Kosovë-Serbët festojnë Vidovdanin

June 28, 2016 by dgreca

-Në veri të Mitrovicës edhe me përmendoren e Knez Lazarit/

-Para 27 viteve, në 600 vjetorin e Betejës së Kosovës, kreu i atëhershëm shtetëror serb, Slobodan Milosheviç, pikërisht në ditën e Vidovdanit në fushën e Kosovës – Gazimestan, u binte daulleve të luftës/

-Po para 27 viteve, në rrethana tragjike terrori, Serbia në Kuvendin e saj në 28 mars të vitit 1989 miratoi “kushtetutën e tankeve”, që përgjakshëm, me forcë e në mënyrë kundërkushtetuese rrënoi autonominë që kishte Kosova/

– POLICIA E KOSOVES-KOMUNIKATE RRETH FESTIMEVE/

PRISHTINË, 28 Qershor 2016-B.Jashari/ Serbë kosovarë dhe të ardhur edhe nga Serbia po festojnë Vidovdanin, të mbledhur sot në mesditë në Gazimestan, në një fushë rreth pesë kilometra në veri të Prishtinës, duke shënuar kështu 627 vjetorin e Betejës së Kosovës.

Në çdo 28 qershor serbët festojnë Vidovdanin apo Betejën e Kosovës, që ka ndodhur në vitin 1389, e cila ishte humbur.Dita e Vidovdanit festohet sot nga serbët edhe me “zbulimin solemn” në qendër të Mitrovicës Veriore të përmendores së Knez Lazar të kohës së Betejës së Kosovës, e cila është vendosur natën në sheshin kryesor afër urës mbi lumin Ibër që ndanë qytetin.

“Përmendorja është e lartë 7,5 metra, e rëndë 7,5 tonë”, raporton media serbe, duke theksuar se “Knez Lazar është prezantuar me shpatën në njërën dorë, derisa me dorën tjetër tregon drejt Gazimestanit”.Vendimin për përmendoren e ka marrë Kuvendi i Komunës veriore të qytetit të ndarë me votat e këshilltarëve serbë, por jo edhe të shqiptarëve e boshnjakëve që atje janë pakicë.

Para 27 viteve, në 600 vjetorin e Betejës së Kosovës, kreu i atëhershëm shtetëror serb, Slobodan Milosheviç, pikërisht në ditën e Vidovdanit në fushën e Kosovës – Gazimestan, u binte daulleve të luftës, e cila pastaj u ndez e përfshiu hapësirat e ish-Jugosllavisë, edhe Kosovën, luftës për Serbinë e madhe, nga më të përgjakshmet në gjithë historinë e Ballkanit, dhe që në fund e humbi e pastaj vet përfundoi në Tribunalin Ndërkombëtar për Krime Lufte në Hagë.

“Ne ishim të guximshëm e dinjitozë. Tani, gjashtë shekuj më vonë, ne sërish jemi në betejë. Nuk janë këto beteja të armatosura, por ato nuk mund të përjashtohen”, thoshte Milosheviç në fushën e Kosovës në Gazimestan.

Po para 27 viteve, në rrethana tragjike terrori, Serbia në Kuvendin e saj në 28 mars të vitit 1989 miratoi “kushtetutën e tankeve”, që përgjakshëm, me forcë e në mënyrë kundërkushtetuese rrënoi autonominë që kishte Kosova me Kushtetutën e vitit 1974 si element konstituiv me të drejtë vetoje në federatën e atëhershme, nga shpërbërja e së cilës pastaj dolën 7 shtete të pavarura.

Në demonstratat gjithëpopullore në mbrojtje të Kosovës nga sulmet e Serbisë, vetëm brenda dy ditëve, në 27 e 28 mars 1989, në shtetrrethimin e hekurt ushtarako-policor të vendosur nga Beogradi u vranë 22 shqiptarë e plagosën qindra të tjerë në Prishtinë, Podujevë, Mitrovicë, Zhur e Dushanovë afër Prizrenit, Deçan, Gjilan e në anë të tjera të Kosovës.

