Bylykbashi: PS prishi formulën e Kompromisit

July 20, 2016 by dgreca

– Manjani: Agaçi i PS ra dakord me PD/

Deputeti i Partisë Demokratike, Oerd Bylykbashi ka deklaruar sonte në mbrëmje se, votimi i reformës në drejtësi të enjten në Parlament është i pamundur për shkak të mosdakordësisë për formulën e zgjedhjes së anëtarëve të 4 organeve të drejtësisë, përfshirë KLGJ dhe KLP.

***

Pas deklaratës së Ambasadës amerikane se Basha ka shkelur konsensusin e arritur më herët të mërkurën, Partia Demokratike ka reaguar me anë të një deklarate ku thotë se bllokimi i ndodhur në orët e fundit nuk vjen prej saj.

“Partia Demokratike rikonfirmon se negociatoret Bylykbashi, Agaci dhe Manjani të hënën mbrëma kanë rënë dakord që formula e propozimit hibrid për institucionet e vetingut do të përdoret edhe për Këshillin e Lartë Gjyqësor dhe Këshillin e Lartë Prokurorial.

Kjo është një formulë në përputhje me rekomandimin e Venecias e aprovuar si e tillë nga komuniteti ndërkombëtar dhe së fundmi edhe nga Partia Socialiste dhe ditën e sotme edhe nga Edi Rama”, thotë PD.

Më tej në deklaratë thuhet se, “hapi mbrapa i përfaqësuesve të PS në Komision, kërkesa për t’u kthyer në formulën e votës së vetme të transferueshme të refuzuar publikisht nga Partia Demokratike, dhe refuzimi për të zbatuar marrëveshjen është një zhvillim dramatik”.

Manjani: Agaçi i PS ra dakord me PD

Ministri i Drejtësisë, Ylli Manjani deklaroi sonte nga kryesia e kuvendit se mbi variantin që kërkon sot PD dhe LSI është rënë dakord në mbledhjen e ditës së hënë. “Agaçi, unë dhe Bylykbashi arritën dakordësinë për këtë pikë, por nuk u fut në procesverbal pasi mbledhja u mbyll”, tha Manjani.

Sipas Manjanit, ditën e hënë u diskutua mbi propozimin hidrit, propozimi i Nuland. Ai theksoi më tej se negociatat kanë qenë dypalëshe, PDPS, ndërsa të hënë u arrit mbyllja me konsensus për çështjen e Vettingut.

“Diskutuam me Hahn për çështje që kishin ngelur pezull për propozimet e Nuland, që kishte të bënte me procesin e Vetingut. E konfirmoj atë që tha zoti Bylykbashi për atë që ishte rënë dakord. Kanë qenë negociata dypalëshe, Agaci dhe Bylykbashi më kanë thënë se ishin marrë vesh. Për shkak se mbledhja u ndërpre papritur, kanë ngelur dy çështje pa zgjidhur që u thanë në letrën e zotit Hahn dhe çështja u quajt e zgjidhur. Nuk kemi pasur asnjë reagim as nga partitë e tjera dhe nga ekspertët e tjerë. Ne jemi mbledhur në grupin negociatat pasi u mblodh tryeza e Partive politike dhe ata na mandatuan që të merreshim vesh për çështjen e fundit; për rolinn e ndërkombëtarëve. Unë nuk e di ça janë negociatat e PDPS. Ne kemi mbyllur çështjen e rolit të ndërkombëtarëve dhe çështjen e seleksionimit të atyre që do konkurrojnë në çështjen e Vetingut. Ne kemi rënë dakord që të ishin tre nga maxhoranca dhe dy nga opozita. Nuk hy në detaje. Unë nuk jam kryetari i negocatorëve.”, tha Manjani.

PRISHET FESTA POLITIKE-NGRINE KONSENSUSI PER REFORMEN NE DREJTESI

July 20, 2016 by dgreca

*Ambasada amerikane: Reforma në drejtësi është bllokuar sërish/

Ambasada e SHBA-ve ka reaguar për herë të parë për reformën në drejtësi. Me anë një deklarate ajo konfirmon lajmet se reforma në drejtësi është bllokuar sërish.

