MAQEDONI-Ivanov nuk dekreton ligjin për gjuhën shqipe

January 17, 2018 by dgreca

Shkup, 17 Janar 2018- Presidenti i vendit, Gjorge Ivanov, deklaroi për opinionin se ai ka vendosur të mos e dekretoj miratimin e ligjit për përdorimin e gjuhëve. Sipas presidentit ligji rrezikon karakterin unitar të shtetit , sovranitetin dhe integriten territorial të Maqedonisë.

1 Ivanov

“Më 11 janar të vitit 2018 Kuvendi i Maqedonisë e votoi ligjin për përdorim të gjuhëve pa debat publik, pa përfshirjen e ekspertëve akademik dhe pa opozitën. Në fjalimin e fundvitit theksova se ky ligj është sjell me flamuri evropian. Me miratimin e këtij ligji është keqpërdorur flamuri evropian i cili i ndryshon sistemet ligjore – tha mes tjerash Gjorge Ivanov, president i Maqedonisë.”

Qytetarët nga Mitrovica i japin lamtumirën Ivanoviqit

January 17, 2018 by dgreca

Vrasja e Ivanoviqit të mos shfrytëzohet për axhenda politike/

Qindra qytetarë nga Mitrovica i kanë dhënë lamtumirën Oliver Ivanoviqit, i vrarë të martën në mëngjes para zyrës së subjektit të tij politik, me emrin, iniciativa qytetare “Liria, Demokracia, Drejtësia” [SDP].

Kortezhi me arkivolin e Ivanoviqit është nisur nga Mitrovica veriore për në Beograd, ku pritet të varroset të enjten.

Ivanoviq ka qenë edhe deputet i Kuvendit të Kosovës në legjislaturën e parë. Vrasjen e Oliver Ivanoviqit, e kanë dënuar zyrtarët e institucioneve të larta të Kosovës.

Vrasja e Ivanoviqit të mos shfrytëzohet për axhenda politike

Këshilli i Sigurisë së Kosovës thekson se situata e sigurisë në Kosovë është e qetë. Kryeministri i Kosovës Ramush Haradinaj shprehet se dënohet çdo tendencë për ta shfrytëzuar politikisht vrasjen e Oliver Ivanoviqit.

Kosovo Trauer um Oliver Ivanovic (Reuters/D. Kojadinovic)

Këshilli i Sigurisë së Kosovës i kryesuar nga kryeministri Ramush Haradinaj, ka konstatuar se gjendja e sigurisë në Kosovë është e qetë dhe e qëndrueshme dhe se organet e rendit janë duke kryer me përgjegjësi detyrat e tyre në ruajtjen e qetësisë publike dhe të sigurisë për të gjithë qytetarët e vendit. Ky konstatim u bë nga organi më i lartë i sigurisë në vend, pas vrasjes një ditë më parë të liderit lokal serb nga veriu i Kosovës, Oliver Ivanoviq.

Kërkohet ndihmë nga qytetarët

Këshilli i Sigurisë së Kosovës diskutoi mbrëmë deri vonë për situatën e sigurisë, me theks të posaçëm atë në veri të Kosovës. “Këshilli i Sigurisë së Kosovës thekson se autoritetet e sigurisë dhe ato të ndjekjes po zhvillojnë hetime intensive në rastin e vrasjes së Oliver Ivanoviq dhe po hetojnë të gjitha pistat e mundshme. Organet e rendit kanë kërkuar nga të gjithë qytetarët, pa dallim, që të ofrojnë ndihmën dhe bashkëpunimin e tyre në zbulimin e kapjen sa më të shpejt të kryesve të këtij akti kriminal dhe sjelljen e tyre përpara drejtësisë”, thuhet në deklaratën e Këshillit të Sigurisë së Kosovës.

Kosovo Mitrovica trauert um Ivanovic (DW/J. Đukić-Pejić)

Policia e Kosovës është duke zhvilluar hetimet pas vrasjes së zotit Ivanoviq, një ditë më parë ndërsa ka vlerësuar që në rast të nevojës për ndihmë dhe ekspertizë në ndriçimin e rastit mund të kërkohet ndihmë profesionale edhe nga agjencitë e specializuara ndërkombëtare, në veçanti nga FBI e SHBA-së. Kërkesë drejtuar autoriteteve të rendit në Kosovës për ta hetuar vrasjen e Oliver Ivanoviqit, kanë kërkuar edhe autoritetet e Serbisë, por, një gjë e tillë tash për tash nuk iu është lejuar.