Në ditën e Vidovdanit në Kosovë, në vazhdimësi, grupe ekstremiste të serbëve kanë manifestuar edhe provokacione, në forma të ndryshme.

Policia e Kosovës me kohë bën të gjitha përgatitjet e nevojshme policore për mbarëvajtjen e manifestimit tradicional religjioz të Vidovdanit.

Komunikatë për media/

Prishtinë, 28 qershor 2016/

Policia e Kosovës lidhur me aktivitetet dhe manifestimet tradicionale religjioze ortodokse të festës së ‘Vidovdanit’ ka ndërmarr me kohë të gjitha veprimet paraprake dhe ka përgatitur planin operativ për menaxhimin e situatës së sigurisë.

Plani operativ policor u realizua me qëllim që gjatë aktiviteteve të mbajtura të arrihen objektivat si në vijim:

Mbajtja e rendit dhe sigurisë publike dhe zbatueshmëria e ligjit në vend,

Shtimi i masave të sigurisë për të garantuar rend, qetësi dhe siguri publike, para, gjatë dhe pas manifestimeve.
Garantimi i lirisë së lëvizjes së lirë për të gjithë qytetarët.
Kontrollimi dhe rregullimi i nevojshëm i rrjedhës së trafikut në të gjitha rrugët magjistrale, rajonale dhe ato lokale,
Përcjellja dhe sigurimi i eskortave, individëve dhe grupeve të veçanta,
Zbatimi i kompetencave dhe autorizimeve ligjore, përballë situatave të ndryshme dhe marrja e masave ndaj të gjithë shkelësve të ligjit, konform ligjeve të Republikës së Kosovës.

Sipas vlerësimeve në teren në këto manifestime morën pjesë prej 1300-1500 pjesëmarrës, të cilët në mënyrë të organizuar kanë marrë pjesë në Graçanicë dhe Gazimestan të rajonit të Prishtinës, për festimet e tyre.

Rreth orës 09:00, manifestimi ka filluar në Graçanicë, ku kanë marrë pjesë rreth 900 pjesëmarrës, përderisa Policia është përkujdesur për mbarëvajtjen e tij pa incidente si dhe duke mundësuar qarkullimin e trafikut duke ri-drejtuar automjetet në rrugë alternative.

Rreth orës 13:00, ka filluar edhe manifestimi tek monumenti i Gazimestanit, ku kanë marrë pjesë prej 1.300 – 1.500 pjesëmarrës, ku edhe në këtë lokacion njësitet policore janë përkujdesur për mbarëvajtjen e manifestimit si dhe rregullimin-orientimin e komunikacionit rrugor.

Gjatë zhvillimit të të gjitha aktiviteteve manifestuese sa i përket aspektit të rendit dhe sigurisë së përgjithshme në mbarëvajtjen e këtyre manifestimeve deri në përfundim të tyre, në këto dy lokacione çdo gjë ka shkuar sipas planit të paraparë operativ dhe nuk është shënuar asnjë incident, përderisa pas përfundimit, rreth orës 13:45 pjesëmarrësit kanë filluar të shpërndahen ngadalë ashtu siç edhe kishin ardhur në mënyrë të qetë.

Vlen të potencohet rreth orës 15:50, nga zyrtarët policor është raportuar se që gjatë kthimit të eskortës e cila ishte në përcjellje të Policisë, në fshatin Lisicë të Mitrovicës në jug është hedhur koktej molotovi, përderisa nuk është raportuar për ndonjë dëm material apo lëndime në njerëz. Njësitet relevante policore kanë dalë në lokacion dhe po hetojnë rastin.

Një informacion tjetër, po ashtu është pranuar se ka pasur gjuajtje me gur në drejtim të një furgoni, i cili nuk ishte në përcjellje të Policisë, përderisa dy persona kanë kërkuar ndihmë në spitalin e Mitrovicës në veri. Policia e Kosovës edhe në këtë rast është duke ndërmarr veprimet e nevojshme hetimore.

