Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

90 VJET NGA TRIUMFI I LEGALITETIT

by

Nga SULEJMAN GJANA/
24 dhjetori 1924 shënon një moment të rëndësishëm që meriton një vend të veçantë në historinë e shtetit shqiptar, ndonëse ngjarja që ndodhi atë ditë është lënë në harresë nga historiografia zyrtare gjatë kohës së diktaturës komuniste, por edhe pas ndryshimeve politike të fillim viteve 90-të.
Triumfi i Legalitetit është padyshim një prej gurthemeleve kryesorë në ndërtimin e shtetit të së drejtës, të demokracisë, të jetës institucionale dhe asaj parlamentare të vendit.
Ajo ngjarje shënon rikthimin e legjitimitetit të institucioneve të dala nga zgjedhjet e lira të 27.12.1923, kur shumica parlamentare kishte arritur të formonte një koalicion rreth kryeministrit në detyrë Ahmet Zogu, e ti japë votëbesimin atij dhe qeverisë së vet.
Për fat të keq fillimet e ndërtimit të shtetit shqiptar nuk ishin pa trazira. Dhe shpeshherë duhej vepruar – ashtu siç ka ndodhur në të gjitha etapat e rëndësishme të konsolidimit të shtetit dhe demokracisë, me maturi, pjekuri, zgjuarsi dhe gjakftohtësi, për të tejkaluar situatat e rrezikshme për ekzistencën dhe pavarësinë e Shqipërisë.
Në kushtet e asaj kohe, kur shtetet fqinjë nuk nguronin të kërcënonin sovranitetin dhe integritetin e shtetit të ri shqiptar, kur disa qarqe diplomatike vinin në dyshim aftësinë e elitës politike dhe sociale të vendit për të qeverisur shtetin tonë, kur situata sociale ishte krejtësisht e pafavorshme ngaqë shqiptarët nuk e kishin kuptuar dhe përvetësuar idenë e shtetit unitar dhe ndjenjën kombëtare, gjendeshin politikanë që loznin në këto rrethana dhe bëheshin vegla të verbëra të atyre që synonin destabilizimin e vendit tonë për llogari të tyre, duke organizuar kryengritje, sulmuar institucionet e shtetit, deklaruar shkëputje territoresh, etj. etj.
Siç thotë populli “ jo rrallëherë shqiptarët janë bërë vegla të të tjerëve; shpeshherë me lekë, por më shumë pa lekë”.
Dhe kështu ndodhi në fakt kur opozita parlamentare e udhëhequr nga Fan Noli, organizoi një grusht shteti në qershor të vitit 1924 dhe përmbysi qeverinë e Iliaz Vrionit.

Gjatë periudhës 6-mujore të qeverisjes së Fan Nolit u dhanë prova se udhëheqësit e asaj periudhe ishin larg realitetit shqiptar. Në fakt, aq larg ishin saqë i kishin rrënjët në Moskë dhe Bashkimin Sovjetik, ndërsa degët në Athinë e Beograd, sidhe ishin në kundërshtim të plotë me parimet bazë të demokracisë.
Pa dashur të zgjatem në aspekte historike, vlen të përmendet këtu fjalimi që mbajti Fan Noli më 10 shtator 1924 para Asamblesë së Lidhjes së Kombeve në Gjenevë, për të kuptuar ideologjinë, konceptet dhe metodat e asaj qeverie që tashmë kishte dënuar më vdekje tre kryeministrat pararendës.
Duke akuzuar Lidhjen e Kombeve për inefiçencë, ai deklaroi në atë forum: “ Më mirë të bëjmë luftë, sesa biseda të lodhshme si kjo për paqe”.
Madje vazhdoi duke iu dhënë leksione për demokraci: “A e dini se çfarë është një parlament? S’ka dyshim se e dini. Por çështja do të jetë më e qartë kur t’ju tregoj unë se ç’mendoj për këtë. Një parlament është një dhomë ku politikanë të pazemër mblidhen për të përdorur si kavie sojin e tyre, një dhomë plot gaz helmues, gaz mbytës, gaz lotsjellës…”.
Ai shtoi poashtu: “ Por, pasi ju këmbëngulni, jemi gati të mbajmë zgjedhje të reja dhe të thërrasim atë murtajë, atë katastrofë, atë supersticion të neveritshëm, atë parlament, pas thuajse dy apo tre vitesh të qeverisë tonë atërore”.
Në këto kushte është lehtësisht e kuptueshmë që Fuqitë e Mëdha të asaj kohe e kuptuan rrezikun e qeverisë së Fan Nolit dhe nxitën ritkthimin e qeverisë legjitime të para grusht-shtetit, duke financuar përgatitjet ushtarake nëpërmjet “Anglo Persian Oil Company”.
Kështu u rivendos rendi institucional e ligjor dhe u respektua legjitimiteti i pushtetit të dalë nga zgjedhjet e 27.12.1923, kur më 24 dhjetor 1924, Ahmet Zogu hyri në Tiranë dhe shpalli Triumfin e Legalitetit, që përkujtojmë sot në 90-vjetorin e kësaj ngjarjeje.
Ndonëse grushti i shtetit i qershorit 1924 është konsideruar nga historiografia gjatë diktaturës komuniste dhe pas 90-ës në fjalorin politik dhe historik si “revolucion demokratik”, edhe pse nuk kishte lidhje as me nje revolucion dhe as me demokracinë, Triumfi i Legalitetit mbetet një nga momentet vendimtare për shtetin shqiptar në rrugëtimin e vështirë për ndërtimin dhe konsolidimin e vet, sidhe për funksionalitetin dhe efektivitetin e institucioneve, apo edhe mishërimin e vlerave kombëtariste.
Prandaj, legalistët shqiptarë, si trashëgimtarë të vlerave dhe parimeve të Triumfit të Legalitetit, gjejnë burimin ideor dhe referencat e tyre historike te ky moment i veçantë i së kaluarës sonë jo aq të largët.
***
Ashtu si me Triumfin e Legalitetit më 24 dhjetor 1924, legalistët shqiptarë i qendruan besnikë interesit madhor të shtetit e kombit, kur më 7 prill 1939 rezistuan me armë në dorë kundër pushtimit të vendit tonë dhe kërkuan në vazhdim rivendosjen e rendit juridik e institucional legjitim të parapushtimit.
Në të njëjtin titull, legalistët rezistuan gjatë LDB-së dhe nuk njohën asnjëherë as pushtimin, as diktaturën komunistë që u vendos me dhunë e krime pas Luftës.
Po ashtu, legalistët shqiptarë vepruan gjatë gjithë kohës së diktaturës komuniste dhe pas ndryshimeve politike të fillimviteve 90-të, duke synuar vetëm e vetëm (1) ndërtimin e shtetit ligjor me legjitimitet të plotë, (2) lirinë e demokracinë, (3) zhvillimin për të gjithë dhe rritjen e standardeve për çdo qytetar, (4) shtetin unitar, (5) gjithmonë nën parimin e shërbimit ndaj atdheut e kombit.
Prandaj edhe jemi krenarë që jemi trashëgimtarë të frymës dhe idealeve të Triumfit të Legalitetit, dhe se roli ynë sot është një detyrim përtej nevojës së kohës, që t’i ofrojmë Shqipërisë dhe shqiptarëve një model të ri të udhëheqjes, duke u inspiruar nga mësimet e njerëzve dhe vlerat që krijuan dhe ndërtuan shtetin tonë.
Modeli, përvoja, vizioni dhe referencat e legalistëve për drejtimin e shtetit shqiptar ndryshojnë katërcipërisht nga ata të shumë politikanëve postdiktatorialë, të cilët shpeshherë, me ose pa dashje, e gjenin burimin dhe frymëzimin e tyre te diktatura komuniste, te krimi dhe kriminelët, te dhunimi i shtetit ligjor, te ilegaliteti dhe ilegjitimiteti i pushtetit.
Kjo u dëshmua më së miri gjatë ngjarjeve tragjike të vitit ’97.
Së fundmi, të gjithë ishim dëshmitarë se si në rastin e ceremonive të 70-vjetorit të të ashtuquajturit Çlirim, disa pushtetarë shfaqeshin e përkuleshin para figurës së diktatorit Enver Hoxha, saqë u desh ndërhyrja e ambasadorit amerikan Arvizu, për të penguar kërcënimet që disa politikanë po i bënin qytetarëve shqiptarë me veprimet e tyre.