Akti kriminal nuk duhet të shfrytëzohet për axhenda politike

Kryeministri i Kosovës Ramush Haradinaj, tha se institucionet e Kosovës e dënojnë çdo tendencë që ky akt kriminal të shfrytëzohet për agjenda politike dhe të tjera nga kushdo qoftë. “Institucionet e Kosovës janë vërtetë në krye të detyrës, pra, policia. Policia e Kosovës po ashtu ka marrëdhënie të mira me plot organizata simotra. Sikur ne ta ndjejmë nevojën për ndihmesë në hetime, mund ta ftojmë FBI, që është shumë i besueshëm. Nuk i mirëpresim deklarimet e askujt për ndërhyrje në rend dhe ligj në veri. Mendojmë se edhe ky krim, por edhe zhvillime të caktuara kriminale që ndodhin në veri, janë po ashtu rezultat i përfshirjeve ilegale që ndodhin në veri nga instanca të tjera jashtë Kosovës”, tha kryeministri Haradinaj, pas mbledhjes së Këshillit të Sigurisë së Kosovës.

Makina nga u krye vrasja gjendet e djegur

Drejtori i Policisë së Kosovës, Shpend Maxhuni, nga ana e tij, ka thënë se në kuadër të hetimeve, policia deri tash ka informacione rreth makinës që është gjetur e djegur dhe besohet se është përdorur nga autorët e vrasjes së zotit Ivanoviq. “Kjo veturë ka qenë pa targa, por ne kemi arritur që të kemi informatat e nevojshme për prejardhjen e veturës dhe pronësinë e saj”, tha Shpend Maxhuni duke mos dhënë detaje të tjera që mund ta dëmtojnë procesin e hetimeve.

Vrasja e liderit lokal serb të veriut të Kosovës Oliver Ivanoviq, thelloi krizën e marrëdhënieve ndërmjet Kosovës dhe Serbisë. Delegacioni serb në bisedimet në Bruksel, ndërpreu dialogun teknik të rinisur pas disa muajsh ndërprerje. Shefi i këtij delegacioni Marko Gjuriq, tha se dialogu me Prishtinën nuk do të vazhdojë siç tha” pa marrë një përgjigje rreth vrasjes së Oliver Ivanoviqit”. Kryeministri i Kosovës, Ramush Haradinaj, u shpreh i habitur pse Beogradi ndërpreu “dialogun teknik” me Kosovën.

SHBA, përkrahje për FSK

January 13, 2018 by dgreca

-Me ftesë të Komandantit të Ushtrisë Amerikane për Evropë, Komandanti i FSK-së merr pjesë në Forumin Ndërkombëtar në Komandën e Forcave Ajrore të NATO-s/

PRISHTINË, 13 Janar 2018-Gazeta DIELLI/ Komandanti i Forcës së Sigurisë së Kosovës, gjenerallejtënant Rrahman Rama, me ftesë të Komandantit të Ushtrisë Amerikane për Evropë, gjeneral major Timothy McGuire, mori pjesë në Forumin Ndërkombëtar të Zjarrit Luftarak në Komandën e Forcave Ajrore të NATO-s në Gjermani. Në Forumin Ndërkombëtar morën pjesë përfaqësues ushtarakë të më se njëzet vendeve anëtare të NATO-s, ku u diskutua lidhur me trendët e reja në teknologjinë e zjarrit luftarak, ndërveprueshmërinë e zjarrit indirekt në fushat luftarake, si dhe për mësimet e mësuara nga operacionet e tanishme. Me këtë rast, komandanti i FSK-së, gjeneral Rama ka falënderuar përfaqësuesit e Ushtrisë Amerikane për përkrahjen dhe mbështetjen e vazhdueshme, si dhe për mundësitë e gjithanshme që po merr nga partnerët strategjikë në të mirë të avancimit dhe zhvillimit profesional të FSK-së./b.j/

Kryeparlamentari Veseli priti në takim Ambasadorin Amerikan Greg Delawie

January 13, 2018 by dgreca

Kryetari i Kuvendit të Kosovës, Kadri Veseli, ka zhvilluar sot një takim me Ambasadorin e Shteteve të Bashkuara të Amerikës në Prishtinë, Greg Delawie.Ata kanë biseduar për zhvillimet e fundit në vend dhe për agjendën e Kuvendit të Kosovës për vitin 2018.Në takimin e Kryetarit Veseli dhe Ambasadorit Delawie është theksuar nevoja e qëndrimit të përbashkët për çështjet me interes nacional.Veseli ka thënë se Kosova do t’u qëndrojë obligimeve te veta ndërkombëtare deri në fund, përfshirë edhe Dhomat e Specializuara, do të ndjekë agjendën e integrimeve euroatlantike, dhe në këtë rrugëtim partneriteti me SHBA-të do të mbetet primar.

Kryetari Veseli ka falënderuar ambasadorin amerikan për përkrahjen konstante që SHBA-të i japin Kosovës.(E dergoi zyra e Kryeparlamentarit te Kosoves).