Me respekt,

Zyra për Informim dhe Marrëdhënie me Publikun,

DPP-Prishtinë.

Forca e Sigurisë në Kosovë, memorandum bashkëpunimi me Komandën Evropiane të SHBA

June 28, 2016 by dgreca

Ministria e Mbrojtjes e Forcës së Sigurisë në Kosovë, memorandum bashkëpunimi me Komandën Evropiane të SHBA/Në ambientet e Ministrisë për Forcën e Sigurisë së Kosovës, {MFSK}, nën një ceremoni solemne, më datën 16 qershor 2016, u nënshkrua memorandumi i bashkëpunimit ndërmjet Ministrisë të FSK dhe Komandës Evropiane të Shteteve të Bashkuara të Amerikës, lidhur me përdorimin e hapësirës të MFSK për Zyrën e Bashkëpunimit në Fushën e Mbrojtjes të SHBA, {US-ODC}. Në emër të MFSK, memorandumin e nënshkroi Sekretari i Përgjithshëm i kësaj ministrie, ndërsa në emër të Ambasadës së SHBA, e nënshkroi Shefi i Zyrës për bashkëpunim në Fushën e Mbrojtjes. Memorandumi i Bashkëpunimit është në përputhje të plotë me marrëveshjen midis SHBA dhe Republikës së Kosovës, lidhur me Statusin e Forcave të SHBA në Kosovë, {SOFA}, nënshkruar në Prishtinë, më 18 shkurt 2012. Qëllimi i këtij memorandumi është lejimi i shfrytëzimit të hapësirave të caktuara të MFSK, për nevoja të Zyrës për Siguri e Bashkëpunim të SHBA në Kosovë, {US-ODS}. Zyra për bashkëpunim në fushën e Mbrojtjes është përgjegjëse për bashkëpunimin biletaral në fushën e mbrojtjes midis MFSK dhe strukturave ushtarake të Departamentit të Mbrojtjes të SHBA, Komandës Evropiane të SHBA, të përfaqësuar nga Shefi i Zyrës për bashkëpunim në fushën e Mbrojtjes në Kosovë, {US-ODC}. {Zyra e shtypit e MFSK}.

Britania e Madhe del nga Bashkimi Europian, Cameron jep dorëheqjen

June 24, 2016 by dgreca

Kancelarja Merkel: Procesi i daljes së Anglisë nga BE-ja do të zgjasë rreth 2 vite/

Britania e Madhe do të lërë Bashkimin Europian. Ky është verdikti i referendumit për daljen jashtë nga blloku, që rezultoi me 51.9% të votave për ata votuan pro. Pas 43 vjetësh “martesë”, Loindra divorcohet kështu nga Brukseli.

Ndërkohë, presidenti i Këshillit Europian, Donald Tusk, ka shprehur keqardhjen e tij për daljen e Britanisë nga BE-së: “Nuk e fsheh që donim një rezultat ndryshe. Jam shumë i ndërgjegjshëm për rëndësinë e këtij verdikti dhe mendoj ky është një moment dramatik, që sigurisht do të ndikojë politikisht. Nuk ka mënyrë për të parandaluar të gjitha pasojat politike”.

Ndërsa ende kanë mbetur edhe 8 qendra numërimi pa u mbyllur, BBC ka parashikuar edhe rezultatin e tyre, ku sipas saj rreth 52 % e britanikëve kanë votuar pro daljes nga BE duke e bërë fakt tashmë daljen nga Bashkimi Europian.

Procesi i numërimit vijon vetëm në Angli, ndërkohë që në Irlandën e Veriut, Uells, Skoci dhe Gjilbratar ka përfunduar.

Lideri i euro-skeptikëve, Najxhëll Farage ka festuar, ndërsa ministri gjerman Shauble kërkon “bashkim” për pjesën tjetër të BE-së. Ndërkohë që bursat janë në panik: leku vendës, sterlina ka rënë dhe ka kaos në tregun monetar.