PLL dhe legalistët shqiptarë i kanë konsideruar gjithnjë e pamëdyshje SHBA-të si aleatët tonë strategjikë dhe vlerësojnë se është në dëm të sigurisë sonë kombëtare kur disa politikanë shprehin orientime që dhunojnë vlerat tona dhe te aleatëve tanë ose kur përbuzin ose ofendojnë përfaqësuesit diplomatikë të aleatëve tanë.
Qytetarët shqiptarë duhet të jenë të vetëdijshëm se përtej fjalorit demagogjik dhe zbukurimeve sipërfaqësore që përdorin disa, ekzistojnë ende në vendin tonë qarqe të caktuara dhe të rrezikshme, që veprojnë kundër interesave të vendit dhe kombit shqiptar, e që rrezikojnë partneritetin stratregjik me SHBA dhe BE.
Dhe për këtë, shembulli më i mirë është ai i aspiratës europiane të vendit tonë, që populli e dëshiron e përqafon, ndërsa politika dhe politikanët e pengojnë ose nuk e lejojnë që 23 vjet.
Jemi të gjithë dëshmitarë të zhvillimeve të fundit ku në një kohë rekord, vendi ynë ka marrë një orientim drejt lindjes, duke shkuar deri në Kinë. Sidomos, me gjykimin se kapitalet e tyre do të sigurojnë jetëgjatësinë e pushtetit të një kaste.
Por a mund të vazhdojmë të heshtim kur qeveritarët tanë i negociojnë me tellall interesat tona kombëtare?!
Jo, nuk mund t’ja vëmë fajin askujt, përveçse vetës tonë, nëse nuk kemi qenë në gjendje deri më sot të krijojmë kushtet e nevojshme për thithjen e kapitalit dhe investimeve nga BE e SHBA, e të tregojmë se veprimet e qeverisë sonë shkojnë në linjë paralele me dekaratat dhe fjalorin e politikanëve tanë.
PLL, në traditën e vet për krijimin e kushteve të zhvillimit të vendit, me parimin e interesit kombëtar afatgjatë, gjykon se është detyrë e së djathtës që të ofrojë zgjidhje reale dhe konkrete të problemeve të shumta të vendit tonë.
Ndonëse ne vlerësojmë se çdo qytetar duhet të kryejë detyrat e veta ndaj shtetit, besojmë se i takon së pari shtetit t’i kryejë detyrat e veta ndaj qytetarëve.
Ndërkaq, reformat e nevojshme në të gjitha sektorët nuk mund të imponohen me dhunë e kërcënime, as për revanshizëm apo efekte elektorale e politike, por vetëm në interesin e qytetarëve dhe të vendit.
Prandaj mendojmë se duhet gjetur gjithnjë gjuha e dialogut ndërmjet palëve dhe se reformat duhen shoqëruar me dispozita dhe afate tranzitore, që do t’i japin mundësi të gjithëve të provojnë e kuptojnë efiçencën e tyre, e sidomos shtresave më të prekura nga reformat që të gjejnë vetveten në kushtet e reja.
Kjo vlen veçanërsiht për reformat e fundit në arsim, ku janë lënë në mëshirën e fatit dhe në rrugë të madhe mijera studëntë; për reformën në sistemin e shëndetësisë, ku mijëra pacientë konsiderohen ende si klientelë fitimprurëse, për reformën në drejtësi, që mbetet një prioritet dhe kusht i domosdoshëm për ndërtimin e një shteti modern, etj…
Konceptet dhe vlerat e së djathtës që bazohen pikërisht në ndërtimin e një shteti ku stimulohet siguria, prosperiteti dhe inisiativa e lirë, janë aq të domosdoshme sot për t’i rikthyer qytetarëve shqiptarë shpresën se Shqiperia mund të bëhet, se vendi ynë mund të ofrojë perspektiva për rininë.
Dhe kjo nuk mund të realizohet duke nxitur varfërinë, por duke krijuar kushte të favorshme për zhvillimin shoqëror e ekonomik, si dhe për thithjen e investimeve nga BE e SHBA.
Legalistët shqiptarë janë të bindur se i takon të djathtëve që t’i kthejnë besimin qytetarëve shqiptarë dhe sidomos rinisë, se zhvillimi i vendit nuk mund të kalojë nëpërmjet cenimit të së drejtës së pronës, dhe se shteti duhet të marrë përgjegjësitë e veta për t’i riparuar dëmet e shkaktuara nga shtetëzimet e dhunshme të djeshme, efektet ende aktuale të Ligjit famëkeq 7501, apo shpronësimet e sotme.
Në të njëjtën logjikë, është një detyrim i së djathtës të realizojë drejtësinë për ata që e paguan me gjak, burgim, internime dhe ekzil luftën e klasave. Duhet të jemi të ndërgjegjshëm se nuk bëhet fjalë vetëm për shpërblime financiare, por për një orientim të ri e perëndimor të vendit dhe shoqërisë, që do ta mbyllte njëhere e përgjithmonë kapitullin e komunizmit dhe të pasojave të veta, dhe ku drejtësia do të jepej për viktimat dhe për kriminelët.
Sigurisht, hapja e dosjeve është një hap në këtë drejtim, siç është detyrimisht ligji i lustracionit për pushtetarët dhe nëpunësit e lartë, por duhet të jemi të vetëdijshëm se nuk mund të pranohet më përdorimi që i bëjnë politikanët tanë kësaj çështjeje për presion apo shantazh ndaj kundërshtarit. Për ne kjo është një kauzë në vetvete dhe nuk mund t’ja besojmë atyre që e kanë shpërdoruar për kaq vite, duke siguruar që asgjë të mos ndryshojë.
Në fund të ditës, persekutorët dhe të persekutuarit e djeshëm a nuk janë ende në të njëjtat pozicione ?!
Konceptet e legalistëve për shtetformin dhe konsolidim të institucionëve dhe të ndërgjegjes kombëtare janë dhe do të mbeten aktuale përderisa ligji dhe drejtësia nuk do të jenë vendosur në vendin tonë, në shërbim të interesave të qytetarëve.
Nga ana tjetër, ne mendojmë se kombi nuk mund të ndërtohet pa një familje të shëndoshë, që përfshin brenda saj jo vetëm traditat dhe moralin e trashëguar ndër shekuj dhe në përballje me sundimet apo qytetërimet e huaja, por edhe duke konsideruar si një familje të vetme të gjithë shqiptarët kudo që ndodhen, brenda kufijve të Shqipërisë londineze, në trojet shqiptare apo në diasporë.
Në përputhje me drejtësinë ndërkombëtare, me interesat e aletave tanë strategjikë dhe sidomos me interesat e popullit shqiptar, ne mendojmë se duhet të përpiqemi të shndërrojmë në realitet vullnetin për bashkim kombëtar që mishërohet te të gjithë shqiptarët.
Dhe kjo jo për folklorizëm nacionalist të pavend, por në shërbim të zhvillimit të vendit tonë, të stabilitetit afatgjatë për gjithë rajonin, si dhe krijimin e kushteve të reja për prosperitet ekonomik.
Prandaj jemi të bindur në nevojën e krijimit të një Konfederatë shqiptare me Kosovë e Shqipëri nën një qeverisje unitare që jetësohet më së miri nga institucioni mbretëror.
***
Në këtë 90-vjetor të Triumfit të Legalitetit, roli dhe rëndësia e koncepteve dhe vizioneve tona është sot më shumë se kurdoherë i nevojshëm për të rivendosur drejtësinë dhe legjitimitetin e mohuar prej kaq kohësh për shqiptarët.
Në këtë kontekst, ne e konsiderojmë misonin e Legalitetit si një vlerë e shtuar në spektrin politik, dhe padyshim, vlerat tona kanë qënë dhe do të jenë lokomotivë për rikthmin e dinjitetit dhe rindërtimin e shtetit e demokracisë për të gjithë shqiptarët.
Ndaj i urojmë të gjithë Legalistët dhe mbarë Shqiptarët në këtë 90-vjetor të Triumfit të Legalitetit dhe ju urojmë shumë përvjetorë të tjerë në vazhdim.
Ju falemnderit,
* Fjalim më rastin e 90-vjetorit të Triumfit të Legalitetit
Mbajtur në Akademinë Solemne organizuar nga PLL
Muzeu Historik Kombëtar – Tiranë – 24/12/2014

