Kronike – Page 258 – Dielli

Avionët amerikanë e rusë fluturojnë 3 metra larg mbi Detin e Zi

September 8, 2016 by dgreca

Pentagoni njoftoi se një avion luftarak rus ka fluturuar vetëm 3 metra larg njërit prej avionëve të tij të gjurmimit që ndodhej mbi Detin e Zi. Zyrtarët amerikanë e përshkruan veprimin e SU-27 si joprofesional dhe të rrezikshëm. Ministria ruse e Mbrojtjes nuk vonoi të paraqiste variantin e saj të ngjarjes e tha se avioni amerikan ndodhej shumë pranë territorit rus. Sa i takon pilotëve të SU-27-s, ata për Moskën i janë përmbajtur rregullave ndërkombëtare të fluturimit e janë afruar sepse avioni amerikan e kishte të fikur transponderin sinjalizues që ndihmon në identifikimin e mjetit.
Avioni amerikan P-8A Poseidon nga ana tjetër, sipas shpjegimeve të Pentagonit, ishte duke kryer operacione rutinë në hapësirën ndërkombëtare kur avioni rus iu afrua rrezikshëm. Të tilla veprime bartin potencialin e përshkallëzimit të tensioneve e mund të çojnë më e pakta fare edhe në aksidente, ishte deklarata e zyrtarëve amerikanë. Rusia aktualisht është duke zhvilluar manovra ushtarake në Detin e Zi. Marrëdhëniet mes saj dhe Perëndimit janë ashpërsuar ndjeshëm që prej aneksionit të Krimesë marsin e vitit 2014. Prillin e këtij viti, Shtetet e Bashkuara u ankuan se avionët rusë ishin përballur në një mënyrë të ngjashme me këtë të fundit me avionët e saj të zbulimit që fluturonin mbi Detin Balltik. Edhe në atë rast, Moska përdori të njëjtin shfajësim: fikjen e transponderit sinjalizues.

Policia e Kosovës feston 17-vjetorin e themelimit

September 7, 2016 by dgreca

-Kryeministri Mustafa: Policia e Kosovës simbol i përkushtimit në shërbim të qytetarëve dhe të Republikës/

-Policia e Kosovës vlerësohet se vazhdon të jetë një ndër institucionet me besimin më të madh të qytetarëve në vendin e lirë prej 17 vitesh dhe të pavaur nga 17 shkurti 2008/

PRISHTINË, 6 Shtator 2016-Gazeta DIELLI-B.Jashari/ Policia e Kosovës festoi sot ditën e 17-vjetorit të themelimit, me një ceremoni zyrtare, me pjesëmarrje edhe të përfaqësuesve të lartë të institucioneve vendore dhe ndërkombëtare.

Kryeministri i Republikës së Kosovës, Isa Mustafa, e quajti përvjetor të punës dhe sakrificës 17- vjetorin e themelimit të Policisë së Kosovës, të cilin e quajti institucion të rëndësishëm dhe të besueshëm.“Mund të them se ju keni bërë një punë të mrekullueshme, se Policia e Kosovës e ka bërë një punë të lartë profesionale, ka treguar profesionalizëm, ka treguar disiplinë, ka treguar përkushtim për mbajtjen e rendit dhe qetësisë në shërbim të qytetarëve të Republikës së Kosovës dhe në shërbim të integritetit territorial dhe sovranitetit të vendit tonë. Ka zbatuar në mënyrë të përkushtuar ligjet dhe Kushtetutën e Republikës së Kosovës ”, ka thënë kryeministri.

Më tej, kryeministri Mustafa shprehu përkushtimin e Qeverisë që të ndihmoj edhe më shumë zhvillimin e këtij institucioni.

“Ajo që mbetet të them si kryeministër është se ne mburremi me ju, mburremi me punën që e keni bërë, dhe do ta keni një përkrahje të pa rezervë, në mënyrë që ky institucion të zhvillohet ashtu siç është zhvilluar, dhe të kryej përgjegjësitë e saj në mënyrën më të mirë. Unë e di që ju nuk e keni pasur lehtë, sidomos kohëve të fundit, jeni ballafaquar me shumë sfida dhe probleme, por mund të them se të gjitha këto i keni menaxhuar mirë, e keni mbrojtur qytetarin e Kosovës, keni mbrojtur pasurinë e shtetit, e keni zbatuar ligjin. Ju përgëzoj për të gjitha punët e mira që i keni bërë dhe për sukseset që i keni arritur, juve, udhëheqësinë e juaj, Ministrinë e Punëve të Brendshme. Po ashtu dëshiroj që këto suksese bashkërisht t’i rrisim dhe t’i shtojmë edhe në periudhën e ardhshme”, ka theksuar kryeministri Mustafa.

