Mergata – Page 95 – Dielli

Aktivitet përkujtimor në Vjenë:”Çamëri moj Çamëri,70 vjet lot në sy

June 27, 2014 by dgreca

Homazhe simbolike viktimave çame nga masakrat greke. P.Begzati:”Masakra ndaj çamëve ka vetëm një emër:gjenocid e pastrim etnik…Koha që Qeveria Shqiptare t’i jep fund qëndrimit pasiv nda çështjes çame.. Deklaratë apeli nga 14 Shoqata iu dërgua BE-së, OSBE-së etj./
Hazir MEHMETI, Vjenë*/
Këshilli Koordinues i Shoqatave Kulturore në Vjenë organizoj manifestimin në përkujtim të tragjedisë së përgjakshëm të popullsisë çame nga forcat greke. Ishin të pranishëm edhe përfaqësues nga Ambasada e Shqipërisë, Maqedonisë dhe Kosovës. Mysafir rasti ishte z.TahirMuhedini, deputet përfaqësues në parlamentin shqiptar të shqiptarëve të Çamërisë. Kishin ardhur bashkëkombës nga e gjithë Austria, mes tyre shkrimtarë, artistë, krijues e veprimtarë.
Vjetët 1944-45 ishin vjet kur u krye tragjeditë më e rënda shfarosëse ndaj popullsisë çame. Gati paralelisht ndodhi masakra tjetër tragjike ndaj shqiptarëve nga forcat komuniste jugosllave tëpërkrahura nga komunistet shqiptarë brenda Shqipërisë dhe jashtë saj, Masakra e Tivarit. Mosvlerësimi dhe harresa e dy masakrave gjenocide nga shteti diktatorial komunist dhe shërbyesit e pushtuesit sllav, është një tjetër krim brenda vet kombit shqiptar, i ndarë ideologjikisht dhe në shërbim të shkatërrimit kombëtar.
Tani pas gjithë këtyre ndryshimeve progresive ndaj errësirës ideologjike komuniste dhe lirisë së trevave etnike shqiptare, krijohen mundësi të trajtimit, vlerësimit e përkujtimit për të parën herë masakrën e Çamërisë. Formimi i Këshillit Koordinues i disa shoqatave kulturore në Vjenë nga aktivistët e veprimtarët e njohur të çështjes kombëtare, hapi shtigje të reja aktivitetesh. Salla e bukur ishte përplot me mërgimtarë nga të gjitha trojet etnike shqiptare, mes tyre edhe nga Çamëria. Dita e 27 qershorit është shpallur si “Dita e Gjenocidit ndaj shqiptarëve të Çamërisë nga shovinizmin grek”. Forcat armike greke në këtë datë ushtruan terror masiv me përmasa gjenocidi, ku u masakruan mijëra çamë dhe mbi 35 mijë prej tyre u dëbuan nga vatrat e tyre duke iu aneksuar toka e pasuria dhe u pamundësohet kthimi i tyre edhe pas 70 vjetëve. Tubimin e hapi Dr.Dr.Ilir Çaushi nga Instituti i Kulturës Shqiptare “Aleksandër Moissi” në Vjenë. Kurse vështrimin rreth masakrës greke ndaj Çamërisë e mbajti z.Petrit Begati (Kasemi): “Padrejtësisht krahina shqiptare e Çamërisë u shkëput nga Kongresi i Ambasadorëve të Londrës prej tërësisë së truallit etnik shqiptarë me 11 gusht të vitit 1913 duke iu aneksuar Greqisë. Popullata e Çamërisë iu nënshtrua represionit grek gjithmonë me propagandën e greke sikur po sillnin barazinë, qytetërimin e respektimin e të drejtave njerëzore. Kjo fasadë propagandistike shoqëronte nënshtrimin e Çamërisë dhe çamëve, jo vetëm që ka mashtruar dhe vazhdon ta mashtroj opinionin e gjerë por pësoi një nga fatkeqësitë më të mëdha që nga koha antike e këtij populli. Ky pushtim solli shkatërrimin e vlerave, vrasje masive duke përfshirë këtu edhe vrasjet fëmijëve. Çamëve iu mohuan të drejtat e tyre në shkollim në gjuhën shqipe të lashtë stërgjyshore që nga pellazgjishtja duke vazhduar me gjenocid ndaj tyre në vitet 1944 e 1945. Ky represion me përmasa gjenocidi u përcoll më shpërnguljet masive të çamëve, veçan atyre të religjionit mysliman. Ishte ky një plan i përgatitur e studiuar shumë vjet më parë duke kujtuar këtu dy projekte famëkeqe që ka njohur Ballkani: “Naqertania” serbe dhe “Legalites” greke për shfarosjen e shqiptarëve dhe dëbimin e tyre nga territoret autoktone. Që nga aneksimi