Miq të librit, mos harroni: këtë të shtunë, në Universitetin e Harvardit, VATRA në Boston, në bashkëpunim me Programin e Studimeve të Gjuhës Shqipe pranë këtij universiteti prestigjioz dhe Shtëpinë Botuese Onufri, do të prezantojnë për komunitetin shqiptar librin “Porosia e Kullës” nga Dr. Pashko R. Camaj, njëkohësisht Sekretar i Përgjithshëm i VATRËS!

Më poshtë keni programin për këtë event, i cili organizohet në kuadër të festimeve për njëvjetorin e ringritjes së VATRËS në Boston.

Pjesëmarrësit do të kenë mundësinë të marrin kopje të librit në gjuhën shqipe dhe angleze.

Detajet e aktivitetit:

• Data: E shtunë, 14 dhjetor

• Ora: 12:00

• Vendi: Universiteti i Harvardit – Fong Auditorium

• Adresa: Boylston Hall, 5 Harvard Yard, Cambridge, MA 02138

Sokol Paja/

New York, 8 Dhjetor 2024 – Federata Pan-Shqiptare e Amerikës Vatra dhe Instituti i Studimeve për Krimet dhe Pasojat të Komunizmit në Shqipëri nënshkruan një marrëveshje bashkëpunimi me qëllim organizimin e aktiviteve të përbashkëta në përkujtim të figurave dhe ngjarjeve të caktuara historike kombëtare me fokus kujtesën kolektive dhe kontributin për zbardhjen e të vërtetave historike të shqiptarëve. Marrëveshja e bashkëpunimit u nënshkruar gjatë një takimi pune të Kryetarit të Vatrës, Dr. Elmi Berisha, dhe drejtorit ekzekutiv të ISKK, Dr.Çelo Hoxha.

Qëllimi i marrëveshjes është mbledhja e dëshmive të personave të persekutuar gjatë regjimit komunist, të cilët jetojnë në SHBA me qëllim zbardhjen e krimeve të komunizmit dhe botimin e dëshmive si pjesë e kolanës “Zërat e Kujtesës”. Një delegaacion i ISKK ndodhet prej disa ditësh në New York në një vizitë pune. Më 7 dhjetor, u zhvillua një takim në shkollën shqipe “Gjergj Fishta”, në Long Island, New York. ISKK u dhuroi nxënësve kopje të librit për fëmijë “Kundër rrymës”, një libër për fëmijë i bazuar në jetën e shkencëtares Sabiha Kasimati.

Instituti i Studimeve për Krimet dhe Pasojat të Komunizmit më herët ka kontribuar për Bibliotekën Shkencore të Vatrës me 50 libra shkencorë. Në fund të këtij viti po ky Institut do të dërgojë për Vatrën afro 50 botime shkencore me fokus historinë e Shqipërisë dhe shqiptarëve.

Patriotët e shquar Qemal e Kozeta Zylo, “Ambasadorë të Kombit” shqiptar në mërgatën e Shteteve të Bashkuara të Amerikës dhuruan 500 dollarë për ndërtesën e re të Federatës Vatra dhe 100 dollarë për gazetën Dielli. Themeluesit e shkollës shqipe dhe televizionit shqiptaro-amerikan “Alba Life” prej afro 2 dekadash kontribuojnë me çdo mjet e çdo kusht për kombin, gjuhën, komunitetin dhe kulturën kombëtare në New York.

Institucioni i Presidentit të Republikës së Shqipërisë, për punën e shquar atdhetare i ka vlerësuar patriotët Qemal e Kozeta Zylo me Titullin e Lartë ” Kalorës i Urdhërit të Flamurit.

Me dhjetëra fëmijë shqiptarë që edukohen në çdo vit prej patriotëve Zylo dhe dhjetëra emisione televizive kushtuar komunitetit shqiptar në Amerikë, përbëjnë një pasuri e kontribut patriotik e kombëtar shumë të çmuar për shqiptarët e Amerikës.

Vatra e Dielli shprehin falënderimin më të përzemërt, respektin më të thellë e mirënjohjen më të veçantë për çiftin Zylo dhe çdo shqiptar që mbështet Vatrën e Diellin si institucionet atdhetare më të fuqishme që udhëheqin prej më shumë se 1 shekull dhe 1 dekadë proceset patriotike dhe veprimtarinë atdhetare në Shtetet e Bashkuara të Amerikës.

Të mbështesësh Vatrën e Diellin është akt i lartë patriotik e vepër e artë atdhetare.

Komuniteti Shqiptar i Floridës së Jugut pati dy evente madhështore këtë nëntor: për herë të parë, ngritjen e flamurit shqiptar në Bashkinë e Hollywood dhe gjithë Floridën e Jugut si dhe celebrimin e festës kombëtare së bashku me Ditën e Falënderimeve (Thanksgiving) më 28 Nëntor. Të dyja këto aktivitete ishin organizuar nga Vatra Miami.

Vatra Miami ndihet krenare që arriti këtë ditë historike. Mesazhi i saj është i qartë: Kur duam njëri-tjetrin, duam më shumë Shqipërinë! Asnjë ditë nuk na bashkon më shumë se Festa e Flamurit, dita e Pavarësisë së Shqipërisë, 28 Nëntori.