Ministri i Punëve të Brendshme, Skender Hyseni, tha se 17 vjet pas themelimit, Kosova ka arsye për të qenë krenare me polici profesionale, me integritet të madh njerëzor dhe profesional, e cila me përkushtim ka mbrojtur Republikën.

“Ju të nderuar oficerë dhe pjesëtarë të Policisë së Kosovës, më mirë se çdo kush tjetër keni dëshmuar se jeni mbrojtës të pa kompromis të ligjeve dhe Kushtetutës së Republikës së Kosovës. Do të vazhdoni të përballeni me sfidat që jeni përball gjatë vitit që po e lëmë pas, por unë jam i sigurt që do të vazhdoni po me të njëjtin intensitet t’i adresoni ato sfida, me ekspertizë të pashoqe që e keni demonstruar gjatë vitit që po e lëmë pas, me integritet, me guxim edhe qytetar edhe institucional, në mënyrë që qytetarët e Republikës së Kosovës, pa dallim përkatësie etnie, përkatësie fetare, kulturore apo gjinore, ta ndjejnë veten të sigurt në shtëpinë e vet. E, shtëpia e të gjithë neve është Republika e Kosovës, që ndonjë i shkalluar mund edhe ta mohoj, mirëpo Republika e Kosovës po bëhet gjithnjë më e fuqishme, më e fortë dhe më e konsoliduar”, ka theksuar ministri Hyseni.

Drejtori i Përgjithshëm i Policisë së Kosovës, Shpend Maxhuni, foli për rrugëtimin e Policisë së Kosovës që nga themelimi i saj e deri në ditët e sotme, por edhe për përkushtimin dhe sfidat me të cilat u përballën.

“Rrugëtimi 17-vjeçar i mijëra grave dhe burrave të Policisë së Kosovës të devotshëm për t’iu shërbyer qytetarëve çdo herë, ka bërë që Policia e Kosovës të gëzoj respekt dhe mbështetje nga të gjithë”, tha drejtori Maxhuni.

Gjatë kësaj ceremonie u bë ndarja çertifikatave për zyrtarët policorë që janë shquar për punën e tyre dhe rezultatet e arritura.

Policia e Kosovës vlerësohet se vazhdon të jetë një ndër institucionet me besimin më të madh të qytetarëve në vendin e lirë prej 17 vitesh dhe të pavaur nga 17 shkurti 2008.

Në 6 shtator të vitit të lirisë 1999, Misioni i OSBE-së në Kosovë, në pajtim me Rezolutën e Kombeve të Bashkuara 1244, ka hapur në qytetin e Vushtrrisë Shkollën e Policisë dhe ka filluar trajnimin për pjesëtarë të Policisë së Kosovës.
Brezi i parë i kandidatëve kishte 176 pjesëtarë, të cilët me sukses përfunduan trajnimin dhe pastaj filluan ushtrimin e veprimtarisë policore në tërë territorin e Kosovës, një shërbim i ri i krijuar në bazat e një policie demokratike dhe profesionale, i hapur dhe i barabartë për të gjithë të interesuarit që dëshrirojnë të bëhen pjesëtarë. Trajnimi në Shkollën e Policisë së Kosovës vlerësohet me standarde të larta.

