Kryeministri Mustafa: Ilaz Kurteshit, kontribut të madh për realizimin e aspiratave të popullit të Kosovës/
Prishtinë, 13 shkurt 2016/ Kryeministri i Republikës së Kosovës, Isa Mustafa, ngushëlloi Familjen Kurteshi dhe qytetarët e Kosovës me rastin e ndarjes nga jeta të veprimtarit të shquar, Ilaz Kurteshi.
Duke shprehur pikëllimin për ndarjen nga jeta të Ilaz Kurteshit, kryeministri Isa Mustafa theksoi kontributin e madh të tij për realizimin e aspiratave të popullit të Kosovës në rrugën e gjatë të krijimit të shtetit të pavarur dhe sovran të Kosovës.
Kryeministri Isa Mustafa ka veçuar rolin e rëndësishëm që Ilaz Kurteshi ka dhënë gjatë hartimit të Kushtetutës së vitit 1974 dhe në themelimin e institucioneve të rëndësishme të Kosovës, si Bibliotekës Universitare, Akademisë së Shkencave dhe të Arteve të Kosovës, Institutit Albanologjik dhe Radio Televizionit të Prishtinës.
Duke shprehur ngushëllimet më të sinqerta në emër të Qeverisë së Kosovës, kryeministri Isa Mustafa, theksoi se vdekja e Ilaz Kurteshit është humbje e madhe për familjen, për miqtë dhe për shtetin e Kosovës, përfundonnjoftimi dërguar sonte nga Kryeministria kosovare.
Ilaz Kurteshi ka lindur në vitin 1927, ishte një nga personalitetet më kontribuese kosovare në kohën kur Kosova ishte element konstituiv me të drejtë vetoje i federatës. Mes tjerash, ishte kryetar i Kuvendit të federatës së atëhershme, nga shpërbërja e së cilës elementet konstituive, përfshirë Kosovën, u bënë shtete të pavarura.
Sot u njoftua se pas një sëmundje të gjatë Ilaz Kurteshi është ndarë nga jeta./b.j/
Zonja Voltana Ademi dhe nje grup kryebashkiakesh nga Shqiperia, vizite ne SHBA
Kryetarja e Bashkisë Shkodër, znj. Voltana Ademi, gjatë takimeve në Shtetet e Bashkuara të Amerikës
Beqir SINA – New York City/
NEW YORK CITY : Znj. Voltana Ademi Kryetarja e Bashkisë së Shkodrës – një ndër bashkitë më të mëdha në Shqipëri, me rreth 150 mijë banorë, këto ditë ndodhet së bashku me një grup të kryetareve të bashkive nga Shqipëria, në Shtetet e Bashkuara për një vizitë zyrtare e ftuar nga një program i Departamenti i Shtetit Amerikan
Kjo vizitë zhvillohet në kuadër të Programit të Lidershipit që organizohet prej gjashtedhjetë vitesh nga Departamenti i Shtetit Amerikan me liderit administrative të bashkive nëpër botë.
Pjesë e kësaj vizite ishin edhe kryetarë të tjerë të bashkive të Shqipërisë, Vlorës, Fierit,e të tjerë.
Takimet e zhvilluara këtu në SHBA- ishin me kryetarë të bashkive dhe zyrtarë të distrikteve menaxhuese në Washington DC, në Charlotte dhe Catawba(në shtetin e North Caroline), në Portland dhe në shtetin e Oregonit, në Indianapolis dhe Carmelit(në shtetin Indiana) dhe në Albany, në shtetin e New York-ut.
Gjithashtu, kryetarët pjesëmarrës të bashkive të Shqipërisë, u takuan me përfaqësues të Departamentit të Shtetit, drejtues të programit ndërkombëtar për mbështetjen e lidershipit.
Kurse, mbrëmë Kryetarja e Bashkisë Shkodër, znj. Voltana Ademi, gjatë takimeve të saj në Shtetet e Bashkuara të Amerikës, ka pasur një takim privat – mjaft të ngrohtë me Asamblesitin e parë shqiptarë në Asamblenë e Nju Jorkut, zotin Mark Gjonaj.
Në këtë takim mori pjesë edhe anëtari i stafit Gjonaj, zoti Stefan Gjurraj.
