Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVA KULTIVON ME SHUMË RESPEKT TRADITËN E TOLERANCËS NDËRFETARE DHE NDËRKULTURORE

by

-Festohet Bajrami, mesazhe kundër çdo ekstremizmi dhe terrorizmi në emër të fesë/
Nga: Behlul Jashari/ PRISHTINË, 17 Korrik 2015/- Në Kosovë festohet Bajrami i Madh, drejtuesit institucionalë e politikë të shtetit më të ri evropian në mesazhet e tyre kanë uruar paqe, solidaritet dhe mirëkuptim me njëri-tjetrin, duke theksuar vlerat e tolerancës ndërfetare dhe ndërkulturore.
“Të punojmë çdo ditë, me shumë përkushtim, për ndërtimin e të ardhmes më të mirë për vendin tonë, si pjesë e familjes së madhe evropiane, duke kultivuar me shumë respekt traditën e tolerancës ndërfetare dhe ndërkulturore si vlerat me të çmuara të shoqërisë sonë”, theksohet në Kosovë, në mesazhet e urimit në festën e Bajramit të Madh.

BASHKË PËR VLERAT NË INTERES TË NJERËZIMIT DHE PAQES
Kryeministri i Republikës së Kosovës, Isa Mustafa, me rastin e Fitër – Bajramit, vizitoi sot Bashkësinë Islame të Kosovës, ku u prit nga myftiu i Kosovës, Naim Tërnava.
Duke uruar myftiun Tërnava dhe të gjithë besimtarët myslimanë të Kosovës, kryeministri Mustafa, theksoi se Festa e Bajramit është një ditë e cila i bashkon të gjithë besimtarët dhe përkujton se duhet të zhvillohet solidariteti, toleranca e të punohet bashkërisht për të mirën e njerëzimit.
“Ne erdhëm sot të vizitojmë Bashkësinë Islame, t’i urojmë myftiut dhe të gjithë bashkëpunëtorëve të tij, por edhe të gjithë besimtarëve islamë Ditën e Bajramit. Një ditë që është shumë e rëndësishme për ne të gjithë, sepse është një ditë e cila na bashkon edhe në familje, na bashkon edhe me miqtë, na bashkon edhe me të gjithë të tjerët që nuk kemi mundësi që t’i shohim dhe t’i vizitojmë shpesh, por edhe na përkujton me faktin se ne duhet të zhvillojmë solidaritetin, duhet të zhvillojmë tolerancën, duhet të punojmë bashkërisht për të mirën e njerëzimit”, tha kryeministri Mustafa.
Duke vlerësuar punën që Bashkësia Islame po bën në edukimin e popullatës dhe në aktivitetin e përditshëm për të zhvilluar paqen e mirëkuptimin, jo vetëm në Kosovë por në tërë botën, kryeministri kosovar Mustafa theksoi përkushtimin që të punohet bashkërisht për thellimin e këtyre vlera dhe që të punohet në interes të njerëzimit dhe në interes të paqes.
Gjatë vizitës në Bashkësinë Islame të Kosovës, bashkë me kryeministrin Isa Mustafa, ishin edhe zëvendëskryeministri i parë, njëherësh ministri i Jashtëm, Hashim Thaçi, ministri i Mjedisit dhe Planifikimit Hapësinor, Ferid Agani, ministri i Forcës së Sigurisë së Kosovës, Haki Demolli dhe ministri i Financave, Avdullah Hoti.

