Kronike – Page 422 – Dielli

Berisha në Parlament: Të ngrihemi si popull që ta çojmë vendin në zgjedhje të parakohshme

January 29, 2015 by dgreca

Sot ka filluar seanca e parlamentit me debate te forta mes PD dhe mazhorances. Ish-kryeministri Berisha ka sulmuar fort qeverine dhe Edi Ramen si kupola e krimit , klike e cila duhet rrezuar me forcen e popullit. Ndaj ai beri thirrje publike ne parlament qe te ngrihemi e ta rrezojme kete qeveri me zgjedhje te parakohshme parlamentare ne qershor te ketij viti.
Mesohet se edhe deklarata e ish-kryeministrit Berisha ne studion e Eni Vasilit para dy ditesh se “Shqiperia po shkon drejt vitit 1997” eshte ne vazhden e kesaj levizjeje.
Kuvendi ka nisur ditën sotme seancën e parë të plotë plenare për këtë vit, ndërkohë që opozita, e cila mungoi për më tepër se 6 muaj në atë sallë shfrytëzoi rastin të bënte një ekspoze të të gjitha ngjarjeve të ndodhura gjatë mungesë së tyre duke lëshuar një mal akuzash ndaj policisë.
I rikthyer pas mungesës së gjatë, ish-kryeministri i vendit Sali Berisha akuzoi qeverinë për lidhje me krimin dhe mafien dhe u bëri thirrje qytetarëve që së bashku ta çojnë vendin në zgjedhje të parakohshme.
“U bëj thirrje shqiptarëve të ngrihen fuqishëm, ta çojmë vendin në zgjedhje të parakohshme si kusht për të shpëtuar procesin e integrimit të vendit nga duart e mafies”, tha Berisha.
Sipas Berishës, me mënyrën e tij të qeverisjes me anë të shtetit policor, Rama po rrezikon ëndrrën më të madhe të shqiptarëve, që është integrimi në BE.

Tahiri: Drogën e mbollët ju, numri i vrasjeve ka rënë
Ndërkohë Ministri i Brendshëm u është përgjigjur akuzave të opozitës për shtim të kriminalitetit në vend, përfshirë dhe trafikun e drogës me baza në Shqipëri.
“Ky është operacioni më i rëndësishëm i drogës në vend, – tha Tahiri. – Deri dje droga ishte në Lazarat, në Dukagjin dhe në Elbasan po të doni. Shqiptarët janë dëshmitarë për këtë, por policia e atëhershme nuk ka qenë atje për të zbatuar ligjin. Sot është ndryshe dhe rezultatet flasin vetë. Kur Policia e Shtetit luftonte vjet në verë në Lazarat, u quajtën plaçkitës bandash nga opozita, ndërsa trafikantët i konsideruan viktima të shtetit policor”.
Tahiri tha se është gati të japë dorëheqjen nëse del se shifrat e krimit sot janë më të larta se në vitin 2013: “Ju kishit dijeni për çdo parcelë droge, sepse ua kanë dhënë hartat partnerët ndërkombëtarë, – vazhdoi Tahiri. – Është kjo arsyeja që e gjetëm Shqipërinë me drogë në çdo pëllëmbë. Sot Shqipëria nuk është vend trafikimi droge. Nëse vrasjet janë më të larta se në vitin 2013, unë jam gati të jap dorëheqjen bë sekondë. Sillni shifrat dhe jam gati të përballem me to”, – shtoi Ministri i Brendshëm.

