Kronike – Page 183 – Dielli

PËR HERË TË KATËRT GAZI LOTËSJELLËS NDËRPRET KUVENDIN E KOSOVËS

March 21, 2018 by dgreca

KOSOVË-GAZI LOTËSJELLËS I VETËVENDOSJES NDËRPRET PËR HERË TË TRETË SOT SEANCËN E KUVENDIT/

Seanca e Kuvendit të Kosovës në vijimin e seancës së jashtëzakonshme për votimin Projektligjit për ratifikimin e Marrëveshjes për Kufirin Shtetëror me Malin e Zi sërish u ndërpre rreth orës 15:40 për herë të tretë sot.Për hërë të dytë u ndërpre rreth orës 13:10, pas pauzës që u dha pas hedhjes së gazit lotësjellës për herë të parë rreth mesditës nga deputetë të Lëvizjes Vetëvendosje.Kryetari i Kuvendit të Kosovës Kadri Veseli paralajmëroi rimbledhjen e deputetëve në seancë sot në orën 16:30.

PËR HERË TË DYTË SOT GAZ LOTËSJELLËS NË KUVENDIN E KOSOVËS/

Seanca e Kuvendit të Kosovës sërisht u ndërpre për hërë të dytë sot rreth orës 13:10 nga hedhja e gazit lotësjellës, pas pauzës që u dha pas hedhjes së gazit lotësjellës për herë të parë rreth mesditës nga deputetë të Lëvizjes Vetëvendosje.Kosovë-Gazi lotësjellës ka ndërprerë seancën e Kuvendit para votimit për demarkacionin/

Gazeta DIELLI nga korrespondenti në Kosovë Behlul Jashari/

PRISHTINË, 21 Mars 2018/ Gazi lotësjellës ndërpreu seancën e jashtëzakonshme të Kuvendit të Kosovës që u rimledh sot në mesditë pak para se të votohet Projektligji për ratifikimin e Marrëveshjes për Kufirin Shtetëror me Malin e Zi. Nuk u tha ende zyrtarisht, por duket edhe sipas disa deklaratave të deputetëve se gazi lotësjellës është hedhur nga ana e Lëvizjes Vetëvendosje, si edhe në rastet gjatë viteve të kaluara.

Votimi në Kuvendin kosovar i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi pritej të bëhet këtë të mërkurë të 21 marsit, në vazhdimin e seancës pas debateve që kanë përfunduar rreth një orë pas mesnatës në seancën e jashtëzakonshme të nisur dje pasdite, pas katër shtyrjeve në pritje të sigurimit të numrit të nevojshëm të votave.Për kalimin e Projektligjit duheshin dy të tretat e votave, së paku 80 të Kuvendit të Kosovës 120 anëtarësh.

Votimi sot dukej se do zhvillohej pa prezencën e Listës Serbe, si dhe gjatë gjithë seancës së Kuvendit të Kosovës për demarkacionin. Por një deputetet i saj, i komunitetit goran, u pa në momentet e fundit tek kishte hyrë në sallën plenare të Kuvendit dhe besohet se është vota e 80-të.

Në fillim të vijimit të seancës sot u dha pushim për saktësim të amandamentit nga Komisioni parlamentar për Politikë të Jashtme, për Projektligjin, neni 3 i të cilit pas miratimit do jetë ky:

“Pjesë përbërëse të këtij Projektligji janë: 1.1.Marrëveshja për Kufirin Shtetëror në mes të Republikës së Kosovës dhe Malit të Zi, e nënshkruar në Vjenë më datë 26 gusht 2015;

1.2.Deklarata e përbashkët e Presidentit të Republikës së Kosovës, SH.T.Z. Hashim Thaçi dhe Presidentit të Malit të Zi, SH.T.Z. Filip Vujanoviç, e datës 16.02.2018.

1.3. Dokumentacioni zyrtar i Komisionit Shtetëror për shënimin e Kufirit Shtetëror – për orientim”.Marrëveshja për Kufirin Shtetëror mes Kosovës e Malit të Zi është nënshkruar në 26 gusht 2015 në Vjenë.

VEPRIMET POLICORE NË KUVENDIN E KOSOVËS

-Informacion i Policisë së Kosovës lidhur me veprimet policore në Kuvendin e Republikës së Kosovës/

Prishtinë, 21 mars 2018, ORA 17:50/

Gjatë tentimit të katërt të vazhdimit të seancës parlamentare, sërish është hedhur gaz lotsjellës nga deputet të pranishëm brenda në sallë dhe bazuar në këtë veprim si dhe bazuar në vendimet zyrtare, Policia e Kosovës është detyruar të veprojë duke shoqëruar në stacion edhe një (1) deputet për hedhje të gazit lotsjellës si dhe një (1) deputete për posedim të gazit lotsjellës.Njëkohësisht përderisa janë zhvilluar aktivitete brenda në Kuvendin e Kosovës, diku rreth orës 17:10 është raportuar për një incident ku disa persona dyshohet se kanë hedhur gurë në drejtim të Kuvendit të Republikës së Kosovës, ku si pasojë janë thyer dy xhama të objektit të Kuvendit të RKS-së.Njësitet policore të cilat kanë qenë me detyrë zyrtare në atë lokacion, kanë vepruar menjëherë dhe si rezultat i veprimeve të shpejta në afërsi të lokacionit kanë ndaluar tre (3) persona të dyshuar të cilët i kanë shoqëruar në stacion policor për procedura të mëtejme.Lidhur me rastin në vendin e ngjarjes kanë dalë hetuesit policor dhe njësia e forenzikës për të ekzaminuar vendin e ngjarjes.

