Sulm në ambasadën amerikane në Podgoricë, Kosova dënon aktin

February 22, 2018 by dgreca

1 ambasada amerik

Policia e Malit të Zi tha sot se një veteran i ushtrisë jugosllave që punonte në mbrojtjen kundër-ajrore gjatë bombardimeve të NATO-s të vitit 1999, hodhi një granatë dore në kompleksin e ambasadës amerikane në Podgoricë rreth mesnatës dhe pastaj hodhi veten në erë.Ambasada në faqen e saj në Facebook tha se asnjë nga personeli i saj nuk u dëmtua nga incidenti dhe po ashtu nuk pati njoftime për dëme materiale.

Malazezi i moshës 41 vjeçare dhe i lindur në Serbi, u identifikua nga policia me inicialet D.J., por mediat thanë se emri i tij i plotë ishte Dalibor Jaukoviç.

Pak para mesnatës, ai hodhi një granatë dore mbi gardhin e kompleksit të ambasadës dhe më pas hodhi veten në erë, u tha gazetarëve shefi i policisë, Enis Bakoviç.

Bakoviç tha se po zhvillohen hetime për të përcaktuar nëse ai kishte vepruar i vetëm apo me të tjerët. “Ne po kërkojmë në mediat sociale së bashku me FBI-në”, tha ai.

“Nuk ka shenja se ishte akt terrorizmi”, tha prokurorja Lepa Medenica.

Policë me armë automatike dhe automjete patrullonin rrugët pranë ndërtesës së ambasadës të enjten në mëngjes pas incidentit.

Megjithëse ambasada tha se stafi i saj ishte i padëmtuar, ambasada u mbyll për lëshimin e vizave deri në një njoftim tjetër.

“Ambasada e SHBA-së në Podgoricë këshillon shtetsasit amerikanë se në ambasadë ka një situatë aktive të sigurisë,” thuhej në faqen e saj të internetit.

Mali i Zi, një nga vend i vogël me dalje në det, u bë anëtari i 29-të i NATO-s në muajin maj të vitit 2017.(VOA)

***

Kosova dënon sulmin ndaj Ambasadës së SHBA në Mal të Zi

-Ministri i Jashtëm Pacolli: Dënoj fuqishëm sulmin ndaj Ambasadës amerikane në Mal të Zi/

PRISHTINË, 22 Shkurt 2018-Gazeta DIELLI/ Zëvendëskryeministri i Parë dhe Ministri i Jashtëm i Republikës së Kosovës, Behgjet Pacolli, ka dënuar sulmin, që ndodhi mbrëmë vonë ndaj Ambasadës së Shteteve të Bashkuara të Amerikës në Mal të Zi.

“Jam duke i përcjellur me vëmendje zhvillimet e mbrëmshme, që ndodhën në Podgoricë, ku sipas raportimeve të deritashme kishte një sulm me një mjet eksploziv ndaj Ambasadës Amerikane në Malin e Zi. Megjithëse motivet ende mbeten të paqarta dhe organet përgjegjëse të sigurisë atje janë duke kryer punën e tyre për zbardhjen e rrethanave, dënoj me fjalët më të ashpra këtë sulm të ulët ndaj Institucioneve të aleatit dhe partnerit tonë strategjik, SHBA-së. Kosova mbetet e palëkundur pranë SHBA-ve dhe ofron ndihmën dhe bashkëpunimin në zhvillimin e hetimeve me institucionet përgjegjëse të Malit të Zi nëse kjo vlerësohet e nevojshme”, është shprehur Ministri i Jashtëm Pacolli./b.j/

EKSTREMISTET GREKE DHE SHKOLLA SHQIPE NE KRETE

February 12, 2018 by dgreca

Ekstremistët Grekë tentojne të shkatërrojnë shkollën shqipe, i vënë naftë dhe vaj dyerve, por nuk arrijnë dot të ndalojnë mësimin/

Mësimet e gjuhës shqipe dhe orët e leksioneve u hapën sërish në komunitetin Chania (Hani) në Kretë të Greqisë.
Pas trazirave që shpërthyen për ndalimin e leksioneve në shkollën e mesme Chrysopigi dhe kundërshtimeve të shumta të pjesëtarëve të ndryshëm të shoqërisë, mësimet rifilluan pasditen e së dielës në të njëjtin vend.

Megjithatë, mëngjesin e ditës së djeshme, në afërsi të shkollës disa makina me naftë dhe vaj u zbrazën, duke dëmtuar një pjesë të shkollës, përfshirë edhe derën kryesore të saj, siç duket në pamjet e mëposhtme.

Kryetari i komitetit të shkollës së Mesme të Bashkisë Chania, Antonis Vardakis, i cili mbërriti menjëherë në vendngjarje, tha se veprime të tilla nuk kanë efekt dhe theksoi se kurset do të vazhdojnë normalisht, pasi kjo është një e drejtë ligjore e çdo nxënësi.Incidenti i ndodhur gjatë orëve të paradites nuk e pengoi rihapjen e kurseve për rreth 45 fëmijë shqiptarë.Ngjarja u ndoq nga shumë njerëz nga bashkësia shqiptare dhe nga shoqatat lokale si ELME, Shoqata e Mësuesve të Arsimit Fillor dhe klubet anti-raciste.