Pas daljes së Britanisë së Madhe nga Bashkimi Europian, kryeministri David Cameron ka dhënë dorëheqjen.

Në një konference pas rezultatit te referendumit, Cameron tha se do të vazhdojë të qendroje edhe per tre muaj në kyre te qeverisë, për ti hapur më tej rrugën një lideri të ri.

Duke respektuar vendimin e qytetareve te Britanisë, Cameron tha se pavarësisht daljes nga BE Britania është një ekonomi e fortë.

“Britanikët kanë votuar për tu larguar nga BE dhe ne do të respektojmë vendimin e tyre. Më lejoni që tju uroj edhe ju që votuat pro daljes nga BE. Këto rezultate do të përcaktojnë të ardhmen e Britanisë, – tha Cameron. – E gjithë bota ka parë vendimin që ka marrë Britania e Madhe, por Britania ekonomike është e fortë. Çdo gjë e ka një zgjidhje, Ne do të kalojmë në një fazë tjetër të bisedimeve me BE për të treguar interesin e të gjitha shteteve të Mbretërisë së Bashkuar”.“Unë jam i nderuar që kam qenë kryeministër i vendit për këto vite. Vlerësoj reformat e marra nga qeveria. Dua të theksoj se jam mirënjohës të gjithë atyre që kanë punuar me mua”, – shtoi ai.

Merkel: Procesi i daljes së Anglisë nga BE-ja do të zgjasë rreth 2 vite/

Kancelarja e Gjermanisë Angela Merkel, i ka bërë thirrje vendeve të tjera të Bashkimit Europian të mos nxitohen për të marrë hapa të nxituara pas referendumit të Britanisë që vendosi të lërë bllokun evropian.

Merkel shtoi se vendet e BE-së duhet të jenë të qeta dhe se ka ftuar javën e ardhshme kryeministrat e Italisë dhe të Francës për të diskutuar mbi vendimet që do të merren në Bruksel pas daljes së Anglisë nga BE-ja.

“Duhet të jemi të qetë për të marrë vendimet e duhura. Duhet të vazhdojmë siç kemi qenë më parë. Të kujdesemi për procesin e integrimit në BE, – tha Merkel, – dhe të përmirësojmë jetesën e qytetarëve të BE-së. Është me rëndësi të jemi të bashkuar. Vendet e BE-së të përpiqen të mos nxitohen”.

“Sa i takon daljes nga BE-ja, ka procedura të detajuara dhe procesi kërkon që procedurat të zgjasin rreth 2 vjet. Britania e Madhe do të ketë përgjegjësi të madhe deri sa të bëhet dalja e plotë nga BE-ja, – vijoi Merkel. – Edhe pas daljes së saj nga BE, ne do të vazhdojmë partneritetin me Britaninë. Be do të gjejë mënyrën e duhur si do të vazhdohet pas daljes nga Bashkimi Evropian”.

Deputetet kosovare në Preshevë

June 23, 2016 by dgreca

-Grupi i Grave Deputete të Kuvendit të Kosovës nesër viziton Luginën e Preshevës/

PRISHTINË, 23 Qershor 2016/ Gazeta DIELLI-B.Jashari/ Grupi i Grave Deputete të Kuvendit të Kosovës nesër do ta vizitojë Luginën e Preshevës, ku do të realizohen takime me udhëheqës komunalë, të partive politike dhe të Këshillit Nacional Shqiptar.

“Do të ketë takime me kryetaren e Kuvendit Komunal të Preshevës Ardita Sinani, kryetarin e Preshevës Shqiprim Arifi, kryetarin e Bujanocit Shaip Kamberi, kryetarin e Këshillit Nacional Shqiptar Jonuz Musliu, kryetarin e Partisë Demokratike Nagip Arifi dhe kryetarin Partisë Demokratike Shqiptare Ragmi Mustafa”, bëhet e ditur në axhendën e dërguar. Lugina e Preshevës, të cilën e quajnë edhe Kosova Lindore, është një rajon i banuar me shumicë shqiptare, në jug të Serbisë.