“Ambasada e SHBA është e zhgënjyer që vëren se pas deklarimit të një marrëveshjeje midis qeverisë dhe opozitës, kreu i opozitës, Z. Basha ka paraqitur një kërkesë të re të papranueshme. Ky zhvillim i fundit na detyron të arrijmë në përfundimin se kjo është një përpjekje e qëllimshme nga kreu i opozitës për ta bllokuar këtë reformë. Paketa e reformës është gati dhe përmbush të gjitha standardet e Komisionit të Venecias, SHBA dhe BE. Nëse Z. Basha nuk i përmbush dot premtimet e tij, Qeveria e Shteteve të Bashkuara iu bën thirrje anëtarëve të parlamentit individualisht ta miratojnë këtë reformë më 21 korrik” – thuhet në reagimin e ambasadës së SHBA-ve.

Në reagimin e SHBA-ve nuk thuhet se cila ishte kërkesa e re e kreut të opozitës Basha. Burimet nga grupi i negociatorëve thonë se ishte PS ajo që ngriti pretendime. Kryeministri Rama kishte premtuar të votonte çdo draft që merrte miratimin e SHBA dhe BE, por tashmë ka nxjerrë pretendime të reja.

*KOMISIONI I POSACEM: PD DHE LSI PRESIN PERFAQESUESIT E PARTISE SOCIALISTE/

Kur u mendua se gjithçka ishte në rregull dhe nesër do të kryhej votimi me konsensus, brenda pak orësh ndodhi një kthesë e madhe:Në orën 22:00 ambasada e SHBA-se del me një deklaratë ku akuzon se kryetari i Partisë Demokratike, Lulzim Basha ka paraqitur kërkesa të reja, që sipas ambasadës janë të papranueshme dhe që synojnë bllokimin e reformës.

Washingtoni i bën thirrje anëtarëve të parlamentit individualisht ta miratojnë këtë reformë më 21 korrik, nse Z. Basha nuk i përmbush dot premtimet e tij.

Ndërkohë prej orës 20:30 në tryezën e Komisionit të posaçëm të Reformës në Drejtësi, ndodhen përfaqësuesit e opozitës dhe kryetari i grupit parlamentar te LSI-se, Petrit Vasili.

PD akuzon PS-në se me mosardhjen e deputetëve të PS rrezikon minimin e votimit të reformës në drejtësi seancën gjatë ditës së nesërme.PD kërkon që formula për vetingun të jetë dhe për 4 institucionet përfshi dhe KLP dhe KLGj-se.

“Përfaqësuesit e PS-së refuzojnë të mblidhen në komisionin e Reformës në drejtësi për të bërë këto ndryshime që janë absolutisht të domosdoshme. Mbledhja e këtij komisioni dhe miratimi i këtyre ndryshimeve që u ranë dakord dhe përshëndeten nga palët është esencial dhe i domosdoshmë, pra propozimi i Nuland të shkojë në parlament nesër. Moskryerja e kësaj séance, e këtij komisioni sot e bën të pamundur që nesër parlamenti të ketë mundësi të votojë propozimin e dakordësuar .

Moskryerja e kësaj seance, vë në rrezik votimin. PS po synon të fusë në mënyrë tinzare dhe pas asnjë lloj marrëveshje votën e vet të transferueshme. Kjo forlumë nuk funksionon në një komision me 10 anëtar dhe është e korruptueshme. Insistimi për ta bërë në mënyrë të njënashme është a- për ta deformuar konsensusin, b- për të marrë kontrollin e këtyre organeve. Nëse kalon dita e sotme nuk mund të paraqiten më amendamente të reja dhe vihen në rrezik propozimi i Nuland” deklaroi Oerd Bylykbashi.

Xhafaj: Projekti është gati për në seancë

“Ju kërkoj ndjesë se jeni detyruar të qëndronit deri në këtë orë të vonë për shkak të çudirave që prodhon politika shqiptare, të marrësive të njëpasnjëshme dhe të gënjeshtrave të radhës që nxjerr në çdo moment për t’i bërë bisht përgjegjësive që ka ndaj qytetarëve shqiptarë dhe ndaj partnerëve të vendit. Kjo që bëri sot dhe teatrit që po zhvillon Partia Demokratike dhe më vjen keq për kolegët që janë pjesë e komisionit, është një gjë e turpshme, nuk është korrekte me qëndrimet e veta, dhe me qytetarët e këtij vendi dhe me partnerët. Ju më pyetët a ka mbledhje komisioni? Dihet! Unë nuk ka ndonjë mbledhje komisioni që nuk e thërret kryetari. A mund ta thërrisja, po kam që nga mëngjesi që unë pres të bëj një mbledhje komisioni. Për çfarë do ta bëj? Për të shqyrtuar një çështje të caktuar.

