Rajon – Page 119 – Dielli

Liderët e partive shqiptare në Maqedoni u takuan me Brian Yee

March 3, 2016 by dgreca

Diplomati amerikan, gjatë ditës së enjte, është takuar me presidentin e Maqedonisë, Gjorgje Ivanov, si dhe liderët e dy partive politike shqiptare, Ali Ahmetin nga Bashkimi Demokratik pë Integrim dhe Menduh Thaçin, nga Partia Demokratike Shqiptare.

Nga ambasada amerikane në Shkup kanë njoftuar se Brian Yee do të prononcohet për mediet gjatë ditës së premte, pasi t’i takojë të gjithë liderët politik, të cilët janë përgjegjës për realizimin e marrëveshjes politike, si kusht për të pasur zgjedhje të besueshme dhe kredibile.

Ndërkaq, lideri i partisë shqiptare në pushtet, Ali Ahmeti nga Bashkimi Demokratik për Integim, pas takimit me Brian Yee, ka theksuar se zotohet për zgjedhje të lira dhe demokratike, me qëllim që rezultati zgjedhor të mos kontestohet nga asnjëra palë.

“U pajtuam që zgjedhjet duhet të jenë të besueshme, të përmbushen të gjitha standartet e pakontestueshme kombëtarisht dhe ndërkombëtarisht. U bisedua edhe për hapat që duhet të ndërmarrë Maqedonia në drejtim të angazhimeve,që në Samitin e NATO-s, që do të organizohet në korrik, të kemi pritje më të mira”, ka theksua Ahmeti.

Ndërkohë, kryetari i Partisë Demokratike Shqiptare, Menduh Thaçi tha se është shprehur skeptik edhe para zotit Brian Yee se do të plotësohen kushtet për zgjedhje fer dhe demokratike, në afatin e caktur për mbajtjen e tyre më 5 qershor.

“U dakoduam bashkë se argumenti kryesor që ne i japim aleatit tonë kryesor, SHBA-së, që ata të lobojnë për Maqedoninë që të bëhet pjesë e NATO-s, janë zgjedhjet korrekte dhe demokratike, që tashmë duket se do të mbahen më 5 qershor. Nga ana ime u shpreh skepticizmi se ne nuk kemi lëvizur asgjë në drejtim të përmbushjes së kushteve për të pasur zgjedhje fer dhe demokratike”, ka deklaruar Thaçi .

Zëvendësndihmës sekretari amerikan i shtetit, Hoyt Brian Yee, gjatë ditës së premten pritet të takohet me kryeministin e Maqedonisë, Emil Dimitriev, si dhe me krerët e dy partive maqedonase, Nikolla Gruevskin nga partia në pushtet, VMRO-DMNE, dhe Zoran Zaev nga partia opozitare, Lidhja Social Demokrate e Maqedonisë.

Jahjaga- Senatorit amerikan Bob Corker: Kosova, një rrëfim i suksesit

February 16, 2016 by dgreca

-Presidentja Jahjaga priti Kryesuesin e Komitetit për Marrëdhënie me Jashtë të Senatit amerikan, Bob Corker/
PRISHTINË, 16 Shkurt 2016/ Presidentja e Republikës së Kosovës, Atifete Jahjaga priti sot në takim Kryesuesin e Komitetit për Marrëdhënie me Jashtë të Senatit Amerikan, Senatorin Bob Corker.
Presidentja Jahjaga dhe Senatori Corker diskutuan për zhvillimet aktuale në Kosovë dhe rajon, procesin e integrimit evropian dhe euroatlantik të Republikës së Kosovës, bashkëpunimin rajonal dhe thellimin e marrëdhënieve ndërmjet Kosovës dhe Shteteve të Bashkuara të Amerikës.
Presidentja Jahjaga falënderoi Senatorin Corker dhe Kongresin amerikan për mbështetjen e vazhdueshme për Kosovën, zhvillimin dhe të ardhmen e saj demokratike. Presidentja Jahjaga theksoi se Kosova po e konsolidon demokracinë e saj të brendshme dhe përfaqësimin e saj ndërkombëtar, dhe mbetet një faktor i paqes, stabilitetit dhe fqinjësisë së mirë me të gjitha vendet e rajonit.
Presidentja Jahjaga tha se Kosova është një rrëfim i suksesit të përbashkët të institucioneve dhe popullit të saj, si dhe bashkësisë ndërkombëtare, dhe vlerësoi përkushtimin e Shteteve të Bashkuara të Amerikës dhe Kongresit amerikan për Ballkanin dhe për procesin e integrimit euroatlantik të shteteve të këtij rajoni./b.j/