Mori fund bojkoti i opozitës, Votohet rezoluta ne Parlament

by

*PD thyen bojkotin, hyn në Kuvend, miratohet me 126 vota rezoluta për bashkëpunimin PS-PD/
*PALOKA NE KUVEND: REZOLUTA SHPETON POLITIKEN NGA ZHYTJA NE LLUMIN E KRIMIN/
* Berisha: Dita e sotme historike, sakrifikuam por e rivendosëm demokracinë në Kuvend
* DODA: DUHET TE ISHIM KTHYER ME PARE/
TIRANE – Mazhoranca dhe opozita kanë miratuar me 126 vota pro, asnjë kundër dhe asnjë abstenim, rezolutën e përbashkët, për të cilën ranë dakord pas negociatave me eurodeputetët Kukan dhe Fleckenstein, të cilët u angazhuan për normalizimin e jetës parlamentare në Shqipëri. Përpara votimit, me kërkesë të Palokës, kryetari i Kuvendit Ilir Meta lexoi “Projekt/rezolutën e marrëveshjes politike mes mazhorancës dhe opozitës në Kuvendin e Republikës së Shqipërisë”. Dakordësia e arritur për miratimin e rezolutës, bëri që Partia Demokratike të thyente bojkotin 6-mujor dhe të zinte vendet e saj në Kuvend.
Përpara rikthimit të demokratëve pati edhe disa kundërshti lidhur me rendin e ditës së seancës plenare. Demokratët kërkuan ndryshimin e rendit të ditës, duke propozuar që seanca të niste me miratimin e rezolutës dhe më pas të votoheshin vetëm marrëveshjet ndërkombëtare, të cilat nuk kërkojnë debat politik. Por Kuvendi vijoi punimet sipas rendit të ditës, pa bërë asnjë ndryshim, madje pa mbërritur deputetët e opozitës, të cilët ishin ende në mbledhjen e grupit në selinë e PD-së dhe zunë vendet e tyre në Kuvend disa minuta me vonesë.
PALOKA NE KUVEND: REZOLUTA SHPETON POLITIKEN NGA ZHYTJA NE LLUMIN E KRIMIN
Në fjalën e tij përpara ligjvënësve, kreu i grupit të PD-së, Edi Paloka theksoi se marrëveshja e arritur është në favor të të gjitha palëve dhe “një mundësi e mirë për të shpëtuar politikën shqiptare nga zhytja në llumin e krimit dhe korrupsionit”.
Paloka nënvizoi arsyet që e shtynë opozitën drejt bojkotit parlamentar, ndërsa tha se “deputetët rikthehen me kokën lart me vullnetin dhe dëshirën që parlamenti të kthehet në tempullin e demokracisë, mbrojtjes së lirisë dhe të drejtave të qytetarëve”.
“Bojkoti për ne u bë një zgjedhje e detyruar, pasi ky parlament u kthye në vendin ku u shkelën dhe u dhunuan të drejtat e deputetëve. Nuk vumë kushte, as nuk kërkuam favore nga mazhoranca, kërkuam vetëm që kjo mazhorancë të mos bënte sikur nuk e dinte se çfarë kërkonte opozita.Bojkoti sado i padëshiruar nga ne tërhoqi vëmendjen e partnerëve tanë ndërkombëtare, të cilët i dhanë vlerësimin e duhur situatës në Shqipëri.Kjo rezolutë u jep përgjigje shqetësimeve madhore që opozita ngriti dhe që imponoi largimin tonë nga parlamenti. Kjo marrëveshje është jo vetëm në interes të demokracisë shqiptare, të qytetarëve shqiptarë por edhe në interes të partive politike. Ne besojmë realisht se kjo marrëveshje është në favor të të gjitha palëve. Për ne kjo qeveri e ka mbyllur ciklin e saj dhe duhet të ikë në shtëpi. Garantojmë qytetarët se interesi i tyre është i vetmi interes i yni. Do të jemi në parlament për të mbrojtur deri në fund këtë interes”- deklaroi Paloka.
PS-PD MBLEDHIN GRUPIN PARLAMENTAR
Përpara fillimit të seancës plenare, kreu i PD-së Lulzim Basha ka thirrur grupin parlamentar, në një mbledhje me dyer të mbyllura ku është vendosur që deputetët të rikthehen në Kuvend. Menjëherë pas mbledhjes së grupit, kreu i grupit Edi Paloka ka propozuar në mbledhjen e Konferencës së Kryetarëve ndryshimin e rendit të ditës, duke kërkuar që seanca të niste me miratimin e rezolutës dhe më pas të votoheshin vetëm marrëveshjet ndërkombëtare, të cilat nuk kërkojnë debat politik. Edhe Partia Socialiste ka zhvilluar një mbledhje grupi, përpara fillimit të seancës parlamentare, ku është vendosur që të miratohet rezoluta e përbashkët, por pa pranuar kërkesën e opozitës për ndryshimin e rendit të ditës.
PALOKA: TE MIRATOHET VETEM REZOLUTA