Së pari, Kuvendi mund të mblidhet normalisht nesër. Ka një draft kushtetues, ka një projekt kushtetues, për të cilën është përgatitur e gjithë procedura e nevojshme parlamentare. Relatorët dhe unë kemi firmosur raportin që do t’i paraqitet seancës plenare për projektin kushtetues. A është ky i duhuri? Po themi ne! Po thonë SHBA! Po thotë BE. Ka dikush që nuk thotë dot po. Nga kjo pikëpamje projekti është gati.

Natyrisht kishte një çështje të mbetur pezull që ishte jetësimi i propozimit hibrid i zonjës Nuland i cili ishte propozim që konfirmonte qëndrimin e SHBA dhe BE. Atë propozim ne e kemi përfshirë në draftin që do të jetë nesër në mbledhjen e djeshme të komisionit të posaçëm parlamentar. Unë nuk mbaj përgjegjësi për opozitën që ka muaj të tërë që e bllokon dhe e bojkoton. Ishte pak qesharake pasi mbas kaq muajsh marrin pjesë në mbledhjen e komisionit”-tha se drafti është gati edhe në këtë formë për të hyrë në seancë normale Kuvendi.

Fleckenstein: Nuk më besohet! Më vjen keq!

Eurodeputeti Knut Fleckenstein ka deklaruar se nuk i besohet që ka probleme të reja për reformën në drejtësi. Në një reagim në Twitter, i shkruan se është i mërzitur me atë çka po ndodh në Shqipëri.

Fleckenstein: Probleme të reja? Nuk më besohet. Jam shumë i mërzitur. Tani duhet të presim për votat nesër? Atëherë do ta shohim. Më vjen keq!

BE reagon

Në një reagim të minutës së fundit (Ora 23:30) nga zyra e delegacionit të Bashkimit Evropian, thuhet se supozohet që angazhimi i kreut demokrat Basha të mbahej.

Reagimi: Shpresojmë se dakordësia e Bashës që iu bë Komisionerit Hahn është ende e vlefshme në tërësinë e saj. Kjo është çështje kredibiliteti personal dhe politik

Ndodhi Sot-Basha: Ngërçi për Reformën u kapërcye

July 20, 2016 by dgreca

Kryetari i opozitës njoftoi arritjen e një zgjidhjeje për rolin e ekspertëve ndërkombëtarë: Do të jetë rekomandues dhe vendimmarrja do të jetë në duart e palës shqiptare…

Në Shqipëri, kryetari i Partisë Demokratike Lulzim Basha njoftoi sot se pas ndërhyrjeve të Komisionerit për Zgjerimin Johannes Hahn është arritur mirëkuptimi dhe për aspektet e mbetura pezull për Reformën në Drejtësi. “Eshtë rënë dakort se roli i Misionit Ndërkombëtar do të jetë rekomandues dhe vendimmarrja do të jetë në duart e palës shqiptare dhe kjo do mishërohet në kushtetutë. Nuk do përjashtohet asnjë qytetar nga konkurrimi mbi bazën e hamendësimeve por vetëm i provave”, deklaroi zoti Basha duke shtuar se “PD është e gatshme që nesër të bashkojë votat për draftin kushtetues”. Kreu i opozitës foli për “një betejë që ja vlejti”, pasi tani siç u shpreh ai “drafti mishëron e reflekton plotësisht rekomandimet e Venecias dhe është i bazuar në propozimin e zonjës Nuland”.

ÇFARË THONË TRE AKTORËT KRYESORË PËR 21 KORRIKUN ?

July 19, 2016 by dgreca

Reforma e drejtësisë; flasin Rama, Basha dhe Meta/

Kyeministri Edi Rama i bëri sot thirrje opozitës që t’i qëndrojë propozimit të ambasadores Nuland mbi reformimin e drejtësisë si e vetmja mundësi për kompromis në 21 korrik.

Zoti Rama tha se deri pas mesnate u bë një progres i mirë në disa aspekte teknike mes ekspertëve, por vija e kuqe e SHBA-ve rezultoi e pakapërcyeshme, dhe se propozimi i PD-së është për të hequr ONM-në (Operacioni Ndërkombëtar i Monitorimit ).

