Me 11 mars 1926, kryetari i Federatës Vatra, që në atë kohë ishte Aqile Tasi, që përfundoi në Burgun e Burrelit nga diktatura komuniste, pat marrë një letër nga kryetarët e Qarkut të Gjirokastrës. Letra nënshkruhej nga kryetarët e Bashkive të provincës së Gjirokastërs, Bajo Topulli, Arshi Sheh, Koco Harito, Ferdi Kumbaro, Islam Këlcyra, R. Muzalli, Fan Adhamidhi, Jani K. Foto dhe Ilias Zëri. Në fund të shkresës ishte vendosur vula e Bashkisë së Gjirokastrës.

Në letër shkruhej:Zoti Kryetar;

Të inspiruar prej dëshirës së popullit të  Gjirokastrës në të cilën muarën pjesë të gjithë kryetarët e Bashkive të Qarkut, dhe u vendos me një za si shenjë mirënjohje ndaj kryetarit të Parë të Republikës Ahmet Bej Zogu, shpëtimtarit t’Atdheut, t’i dedikohet një vilë presidenciale. Me këtë rast lusim nxehtësisht Kryesinë e Vatrës të ndërmjetësojë n’apelin tonë që u bëjmë mërgimtarëve të Qarkut të Gjirokastrës që ndodhen në Amerikë me lutjen që të na përkrahin me ndihmat materiale të tyre me këtë vepër të shkëlqyer. Ndihmat të mblidhen nga Kryesia e Vatrës dhe t’i dërgohen Bashkisë së Gjirokastrës jo më vonë se në muajin maj 1926.

Lutemi z. Kryetar të pranoni nderimet e të gjithë popullit të këtij qarku.