Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova i konsideron vlerë të veçantë raportet me Austrinë

by

-Kryeparlamentari Veseli priti në takim Presidentin e Austrisë, Heinz Fischer/
PRISHTINË, 28 Tetor 2015/ Kryetari i Kuvendit të Kosovës, Kadri Veseli, zhvilloi takim me Presidentin e Austrisë, Heinz Fischer. Në takim u bisedua në radhë të parë për marrëdhëniet bilaterale të cilat ekzistojnë në mes dy vendeve.
Presidenti Fischer, duke folur për këtë, theksoi se “edhe pse në politikë gjithmonë ka hapësirë për t’u shprehur i pakënaqur me rrjedhën e gjërave, kur është fjala për raportet në mes Austrisë dhe Kosovës, mund të themi se këto raporte janë shumë të mira, të kënaqshme dhe në zgjerim e sipër, përfshirë edhe fushën e ekonomisë”, për të shtuar se “tregues i kësaj është edhe forumi ekonomik i dy vendeve që po zhvillohet aktualisht në Kosovë, e ku janë të pranishme mbi 20 biznese të fuqishme austriake”.Duke folur për raportet e Kosovës me Bashkimin Evropian, presidenti austriak përgëzoi institucionet e Kosovës për nënshkrimin e Marrëveshjes për Stabilizim – Asociim me BE-në, për të theksuar se tash përpara është procesi i liberalizimit të vizave për qytetarët e Kosovës.
“Vendet e Ballkanit perëndimor janë pjesë e Evropës dhe Bashkimi Evropian ka nevojë për këto vende”, theksoi presidenti Fischer.
Nga ana e tij kryetari i Kuvendit të Kosovës, Kadri Veseli, duke falënderuar presidentin austriak për vizitën e tij që po zhvillon në Kosovë, u shpreh se “Republika e Kosovës i konsideron si vlerë të veçantë raportet shumë të mira që kemi ndërtuar me Republikën e Austrisë dhe në këtë kontekst, interesimi i kompanive austriake për ekonominë kosovare përbën një ngjarje me rëndësi kapitale për Kosovën”.
Më tutje Veseli theksoi se raportet e Kosovës me Austrinë janë raporte të shumëfishta miqësore, që padyshim kanë një impakt pozitiv në rrugën e Kosovës drejt integrimeve euro-atlantike.
Duke folur për gjendjen aktuale të krijuar në Kuvendin e Kosovës, presidenti Fischer theksoi se, “ne në Austri, sidomos në përvojën shumë të mirë të Republikës së Dytë, pas Luftës së Dytë Botërore, besojmë se problemet dhe çështjet, edhe kur janë të dhimbshme, duhet të trajtohen e zgjidhen në mënyrë paqësore dhe demokratike”.
Nga ana e tij kryetari Veseli theksoi se, “ajo çfarë është duke ndodhur, është një situatë e vështirë e mosmarrëveshjeve në mes partive politike në pushtet e opozitë dhe insistimi i tij i vazhdueshëm është që kjo situatë të tejkalohet vetëm dhe vetëm përmes procedurave demokratike, dialogut dhe konsensusit”.
Në fund të takimit presidenti Fischer falënderoi kryetarin Veseli dhe Kuvendin e Kosovës për mundësinë që nesër tu drejtohet, me një fjalim, përfaqësuesve të zgjedhur të popullit të Kosovës./b.j/