OBLIGIM I SHENJTË TA RUAJMË VATANIN TONË SI SYTË E BALLIT, E KEMI AMANET ATDHETAR E FETAR

Mesazhi i Bashkësisë Islame të Kosovës kundër çdo ekstremizmi dhe terrorizmi në emër të fesë është shprehur edhe sot në festën e Fitër Bajramit, për të cilën u janë drejtuar urime të gjithë shqiptarëve kudo që janë, besimtarëve myslimanë.
Në faljen në Xhaminë e Madhe në Prishtinë, kryetari i Bashkësisë Islame të Kosovës, myftiu Naim Tërnava u shpreh se, “nuk ka asgjë më me rëndësi në një shoqëri sesa përkushtimi i të gjithëve për siguri, paqe, harmoni, mirëbesim, respekt e nderim ndaj njëri-tjetrit”.
“Duhet të tregohemi shumë syçelë ndaj asaj që po ndodhë sot nëpër disa shtete nëpër botë, si luftë, terror e vrasje, në mënyrë që kjo të mos reflektohet edhe në vendin tonë”, vijoi ai.
“E kemi obligim të shenjtë ta ruajmë vatanin tonë si sytë e ballit, ngase këte e kemi amanet atdhetar e fetar. Nuk guxojmë me asnjë çmim të lejojmë që dikush t’i bëj keq vendit tonë, duke futur pasiguri, mosbesim e vëllavrasje mes nesh”, theksoi myftiu i Kosovës.
“Nga ky vend i bekuar, me tërë fuqinë e zemrës, shpirtit dhe të fjalëve tona, rikonfirmojmë edhe një herë përkushtimin e Bashkësisë Islame të Republikës së Kosovës dhe të besimtarëve myslimanë se jemi kundër çdo ekstremizmi të çfarëdo ngjyrimi fetar qoftë dhe kundër terrorizmit në emër të fesë”, tha kryetari i Bashkësisë Islame të Kosovës, Tërnava.
“Vetëm të bashkuar e unikë në qëllimet tona për mbrojtjen e atdheut tonë do të pengojmë me kohë çdo përpjekje për destabilizimin e shoqërisë sonë nga kushdoqoftë. Siguria, mirëqenja dhe interesi i vatanit do të jetë mbi interesat tona, se përndryshe nuk e kemi kryer amanetin e marrë nga i madhi Zot”, tha myftiu i Kosovës, Tërnava.
Ai u lut “për një Kosovë të sigurt, që Zoti ta ruajë prej kriminelëve, terroristëve dhe prej të gjithë atyre që dëshirojnë t’u bëjnë keq trojeve etnike shqiptare”.
Në Xhaminë e Madhe në Prishtinë manifestimi qendror për festën e Fitër Bajramit për Republikën e Kosovës filloi herët në mëngjes me faljen e namazit të sabahut.
Faljes së namazit të Fitër Bajramit i priu kryeimami i Kosovës, Sabri Bajgora.
Hytben e Fitrër Bajramit e mbajti myftiu i Kosovës, Naim Tërnava, i cili edhe iu drejtua opinionit me mesazhin e festës.
Me rastin e festës së Fitër – Bajramit, sot gjatë paraditësa organizohet edhe pritja tradicionale e përurimit në selinë e Kryesisë së Bashkësisë Islame të Kosovës, në Prishtinë.

