Klinë, Kosovë, 30 korrik 2026 – Kryetari i Federatës Panshqiptare të Amerikës “Vatra”, Dr. Elmi Berisha, i shoqëruar nga anëtari i Kryesisë Bardh Tomaj dhe veprimtari i shquar i çështjes kombëtare Marjan Cubi, zhvilluan homazhe nderimi pranë shtatoreve të Presidentit Historik të Kosovës, Dr. Ibrahim Rugova, dhe Shën Nënë Terezës në qytetin e Klinës.

Shtatorja e Presidentit Ibrahim Rugova është ngritur falë donacionit bujar të vatranit historik Marjan dhe Ilir Cubit, një akt që dëshmon respektin dhe përkushtimin e tyre të palëkundur ndaj trashëgimisë së Presidentit Rugova dhe idealeve të lirisë, demokracisë dhe shtetndërtimit të Kosovës.

Marjan Cubi është një veprimtar dhe patriot i shquar, i cili për më shumë se pesë dekada nuk është ndalur së vepruari në shërbim të çështjes kombëtare shqiptare, e veçanërisht të Kosovës. Si kryetar i Degës së LDK-së për Nju Jorkun me rrethe dhe bashkëpunëtor i afërt i Presidentit Ibrahim Rugova, ai ka qenë ndër zërat më të fuqishëm të diasporës shqiptare në Shtetet e Bashkuara, duke kontribuar në ndërgjegjësimin e opinionit amerikan dhe në mbështetjen politike e kombëtare për Kosovën. Këtë trashëgimi patriotike e vazhdon sot me krenari atdhetari i flaktë Ilir Cubi.

Vizita e delegacionit të Vatrës në këtë vend simbolik përfaqëson vazhdimësinë e misionit historik të Federatës Panshqiptare të Amerikës “Vatra”, e cila për më shumë se një shekull ka qenë në vijën e parë të mbrojtjes së interesave kombëtare shqiptare. Gjatë viteve të represionit serb dhe luftës në Kosovë, Federata Vatra dhe Gazeta Dielli ngritën pandërprerë zërin për të drejtat e shqiptarëve, informuan opinionin publik amerikan, mbështetën përpjekjet diplomatike dhe lobuan pranë institucioneve të Shteteve të Bashkuara për lirinë dhe pavarësinë e Kosovës. Në faqet e Diellit u pasqyruan padrejtësitë ndaj popullit të Kosovës, ndërsa Vatra mobilizoi komunitetin shqiptaro-amerikan në mbështetje të kauzës së drejtë të shqiptarëve.

Edhe sot, Vatra dhe vatranët me dinjitet vazhdojnë të zhvillojnë aktivitete të shumta në Kosovë dhe në të gjitha trojet etnike shqiptare, duke forcuar lidhjet kombëtare, duke nderuar figurat më të mëdha të historisë sonë kombëtare.

Kryetari i Federatës Panshqiptare të Amerikës “Vatra”, Dr. Elmi Berisha, i shoqëruar nga anëtari i kryesisë, Bardh Tomaj, vizituan sot komunat veriore të Republikës së Kosovës, si dhe liqenin e Ujmanit, ku panë nga afër asetet më të rëndësishme hidrike dhe zona të tjera me rëndësi strategjike në pjesën veriore të vendit.

Gjatë kësaj vizite, kryetari i Vatrës shprehu mirënjohjen dhe vlerësimin e lartë për institucionet e sigurisë së Republikës së Kosovës, të cilat me profesionalizëm, përkushtim dhe përgjegjësi kanë menaxhuar situatën në veri të vendit, duke forcuar rendin, sigurinë, sundimin e ligjit dhe sovranitetin e shtetit të Kosovës në çdo pjesë të territorit të saj.

Federata Panshqiptare e Amerikës “Vatra” rithekson se mbështet pa asnjë rezervë institucionet legjitime të Republikës së Kosovës në përpjekjet e tyre për garantimin e paqes, stabilitetit dhe integritetit territorial. Vatra beson se partneriteti strategjik me Shtetet e Bashkuara të Amerikës mbetet garancia më e fuqishme për të ardhmen e Kosovës dhe se zgjidhja amerikane ka qenë dhe mbetet rruga më e sigurt për paqen, sigurinë dhe zhvillimin e saj.

Në të njëjtën kohë, Vatra thekson se dialogu ndërmjet Kosovës dhe Serbisë duhet të përfundojë me njohje reciproke, si e vetmja zgjidhje e drejtë, e qëndrueshme dhe në përputhje me të drejtën ndërkombëtare. Çdo zgjidhje tjetër që nuk respekton sovranitetin, integritetin territorial dhe subjektivitetin ndërkombëtar të Republikës së Kosovës nuk mund të sjellë paqe afatgjatë dhe stabilitet të qëndrueshëm në rajon.

