Lalëzit nuk është pronë private por pronë e pashallarëve të politikës, ndërsa ne populli i thjeshtë kemi 24 vjet që pengohemi dhe nuk e gëzojmë të drejtën e pronës që trashëgojmë nga të parët tanë.
Jo, zz.pushtetarë, ju po drejtoni vendin në rrugën me të gabuar, ne nuk shkojmë në Europë me dy standarte, një për veriun që e ka marrë pronën dhe tani po i legalizoni pronën që i ka grabitur dikuj tjetër. Një ligj për veriun dhe tjetër për jugun, një për qytetin e një për fshatin. Ju spekulloni me zërat kadastralë. Në qytet të larguarit me akt normativ të qeverisë Berisha, i morën pronat dhe qytetarët i nxorrën jashtë, pavarësisht se kush ishin dhe nga vinin, ndërsa ne nuk e gëzojmë të drejtën e pronës në fshatin tonë. Dhe është interesant se ligji 7501 është zbatuar kryesisht për bregdetin e Vlorës nga Kalaja ne Ujë të Ftohtë deri në Konispol, mbasi është zona turistike e lakmuar për pushtetarët. Politikaneve ju pelqejne kullotat e Karaburunit dhe zona turistike te Vlores, por ato kane zot. Ne kërkojme të zbatoni kushtetutën dhe jo lëmoshë nga ju.
Atdheu im i parë dhe i të gjithë ne që kemi ardhur në këtë ballafaqim, me ju zoti Nasip Naço, që sot jeni Ministër i Drejtësisë është prona e prindërve të mi. Unë personalisht jam i 16-ti brez autokton, veç djalit e nipave të mi, që më kërkojnë, pronën e të parëve, unë e ndjej se nuk do të më tretë dheu, pa e marrë atë. E kërkojmë pronën me ligj, se këtu fillon demokracia. Ju na keni lënë pa asnjë cm2 tokë, duke humbur kështu identitetin tonë si Dukatas. Si mund tu them unë nipave të mi që ju jeni nga Dukati ? Pronën tonë nuk e mori as pushtuesi Osman, as Italiani, e as Gjermani, dhe diktatura nuk na hoqi te drejten e pronsise , por të posedimit dhe la statusin e kooperativës bujqësore. Në 1991 kur u prishën kooperativat statuti i kooperativave te Enverit, përcaktonte se kur kooperativa prishet, secili merr mbrapsh pronën aq sa ka futur ne kooperative kor kjo nuk u zbatua. Kush e ka këtë të drejtë kushtetuese, ligjore apo kanunore që të më grabisë pronën e babës të trashëguar në breza. Ky nuk është shteti ligjor që aspiruam në 1991, prandaj, nëse ndiheni shqiptarë, kthejani pronën e grabitur të zotit, na jepni pronën tonë.
Ata që e bënë këtë ligj, e bënë se e gjithë strategjia e tyre politike, ishte për të mbjelle konfliktualitet dhe ja arritën qëllimit. Për pronën u vranë mijëra. Z.Sali Berisha në vitin 2013 pranoi se ligji 7501 ishte një gabim. Po qe se e thotë me ndërgjegje, të pregatisë amendamentet për rregullimin e nenit 8 të tij pasi ka shkaktuar mijëra të vrarë dhehasmëri që po shtohen vazhdimisht .
Thuhet që tokat arë do kompesohet fizikisht sepse prona ime i është falur bashkëfshatarit tim. Me këto financa e borxhe që ka trashëguar qeveria e sotme dhe sa të tjera po merr, është i pa mundur kompesimi. Tokëtëlirë as ka patur e as ka. Nga Agjensia e Pronave na thuhen se janë 9000 e ca dosje pa u përpunuar. Edhe stepat e Rusisë po të kishin qënë do ishin mbaruar dokumentacionet e pronave. Lind pyetja pse do kompesohem unë, që jam pronar I ligjshëm dhe jo ai qënuk e lidh asgjë me pronën time. Pse shteti nuk zbaton nenin 41 dhe 181 te kushtetutes ne fuqi Pse doni të na shkëpusni nga fshati ku u lindëm, u rritëm, u shkolluam dhe shërbyem ? Zgjidhja është fare e thjeshtë të kthehet toka tek pronari I ligjshëm dhe ato 5 miliardëqë do dalin nga buxheti I shtetit, që ju thoni për kompesim për 10 vjet, le ti jepen popullit për spitale, pensione, rrugë dhe nevoja publike .