Vizita e Presidentes së Maltës, drejt thellimit të bashkëpunimit me Kosovën

February 16, 2016 by dgreca

-Presidentja e Maltës, Marie Louise Coleiro Preca, falënderoi të gjitha institucionet e Republikës së Kosovës për pritjen e ngrohtë që iu bë asaj dhe delegacionit gjatë qëndrimit në Prishtinë, prej nga udhëton për vizitën nesër në Tiranë/
PRISHTINË, 16 Shkurt 2016-B.Jashari/Presidentja e Republikës së Maltës, Marie Louise Coleiro Preca, sot në Prishtinë, vlerësoi progresin e arritur në Kosovë, duke shprehur përkrahjen e vendit të saj për proceset integruese evropiane.
E pritur në takim te Kryeministri Isa Mustafa, Presidentja Preca, po ashtu, theksoi vullnetin e shtetit të saj për thellimin e bashkëpunimit me Kosovën.
Kryeministri Mustafa e njoftoi për progresin në Kosovë dhe përkushtimin e qeverisë kosovare për zhvillimin e gjithanshëm të vendit.
Ai theksoi prioritetet e qeverisë për zhvillim ekonomik, hapje të vendeve të reja të punës, proceset integruese evropiane, si dhe fuqizimin e gjithanshëm të institucioneve demokratike.
Duke e falënderuar për përkrahjen e Maltës për Kosovën, kryeministri Mustafa shprehu përkushtimin e qeverisë për fuqizimin e marrëdhënieve ndërmjet dy vendeve, posaçërisht në zhvillimin ekonomik dhe fushën e investimeve.
Presidentja e Republikës së Maltës, Marie Louise Coleiro Preca, zhvilloi sot vizitë zyrtare shtetërore në Kosovë, ku fillimisht u prit nga Presidentja e Republikës, Atifete Jahjaga, si dhe kryetari i Kuvendit, Kadri Veseli.
Presidentja e Maltës falënderoi të gjitha institucionet e Republikës së Kosovës për pritjen e ngrohtë që iu bë asaj dhe delegacionit gjatë qëndrimit në Prishtinë, prej nga udhëton për vizitën nesër në Tiranë.

Kosova nis përgatitjet për Konferencën e Parisit

February 16, 2016 by dgreca

-Fokusi i konferencës së Parisit përveç projekteve infrastrukturore që tashmë janë dakorduar, do të jetë tek fuqizimi i rolit të rinisë në vendet e Ballkanit Perëndimor nëpërmjet programeve të ndryshme që do të financohen nga BE/
PRISHTINË, 16 Shkurt 2016/ Kosova nis përgatitjet për Konferencën e Parisit, bëhet e ditur pas takimit sot të ministrit të Integrimit Evropian, Bekim Çollaku, me ambasadoren e Francës në Prishtinë, Maryse Daviet.
Me ambasadorn Daviet, ministri Çollaku ka diskutuar për axhendën evropiane të Kosovës, duke u fokusuar në procesin e liberalizimit të vizave si dhe përgatitjet për fillimin e zbatimit të Marrëveshjes së Stabilizim Asociimit.
“Po ashtu temë qendrore e takimi ishte përgatitja që po bënë Kosova për pjesëmarrjen në Konferencën e Parisit këtë vit, si vazhdimësi e Procesit të Berlinit”, thekson njoftimi i dërguar.
Ministri Çollaku vlerësoi se Konferenca e Parisit do të jetë një mundësi e jashtëzakonshme për forcimin e bashkëpunimit rajonal përmes realizimit të projekteve të ndryshme përmes së cilave do të përfitojnë qytetarët e Kosovës dhe vendeve tjera të Ballkanit Perëndimor në kuadër të procesit të integrimit evropian.
“Fokusi i konferencës së Parisit përveç projekteve infrastrukturore që tashmë janë dakorduar, do të jetë tek fuqizimi i rolit të rinisë në vendet e Ballkanit Perëndimor nëpërmjet programeve të ndryshme që do të financohen nga BE”, u shpreh ai.
Procesi i Berlinit është nismë e kancelares së Gjermanisë, Angela Merkel, me qëllim të ofrimit të mbështetjes politike dhe financiare për shtetet e Ballkanit Perëndimor në procesin e integrimit evropian.
Procesi nisi me Konferencën e Berlinit në vitin 2014, për të vazhduar me Samitin e Vjenës që u mbajt në gusht të 2015 dhe këtë vit vijon me Konferencën e Parisit./b.j/