Komenti-Kryetari i Parlamentit të Kosovës, Kadri Veseli tha të shtunën se Kosova do t’u qëndrojë detyrimeve ndërkombëtare deri në fund, përfshirë edhe Gjykatën e Posaçme për krime lufte.Sipas një komunikatë të zyrës së zotit Veseli, zotimi i yij u bë gjatë një takimi me ambasadorin amerikan në Prishtinë Greg Delawie.

Në njoftim thuhet se zoti Veseli theksoi “nevojën e qëndrimit të përbashkët për çështjet me interes nacional. Kosova do t’u qëndrojë obligimeve te veta ndërkombëtare deri në fund, përfshirë edhe Dhomat e Specializuara, do të ndjekë agjendën e integrimeve euroatlantike, dhe në këtë rrugëtim partneriteti me Shtetet e Bashkuara të Amerikës do të mbetet primar”, thuhet në njoftim.

Me 22 dhjetor një grup prej 43 deputetësh hodhi nismën për të shfuqizuar ligjin mbi Gjykatën e Posaçme, që do të trajtojë pretendimet për përfshirjen e ish pjesëtarëve të Ushtrisë Çlirimtare të Kosovës në krime lufte. Nisma nxiti reagime të ashpra të diplomacisë perëndimore.

Departamenti amerikan i shtetit u bëri thirrje “me forcë udhëheqësve aktualë të Kosovës dhe anëtarëve të Parlamentit që mos ta zhbëjnë atë arritje duke e prekur gjykatën tani ose në të ardhmen”.

Ambasadat e pesë vendeve kryesore perëndimore në Kosovë paralajmëruan për pasojat e rënda që mund të ketë për vendin përpjekja për shfuqizimin e Gjykatës së Posaçme.

Berlini dhe Parisi dërguan një delegacion për të takuar përfaqësuesit e institucioneve dhe partive politike në Kosovë për të diskutuar pasojat e një nisme të tillë.

Çështja është ende pezull, pasi që parlamenti i Kosovës ndodhet në pushim dimëror deri më 15 janar. Për të mërkurën më 17 janar është paralajmëruar mbledhja e kryesisë së parlamentit dhe ndër pikat e rendit të ditës është edhe nisma e deputetëve për të shfuqizuar ligjin për Gjykatën e Posaçme.

Ideja për shfuqizimin e gjykatës pasoi nënshkrimin e një peticioni nga ana e Organizatave të veteranëve të ish Ushtrisë Çlirimtare të Kosovës me anë të të cilit kërkohet nga parlamenti të ndryshohet dhe plotësohet ligji për Gjykatën e Posaçme për krime lufte, të cilën ata e cilësojnë diskriminuese për Kosovën.(VOA)

Ambasadori Lu: Hetim të plotë çështjes Tahiri

January 12, 2018 by dgreca

Shtetet e Bashkuara të Amerikës janë të gatshme të ofrojnë prokurorë të FBI-së për hetimin e çështjeve të korrupsionit të nivelit të lartë, siç cilësohet ajo ku është i përfshirë edhe ish-ministri i Brendshëm, Saimir Tahiri. Deklarata është bërë sot nga ambasadori i SHBA-ve, Donald Lu, i pyetur nga “BalkanWeb”, në përfundim të një takimi me ministrin e Brendshëm, Fatmir Xhafaj në prani edhe të ambasadores së BE-së, Romana Vlahutin. Sipas Ambasadorit Lu, çështja e zotit Tahiri kërkon një hetim të plotë dhe proces të paanshëm ligjor, e në këtë pikë SHBA-të janë të gatshme të ofrojnë edhe prokurorë të FBI-së, për ta hetuar.

Ambasadori Lu, gjatë takimit tuaj me Ministrin Xhafaj, a biseduat çështje korrupsioni të nivelit të lartë, si ajo e Saimir Tahirit?

Ambasadori Lu: Çështja e Z. Tahiri kërkon një hetim të plotë dhe proces të paanshëm ligjor. Ashtu si vetë Z. Tahiri dhe shumë udhëheqës të tjerë shqiptarë e kanë thënë, kjo çështje duhet zgjidhur në gjykatë, duke shqyrtuar të gjitha faktet. Bota, përfshirë edhe Shtetet e Bashkuara, po e ndjek nga shumë afër këtë çështje dhe çështje të tjera sensitive, si ato të Emiljano Shullazit, Lul Berishës dhe tre gjykatësve të apelit në Durrës. Ne kemi ofruar mbështetjen e prokurorëve federalë amerikanë dhe agjenci të zbatimit të ligjit të Shteteve të Bashkuara për t’i ofruar ndihmë teknike Prokurorisë në kryerjen e një hetimi të plotë, i cili ka për qëllim zbulimin e të vërtetës. Ne do donim të shihnim një hetim më aktiv nga prokurorët dhe policia gjyqësore, dhe e kemi përcjellë këtë mesazh. Në një demokraci të vërtetë, askush nuk është mbi ligjin.{SH.K}