I dashur miku ynë i shtrenjtë Harry

E nderuar familja Bajraktari e Milicaj

Me dhimbje të madhe e keqardhje të thellë mësova lajmin e largimit nga jeta të bashkëshortes suaj të shtrenjtë e të paharruar Lisa Bajraktari Milicaj. Në emër të Federatës Pan- Shqiptare të Amerikës VATRA, të gazetës Dielli, në emër të të gjithë vatranëve e të familjes sime ju përcjell ngushëllimet tona më të sinqerta e më të dhimbshme për humbjen e bashkëshortes suaj të dashur e të shtrenjtë.

Zoti ju dhashtë forcë e kurajë për të përballuar dhimbjen dhe vuajtjen për humbjen e Lisës, njeriut tuaj të çmuar të zemrës.

Të gjithë bashkë si vatranë jemi pranë jush, familjes, farefisit, miqve e dashamirësve tuaj në këto momente trishtimi, zie e lamtumire pa kthim. Në këto çaste të vështira për ju të gjithë, lutemi me shpirt që Zoti t’ju japë fuqi e ngushëllim për ta përballuar këtë dhimbje, ndërsa kujtimi dhe mirësia e Lisës të mbeten përherë të gjalla në jetën dhe zemrat e të gjithë atyre që e njohën dhe e deshën shumë.

Qoftë i përjetshëm nderimi dhe kujtimi i saj!

Shpirti i saj u bëftë dritë në Parajsë.

I pikëlluar thellë

Pranë jush dhe me nderime

Kryetari i VATRËS

Dr.Elmi BERISHA

Federata Pan-Shqiptare e Amerikës “Vatra” dhe gazeta “Dielli” shprehin ngushëllimet më të dhimbshme për ndarjen nga jeta të gazetarit të shquar, korrespondentit të gazetës “Dielli” në Prishtinë, Behlul Jashari. Mbarë vatranët i gjenden pranë familjes e miqve në këto momente të vështira dhe luten që shpirti i Behlul Jasharit të gjejë paqen e amshuar.

Behlul Jashari ishte profesionist i lartë e patriot që sfidoi regjimin serb në mbrojtje të atdheut dhe interesit qytetar e kombëtar.

Veprimtaria publicistike mbi pesë dekada te gazeta “Rilindja”, “Bujku”, “ATSH” e “Dielli” e skalisin emrin dhe kontributin e tij me gërma të arta në historinë e Kosovës e medias shqiptare. Behlul Jashari raportoi me kurajë, profesionalizëm, guxim, trimëri e përkushtim ngjarje historike e mediatike që kanë shënuar momentet më të rëndësishme të historisë së Kosovës që nga lufta, pavarësia, rrugëtimi euro-atlantik e shtetformimi institucional.

“Vatra”, “Dielli” e kombi do të jenë përjetë mirënjohës.

Pranë familjes, miqve e kolegëve

Me nderim të veçantë

Kryetari i Vatrës

Dr. Elmi Berisha

Federata Panshqiptare e Amerikës “VATRA” dënon ashpër deklaratën fashiste të ministres serbe Snežana Paunović, se “po të ishte në vend të Sllobodan Millosheviqit në vitin 1998, do ta kishte spastruar etnikisht Kosovën.”

Një deklaratë e tillë është e papranueshme, e turpshme, e neveritshme, çnjerëzore dhe përbën glorifikim të krimit, gjenocidit dhe spastrimit etnik dhe të politikave gjenocidale që regjimi i Sllobodan Millosheviçit ushtroi ndaj popullit shqiptar të Kosovës. Kjo retorikë urrejtjeje e kërcënimi është fyerje për mijëra viktima të luftës, familjet e tyre dhe qindra mijëra shqiptarë të dëbuar me dhunë nga trojet e tyre, por edhe një kërcënim për paqen, stabilitetin, pajtimin dhe sigurinë në Ballkan.

Lavdërimi, glorifikimi dhe justifikimi i krimeve serbe në Kosovë është i papranueshëm, i neveritshëm dhe i dënueshëm në çdo shoqëri të lirë e demokratike. Gjuha e tmerrshme e ministres serbe Paunović bie ndesh me vlerat mbi të cilat është ndërtuar Europa, Perëndimi e civilizimi njerëzor.

Federata VATRA u kërkon Shteteve të Bashkuara të Amerikës, Bashkimit Evropian, NATO-s dhe gjithë komunitetit ndërkombëtar të reagojnë me ashpërsi e vendosmëri ndaj çdo deklarate që promovon dhunën, krimin, urrejtjen etnike dhe që mohon ose justifikon krimet e Serbisë në Kosovë.

Heshtja përballë kësaj retorike të tmerrshme vetëm sa inkurajon gjenocidin, krimin e ekstremizmin e dhunshëm dhe rrezikon paqen e lirinë e fituar me gjak e sakrifica sublime.

Me indinjatë të thellë

Kryetari i Vatrës

Dr. Elmi Berisha