Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Ambasadori Arvizu takohet me Ramën dhe Metën: Tranzicion i butë dhe i rregullt

by

Tirane, 27 Qershor- Ambasadori i SHBA-së Aleksandër Arvizu ka deklaruar sot se duhet të zhvillohet një trazicion i butë dhe i rregullt në Shqipëri.

Në një prononcim të shkurtër për mediat pas takimit me kreun e PS-së Edi Rama, ambasadori theksoi se i ka përcjellë kryesocialistit Rama mesazhin se SHBA-ja mbetet partnere e Shqipërisë.

“Zhvilluam një diskutim të mirë dhe substancial. Dy gjërat më të rëndësishme që diskutuam e para ishte që të kemi një trazicion të butë dhe të rregullt dhe arsyeja e dytë që është edhe arsyeja se përse ndodhemi këtu që të ripohojmë angazhimin e fortë të SHBA-së. SHBA mbetet një partnere e Shqipërisë dhe ky është mesazhi që SHBA-ja përcjell” theksoi Arvizu.

 Meta: Të angazhuar për të përshpejtuar reformat integruese

Kreu i LSI-së Ilir Meta në një konferencë të përbashkët me ambasadorin Arvizu shprehu angazhimin e tij për të përmbushur të gjitha detyrimet në respekt të kodit dhe të ligjit dhe për të vazhduar marrëdhëniet shumë të mira dhe të fuqishme me SHBA-në.

“Do të vijojmë bashkëpunimin me SHBA-në me prioritetet që ne kemi për vendin tonë por edhe për SHBA-në sidomos në drejtimin e forcimit të ligjeve dhe pavarësinë e institucioneve. Për të krijuar një konsensus sa më të gjerë të përmbushjes së reformave që do të përshpejtojnë integrimin europian të Shqipërisë dhe do të adresojnë problemet e qytetarëve tanë” tha Meta.

Meta theksoi më tej se Shqipëria ka marrë një shtysë së fuqishme nga zgjedhjet e 23 qershorit dhe partneriteti me SHBA-në do të ndihmojë Shqipërinë të ecë më shpejt në rrugën e zhvillimit dhe të integrimit. “Ne do ta bëjnë SHBA-në edhe më krenare për ndihmën që i kanë dhënë Shqipërisë për anëtarësimin në NATO dhe në BE” tha Meta.

 Arvizu: Mbështesim integrimin e Shqipërisë në BE

Ndërsa ambasadori Arvizu u shpreh se është takuar me kreun e LSI-së për t`i konfirmuar të ardhmen demokratike të Shqipërisë dhe anëtarisimin e saj në Bashkimin Europian.

“E falënderoj që gjeti mundësinë që gjeti të na presë dhe e falënderoj për kohën që na kushtoi pasi ai ka pasur një fushatë të lodhshme. Dhe arsyeja pse ndodhemi këtu është që të konfirmojmë të ardhmen demokratike e Shqipërisë dhe mbështetjen për në Bashkimin Europian. Sikurse janë në pritje për qeverinë e ardhshme, pritjet janë të larta, pritet një tranzicion i qetë dhe pres me kënaqësi të bashkëpunoj me z Meta dhe anëtarët e tjerë të koalicionit”, u shpreh Arvizu

Takimi me dy liderët e së majtës zhvillohet vetëm një ditë pasi në të gjithë vendin përfundoi procesi i numërimit të votave ku e majta fitoi bindshëm në zgjedhjet e 23 qershorit.