i Çamërisë greket kanë organizuar vrasje masive të planifikuara…. Sipas Marrëveshjes së Llozanos të vitit 1943/44 mes autoriteteve greke dhe aktorët ndërkombëtarë, u dëbuan nga territoret çame mijëra familje shqiptare, pothuaj se u boshatisën Parga dhe rrethina e saj, Kosturi, Konica, Janina etj. pra një spastrim etnik i formës së veçantë. Në vitet dyzetë, pak para pushtimit të atyre viseve nga fashistët gjerman, grekët organizuan burgosjen dhe internimin e meshkujve shqiptarë në ishujt e Mesdheut që nga mosha 16 vjeçare e tutje, duke lënë vetëm gra e fëmijë të pa mbrojtur të cilët iu nënshtruan plaçkitjeve, dhunimeve, shkatërrimeve të vazhdueshme nga bandat kriminale greke. Ishin këto kampe internimi të tipit të fashistëve të Mauthausenit për shfarosje masive. Ishte realitet i shpëtimit të kësaj popullate nga burgjet e internimit dhe shfarosjes prej forcave gjermane që pushtuan këto vise. Ata u liruan dhe u vendosen në shtëpitë e tyre në Çamëri dhe duke i shpëtuar kështu shfarosjen e tërë meshkujve. Atyre iu lejua shkolla, gjuha, kultura. Tani ironia e fatit, ushtria fashiste identifikohet si çlirimtare. Kjo në sytë e çamëve u krijua si pikëpamje, se grekët ishin pushtuesit kurse gjermanët të mos shikoheshin si pushtues por si çlirimtarë, pasi këta po u njihnin të drejtat e tyre të mohuara nga pushtuesit grek në vazhdimësi. Çamët për herë të parë realizuan të drejtat e tyre kombëtare, mbajtjes së flamurit, shkollimin në gjuhën amtare. Në ngjarjet tragjike që pësuan më vonë çarqet greke duke propaganduar, se gjoja çamët bashkëpunuan me gjermanët dhe rrethanat e krijuar gjatë luftës, favorizimet e saj, realizoi aktin e fundit gjenocid ndaj popullsisë myslimane çame i filluar më 27 qershor të vitit 1944 dhe i përfunduar më masakrën e fundit të Varnanit me 13 mars 19945 kur s’kishte asnjë forcë gjermane në Çamëri…. Vetëm brenda 27 qershor 1944, ditë e martë, u ekzekutuan mbi 600 shqiptarë çamë nga EDES-i grek nën komandën e famëkeqit Napoleon Zerva…. Kjo mbetet një nga ditët më të zeza të kombit shqiptar…. Mbi 10% e popullatës çame e vrarë dhe e masakruar nga të cilët 2900 të moshuar dhe të rinj, gra të dhunuar dhe mbi 35 mijë të shpërngulur nga trojet e tyre. I vetmi faj i tyre ishte pse ishin shqiptarë dhe jo grekë… Tragjedia çame dhe vepra armiqësore greke ndaj shqiptarëve të Çamërisë ka vetëm një emër: gjenocid e spastrim etnik… Ka ardhur koha që shteti shqiptarë t’i japi fund qëndrimit të tij pasiv nda çamëve e Çamërisë”. Në emër të shqiptarëve të Çamërisë përshëndeti deputeti zoti TahirMuhedini, i cili falënderoi të pranishmit për respektin që po tregonin në përkujtim të tragjedisë së vëllezërve të tyre çam. Gjatë këtij aktiviteti u shfaqën filma dokumentarë që risjellin në kujtesë ngjarjet e hidhura që kanë kaluar shqiptarët e Çamërisë si dhe dëshmi nga të mbijetuarit e masakrave. AbdullahAbdullahu, përfaqësues i Shoqatave lexoi deklaratën ku bëhet thirrje bashkësisë ndërkombëtare që të tregojë një interesim dhe kujdes edhe ndaj kësaj pjese të braktisur të Evropës dhe të kujtoj se dhe fëmijët e shqiptarëve të Çamërisë kanë të drejtën natyrale dhe historike për vatrat e tyre stërgjyshore.
Ishte një ambiente i rrallë përplot emocione, ku nuk mungonin lotët. Dhimbja në shpirt trazonte secilin, veçan kur takoj mik e mikeshë çame. Para të vinte pamja e vendlindjes e cila të pret me gjithë bukuritë e vuajtjet e saj. Vërtetë, “Çamëri, na mbeti loti në sy” dhe Arvanitasit, nipat e mbesat e Marko Boçarit edhe sot me shpresë këndojnë: Sa të jetë Shqipëria, Nuk ka mortje Çamëria.
* Hazir Mehmeti eshte korerspondent i Diellit ne Vjene