Platforma e derisotme me pronën , në fshat ka krijuar një hendek I madh midis nesh dhe atyre që kanë marrë pronën e tjetrit. Keni prishur moralin e familjeve që me ligjet tuaja jo vetëm përvetësojnë pronë e tjetrit por bëjnë dhe karshillëk të jashtëzakonshëm. Në njëtakim Xhemilit I thane se nuk ka varr as për në këmbë, kur ai ka dhjetëra hektare tokë e kullota. Na thone se s’jemi bijtë e babës, duke treguar brrylin. Hodua e Tomorri të interrnuar nga sistemi I kohes, gjetën themelet e shtëpisë së prindërve, por ata që kishin zaptuar pronën e tyre i pritën me kallash. Fyerjet që na janë bërë nga kalemxhinjtë I kanë botuar edhe në shtyp, duke na quajtur “përçarës të fshatit”, “të depersonalizuar moralisht”, “njerëz pa nivel e pa moral”, “qajeni me ligjeligjin 7501” etj. Kjo situateë ka future përçarje në popull dhe kjo nuk zgjidhet me atë projektligj që keni hedhur në tavolinë.
Sistemi I kaluar na arsimoi, na shkolloi dhe na shpërndau nëpër Shqipëri atje ku kishte nevoje, disa prej nesh kanë punuar në qytete e në institucionet qëndrore. Ne u bëmë një elite intelektuale që I bëmë nder jo vetëm vëndit të punës por nder edhe fshatit, duke mbajtur si askush tjetër lidhje me fshatin, ndërsa tani jemi muhaxhirë, ne jemi çamët e kohës moderne. Ata i përzuri greku me zjarr e hekur, kurse ne na përzuri Saliu “demokrat” , duke na hequr me ligj të drejtën e pronësisë dhe të trashëgimisë mbi pronat e baballarëve tanë. Dhe këtë tradhëti kombëtare tani po e stampon edhe partia socialiste, madje e quani edhe reformë agrare. Jo zotërinj qeveritarë, sistemi i kaluar komunist kur bëri reformën agrare, u mori pronën kundërshtarëve politikë dhe të pasurëve, por ruajti dokumentat. Ndërsa ne nuk e gëzojmë dot të drejtën e pronës vetëm se nuk banojmë në fshat. Prandaj anullojeni këtë ligj se nuk na e mohoni dot origjinën tonë.
Janë bërë me qindra ankimime në Strazburg , pronarët i kanë fituar gjygjet dhe shteti është gjobitur. Edhe ne do të ankohemi në Strasburg, por ne kërkojmë zgjidhje nga qeveria jonë jo vetëm se kemi të drejtë por edhe e duam atë. Duke e mbyllur këtë diskutim zotërinj ne kërkojmë anullimin e këtij ligji sepse ai është tërësisht antikushtetues. Kërkojmë barazi dhe drejtësi dhe e përsëris nuk kërkojmë as mëshirë as lëmoshe por pronën e prindërve tanë. Kushtetuta është zgjidhja e thjeshtë dhe e drejtë nëse ju punoni me drershmëri dhe për Shqipërinë.
*Merko Bozhani
Pronar nga fshati Dukat –Vlorë

BE-JA DHE SHBA-JA PËRSHËNDETËN MIRATIMIN E SPECIALES

August 4, 2015 by dgreca

Mogherini mirëpret miratimin e Gjykatës Speciale/
Bashkimi Evropian, Zyra në Prishtinë dhe Ambasada e Shteteve të Bashkuara të Amerikës në Kosovë kanë përshëndetur sonte me anë të një komunikate miratimin e amendamentit kushtetues dhe të Ligjit për themelimin e Dhomave të Specializuara, menjëherë pas votimit sonte në mesnatë të Projektligjit për Dhomat e Specializuara.