Mark Gjonaj – duke ia uruar vizitën në Nju Jork, kryeqendrën e shqiptarëve të Amerikës, dhe suksese, kryetares ( Mayor of Shkodra ) zonjës Ademi, i tha asaj se së bashku me komunitetin shqiptarë dhe Asamblenë dhe Govermentin në Shtetin e New Yorkut, Bashkinë e qytetit, ne po punojmë fortë, për të hapur edhe një Qender Kulturore Shqiptare, në këtë qytet- Dhe, kemi realizuar gjatë gjithë vitit së bashku me shoqatat dhe organizatat e komunitetit, disa veprimtari të rëndësishme kombëtare, duke i mbledhur dhe bërë së bashku gjithë komunitetin shqiptarë, nga Shqipëria, Kosova, shqiptarët e Mali të Zi, Maqedonia, Lugina e Preshevës dhe Çamëria, për të festuar festat tona kombëtare ruajtur e kultivuar traditën tonë edhe këtu përtej oqeanit – duke shërbyer kështu edhe si ura lidhje mes SHBA dhe vendlindjes sonë”.
Gjate takimit, me asamblestin Gjonaj, u bisedua edhe për komunikim, bashkëpunim – më të mirë jo vetëm me komunitetin shqiptarë, por edhe me institucionet amerikane. U folë edhe për ndonjë investim në qytetin e Shkodrës, mbasi Nju Jorku, është edhe një nga qytetet më numërin më të madh të komunitetit shkodran, biznesmen , afaristë dhe njerëz të suksesshëm, që kan dëshirë e vullnet, për të investuar në qytetin e tyre – Shkodrën.
Ndërkohë, duke e falenderuar për pritjen e rezuervuar me këtë rast- kreu i bashkisë Shkodër, znj. Voltan Ademi, tha se ne jemi të impresionuar për arritjen tuaj dhe ju përgëzojmë, që ju jeni shqiptari i parë në një detyrë kaq të lart zyrtare në shtetin e New Yorkut, duke ngritur lart emrin e shqiptarëve të Amerikës, të cilët kan dhë një kontribut historik, për Shqipërinë, pavarësinë e Kosovës, dhe të drejtat e shqiptarëve kudo që ata jetojnë.
“Mirëpresim, çdo lidhje dhe investim nga diaspora, tha ajo duke i siguruar çdo njeri që vendos të investojë në Shkodër, dotë gjejë, tek ne në Shqipëri, gadishmërinë tonë – për t’u ndihmuar, sidomos, në lehtësira dhe duke ju siguruar një kuadër të sistemit ligjor, për t’ u dhënë prioritet investimeve nga bashkëatdhetarët tanë, në SHBA, që janë mëse të mirëpritura”.
Ajo foli më pastaj edhe për rritjen e bashkëpunimit mes shoqatave të biznesit shqiptarë në Amerikë : “Kështu, që edhe nepermjet ketij bashkëpunimi mendojë tha kreu i bashkisë Shkodër, ne do të jemi sa më afër njeri tjetrit, mbasi tani kemi një numër të madh me shqiptarë, që kanë bërë histori suksesi, dhe që jetojnë e punojnë këtu në SHBA”.
Zonja Ademi – tregojë edhe për sistemin tregatar, të cilin ajo e quajti një prioritet me garantu atë të disaporës dhe huajt për të shkuar në Shkodër dhe investuar atje.
Ndër proiritet e saj – për bashkinë, numëri një i Shkodrës, Kryetarja e Bashkisë Voltana Ademi renditi : Rregullimin e master planit për zonën e qytetit, Gjykatat, Punësimi, Bujqësia, Emigracioni, dhe Tregëtia. “Mbasi, ajo dhe stafi i saj tregon besnikëri dhe vendosmëri, ndaj këtyre premtimeve – andaj edhe në bashki kan një vullnet të mirë, për ti realizuar ato” tha Ademi.
Ndërkohë, që nesër thuhet se ajo do të marrë pjesë në darkën festive në Bronx – New York me rastin e 8 Vjetorit të pavarësisë së Kosovës, sot ajo u takua më drejtuesit kryesorë të Vatrës.