Braçe: Europa, rruga e vetme e Shqipërisë. Fjalimi i Berishës , i turpshëm
Duke marrë fjalën pas ish-kryeministrit Berisha, deputeti socialist, Erjon Braçe e cilësoi fjalimin e këtij të fundit si të turpshëm që për akuzat e lëshuara duhet të çohet në prokurori e gjykatë. Braçe u shpreh se destinacioni i vetëm i Shqipërisë është padyshim Europa dhe BE, pavarësisht ngjarjeve të dhimbshme nëpër të cilat ka kaluar vendi ynë.
‘Më duhet të konfirmoj më forcë se Europa është destinacioni ynë pavarësisht ngjarjeve të 97, 96 e 98 që e kanë vonuar tmerrësisht këtë vend për t’u integruar në Europë. Askund në Europë nuk do të gjeni një fjalim si ai që dëgjuat pak më parë, një fjalim i tillë që nuk shoqërohet nga asnjë akt dërgimi në prokurori dhe më pas në gjykatë për të gjitha ato akuza të rënda. Ndërkohë që sot në prokurori e gjykatë janë tërësisht të paprekur të gjithë ata persona të emëruar me vullnet të plotë nga qeveria e mëparshme. Por janë ministrat dhe kryeministri që ka kërkuar ballafaqim në gjykatë e prokurori për këto akuza. Ky është ndryshimi dhe sjellja ligjore, ndërsa ajo që u dëgjua më parë është sjellja që ka nxjerrë jashtë një Europë e tërë”, tha Braçe.
Gjatë seancës së sotme pritet të votohen emrat e anëtarëve të rinj të Komisionit Qendror të Zgjedhjeve (vendet vakante) të cilët janë Denar Biba nga PS, nënkryetar dhe Edlira Jorgaqi e Gëzim Veleshnja nga LSI, anëtarë.
Topalli: Deputeti i mazhorancës u kap me drogë në Vilun
Ish-kryetarja e Kuvendit, Jozefina Topalli, nga foltorja e Kuvendit ka akuzuar në nisje të seancës plenare të ditës së sotme mazhorancën për lidhje me bandat e drogës.
Deputetja e PD-së, tha se një deputet i majtë, i pranishëm në sallë sipas saj, u kap me drogë në makinë në Vilun dhe më pas u lirua nga policia.
“Çfarë burrash jeni ju që keni frikë të përmendni emrin e Shullazit? Pse nuk e thoni që anëtari i atyre që u arrestuar është kushëriri i ‘Hakmarrjes për Drejtësi’. Më pëlqen që flisni për djalin e diktatorit. Për lidhjet tuaja me drogën ne ikëm nga Parlamenti. Kush ishte deputeti që kishte lidhje me drogën në Vilun? Këtu e keni mes jush”, – iu drejtua Topalli deputetëve të majtë.
Më tej, ish-kryeparlamentarja akuzoi edhe një herë mazhorancën se ka mbështetur të arrestuarit e laboratorit të drogës në Xibrakë: “Ku janë kokat dhe trafikantët e laboratorit? Si ka mundësi që ministri Tahiri ndërhyn në emisione dhe thotë kush jeni ju që flisni për laboratorin e drogës? Shqiptarët nuk janë naivë të mendojnë se bëhet trafik ndërkombëtar droge dhe nuk mbështetet nga qeveria”, – deklaroi Topalli.