JAHJAGA NE LONDER:KOSOVA BESON NË PARIMIN E DREJTËSISË PËR TË GJITHË

by

Nga Behlul Jashari/ PRISHTINË, 16 Korrik 2015 – Presidentja e Republikës së Kosovës, Atifete Jahjaga, u takua sot në Londër me sekretarin e jashtëm britanik, Philip Hammond, me të cilin bisedoi për sfidat e vendit në fushën e sundimit të ligjit dhe të rendit, përballjen me kërcënimet ekstremiste, rrugën evropiane të Kosovës dhe zhvillimin ekonomik të saj, përmes tërheqjes së investitorëve të huaj.
Presidentja Jahjaga theksoi rëndësinë e thellimit të bashkëpunimit me Britaninë e Madhe, që e ka ndihmuar Kosovën në procesin e ndërtimit të paqes dhe të shtetësisë së saj. Ajo tha se Kosova është e përkushtuar që të ndërtojë një shoqëri demokratike e gjithëpërfshirëse dhe të luajë një rol të rëndësishëm në ruajtjen e paqes dhe stabilitetit në rajonin e Ballkanit. Ajo tha se sundimi i ligjit dhe rendit dhe ndërtimi i një shtetit të së drejtës janë përparësi të shoqërisë në vend.
Presidentja Jahjaga tha se qytetarët e Kosovës dhe institucionet e saj besojnë në parimin e drejtësisë për të gjithë dhe se shpreson se institucionet e vendit do të gjejnë së shpejti mundësinë për të përmbushur obligimet ndërkombëtare duke votuar për krijimin e Gjykatës Speciale, që do të adresojë akuzat e ngritura nga raporti i Këshillit të Evropës, duke shmangur një hap që do të mund të ndërmerrej nga Këshilli i Sigurimit i OKB-së.
Duke folur për procesin e dialogut me Republikën e Serbisë, presidentja Jahjaga theksoi se institucionet e vendit janë të përkushtuara për dialogun, por ritheksojnë rëndësinë e zbatimit të plotë të gjitha marrëveshjeve të arritura dhe kushtëzimit të rrugës evropiane të Serbisë me zbatimin e tyre. Ajo tha se Serbia po vazhdon të mbështesë strukturat ilegale të sigurisë në Kosovë, të cilat sipas marrëveshjeve do të duhej të shpërbëheshin.
JAHJAGA: PROCESIN E DIALOGUT DUHET PASUR KUJDES QË TË MOS LEJOHET NDARJA NE VIJA ETNIKE, QË TË MOS KRIJOHET NJË PUSHTET I TRETË OSE NJË SHTRIRJE E INSTITUCIONEVE TË SERBISË NË KOSOVË
Ajo tha se në procesin e dialogut duhet pasur kujdes që të mos lejohet ndarja ne vija etnike, që të mos krijohet një pushtet i tretë në vend ose një shtrirje e institucioneve të Serbisë në Kosovë. Ajo tha se dialogu duhet të ndihmojë në zgjidhjen e çështjeve dhe të relaksojë marrëdhëniet ndërmjet dy shteteve, që do të lehtësojë edhe jetën e qytetarëve por do të hap rrugën edhe të integrimeve evropiane për të dyja vendet.
Presidentja Jahjaga theksoi se rruga evropiane e Kosovës, sikundër edhe i gjithë rajonit të Ballkanit, duhet të jetë e qartë dhe e sigurt, për të mos lejuar ndikime të tjera të jashtme dhe theksoi se Kosova duhet të trajtohet në mënyrë të barabartë dhe njëlloj me shtetet e tjera të Ballkanit në procesin e integrimeve evropiane.
BRITANIA E MADHE MBËSHTET DIALOGUN NDËRMJET KOSOVËS DHE SERBISË DHE GJITHASHTU EDHE PROCESET INTEGRUESE NË BE TË GJITHË RAJONIT TË BALLKANIT
Sekretari i jashtëm britanik, Philip Hammond, shprehu mbështetjen e qeverisë së Britanisë së Madhe për Kosovën në ndërtimin e një shteti demokratik e gjithëpërfshirës dhe një shteti të së drejtës, me përkushtimin për sundimin e ligjit dhe të rendit dhe në luftën kundër korrupsionit. Ai tha Kosova duhet të bëjë çmos për të përmbushur obligimet e saj ndërkombëtare dhe të themelojë Gjykatën Speciale, për të shmangur proceset në organizata të tjera ndërkombëtare. Sekretari Hammond tha se Britania e Madhe mbështet dialogun ndërmjet Kosovës dhe Serbisë dhe gjithashtu edhe proceset integruese në BE të gjithë rajonit të Ballkanit, thekson njoftimi i dërguar nga Presidenca Kosovare.
MINISTRJA E SHTETIT NË MINISTRINË E PUNËVE TË JASHTME TË MBRETËRISË SË BASHKUAR, BARONESHA JOYCE ANELAY VIZITON KOSOVËN
Ministrja e Shtetit në Ministrinë e Punëve të Jashtme të MB dhe Përfaqësuesja Speciale e Kryeministrit për Parandalimin e Dhunës Seksuale në Konflikt, Baronesha Anelay do të vizitojw Kosovën më datën 20 deri më 22 Korrik. Gjatë qëndrimit të saj në Kosovë, Baronesha do të takohet me zyrtarë të lartë qeveritarë duke përfshirë Presidenten Atifete Jahjaga, Kryeministrin Isa Mustafa dhe përfaqësues të shoqërisë civile për të diskutuar përpjekjet që po i bën Kosova në adresimin e çështjeve të dhunës seksuale në konflikt, marrëdhëniet bilaterale si dhe zhvillimet e fundit në Kosovë.
Këtë e bëri të ditur sot Ambasada e Mbretërisë së Bashkuar në Kosovë në njoftimin e sapodërgua