Në një deklaratë për mediat përpara nisjes së seancës, kreu i grupit parlamentar të PD-së, Edi Paloka bëri të ditur se demokratët kërkojnë ndryshim të rendit të ditës, duke propozuar që seanca të nisë me miratimin e rezolutës dhe më pas të votohen vetëm marrëveshjet ndërkombëtare të cilat nuk kërkojnë debat politik.
“Nuk mund ta konsiderosh një ngjarje të zakonshme rikthimin e opozitës në parlament. Eshtë bërë pas një bojkoti të gjatë e negociatave të gjata mes palëve. Kërkuam që konferenca e kryetarëve të përcaktojë mënyrën se si do procedojmë. Eshtë e logjikshme të trajtohet fillimisht rezoluta në parlament. Pa u miratuar kjo rezolutë nuk do të ishte e logjikshme që ne të hyjmë në parlament. Që të futen në diskutim pr/ligje të rëndësishme, ndërkohë që jemi në një situatë të veçantë nuk është normale. Kërkuam që këto pr/ligje të shtyhen për një seancë tjetër. Sot të miratohet rezoluta. Pas një ore vendosëm të fillojë seanca”- deklaroi Paloka.
DODA: DUHET TE ISHIM KTHYER ME PARE
Përpara se të futej në Kuvend, deputetja demokrate Mesila Doda tha se opozita duhet të ishte kthyer më parë në parlament, për të mbrotjur interesat e qytetarëve.“Besoj se do duhet të ishim kthyer që në seancat e para. Megjithatë sot ka një rezolutë që duhet te miratohet, është diçka pozitive që duhet të përgëzohet. Qytetarët shqiptarë kanë nevojë për normalitet në jetën e tyre politike. Fjala bojkot duhet të zhduket nga fjalori politik.”- deklaroi Doda.
NEGOCIATAT
Taulant Balla e Genc Pollo udhëhoqën negociatat që në mesnatë sollën marrëveshjen me 4 pika. Orë të shumta negociatash vazhduan me debate deri në mesnatë dhe deputetët e mazhorancës dhe opozitës kanë rënë dakord për draft-rezolutën e përbashkët të hartuar nga dy eurodeputetët Kukan dhe Fleckenstein. Balla dhe Pollo konfirmuan në prag të mesnatës se ishte arritur një akord i përbashkët: rezoluta e eurodeputetëve do miratohet pa ndryshime.
4 PIKAT E DRAFTIT
Pika e parë: “Opozita kthehet në parlament dhe rimerr plotësisht funksionet e saj parlamentare, duke iu shmangur bojkotit të parlamentit dhe komisioneve të tij. Mazhoranca qeverisëse nuk do të përdorë shumicën e cilësuar prej tre të pestave, duke anashkaluar opozitën, por do të punojnë së bashku me opozitën për të gjetur konsensus për reforma të rëndësishme sa herë që është e mundur”.
Pika e dytë: “Të gjitha palët do të kontribuojnë për dialogun politik, i cili duhet të bëhet së pari në parlament dhe të respektojnë Kushtetutën dhe zbatimin sistematik të vendimeve të Gjykatës Kushtetuese. Mazhoranca qeverisëse dhe opozita do të angazhohen të rishikojnë rregullat që kanë të bëjnë me funksionimin efikas të komisioneve parlamentare hetimore, të bazuar në praktikat më të mira ndërkombëtare”.
Pika e tretë: “Opozita dhe mazhoranca qeverisëse angazhohen të punojnë së bashku në mënyrë konsensuale, me ndihmën e Bashkimit Europian, për çështjen e individëve me rekorde kriminale, që kërkojnë të zgjidhen ose të emërohen për poste publike, bazuar në standardet europiane dhe me asistencën e Komisionit të Venecias”.
Pika e katërt: “Përfaqësuesit e grupeve më të mëdha parlamentare në
Parlamentin Europian, socialdemokratët dhe Partia Popullore Europiane do të mbështesin një marrëveshje të tillë politike”.
RENDI I DITES
Kuvendi u mblodh sot në mesditë në seancën plenare, që është dhe e fundit për këtë sesion. Rendi i ditës i Kuvendit përfshin diskutimin e disa projektligjeve, si dhe votimin e disa çështjeve të tjera. Mes tyre veçohen ndryshimet në ligjin “Për huamarrjen shtetërore, borxhin shtetëror dhe garancitë shtetërore”; ato në ligjin “Për vlerësimin e ndikimit në mjedis”, ndryshimet në ligjin e ‘prokurimit publik’, etj.
Gjithashtu, Kuvendi pritet të miratojë dhe tre kandidaturat për anëtarë të Bordit të Agjencisë së Mbikëqyrjes Financiare dhe të Drejtorit e Nëndrejtorit të Përgjithshëm Ekzekutiv të AMF-së; miratimin e kandidaturave për anëtar të Këshillit Mbikëqyrës të Bankës së Shqipërisë; pr/rezolutën “Për njohjen dhe forcimin e rolit të shoqërisë civile në procesin e zhvillimeve demokratike të vendit”, si dhe pr/vendimin “Për mënyrën e trajtimit të deputetëve”.

