Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Promovim barazisë gjinore

by

-Tryezë e OSBE: Oficerët burra të Policisë së Kosovës, avokues për barazinë gjinore/

1 barazia gjinore

PRIZREN, 18 Maj 2017-Gazeta DIELLI/ Oficerët burra të Policisë së Kosovës të bëhen avokues për barazinë gjinore, konkluduan pjesëmarrësit e tryezës së rrumbullakët të OSBE-së.Tryeza e rrumbullakët, e organizuar nga Misioni i OSBE-së në Kosovë, mbi rolin e zyrtarëve të lartë policorë burra në promovimin e barazisë gjinore, përfundoi punimet dyditore në Prevallë, afër Prizrenit.Në këtë tryezë të rrumbullakët morën pjesë drejtorë rajonalë të policisë dhe komandantë të stacioneve policore, përfaqësues të Shoqatës së Grave të Policisë së Kosovës, si dhe Forumit të Gjyqtareve dhe Prokuroreve. Tryeza është pjesë e përpjekjeve të Misionit për të shtuar angazhimin e burrave në promovimin e barazisë gjinore në institucionet e sigurisë publike.“Jam krenar që Policia e Kosovës ka pranuar të jetë pjesë e këtij procesi pionier. Angazhimi i burrave në avokim për barazi gjinore paraqet shembull të mirë për institucionet e tjera në atë se si të punohet drejt barazisë gjinore”, tha Jan Braathu, Shef i Misionit të OSBE-së në Kosovë, në adresimin e tij para pjesëmarrësve.

Në tryezën e rrumbullakët pjesëmarrësit rivlerësuan rolet aktuale gjinore në Kosovë, diskutuan për stereotipat e normat gjinore, si dhe çfarë mund të bëjnë burrat e gratë për ta tejkaluar pabarazinë. Ata erdhën në përfundimin që për avancim të mëtejmë të Policisë së Kosovës në një forcë policore me shumëllojshmëri gjinore, zyrtarët burra duhet të bëhen avokues të barazisë gjinore. Drejtorët e tetë drejtorive rajonale policore u zotuan të ndërmarrin hapa të vegjël, por konkretë, drejt arritjes së shumëllojshmërisë, duke përfshirë miratimin e rregulloreve të brendshme që kanë parasysh elementin gjinor për sa i përket balancës mes punës e jetës, trajnime të specializuara, dhe procese rekrutuese e mjedise pune me ndjeshmëri gjinore.

Shaban Shala, Drejtor i drejtoratit rajonal të Policisë së Kosovës në Pejë, theksoi se “gratë duhet të jenë në pozita vendimmarrëse dhe shpresoj se nuk do të kemi nevojë ta diskutojmë këtë çështje edhe shumë gjatë”.Misioni i OSBE-së ka mandat të mbrojë dhe promovojë të drejtat e njeriut dhe të komuniteteve, demokratizimin dhe zhvillimin e sektorit të sigurisë publike. Misioni kryen monitorime të rregullta dhe avokon për pjesëmarrje të baraspeshuar gjinore në institucione publike, si dhe avancime institucionale që kontribuojnë në barazi gjinore./b.j/

Instituti i Historisë në Kosovë, pesëdhjetë vjet veprimtari

by

-Presidenti Thaçi mori pjesë në shënimin e 50 vjetorit të themelimit të Institutit të Historisë “Ali Hadri”/

1 Inst i Historise 50 vjet

PRISHTINË, 15 Maj 2017-Gazeta DIELLI/ Presidenti i Republikës së Kosovës, Hashim Thaçi, mori pjesë sot në shënimin e 50 vjetorit të themelimit të Institutit të Historisë “Ali Hadri”.Presidenti Thaçi, tha se një ndër institucionet më të rëndësishme shkencore të Kosovës padyshim se është Instituti i Historisë, dhe se meriton të vlerësohet për kontributin që ka dhënë.“Pesëdhjetë vjet veprimtari e Institutit të Historisë meriton të vlerësohet si kontribut për ndriçimin e ngjarjeve nëpër të cilat ka kaluar Kosova dhe historia e popullit shqiptar për liri dhe emancipim kombëtar, politik dhe kulturor” tha presidenti Thaçi.