Presidenti Meta i jep autorizimin ministrit Bushati

March 19, 2018 by dgreca

1 Meta Bushati

“Presidenti i Republikës, Sh.T.Z Ilir Meta në mbështetje të nenit 92 gërma “ë”, nenit 116, nenit 121 pika 1, nenit 132 të Kushtetutës; Vendimit nr.15, datë 15.04.2010 të Gjykatës Kushtetuese të Republikës së Shqipërisë; Nenit 6 pika 3, shkronja “a” të ligjit nr. 43/2016 “Për marrëveshjet ndërkombëtare në Republikën e Shqipërisë”, në vijim të kërkesës të Ministrisë për Evropën dhe Punët e Jashtme autorizoi sot Ministrin për Evropën dhe Punët e Jashtme, z.Ditmir Bushati, të lëshojë Plotfuqinë për Grupin Negociator të Republikës së Shqipërisë për negocimin e “Projektmarrëveshjes ndërmjet Republikës së Shqipërisë dhe Republikës së Greqisë për kufizimin e zonave të tyre detare”. Presidenti i Republikës, Sh.T.Z Ilir Meta u kërkon Ministrisë për Evropën dhe Punët e Jashtme, institucioneve shtetërore shqiptare, të përfshira në këto negociata dhe Grupit Negociator, të përmbushin përgjegjësitë e tyre në respekt të Kushtetutës së Republikës së Shqipërisë, të Vendimit nr.15, datë 15.04.2010 të Gjykatës Kushtetuese, akteve ndërkombëtare ku Republika e Shqipërisë është palë, kuadrit të brendshëm ligjor, në interes të ruajtjes dhe ushtrimit të sovranitetit territorial dhe juridiksionit kombëtar dhe të garantimit të sigurisë, dobisë ekonomike e sociale të vendit”.

Autonomia shqiptare sipas gazetës greke

March 18, 2018 by dgreca

L’EPHIMÉRIS I ATHINËS (1897) : “NË SHQIPËRI JANË FORMUAR DISA KOMITETE PËR TË PËRHAPUR IDENË E AUTONOMISË”/

Nga Aurenc Bebja*, Francë/

“Le Temps” ka botuar, të shtunën e 9 tetorit 1897, në faqen n°2, shkrimin e gazetës athinase “L’Ephiméris” mbi çështjen e autonomisë shqiptare dhe kërcënimin e saj nga Porta e Lartë.Aurenc Bebja, nëpërmjet faqes së tij “Dars (Klos), Mat – Albania”, ka sjellë, në shqip, tekstin e plotë :

“Autonomia shqiptare

L’Ephiméris i Athinës, që publikoi disa kohë më parë një seri artikujsh cilësorë mbi lëvizjen shqiptare, mbi kolonitë shqiptare në Itali dhe mbi veprimet e komiteteve shqiptare me seli në Romë, jep sot informacione të reja mbi këtë agjitacion.

Sipas kolegut tonë athinas, në Shqipëri janë formuar disa komitete për të përhapur idenë e “Shqipërisë autonome”. Duket se kjo lëvizje autonome tashmë ka marrë përmasa shqetësuese, sepse Porta e Lartë, e alarmuar, ka urdhëruar që të merren masa ndëshkuese.

Kështu, valitë (udhëheqësi më i lartë në një vilajet të Perandorisë Osmane) janë urdhëruar të monitorojnë nga afër vajtje-ardhjet e anëtarëve të komiteteve, vendase ose të huaja, të ndalojnë me sa më shumë ashpërsi hyrjen në Shqipëri të gazetës së re që botohet në Itali nën titullin Skiperia (Shqipëria) dhe të forcojnë pozitat ushtarake në vendet e rrezikuara nga një kryengritje shqiptare.”

Kosovë-Demarkacioni, të martën

March 15, 2018 by dgreca

-Kuvendi i Kosovës rimblidhet për demarkacionin të martën e javës së ardhshme/

1 Kuvendi sot

-Lëvizja Vetëvendosje pas largimit të 13 deputetëve, nga grupi më i madh parlamentar kaloi në vendin e tretë/

–Tani grupi i parë – më i madh parlamentar në Kuvendin e Kosovës është i Lidhjes Demokratike të Kosovës, parti opozitare, me 27 deputetë/

PRISHTINË,15 Mars 2018-Gazeta DIELLI-B.Jashari/ Vazhdimi i seancës plenare për shqyrtimin e Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi do mbahet të marten e javës së ardhshme, 20 mars 2018, në orën 16:00.