*Mesila Doda: Bojkoti të zhduket nga fjalori i politikanëve/

Deputetja demokrate, Mesila Doda më parë dha një deklaratë për mediat, duke premtuar se qytetarët shqiptarë do të kenë një opozitë të fortë dhe reale në Parlament.

Ajo mendon se Partia Demokratike duhet të ishte kthyer më herët në Kuvend dhe bojkoti duhet të zhduket në fjalorin politik. “Ne do të kthehemi në Kuvend për të mbrojtur dhunën dhe autoritarizmin që po ushtohet mbi qytetarët. Opozita duhet të ishte kthyer që në seancat e para, por fatmirësisht tashmë për këtë ka një rezolutë, e cila sqaron punën në Parlament.
Kjo është pozitive dhe duhet theksuar. Qytetarët shqiptarë kanë nevojë për normalitet politik. Bojkoti duhet të zhduket nga fjalori i politikanëve. Do ketë një opozitë shumë të fortë dhe reale”, tha deputetja e PD-së.

Kukan përshëndet votimin e rezolutës
Europarlamentari Eduard Kukan, njëherësh dhe një nga hartuesit e rezolutës ka përshëndetur finalizimin e marrëveshjes mes palëve politike.

Përmes rrjetit social Twitter, Kukan shpreson që ky bashkëpunim në Kuvend të vazhdojë.“Misioni i fundit i suksesshëm, urime miqve shqiptarë.Miqtë shqiptarë finalizuan marrëveshje të rëndësishme.Shpresoj që bashkëpunimi në Parlament të vazhdojë” shkruan ai.
Rezoluta e firmosur mes palëve e që i dha fund bojkotit opozitar u firmos pas negociatave të gjata.
Berisha: Dita e sotme historike, sakrifikuam por e rivendosëm demokracinë në Kuvend
TIRANË-Ish-kreu i Partisë Demokratike, deputeti Sali Berisha sapo ka dalë nga seanca e kuevdnit ka komentuar gjerësisht bojkotin 6 mujor të opozitës ndaj punimeve të parlamentit. Sipas tij, opozita me anë të bojkotit korri një fitore të madhe historike në emër të gjithë opozitave. Në vijim ai rikthye gjuhës së akuzave ndaj Qeverisë dhe maxhorancës, për të cilën tha se qëndron mbi krimin dhe korrupsionin duke krijuar 3/5 e votave në Kuvend, duke blerë në mënyrë flagrante deputetë, gjë që Parlamenti Europian (PE) nuk e kapërdin. Akuzat nuk i kurseu dhe ndaj kryeministrit Rama…
Z Berisha, cfare mund te na thoni per kete seance te pare pas 6 muajve bojkot…
“Kjo është një ditë historike për demokracinë shqiptare se për herë të dytë në 23 vjet, PD shpëton nëpërmjet një marrëveshje demokracinë parlamentare të vendit. Kjo ndodhi në vitin 2001, kur dhjetra e dhjetra mandate u morën nga kjo shumicë, por pastaj me një proces të paprecedent ne rikthyem frymën dhe vendosëm në mënyrë fraxhile të brishtë normat e demokracisë në Kuvend. Kjo që ndodhi këtë vit, kur për shkak të lidhjeve të pazgjidhshme me krimin të Edvin Ramës në parlamentin shqiptar, ndodhi ajo që s’ka ndodhur në asnjë vend tjetër të paktën në vitet 50 e deri sot. Kreu i qeverisë organizoi dhunë ndaj një deputeti guximtar të opozitës. Ndodhi në këtë parlament që maxhoranca të shkelmojë në mënyrë të papërgjegjshme të drejtat themelore të krijimit të komisioneve parlamentare.
Ndaj e kam quajtur të ligjshëm komplet bojkotin tonë, duke deklaruar se bojkoti i opozitës shqiptare është tjetër krahasuar me opozitat e tjera, ndërmori mbështetjen e vendeve më të larta të Parlamentit Evropian, nisëm që synon nëpërmjet kësaj Rezolute të rivendosë standartet themelore të parlamentarizmit. Në këtë nisëm dhe në bazën e kësaj Rezolute, maxhoranca aktuale sot nuk mundet kurrë të bojkotojë më kurrë komisionet parlamentare të opozitës. U votua një standard evropian, do vendoset një standart i ri evropian.
Së dyti, kjo maxhorancë qëndron mbi krimin dhe korrupsionin ka krijuar 3/5 duke blerë në mënyrë flagrante deputetë, gjë që Parlamenti Europian (PE) nuk e kapërdin. Ne nuk synojmë kurrë të bllokojmë një shumicë të cilësuar. Por të blejë me drogë e krim mandate, t’ia marrsha ato opozitës që të bësh ligjin e shtetit policor kjo është e patolerueshme për standardet e BE.