KOSOVA RISHIKON BUXHETIN E SHTETIT 2015, RËNDËSI E VEÇANTË MARRËVESHJES ME FMN-në

by

-Kuvendi i Kosovës, kërkohet raportim për bisedimet Prishtinë-Beograd në Bruksel/
Nga Behlul Jashari/ PRISHTINË, 16 Korrik 2015 – Shqyrtimi i dytë i projektligjit për ndryshimin dhe plotësimin e Ligjit për Buxhetin e Republikës së Kosovës për vitin 2015, me procedurë të përshpejtuar, është një nga 10 pikat e axhendës së seancës së sotme plenare të Kuvendit kosovar. Ligji sapo u miratua me shumicë votash. “ Kanë votuar 63 deputetë pro, 4 kundër dhe 1 ka abstenuar. Kuvendi miratoi Ligjin për ndryshimin dhe plotësimin e Ligjit për Buxhetin e Republikës së Kosovës për vitin 2015”, konstatoi pak më parë kryesuesi i seancës, nënkryetari Sabri Hamiti.
Miratimi në parim u bë javën e kaluar, në 10 korrik, në vazhdimin e seancës plenare të Kuvendit të Kosovës pas debatit të një dite më parë, ndërkohë, si u theksua dje në mbledhjen e qeverisë, projektligji ka kaluar diskutimet në komisionet parlamentare me ndryshime të vogla.
Komisioni Parlamentar për Buxhet nuk ka propozuar amendamente që e ndryshojnë strukturën e Buxhetit dhe që do të rezultonin nevojën që të rikonsiderohet edhe njëherë.
Në prezantimin e projektligjit nga qeveria i është dhënë një rëndësi e veçantë marrëveshjes me FMN-në, ruajtjes së fondeve për investime dhe uljes së shpenzimeve në mallra dhe shërbime.
Në seancën plenare të shqyrtimit të parë, Komisioni Parlamentar për Buxhet u deklarua për shqyrtimin e dytë të projektligjit në 16 korrik pasi në 24 korrik Bordi i FMN-së në Uashington do të diskutojë marrëveshjen me Kosovën.
Miratimi sot në Kuvendin e Kosovës i Projektligjit për ndryshimin dhe plotësimin e Ligjit për Buxhetin do t’i hapë rrugë rishikimit të Buxhetit të Shtetit për këtë vit, ndërsa sipas paralajmërimeve të qeverisë shpenzimet e parashikuara do të jenë më të ulëta për 49 milionë euro. Rishikimi i Buxhetit është bërë në harmoni të plotë edhe me marrëveshjet e arritura me Fondin Monetar Ndërkombëtar, ka theksuar qeveria.
Buxheti i Kosovës 2015 me të hyra të planifikuara 1 miliard e 576 milionë euro, me një rritje prej rreth 8.1% krahasuar me vitin 2014, është miratuar në 29 dhjetor nga Kuvendi i zgjedhjeve të 8 qershorit, i konstituar pas gjashtë muajsh.
Seanca e sotme e Kuvendit ka në axhendë edhe kohën për deklarime jashtë rendit të ditës dhe për pyetje parlamentare, zgjedhjen e Auditorit të Përgjithshëm të Republikës së Kosovës, shqyrtimin e parë të Projektligjit për Sigurimet, shqyrtimin e dytë të Projektligjit për Tatimin mbi Vlerën e Shtuar, shqyrtimin e dytë të Projektligjit për Tatimin në të Ardhurat e Korporatave dhe shqyrtimin e dytë të Projektligjit për Tatimin në të Ardhurat Personale.
Pika e fundit e axhendës është kërkesa e deputetes Albulena Haxhiu (e Lëvizjes Vetëvendosje), e mbështetur nga 5 deputetë nënshkrues për debat parlamentar lidhur me veprimtarinë e misionit të BE-së në Republikën e Kosovës.
PYETJE NË SEANCËN E KUVENDIT: KUSH MUND TË NA GARANTOJË SE BRENDA KOSOVËS NUK DO TA KEMI NJË “REPUBLIKA SRPSKA”?