Kosova përmbush edhe një rekomandim për liberalizimin e vizave

February 12, 2016 by dgreca

-Zyra e BE-së në Kosovë/Përfaqësuesi Special i BE-së mirëpret marrëveshjen e sotme për objektin e ri për Institucionin e Avokatit të Popullit i cili u nënshkrua ndërmjet Institucionit të Avokatit të Popullit dhe qeverisë së Kosovës/
Nga Behlul Jashari/ PRISHTINË, 12 Shkurt 2016/ Është përmbushur edhe një rekomandim për liberalizimin e vizave për qytetarët e Kosovës, deklaroi sot Ministria e Integrimit Evropian, pas nënshkrimit të Memorandumit të Bashkëpunimit mes Ministrit të Administratës Publike, Mahir Yagcilar dhe Avokatit të Popullit Hilmi Jashari, lidhur me sigurimin e hapësirave të punës për Institucionin e Avokatit të Popullit.
Me këtë rast palët konsideruan se ky memorandum kontribuon pozitivisht në funksionimin e Institucionit të Avokatit të Popullit.
“Me nënshkrimin e këtij memorandumi u plotësua edhe një kusht për liberalizimin e vizave gjë që dëshmon përkushtimin e Republikës së Kosovës ndaj çështjes së mbrojtjes dhe promovimit të të drejtave të njeriut”, thekson deklarata.
Përmes memorandumit palët u dakorduan që hapësirat ekzistuese në ndërtesën e ish-Bankës së Lubjanës, në Prishtinë, do të ofrohen për akomodimin e Institucionit të Avokatit të Popullit.
Pas ceremonisë së nënshkrimit, ministri i Administratës Publike, Mahir Yagcilar, përfaqësuesi Special i BE-së në Kosovë, Samuel Zhbogar, avokati i popullit, Hilmi Jashari si dhe zëvendësministri i Integrimit Evropian Ramadan Ilazi, iu drejtuan mediave me nga një fjalë rasti.

Në një deklaratë , Zyra e BE-së në Kosovë/Përfaqësuesi Special i BE-së mirëpret marrëveshjen e sotme për objektin e ri për Institucionin e Avokatit të Popullit i cili u nënshkrua ndërmjet Institucionit të Avokatit të Popullit dhe qeverisë së Kosovës.

“Me këtë rast, falënderojmë Avokatin e Popullit Hilmi Jashari për qasjen e tij konstruktive në gjetjen e një zgjidhje për objektin, në përputhje me parimet e Parisit që përcaktojnë kriteret për lokacionin e institucioneve kombëtare për të drejtat e njeriut, siç është Institucioni i Avokatit të Popullit”, thuhet në deklaratën e Zyrës së BE-së/PSBE për Memorandumin e Bashkëpunimit në mes të Avokatit të Popullit dhe qeverisë së Kosovës.

Theksohet se, ky është një parakusht i rëndësishëm që Institucioni i Avokatit të Popullit të jetë në gjendje për të kryer rolin e tij kushtetues në mbrojtjen e të drejtave të njeriut dhe lirive të qytetarëve dhe institucioneve nga veprimet e paligjshme dhe të parregullta ose mosveprimet e autoriteteve publike.

“Zyra e BE-së në Kosovë/Përfaqësuesi Special i BE-së vlerëson gjithashtu përpjekjet e qeverisë për të zgjidhur këtë angazhim shumëvjeçar të Studimit të Fizibilitetit për Marrëveshjen e Stabilizim Asociimit, i cili është edhe një rekomandim për liberalizimin e vizave, dhe jep shpresë se rekomandimet e mbetura për liberalizimin e vizave do të përmbushen së shpejti”, përfundon deklarata.

****
Statement by EU Office/EUSR on the Memorandum of Cooperation signed between the Ombudsperson and the Government of Kosovo
“The EU Office in Kosovo/EU Special Representative welcomes today’s agreement on the new premises for the Ombudsperson signed between the Ombudsperson and the Government of Kosovo. On this occasion, we thank Ombudsperson Hilmi Jashari for his constructive approach in finding a solution for the premises, in accordance with the Paris principles that define the criteria for location of national human rights institutions such as the Ombudsperson.
This is an important precondition for the Ombudsperson to be able to carry out his constitutional role of protecting human rights and freedoms of citizens and institutions from unlawful and irregular actions or inactions of the public authorities.
The EU Office in Kosovo/EU Special Representative also appreciates the Government’s effort to resolve this long-standing Stabilisation and Association Agreement Feasibility Study commitment, which is also a visa liberalisation recommendation, and expresses hope that the remaining visa liberalisation recommendations will be met shortly.”