Së treti, dekriminalizimi. Ju duhet të dini se cdo gjë e mirë mbi tokë ka në themel, sakrificën. Ne vërtet sakrifikuam por kjo është kthyer në një mirësi të vërtetë, për cdo shqiptar, për demokracinë shqiptare dhe kjo do shënojë një pikë kthese për të ardhmen e demokracisë. Në themel të gjithë kësaj që ndodhi janë lidhjet e Edvin Kristaq Ramës me krimin që datojnë qysh para fillimit të tij në politikë e deri më sot.
Me këto lidhje Shqipëria nuk ecen drejt Europës, por drejt greminës. Një vit kur filloi ky parlament para kamerave i thashë, këto fjalë. ‘Zotëri, cdo shqiptar e di që lidhjet e tua me krimin janë nga më të tmerrshmet, me bandat e Rrugës së Kavajës, Hakmarrja për Drejtësi. Ty shqiptarët të votuan, të amnistuan për lidhjet që ke, por duhet të ndërpresësh këto lidhje. Por e vërteta është se ai është skllav i tyre. Por mesazhi i Europës është se nuk ecet para nëse kuvendi nuk dekriminalizohet.
Së fundmi, është rënë dakort që këto ligje dhe këto marrëveshje të zbatohen dhe formulohen nga ata të cilët janë dhe gardianët kryesorë të standardeve evropiane jo vetëm në vendet e BE, por dhe në vetë vendet e BE që është parlamenti. Ata meritojnë një mirënjohje të thellë nga cdo shqiptar. Nga kjo marrëveshje nuk ka asnjë të humbur, përvec ata që për pushtet janë të gatshëm të bëjnë gjithcka.
Tani ne jemi në një bashkëpunim të gjerë dhe nuk na përket ne. Ne na përket të negociojmë një nga fenomenet më të paimagjinueshme në këtë parlament, është krenari, është e hidhur kjo, por ama jemi vendi i parë që bëjmë përpjekje për dekriminalizimin e kuvendit.
Por zoti Berisha, edhe ju keni bojkotuar dikur…
Kemi bojkotuar dhe në vitin 2001, parlamenti me miratimin e plotë të partive evropiane njësoj si tani. Ata nuk na kërkuan të rikthehemi në parlament pa u vendosur e drejta. Nuk ka akt më të dhimbshëm për një deputet se bojkoti. Por më i strukturuari dhe më i qëndrueshmi si bojkot ka qenë ky. Jemi të vendosur të punojmë në parlament për vlerat e demokracisë.
Po në grupin tuaj parlamentar, z Berisha nuk ka asnjë të inkriminuar?
Në dijeninë time nuk ka asnjë deputet të inkriminuar. Por cilido të ketë dokumentin më të vogël, jo vetëm për deputetë, por dhe për strukturat e PD është i ftuar ta publikojë. Unë nuk mund të bisedoj për rekorde kriminale nëse nuk ekziston një dokument juridik se për hamendje pastaj, kjo nuk ndalet kjo.
Paloka mbajti një fjalim të ashpër sot. Përmendi prangat…
Unë e kam denoncuar këtë akt. Zoti Rama pas kthimit nga Brukseli i ka thënë z Meta se ‘më kanë kërkuar arrestimin tuaj’. Por ka një problem këtu, shpesh kam dëgjuar se e thonë.
Por ju e keni mbrojtur Ilir Metën
Për herë të parë them se, unë nuk e kam mbrojtur Ilir Metën. Ka patur një dokument për 700 mijë euro që flitej në regjistrim. Ai dokument ekzistonte në letrën që sipërmarrësi i dërgonte Dritan Priftit se dëmi që i shkaktohej ishte 700 mijë euro. Prifti nuk e ka mohuar se ekziston ky dokument. E gjithë akuza që i bëhet Sali Berishës është se nëse ekziston ky dokument. Nëqoftëse dosja do të ishte e plotë dhe nuk do ishte shqyrtuar nga ekspertë, askush nuk do i kërkonte atij arrestimin e Ilir Metës.
Pas largimit të LSI nga koalicioni i djathte…
Absolutisht jo, se ato dy vota mor zotëri u përdorën vetëm për të futur në zgjedhje dhe për të mos hyrë në kaos. Këta përdorin votat e blera për të instaluar shtetin policor. Nuk ka asnjë lidhje, pse unë cfarë alternative kisha.
Pse zgjodhët të heshtnit sot në parlament?
Foli sot kryetari i grupit parlamentar dhe mbajti një fjalim të shkëlqyer. Maxhoranca nuk foli e kishte vendosur që të kalonin rezolutën pa diskutime. Por derisa ishte e realizuar ne e respektuam atë. Natyrisht këtu do jemi. Gëzuar Krishtlindjet