Shqipëria mbështetje të plotë Kosovës

by

-Kryeparlamentari Veseli takon ambasadorin e Shqipërisë, Minxhozi-/
PRISHTINË, 28 Tetor 2015 B.Jashari/.-Kryetari i Kuvendit të Republikës së Kosovës, Kadri Veseli, sot takoi ambasadorin e Republikës së Shqipërisë në Republikën e Kosovës, Qemal Minxhozi.
Në takim, Kryekuvendari dhe Ambasadori diskutuan për zhvillimet aktuale në Kosovë dhe rajon, me theks të veçantë, në zhvillimet e fundit dhe punën e Kuvendit të Kosovës.
Veseli theksoi se qytetarët e Kosovës dhe bashkësia ndërkombëtare presin nga të gjithë ne,në mënyrën më të përgjegjshme institucionale, të shtyjmë përpara proceset në të cilat gjendet Kosova, me qëllim të ngritjes së mirëqenies së qytetarëve dhe respektimin e shtetit ligjor.
“Marrëveshja e Stabilizim-Asociimit është etapë e re zhvillimore për vendin tonë, ndërsa procesi i euro-integrimeve vijon të përcillet me përkushtim nga të gjitha nivelet institucionale”, theksoi kryetari Kuvendit kosovar, Veseli.
Ambasadori Minxhozi përgëzoi kryekuvendarin Veseli për nënshkrimin e marrëveshjes së MSA-së, duke vënë theksin në vijimin e angazhimit për liberalizimin e vizave dhe realizimin e procesit eurointegrues, duke ofruar mbështetjen e plotë të Shqipërisë në këto procese.

Presidenti i Austrisë mbërrin në Kosovë, pritet me ceremoni shtetërore

by

-Presidenti Fischer është presidenti i parë austriak që viziton Kosovën që nga shpallja e pavarësisë dhe ai erdhi sot bashkë me një delegacion të gjerë të përfaqësuesve të bizneseve austriake/
Nga Behlul Jashari/ PRISHTINË, 28 Tetor 2015/ Presidenti i Republikës së Austrisë, Heinz Fischer, sot pas mesditës, u prit me ceremoni shtetërore në vizitën dyditore në Kosovë, me ftesë të presidentes së Republikës, Atifete Jahjaga. Më pas, sipas axhendës, nisi takimi i presidentes Jahjaga me presidentin Fischer.
“Kam nderin që t’i uroj mirëseardhje në Kosovë presidentit të Austrisë, Heinz Fischer, një përkrahës i fuqishëm i Republikës së Kosovës dhe përparimit të saj”, është shprehur Jahjaga.
Presidenti Fischer është presidenti i parë austriak që viziton Kosovën që nga shpallja e pavarësisë dhe ai erdhi sot bashkë me një delegacion të gjerë të përfaqësuesve të bizneseve austriake.
“Vizita e presidentit Fischer është dëshmi e marrëdhënieve të shkëlqyera ndërmjet dy vendeve dhe mundësi për të thelluar bashkëpunimin ekonomik dhe tregtar”, vlerëson presidentja kosovare.
“Austria është pjesë e pandashme e bashkësisë ndërkombëtare, që ndan suksesin e Kosovës së re së bashku me popullin dhe institucionet e saj”, theksonte presidentja kosovare në shënimin e 60 vjetorit të pavarësisë dhe të deklarimit të neutralitetit të përhershëm të Republikës së Austrisë, në mbrëmjen e 26 tetorit në Prishtinë.
“Austria ka qëndruar afër nesh për të na ndihmuar në rrugëtimin jo aq të lehtë të ndërtimit të paqes”, theksonte presidentja e Kosovës.
Ajo shtonte se, Austria është pjesë e pandashme e historisë më të re të Kosovës, e përfshirë në dhënien fund të dhunës dhe luftës, në ndërtimin e një Kosove më ndryshe, më gjithëpërfshirëse, më demokratike, më të përparuar – një shtet i ndërtuar mbi parimin e drejtësisë.
“Ju keni qenë shembull jo vetëm i mikpritjes, në kohë paqeje, gjatë bisedimeve për statusin e Kosovës, të përpjekjeve për ta bërë Kosovën të mëvetësishme, demokratike dhe përgjegjëse për fuqizimin dhe avancimin e të drejtave për të gjithë qytetarët e saj”, shprehej Jahjaga duke uruar ambasadorin e Austrisë në Kosovë, Johann Brieger.
Sipas axhendës zyrtare, në vazhdim të vizitës sot pasdite presidentin e Austrisë Fischer e pret në takim edhe kryetari i Kuvendit të Kosovës, Kadri Veseli.
Të enjten, presidenti i Austrisë, Heinz Fischer takohet me kryeministrin e Republikës së Kosovës, Isa Mustafa.
Në vazhdim të axhendës, presidentja Jahjaga dhe presidenti Fischer marrin pjesë në Forumin Ekonomik Kosovar-Austriak në Prishtinë dhe vizitojnë Prizrenin, Kishën Katolike dhe Xhamia e Sinan Pashës në qytetin më të madh jugor të Kosovës.