Siç ka thënë Mit’hat Frashëri:

“Patriotizmi është mbi të gjitha një ndjenjë madhështore që na shtyn të kërkojmë nderin dhe madhërinë e kombit tonë, sepse në atë madhëri do të gjejmë lumturinë dhe nderin tonë si individë.”

I bekuar qoftë çdo shqiptar, brenda dhe jashtë trojeve, që e ka në zemër këtë amanet të Frashëlliut të fundit!

Në emër të Vatra Miami dhe Klubit Flas Shqip, dëshirojmë të shprehim falënderimet tona të përzemërta për të gjithë ata që ndihmuan në realizimin e këtyre sukseseve të mëdha:

Falënderime të Veçanta:

Kryetarit të Bashkisë së Hollywood dhe stafit të tij, për mikpritjen e veçantë dhe lejimin që flamuri ynë të valëvitej krenar për herë të parë për tre ditë me radhë në qiellin më jugor të kontinentit Amerikan.

Sponsorit gjeneral të Klubit Flas Shqip, z. Doug Saraci, pronar i kompanisë së suksesshme Alyssa’s, i cili mbështeti financiarisht Klubin Flas Shqip dhe premton ndihmë të mëtejshme për zgjerimin e tij.

Prindërve të përkushtuar, si Ilir dhe Suela Dekaj, Lek dhe Adela Dekaj, Lul dhe Ardela Smailaj, Alban dhe Tika Hoti, familjet Zharku dhe Berisha, Nola Belenek, dhe familjen Jakupi, Troni dhe Shehu, që kanë ndihmuar në rritjen e radhëve të klubit dhe kanë qenë ndër të parët që ofruan mbështetje financiare për eventet e nëntorit.

Skulptorit Artur Bejkollari, banues në Miami, i cili krijoi banerin kryesor të eventit si një dhuratë e veçantë për Vatra Miami.

Televizionit Noli TV dhe gazetarit Nazim Saliu, për mbulimin profesional të eventit dhe promovimin e komunitetit tonë.

Përfaqësuesve të Vatrës, z. Sokol Paja dhe z. Marjan Cubi, që na nderuan me pjesëmarrjen dhe mbështetjen e tyre në event.

Mësueses Liljana Rrumbullaku për përkushtimin në përgatitjen dhe realizimin e koncertit të fëmijëve si dhe mësuese Ana Liko për ndihmën me orientimin e të ftuarve përgjatë eventit.

Familjes sime, që më mbështeti pa kushte gjatë gjithë kësaj kohe.

Një falenderim i vecante i shkon orkestrës së Maestro Raif Hyseni dhe Bilbilit të këngës së Shqipërisë së mesme Merita Halili që i dhanë mbrëmjes notat e larta festive.

Vatra Miami dhe Klubi Flas Shqip do të vazhdojnë të kontribuojnë për komunitetin shqiptar, duke rritur numrin e anëtarëve dhe nxënësve, duke rrënjosur gjuhën dhe kulturën tonë në brezat e rinj dhe duke promovuar vlerat kombëtare. Por mbi të gjitha, ne do të vazhdojmë të forcojmë frymën e bashkimit, sepse vetëm të bashkuar si komunitet mund të jemi më të fuqishëm.

Zoti e bekoftë çdo shqiptar dhe çdo cep të botës ku ata jetojnë dhe punojnë!

Bekuar qoftë Shqipëria dhe Amerika, të dyja janë tonat, si valvulat e zemrës!

Me respekt,

Vatra Miami

New York, 27 Nëntor 2024 – Fatmir Gjeka, ministër i të drejtave të njeriut dhe pakicave në qeverinë e Malit të Zi njëkohësisht dhe kryetar i Partisë Demokratike në Mal të Zi vizitoi Federatën Pan-Shqiptare të Amerikës Vatra. Ai u shoqërua nga Astrit Hoxha sekretar shtetëror në Ministrinë e Drejtave të Njeriut dhe Pakicave dhe Naser Nika kryetar i shoqatës shqiptaro-amerikane në Staten Island, NY. Ata u pritën nga sekretari i Vatrës Dr. Pashko Camaj, z.Ilir Cubi anëtari i kryesisë më 30 vite kontribut në Vatër dhe z.Mëhill Gjuraj biznesmen dhe aktivist i çështjes kombëtare në mërgatën e Amerikës. Dr. Camaj në fjalën e mirëseardhjes shpjegoi historinë e Vatrës dhe Diellit dhe kontributin thelbësor në historinë e Shqipërisë dhe shqiptarëve nga Shtetet e Bashkuara të Amerikës deri në trojet etnike. Ministri Gjeka vlerësoi punën e Vatrës si institucion kombëtar dhe tregoi sukseset qeveritare në kabinetin ku prezenca dhe fuqia e shqiptarëve është gjithnjë në rritje. Dr. Camaj në emër të Vatrës shprehu mirënjohje, falenderim e mbështetje faktorit politik shqiptar në Mal të Zi të cilët janë më të fortë se kurrë në mbrojtje të interesave kombëtare dhe prosperitetit të Malit të Zi në rrugën euroatlantike.