Ngërci politik ,në Shqipëri vazhdon, ende pa marrëveshje

by

Ndërmjetuesi i parlamentit europian Eduard Kukan i propozon palëve një tekst për zgjidhjen e situatës. Bisedimet mes shumicës dhe opozitës vazhdojnë edhe pas largimit të zotit Kukan/
Në Shqipëri edhe përpjekja e sotme e eurodeputetit Eduard Kukan për arritjen e një marrëveshjeje mes shumicës dhe opozitës, që do t’i jepte fund bojkotit të kësaj të fundit, nuk ka sjellë një rezultat përfundimtar. Palët megjithatë kanë deklaruar se janë afër përmbylljes, dhe duket se ndahen mes tyre më shumë për cështje të formës se sa të përmbajtjes. Ato do të vazhdojnë të punojnë rreth një teksti të propozuar nga zoti Kukan, i cili do të ndjekë ecurinë e procesit në distancë.
Tre ditë pas përpjekjeve të para të eurodeputetit të së majtës europiane Knut Fleckenstein, kolegut i tij i së djathtës Eduard Kukan, nisi bisedimet me përfaqësuesit politik në Tiranë mbi një tekst konkret që ua paraqiti palëve.
Zoti Kukan tha se “qëllimi është rivendosja e dialogut politik në Shqipëri, i cili është shumë i rëndësishëm për vendin nëse dëshirohet të ecet përpara me sukses në procesin e integrimit europian”.
Zoti Kukan pati një paradite intensive. Pas afër një orë bisedimesh me kryetarin e opozitës Lulzim Basha, zoti Kukan u takua me kryeministrin Edi Rama, dhe më pas me kryetarin e parlamentit Ilir Meta. Përpara se të largohej nga Shqipëria, ai zhvilloi një bisedë të dytë për më shumë se një orë me zotin Basha. Palët nuk dhanë detaje mbi diskutimet apo cështjet mbi të cilat po zhvillohen bisedimet të cilat do të vazhdojnë ende.
“Unë besoj se janë plotësuar të gjitha kërkesat e opozitës, pra kërkesat kryesore të saj dhe çdo kërkesë e cila synon një funksionim më demokratik, më transparent të Kuvendit ka qenë dhe mbetet gjithmonë e mirëpritur dhe ne jemi të vendosur për transparencë dhe për gjithëpërfshirje”, u shpreh zoti Meta.
Kryetari demokrat Basha, dukej optimist, edhe sepse, ndërmjetësimi i parlamentit europian, është pjesë e kërkesave të opozitës për të patur garanci. Por edhe ai u rezervua të japë hollësi duke lënë të kuptohet se sipas tij zgjidhja është në dorën e shumicës: “Duke qenë në proces negociatash nuk më mbetet gjë tjetër veçse të shpreh besimin se përpjekja e tyre, përpjekja europiane do të kurorëzohet me sukses. T’i bëj thirrje maxhorancës që të jetë konstruktive në përmbylljen me sukses të këtij procesi”.
Palët megjithatë duket se po ndahen me shumë jo aq në cështjet që lidhen me përmbajtjen e marrëveshjes se sa në detaje anësore apo teknike dhe të formës. Ende duket se nuk është rënë dakort nëse do të bëhet fjalë për një dokument që do të nënshkruhet nga palët apo ajo do të ketë formën e një rezolute që do të miratohet në parlament pasnesër, ku opozita do të rikthehej në rast të gjetjes së një zgjidhje. Gjithashtu, dakortësi ka edhe për cështjen e dekriminalizimit të parlamentit dhe institucioneve, ndërkohë që mbetetet për tu përcaktuar si do realizohet dhe asistenca ndërkombëtare në këtë proces.(Armand Mero-Voa)

EURODEPUTETI TAKOI FILLIMISHT OPOZITEN

by

Kukan në Tiranë: Të vendoset dialogu politik, i rëndësishëm drejt rrugës së BE/
Ka përfunduar takimi mes eurodeputetit, Eduart Kukan dhe kryetari të Partisë Demokratike, Lulzim Basha për vendosjen e dialogut mes mazhorancës dhe opozitës dhe thyerjes së bojkotit opozitar.
Eurodeputetit, Eduart Kukan u takua sot në mëngjes me Kryetarin e Partisë Demokratike, Lulzim Basha për të gjetur një marrëveshje mes mazhorancës dhe opozitës për ta kthyer opozitën në Kuvend.
Eduart Kukan pas takimit me kryetarin e opozitës, Lulzim Basha dha një prononcim për mediat dhe u shpreh se “kam ardhur sot të vijoi punën e kolegut tim, z. Flenkeshtein për të rivendosur dialogun politik në Shqipëri që është shumë i rëndësishëm për të zhvilluar një politikë evropianë të suksesshme”.
“Jemi në diskutime”, është përgjigjur Kukan, pyetjes së drejtuar nga gazetarët përsa i përket bojkotit të opozitës.
Meta pas takimit me Kukan: Opozita e mirëpritur; të vendosur për gjithëpërfshirje
Kryetari i Kuvendit, Ilir Meta u takua të hënën me eurodeputetin e Parlamentit Evropian, Eduard Kukan, me të cilin bisedoi mbi zhvillimet e fundit politike në Shqipëri duke ndarë bindjen e përbashkët se të gjitha institucionet demokratike në vend duhet të funksionojnë përmes parimeve të pjesëmarrjes, dialogut dhe bashkëpunimit politik.
Në këtë kuadër u vlerësua angazhimi dhe mbështetja e eurodeputetëve dhe PE-së, veçanërisht e dy grupeve të mëdha europarlamentare të Partive Popullore Evropiane (EPP) dhe Aleancës Progresive të Socialistëve dhe Demokratëve (S&D). Pas takimit, kryeparlamentari tha se opozita është e mirëpritur të kthehet në parlament, pasi tashmë janë plotësuar të gjitha kërkesat kryesore të saj, përfshi dhe ato që synojnë funksionimin më demokratik dhe transparent të parlamentit.