“Misionet e BE-së, Përfaqësuesi Special i BE-së/ Zyra e BE-së në Kosovë dhe Ambasada e Shteteve të Bashkuara në Prishtinë mirëpresin aprovimin e amendamentit kushtetues dhe ligjit të nevojshëm për themelimin e Dhomave të Specializuara.
Ky ishte një hap i rëndësishëm në rrugën Euro-Atlantike të Kosovës. Me këtë vendim, Qeveria e Kosovës dhe Kuvendi kanë demonstruar përkushtimin e tyre për sundimin e ligjit dhe për respektimin e marrëveshjeve ndërkombëtare.
Dhomat e Specializuara janë instrument jetik për vendosjen e drejtësisë lidhur me pretendimet për krimet e supozuara gjatë konfliktit në Kosovë.
Themelimi i tyre do të forcojë parimin e sundimit të ligjit në Kosovë dhe vendet tona do të vazhdojnë të mbështesin përpjekjet e Kosovës në këtë fushë. Duke u ballafaquar me të kaluarën e saj dhe duke siguruar drejtësi për viktimat, Kosova mund të arrijë pajtimin dhe të ndërtojë të ardhme më të mirë”, thuhet në komunikatën e përbashkët.

Mogherini mirëpret miratimin e Gjykatës Speciale/

Përfaqësuesja e lartë për politikë të jashtme të Bashkimit Evropian, Federica Mogherini, mirëpriti miratimin e ndryshimeve kushtetuese dhe ligjit për themelimin e Gjykatës Speciale në Kosovë.
Në një deklaratë të lëshuar nga zyra e zonjës Mogherini, thuhet se “aprovimi i sotëm i amendamenteve kushtetuese dhe ligjit për Dhomat e Specializuara dhe Zyrën e Prokurorit Special në Kuvendin e Kosovës është hap jetik në ofrimin e kornizës së domosdoshme ligjore për adresimin e pretendimeve të rënda që dalin nga raporti i Këshillit të Evropës, si dhe zotimet e theksuara në Letërkëmbimet e miratuara nga Kuvendi i Kosovës në vitin 2014.
Duke kuptuar që ky hap i deputetëve të Kuvendit të Kosovës nuk ishte i lehtë, ai është shenjë e përgjegjësisë dhe vendosmërisë për të nxjerrë të vërtetën dhe për të marrë vendime që janë në harmoni me rrugën evropiane të Kosovës.
BE-ja është e përkushtuar në ofrimin e asistencës në këtë proces dhe për të vazhduar punën me palët e përfshira për të përfunduar procesin e krijimit të mekanizmave të nevojshëm ligjor në mënyrë që të mund të mbahen procese gjyqësore të pavarura dhe të drejta në një të afërme”, thuhet në deklaraten e zonjës Mogherini.

KOSOVË – GJYKATA SPECIALE RIKTHEHET NË 3 GUSHT NË AXHENDËN E SEANCËS PLENARE TË KUVENDIT

August 1, 2015 by dgreca

-Mustafa: Riprocedimi dhe vendimi në Kuvend për Gjykatën Speciale e ruan sovranitetin e Kosovës/
-Thaçi: Që të kemi një mbështetje çfarë e meritojmë, duhet natyrisht që edhe ne të prodhojmë argumente/
Nga Behlul Jashari/ PRISHTINË, 1 Gusht 2015/ Gjykata Speciale rikthehet në 3 gusht në axhendën e seancës plenare të Kuvendit të Kosovës, ku në 26 qershor për miratim mungonin 5 vota për të arritur numrin e nevojshëm 80 – dy të tretat e 120 deputetëve.
