Rajon – Page 114 – Dielli

Rajon: Kosovë-Maqedoni, ngritje bashkëpunimi

May 12, 2016 by dgreca

-Referencë pozitive bashkëpunimi Kosovë-Shqipëri/

-Ministri i Ekonomisë së Maqedonisë, Driton Kuqi, në vizitën në Kosovë është pritur nga ministri i Zhvillimit Ekonomik, Blerand Stavileci/

PRISHTINË, 12 Maj 2016-B.Jashari/ Ministri i Ekonomisë së Maqedonisë, Driton Kuqi, në vizitën sot në Kosovë është pritur nga ministri i Zhvillimit Ekonomik, Blerand Stavileci, ku diskuan për vazhdimin e bashkëpunimin në sferën e ekonomisë, projektet në fushën e energjetikës, shkëmbimin tregtar mes dy vendeve, heqjen eventuale të barrierave etj. Në takim u theksua se, bashkëpunimi Kosovë-Maqedoni duhet të ngritet në një nivel më të lartë.Republika e Kosovës dhe Republika e Maqedonisë duhet të intensifikojnë bashkëpunimin në fushat e interesit të përbashkët si energjia, infrastruktura dhe fusha tjera që hynë në kuadër të bashkëpunimit rajonal. Kështu u tha nga ministri i Zhvillimit Ekonomik i Kosovës, Blerand Stavileci dhe ministri i Ekonomisë i Maqedonisë, Driton Kuqi, pas takimit, gjatë një konference të përbashkët për shtyp në Prishtinë.

Ministri Stavileci tha se me homologun e tij nga Maqedonia janë pajtuar se niveli i bashkëpunimit që kemi pasur në të kaluarën, patjetër duhet të ngritet në një nivel tjetër nisur nga fakti që ne kemi pasur disa marrëveshje të nënshkruara në mes shteteve tona.

“Do të donim që tash e tutje ta ndryshonin kahen në kuptimin pozitiv sidomos për sa i takon ritmit të zhvillimeve, pra që t’i materializojmë ato dhe të nisim me aktivitete dhe projekte konkrete”, tha Stavileci.

Sipas tij, duke e ditur që të dyja shtetet janë bashkëpjesëmarrëse në të gjithat iniciativat rajonale, përfshi edhe ato që rrjedhin nga procesi i Berlinit në kuadër të cilit janë axhenda e rrjetit të transportit në shtetet e Ballkanit Perëndimor dhe interkonektiviteti në fushën e energjisë, ky bashkëpunim duhet quar më tej.

“Në këtë kuadër është shumë e rëndësishme që shtetet e Evropës Juglindore, sidomos këto me të cilat jemi fqinj të kemi projekte me të cilat do të lidheshim edhe më mirë njeri me tjetrin, pastaj do të lidheshim edhe në platformat tjera sidomos në aspektin e tregut rajonal”, tha Stavileci, duke marrë si referencë pozitive bashkëpunimin Kosovë-Shqipëri në këto fusha.

Kreu i MZHE-së, tha se praktika e bashkëpunimit me Shqipërinë ku hyn autostrada energjetike – 400 kV dhe projektet që do të kenë impakt edhe në zhvillimet e ardhshme në tregjet e përbashkëta, mund të ndiqen edhe me Republikën e Maqedonisë, me qëllim të krijimit të një tregut të integruar rajonal.

“Delegacionet përkatëse u zotuam që do t’i rinisim këto ide të mëparshme dhe të shohim si t’i avancojmë ato në mënyrë që shtetet tona të lidhen në kuptimin e infrastrukturës fizike por edhe në kuptimin e ndërtimit të kapaciteteve energjetike, me të cilat mund të komplementarizohemi, me çka ndikojmë edhe në sigurinë e furnizimit, jo vetëm për Kosovën dhe Maqedoninë, por edhe me shtete tjera”, tha Stavileci, duke shtuar se kjo do t’i japë një frymëmarrje tjetër të dyja vendeve.

Ministri i Ekonomisë i Maqedonisë, Driton Kuqi tha se dy vendet tanimë kanë vendosur bazë solide për themelimin e bashkëpunimit me projekte të reja në interes të qytetarëve të dy vendeve.