Duke vlerësuar lart kontributin e këtij Instituti në periudha të ndryshme të vendit, kreu i shtetit, tha se rrugëtimi dhe fati i Institutit të Historisë së Kosovës, ishte rrugëtim i vet Kosovës nëpër të gjitha periudhat që ka kaluar që nga themelimi i Institutit me sfidat, ballafaqimet, vështirësitë, me rreziqet, me ndjekjet, me burgosjet, diferencimet deri në ngadhënjimin përfundimtar të së vërtetës për Kosovën.

Midis përpjekjeve për të thënë të vërtetën dhe shtrëngesave ideologjike, Instituti i Historisë ngadhënjeu.Duke vlerësuar lart figurën e historianit, emrin e të cilit e mban vetë Instituti i Historisë, presidenti Thaçi, tha “Ali Hadri e ndjeu peshën e diferencimit dhe anatemimit  nga politika komuniste jo vetëm jugosllave.Ai më tej tha se reformimi i institucioneve shkencore dhe kulturore është para së gjithash reformim i mendimit, i qasjeve metodologjike dhe ndërdisiplinore.“Kosova tashmë është një vend demokratik dhe të gjitha  pengesat dhe detyrimet ideologjike të e shkruarjes së historisë sipas porosisë kanë përfunduar një herë e përgjithmonë’, vijoi presidenti Thaçi.Presidenti Thaçi tha se është mundësia e rishkrimit të historisë mbi bazën e objektivitetit dhe saktësisë shkencore.“E them këtë për arsye se ende mendohet se mund të bëhet edhe më tepër për të zbërthyer të vërtetën e plotë edhe të kontributit të Kosovës në rolin e pavarësisë së Shqipërisë, rolin e Kosovës të periudhës në mes dy luftërave botërore, por para së gjithash, tash flas pak edhe si historian jo në grada ta larta shkencore”, shtoi Thaçi.Ai ka bërë thirrje që mos të deformohet e kaluara. “Si student i shumicës prej jush, që para së gjithash të mos na ndodhin deformime siç kanë ndodhur në të kaluarën, kur një studiues magjistronte me temën “Kundërrevolucioni në Drenicë”, ndërsa doktoronte me temën “Lufa çlirimtare në Drenicë” për të njëjtën periudhë, për të njëjtat personalitete”, theksoi presidenti Thaçi.

Ekzistojnë të gjitha parakushtet që të tjerët të mos krijojnë modele të pasqyrimit të historisë sonë.“Gjithashtu dua të potencoj dhe duhet të tejkalohet mendoj edhe qëndrimi i disa historianëve të huaj që janë agjenda kryekëput politike, të katedrave të ndryshme, të cilat apriori i përgatisin studiuesit e rinj që i këshillojnë që të mos bazohen qind për qind në burimet e historiografisë shqiptare. Ata hapin ide të ndryshme, teza të ndryshme, krejt dezinformuese prej Skënderbeut e deri në ditët e sotme të historisë së kombit shqiptar”, tha presidenti Thaçi.

Duke iu premtuar përkrahjen e institucioneve të shtetit të Kosovës për të vërtetën dhe historinë e kombit tonë, presidenti Thaçi tha se meriton të thuhet e vërteta e pandikuar politikisht, ideologjikisht apo rajonalisht.“Është një histori e pasur, e lavdishme, histori që meriton për të thënë të vërtetën dhe vetëm të vërtetën, pa ideologji, pa ndikime politike, pa ndikime rajonale, për historinë në përgjithësi, por edhe për personalitete që i kanë pri çlirimit të Kosovës, bërjes së Kosovës së pavarur, bërjes së Shqipërisë dhe bërjes së kombit shqiptar”, shtoi ai./b.j/

Kosova, zhvillim të qëndrueshëm ekonomik

by

Kosova, zhvillim të qëndrueshëm ekonomik dhe ulje të ndjeshme të papunësisë/

-Konferenca e pestë ndërkombëtare “Aktivizimi i resurseve të zhvillimit ekonomik”, organizuar nga Instituti Riinvest, e cila njëherësh shënon përvjetorin e 22-të të themelimit të këtij Instituti/