Kuvendi i Republikës së Kosovës do të mblidhet në seancë plenare të hënën, në 3 gusht, në orën 10:00, me një pikë të vetme të rendit të ditës: Shqyrtimi i propozim-amendamentit nr. 24 në Kushtetutën e Republikës së Kosovës, të riproceduar në Kuvend nga Qeveria e Republikës së Kosovës.
Ky ishte vendimi i djeshëm i Kryesisë së Kuvendit, në mbledhjen e saj të përbashkët me kryetarët e grupeve parlamentare, kryesuar nga kryetari Kadri Veseli, e cila u mbajt ndonjë orë pas mbledhjes së qeverisë së Republikës së Kosovës.
Riprocedimi dhe vendimi në Kuvend për Gjykatën Speciale e ruan sovranitetin e Kosovës, është shprehur kryeministri kosovar Isa Mustafa në mbledhjen e qeverisë ku u miratua unanimisht propozimi për riprocedimin e amendamenteve të Kushtetutës së Republikës së Kosovës.
Gjatë mbledhjes së djeshme të qeverisë, ai përkujtoi se, Kuvendi kosovar e ka shqyrtuar në 26 qershor amendamentin numër 24 në Kushtetutën e Republikës së Kosovës, i cili është proceduar nga qeveria pas aprovimit në 7 mars 2015.
“Amendamenti është përkrahur nga 75 deputetë, por nuk i ka arritur votat e mjaftueshme prej dy të tretave, përkatësisht të 80 deputetëve të Kuvendit të Republikës së Kosovës. Në takimin e qeverisë të datës 27 qershor kemi shprehur përcaktimin tonë që pas konsultimeve të nevojshme me deputetë të riprocedojmë në Kuvend të njëjtin amendament kushtetues”, tha ai.
Kryeministri Mustafa tha se, ndërkohë janë zhvilluar takime me deputetë dhe me grupe parlamentare në të cilat është biseduar lidhur me nevojën e aprovimit të ndryshimeve kushtetuese, të cilat do të mundësojnë themelimin e Dhomave të Specializuara dhe Zyrës së Prokurorit Specializuar.
“Kushtetuta e Republikës së Kosovës dhe Rregullorja e Punës së Kuvendit të Republikës së Kosovës nuk e kufizojnë mundësinë që qeveria të riprocedojë me të njëjtat amendamente në Kuvendin e Republikës së Kosovës. Prandaj, konsideroj që ne nuk e kemi asnjë pengesë kushtetuese që amendamentet të cilat janë aprovuar njëherë në qeveri të riprocedohen në Kuvend me kërkesë që t’i shqyrtojë edhe njëherë dhe të marrë vendim për aprovimin e tyre, duke pasur parasysh rëndësinë shumë të madhe që ka për vendin aprovimi i këtyre amendamenteve”, u shpreh kreu i qeverisë.
Ai tha se, arsyeja e riprocedimit të amendamenteve ndërlidhet veçmas me përmbushjen e obligimeve të cilat i ka marrë Kosova në Ligjin për ratifikimin e letrës së Presidentes së Kosovës me Baroneshën Ashton të aprovuar me votat e dy të tretave të deputetëve të Kuvendit të Republikës së Kosovës në vitin 2014.
“Prandaj, ne jemi të detyruar të zbatojmë ligjet të cilat i aprovon Kuvendi, ndërsa Kosova duhet të tregojë se është përgjegjëse dhe se është e zonja që të përmbushë zotimet e saj para komunitetit ndërkombëtar, zotime të cilat janë ratifikuar me ligj. Kosova përmes aprovimit të këtyre amendamenteve demonstron në mënyrë të qartë përcaktimin e qeverisë së saj për rend dhe ligj dhe për arritjen e standardeve të larta perëndimore të drejtësisë, por njëherit poashtu shprehë bindjen se votimi i tyre në Kuvend është në dobi afatgjate të Kosovës”, tha Mustafa.
Kryeministri i Kosovës theksoi se, themelimi i Dhomave të Veçanta sipas këtyre amendamenteve është kërkesë eksplicite e partnerëve tanë strategjikë, sidomos e Shteteve të Bashkuara të Amerikës dhe Bashkimit Evropian.