Kosovë-Tre krerë të rinj të pranisë ndërkombëtare

September 2, 2016 by dgreca

-Komandant i ri të KFOR-it, Gjeneral Majori Giovanni Fungo/

-Shefe e re e Zyrës së BE-së në Kosovë dhe Përfaqësuesen e Posaçme e BE-së, Nataliya Apostolova/

– Shefje e re e Misionit të Bashkimit Evropian për Sundimin e Ligjit në Kosovë (EULEX), Alexandra Papadopoulou/

PRISHTINË, 2 Shtator 2016-Gazeta DIELLI-Behlul Jashari/ Presidenti i Republikës së Kosovës, Hashim Thaçi, priti sot në takime të ndara Shefen e re e Zyrës së BE-së në Kosovë dhe Përfaqësuesen e Posaçme e BE-së, Nataliya Apostolova, si dhe Shefjen e re të Misionit të Bashkimit Evropian për Sundimin e Ligjit në Kosovë (EULEX), Alexandra Papadopoulou, të cilat kanë marrë dje detyrat. Apostolova wshtw me kombësi bullgare, ndwrsa Papadopoulou greke.

Kështu niswn takimet njohëse me autoritetet e vendit krerët e rinj të pranisë ndërkombëtare në Kosovë, që kanë marrë pozitat në të njëjtën ditë, dje, dhe janë tre përfshirë komandantin e ri të KFOR-it, Gjeneral Majorin Giovanni Fungo.

Presidenti Thaçi mori pjesë në ceremoninë e ndërrimit të komandës së forcës paqeruajtëse të NATO-s në Kosovë në mes të Gjeneral Majorit italian në largim Guglielmo Luigi Miglietta dhe bashkwkombasit tw tij Gjeneral Majorit në ardhje Giovanni Fungo, të zhvilluar dje në Shtabin e Përgjithshëm të KFOR-it, në Kampin “Film City” në Prishtinë.

Për punën e tij në Kosovë, për thellimin e besimit dhe të përkrahjes për të gjithë banorët, Presidenti Thaçi e dekoroi Gjeneral Majorin Miglietta me Medaljen Ushtarake të Presidentit të Kosovës.

Presidenti Thaçi priti shefen e re të zyrës së BE-së, Nataliya Apostolova

Presidenti i Republikës së Kosovës, Hashim Thaçi, ka pritur sot në takim përfaqësuesen e Posaçme të BE-së, Nataliya Apostolova, të cilës i ka uruar punë të mbarë në detyrën e re.

Presidenti Thaçi ka theksuar se Kosova në vitet e shkuara ka bërë përparime të prekshme në jetësimin e aspiratave të qytetarëve të Kosovës për anëtarësim në Bashkimin Evropian. “Me mbështetjen tuaj do t’i tejkalojmë edhe sfidat e mbetura”, ka shtuar Thaçi.

Nga ana tjetër, shefja e re e zyrës së BE-së në Kosovë, Nataliya Apostolova, ka rikonfirmuar mbështetjen e BE-së për perspektivën evropiane të Kosovës.

“Pres me padurim të punojë me juve në avansimin e axhendës së BE-së për Kosovën, në çështjet si zbatimi i MSA-së, viza liberalizimi, të drejtat e njeriut dhe vazhdimin e dialogut për normalizimin e marrëdhënieve mes Beogradit e Prishtinës, ku BE-ja është e angazhuar në mënyrë të barabartë me të dyja palët. Jam në mënyrë të veçantë e inkurajuar me dakordimin që të kemi takime të rregullta për të kumtuar se çfarë nënkupton BE-ja për qytetarët e Kosovës.””, u shpreh Apostolova.

Në këtë takim, presidenti Thaçi ka theksuar se sa më parë duhet të ndodh liberalizimi i vizave për qytetarët e Kosovës, në mënyrë që edhe ata të bëhet pjesë e lëvizjes së lirë në Evropë.

Presidenti Thaçi me shefen e re të EULEX-it flasin për bashkëpunimin në fushën e drejtësisë

Presidenti i Republikës së Kosovës, Hashim Thaçi, ka pritur sot në takim edhe shefen e re të EULEX-it, Alexandra Papadopoulou.

Me shefen e EULEX-it, kreu i shtetit ka diskutuar për bashkëpunimin e mirë të institucioneve të Kosovës me EULEX-in, për shtimin e kapaciteteve të reja dhe për sfidat e institucioneve të drejtësisë.

“Bashkëpunimi me institucionet dhe puna e mirë e EULEX-it kanë bërë që deri më tani ky mision të ketë shumë suksese në Kosovë. Falë mbështetjes së EULEX-it edhe institucionet tona të drejtësisë janë fuqizuar dhe kanë rritur kapacitetet e tyre të punës”, është shprehur presidenti Thaçi.Ndërsa, shefja e re e EULEX-it, Alexandra Papadopoulou, tha se EULEX do të vazhdojë bashkëpunimin me institucionet e Kosovës dhe brenda përgjegjësive që ka gjithnjë do t’i mbështes ato.