RREZOHET HELIKOPTERI ME DROGE NE SPANJE, HUMB JETEN PILOTI- MAJOR I FORCAVE TE ARMATOSURA TE SHQIPERISE

January 29, 2015 by dgreca

Ngjarje të rëndë të ndodhur në Spanjë ku forcat e gardës civile kanë rrëzuar një helikopter që transportonte drogë nga Maroku dhe piloti është një major i FA shqiptare. Ky major është në strukturat e Forcave të Armatosura Shqiptare prej 18 vjetësh, gradën major e ka marrë në vitin 2009 dhe është një nga pilotët më të besuar të Forcave tona të Armatosura./
Kryeministri i vendit, Edi Rama duke folur nga foltorja e kuvendit dhe në përgjigje të akuzave të opozitës ka informuar sot lidhur me një ngjarje të rëndë të ndodhur në Spanjë ku sipas tij është rrëzuar një helikopter që transportonte drogë i cili drejtohej nga një major i Forcave të Armatosura Shqiptare.
“Para pak minutash Ministria e Jashtme është njoftuar për një ngjarje të rëndë të ndodhur në Spanjë ku forcat e gardës civile kanë rrëzuar një helikopter që transportonte drogë nga Maroku dhe piloti është një major i FA shqiptare. Ky major është në strukturat e Forcave të Armatosura Shqiptare prej 18 vjetësh, gradën major e ka marrë në vitin 2009 dhe është një nga pilotët më të besuar të Forcave tona të Armatosura. Tani nuk ja vlen të hyjmë në diskutimin është piloti jonë apo juaji”, tha Rama.
Ndërkohë, mediat spanjolle e kanë raportuar së fundmi këtë ngjarje, duke saktësuar se në bordin e helikopterit ndodheshin dy persona, njëri spanjoll dhe tjetri i huaj, të cilët transportonin 30 pako hashash.
Helikopteri i ngarkuar me drogë është përplasur me një shtyllë tensioni në Cortes de la Frontera të Malagës duke shkaktuar vdekjen e dy pilotëve. Mes tyre është identifikuar majori shqiptar i FA, Sokol Feka. Ngjarja ka ndodhur në të gdhirë të ditës së martë, sipas gazetave ‘Diario Sur’ dhe ‘Malaga Hoy’.
Autoritetet kanë gjetur në helikopter rreth 30 pako hashash, por ende nuk është saktësuar sasia në kilogramë pasi hetimi po vazhdon.
Ministria e Mbrojtjes: Feka, instruktor në bazën ajrore të Farkës, kishte marrë leje 12- 31 janar
Ministria e Mbrojtjes është informuar në rrugë zyrtare nga Ministria e Punëve të Jashtme të Republikës së Shqiperisë se një ngjarje e pakëndshme ka ndodhur gjatë ditës së djeshme në Spanjë.
Guardia civil Spanjolle njoftoi se është rrëzuar një mjet fluturues akoma i paidentifikuar, i dyshuar se po merrej me aktivitet të paligjshëm. Nga verifikimet paraprake, helikopteri udhëtonte nga Maroku në Spanjë.
Si pasojë e rrëzimit të avionit piloti ka rezultuar i vdekur. Bazuar në dokumentet e gjetur mendohet se ky person të jetë shtetasi shqiptar Sokol Feka major, me detyrë instruktor në bazën ajrore të Farkës.
Ministra Mbrojtjes është duke bërë verifikimet nëse dokumentet e gjetura përkojnë me shtetasin në fjalë. Major Feka është pjesë e Forcave të Armatosura prej 18 vitesh dhe mban gradën major që nga viti 2009.
Me informacionin që Ministria e Mbrojtjes disponon, shtetasi Feka ka marrë lejen e zakonshme për periudhën 12- 31janar 2015, por nuk ka aplikuar për leje për të dalë jashtë vendit, duke shkelur rregullat e parashikuara në ligjin për Statusin e ushtarakut në Republikën e Shqiperisë. Përmes një shkresë zyrtare,
Ministria e Mbrojtjes i ka kërkuar verifikimin urgjent të lëvizjeve të shtetasit Feka, Ministrisë së Brendshme dhe Drejtorishë së Përgjithshme të Policisë Shtetit.

Lamtumirë Gentian Demaliaj, lideri i “Djemve të Detit”

January 27, 2015 by dgreca

TIRANË, 27 Janar/-Është ndarë nga jeta në moshën 40-vjeçare këngëtari i njohurGent Demaliaj. Vokalisti i grupit të famshëm të viteve 90-të, “Djemtë e Detit“, prej kohësh vuante nga një sëmundje e rëndë.
Në vitin 2013, me një vendim të Këshillit të Ministrave, Qeveria shqiptare i dha atij një shumë prej 35 milionë lekësh për t’u kuruar jashtë vendit. Në vitin 2013, ai u diagnostikua me kancer dhe që atëherë, ai bënte vazhdimisht kimioterapi në Tiranë dhe Itali.
Demaliaj është i martuar dhe ka një vajzë, Edean, këngëtare, e cila ka fituar në Festivalin e Shkodrës çmimin “Zërat më të mirë”, ndërsa në Festivalin e Tiranës u vlerësua me çmimin “Interpretuesja më e mirë”.
Gentian Demaliaj mbahet mend për interpretimin brilant të këngëve “Mos Qaj”, “Jo tani”, “Jakup Ferri”, që tashmë janë pjesë e artë e fonotekës shqiptare.
Homazhet në nder të tij do të bëhen nesër ,e Merkure, në orën 12:30 në ambientet e RTSH, ndërsa ceremonia mortore do të zhvillohet në orën 14:00.

FBI zbulon rrjetin e spiunëve rusë ne Nju Jork!