 

Prokuroria: Vendimi për 21 Janarin do të apelohet , GJYKATA AKUZON AMBASADORIN ARVIZU

by

Burime të sigurta konfirmuan se çështja do kalojë në Apel. Amb. Arvizu takon kryeprokurorin Llalla. Gjykata e Tiranës: Ambasada ndërhyn në proces…/

Nga Armand Mero/

Në Shqipëri burime të Prokurorisë së Përgjithshme i thanë sot Zërit të Amerikës se do të bëhet ankim në gjykatën e Apelit ndaj vendimi të djeshëm të Gjykatës së Tiranës e cila shpalli dje të pafajshëm komandantin e Gardës së Republikës Ndrea Prendi dhe përgjegjësin e njësisë speciale Agim Llupo të akuzuar për vrasjen e tre prej katër manifestuesve që u qëlluan me armë zjarri gjatë protestave të opozitës në 21 Janar të vitit 2011. Sot në mëngjes prokurori i Përgjithshëm Adriatik Llalla pati një takim me ambasadorin amerikan Alexander Arvizu i cili rikonfirmoi qëndrimin ndaj vendimit të djeshëm të gjykatës, e cila përmes një njoftimi e cilësoi sot deklaratën e ambasadës amerikane si një ndërhyrje në proces. Por sipas ambasadorit Arvizu akuza të tilla ishin të pabaza.Prokuroria shqiptare deklaroi dje se ajo do të priste zbardhjen e vendimit të Gjykatës së Tiranës për cështjen e 21 janarit, për të përcaktuar hapat e mëtejshëm që do të ndërmerrte. Sot burime nga Prokuroria e Përgjithshme, i thanë Zërit të Amerikës se vendimi që shpalli të pafajshëm dy drejtuesit e lartë të Gardës së Republikës, “do të cohej në Gjykatën e Apelit”, pavarësisht motivacionit mbi të cilin u mbështet dje Gjykata. Më herët në zyrën e Prokurorit të Përgjithshëm ishte ambasadori amerikan në Tiranë Aleksandër Arvizu.
Dje ambasada u shpreh e tronditur nga vendimi i pafajësisë për komandantët e Gardës duke vlerësuar se një vendim i tillë sipas saj “ka minuar besimin në aftësinë dhe gatishmërinë e sistemit gjyqësor shqiptar për të dhënë drejtësi në mënyrë të paanshme dhe transparente”. Që në mëngjes herët Gjykata e Tiranës ishte kundërpërgjigjur duke theksuar se “deklarata e ambasadës amerikane në Tiranë është shqetësuese dhe ndërhyn në procesin e rregullt ligjor përmes komenteve mbi një cështje përpara zbardhjes së vendimit, përpara qëndrimit të prokuorirsë mbi hapat e mundshëm dhe përpara mbylljes së procesit” duke bërë thirrje që të “shmanget cdo qëndrim paragjykues ndaj këtij procesi”.
Por ambasadori Arvizu e kundërshtoi deklaratën e Gjykatës: “Me gjithë respektin për deklaratën e Gjykatës së Rrethit Tiranë sot në mëngjes, që sugjeronte se SHBA po ndërhyn në një proces gjyqësor, nuk jam dakord. Kjo akuzë nuk ka bazë. Përfshirja jonë rrjedh drejtpërdrejt nga një kërkesë specifike e Prokurorit të Përgjithshëm dhe kjo kërkesë u mbështet nga qeveria e Shqipërisë”, tha ambasadori amerikan duke ju referuar asistencës teknike që u ofrua për hetim. Laboratori Byrosë amerikane të hetimit, Fbi realizoi ekspertizën nga e cila rezultoi se tre manifestuesë ishin vrarë me plumba të dalë nga arma e komandantit të Gardës Ndrea Prendi dhe përgjegjësit të njësisë speciale Agim Llupo.
Ambasadori amerikan I bëri komentet e tij në përfundim të takimit me kryeprokurorin Adriatik Llalla i cili më pas pasdite u thirr nga presidenti Bujar Nishani. Për ngjarjen reagoi sot edhe ambasadori i delegacionit të Bashkimit europian në Tiranë Ettore Sequi. Ai i bëri jehonë komenteve të mbrëmshme të komisionerit për Zgjerimin Stefan Fyle, i cili edhe një herë kishte përsëritur se “një sistem gjyqësor i papanshëm që të sigurojë procese gjyqësore të drejta është një parakusht në rrugën drejt BE dhe kishte bërë thirrje për shmangien e cdo polarizimi”.
Edhe Komiteti shqiptar i Helsinkit përmes një deklarate u shpreh i shqetësuar për vendimin e gjykatës i cili sipas këtij Komiteti “nuk të bind për drejtësinë dhe paanshmërinë e tij. Në të kundërtën, rrit edhe më tej mosbesimin e qytetarëve ndaj organeve të drejtësisë”. Komiteti Helsinikit vlerëson të gabuar edhe faktin që Gjykata ju referua një vendimi të Gjykatës së Strasburgut për të motivuar vendimin e saj, duke bërë, sipas Komitetit të Helsinkit “interpretime subjektive dhe të kundraligjshme”. Gjykata sipas këtij Komiteti nuk ka mbajtur parasysh se sipas Kodit penal të vendit “zbatimi i ligjit penal me analogji nuk lejohet”.