“Gjatë takimit u bisedua rreth projekteve energjetike aktuale të përbashkëta sikurse është interkonektimi i dytë Maqedoni -Kosovë prej 400 kV, në të cilën tani më marrin pjesë dy vendet në pranimin e studimeve për vërtetësi, ndërsa është nënshkruar edhe Marrëveshja Operative mes MEPSO dhe KOSTT me të cilën rregullohet bashkëpunimi i sistemeve interkonektive mes Republikës së Maqedonisë dhe Republikës së Kosovës”, tha ai.

Kuqi më tutje tha se me kolegun Stavileci janë pajtuar rreth rëndësisë së zhvillimit të sistemeve gazpërçues të dy vendeve, sepse në pajtim me studimet e fizibilitetit për sistemin gazpërçues në Maqedoni, në mesin e 6 interkonektimeve potenciale shtesë të parashikuara është edhe interkonektimi me Kosovën me të cilën do të shtohet sigurimi i furnizimit me energji.Sipas tij, bashkëpunimi realizohet në bazë të 28 marrëveshjeve të nënshkruara midis dy vendeve, por ky bashkëpunim pritet të konkretizohet edhe më tutje nga grupet punuese të dy ministrive.

Kosovë-Shqipëri, fuqizim i sundimit të ligjit dhe bashkëpunimit ndërshtetëror

May 12, 2016 by dgreca

– Delegacioni i Gjykatës Kushtetuese të Shqipërisë vizitë zyrtare në Kosovë/

PRISHTINË, 11 Maj 2016-B.Jashari/ Fuqizimi i sundimit të ligjit në Kosovë dhe Shqipëri, fuqizon bashkëpunimin ndërshtetëror. Ministri kosovar i Drejtësisë, Hajredin Kuçi sot ka pritur në takim kryetarin e Gjykatës Kushtetuese të Shqipërisë, Bashkim Dedja, i shoqëruar nga Kryetarja e Gjykatës Kushtetuese së Kosovës, Arta Rama Hajrizi.Gjatë këtij takimi Ministri Kuçi e ka njoftuar Kryetarin e Gjykatës Kushtetuese të Shqipërisë, Dedja, me punën dhe aktivitetet e Ministrisë së Drejtësisë, përfshirë zhvillimet e fundit në fushën e drejtësisë në Kosovë, konkretisht në reformat e realizuara në frymën e perspektivës evropiane, përfshirë legjislacionin, ngritjen e kapaciteteve si dhe garantimin e pavarësisë së gjyqësorit.

Kryetari i Gjykatës Kushtetuese të Shqipërisë, Dedja njoftoi ministrin Kuçi për reformat themelore që po ndërmerren në fushën e drejtësisë në Shqipëri, për sa i përket legjislacionit dhe funksionimit të sistemit të drejtësisë.

Ministri Kuçi dhe kryetari Dedja me theks të veçantë diskutuan për rëndësinë e Gjykatës Kushtetuese, rolin dhe rëndësinë e punës dhe pavarësisë së këtij institucioni në të dyja vendet.

Ministri Kuçi theksoi edhe bashkëpunimin e ngushtë që ka Ministria e Drejtësisë me institucionet e Drejtësisë në Shqipëri, duke vlerësuar lartë shkëmbimin e përvojave nga të dyja vendet në fushën e drejtësisë.

Po ashtu, kryetarja e Gjykatës Kushtetuese të Republikës së Kosovës, Arta Rama-Hajrizi, priti sot në takim kryetarin e Gjykatës Kushtetuese të Republikës së Shqipërisë, Bashkim Dedja, i shoqëruar nga gjyqtarët e kësaj gjykate: Altina Xhoxhaj dhe Fatmir Hoxha.

Pasi i falënderoi për vizitën, kryetarja Rama-Hajrizi fillimisht informoi me zhvillimet e fundit në Gjykatën Kushtetuese të Kosovës, duke veçuar njëherësh disa nga sfidat me të cilat vazhdon të ballafaqohet kjo gjykatë në çështjet e funksionimit.

Ajo shprehu mirënjohjen e saj për përkrahjen që Gjykata Kushtetuese e Shqipërisë i ka ofruar në vazhdimësi Gjykatës Kushtetuese të Kosovës, si nëpërmjet shkëmbimit të përvojave e po ashtu edhe nëpërmjet iniciativave të përbashkëta, që çdoherë për synim kanë avancimin profesional të këshilltarëve dhe të gjyqtarëve të saj.

