Dr. Elmi Berisha/

Ka momente në historinë e një populli, shteti e kombi që nuk harrohen kurrë. Për shqiptarët e Kosovës, senatorit amerikan Bob Dole i takon një vend i veçantë në kujtesën tonë kombëtare. Më 29 gusht 1990, në një nga periudhat më të dhimbshme e më errëta për Kosovën, Bob Dole vizitoi Prishtinën në krye të një delegacioni senatorësh amerikanë. Në rrugët e kryeqytetit mijëra shqiptarë kërkonin liri, të drejta dhe dinjitet, ndërsa represioni i regjimit serb po rëndonte çdo ditë e më shumë mbi popullin shqiptar. E kujtoj dhe nuk e harroj kurrë bashkëpunimin e ngushtë, miqësinë dhe punën e çmuar që bashkë me Bob Dole bëmë për Kosovën.

Vizita e senatorit Dole nuk ishte thjesht një vizitë politike. Ajo ishte një gjest guximi, solidariteti dhe humanizmi i lartë për shqiptarët e shtypur e të masakruar prej serbëve. Ai pa nga afër realitetin e Kosovës dhe u bë një prej zërave të rëndësishëm që e përcollën të vërtetën e popullit shqiptar në Shtetet e Bashkuara të Amerikës. Për ne shqiptarët e Amerikës, kjo ka një domethënie të veçantë. Në historinë e marrëdhënieve shqiptaro-amerikane, miq si Bob Dole dëshmojnë se kjo lidhje nuk është ndërtuar vetëm mbi interesa politike, por mbi vlera të përbashkëta: lirinë, demokracinë, të drejtat e njeriut dhe respektin për dinjitetin njerëzor.

Bob Dole ishte një amerikan i madh dhe një mik i madh i shqiptarëve. Ai e kuptoi se çështja e Kosovës nuk ishte thjesht një çështje rajonale, por një çështje e drejtësisë dhe e të drejtave themelore të njeriut. Zëri i tij në Uashington ndihmoi që kauza e Kosovës të mos mbetej e izoluar dhe që realiteti i dhunës dhe represionit serb të dëgjohej më fuqishëm në Amerikë. Kujtojmë me nderim e respekt një njeri që në një kohë kur shumëkush mund të heshtte, zgjodhi të shihte, të dëgjonte dhe të fliste në favor të të drejtave të shqiptarëve.

Trashëgimia e Bob Dole mbetet pjesë e historisë së miqësisë amerikano-shqiptare dhe e rrugëtimit të Kosovës drejt lirisë, pavarësisë, shtetformimit dhe integrimit euroatlantik. Në emër të Federatës Panshqiptare të Amerikës “VATRA”, shpreh mirënjohjen tonë të thellë dhe të përjetshme për Senatorin Bob Dole, për guximin, përkushtimin dhe kontributin e tij jo vetëm në mbështetje të popullit të Kosovës por mbi të gjitha të çështjes shqiptare në Shtetet e Bashkuara të Amerikës.

E nderuar familja Tomaj

I dashur miku ynë Bardh

Me keqardhje të thellë mësova lajmin e largimit nga jeta të babait tuaj, vatranit, atdhetarit e patriotit Tom Tomaj.

Në emër të Federatës Pan- Shqiptare të Amerikës VATRA, të gazetës Dielli, në emër të të gjithë vatranëve e të familjes sime ju përcjell ngushëllimet tona më të sinqerta e më të dhimbshme familjes, farefisit e miqve për largimin nga jeta tokësore të fisnikut Tom Tomaj.

Patriotizmi, trimëria dhe fisnikëria e tij do kujtohen me respekt kurdoherë. Të gjithë bashkë si vatranë jemi pranë familjes në këto momente trishtimi e lamtumire të pakthyeshme.

Lusim Zotin për shpirtin e tij.

Pushoftë në paqen e përjetshme.

I pikëlluar

Pranë jush dhe me nderime

Kryetari i Vatrës

Dr.Elmi Berisha

Tom Tomaj Obituary:

Visitation

Sunday, August 30, 2026

2:00 – 8:00 pm

McHoul Funeral Home, Inc. ~ Van Wyck Room

895 Route 82, Hopewell Junction, NY 12533

Mass of Christian Burial

Monday, August 31, 2026

11:00 am – 12:00 pm

Our Lady of Shkodra Albanian Catholic Church

361 W Hartsdale Avenue, Hartsdale, NY 10530

Të dashur prindër dhe familje shqiptare!

Me kënaqësi të madhe ju ftojmë në rihapjen e Shkollës Shqipe VATRA, organizuar nga Vatra Tampa Bay. Viti i ri shkollor fillon më 26 Shtator 2026

Vendndodhja: St. Petersburg College, Clearwater, ES 113

Orari: Çdo të shtunë, nga ora 13:30 deri në 15:30

Shkolla është e hapur për fëmijët e moshës 6–14 vjeç. Këtu fëmijët do të socializohen me njëri-tjetrin, do të mësojnë gjuhën shqipe nëpërmjet historisë dhe gjeografisë së Shqipërisë, si dhe duke njohur figurat e mëdha historike shqiptare – gjithçka në një ambient të ngrohtë, motivues dhe plot gëzim.

Regjistrimet janë të hapura!