Ky është vendimi i mbledhjes së mbrëmjes së sotme të Kryesisë së Kuvendit të Kosovës së bashku me kryetarët e grupeve parlamentare, ndërkohë që gjatë ditës u zhvilluan punime në seancë plenare për pikat e papërfunduara nga seancat e kaluara në mungesë kuorumi.

Seanca e jashtëzakonshme për Projektligjin për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi ka pasur katër shtyrje në pritje të sigurimit të dy të tretave të votave – së paku 80 nga Kuvendi 120 anëtarësh.

Duhen së paku edhe 2 vota derisa janë dy parti që ishin deklaruar kundër – Lëvizja Vetëvendosje opozitare dhe Lista Serbe pjesë e koalicionit qeverisës.

Por, grupi parlamentar i Lëvizjes Vetëvendosje nuk është më si ishte deri dje më i madhi me 32 deputetë, pasi ndarja u pa sot në seancën plenare të Kuvendit të Kosovës.

Dje në mbrëmje Kryesia e Kuvendit zyrtarizoi kërkesën e 12 deputetëve për krijimin e grupit të ri parlamentar – Grupi i Deputetëve të Pavarur nga të dorëhequrit e Vetëvendosjes, e cila tani ka vetëm 19 deputetë pas kalimit dje edhe të një deputeteje të deritanishme të saj në partinë që udhëheqë me qeverinë -Aleancën për Ardhmërinë e Kosovës.

Vetëvendosje nga grupi më i madh parlamentar në Kuvendin e Kosovës ka kaluar në vendin e tretë.

Tani grupi i parë – më i madh parlamentar në Kuvendin e Kosovës është i Lidhjes Demokratike të Kosovës, parti opozitare, me 27 deputetë, e cila me kohë ka deklaruar votën pro ratifikimit të marrëveshjes për demarkacionin.

I dyti është grupi parlamentar nga koalicioni qeverisës, i Partisë Demokrake të Kosovës me 23 deputetë.

Së paku dy votat që duheshin për ratifikimin e demarkacionit tani duket se janë siguruar – një e deputetes së Vetëvendosjes së kaloi në Aleancën për Ardhmërinë e Kosovës e ndonjë tjetër nga partia e sapondarë.

Ndërsa, për Listën Serbe “tema e të ashtuquajturit demarkacion fare nuk egziston”.

“As që na intereson kjo çështje, me të le të merren partitë shqiptare në përputhje me programet e veta politike”, ka deklaruar në një komunikatë në 9 mars partia serbe, e cila ka 10 deputetë në Kuvend e 3 ministra në qeverinë e Kosovës, një prej të cilëve është edhe zëvendëskryeministër.

Marrëveshja për Kufirin Shtetëror mes Kosovës e Malit të Zi është nënshkruar në 26 gusht 2015 në Vjenë. Për palën kosovare e ka nënshkruar atëherë zëvendëskryeministri i parë dhe ministri i Jashtëm, Hashim Thaçi, dhe ministri i atëherëshëm i Brendshëm, Skender Hyseni, ndërsa për palën malazeze, zëvedëskryeministri dhe ministri i Jashtëm, Igor Llukshiç dhe ministri i Brendshëm, Rashko Konjeviç.

Dëshmitarë të nënshkrimit ishin atëherë kryeministri i Kosovës, Isa Mustafa, presidenti i Malit të Zi, Filip Vujanoviç, si dhe ministri i Jashtëm i Austrisë, Sebastian Kurz.

Sarkozy dekorohet me Medaljen Presidenciale të Kosovës

March 15, 2018 by dgreca

Sarkozy dekorohet me Medaljen Presidenciale të Kosovës/

sarkozi

Presidenti i Kosovës Hashim Thaçi në Paris e ka dekoruar e me Medaljen Presidenciale të 10 vjetorit të pavarësisë ish kryetarin e Francës Nicolas Sarkozy. Ja cfare shkroi Thaci ne facebook: “Çdo qytetar i Kosovës e mban në mend deklaratën e famshme të ish-presidentit Sarkozy kur paralajmëroi disa ditë para shpalljes së pavarësisë së Kosovës në një shkollë fillore në Paris, se harta evropiane do të ndryshoi dhe pasurohet me një shtet të ri – Republikën e Kosovës. Sot pata nderin që ish-presidentit Sarkozy, që punoi palodhshëm për njohje ndërkombëtare të pavarësisë sonë, ta dekoroj në emër të shtetit dhe të popullit të Kosovës me Medaljen Presidenciale Jubilare të dhjetëvjetorit të pavarësisë. Kosova ka të ardhme të sigurt me miq nga i tërë spektri politik francez që përgjatë dekadave ishin mbrojtës dhe promovues të konsolidimit dhe forcimit të shtetit të Kosovës.”