Në seancën plenare të Kuvendit të Kosovës, të nisur sot me deklarime jashtë rendit të ditës, u kërkua raportim për bisedimet Prishtinë-Beograd në Bruksel.
“Kërkojmë nga kryeministri dhe ekipi negociator që të jenë transparentë për të gjitha vendimet të cilat i marrin në këto bisedime”, tha deputetja Valdete Bajrami, nga grupi parlamentar i Nisma për Kosovën.
“Duhet të raportonit këtu në Kuvend se si shkuan këto bisedime dhe çfarë vendimesh keni marrë”, vijoi ajo duke kërkuar që “me asociacionin-bashkësinë e komunave serbe të mos lejohet krijimi i një minishteti brenda Kosovës në veri”.
“Kush nga ju mund të na garantojë se brenda Kosovës nuk do ta kemi një ‘Republika Srpska’?”, ishte pyetja e deputetes Bajrami.
Sipas saj, “krijimi i kësaj bashkësie do të jetë jashtë rendit kushtetues të Kosovës dhe pikërisht do të jetë Beogradi që do të vendosë për ato komuna”.
“Pra, ky asociacion neve nuk do në na mundësojë që të kemi qasje në atë pjesë të vendit, sepse rendi dhe ligji do të funksionojë nën kompetenca të Beogradit dhe llogaria do t’i jepet vetëm Beogradit”, ka shprehur opinionin e saj deputetja Bajrami.
Gjatë këtij deklarimi kryeministri i Kosovës, Isa Mustafa nuk ishte në seancë, ndërsa në 8 Korrik në mbledhjen e qeverisë ka thënë se në dialogun me Serbinë në Bruksel “temat të cilat tani i kemi në rend të ditës nuk janë shumë të lehta, janë tema që kërkojnë vëmendje të veçantë, sepse janë zgjidhje specifike të cilat ne nuk i kemi pasur deri më tani në Kosovë”.
“Në katër tema që i kemi tash në shqyrtim, mund të them se ne e kemi përfunduar praktikisht marrëveshjen për kodin telefonik. Marrëveshja është e gatshme, nuk është nënshkruar”, ka shtuar ai.
“Kemi përafruar qëndrimet sa i përket Asociacionit të Komunave, jo të Statutit, por vetëm të parimeve themelore, mirëpo kanë mbetur disa çështje të cilat duhet të diskutohen dhe të sqarohen edhe më tutje, në mënyrë që çdo gjë që merremi vesh atje të jetë e zbatueshme dhe të jetë e aplikueshme”, ka theksuar Mustafa.
“Janë diskutuar, por nuk janë përfunduar edhe çështjet e marrëveshjes për energjinë dhe lidhur me Urën mbi Ibër që kanë mbetur që të diskutohen në vijim”, ka vijuar ai.
“Ne kemi prezantuar qëndrimin tonë, që jemi për atë që të bëjmë përpjekje që këto katër marrëveshje t’i përfundojmë, dhe që si pako t’i realizojmë, natyrisht duke e nënshkruar secilën veç e veç, sepse e konsiderojmë që në to është punuar gjatë, në disa prej tyre mbi dy vite, si në marrëveshjen për kod telefonik dhe atë për energji dhe se mundemi që ato përnjëherë t’i pranojmë dhe t’i aprovojmë, natyrisht pas një dialogu i cili është përmbajtjesor dhe kemi një angazhim shumë të madh të ekipit tonë”, ka thënë kryeministri kosovar Mustafa në mbledhjen e qeverisë pas kthimit nga Brukseli.
Në 30 qershor njoftohej se, nuk është arritur asnjë marrëveshje finale në bisedimet Kosovë-Serbi në Bruksel të raundit të 27-të në nivel të lartë kryeministror, të nisura një ditë më parë në mëngjes, e të përfunduara pas mesnate.(Foto-Arkiv)