PSE U SULMUA AMBASADA SHQIPTARE NE MAL TE ZI?

by

Tirana zyrtare dënon sulmin-Deklarata e Ministrise se Jashtme te Republikes se Shqiperise/
Është sulmuar me gurë mbrëmjen e së shtunës Ambasada e Republikës së Shqipërisë në Malin e Zi. Lajmi është bërë i ditur në profilin në Twitter të qeverisë malazeze, në të cilin thuhet se nga sulmi ka pasur vetëm dëme të vogla në fasadën godinës.
Sipas të njëjtit burim, sulmi është bërë nga një grup personash që mbanin flamuj të Serbisë dhe bërtisnin slogane, të cilat sipas mediave malazeze ishin antietnike.
Policia malazeze ka marrë menjëherë në mbrojtje ndërtesën e selisë diplomatike shqiptare, e cila bëhet objekt sulmesh për herë të dytë brenda një kohe të shkurtër.
Po c’patën malazeztë me Ambasadën Shqiptare në Mal të Zi? Gurët, ndoshta nuk do të jenë nga Podgorica, por ka gjasa i ka hedhë Moska ose Beogradi.

Tirana zyrtare dënon sulmin

Ministria e Punëve të Jashtme të Shqipërisë ka reaguar ndaj sulmit të verifikuar mbrëmjen e së shtunës ndaj ambasadës shqiptare në Podgoricë. “MPJ dënon sulmin e sotëm ndaj Ambasadës së Republikës së Shqipërisë në Podgoricë nga demonstrues huliganë”, thuhët në një reagim për mediat. Dikasteri numër një i diplomacisë shqiptare i bën thirrje autoriteteve të Malit të Zi që të marrin të gjitha masat e nevojshme për mbrojtjen e godinës së ambasadës.
“Kjo, për të siguruar aktivitetin e saj normal dhe integritetin e personelit, si dhe për të nxjerrjë përgjegjësit e këtij sulmi para drejtësisë”, vijon njoftimi.
Ministria e Jashtme nënvizon më tej se Shqipëria do të vijojë të mbështesë kursin euro-atlantik të rajonit. “Përkushtimi ndaj vlerave euro-atlanike është i panegociueshëm dhe nuk do të frenohet nga grupe huliganësh, idetë e të cilëve kërcënojnë integrimin e mëtejshëm të rajonit tonë”, vijon njoftimi. Në të saktësohet më tej se shefi i diplomacisë shqiptare, Ditmir Bushati është në kontakt të vazhdueshëm me homologun e tij malazez,Igor Lukshiç.