“Jemi përballë një zgjedhje të qartë: ose të votojmë, si duan shqiptarët, për të shpëtuar nga gjyqtarët e korruptuar, ose të votojmë që këta të vazhdojnë të mbajnë peng sistemin gjyqësor.

Ose të ulemi në tryezën e BE-së, ose të turpërohemi duke dalë kundër SHBA dhe Europianë, duke refuzuar ndihmën e tyre për të fshirë papastërtitë e drejtësisë tonë” – tha zoti Rama.

Ai tha se opozitës iu plotësua çdo kërkesë e negociueshme dhe ajo ka arritur shumë, por nuk ia plotësojmë dot kërkesën për të dalë kundër SHBA dhe BE, sepse këta janë garancia e fshesës së hekurt kundër të korruptuarve.

“Jam gati deri në orën 10 të enjten, por kemi arritur deri në një bllokim absurd. Kjo nuk është reforma ime, nuk është reforma e një partie. Të bashkojmë të dy koalicionet dhe të ngremë duart lart me kartonin jeshil dhe të miratojmë reformën në drejtësi” – tha zoti Rama.

Ai zhvilloi sot një takim me kryetarin e PDIU-së, Shpëtim Idrizi.

Ndëkohë kryetari i PD-së, Lulzim Basha zhvilloi një takim me kryetarin e LSI-së, Ilir Meta, pjesëtar i koalicionit qeveritar, njëkohësisht kryetar i parlamentit.

Zoti Basha tha se kryeministri Rama po bën një përpjekje ogurzezë për të shkatërruar konsensusin. “Rama nuk dëshiron të lejojë PD-në të bashkojë votat në një proces konsensual. Dolën petët e lakrorit, kush e do konsensusin dhe kush do ta sabotojë atë” – tha zoti Basha.

Ai tha se ishte i gatshëm t’i drejtohej Brukselit për të shpartalluar “komplotin e kryeministrit” ndaj reformës në drejtësi.

“PD ka votat gati për të votuar në parim draftin, dhe dy çështjet e rikthyera në tryezë, nëse nuk zgjidhen dot, do ta zgjidhim në Bruksel bashkë me Metën për të shpartalluar komplotin e Edi Ramës”, tha ai.

Ndërsa zoti Meta shprehu optimizmin se korrupsioni nuk luftohet me korrupsion dhe krim të organizuar.

“Nuk mund të bëhet reforma në mënyrë jo shumë transparente dhe si telefon i prishur. Politika armiqësore dhe përjashtuese nuk e ndihmon drejtësinë. Shqiptarët duhet të dalin të bashkuar pas së enjtes, me besim se Shqipëria do të hedhë një hap madhor.”, – tha ai.( sipas Zerit te Amerikes)

REFORMA NE DREJTESI, TAKIM TRESH: RAMA, BASHA, META

July 18, 2016 by dgreca

Bisedimet trepalëshe, Basha: “është rënë dakort për të kërkuar zgjidhje bazuar mbi propozimin hibrid dhe rekomandimet e Komisionit të Venecias”. Rama: Konsensus janë dhe dy të tretat e votave në parlament/

Në Shqipëri palët politike duket se po bëjnë një përpjekje të fundit në kërkim të një marrëveshjeje për Reformën në Drejtësi. Në përfundim të takimit të sotëm mes kryeministrit Edi Rama, kreut të opozitës Lulzim Basha dhe kryetarit të Parlamentit Ilir Meta, i cili zgjati pak më shumë se 100 minuta, palët kanë vendosur të rinisin bisedimet. Zoti Basha njoftoi se është rënë dakort që “secili të angazhojë nga një përfaqësues për të kërkuar zgjidhje bazuar mbi propozimin hibrid dhe rekomandimet e Komisionit të Venecias”. Sipas kryetarit të opozitës Basha kjo është “një mundësi për të përmbyllur me sukses reformën”.