AMBASADORI ARVIZU KESHILLON ALEANCEN KUQ E ZI

by

Arvizu – Spahiut: Shmangni rrëshqitjen në retorika nacionaliste/

Ambasadori i SHBA-së në Tiranë Aleksandër Arvizu është takuar sot me kreun e aleancës “Kuqezi” Kreshnik Spahiu.
Takimi mes ambasadorit Arvizu dhe Spahiut është zhvilluar në zyrat qëndrore të kësaj force politike ndërsa në fokus të bisedimeve kanë qënë zgjedhjet e 23 qershorit.
Në një prononcim për mediat pas takimit, ambasadori Arvizu ka vlerësuar konkurrencën në politikë por ka këshilluar të shmanget rrëshqitja drejt retorikës nacionaliste.
“Konkurrenca politike është gjë e mirë, në çdo lloj demokracie duhet të ketë një konkurrencë të tillë. Për këtë arsye vlerësojmë pjesëmarrjen e saj aktive në këtë fushatë. Kemi folur për platformën, theksin e fortë që kanë, shtetin ligjor dhe antikorrupsionin. Ne gjithashtu folëm për atë që është e rëndësishme për çdo parti në vend dhe SHBA, që të flitet në mënyrë të moderuar për vazhdimësinë në rajon prandaj e kam nxitur Spahiun në këtë kuptim që patriotizmi është gjë e mirë, por është e rëndësishme që në axhendën tuaj të shmanget tundimi që të rrëshqitet drejt retorikës nacionaliste, e cila mund të jetë kundër stabilitetit dhe moderacionit për të cilën folëm dhe kemi marrë garanci prej tij dhe lidershipit të AK-së që në fakt politika e tyre do të jetë siguria” tha Arvizu.
Ndërsa kreu i AK-së Kreshnik Spahiu është shprehur se forca politike që ai përfaqëson do të publikojë platformën politike e cila do të ketë në fokus luftën kundër korrupsionit.
“Shqipëria është në prag të zgjedhjeve më vendimtare për shqiptarët, demokracinë, të drejtat e njeriut dhe për të ardhmen e procesit të gjithë shqipatreve në rajon dhe natyrisht për standardet e integrimit ta gjithë shqiptarëve na BE. AK tashmë do ta prezantoja programin dhe platformen e saj të orientuar në një luftë pa kompromis kundër korrupsionit, kundër krimit të organizuar, pastrimit të parave, për ta nxjerrë për të parën herë nga harta e zezë Shqipërinë, si një nga vendet më të korruptuar në të gjithë Europën si një nga vendet e përfshira në trafiqe dhe me probleme të krimit të organizuar ” tha Spahiu.
Ai ka theksuar gjithashtu se AK-ja do të kërkojë edhe hartimin e një ligji për kufizimin e mandateve të lidershipit politik.
“Aleanca “Kuqezi” do të kërkojë një ligj për vendosjen e standarteve ashtu si në SHBA-ja ku ndryshon lideri edhe në Shqipëri të kufizohet mandati i lidershipit politik shqiptar, jo më shumë se dy mandate, duke filluar nga kryetarët e komunave, të bashkive, kryeminitri, presidenti, liderët e partive, etj” tha Spahiu.(BS)