“Gjatë riprocedimit kemi pas parasysh poashtu edhe opinionin e Gjykatës Kushtetuese, e cila në aktgjykimin e saj e ka deklaruar të pranueshme kërkesën e kryetarit të Kuvendit dhe e ka konfirmuar se amendamenti numër 24 nuk i pakëson të drejtat dhe liritë e njeriut të përcaktuara me kapitullin 2 dhe me kapitullin 3 të Kushtetutës”, vijoi Mustafa.
Ai u shprehu besimin se aprovimi i këtij amendamenti është në dobi të shtetit të Kosovës dhe të zotërimit të drejtësisë mbi çdo dyshim të mundshëm.
“Riprocedimi dhe vendimi në Kuvend për këto amendamente kushtetuese e ruan sovranitetin e Kosovës, sepse institucionet e Republikës së Kosovës janë ato që marrin rolin dhe përgjegjësinë për një vendim të tillë. Për neve do të jetë e dëmshme dhe e papranueshme që për këtë çështje të vendoset mbi bazën e Rezolutës 1244, pasi që rikthimi dhe fuqizimi i kësaj rezolute sjell në pikëpyetje sovranitetin e vendit dhe vlerat e ndërtuara që nga periudha e shpalljes së pavarësisë”, theksoi kryeministri Mustafa.
Unë, vijoi kreu i qeverisë, pres që vendimi për ndryshimet kushtetuese të përkrahet nga të gjithë deputetët e Kuvendit të Kosovës, të pozitës dhe opozitës.
“Kjo është një çështje që i takon tërë vendit, ashtu siç është partneriteti me Shtetet e Bashkuara të Amerikës, të cilat e kanë ndihmuar vendin tonë në të gjitha fazat e shtetndërtimit dhe partneriteti me BE-në. Janë në interes të pozitës dhe të opozitës dhe të gjithë qytetarëve të Republikë së Kosovës. Ne poashtu duhet të jemi të vetëdijshëm se nuk mund ta ndërtojmë dhe zhvillojmë këtë vend të izoluar nga vendet mike. Na nevojitet përkrahja e tyre për integrimet në BE, për anëtarësimin në organizata ndërkombëtare, për njohjen e pavarësisë së Kosovës, për investime dhe zhvillim ekonomik dhe për forcimin e shtetit ligjor. Këtë duhet ta bëjmë së bashku me partnerët strategjikë në rrugën e integrimeve tona euroatlantike”, theksoi kryeministri Mustafa.
Prandaj, përfundoi kryeministri kosovar, duke pas parasysh rëndësinë e themelimit të Dhomave të Veçanta, unë ju ftoj që ta përkrahni riprocedimin e këtij amendamenti, përkatësisht amendamenteve kushtetuese, dhe poashtu Kuvendi i Republikës së Kosovës sa më shpejtë ta thërrasë seancën dhe të aprovojë këto amendamente.
Edhe zëvendëskryeministri i parë, njëherësh ministër i Punëve të Jashtme i Kosovës, Hashim Thaçi, vlerësoi se është një hap jashtëzakonisht i rëndësishëm për qeverinë dhe të gjitha institucionet e vendit që të riprocedohet për këtë çështje të rëndësishme të themelimit të Gjykatës Speciale.
“Vlerësoj se është e rëndësishme edhe për të kaluarën, për të sotmen dhe mbi të gjitha për të ardhmen e shtetit të Kosovës. Ne kemi marrë obligimet si institucione para bashkësisë ndërkombëtare, në një proces të një bashkëpunimi të ngushtë, të një transparence të plotë, por edhe të një bashkëpërgjegjësie mund të themi lirisht”, u shpreh ai.
Prandaj, vijoi shefi i diplomacisë kosovare, edhe letërkëmbimet që kanë ndodhur duke u bazuar në vendimet e Kuvendit në mes të Presidentes së Republikës së Kosovës dhe autoriteteve të Bashkimit Evropian janë edhe një përgjegjësi e re që del para institucioneve tona.
