Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kryeparlamentarja Osmani, takim me përfaqësues të 13 agjencive të Kombeve të Bashkuara

by

Kryetarja Osmani takoi përfaqësues të trembëdhjetë agjencive të Kombeve të Bashkuara/

Sot, kryetarja e Kuvendit të Republikës së Kosovës, dr. Vjosa Osmani, priti në takim një delegacion të përbërë nga përfaqësues të trembëdhjetë agjencive të Kombeve të Bashkuara, të udhëhequr nga znj. Ulrika Richardson, koordinatore zhvillimore e OKB-së në Kosovë.

Në këtë takim u diskutua për projekte zhvillimore, të cilat përkrahen nga këto agjenci. Kryekuvendarja Osmani shprehu gatishmërinë e institucioneve të Republikës së Kosovës për bashkëpunim me këto agjenci.

Temë qendrore e diskutimeve ishte investimi në fushat që janë në funksion të Objektivave të Zhvillimit të Qëndrueshëm, specifikisht në krijimin e parakushteve për barazi në punësim, sigurim të shëndetit të grave shtatëzëna dhe të nënave, pastaj të drejtat e punëtorëve, mbrojtje të mjedisit etj.

Kryekuvendarja Osmani theksoi, po kështu, nevojën për rritje të buxhetit në shëndetësi, arsim dhe politika të punësimit.

Palët u pajtuan që ta intensifikojnë bashkëpunimin, në mënyrë që të rritet cilësia e punës së Kuvendit të Kosovës nëpërmjet përkrahjes nga këto agjenci.​

KOSOVA DITË ZIE, NDEROHET NEXHMIJE PAGARUSHA

by

-Presidenti Thaçi e shpall të dielën ditë zie shtetërore për artisten Nexhmije Pagarusha/

PRISHTINË, 8 Shkurt 2020-Gazeta DIELLI/ Presidenti i vendit, Hashim Thaçi, në nderim të jetës dhe veprës së artistes së madhe, Nexhmije Pagarusha, ka vendosur që ditën e varrimit të saj, 9 shkurt 2020, ta shpall ditë zie shtetërore në tërë territorin e Republikës së Kosovës.

Presidenti Thaçi e ka marrë këtë vendim në shenjë respekti shtetëror dhe qytetar për artisten Nexhmije Pagarusha, e cila i dha vlera të përjetshme kulturës dhe artit tonë kombëtar.

Në pajtim me legjislacionin në fuqi, në ditën e zisë, flamuri shtetëror ngrihet në gjysmështizë në të gjitha objektet shtetërore të Republikës së Kosovës, brenda dhe jashtë vendit.

Familja e Nexhmije Pagarushës ka njoftuar se në Teatrin Kombëtar në Prishtinë do bëhen homazhe dhe mbahet mbledhja komemorative, ndërsa varrimi bëhet në fshatin Pagarushe të komunës së Malisheves me rrethin e ngushtë familjar sipas amanetit të saj të fundit.

OSMANI: PARTNERITETI ME SHBA, EKZISTENCIAL PËR KOSOVËN

by

Kryetarja e Kuvendit, Vjosa Osmani në takim me ambasadorin e Shteteve të Bashkuara të Amerikës në Kosovë,  Philip S. Kosnett: Partneriteti me SHBA është ekzistencial për Kosovën/

PRISHTINË, 4 Shkurt 2020 -Gazeta DIELLI/ Kryetarja e Kuvendit të Republikës së Kosovës, Dr. Vjosa Osmani, në takimin e parë zyrtar, takoi sot ambasadorin e Shteteve të Bashkuara të Amerikës në Kosovë,  Philip S. Kosnett.

Ambasadori Kosnett uroi kryetaren Osmani për detyrën e re, duke ofruar përkrahje dhe bashkëpunim.

Në takim me ambasadorin amerikan, kryetarja Osmani diskutoi prioritetet e Kuvendit, rritjen e efikasitetit dhe mbikëqyrjes së Kuvendit në raport me Qeverinë, avansimin e diplomacisë parlamentare, bashkëpunimin me opozitën si dhe me të gjithë akterët e tjerë relevant.