Në vazhdim të bisedës, kryetarja Rama-Hajrizi dhe kryetari Dedja trajtuan çështje të tjera me interes të përgjithshëm për funksionimin e gjyqësorit dhe për reformat në gjyqësinë e të dyja vendeve, me ç’rast të dyja palët shkëmbyen pikëpamjet e tyre përkitazi me thellimin e mëtutjeshëm të bashkëpunimit ndërmjet dy gjykatave kushtetuese.

Delegacioni i Gjykatës Kushtetuese të Shqipërisë po qëndron për vizitë zyrtare në Kosovë me ftesë të Gjykatës Kushtetuese të Kosovës, me ç’rast do të takohet edhe me udhëheqës të institucioneve të tjera shtetërore.

Kosovë-Kroaci, marrëveshje për bashkëpunim kulturor

May 11, 2016 by dgreca

-Marrëveshja e nënshkruar në Zagreb përfshinë edhe bashkëpunimin në fushën e pakicave kombëtare dhe pronësisë intelektuale/PRISHTINË, 11 Maj 2016-B.Jashari/ Ministri kosovar i Kulturës, Rinisë dhe Sportit, Kujtim Shala, ka nënshkruar sot Marrëveshjen e Bashkëpunimit Kulturor ndërmjet Qeverisë së Kosovës dhe Qeverisë së Kroacisë. Marrëveshja është nënshkruar në Zagreb ndërmjet ministri Kujtim Shala dhe atij të Kroacisë, Zlatko Hasanbegović.

Njoftimi i dërguar thekson se, ministri Shala dhe ai kroat Hasanbegović biseduan për një varg çështjesh të interesit të përbashkët, si dhe për nevojën e rritjes të bashkëpunimit kulturor ndërmjet Kosovës dhe Kroacisë. Shala dhe Hasanbegović u shprehën se Kosova dhe Kroacia kanë pasur bashkëpunim të vazhdueshëm kulturor, por kjo marrëveshje e sotme e natyrës politike, këtij bashkëpunimi i jep dimension tjetër, sepse raportet ndërmjet këtyre dy shteteve rregullohen dhe marrin karakter shtetëror. Po ashtu, Shala e Hasanbegović nënvizuan se kjo marrëveshje protokolare i rregullon raportet në fushën e kulturës dhe do të pasohet me bashkëpunim konkret ndërmjet institucioneve të kulturës së dy vendeve.Ministri Shala dhe Hasanbegović e vlerësuan këtë marrëveshje si tejet të rëndësishme për thellimin e raporteve bilaterale mes Kosovës dhe Kroacisë, të cilët janë domethënëse dhe i kontribuojnë paqes dhe stabilitet në rajon, meqë Kosova dhe Kroacia kanë raporte historike, që domethënë raporte politike e kulturore.Me këtë rast, ministri Shala u shpreh se kultura ndikon drejtpërdrejtë në afrimin e popujve, ndaj kërkohet që t’i kushtohet vëmendje e veçantë. Ai më tej shtoi se kjo marrëveshje është bazë e mirë për një prezencë më të madhe të Kroacisë në Kosovë dhe anasjelltas, dhe shtoi se kjo praktikë, duhet të vazhdohet edhe në fusha tjera.Më tej ministri Shala u shpreh se kjo marrëveshje e natyrës politike krijon kushte të volitshme që të konkretizohet me nisma dhe aktivitete të përbashkëta në fushën e kulturës, trashëgimisë kulturore, librit, muzeut dhe sferave tjera të artit.Shala ndër të tjera tha se Kosova i është mirënjohëse shtetit kroat për mbështetjen e vazhdueshme që i ka dhënë, e cila vazhdon me të njëjtin intensitet edhe tani.Marrëveshja e Bashkëpunimit Kulturor e cila është nënshkruar sot synon të zgjerojë bashkëpunimin ndërmjet institucioneve nacionale në fushën e kulturës, përmes aktiviteteve që kontribuojnë në njohjen më të mirë të dy vendeve, përmes respektimit të të drejtave dhe detyrimeve të përfshira në traktatet ndërkombëtare.Kjo marrëveshje bashkëpunimi, po ashtu specifikon temat dhe fushat e interesit të përbashkët, në ngjarje kulturore, në fushën e arteve pamore, në muze e galeri, pastaj në thellimin e bashkëpunimit ndërmjet institucioneve përgjegjëse për arkivat kombëtare, bibliotekat, si dhe thellimin e formave të bashkëpunimit në fushën e letërsisë, muzikës, arteve skenike, shtëpive botuese, filmit, etj. Marrëveshja përfshinë edhe bashkëpunimin në fushën e pakicave kombëtare dhe pronësisë intelektuale.