“Besoj se janë plotësuar të gjitha kërkesat kryesore të opozitës, si dhe çdo kërkesë e saj që synon një funksionim më demokratik dhe transparent të Kuvendit. Opozita ka qenë dhe mbetet gjithmonë e mirëpritur dhe ne jemi të vendosur për transparencë dhe gjithëpërfshirje. Ajo është e mirëpritur në çdo moment për të përmbushur rolin dhe funksionet e saj në parlament dhe do të shpresoja shumë që kjo të ndodhte para Krishtlindjeve”, u shpreh kreu i Kuvendit në prononcimin e tij për gazetarët.
.

I pyetur nëse kthimi i deputetëve të opozitës lidhet me djegien e mandateve, kryeparlamentari u përgjigj se nuk është momenti të flasim për këtë, por duhet të flasim për përfshirje dhe dialog.
“Këtu nuk flitet thjesht për të evituar një djegie mandatesh, por për ta ndarë njëherë e mirë politikën tonë nga fryma e bojkotit dhe e konfliktit. Ne na duhet të krijojmë një traditë të qëndrueshme të një demokracie funksionale dhe të një dialogu funksional për realizimin e reformave që kërkon vendi. Fakti që kemi angazhimin e dy eurodeputetëve të njohur tregon se ka një vëmendje ndërkombëtare për të mbështetur rivendosjen e dialogut politik në vend. Dhe unë shpresoj që ky angazhim i eurodeputetëve Kukan dhe Fleckenstein të jetë i suksesshëm dhe kjo është mjaft pozitive”, nënvizoi Ilir Meta.
I pyetur nga gazetarët se ende politika shqiptare vazhdon të ‘mbikëqyret’ nga ndërkombëtarët, edhe pas 25 vitesh pluralizëm politik, ai u përgjigj se ‘kjo nuk është çështje mbikëqyrje, por çështje standardesh”.

“Ne kemi bërë një zgjedhje për t’u integruar plotësisht në Bashkimin Europian dhe ky bashkëpunim me BE-në më duket i natyrshëm dhe në fund të fundit e rëndësishme është të ecet përpara drejt një dialogu të qëndrueshëm e afatgjatë që e ndihmon Shqipërinë të përmbushë më shpejt standardet e saj drejt BE-së”, the kreu i Kuvendit.
Eurodeputeti Eduard Kukan, i mandatuar nga grupimi i së djathtës në Parlamentin Europian, ndodhet në Tiranë në kuadër të misionit të faktorit ndërkombëtar për të ndërmjetësur rikthimin e opozitës në Kuvend.
Axhenda e tij nisi me takimin me kryetarin e Partisë Demokratike, Lulzim Basha, për të vijuar më pas me takimin me kryeministrin Edi Rama dhe kryeparlamentarin Meta.

Berisha nga Budapesti:”Ne do ju rezervojmë bijve fatin e etërve te tyre”!

by

Berisha ka reaguar nga Budapesti, ku ndodhet si i ftuar ne konferencën kushtuar kryengritjes antikomuniste të Timoshoarës ku nisi edhe kryengritja antikomuniste qe coi ne rezimin e diktatorit komunist Çaushesku . Bersha ka postuar ne profili n e tij ne fb një mesazh qe përfundon me premtimin se pushtetarëve ish komuniste ne Tirane do ju rezervojnë fatin e etërve se Te dashur miq, sot mora fjalën ne konferencën e organizuar ne Budapest për 25 vjetorin e Kryengritjes se Timoshoares . Ne fjalën time shpreha mirënjohjen për ftesën dhe nderin qe me bene t’i drejtohem si i ftuar nderi këtij Forumi, sikundër theksova se kombet qe vuajtën nen diktaturat komuniste janë dhe do mbeten shume mirënjohës ndaj kombit hungarez.
Ne fjalën time theksova se kombi i tyre vigan, ishte i pari qe se bashku me autoritetet e vendit shembi segmentin e vet te murit te Berlinit, hoqi telat me gjemba ne kufirin me Austrinë dhe duke hapur kufirin për gjermanet e Lindjes luajti rol te pazevendesueshem ne shembjen nga gjermanet te murit ne Berlinit. Ne fjalen time u shpreha gjithashtu se nga ajo tribune dëshiroja te përulesha me nderimin me te madh para trimërisë, guximit, heroizmit te qytetareve te Timoshoares dhe bishopit te tyre Tukesh Lazlo, qe shndërruan 25 vjet me pare, fillimisht Kishën e me pas qytetin e tyre, ne kështjelle te pamposhtur te lirisë. Timoshoara nuk është një ngjarje e madhe vetëm për ketë qytet dhe Transilvaninë por dhe për rumunet, shqiptaret dhe mbare popujt e tjere te shtypur, te cilet mbeten pas zhvillimeve epokale ne Poloni, Hungari, Gjermani, Çekosllavaki nen diktaturat e egra komuniste. Qendresa e qytetareve te Timoshoares frymezoi rumunet dhe shqiptaret ne perpjekjet e tyre per liri, te drejta dhe dinjitet njerezor.
Ne fjalen time, pasi i njoha me levizjen studentore te dhjetorit 1990, u ndala ne zhvillimet e fundit ne Shqiperi ku nder te tjera theksova se sot ne Shqiperi jane ne pushtet bijte e atyre qe ne permbysem ne vitin 1990. Une besoj se askush nuk mund te mbaje pergjegjes bijte per veprat e eterve te vet. Mirepo ne Shqiperi qeveritaret aktual festuan ne vitin e 70 vjetorit te çlirimit duke rehabilituar diktatorin Enver Hoxha, diktatorin me mizor qe Europa ka njohur pas Luftes se Dyte Boterore, te cilin lideret e EDU, qendres se djathte europiane, ne deklaraten e Samitit te pranveres se viti 1991 e cilesuan si Hitlerin shqiptar te Pasluftes. Ata ngriten muze shteteror per Enver Hoxhen, dekoruan mbi 1000 drejtues kryesor,persekutor xhelat te rregjimit hoxhist qe kryen ndaj shqiptareve genocid dhe krime te tmerrshme kunder njerezimit.
Ne kete konference une mbylla fjalen time me zotimin solemn se ne demokratet shqiptare do t’u rezervojme bijeve fundin e eterve te tyre barbar !”, përfundon Berisha .(Kortezi:Minerva)