Pak më vonë, duke folur për Reformën në Drejtësi, kryeministri Edi Rama nuk shfaqi ndonjë shenjë optimizmi mbi takimin e sotëm. “Edhe një herë sot kam bërë të qartë që ne pranojmë çdo propozim dhe cdo zgjidhje që ofron PD, me kusht që zgjidhja në fjalë të konsiderohet zgjidhje dhe jo zgjedhë mbi sistemin e drejtësisë, nga partnerët tanë”, deklaroi zoti Rama. Ai shtoi se “ne nuk mund t’i lejojmë vetes për asnjë arsye, për asnjë interes të natyrshëm legjitim, politik, partiak apo numerik që të pranojmë në heshtje pengmarrjen e vendit tonë dhe që në heshtje të shohim se si Shqipëria në vend që të çelë dyert e BE jo vetëm ta humb këtë mundësi por të damkoset si vendi që nuk pati kurajon për shkak të përfaqësuesve në parlament të kalojë Reformën në Drejtësi dhe refuzoi përfshirjen e partnerëve tanë në procesin e pastrimit të sistemit nga gjykatësit dhe prokurorët e korruptuar”.

Pavarësisht se uroi që më 21 korrik Reforma të kalojë me konsensus, zoti Rama nuk duket se ka shumë shpresë për këtë, por se Reforma do të mund të votohet “me konsensus apo pa konsensus. Kushtetuta ka një konsensus, me dy të tretat”, theksoi ai si një përgjigje që tingëllon t’i drejtohet edhe aleatit të vet LSI-së, drejtuesi i së cilës, Ilir Meta deklaroi një ditë më parë se “miratimi i Reformës në mënyrë të diskutueshme, jo plotësisht legjitime dhe me integritet, mund të hapë një situatë krejt të re për vendin e cila nuk do të jetë ajo e forcimit të institucioneve dhe të shtetit ligjor”.

Në pamje të parë duket se opozita ka bërë një hap të lehtë pas, duke pranuar që bisedimet të mbështeten te propozimi i bërë nga Ndihmës sekretarja amerikane e Shtetit Victoria Nuland, më 10 korrik në Tiranë, ndonëse zoti Basha përsëriti se “ne kemi paraqitur një zgjidhje dhe kontributi ynë për ta sjellë propozimin hibrid tërësisht brenda paramatrave të Komisionit të Venecias është dëshmia e përkushtimit dhe sinqeritetit të PD”. Praktikisht zoti Basha nënvizon se sipas tij propozimi hibrid nuk është në përputhje me rekomandimet e Venecias, ndërkohë që si ambasadori amerikan Donald Lu dhe kreu i Delegacionit të Bashkimit Europian Romana Vlahutin, por edhe vetë zonja Nuland, mbështesin të kundërtën.

Gjatë paradites, në përgjigje të ftesës së djeshme të zotit Meta për takimin e sotëm, zoti Basha kishte deklaruar se “PD është e gatshme të marrë pjesë në këtë format takimi, të ekspozojë pa asnjë paragjykim apo prapamendim bazën ligjore të propozimeve të saj për verifikimin e gjykatësve dhe prokurorëve, të negociojë zgjidhje që mundësojnë plotësisht rolin më aktiv të ndërkombëtareve në përputhje të plotë me rekomandimet e Komisionit të Venecias. Zgjidhja është e mundshme dhe duhet të arrihet patjetër, me kontributin e të gjithëve, me forcën imponuese të argumenteve dhe largpamësisë, siç i ka hije përgjegjesisë politike, bashkëpunimit dhe parneritetit strategjik”, saktësonte zoti Basha, në deklaratën e cila niste me përkrahjen e idesë tjetër të zotit Meta për një qeveri teknike pas miratimit të Reformës në Drejtësi.

Por kjo përgjigje e tij nuk është mirëpritur nga ambasadori amerikan Lu dhe kreu i Delegacionit të BE-së Vlahutin të cilët dje kishin deklaruar se ishin të gatshëm të përfshiheshin në bisedimet të cilat duhet të kishin si bazë propozimin hibrid të zonjës Nuland. Në një deklaratë të përbashkët, ambasadorët Lu dhe Vlahutin shpjeguan se kishin informuar kryetarin e Parlamentit Meta se “pas deklaratës së zotit Basha, nuk e kanë të mundur të marrin pjesë në negociatat e parashikuara për 18 korrik. Zoti Basha foli për një qeveri teknike dhe nuk e përmendi propozimin hibrid që ai diskutoi me Ambasadoren Nuland më 10 korrik”, nënvizohej në deklaratë, duke shtuar se “nëse zoti Basha e rideklaron angazhimin e tij të mëparshëm për të negociuar ekskluzivisht mbi bazën e propozimit hibrid, vetëm atëherë ambasadorët do t’u bashkohen këtyre diskutimeve”.(VOA)