Kurse, tek Vatra, zonja Ademi bëri një vizitë në shtëpinë e Vatrës (Federatën PanShqiptare të Amerikës Vatra) në Bronx, New York, për të konfirmuar edhe një herë lidhjet e shumë të mira dhe të hershme, që ka Shkodra me Vatrën,më e vjetra në komunitetin shqiptar në SHBA, me një rol dhe kontributë, historik, ku ajo u pritë nga Kryetari i Vatrës, dr Gjon Buçaj dhe bashkëshortja e tij, Nikoleta Buçaj, dhe udhëheqësit e kësaj organizate, nga New Yorku e kryesia nga dega e Vatres në Detroit dhe këngëtari i mirënjohur shkodran Frederik Ndoci.Televizioni Kultura Shqiptare, ne New York ndoqi takimin tek Vatra
Ja si do ta festojë Kosova 8 vjetorin e Pavarësisë…. edhe me parakalim të FSK-së
-Axhenda e manifestimeve e aprovuar nga Këshilli Organizativ për shënimin e tetë vjetorit të Pavarësisë së Kosovës/
Nga Behlul Jashari/ PRISHTINË, 12 Shkurt 2016/ Kosova ka nis festimet e 17 Shkurtit, ditës historike kur në vitin 2008 në Kuvendin e saj shpalli Pavarësinë. Qeveria e Kosovës në mbledhjen në prag të muajit shkurt të festimeve ka themeluar Këshillin Organizativ për shënimin e tetë vjetorit të Pavarësisë së Republikës së Kosovës.
Këshilli Organizativ për shënimin e tetë vjetorit të Pavarësisë së Kosovës ka aprovuar axhendën e manifestimeve dhe e ka bërë të ditur sot për Gazeten Dielli.
Në Prishtinë, në datë 17 shkurt 2016 në ora 10.00, sipas vendimit të qeverisë së Republikës së Kosovës do të bëhet parakalimi i kuadrateve të FSK-së dhe njësive të Policisë së Kosovës. Parakalimi përcillet edhe me aktivitete të tjera akrobatike të kadetëve në shesh si dhe nga bendi muzikor i FSK-së.
Tradicionalisht, në çdo 17 Shkurt ka edhe koncerte dhe njerëzi në festë mbushin sheshet dhe rrugët me defilime për Lirinë dhe Pavarësinë, për të shprehur edhe falënderimin e mirënjohjen e përjetëshme për të gjithë kontribuesit në botë.
Këshilli Organizativ për shënimin e tetë vjetorit të Pavarësisë së Kosovës, i themeluar
me vendim Nr. 09/72, ka aprovuar këtë:
AXHENDË
*të manifestimeve për shënimin e 8-vjetorit të Shpalljes së Pavarësisë së Republikës së
Kosovës në muajin shkurt 2016.
*Manifestimet për shënimin e 8-vjetorit të Shpalljes së Pavarësisë do të përfshijnë:
Aktivitetet e organizuara nga Presidenca;
Aktivitetet e organizuara Qeveria;
Aktivitetet nëpër komunat e Kosovës, dhe
Aktivitetet e përbashkëta me institucionet nacionale.
Aktivitetet me rastin e Ditës së Pavarësisë do të organizohen edhe në të gjitha ambasadat dhe përfaqësitë diplomatike të Kosovës. Këtë vit, Dita e Pavarësisë do të shënohet kryesisht me ngjarje kulturore dhe këto ngjarje do të fillojnë më 10 shkurt 2016, ndërsa finalizohen më 17 shkurt 2016. Deri më tani, në kuadër të muajit të Pavarësisë, janë mbajtur aktivitete që në kuadër të tyre kanë pasur fokus shënimin e 8 vjetorit të pavarësisë. Aktivitetet e mbajtura deri më tani përfshijnë:
Konferenca Ndërkombëtare Gërmia Hill [mbajtur më 2-3 shkurt 2016]
Inaugurimi i Klubit të Prodhuesve të Kosovës [mbajtur më 4 shkurt 2016]
Aktivitetet në vijim pritet të jenë:
Do të bëhen homazhe dhe do të organizohen pritjet për korin diplomatik, si dhe
përfaqësuesit e institucioneve qendrore, të atyre shkencore, kulturore, ekonomike,
sportive etj.
Gjatë muajit shkurt, në qytete të ndryshme të Kosovës dhe Shqipërisë:
Qendra Kinematografike e Kosovës shfaq filmin e metrazhit të gjatë “Engjujt janë larg”
me regji të Gjergj Xhuvanit (bashkëpunim i Kosovës me Shqipërinë).