“Kosova ka qenë dhe mbetet e përkushtuar në konsolidimin e sundimit të së drejtës”, theksoi presidenti Thaçi.

Shefen e re të EULEX-it, Alexandra Papadopoulou, presidenti Thaçi e uroi edhe për detyrën e saj të re në Kosovë.

Ministri Çollaku pret në takim njoftues shefen e re të Zyrës së BE-së, përfaqësuesen e posaçme të BE-së, Apostolova

Ministri i Integrimit Evropian, Bekim Çollaku, priti në takim njoftues shefen e re të Zyrës së Bashkimit Evropian njëherësh përfaqësuese e posaçme e BE-së në Prishtinë, Nataliya Apostolova, së cilës i dëshiroj mirëseardhje në Kosovë.

Ministri Çollaku shprehu përkushtimin e institucioneve për të vazhduar bashkëpunimin me Zyrën e BE-së në drejtim të avancimit të agjendës evropiane për Kosovën.

Gjatë takimit ministri e ka njoftuar Apostolova për angazhimet lidhur me zbatimin e

MSA-së rezultatet e para të së cilës kanë filluar të formësohen duke shtuar se kjo është agjendë e reformave e cila pritet të dinamizohet gjatë muajve në vazhdim.

Kurse sa i përket procesit të liberalizimit të vizave përkundër zhvillimeve të djeshme në Kuvendin e Kosovës, përkatësisht tërheqjes nga rendi i ditës të Projektligjit për ratifikimin e Marrëveshjes për shënimin e vijës kufitare ndërmjet Kosovës dhe Malit të Zi, ministri Çollaku theksoi se BE-ja duhet të vazhdojë me procedurat e vendimmarrjes dhe të marr vendim pozitiv për Kosovën.

“Kosova ka bërë më shumë reforma dhe ka përmbushur shumë më tepër kritere se çdo shtet tjetër i Ballkanit Perëndimor që ka përfituar nga procesi i liberalizimit të vizave. Prandaj pres vlerësime pozitive në këtë drejtim dhe sigurojmë institucionet e BE-së se Kosova do të vazhdojë me agjendën e reformave duke respektuar dhe zbatuar obligimet që dalin nga procesi i liberalizimit të vizave dhe procesi i integrimit evropian në përgjithësi”, ka thënë ministri Çollaku.Shefja e re e Zyrës së BE-së në Kosovë njëherësh përfaqësuesja e Posaçme e BE-së, Nataliya Apostolova e falënderoi Ministrin Çollaku për mikpritjen e ngrohtë në Kosovë.” Jam e lumtur që Kosova është plotësisht e përkushtuar në rrugën e saj evropiane dhe pres të punojmë bashkërisht në avancimin e saj, në mënyrë të posaçme në zbatimin e MSA-së dhe komunikimin e axhendës së BE-së te qytetarët e Kosovës”, ka thënë Apostolova.

SHBA – Shpërthim në Qendrën Hapësinore Kennedy

September 1, 2016 by dgreca

Një shpërthim i madh ka ndodhur në Qendrën Hapësinore Kennedy në Florida.

Kompania hapësinore Space X po përgatitej për nisjen e një rakete nga toka.Shkaku i shpërthimit nuk ishte i qartë dhe ende nuk dihet nëse ka të lënduar.

Pamjet nga vendngjarja tregojnë një shtëllungë të madhe tymi që ngrihet mbi kompleks.Fuqia e shpërthimit tronditi ndërtesat që ndodhen disa milje larg.

Zyrat e emergjencës locale e përshkruan incidentin si një “abort katastrofik gjatë një prove statike zjarri”.Nëpërmjet një statusi në Twitter, Zyra e Menaxhimit të Emergjencave Brevard Country njoftoi se nuk përbënte rrezik për publikun.Space X po kërkon të krijojë një epokë të re të raketave dhe udhëtimit hapësinor.Space X ka përdorur raketat e saj Falcon-9 për të marrë furnizime për në Stacionin Hapësinor Ndërkombëtar.