Për t’u regjistruar, ju lutemi dërgoni në email-in: VATRATAMPABAY@GMAIL.COM

informacionet e mëposhtme:

1. Emrin e fëmijës që do të regjistrohet

2. Emrin e njërit prind

3. Adresën e emailit

4. Numrin e telefonit

Për çdo pyetje ose informacion shtesë, na telefononi në: 727-247-4209

Le t’ua japim fëmijëve tanë dhuratën më të bukur – gjuhën, historinë dhe identitetin shqiptar!

Ju presim me zemër të hapur!

Vatra Tampa Bay

Sokol Paja/

Një ndër personalitetet e rëndësishme të Federatës Vatra, gazetës Dielli, mërgatës shqiptare dhe letrave shqipe në diasporën e Amerikës përgjatë 30 viteve 1992-2022, është pa dyshim Anton Çefa. Poeti, mësuesi, studiuesi, kritiku letrar, eseisti, gjuhëtari e gazetari Çefa ishte Editor i gazetës Dielli nga tetori 1994 deri në dhjetor 2006. Cilësor në gazetari, kontributor i palodhur, vizionar në ide, i ndershëm në qëndrime e pikëpamje, i pathyeshëm në bindje, i saktë në përcaktime, gjenial në interpretime dhe largpamës në parashikime, Anton Çefa i dha gazetës Dielli një frymë të fortë patriotike e kritiko-letrare.

Në historinë e Vatrës e Diellit, Anton Çefa bën pjesë në plejadën e kontributorëve të palodhur, patriotë e punëtorë, fjalë pak, i mençur, i saktë, antikomunist, i urtë, besnik, i ditur, dinjitoz, i dinjitetshëm e shumë i apasionuar. Si editor i Diellit, radhitet ndër më kontributorët në histori duke lënë trashëgimi 19 vepra të botuara e dy në dorëshkrimin. Anton Çefa riktheu shkëlqimin e Diellit të Arshi Pipës duke i dhënë cilësi, formë e përmbajtje të re pasi mblodhi rreth vetes bashkëpunëtorë e studiues të zëshëm, krijues letrar e kërkues shkencor me dinjitet brenda dhe jashtë Amerikës, që i dhanë Diellit identitet të fortë mediatik e patriotik. Diti të ruajë mjeshtërisht ekuilibrat, integritetin dhe dinjitetin në kohët e vështira të Vatrës. Luftoi për cilësi dhe anatemoi bajraktarizmin e mediokritetin. Fisniku Anton Çefa lindi më 1935 në Shkodër dhe aktualisht jeton në Ridgewood, New Jersey.

Për Anton Çefën si editor e studiues, psikologjia kombëtare shqiptare ishte një pasuri e thellë shpirtërore, e trashëguar ndër shekuj dhe e mishëruar në idealin e lirisë, qëndresën, trimërinë, burrërinë, nderin, besën, mikpritjen, drejtësinë dhe respektin për njeriun. Anton Çefa në krijimet e tij e shihte kulturën shqiptare si një sistem të gjallë vlerash, ku gjuha, folklori, proverbat, Kanuni, traditat dhe personalitetet historike dëshmojnë karakterin dhe vazhdimësinë e kombit dhe identitetit shqiptar.

Krijimet e Anton Çefës si sprova letrare, historike e psikologjike kushtuar psikologjisë etnike, gjuhës, kritikës letrare dhe portreteve të personaliteteve tona kombëtare kanë një origjinalitet dhe seriozitet shkencor shumë të arrirë. Anton Çefa përgjatë veprimtarisë së tij publicistike u shqua për aftësi analizuese, interpretuese, krijuese e kritike të një niveli shumë të lartë.

Ndër veprat kryesore studimore e letrare të Anton Çefës përmendim: “Noli e Konica”, “Faik Konica: Për shpiritën e Vatrës jam responsible unë”, “Dritarja e një britme”, “Heshtja ka tingull guri”, “Fjalë në vargoj të muzgët”, “Flatrime me krahë të premë”, “Bardhësi me zbritje bore”, “Fjala shqipe si zjarri i shejtë”, “Tinguj e ngjyra Shqipërie”, “Atdheu”, “Në hullitë e fjalës artistike”, “Prej fjalës te fjala”, “Një sprovë e psikologjisë etnike të popullit tonë”, “Krijimtari e nivelit të lartë shkencor e artistik”, “Gjurmëve të vlerave të fjalës artistike”, “Libri i portreteve”, “Fjala shqipe si zjarri i shejtë” etj.

Anton Çefa vendosi në qendër të shkrimeve e studimeve të tij historinë, gjuhësinë, çështjen kombëtare shqiptare, luftën për liri, pavarësi dhe të drejtat e shqiptarëve në trojet etnike, krijoi në mënyrë në posaçme për Skenderbeun, Pjetër Bogdanin, At Gjergj Fishtën, Nënë Terezën, Eqrem Çabejn e figurat ikonike të Vatrës Nolin e Konicën. Përmes veprës letrare të Anton Çefës njihet dimensioni letrar e kulturor i ikonave kombëtare të Vatrës e Diellit që dominuan kulturalisht shekullin e kaluar.

Vepra e Anton Çefës është një shërbim thelbësor në fushën e kulturës, historisë dhe studimeve albanologjike duke u kthyer në një pikë reference për studiuesit e mërgatës së Amerikës dhe trojeve shqiptare. Për 12 vite Anton Çefa e shndërroi “Diellin” në një media të kujtesës, identitetit, kulturës, dashurisë për atdheun dhe krenari të të gjithë shqiptarëve të Amerikës. Vatra e Dielli do i jenë përjetë mirënjohës trashëgimisë së vyer e kontributit të çmuar kombëtar, patriotik e publicistik të Anton Çefës.