Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

NJU JORK – Al-Kaeda u kërkon ”ujqërve të vetmuar” të godasin linjat ajrore

by

NJU JORK, 27 dhjetor– Rrjeti terrorist al-Kaeda në Gadishullin Arabik ka shpërndarë numrin e ri të revistës së saj ”Inspire” (”Frymëzim”), ku u kërkon të ashtuquajturve ”ujqër të vetmuar” të terrorizmit islamik të godasin ekonominë amerikane dhe manjatët e saj si edhe të marrin në shënjestër disa kompani ajrore si ”Delta”, ”Air France”, ”Easyjet” dhe të tjera, ndërkohë që shton në këtë revistë një manual të përditësuar për mënyrën e bërjes së një bombe artizanale.
Kohët e fundit shprehja ”ujk i vetmuar” përdoret gjerësisht për të përshkruar një ekstremist të ekzaltuar, një predikues islamik autodidakt dhe një terrorist ”artizanal”.
”Në numrin e ri të kësaj reviste me 112 faqe dhe të shpërndarë në internet, al-Kaeda tregon qartësisht se cilët biznesmenë të suksesshëm amerikanë duhen goditur, që nga Ben Bernanke deri te Bill Gates”, thotë faqja autoritare e internetit ‘Site’, që monitoron aktivitetet online të xhihadistëve.
Përsa u takon sulmeve kundër kompanive ajrore thuhet se do të ishte më mirë që ato të kryheshin në territorin amerikan. Mes kompanive amerikane veçohen ”United Airlines”, ”American Airlines” madje edhe ”British Airways”.
Së bashku me revistën është shpërndarë edhe një video prej një minute dhe 12 sekonda ku, sipas Site-s, jepet mënyra e bërjes së një bombe artizanale.
Më pas shihet një avion që shpërthen (pamje e marrë nga një film) dhe në sfond një kolonë zanore me këngë xhihadiste.
Në fund shfaqen titrat ”Pritja mbaroi. Erdhi koha të hipim në një avion”.

Aksident rrugor në Mal të Zi

by

Një grua humbi jetën dhe 3 persona të tjerë janë plagosur rëndë të premten në mbrëmje kur një autobus me 54 turistë nga Shqipëria, që kthehej nga Kroacia doli nga rruga dhe u përmbys disa metra poshtë segmentit Ulqin – Tivar. Ministria e brendshme bëri të ditur se 4 udhëtarë u dërguan me urgjencë në spitalet e kryeqytetit të Malit të Zi, sepse ishin në gjendje më të rëndë, 13 të tjerë po mjekohen në spitalin e Tivarit, ndërsa pjesa tjetër janë jashtë rrezikut për jetën me dëmtime të lehta.
Turistët shqiptarë po ktheheshin në Tiranë nga Dubrovniku, ku ishin për një udhëtim turistik 3 ditor, kur një automjet i vogël me shpejtësi i ka zënë rrugën, duke e detyruar të dalë nga rruga për të shmangur përplasjen. Dëshmitarë nga vendi i ngjarjes thanë se rruga në atë segment ishte e ngushtë, pamja e kufizuar nga errësira, ndërkohë që binte edhe shi i rrëmbyer.
Aksidenti përfshiu gati gjysmën e udhëtarëve, dhe autoritetet malazeze po u japin ndihmën e nevojshme. Drejt vend-ngjarjes u nis ministri i shëndetësisë, Ilir Beqaj. Drejtues të policisë së Shkodrës shkuan në vendngjarje për të ndjekur nga afër gjendjen dhe për të marrë më shumë informacion.
Aksi rrugor Tivar -Muriqan, i gjatë afro 30 km, edhepse cilësohet si rrugë ndërkombëtare, nuk i plotëson normat më themelore për qarkullimin e automjeteve. Rruga paraqet probleme serioze dhe është shumë e vështirë për tu përshkuar nga automjetet gjë që shkakton aksidente të vazhdueshme me pasoja tragjike.(Ilirian Agolli, VOA)