Aktivitetet sipas ditëve:
Më 10 Shkurt
Galeria Kombëtare e Kosovës: Hapja e ekspozitës personale të artistit Ymer Shaqiri.
Më 15-17 shkurt 2016
Në të gjitha ambasadat e Republikës së Kosovës, organizohen pritje për korin diplomatik, zyrtarë shtetesh, si dhe personalitete të rëndësishme të shteteve përkatëse.
Më 15 shkurt 2016
Më 15 shkurt në ora 10:00, ceremonia e dhënies së çmimeve letrare (Ministria e Kulturës, Rinisë dhe Sportit).
Më 15 shkurt në ora 11:00, Ministria e Punës dhe Mirëqenies Sociale, në bashkëpunim me Odën Ekonomike të Kosovës, Odën Amerikane të Kosovës dhe Odën Gjermano- Kosovare, organizon panairin e punës (Salla e Kuqe).
Në Teatrin Kombëtar të Kosovës, më 15 shkurt, në ora 20:00, jepet shfaqja mysafire, “Zemra e Huaj” nga Teatri i Sarajevës. Regjia, Dino Mustafiq.
Federata e Futbollit të Kosovës, më 15 shkurt, duke filluar nga ora 17:00, organizon turneun tradicional në Futsal, me rastin e shënimit të Pavarësisë, i cili do të mbahet në Pallatin e Rinisë dhe Sportit, në Prishtinë.
Më 16 shkurt 2016
Ora e parë e mësimit në të gjitha shkollat do t’i kushtohet Pavarësisë së Republikës së Kosovës.
Në orën 19:00, në Hotel Emerald, Presidentja dhe Kryeministri i Kosovës organizojnë pritje për korin diplomatik dhe përfaqësuesit e institucioneve të Republikës së Kosovës, si dhe mbahet koncert festiv i Filarmonisë së Kosovës.
Në ora 20:00, në Teatrin Kombëtar të Kosovës, do të paraqitet Ansambli i Këngëve dhe Valleve TOBI nga Tirana.
Më 17 shkurt 2016
Më datë 17 shkurt 2016 në ora 10.00, sipas Vendimit të Qeverisë së Republikës së Kosovës do të bëhet parakalimi i kuadrateve të FSK-së dhe njësive të Policisë së Kosovës (parakalimi përcillet edhe me aktivitete të tjera akrobatike të kadetëve në shesh si dhe të përcillet nga bendi muzikor i FSK-së).
Në orën 11:00 bëhen homazhe para varrit të Presidentit Ibrahim Rugova. Në orën 12:00 bëhen homazhe para varrezave të Komandantit Legjendar Adem Jashari dhe familjes Jashari në Prekaz.
Në orën 12:00, Ansambli SHOTA do të defilojë në sheshet “Zahir Pajaziti”, “Nënë Tereza” dhe “Ibrahim Rugova”.
Baleti Kombëtar i Kosovës në Teatrin Kombëtar shfaq: Baletin “Dasma” me regji e koreografi të Mehmet Ballkan, ora 20:00.
Biblioteka Kombëtare e Kosovës “Pjetër Bogdani”, në ora 10:00, Ekspozitë e Librit “Kosova në Udhën e Pavarësisë”
Më 19 shkurt 2016
Më 19 shkurt, në ora 13:00, Presidentja e Republikës së Kosovës, Shkëlqesia e Saj Zonja Atifete Jahjaga do të dekorojë me medalje personalitete të shquara.
Vërejtje: Protokolli i Shtetit është në dispozicion për të mbështetur të gjitha aktivitetet
dhe ceremonitë shtetërore.
Të gjitha komunat:
Në orën 09:00 bëhen homazhe në varrezat e dëshmorëve dhe tek shtatoret e heronjve të Kosovës;
Autoritetet komunale mund të bëjnë vizita në familjet e dëshmorëve;
Komunat ndërmarrin aktivitete për dekorimin e rrugëve, parqeve dhe shesheve për datat 15-17 shkurt 2016 me flamuj dhe brenda mundësive të tyre edhe dekorimin e shesheve dhe rrugëve me logo të 8 vjetorit të Pavarësisë;
Më 17 shkurt 2016, në ora 10:00, kuvendet komunale të mbajnë mbledhje solemne me mysafirë të ftuar;
Nga 11 shkurti deri më 17 shkurt, shkollat mund të organizojnë ekspozita me punimet e nxënësve lidhur me përvjetorin e shpalljes së Pavarësisë së Kosovës;
Komunat mund të ndajnë mirënjohje dhe dekorata për personalitete të vlerësuara komunale në shenjë të 8 vjetorit të Pavarësisë së Kosovës;
Manifestime të ndryshme sportive dhe kulturore në varësi të mundësive të komunave.