Kryetarja Osmani e vlerësoi si ekzistencial bashkëpunimin dhe partneritetin me Shtetet e Bashkuara të Amerikës, duke u zotuar që ky bashkëpunim të thellohet edhe më tej në të ardhmen./b.j/

AMBASADORI AMERIKAN URON KRYEMINISTRIN E RI TË KOSOVËS

by

-Kryeministri Kurti takon ambasdorin amerikan Kosnett: Miqtë tanë do t’i mbajmë shumë afër/

Prishtinë, 4 Shkurt 2020-Gazeta DIELLI/ Kryeministri i Republikës së Kosovës, Albin Kurti, bashkë me Ministren e Drejtësisë, Albulena Haxhiun, kanë pritur sot në takim, ambasadorin e Shteteve të Bashkuara të Amerikës në Kosovë, Philip S. Kosnett dhe këshilltaren politike Alison Storsve të cilët shprehën urimet e tyre për këtë detyrë me shumë përgjegjësi.

Me këtë rast, kryeministri Kurti, tha se ishte nder takimi me ambasadorin Kosnett me të cilin edhe u dakorduan që të dy institucionet tona t’i vazhdojnë takimet  dhe ato të përkthehen në punë konkrete për qytetarët e vendit tonë.

“Miqtë tanë do t’i mbajmë shumë afër. Ata janë aleatë të cilët do t’i nderojmë me bashkëpunimin tonë të sinqertë e serioz”, ka thënë kryeministri Kurti në takimin me ambasadorin Kosnett./b.j/

KUVENDI I KOSOVËS – ALBIN KURTI PREZANTON QEVERINË E RE

by

-Lideri i Lëvizjes Vetëvendosje Albin Kurti i nominuar për mandatar të Qeverisë së Kosovës ka prezantuar listën e dy zëvendëskryeministrave e të 15 ministrave – nga 6 të LVV-së e LDK-së e 3 të komuniteteve pakicë/

3 SHKURT 2020/ Korrespondenti në Prishtinë i Gazetës DIELLI, i cili ndodhet sot në Kuvendin e Kosovës, raporton se seanca plenare për zgjedhjen e Qeverisë së re e ftuar për në orën 11:00 ka nisur me rreth 45 minuta vonesë, ndërsa në orën 14:40 ka shkuar në pauzë njëorëshe si u tha deri në 15:40 dhe pasi të përfundojë debate do votohet.

Lideri i Lëvizjes Vetëvendosje Albin Kurti i nominuar për mandatar të Qeverisë së Kosovës ka prezantuar listën e dy zëvendëskryeministrave e të 15 ministrave – nga 6 të LVV-së e LDK-së e 3 të komuniteteve pakicë:

Zëvendëskryeministër i parë – Avdullah Hoti (LDK), Zëvendëskryeministër i dytë – Haki Abazi (LVV), Ministria e Punëve të Jashtme – Glauk Konjufca (LVV), Ministria e Integrimeve Evropiane – Blerim Reka (LVV), Ministria e Drejtësisë – Albulena Haxhiu (LVV), Ministria e Arsimit – Hykmete Bajrami (LDK); Ministria e Financave – Besnik Bislimi (LVV), Ministria e Punëve të Brendshme – Agim Veliu (LDK), Ministria e Ekonomisë – Rozeta Hajdari (LVV), Ministria e Mbrojtjes – Anton Quni (LDK), Ministria e Infrastrukturës – Lumir Abdixhiku (LDK), Ministria e Shëndetësisë – Arben Vitia (LVV), Ministria e Bujqësisë – Besian Mustafa (LDK), Ministria e Kulturës, Rinisë dhe Sportit – Vlora Dumoshi (LDK), Ministria e Administrimit të Pushtetit Lokal – Emilia Rexhepi (nga komunitetet pakicë) dhe Ministria për Kthim – Delibor Jevtiq e Ministria për Zhvillim Rajonal – Ivan Millojeviq (nga komuniteti serb).

Kryetari i Kuvendit të Kosovës Glauk Konjufca i LVV i zgjedhur në seancën konstituive në 26 Dhjetor 2019 sot pas hapjes së seancës u tërhoq nga kryesimi dhe në vend të tij pritet të zgjedhet Vjosa Osmani e LDK.

Korrespondenti në Kosovë i Gazetës Dielli, Behlul Jashari, sjell fotografi nga seanca e Kuvendit dhe gjatë një takimi me të propozuarin për ministër Blerim Reka sot në ambientet e Kuvendit të Kosovës.