“Mjeshtri i madh” i humorit shqiptar, Veli Rada, ndërron jetë

by

*Presidenti Nishani: Humbje e madhe për artin shqiptar/
TIRANË, 27 Dhjetor/- Aktori i mirënjohur i humorit shqiptar, Veli Rada , ndërroi jetë në moshën 72 vjeçare pas një sëmundje te rëndë
Aktor profesionist i Estradës së Tiranës prej 35 vitesh, Veli Rada në vitin 2013 u nderua nga Bashkia e Tiranës me titullin “Mirënjohja e kryeqytetit” si dhe nga Presidenti i Republikës “Mjeshtër i Madh”.
Rada ka studiuar në Institutin e Lartë të Arteve në vitet 1972-1975 në degën e aktrimit dhe menjëherë pas studimeve, u bë anëtar i Teatrit të Estradës së Tiranës, ku punoi për 35 vjet. Ai ka realizuar qindra role, prej të cilëve shumë do të mbeten të paharruar dhe punoi si regjisor e asistent regjisor, skenarist humori. Rada ka realizuar një sërë skeçesh, parodish, etj. Veli Rada ishte edhe një komentator i njohur i sportit.
Nishani: Humbje e madhe për artin shqiptar
Presidenti Bujar Nishani ka shprehur sot ngushëllimet e tij për ndarjen nga jeta të aktorit të humorit Veli Rada. Nishani është shprehur se ndarja nga jeta e Radës përbën një humbje të madhe për kulturën dhe humorin.
“Të nderuar familjarë të artistit të shquar të skenës dhe ekranit Veli Rada!
Sot në mëngjes mora vesh për ndarjen nga jeta të njeriut tuaj më të dashur dhe aktorit të nderuar të humorit shqiptar, zotit Veli Rada.
Ky lajm, ashtu si për të gjithë artdashësit dhe simpatizantët e humorit që ai krijoi, më ka prekur jashtëzakonisht thellë. E konsideroj vërtet një humbje të madhe për kulturën tonë shqiptare dhe veçanërisht për gjininë e humorit që Veliu ushtroi vazhdimisht në Shqipëri. E gjithë shoqëria shqiptare ndjen një dhimbje për këtë ndarje, sepse nuk do ta kenë më mes tyre për së gjalli në skenat e humorit dhe ekranet e televizorëve duke interpretuar skeçe dhe pjesë të tjera humoristike, nëpërmjet të cilave jo vetëm që i bënte njerëzit për të qeshur duke u falur momente argëtimi, por njëkohësisht stigmatizonte me mençuri mjaft plagë të shoqërisë shqiptare.
Veli Rada do kujtohet përherë, se e vuri jetën e tij të thjeshtë në shërbim të humorit dhe të transmetimit të sportit të bukur të futbollit shqiptar, duke mbetur një qytetar i mirë, sportdashës shembullor dhe aktor vullnetplotë dhe optimist.
Veli Rada që në hapat e para të debutimit në Estradën e Tiranës para katër dekadash arriti të spikasë si një nga talentet më premtuese në fushën e aktrimit të trupës së saj. Me kalimin e viteve dhe sidomos me ardhjen e pluralizmit dhe masivizimin e humorit, do të ishin vitet e demokracisë ato që do e bënin atë një personalitet të arenës mbarëkombëtare shqiptare, me interpretimet tij virtuoze në sallat e shqiptarëve të Shqipërisë, Kosovës, Maqedonisë, etj. ku fitoi simpatinë e gjerë të krejt publikut artdashës të të gjitha trojeve shqiptare. Në rreth 40 vite ai na ka dhuruar një fond rolesh aktoreske që do mbeten përjetësisht në kujtesën tonë.
Duke ndarë në këto çaste me ju dhimbjen time më të thellë për ikjen e këtij artisti, ju shpreh ngushëllimet më të sinqerta për të afërmin tuaj që do mbetet përherë i paharruar.
U prehtë në paqe shpirti i tij!
Me nderimin e pakufishëm për të dashurin tuaj.
Me respekt!
Bujar Nishani”, përfundon mesazhi i tij.