January 27, 2015 by dgreca

Duket si lajm nga vitet e Luftës së Ftohtë, por ka ndodhur vetëm një ditë më parë! FBI ka akuzuar tre vetë në Shtetet e Bashkuara të Amerikës si spiunë të Rusisë. Prokurori i çështjes tha në gjykatë se Evgeni Burjakov, 39 vjeç, ka qenë pjesë e një grupi spiunësh që përveç dërgimit të informacioneve në Rusi, përpiqej edhe të rekrutonte shtetas amerikanë si spiunë. Dy bashkëpunëtorët e Burjakovit, Igor Sporjshev dhe Viktor Podobni, janë gjithashtu të akuzuar, por nuk gjenden më në SHBA.
Burjakov, i cili ka punuar në një bankë ruse në Manhatan, akuzohet se është përpjekur të marrë informacione mbi sanksionet që mund të vendoste Amerika ndaj Rusisë pas kresjes së marrëdhënieve për çështjen e Ukrainës. Gjithashtu ai është përpjekur të rekrutojë si spiunë disa amerikanë që punonin në kompani të mëdha amerikane si dhe student në një universitet të rëndësishëm të Nju Jorkut.
Ndërsa dy të tjerët, kanë qenë zyrtarë të qeverisë ruse në SHBA dhe kanë bashkëpunuar me Burjakov që prej vitit 2012. Edhe në 2010-n qeveria amerikane 10 vetë me akuzën se spiunonin për llogari të Rusisë në Shtetet e Bashkuara.

Gaz lotsjellës, topa uji dhe gurë në qendër të Prishtinës

January 27, 2015 by dgreca

Qendra e Prishtinës u shndërrua të martën në zonë përplasjesh të rrepta ndërmjet njësiteve speciale të Policisë së Kosovës dhe protestuesve.
Forcat e rendit kanë përdorur gazin lotsjellës dhe topat e ujit për të shpërndarë protestuesit e mbledhur në sheshin qendror të kryeqytetit, kurse protestuesit janë parë duke hedhur gurë dhe gjësende të tjera në drejtim të policisë.
Njësitet speciale të policisë kanë qenë të vendosura në pothuajse të gjitha rrugët sporadike që çojnë drejt sheshit qendror në Prishtinë.
Zëdhënësi i Qendrës Klinike Universitare të Kosovës, Shpend Fazliu, ka njoftuar se numri i personave që kanë kërkuar ndihmë ka arritur në 30.
Numri i të ndaluarve nga autoritetet e rendit thuhet të jetë gjithashtu rreth 30.
Në mesin e tyre mediat vendore raportojnë se është edhe Shpend Ahmeti, kryetar i komunës së Prishtinës, njëherësh nënkryetar i Lëvizjes Vetëvendosje, parti kjo e cila ka organizuar protestën e sotme.
Në një komunikatë të mëhershme për opinion, policia e Kosovës ka njoftuar se “rreth orës 12:45 minuta, pas fjalimeve nxitëse nga ana e organizatorëve, një grup prej disa protestuesve kanë filluar të sulmojnë policët, duke hedhur gjësende të ndryshme, mjete të forta, mjete piroteknike në drejtim të njësiteve policore, të cilat detyrimisht janë dashur të intervenojnë për t’i parandaluar sulmet e tilla, duke përdorur mjetet policore të ligjshme”.
Policia e Kosovës u ka bërë “thirrje protestuesve që të protestojnë në mënyrë të qetë dhe të mos bien pre e provokimeve”.
Protesta kishte nisur në orën 12:00, e thirrur nga nga partitë politike në opozitë, në kërkim të shkarkimit të ministrit për Komunitete dhe Kthim në qeverinë e Kosovës, Aleksandar Jabllanoviq, dhe shpalljes së kombinatit metalurgjik “Trepça” si ndërmarrje e veçantë publike.
Përreth qeverisë ishin vendosur rrethojat dhe forcat e rendit. Protestuesit po kërkonin që në fillim të nisjes së protestës heqjen e rrethojave për të mundësuar, siç thanë, të drejtën për të protestuar.
“Sheshi është i yni, jo i qeverisë”, “Trepça është e jona”, “Jabllanoviq jashtë”, “Hiqni barrikadat”, “Poshtë Qeveria”, ishin vetëm disa nga thirrjet e protestuesve.
Ndryshe, Jabllanoviq i kishte quajtur më 6 janar “egërsira” protestuesit në Gjakovë, të cilët po përpiqeshin të pengonin disa pelegrinë serbë që të vizitojnë Gjakovën me rastin e Krishtlindjeve Ortodokse. Jabllanoviq ka kërkuar falje për deklaratën e bërë.
Protesta e sotme pason protestën e së shtunës, më 24 janar, e cila përfundoi me një “ultimatum” dhënë qeverisë së Kosovës që brenda 48 orësh të shkarkojë zotin Jabllanoviq dhe të procedojë në Kuvendin e Kosovës ligjin e veçantë për Trepçën.
Qeveria e Kosovës nuk i është përgjigjur kërkesave të parashtruara.