Kryeministri Rama takon Ministrin e Jashtëm të Greqisë, Nikos Kotzias

by

TIRANË, 15 Korrik/ Nga Gjergji Mima/ – Ministri i Punëve të Jashtme të Greqisë, Nikos Kotzias po zhvillon sot një vizitë zyrtare në Tiranë.
Pas takimit me Ministrin e Punëve të Jashtme, Ditmir Bushati, ministri grek Kotzias ka zhvilluar një takim me Kryeministrin Edi Rama.
“Sot në Sallën e Hartave me Ministrin e Jashtëm të Greqisë, Nikos Kotzias”, shkruan Kryeministri Rama në një postim në rrjetin social “Facebook”, ku ka publikuar edhe një foto nga takimi.
Kryediplomati grek do të takohet më pas me Kryetarin e Kuvendit, Ilir Meta, me Presidentin e Republikës, Bujar Nishani për ta përmbyllur axhendën me takimin me kryetarin e Partisë Demokratike, Lulzim Basha.

Ministri grek ne Tirane: Nuk ekziston ligji i luftës me Shqipërinë, jemi në NATO

by

Ministri i Jashtëm Grek, Nikolaos Kotzia ka deklaruar sot në Tiranë se mes dy vendeve nuk ekziston ligji i luftës. Ai tha se dy vendet janë aleatë në NATO dhe kanë një fqinjësi të mirë.
“Greqia dhe Shqipëria kanë ura shumë të fuqishme miqësie, të cilët janë emigrantët shqiptarë dhe sigurisht minoriteti grek që ekziston këtu prej shumë vitesh. Bashkë me këto diplomacia krijon shumë ura të tjera. Nuk besojmë se nuk ekzisotn një ligj lufte me Greqinë. Në besojmë se bashkëpunimi në NATO jo vetëm na bëjnë miq, por janë dy vende që janë partnerë aleatë”,- tha Kotzias gjatë konferencës së përbashkët të dhënë më ministrin e jashtëm shqiptarë, Ditmir Bushati. Ai tha se marrëveshjet mes dy vendeve që do të nënshkruhen janë dëshmi se mes dy vendeve nuk ka ligj lufte.
“Në të gjitha marrëveshje që ne do të bëjmë do të gjejmë mënyrën për të konfirmuar se nuk jemi në gjendje lufte. Përsa i përket heqjes së ligjit të luftës dhe të drejtës së pronës, çdo qytetar shqiptar mund të shkojë në gjykatat greke dhe të kërkojë të drejta e tij”,- tha ai.
Lidhur me çështjen Çame, diplomati grek u përgjigj në mënyrë indirekte. “E kam si zakon të them; të mësojmë nga historia. Të mos përsërisim gabime të së shkuarës, por edhe të mos mbetemi të burgosur në këtë linjë. Ne duam të ndërtojmë me Shqipërinë të ardhmen”.(KJ)