Më datë 17 shkurt 2016, delegacionet e larta të institucioneve të Republikës së Kosovës: Presidenca, Kuvendi i Kosovës, Kabineti Qeveritar, do të bëjnë homazhe tek varrezat dhe përmendoret e dëshmorëve.
FSK do të angazhojë pjesëtarët e saj tek varrezat dhe komplekset e dëshmorëve.
*Axhenda mund të jetë subjekt i ndryshimeve.
Të akuzuarit në rastin e Kumanovës deklarohen të pafajshëm
Ne Foto:Shkup – Seanca gjyqësore për rastin Kumanova, 11 shkurt 2016/
Nga Zërijeta Hajro Jajaga/
Në Gjykatën Themelore të Shkupit, të enjten ka vazhduar procesi gjyqësor kundër 29 personave, të dyshuar si pjesëmarrës të një grupi të armatosur, të cilët, sipas Kodit Penal të Maqedonisë ngarkohen me veprat penale “organizim terrorist”.
Veprat penale për të cilat akuzohen, ata dyshohet se i kanë kryer gjatë përleshjeve të armatosura që ndodhën në Kumanovë, më 9 dhe 10 maj, të vitit të kaluar.
Përderisa në seancën e së martës, prokurori i rastit Kumanova e kishte lexuar aktakuzën, të enjten, të akuzuarit janë deklaruarnë lidhje me pretendimin e prokurorisë, dhe kanë treguar versionin e tyre të ngjarjes në Lagjen e Trimave në Kumanovë.
Të gjithë të akuzuarit në rastin e Kumanovës janë shprehur të pafajshëm, përballë akuzave me të cilat ngarkohen.
I pari nga të akuzuarit, që është deklaruar para trupit gjykues, është shtetasi i Kosovës, Rufki Dogani.
Ai, mes tjerash, para trupit gjykues është shprehur se Mirsad Ndrecaj dhe Beg Rizaj janë vrarë nga policia maqedonase, pasi që janë dorëzuar. Kjo, sipas tij, ka ndodhur për qëllime politike dhe me qëllim që të fshihet e vërteta që qëndron pas ngjarjeve në Kumanovë. Ai ka theksuar se edhe tre shokë të tjerë të tij: Valin Kabashi, Sami Kastrioti dhe një i tretë, të cilit nuk ia ka përmendur emrin, janë ekzekutuar, pasi i janë dorëzuar policisë maqedonase.
Ndërsa Nasuf Beqiri, nga fshati Haraçinë i Shkupit, ka kërkuar nga Bashkimi Evropian dhe Shtetet e Bashkuara të Amerikës që të kyçen në zbardhjen e rastit, sepse, sipas tij, ai dhe shokët e tij nuk janë terroristë dhe aspak nuk kanë të bëjnë me terrorizmin.
“Edhe një fëmijë 2 vjeçar e di se ne kemi qenë të shfrytëzuar për qëllime politike, prandaj nuk e pranojmë fajin dhe kërkojmë drejtësi”, është shprehur para trupit gjykues, Nasuf Beqiri .
Edhe Valdet Zekaj ka kërkuar që “t`i hapet rrugë së vërtetës”.
Ndërkaq Fadil Zejnullahu, i cili vjen nga Lagja e Trimave në Kumanovë, edhe para trupit gjykues është shprehur me ironi se kërkon që t’i bëhet një kontroll mjekësore, se mos është vallë i çmendur, sepse siç ka theksuar ai, asnjë njeri normal nuk planifikon akte terroriste aty ku e ka tërë familjen.
“Si mendoni ju, unë afër familjes time do të kryeja akt terrorizmi?! Cili njeri normal do të bënte një akt të tillë?”, është shprehur i akuzuari, Fadil Zejnullahu.
Avokatët mbrojtës edhe të enjten kanë hedhur poshtë veprën për të cilën ngarkohen të akuzuarit, duke theksuar se ky rast më së paku ka të bëjë me veprën terrorizëm, për të cilën ngarkohen 29 të akuzuarit.