Darka e Lirisë në Vjenë

June 19, 2014 by dgreca

Shënohet pesëmbëdhjetë vjetori i hyrjes së NATO-së në Kosovës./Në darken festive morën pjesë diplomat, veprimtarë, krijues arti, kulture e shkence. Manifestimin e hapi nikoqiri i mbrëmjes z.ImerLladrovci, konsull.Z. T.Eydelnant: konsull i përgjithshëm SHBA: ”Jam krenar të them se partneriteti në mes të SHBA-ve dhe Kosovës shkon më tej sesa vetëm participimi ynë në KFOR….Urime për zgjedhjet e lira dhe të suksesshme qe u zhvilluan në Kosovë.”/
Nga Hazir Mehmeti, Vjenë/ Ambasada e Republikës së Kosovës/
Hyrja e trupave të NATO- së pas bombardimeve 78 ditësh, më 12 qershorin e para pesëmbëdhjetë vjetëve shënoi në historinë e Kosovës ditën e lirisë së saj. Ushtria Çlirimtare e Kosovës dhe aeroplanët e Aleancës Veri atlantikekurorëzuan fitoren përfundimtare ndaj ushtrisë pushtuese serbe. Kjo datë e ka peshën e saj të pakontestueshëm, datë më e rëndësishme në lirinë e shtetbërjen e Kosovës.
Më këtë rast në shënimin e 12 Qershorit 1999, Ambasada e Republikës së Kosovës në Austri organizoi pritje dhe darkë festive për diplomat nga disa vende, veprimtarë e njerëz nga shkenca, arti e kultura në Austri.Morën pjesë edhe ambasadorët e Shqipërisë z.RolandBimo dhe Spiro Koçi, ambasador pranë OSBE-së. Ishin prezentë edhe z. .TimothyEydelnant, konsull i Përgjithshëm në Ambasadën e SHBA-ve në Vjenë dhe konsull nga shtete tjera si: znj.KirstenAhlers e Gjermanisë,znj.ElizabethWebster e Australisë, z.BranimirLoncar i Kroacisë,z.FitimNuhi i Maqedonisë, përfaqësues nga ambasada e Turqisë, Bullgarisë etj.Moderatore në të tri gjuhët ishte FlorentinaDurmishi. Mysafirët i përshëndeti z. ImerLladrovci, konsull në Ambasadën e Republikës së Kosovës në Austri. Ai në fjalën e tij tha: ”Të nderuar përfaqësues të Trupit Diplomatik në Austri! Shumë të respektuara familje të dëshmorëve dhe ushtar të UÇK-së, të respektuar veprimtar, bashkatdhetarë, zonja e zotërinj! Është kënaqësi e veçantë për mua që të hap këtë Tubim më rastin e 15 vjetorit të çlirimit të Kosovës dhe hyrjes së forcave ushtarake të NATO-s në vendin tim të ju përshëndes përzemërsisht dhe të shpreh falënderimet e mia të sinqerta për praninë tuaj. Kjo datë është shpresa e Kosovës për liri dhe shpresë drejt Bashkimit Evropian. Lufta heroike e UÇK-së dhe intervenimi i NATO-së bënë që Kosova të jetë e lirë. 12 qershori i vitit 1999 është datë kthese, datë shprese, datë e fillimit të lirisë dhe rrugës drejtë Evropës. Ndërhyrja e NATO-së për të parandaluar shfarosjen e një populli, i cili luftoi për ta mbrojtur qenien e vet qytetare dhe kombëtare, territorin e vet historik, etnik ishte luftë për qytetërim evro-perëndimor.Kosovës e rikthen në kujtesë admirimin, mirënjohjen, respektin e përzemërt