Kosova vendos marrëdhënie diplomatike me Belizenë

April 30, 2016 by dgreca

– Palët e cilësuan historike këtë marrëveshje në mes të dy shteteve. Marrëveshja për vendosjen e marrëdhënieve diplomatike në mes të Rëpublikës së Kosovës dhe Belizesë gjithashtu i është dërguar edhe Sekretarit të Përgjithshëm të Kombeve të Bashkuara, Ban Ki-moon për t’u përcjellur tek të gjitha shtetet anëtare të kësaj organizate/

NJU JORK, 30 Prill 2016/ Në një ceremoni rasti të organizuar nga Konsullata e Përgjithshme e Republikës së Kosovës në Nju Jork është nënshkruar marrëveshja për vendosjen e marrëdhënieve diplomatike në mes të Republikës së Kosovës dhe Belizesë. Njoftimi dërguar nga Nju Jorku thekson se, përmes kësaj marrëveshjeje të dy qeveritë janë pajtuar që të thellojnë marrëdhëniet miqësore ndërmjet dy vendeve, të zgjerojnë fushat e bashkëpunimit bilateral, si dhe të ndihmojnë njëra-tjetrën në rrafshin e politikës ndërkombëtare. Marrëveshja është nënshkruar nga Përfaqësuesja e Përhershme e Belizesë në Kombet e Bashkuara, ambasadorja Lois M. Young, e cila ishte e shoqëruar nga ambasadorja Janine Coye Felson, zëvendësshefe e misionit, dhe i ngarkuari me punë në Konsullatën e Përgjithshme të Republikës së Kosovës në Nju Jork, Ylber Kryeziu.

Palët e cilësuan historike këtë marrëveshje në mes të dy shteteve. Me këtë rast, Kryeziu ka falënderuar ambasadoren Young dhe Qeverinë e Belizesë për njohjen e shpejtë të Republikës së Kosovës, përkrahjen e vazhdueshme të axhendës së Republikës së Kosovës për anëtarësim në organizata ndërkombëtare, si dhe ndikimin që ka luajtur Belize në lobimin për njohjen e Republikës së Kosovës nga shtetet e hemisferës perëndimore.

Nga ana tjetër, ambasadorja Young, duke rikujtuar sfidat e ngashme në të cilat ka kaluar shteti i Belizesë gjatë procesit të anëtarësimit në Kombet e Bashkuara. Ajo uroi Kryeziun për të arriturat e Republikës së Kosovës në konsolidimin e shtetit dhe ka siguruar atë që Belize do të vazhdojë të luajë një rol mbështetës për njohjen e mëtutjeshme të subjektivitetit ndërkombëtar të shtetit të Kosovës.

Belize është shteti i 89-të me radhë që hyn në marrëdhënie diplomatike me Republikën e Kosovës. Belize, shtet anëtar i Komonuellthit, është i vetmi anëtar i të tri organizatave kryesore rajonale të Amerikës Qendrore si: CARICOM, CELAC, dhe SICA. Gjithashtu, Belize është një anëtar shumë i respektuar dhe me ndikim në Kombet e Bashkuara.

Marrëveshja për vendosjen e marrëdhënieve diplomatike në mes të Rëpublikës së Kosovës dhe Belizesë gjithashtu i është dërguar edhe Sekretarit të Përgjithshëm të Kombeve të Bashkuara, Ban Ki-moon për t’u përcjellur tek të gjitha shtetet anëtare të kësaj organizate./b.j/

Kosovë-Serbi, ka hyrë në fuqi Marrëveshja për njohjen reciproke të certifikatave ADR

April 26, 2016 by dgreca

-Ministrja kosovare për Dialog, Edita Tahiri: Kjo marrëveshje mundëson lirinë e lëvizjes së mallrave të rrezikshme mes dy shteteve sipas Konventës së ADR/

PRISHTINË, 25 Prill 2016-B.Jashari/ Ministrja kosovare për Dialog, Edita Tahiri, ka bërë të ditur se sot ka hyrë në fuqi Marrëveshja për njohjen reciproke të certifikatave ADR midis dy shteteve Kosovës dhe Serbisë, të ndërmjetësuar nga Bashkimi Evropian.