Togeri i FSK, sukses në SHBA

February 8, 2018 by dgreca

U.S. Army Lt. Gen. Charles M. Pede and his wife, host a reception in honor of the International Military Student Officers at Patton Hall, Joint Base Myer-Henderson Hall, Arlington, Va., Nov. 30, 2017. (U.S. Army photo by Sgt. Michel'le Stokes)

-Toger Albert Asllani shpallet oficeri më i mirë ndërkombëtarë në kursin “Kapitenë të karrierës” në SHBA/

SHBA, 7 Shkurt 2018-Gazeta DIELLI/ Oficeri i Forcës së Sigurisë së Kosovës, togeri Albert Asllani, pas një trajnimi gjashtëmujor në shkollën ushtarake “United States Army Cyber Center of Excellence” në Fort Gordon të Shteteve të Bashkuara të Amerikës (SHBA) u nderua me çmimin “Colonel Alan C. Dexter, OBE, Award”.Këtë çmim e marrin studentët e dalluar të cilët tregojnë arritje të larta akademike si dhe profesionalizëm dhe lidership gjatë studimeve.
Ministria e FSK në njoftimin e dërguar thekson se, Çmimi “Colonel Alan C. Dexter, OBE, Award” për Toger Albert Asllanin është edhe një dëshmi se Forca e Sigurisë së Kosovës është në rrugë të duhur sa i përket ngritjes profesionale të pjesëtarëve të saj, dhe se ky kualitet profesional është duke u dëshmuar edhe jashtë vendit si në: shkollime, trajnime, operacione, përfshirë këto edhe në akademitë më prestigjioze në botë.
Toger Albert Asllani pas kthimit nga SHBA-të do të vazhdojë shërbimin në Komandën e Forcave Tokësore (KFT) duke bartur përvojat e tij të fituara në këtë trajnim specialistik në të mirë të avancimit dhe ngritjes profesionale të FSK-së.

Në këtë trajnim kanë marr pjesë oficerë nga shumë vende të botës. Ky është trajnim special për përgatitjen e oficerëve, Kapitenë, të karrierës./b.j/

Kosova pret nga BE sinjale të qarta drejt integrimit

January 30, 2018 by dgreca

-Ministrja Hoxha në Vjenë, në konferencën ndërkombëtare dyditore dedikuar Strategjisë për të ardhmen e Evropës që organizohet nën patronatin e Kryeministrit të Austrisë, me moton “Go West – Western Balkan”/

PRISHTINË, 30 Janar 2018-Gazeta DIELLI/ Procesi i Integrimit evropian mbetet një nga qëllimet kryesore të politikës së jashtme të Republikës së Kosovës si dhe vazhdimi i konsolidimit demokratik, përmirësimi i sundimit të ligjit, respektimi i të drejtave të njeriut dhe krijimi i një ekonomie funksionale të tregut.

Kështu deklaroi sot në Vjenë ministrja e Integrimit Evropian, Dhurata Hoxha, në konferencën ndërkombëtare dyditore, dedikuar Strategjisë për të ardhmen e Evropës që organizohet nën patronatin e Kryeministrit të Austrisë, me moton “Go West – Western Balkan”.“Besoj që institucionet e BE-së, do të vazhdojnë të bëjnë për perspektivën evropiane të vendit tonë, si për të gjithë rajonin, perspektivë dinamike, konkrete dhe e arritshme”, ka theksuar ministrja Hoxha, duke shtuar se për Kosovën, rruga është e qartë, anëtarësimi në BE me besimin se Bashkimi Evropian duhet të përqendrojë politikën e jashtme në procesin e zgjerimit.

“Politika e zgjerimit të BE-së, duhet të shihet si një mekanizëm për ta bërë familjen e BE-së më të plotë dhe më të qëndrueshme. Ne presim që institucionet e BE-së do të sigurojnë një rrugë të qartë të Kosovës dhe vendeve të tjera të Ballkanit Perëndimor në perspektivën e BE. Konsideroj se në këtë fazë, uniteti duket më i rëndësishëm se kurrë”, ka theksuar ministrja Hoxha, citon njoftimi i dërguar nga Vjena.

Në këtë proces ka shumë sfida dhe mundësi, theksoi ministrja Hoxha, duke vënë në pah se institucionet e Kosovës dhe të BE-së duhet të punojnë së bashku për të kapërcyer sfidat dhe për të përdorur mundësitë duke ri-theksuar perspektivën e Kosovës në BE, si e vetmja rrugë përpara për Kosovën.

“Më lejoni të theksoj angazhimin e qeverisë së Kosovës në të gjitha proceset që lidhen me axhendën evropiane, duke përfshirë dinamizmin e zbatimit të Marrëveshjes së Stabilizim Asociimit, përfundimin e procesit të liberalizimit të vizave dhe lehtësimin e udhëtimit të lirë të qytetarëve të Kosovës në vendet e Bashkimit Evropian”, theksoi ajo.