ndaj secilit ushtar të djeshëm e të sotëm të NATO-së, ndaj shpirtit human dhe demokratik të popujve dhe shteteve aleate me në krye SHBA-të, flamurtare e ideologjisë së paqes universale. Do të jemi, përherë mirënjohës kontributit të ushtarëve të NATO-së, që në këto 15 vjet lirie, së bashku me institucionet ndërkombëtare po ndërtojmë shoqërinë e lirë dhe demokratike për të gjithë. Në këtë përvjetor paqeje dhe lirie, shtet ndërtimi demokratik i Kosovës është mburrje, krenari dhe sukses i yni i përbashkët. Tani jemi më të guximshëm në rrugëtimin tonë drejt familjes evropiane, jemi edhe më pranë vlerave të demokracive perëndimore, ndërtimit të një jete të re në paqe dhe siguri për të gjithë qytetarët e vendit pa dallim etnie e religjioni” Ndërsa në fjalën e tij konsulli i Përgjithshëm amerikan z..TimothyEydelnant mes tjerash tha: ”I nderuari konsull, Lladrovci, të nderuar të pranishëm! Shumë faleminderit për ftesën! SHBA të janë krenare që kontribuojnë për paqe në Kosovë përmes trupave të KFOR-it, e cila udhëhiqet nga NATO.Qe 15 vjet prezenca e SHBA-ve në KFOR është konstante, dhe tani kemi 650 paqeruajtës të pranishëm në Kosovë. Mision i KFOR-it për të kontribuar për një ambient të qetë dhe në forcimin e lirisë së lëvizjes ishte kyç për ta rikthyer paqen dhe stabilitetin, jo vetëm ne Kosovë, por në tërë Ballkanin Perëndimor qe 15 vjet. Ky mision vazhdon edhe tani, KFOR -i është një faktor stabiliteti që respektohet nga të gjitha komunitetet në Kosovë.
Kontributi i KFORit në sigurinë gjatë zgjedhje ne vitin 2013 dhe 2014 qe ishin në Kosovë e konfirmon rolin e saj të rëndësishëm. Prezenca e fuqishme e KFOR-it gjatë mbikëqyrjes sërrjedhave në Kosovë nga Bashkimi Europian, ishte një faktor i rëndësishëm i arritjes së marrëveshjes mes Prishtinës dhe Beogradit në vitin 2013.KFOR-it është shumë mërëndësi për të krijuar një ambient në të cilin këto marrëveshje mund të zbatohen. Shumë gjëra pozitive që janë arritur në Kosovë gjatë këtyre vjetëve të fundit nuk kishin mund të realizohen pa ndihmën dhe prezencën e KFOR-it. Jam krenar të them se partneriteti në mes të SHBA-ve dhe Kosovës shkon më tej sesa vetëm participimi ynë në KFOR. Që nga Marsi i vitit 2011 shteti ynë është pjesë e një partneriteti me Kosovën, i cili quhet „IowaKosovo Program“ i cili përfshin bashkëpunim ndërmjet qeverive, ekonomisë dhe shoqërisë të dy vendeve.
Edhe pse jemi në Vjenë, me lejoni të u shpreh urimet nga ambasada e Amerikës në Kosovë për zgjedhjet e lira dhe të suksesshme qe u zhvilluan në Kosovë. Ky është një hap i mirë drejt standardeve evropiane dhe perëndimore.” Darka kaloj në atmosferë feste, u ngritën dolli për Kosovën, heronjtë e kombit për miqtë e dashamirët tanë gjithandej globit.