Kosovë-Maqedoni, bashkëpunim edhe për universitetin “Nëna Terezë” në Shkup

June 18, 2016 by dgreca

-Ministri i Arsimit, Shkencës dhe Teknologjisë i Kosovës, Arsim Bajrami, priti ministrin e Arsimit dhe Shkencës të Maqedonisë, Pishtar Lutfiu: Në mënyrë të veçantë u morëm vesh që të shpallim konkursin e përbashkët për projektet e përbashkëta kërkimore shkencore/

PRISHTINË, 17 Qershor 2016/ Ministri i Arsimit, Shkencës dhe Teknologjisë i Kosovës, Arsim Bajrami, ka pritur sot ministrin e ri të Arsimit dhe Shkencës të Maqedonisë, Pishtar Lutfiu, me të cilin ka biseduar për bashkëpunimin mes dy vendeve në fushën e arsimit dhe të shkencës.

Ministri Bajrami tha se me ministrin Lutfiu ka biseduar zbatimin e dy marrëveshjeve të nënshkruara me Maqedoninë në fushën e arsimit, por edhe për rritjen e bashkëpunimit në nivelin akademik, tash kur është themeluar edhe universiteti “Nëna Terezë” në Shkup, ndërsa theksoi se Kosova dhe universitetet e Kosovës do ta ndihmojnë këtë universitet.

“Ne do ta mbështestim plotësisht këtë Universitet me profesorët më të mirë që i kemi, sepse ky do të jetë një universitet model i kompetencës, kryesisht i orientuar drejt shkencave teknike dhe teknologjike dhe do të fillojë punën nga ky vit akademik”, tha ministri Bajrami, ndërsa theksoi rëndësinë e këtij universiteti edhe për forcimin e kapacitetin intelektual të shqiptarëve në Maqedoni

Duke theksuar lehtësimet që janë bërë sa i përket kalimit të kufirit me Maqedoninë dhe autostradës e cila është duke u përfunduar, ministri Bajrami theksoi se do të ketë mundësi më të mëdha edhe për studentët kosovarë, por edhe për bashkëpunim ndëruniversitar.

“Me ministrin Lutfiu biseduam që t’i shtyjmë universitetet tona sa më shumë që të bashkëpunojnë në programet e përbashkëta në doktoraturë dhe magjistraturë”, tha ministri Bajrami, ndërsa theksoi se në këtë takim është biseduar edhe për bashkëpunim në fushën e arsimit parauniversitar, sidomos në arsimin profesional.

“Në mënyrë të veçantë u morëm vesh që të shpallim konkursin e përbashkët për Kosovë dhe Maqedoni për projektet e përbashkëta kërkimore shkencore. Të dy ministritë do të ndajmë bursa dhe subvencione për asistentët dhe profesorët që të aplikojnë me projekte të përbashkëta qoftë të karakterit rajonal, apo evropian”, tha ministri Bajrami.

Ministri Lutfiu shprehu kënaqësinë që ndodhet në Kosovë në vizitën e parë zyrtare pas marrjes së detyrës, ndërsa theksoi se do të punohet për jetësimin e dy marrëveshjeve tashmë të nënshkruara mes Kosovës dhe Maqedonisë.

Ministri Lutfiu tha se e ka njoftuar ministrin Bajrami edhe për mënyrën se si po ecën puna me universitetin e ri “Nënë Tereza”, për të cilin theksoi se është një projekt shumë i rëndësishëm si për Maqedoninë ashtu edhe për rajonin. “Në këtë aspekt do të na duhet shumë edhe ndihma e Kosovës dhe përvoja e saj në shkencat teknike kah të cilat është i orientuar Universiteti”, theksoi ai./b.j/