Kosova lidhë autostradat drejt Shqipërisë e Maqedonisë

by

-Mustafa: Ky udhëkryq këtu konsiderohet si më i madhi në këtë rajon, që lidh Shqipërinë, Kosovën, Maqedoninë. Na lidh me Prizrenin, Shkupin, Tiranën dhe vendet tjera të Ballkanit Perëndimor./
Nga Prishtina Behlul Jashari/ PRISHTINË, 25 Tetor 2015/ Kosova lidh autostradën drejt Shqipërisë me atë në ndërtim drejt Maqedonisë, dy projektet më të mëdha të infrastrukturës kosovare të rëndësishme edhe për gjithë rajonin. Sapo u mbajt sot ceremonia inauguruese e hapjes së nyjës lidhëse të Rrugës 6 “Arbën Xhaferi” me Rrugën 7 “ Ibrahim Rugova”. Në ceremoni folën kryeministri Isa Mustafa, kryeparlamentari Kadri Veseli, ambasadori i Shteteve të Bashkuara të Amerikës në Kosovë, Greg Delawie, ambasadorja e Turqisë, Kivilcim Kiliç, zëvendëskryeministri e ministri i Jashtëm Hashim Thaçi dhe ministri i Infrastrukturës, Lutfi Zharku. Të gjithë së bashku, pak më parë, prenë shiritin e inaugurimit.
Kryeministri Isa Mustafa, në fjalën e tij para të pranishmëve, ka vlerësuar se kjo autostradë është vepër e madhe dhe e rëndësishme për zhvillimin ekonomik të vendit.
Kryeministri Mustafa po ashtu tha se ky është një projekt i cili ia mundëson Kosovës që të arrijë standardet e shteteve të Bashkimit Evropian, në infrastrukturën rrugore.
“Sot po përurojmë kyçjen e autostradës “Ibrahim Rugova” me autostradën “Arbër Xhaferi”, që është një vepër e madhe për ne dhe tepër e rëndësishme. Ky udhëkryq këtu konsiderohet si më i madhi në këtë rajon, që lidh Shqipërinë, Kosovën, Maqedoninë. Na lidh me Prizrenin, Shkupin, Tiranën dhe vendet tjera të Ballkanit Perëndimor. Ajo që na gëzon është se janë punë shumë cilësore të cilat po bëhen”, tha kryeministri Isa Mustafa.
Duke bërë të ditur se ky është një projekt i cili Buxhetit të Kosovës i kushton rreth 600 milionë euro, kryeministri po ashtu tha se kjo është një vepër tepër e rëndësishme për Kosovën, sepse do të përfitojnë qytetarët, do të përfitoj ekonomia dhe do të përfitojnë lidhjet e Kosovës me shtetet fqinje dhe miqtë e saj.
“Ky është edhe një projekt i cili na mundëson që ne të arrijmë kompleksin e projekteve që po i realizojmë bashkë me vendet tjera të Ballkanit Perëndimor, me të cilat po bëjmë përpjekje që të arrijmë standardet që kanë shtetet e BE-së. Ne kemi arritur një marrëveshje të rëndësishme me FMN-në, e cila do të na mundësojë që ne të ndërtojmë edhe rrugë të tjera të rëndësishme për vendin. Këtë autostradë do ta lidhim edhe me autostradën për Gjilan, do të vazhdojmë deri në Podujevë me autostradën “Ibrahim Rugova” dhe do të bëjmë lidhjen për Nish. Do të zgjerojmë rrugën për Mitrovicë dhe do të arrijmë në Mitrovicë me autostradë, e po ashtu do të rikonstruktojmë linjën hekurudhore që na lidh nga Hani e Elezit deri në Leshak”, tha kryeministri Isa Mustafa, duke shtuar se këto rezultate dhe suksese të mëdha do të jenë në shërbim të qytetarëve tanë, rajonit dhe miqve të Kosovës.
Në Kosovë, në 3 korrik 2014 është organizuar ceremonia me rastin e fillimit të ndërtimit të autostradës drejt Maqedonisë, Prishtinë-Ferizaj-Kaçanik-Hani i Elezit. Kryeministri i atëhershëm i Kosovës, Hashim Thaçi në një ceremoni të organizuar nga qeveria kosovare ka bërë përurimin e nisjes së punimeve për autostradën që është emërtuar me emrin e intelektualit dhe veprimtarit shqiptar nga Maqedonia Arbën Xhaferi.
Në shtator paralajmërohej edhe fillimi i punimeve në autostradën nga Shkupi drejt Kosovës.
Gjatë vitit 2016 pritet fillimi i ndërtimit të autostradës Shkup-Bllacë (kufiri me Kosovën), me qëllim të plotësimit të autostradës “Arbën Xhaferi” në pjesën maqedonase.
Zv/ministri i Transportit dhe Lidhjeve të Maqedonisë, Nimetullah Halimi i deklaronte RTK-së se gjatë muajit do përfundonte projekti i fizibilitetit për ndërtimin e këtij aksi nga firma projektuese.
“Është nënshkruar kontratë ndërmjet Kornizës Investuese për Ballkanin Perendimor (ËBIF) për projektimin e kësaj rruge. Është bërë edhe zhvendosja e nyjes në Stenkovec.
Projektimi i ri ka paraparë edhe përcaktimin e saktë të pikës kufitare Bllacë-Hani Elezit, përmes së cilës do të lidhet autostrada Shkup-Prishtinë”, paralajmëronte Halimi.
Autostrada Prishtinë-Hani i Elezit është e gjatë rreth 60 kilometra, e një pjesë e saj, pas inaugurimit sot, të hënën do të lëshohet në qarkullim për qytetarët.