Shtrirja e Rrjetit të Bizneseve të Diasporës arrin në Amerikën e Veriut dhe Kanada

June 17, 2014 by dgreca

NGA BEQIR SINA, New York/
Në shtëpinë e Vatrës,me 13 qershor 2014,Unioni i Rrjeteve të Biznesit të Diasporës për Amerikën e Veriut dhe Kanada, u takuan me një grup të biznesmenëve amerikano shqiptarë, të cilët kan vite që po ushtrojnë bizneset e tyre në Shtetet e Bashkuara.
Në mesin e pjesmarrësve ishte edhe një funksionar i lartë, i shtetit të Nju Jorkut, z. Mark Gjonaj Assemblyman i shtetit dhe biznesmen e suksshëm amerikano – shqiptarë , zoti Naim Dedushaj, drejtor i Departamentit të Investimeve, dhe Ambasador Bekim Sejdiu – Konsull i Përgjithshëm i Kosovës në SHBA
Qëllimi i këtij takimi ishte gjetja e mundësive për t’u bashkuar të gjitha bizneset shqiptare në Amerikë nëpërmjet Rrjetit të Biznesit të Diasporës për SHBA, Kanada dhe Britaninë e Madhe.
Ky takim u udhëhoq nga kryetari i kësaj organizate për SHBA z. Elmi Berisha, dhe zëvendës – kryetari z. Besim Malota, të cilët kërkuan duke shfrytëzuar këtë takim shtrirjen dhe bashkëpunimin me disa biznesmenët Shqiptaro-Amerikanë, regjistrimin e tyre nëpërmjet një formulari të posaçëm.
Z. Sejdiu dhe z. Gjonaj gjatë fjalës së tyre inkurajuan biznesmenët amerikano – shqiptarë për të rritur suksesin e tyre.
Zyrtari nga Ministria e Diasporës Naim Dedushaj, drejtor i Departamentit të Investimeve, i cili edhe i udhëheqë forumet në diasporë, me këtë rast, theksoi se janë shtuar mundësitë dhe përparësitë e investimit në Kosovë, si dhe lehtësitë që rrjetëzimi i bizneseve u sjell tashmë afaristëve nga diaspora, prej se kur është krijuar ky Union. Ai mori si shembull regjistrimin e bizneseve shqiptare në Austri, ku simbas tij tani numëroheshin mbi 400 biznese.
Ndërsa, asambleisti i shteti të Nju Jorkut,, z. Mark Gjonaj një biznesmen i suksshëm amerikano – shqiptarë , gjatë diskutimit të tij – tregoi anën ligjore të bërjes biznes në SHBA, dhe sugjeroi mënyrat se si të bëhet një biznes të suksesshëm : “duke marr si shembull dhe model siç e quajti ai atë të biznesi nga komunitet e tjera dhe më i veçanti tha ai në këtë drejtim është komunitet hebrejë në SHBA”.
Kurse Konsulli i Përgjithshëm i Kosovës z. Sejdiu tha se institucioni që ai përfaqëson do të ndihmojë çdo bizneses shqiptarë në SHBA nga ana institucionale, së bashku me përfaqësuesit e shtetit shqiptarë.
Kryetari i Unionit të Rrjeteve të Biznesit të Diasporës për Amerikën e Veriut dhe Kanada, zoti Elmi Berisha theksoi se :”Ky projekt madhor ka për qëllim krijimin dhe forcimin e lidhjeve të biznesit mes biznesmenëve të Diasporës, jo vetëm duke inkurajuar por edhe duke nxitur kështu edhe investimet e tyre, në vendet tona, pra në vend origjinën tonë”.
Diaspora, tha zoti Berisha, tani ka në plan shtrirjen e këtyre rrejeteve të biznesit në Amerikën e Veriut dhe Kanada – ku koncepti bazë i këtij projekti të madh është forcimi i lidhjeve mes anëtarëve të komunitetit të diasporës, si dhe rritjen e bashkëpunimit ndërmjet bizneseve të diasporës dhe bizneseve nga vendorigjina vendin jonë.
Z. Nazar Mehmeti nga Dallas është zgjedhur kryetari i Unionit Global të Rrjeteve të Bizneseve të Diasporës dhe z. Yll Blakaj një biznesmen shumë i suksesshëm në Vjenë është zgjedhur kryetar për Evropën dhe z. Elmi Berisha nga New York-u është zgjedhur kryetar për Amerikën e Veriut dhe Kanada