“Mendoj se kjo çështje është ajo që duhet të largoj ndasitë politike, përkundrazi është një përgjegjësi e përbashkët shtetërore dhe duhet të shndërrohet në një rrethanë të favorshme për të ardhmen euroatlantike të Kosovës, që të vazhdohet menjëherë me çështjen e Stabilizim-Asociimit, pastaj me rekomandimin për liberalizimin e vizave, me anëtarësimin e Kosovës edhe në UNESCO, edhe në Interpol edhe me aplikimin e Kosovës për t’u anëtarësuar në Këshillin e Evropës. Gjithashtu, vlerësoj se është një standard të cilin Kosova e plotëson më mirë se të gjitha vendet e tjera të rajonit dhe që do të mirëpritet prej të gjithë partnerëve dhe miqve ndërkombëtarë dhe që do të kemi një mbështetje të fuqishme, gjithashtu edhe në të ardhmen”, theksoi Thaçi.
Pra, vijoi ai, ky votim apo ky kalim në Kuvendin e Kosovës në ditët e ardhshme do të mund t’i hap Kosovës një kapitull të ri, kapitullin e fuqizimit të integrimeve euroatlantike për Kosovën, por edhe ruajtjes, kultivimit dhe thellimit të partneritetit tonë me Shtetet e Bashkuara të Amerikës, Bashkimin Evropian dhe NATO-n.
“Dhe, pastaj ne të procedojmë axhendën tonë shtetërore, në mënyrë që të kemi një mbështetje edhe më të fuqishme ndërkombëtare. Por, që të kemi një mbështetje çfarë e meritojmë, duhet natyrisht që edhe ne të prodhojmë argumente sikur sot që po prodhojmë si qeveri e Kosovës dhe në ditët e ardhshme edhe si Kuvend i Republikës së Kosovës”, tha Thaçi.
Ai përfundoi se, mbetet me shpresë, optimizëm dhe besim të plotë që edhe deputetët kësaj radhe do të votojnë pa ndonjë hezitim në drejtim të asaj që të përmbyllet edhe kjo sfidë apo bashkëpërgjegjësi e politikës dhe institucioneve të Republikës së Kosovës.
Një ditë pas mosarritjes së numrit të nevojshëm të votave në Kuvend, qeveria në 27 qershor, në një mbledhje konsultative paralajmëronte riprocedim i Gjykatës Speciale dhe për këtë edhe bashkërendësim e bisedime edhe me opozitën. Por, tre partitë opozitare, VV, AAK e Nisma në një deklaratë të përbashkët që pasoi shprehën dhe vazhdojnë të mbajë qëndrimin se, “vendimi i 26 qershorit i Kuvendit të Kosovës për refuzimin e ndryshimeve kushtetuese për themelimin e Gjykatës Speciale është përfundimtar dhe i pakthyeshëm”. Në vazhdimësi të këtij qëndrimi, tre partitë opozitare, me gjithësej 31 deputetë, edhe në deklarata të veçanta, edhe ditëve të fundit, u rishprehën kundër riprocedimit në Kuvend të Gjykatës Speciale. Opozita shprehu kundërshtime edhe me largim nga mbledhja e djeshme e Kryesisë së Kuvendit duke kërkuar të mos procedohen ndryshimet kushtetuese për Specialen.
Në mbledhjen e Kryesisë së Kuvendit të Kosovës, një debat të gjerë ngjalli edhe propozimi për mocion procedural i grupeve parlamentare opozitare lidhur me procedimin në seancën plenare të radhës të Projektrezolutës lidhur me krimet e kryera nga Serbia gjatë viteve 1998-1999. Propozimi u përkrah edhe nga përfaqësues të grupeve parlamentare në pozitë, mirëpo u kontestua në kuptimin procedural. Rrjedhimisht, nuk mori përkrahjen e shumicës së anëtarëve të Kryesisë për të hyrë si pikë e rendit të ditës në seancën e radhës.