“Në fjalën hyrëse shprehëm qëndrimin dhe argumentet tona kundër akuzës të cilën e ka ngritur prokuroria, për krim të organizuar, e cila me çdo kusht tenton në termin terrorizëm, për të cilin [term] ne nuk shohim elemente që të akuzohen këta djem”, ka theksuar, pas përfundimit të seancës gjyqësore të së enjtes, Mefail Asllani, avokati i disa prej të akuzuarve.
Seanca është mbajtur nën masa të shtuara të forcave policore, të cilët kanë qëndruar para objektit të gjykatës, por edhe në pikat kryesore të qytetit të Shkupit.
Në ditën e parë të seancës gjyqësore, të mbajtur të martën, organi i akuzës ka thënë se në bazë të dëshmive që i posedojnë, gjatë procesit gjyqësor do të dëshmohet se të akuzuarit për rastin e Kumanovës, me paramendim kanë kryer veprën për të cilën ngarkohen.
Ndërkaq familjarët e të akuzuarve, të cilët edhe të enjten prisnin para gjykatës së Shkupit, kanë shprehur shqetësimin e tyre për gjendjen e shëndetësore tëtë afërmeve të tyre.
Besnik Kabashi, babai i Betim Kabashit, ka theksuar se djali i tij vuan nga një sëmundje kronike, por gjerë më tani ai nuk ka mundur që të marrë një pasqyrë mjekësore për gjendjen e tij.
“Me anë të avokatit, dy herë kemi kërkuar që të bëhen analizat e gjakut, që të shohim si e ka gjendjen shëndetësore djali ynë, por kurrfarë përgjigje nuk kemi marrë. Unë jam edhe në OSBE në Prishtinë për t`i njoftuar me rastin në fjalë dhe apeloj dhe kërkoj nga të gjitha ambasadat e vendeve të BE-së dhe SHBA-së, të cilat kanë ndikim në Qeverinë e Maqedonisë, që të shkojnë t’i vizitojnë të burgosurit tonë, për t’u njohur me gjendjen e tyre fizike dhe psikike”, apelon Besnik Kabashi, babai i Betim Kabashit.
Familjarët e të burgosurve për rastin e Kumanovës të enjten gjithashtu kanë kërkuar ndihmë financiare për mbrojtjen juridike të të afërmve të tyre. Ata madje kanë hapur një fond për mbrojtjen juridike të të akuzuarve, për ngjarjen e 9 dhe 10 majit, në Lagjen e Trimave në Kumanovë, por, siç thonë, gjërë më tani nuk kanë marrë asnjë ndihmë.
Lidhur me këtë rast, deri në fund të muajit mars janë caktuar të mbahen edhe tetë seanca të tjera gjyqësore.
Ministri i Brendshëm i Kosovës në SHBA, takime të rëndësishme
Takim edhe me Kongresmenin, Eliot Engel. Sot pasdite, ministri Hyseni takon drejtorin e Byrosë Federale të Hetimeve (FBI)/
WASHINGTON, 10 Shkurt 2016/ Në vazhdën e qëndrimit të tij në Washington, ministri i Punëve të Brendshme të Republikës së Kosovës, Skender Hyseni, ka zhvilluar takime të veçanta me Marie Richards, zëvendës koordinatore për çështje rajonale e multilaterale në Byronë e Kundër-Terrorizmit, Tom Yazdgerdi, drejtor për Ballkan në Departamentin e Shtetit, Mark Koumans, nga zyra për Marrëdhënie Ndërkombëtare e Departamentit të Homeland Security, si dhe Kongresmenin, Eliot Engel.
Në të gjitha këto takime u trajtuan çështje të ndryshme që kanë të bëjnë me sigurinë, posaçërisht çështjet e ekstremizmit të dhunshëm dhe radikalizmit, krimit të organizuar dhe anëtarësimit të Kosovës në Interpol dhe organizata tjera ndërkombëtare të bashkëpunimit policor.
Njoftimi i dërguar bën të ditur edhe se, sot pasdite, ministri Hyseni takon drejtorin e Byrosë Federale të Hetimeve (FBI) me ç’ rast do të nënshkruhet Memorandumi i Mirëkuptimit në fushën e Forenzikes./b.j/
- « Previous Page
- 1
- …
- 296
- 297
- 298
- 299
- 300
- …
- 596
- Next Page »