Mergata ne Europe- Gara e diturisë në Austri, festë mësimi e krenarie

June 10, 2014 by dgreca

Vendi i parë ekipi “Rozafa” dhe cikli i ulët ekipi “Mollëkuqja”. Y. Lladrovci: “ Nuk ka asgjë më të shenjtë e më të shtrenjtë, sesa ta duash gjuhën tënde, ta respektosh gjuhën tënde dhe ta njohës gjuhën tënde”.
Nga Hazir MEHMETI, Vjenë/
Në lokalitetin Rottenmann të Stairmarkut u mbajt gara e diturisë së nxënësve shqiptarë nga e gjithë Austria. Mori pjesë edhe zv. kryetari i Bashkisë z.Bernard Alfred , z.Nuhi Gashi nga Ministria e Arsimit e Teknologjisë së Kosovës, z. Ymer Avdiu nga Ministria e Diasporës. Në emër të Ambasadës së Republikës së Kosovës në Austri z, Ymer Lladrovci. Tubimin e hapi mësuesja nikoqire znj. Roza Ndrecaj, kurse për realizimin programatik u përkujdes z.Osman Ademi, mësues. Z.Ymer Lladrovci në fjalën e tij përshëndetëse mes tjerash tha: “Të respektuar familjet e dëshmorëve, të respektuar përfaqurës nga Ministritë e Kosovës, përfaqësues të pushtetit vendor, mësimdhënës, nxënës, prindër. Ndihem i nderuar që jam në mesin tuaj dhe në emrin tim personal dhe ushtruesit të detyrës së Ambasadorit të Republikës së Kosovës në Austri z.Blerim Camaj, ju përshëndes duke ju sjell urimet e përzemërta. Ndjehem mirë në këtë eveniment i organizuar nga mësuesit në një shtet siç është Austria e cila në vazhdimësi ka dëshmuar se është një mike e madhe e popullit shqiptar. Është vetëm shteti austriak në Europë që e financon mësim plotësues dhe i krijon të gjitha kushtet për mbajtjen e tij me sukses. Por, këtë duhet ta kenë parasysh të gjithë prindërit të cilët nuk i dërgojnë fëmijët e tyre në mësimin shqip. Është me rëndësi ruajtja dhe vazhdimi i këtij evenimenti brez pas brezi, sepse ruajtja e shkollës shqipe në diasporë është përpjekja e jonë e fundit që duhet bërë. Gjuha shqipe sikurse dhe kombi ynë kaluan stuhi e rrebeshe në histori shekujve nën pushtimin turk, serb, por kemi arritur të jemi sot këtu me gjuhën e nënës. Kjo është shumë e rëndësishme dhe na detyron që mësimi plotësues ta mbajmë në nivelin e duhur, jo vetëm sa për të qenë, por të jetë mësim i respektuar. Jam i bindur se kemi edhe një armatë akoma më të madhe jashtë kësaj salle të cilët akoma nuk i dërgojnë fëmijët e tyre në mësimin plotësues në gjuhën shqipe. Ju të nderuar, do ta keni mbështetje time dhe të Ambasadës, të Ministrisë së Arsimit, Ministrisë së Diasporës, të qeverisë së Kosovës. Të gjithë ne që jemi këtu e kemi mundësuar këtë manifestim, prandaj do thosha fjalët e rilindësve: “ Nuk ka asgjë më të shenjtë e më të shtrenjtë, sesa ta duash gjuhën tënde, ta respektosh gjuhën tënde dhe ta njohësh gjuhën tënde.”
Zv.kry. Bernard Alfred, në fjalën përshëndetëse, edhe në shqip, tha: ”Në vitin 1999 kur unë isha me ushtarët tanë në Shkodër, jam përshëndetur nga popullsia shqiptare të cilës i kemi ofruar ndihmë në atë kohë. “ Mirësevini në Rottenmann! E dashura mësuese Roza, jam shumë i gëzuar me ftesën tuaj dhe jam i befasuar me një kuiz, një “Milionen Shov” pa fitues të hollash. Unë ju dëshiroj një pasdite të këndshme, shumë faleminderit.” Ndërsa në emër të Ministrisë së Diasporës përshëndeti z.Ymer Avdiu. “Të nderuar mësues, prindër e nxënës, ju përgëzoj për punën e mirë që bëni, veçanërisht mësuesen Roza si organizatore. Ministria e Diasporës, Arsimit, qeveria, përfaqësia diplomatike këtu gjithmonë do jemi pranë jush. E falënderojmë shtetin austriak në të gjitha nivelet për këto kushte e mundësi që ua ofron dhe apeloj që edhe prindërit tjerë t’i dërgojnë fëmijët e tyre në mësimin e gjuhës shqipe.”