“Kjo marrëveshje mundëson lirinë e lëvizjes së mallrave të rrezikshme mes dy shteteve sipas Konventës së ADR dhe prej sot, me 25 prill 2016 prej orës 00:00, të gjithë transportuesit nga Kosova përmes certifikatave të ADR-së të lëshuara nga institucionet përkatëse të Republikës së Kosovës, do ta realizojnë këtë veprimtari tregtare me shtetin fqinj – Serbinë”, ka thënë ministrja Tahiri.

Ajo ka shtuar më tej se kjo marrëveshje është e rëndësishme në planin ekonomik dhe tregtar sepse mundëson heqjen e pengesave që Serbia ia ka krijuar kompanive transportuese nga Kosova për gati më shumë se tetë muaj, po ashtu në planin politik ka rëndësi sepse është njohje e dokumenteve shtetërore të Republikës së Kosovës nga ana e Serbisë.

“Certifikata ADR për shoferë është dokument shtetëror e cila përmban stemën shtetërore si dhe është konform konventës së OKB-së për ADR”, tha Tahiri.

Ministrja Tahiri po ashtu theksoi se me heqjen e kësaj bllokade nga Serbia, do të përfitojnë kompanitë e vendit tonë që transportojnë këtë lloje të mallrave si dhe buxheti i Kosovës do të përfitojë nga taksat e eksport / importit por edhe familjet që kanë të punësuar në këto kompani vendore.

“Vlen të përmendet se ka më shumë se tetë muaj që unë si Kryenegociatore e Dialogut të Brukselit e kam ngritur në Bruksel çështjen e njohjes së certifikatave ADR, me qëllim që të heqim bllokadën që Serbia ia kishte bërë importeve nga kompanitë kosovare, dhe këto angazhime qeveritare rezultuan me arritjen e marrëveshjes më 19 prill 2016. Megjithëse u desh disa muaj negociata në Bruksel të arrihet kjo marrëveshje, vlerësoj se është një sukses i rëndësishëm dhe në fazën vijuese ne si Ministri e Dialogut së bashku me Ministrinë e Tregtisë dhe Industrisë dhe Doganën e Kosovës do të bëjmë monitorimin e zbatimit të kësaj Marrëveshje. Nga Raporti zyrtar i Doganës të cilën e kam marrë para një ore, procesi i zbatimit po shkon mirë”, theksoi ministrja Edita Tahiri.

Ajo bëri të ditur se, me hyrjen në fuqi sot të kësaj Marrëveshjes janë hequr edhe masat e reciprocitetit të vendosura nga Qeveria e Republikës së Kosovës përkatësisht nga Ministria e Tregtisë dhe Industrisë.
Si kundërpërgjigje për bllokadën e Serbisë për importin nga Kosova, Qeveria e Republikës së Kosovës më 22 mars 2016 pat marrë vendim për masa reciprociteti për mosnjohjen e certifikatave dhe ka ndaluar importin e mallrave të rrezikshme nga Serbia, të cilat masa u hoqën sot.

Në vijim po sjellim tekstin e plotë të Marrëveshjes për njohjen reciproke të certifikatave të ADR-së në gjuhën shqipe dhe në gjuhën angleze (në origjinal):

Marrëveshja e Brukselit për njohjen reciproke të Certifikatave ADR

Konkluzionet e kryesuesit të BE të datës 19 prill 2016

1. Palët zotohen për lëvizjen e lirë të mallrave, duke përfshirë mallrat e rrezikshme, pa pengesa dhe në përputhje me standardet ndërkombëtare / Evropiane.

2. Palët pajtohen që reciprokisht ti pranojnë të gjitha standardet ndërkombëtare / Evropiane për transportin / bartjen e mallrave të rrezikshme, përfshirë të gjithë dokumentacionin në përputhje me konventën e ADR-së (certifikatat e shoferëve dhe automjeteve).

3. Me këtë marrëveshje nuk preken detyrimet ndërkombëtare të secilës palë.

4. Kjo marrëveshje hynë në fuqi më 25 prill 2016.

5. Një grup për zbatim do të formohet nga BE që të monitorojë implementimin.

Brussels Agreement on mutual recognition of the ADR certificates

Conclusions of the EU chair of 19 April 2016

1. The parties commit to free movement of goods, including dangerous goods, without hindrance and in line with international/European standards.

2. Parties agree to mutually accept all international/European standards for the transport/carrying of dangerous goods, including all documentation in line with the ADR convention (certificates for drivers and vehicles).

3. The above does not affect each party’s international obligations.

4. The above enters into force on 25 April 2016.

5. An implementation group will be set up by the EU to monitor implementation.