1 Mustafa Konf Nderkomb

-Kryeministri Mustafa: Është arritur zhvillim i qëndrueshëm ekonomik dhe ulje e ndjeshme e papunësisë/PRISHTINË, 15 Maj 2017-Gazeta DIELLI/ Kryeministri i Republikës së Kosovës, Isa Mustafa, mori sot pjesë në Konferencën e pestë ndërkombëtare “Aktivizimi i resurseve të zhvillimit ekonomik”, të organizuar nga Instituti Riinvest, e cila njëherësh shënon përvjetorin e 22-të të themelimit të këtij Instituti.

Me këtë rast, kryeministri Mustafa vlerësoi lartë punën e Riinvestit që në kohë të vështira nisi zhvillimin e hulumtimeve dhe shkencës në Kosovë.

“Është insistim, kurajo, por mbi të gjitha vizion i njerëzve që para kaq viteve kishin vendosur për themelimin e këtij Instituti dhe që gjithë këtyre viteve punuan në mënyrë shumë të angazhuar dhe me përkushtim shumë të madh që hulumtimet e tyre të shërbejnë për zhvillimin ekonomik, për orientimet afatgjata zhvillimore dhe për reformat substanciale, të cilat janë bërë në vendin tonë. Instituti Riinvest është një historik i pasur i vendit, janë studime dhe analiza shumë të vlefshme, është ndër burimet më kredibile të analizave dhe të dhënave shkencore të Kosovës”, tha Mustafa.

Duke kujtuar periudhën që ka kaluar në këtë Institut, kryeministri Mustafa përmendi edhe punën e madhe që ka bërë Riinvesti dhe që përmes bashkëpunimit ndërkombëtar me institute dhe universitete të ndryshme, ka mundësuar studime kualitative dhe marrjen e titujve doktor shkence dhe magjistër i ekonomisë për shumë të rinj në Kosovë.

“Shumëkush do ta konsideronte si veprim të pakohë faktin se ky institut ndërmerrte hulumtime për politika ekonomike para kaq viteve, por janë pikërisht hulumtimet e këtij Instituti që kanë kontribuar thelbësisht në arsyetimin e qëndrueshmërisë ekonomike të Kosovës dhe në faza shumë të rëndësishme të bisedimeve në Rambuje dhe negociatat në Vjenë. Ka qenë një bazament tepër i rëndësishëm i të dhënave që janë shfrytëzuar në fazën e shtetndërtimit të Kosovës”, tha kryeministri.

Nisur nga vetë titulli i konferencës, kryeministri Mustafa, tha se dëshmohet se ky Institut ka ende çfarë t’i jap Kosovës, duke theksuar rëndësinë e bazimit të politikave efikase ekonomike sidomos në fushat e zhvillimit makroekonomik.

Duke iu referuar ekspertëve që kanë reflektuar dijen e tyre në këtë fushë, kryeministri theksoi se Instituti ka bërë punë të madhe me rekomandimet e dhëna, edhe kur ato nuk janë pranuar në momente të caktuara.
“Në qoftë se i kthehemi situatës në vend, gjatë qeverisjes mbi dyvjeçare, ne kemi pasur një bashkëpunim mjaft të mirë dhe kemi qenë të interesuar që të marrim të gjitha sugjerimet shkencore për të adresuar një rrugë, e cila ka bazament të zhvillimit. Mbi këtë bazë, ne kemi arritur që të rrisim rritjen vjetore ekonomike, rreth 4 për qind, nga ajo që kemi trashëguar në 1.2 për qind. Ajo që na gëzon është se, edhe duke respektuar të gjeturat e këtij Instituti, ne kemi arrit që këtë zhvillim ekonomik ta bazojmë në sektorin privat, që është një zhvillim shumë i qëndrueshëm, dhe është një zhvillim që mund të them se siguron zhvillim, i cili mund të rritet në proporcione gjeometrike, dhe për të cilën ne mund të shpresojmë se edhe këtë vit edhe vitin e ardhshëm, edhe vitet në vijim, do të kemi gjithmonë rritje ekonomike mbi rritjen e tanishme ekonomike, që do të siguroj zvogëlim të papunësisë, do të siguroj punësim produktiv, do të siguroj konkurrueshmëri në raport me ekonomitë tjera regjionale, dhe në ekonominë e tregut të Bashkimit Evropian si treg unik, në të cilin ne tani kemi qasje në bazë të nënshkrimit të Marrëveshjes së Stabilizim Asociimit”, tha kryeministri Mustafa.