Besimtarët e krishterë festojnë lindjen e Krishtit

by

TIRANË, 25 Dhjetor/- Mijëra besimtarë katolikë kremtuan lindjen e Jezu Krishtit në Katedralen e “Shën Palit” në Tiranë, ndërsa mijëra të tjerë të besimit ortodoks ndoqën meshën dhe ndezën qirinj në Kishën Autoqefale.
Të krishterët janë lutur duke falënderuar Zotin për lindjen e Birit të Tij, duke uruar njëri-tjetrin me mesazhet e tolerancës dhe të paqes.
Në Katedralen e Shën Palit në kryeqytet u mbajt mesha solemne e përvitshme, ku Imzot Rrok Mirdita uroi besimtatrët katolikë për më shumë paqe, mirësi dhe afrimitet me njëri-tjetrin, duke vlerësuar Krishtlindjen si ngjarjen më të rëndësishme.
Imzot Rrok Mirdita në mesazhin e tij për festën kërkoi që njerëzit ta ndihmojnë njëri-tjetrin dhe të sakrifikojnë për të ngritur një jetë në paqe dhe bashkëpunim.
Katedralja e “Shën Palit” në Tiranë ishte mbipopulluar nga prania e besimtarëve që pritën deri në ambientet e jashtme për të kryer ritualet e festës, lutjet, ndezjen e qiririt dhe faljes.
Edhe në kishën Orthodokse, është kremtuar Lindja e Krishtit. Në meshën e mbajtur nga kryepeshkopi Anastas, besimtarët ortodoksë janë lutur në emër të Krishtit.
“Le të përkujdesemi që në këto ditë festive, të përjetojmë më thellë shenjtërinë dhe madhështinë e dhuratës së jetës që na e ka dhuruar Perëndia. Dhe për më tepër të shprehim mirënjohjen tonë me përpjekje të pandërprerë për zhvillimin e jetës shpirtërore”, tha kryepeshkopi Anastas.
Pas ceremonisë, besimtarët u shpërndanë duke ndarë mesazhe për shumë paqe e dashuri mes njëri tjetrit. Festimet vijojnë më pas me drekën e Krishtlindjes dhe shkëmbimin e vizitave.
Krishtlindja është festa e lindjes së Jezusit, i cili besohet nga të krishterët si Biri i Perëndisë dhe Perëndia vetë e mishëruar, zbritur në tokë për të shlyer mëkatet e njerëzimit, dhe për ta kthyer atë në shtëpinë e Perëndisë.
Sipas Biblës, Jezusi lindi nga Maria në Betlehem, ku ajo dhe i shoqi i saj Jozefi po pushonin rrugës për në vendlindjen e tyre, Nazaret, për të marrë pjesë në numërimin e mbarë popullsisë urdhëruar nga perandori August.
Lindja e Jezu Krishtit kremtohet në gjithë botën si dita e shpresës, paqes dhe dashurisë njerëzore.
Në Shqipëri, Krishtlindja rinisi të festohet pas viteve ’90-të, kur u lejua besimi fetar, i ndaluar nga diktatura. Darka e Krishtlindjeve paraprihet nga një ditë agjërimi, gjatë së cilës përgatiten ushqimet që do të serviren në mbrëmjen e festës.

Papa Francesku uron Krishtlindjen

by

Papa Francesku ka uruar 1.2 miliardë besimtarë katolikë në mbarë botën me rastin e festës së Krishtlindjes. Ai u bëri thirrje atyre që të lejojnë Perëndinë të hyjë në jetën e tyre për t’i ndihmuar të luftojnë errësirën dhe korrupsionin. Papa 78-vjeçar, argjentinas, udhëhoqi meshën solemne të Krishtlindjeve për mijëra njerëz të pranishëm në bazilikën e Shën Pjetrit.
I veshur me të bardha, Papa Bergolio në predikimin e tij tha se mesazhi i paqes i perëndisë, është më i fortë sesa errësira dhe korrupsioni. Ai tha se në një botë që ende ka dhunë luftëra, urrejtje dhe shtypje” ka nevojë për më shumë butësi.
Në bazilikën e Shën Pjetrit Papa zhvilloi edhe një bisedë telefonike me disa refugjatë irakianë të detyruar të largohen nga shtëpitë e tyre nga militantët mysliman.
Kreu i Kishës Katolike i krahasoi refugjatët me Jezu Krishtin, të detyruar të largohen sepse për ta nuk kishte vend.
“Këtë natë ju jeni si Jezu Krishti dhe unë do t’ju bekoj. Jam pranë jush, i është drejtuar Papa Françesku refugjatëve irakianë.
Të gjithë ata që nuk mundën të hyjnë në bazilikë, e ndoqën meshën nga ekranet gjikande që ishin vendosur jashtë në sheshin Shen Pjetri.
Këto janë Krishtlindjet e dyta për Papën argjentinas, i cili u zgjodh vitin e kaluar si papa i parë joeuropian në 1300 vjet. Ai ka sjellë frymën e thjeshtësisë në Vatikan, duke refuzuar shumë nga lukset e papatit , dhe ka sjelle kishën më afër qytetarëve dhe besimtarëve.