Risi e garës ishte forma moderne e parashtrimit të pyetjeve të prezantuara në ekran dhe mundësia e përgjegjës alternative. Kjo formë loje e lehtësoi garën, ishte më afër publikut i cili mund të mësonte edhe vet. Këtu një punë të madhe bëri z.Nuhi Gashi nga MASHT e Kosovës i cili kishte përgatitur pyetjet dhe anën teknike vizuale, tani hera e parë edhe në Austri krahas vendeve tjera. Pytjet ishin të gjitha përgatitura nga tekstet e reja mësimore për tri nivelet mësimore. Krejt këto mbi bazën e Kurrikulës për Diasporën.
Nga cili i ulët i fillores u paraqiten ekipet: “Mollëkuqja”, ekipi mësueses Fatime Imeri i zili zuri vendin e parë. Ekipi “Xixëllonjat” e mësueses Miradije Berisha, venid i dytë dhe ekipi “Milingonat” i mësueses Roza Ndrecaj u rendit i treti. Në ciklin e lartë ekipi “Rozafa” nga Rottenmann-i i mësueses Roza Ndrecaj u shpall kampion diturie dhe mori kupën e kuizit, me nxënësit/et: : Albjona Kicaj, Vjosa Bytyqi, Hyra Osaj. Vendi i dyte ekipi “DUKAGJINI” I mësueses Miradije Berisha dhe vendi i tretë “Dardanija” i mësuesit Mark Demaj. Në gara ishin edhe këto ekipe: “Yjet” e mësueses Feride Aradini “Afrim Zhitia” –Ibrahim Hasani, “Dituria” –Bukurije Limani, “Flamuri”- Ismet Sinani, , “Liria” Osman Ademi, “Sharri” Shefqet Gashi.
Programi artistik ishte i larmishëm ku nxënësit u paraqiten me valle, recitime, këngë, skeçe teatrale etj. U këndua kënga përshëndetëse nga Ulli Eder-Traxel në gjermanisht. Ekipeve fituese ju ndanë shpërblime. Ekipit fitues “Rozafa”, z.Imer Lladrovci, në emër të Ambasadës së Kosovë ua dhuroi kompletin e veprave të shkrimtarit Adem Dema (qi), kurse kupën e fituesit e dhuroi z.Ymer Avdiu (M e D). Z.Nuhi Gashi të gjithë nxënësve garues dhe moderatorit u dhuroi libra në emër të dikasterit që përfaqëson. Zv.kry. të Rottenmann-it iu dhurua Monografia e Mësimit Shqip në Austri nga autori, e cila u prit me kënaqësi dhe falënderim.
Gara e diturisë ishte një festë e vërtetë ku u vërtetua se jemi popull vital, me kulturë organizative dhe dimë t’i shërbejmë interesave kombëtare, se e duam kombin e mbi të gjitha gjuhën e shenjtë shqipe. Tani e dy vjet edhe Ministria e Diasporës e mbështetë financiarisht kuizin. Në këtë vit shkollor u botuan edhe 5 tekstet nivelit të tretë nga projekti i mikut tonë të madh Dr.Dr. Basil Schader nga Zvicëra i mbështetur edhe nga MASHT e Kosovës dhe M e D. Për nxënësit fillestar Ministria e Mësimit e Austrisë tani ka botuar Abetaren e parë në gjuhën shqipe e standardeve bashkëkohore krahas gjuhëve turke e kroate. Fjalori “Bota e fjalëve” i autorëve Dr.Rudolf Muhr e Ramiz Berisha tani e plotëson vëllimin e botimeve shumë të rëndësishme për mesmin e gjuhës shqipe. Faqja e internetit e përkrahur nga Ministria përkatëse e Austrisë siguron botimin e të gjitha fletëve mësimore në gjuhën shqipe nga mësuesit kreativ krahas gjuhëve turke e kroate. Këto arritje janë dëshmi e një qëndrimi dashamirës të Austrisë. Kjo na detyron të jemi vlerësues e kreativ në mësimin e gjuhës amtare. Mjerisht, akoma jemi larg me qëndrimin tonë si prindër dhe komunitet në gjithë përfshirjen e fëmijëve shqiptarë në mësimin amtar. Ndoshta nuk do bëhet vonë nesër!