“Ne presim që Kosova të jetë gati në të njëjtën kohë me vendet e tjera të Ballkanit Perëndimor për t’u bashkuar me BE-në. Perspektiva e BE-së duhet të shihet në të njëjtën mënyrë për tërë Ballkanin Perëndimor. Kosova nuk është ndryshe nga shtetet tjera dhe planet e zgjerimit duhet të përfshijnë Kosovën. Qytetarët e Kosovës shpresojnë të jenë pjesë e familjes së BE-së. E vetmja mënyrë që rajoni të jetë i qëndrueshëm është përfshirja e të gjitha vendeve të Ballkanit Perëndimor në një paketë në planet për zgjerim. Kosova nuk duhet të jetë e izoluar apo e ndarë nga vendet tjera të Ballkanit Perëndimor”, tha ministrja Hoxha.

Në këtë konferencë ndërkombëtare, ministrja Hoxha po merr pjesë edhe në cilësi të panelistës dhe tryeza të diskutimeve dhe punëtorive, dedikuar Strategjisë për të ardhmen e Bashkimit Evropian dhe perspektivës së zgjerimit në vendet e Ballkanit perëndimor./b.j/

Kosovë-Maqedoni, mbledhja e dy qeverive në mars

January 23, 2018 by dgreca

-Zëvendëskryeministri Enver Hoxhaj në Shkup takon kryeministrin Zoran Zaev, zëvendëskryeministrin Bujar Osmani dhe ministrin e Diasporës, Edmond Ademi. Diskutohet për një etapë të re të marrëdhënieve në mes të Kosovës dhe Maqedonisë, që do të jetë përmbajtjesore dhe me projekte konkrete bashkëpunimi/

-Në 12 dhjetor 2017 Zaev ishte në vizitën e parë zyrtare të një kryeministri të Maqedonisë në Kosovë/

PRISHTINË, 23 Janar 2018-Gazeta DIELLI-B.Jashari/ Zëvendëskryeministri i Republikës së Kosovës, Enver Hoxhaj po qëndron për vizitë zyrtare në Shkup, ku ka zhvilluar takim me kryeministrin e Maqedonisë, Zoran Zaev.Në takimin e zëvendëskryeministrit Hoxhaj dhe kryeministrit Zaev është diskutuar për një etapë të re të marrëdhënieve në mes të Kosovës dhe Maqedonisë, që do të jetë përmbajtjesore dhe me projekte konkrete bashkëpunimi.Hoxhaj dhe Zaev kanë diskutuar për mbledhjen e përbashkët të dy qeverive, si hapi i parë që do ta hapë rrugën e zhvillimit të bashkëpunimeve të reja në shumë fusha. Palët janë pajtuar që kjo mbledhje të mbahet në mars të këtij viti, ndërsa së shpejti do të bëhet e ditur edhe data e saktë.

Në këtë takim, zëvendëskryeministri Hoxhaj në emër të Qeverisë së Kosovës, ka dërguar mbi njëzet propozime për marrëveshje dhe tema të diskutimit për mbledhjen e përbashkët, duke nisur nga bashkëpunimi ekonomik e tregtar, lëvizja e lirë e njerëzve dhe mallrave, bashkëpunimi ndërkufitar, arsimor, kulturor, si dhe në fushën e drejtësisë. Zëvendëskryeministri Hoxhaj dhe kryeministri Zaev janë pajtuar se viti 2018 ka potencial të jetë viti i shteteve të rajonit dhe i shënimit të progresit në proceset e integrimit euro-atlantik.

Përveç takimit me kryeministrin Zaev, Hoxhaj ka takuar edhe zëvendëskryeministrin Bujar Osmani dhe ministrin e Diasporës, Edmond Ademi, ku kanë biseduar për bashkëpunime të reja në fusha të interesit të përbashkët.Në 12 dhjetor 2017 Zoran Zaev ishte në vizitën e parë zyrtare të një kryeministri të Maqedonisë në Kosovë.

Në 15 dhjetor 2017 qeveria e Kosovës, e drejtuar nga kryeminsitri Ramush Haradinaj, nisi përgatitjet për mbledhjen e parë të përbashkët me qeverinë e Maqedonisë dhe për këto përgatitje autorizoi zëvendëskryeministrin Enver Hoxhaj. Maqedonia është shteti i 49-të që ka njohur Kosovën në 9 tetor të vitit 2008 të shpalljes së pavarësisë në 17 Shkurtin historik.

Qeveria e Kosovës deri tani ka mbajtur mbledhje të përbashkëta vetëm me qeverinë e Shqipërisë, gjithësej 4, së fundi në në 27 nëntor 2017 në Korçë, pas të parës historike në Prizren në 11 janar 2014, të dytës në Tiranë në 23 mars 2015 dhe të tretës në 3 qershor 2016 në Prishtinë.