Kosovë-140 studentë punë praktike në Ministrinë e Financave

August 31, 2016 by dgreca

-Ministri i Financave Avdullah Hoti: Të gjithë studentet që do të përfshihen në këtë proces të punës praktike do të jenë të përgatitur për tregun e punës/

PRISHTINË, 31 Gusht 2016-Gazeta DIELLI-B.Jashari/ Në Ministrinë e Financave sot u mbajt ceremonia e nënshkrimit të kontratave të studentëve të Grupit të Dytë (II) nga Universiteti i Prishtinës “ Hasan Prishtina”, të cilët janë përzgjedhur për angazhim në punë praktike në Ministrinë e Financave, në bazë të Memorandumit të Bashkëpunimit në mes të Ministrisë së Financave dhe UP “Hasan Prishtina”.

Kontratat u nënshkruan nga 140 studentët e grupit të dytë të përcaktuar sipas listave të dërguara nga Universiteti i Prishtinës “Hasan Prishtina” në Ministrinë e Financave. Në këtë grup bëjnë pjesë 100 studentë nga Fakulteti Ekonomik, 30 studentë nga Fakulteti Juridik, si dhe 10 studentë nga Fakulteti i Shkencave Matematikore- Natyrore.

Ministri i Financave Avdullah Hoti , duke përgëzuar studentët Universitetit të Prishtinës për nënshkrimin e kontratave, tha se “Kam kënaqësinë që po nënshkruajmë bashkë me bashkëpunëtorët e mijë nga Ministria e Financave, nga Administrata Tatimore e Kosovës, Dogana dhe Agjencia Qendrore e Prokurimit, kontratat me grupin e dytë prej 140 studentëve duke u bazuar në Memorandumin e Bashkëpunimit me Universitetin e Prishtinës”.

Sipas ministrit Avdullah Hoti grupi i dytë i studentëve, ashtu edhe si edhe grupi i parë të cilët tashmë e kanë përfunduar punën praktike, do të sistemohen në Ministrinë e Financave dhe në agjecionet e saj në Administratën Tatimore, Dogana dhe Agjencinë Qendrore të Prokurimit, ku për periudhën 3 mujore do të angazhohen në punë praktike. Ku sipas tij të gjithë studentet që do të përfshihen në këtë proces të punës praktike do të jenë të përgatitur për tregun e punës.

“Ky është grupi i dytë me radhë ,mandej do të jenë edhe 2 grupe të tjera të studentëve të UP “Hasan Prishtina”, ku do të ju mundësohet aftësimi profesional në fushat që lidhen me Ministrinë e Financave dhe agjencitë e saj. Puna praktike që studentët kryejnë në Ministrinë e Financave dhe agjencitë e saj zgjat tre muaj dhe është me pagesë”, shtoi ministri Hoti.

Ndërsa, Rektorit i Universitetit të Prishtinës “Hasan Prishtina” Marjan Dema, duke falënderuar Ministrinë e Financave, respektivisht Ministrin Hoti për ketë mundësi të shkëlqyer për studentët e Universitetit të Prishtinës për ngritjen profesionale të tyre, uroi edhe të gjithë studentet përfitues nga kjo skeme bashkëpunimi dhe njëkohësisht, kërkoj nga studentet përgjegjësi maksimale profesionale dhe etike në pune për realizmin e qëllimeve të tyre për ngritjen në karrierën.

“Jam tejet i lumtur që në emrin tim personal dhe stafit të Universitetit të Prishtinës të jam pjesëmarrës me rastin e nënshkrimit të kontratave për ciklin e dytë për studentet përfitues si pjese e Marrëveshjes së Bashkëpunimit ndërmjet Ministrisë së Financave dhe Universitetit të Prishtinës “Hasan Prishtina” për angazhimin e studentëve në punë praktike. Unë si Rektor i Universitetit të Prishtinës, ofroj gjithë gatishmërinë time dhe stafit të këtij institucioni që të vazhdojmë dhe intensifikojmë bashkëpunimin e ndërsjellë në mes të institucioneve tona në fusha të ndryshme”, shtoi Rektori Marjan Dema .Në këtë ceremoni i pranishëm ishte edhe dekani i Fakultetit Ekonomik në Universitetin e Prishtinës “Hasan Prishtina” But Dedaj.