AUSTRI-Turneu i Futbollit për nxënësit, një provim i suksesshëm talentesh

June 2, 2014 by dgreca

Z.Lladrovci:” Sporti është një ambasador i vërtetë i kulturës. Populli shqiptar ka një kulturë dhe një traditë në organizim..”…Vendet e para ekipet “Tullni” dhe “Dukagjin” të mësueses Miradije Berisha-Kabashi./
Nga Hazir Mehmeti, Vjenë/
Në lokalitetin Gänsendorf, rrethina e Vjenës, u mbajt turniri vjetor tradicional i futbollit për nxënës dhe të rritur. Realizimin e pjesës zyrtare të programit e udhëhoqi z.Qani Sulejmani, Kryetar i Ligës Shqiptare të Futbollit në Austri, ndërsa hapjen zyrtare të garave e bëri z.Feta Saiti, kryetar i Shoqata Kulturore “Afrim Zhitia”, organizatore e turnirit bashkë me Shoqatën e Prindërve dhe Mësuesve Shqiptarë në Austri. Ai përshëndeti mysafirët e rastit, shikuesit, nxënësit dhe mësuesit pjesëmarrës. “Mirë se erdhët në këtë turnir dhe suksese në gara. Le të jetë kjo një ditë ku do luhet futboll dhe krijohen miqësi mes të rinjve.”. Turnirin e nderuan me pjesëmarrjen e tyre z. Nuhi Gashi nga Ministria e Arsimit Shkencës e Teknologjisë së Kosovës dhe z.Ymer Lladrovci, konsull në Ambasadën e Republikës së Kosovës në Austri. Në fjalën e tij z. Lladrovci mes tjerash tha:” Sporti është një ambasador i vërtetë i kulturës. Populli shqiptar ka një kulturë dhe një traditë në organizim. Të gjithë pjesëmarrësit janë fitimtar, por natyrisht dikujt i takon vendi i parë. Dua ta përshëndes Ligen Shqiptare të Futbollit në Austri dhe u dëshiroj suksese. Mbështetjen tonë do ta keni në të gjitha format e mundshme”
Në një ambient të bukur pranveror fusha e futbollit ishte e mbushur me futbollist të tri niveleve: të ciklit të ulët, ciklit të lartë të shkollës fillore dhe ekipet e të rriturve. Gjelbërimi i derdhur nga penali natyror u zbukurua me veshjet shumëngjyrëshe të nxënësve shqiptarë të cilët krahas gjuhës së shkollës mësojnë edhe gjuhën e shenjtë shqipe. Gjuhën e porositura nga të mëdhenjtë Gjergj Fishta, Naim Frashëri e shumë patriotë tjerë që derdhën gjakun e tyre për shkronjat shqipe. Edhe ky organizim i mrekullueshëm flet për vetëdijen tonë organizative në të mirën e ruajtjes së qenies shqiptare jashtë atdheut, me atdheun në zemër.
Në gara morën pjesë këto ekipe nga Cikli i Ulët i fillores me renditje garuese: Tullni 9 pikë, 2.Drenica 4 pikë; 3.Gänserndorfi 2 pikë dhe veni i katër (4.)Liria me 1 pikë. Në Ciklin e Lartë të fillores morën pjesë katër ekipe: 1.Dukagjini 7 pikë, 2.Gostivari 5 pikë, 3. FC Deutsch-Wagrami 4 pikë, 4.FC Strasshof 0 pikë. Në të dy Ciklet shkollore vendin e parë e mrituan ekipet e mësueses nga Tullni, znj.Miradija Berisha-Kabashi. Kjo tregon një përkushtim në organizimin e aktiviteteve dhe bashkëpunimin e mirë me prindër.
Shoqata Afrim ,,Zhitia” kishte siguruar medalje dhe kupa për tri vendet e para.
Shpërblimet i ndan mësuesit: Osman Ademi, Miradije Berisha, Ibrahim Hasana, Feta Saiti, kryetar i Shoqatës, Halil Jashari, nga Liga Shqiptare e Futbollit në Austri etj.
Në mbarëvajtjen e turneut kontribuuan Adnan Tairi, Fikret Shaqiri, Avni Kamberi ,Nexhbedin Lleshi, Jetmir Izairi, Zekirja Emrulaj e shumë të tjerë.