Gjatë kësaj kohe, kryeministri Mustafa tha po ashtu se papunësia është ulur nga 35 për qind në 27 për qind.

Ndonëse ky numër mund të jetë më i ulët, kryeministri tha se ky është problem i madh, sidomos i të rinjve dhe grave, duke e vlerësuar të rëndësishëm debatin shkencor të kësaj Konference, në mënyrë që të gjinden mënyrat më të mira të angazhimit produktiv të të rinjve dhe grave, duke nisur nga harmonizimi i sistemit arsimor në të gjitha nivelet, me kërkesat e tregut të punës.
Edhe resurset natyrore, sipas kryeministrit, duhet të vihen në shërbim të zhvillimit ekonomik, dhe në shërbim të përparësive ekonomike të cilat i ka Kosova, në krahasim me vendet tjera në regjion dhe në krahasim me vendet tjera të tregut të Bashkimit Evropian.

“Ne kemi resurse minerare, ne kemi toka të pëlleshme, ne kemi dije profesionale dhe dije shkencore, të cilat mund t’i vëmë në shërbim të zhvillimit ekonomik, me një qasje shkencore dhe me një qasje profesionale. Unë shpresoj se institucionet e tilla dhe Institutet e tilla, siç është Riinvesti, do të na ofrojnë zgjidhje të cilat do t’i shërbejnë qytetarëve të Republikës së Kosovës, jo fushatave dhe zgjedhjeve, por zhvillimit ekonomik, sepse çdo gjë tjetër është e kalueshme, ndërkaq zhvillimi ekonomik, perspektiva ekonomike e këtij vendi, është çështje e përhershme”, tha kryeministri Mustafa, duke shprehur përkrahjen e institucioneve të Kosovës.

Ministri i Financave, Avdullah Hoti, tha se tash e sa vjet ky Institut ka vendosur standarde gjithnjë e më të larta për fushën e hulumtimeve.

“Sot, vlerësimet që i jep Instituti Riinvest merren për bazë në vendimmarrje, sigurisht në Qeverinë e Kosovës, por edhe në institucione tjera ndërkombëtare që punojnë bashkë me ne në Kosovë. Nga ky këndvështrim, unë jam shumë i nderuar që kemi arritur të formalizojmë si Ministri e Financave, një bashkëpunim me Institutin Riinvest, për të publikuar në baza të rregullta pasqyrën makroekonomike, kuartale”, tha ministri Hoti.

Ministri Hoti, tha se nga këndvështrimi i Ministrisë së Financave, parimet bazë për zhvillimin e politikave ishin transparenca dhe gjithpërfshirja.

“Këtë e kemi dëshmuar së fundi edhe me atë që ne në Ministri e quajmë Portal i Transparencës, ku mund të shihen në baza mujore të dhënat 11 vjeçare për të hyrat, shpenzimet dhe gjithë indikatorët tjerë ekonomik dhe financiar në vend. Unë besoj shumë që ky publikim do ta qartësoj situatën ekonomike dhe sociale në Kosovë, dhe në masë të madhe do t’i orientojë pritjet e hulumtuesve dhe bizneseve në veçanti për periudhën e ardhshme”, tha ministri Hoti.

Alban Hashani, drejtor i kërkimeve në Institutin Riinvest, prezantoi pasqyrën makroekonomike të tremujorit të parë 2017, duke theksuar ndër të tjera se pavarësisht problemeve me të cilat përballet ekonomia e Kosovës, megjithatë Kosova ka mbajtur një normë pozitive të rritjes, e cila ka shënuar përmirësim në vitet e fundit.

Më pas u bë prezantimi i Raportit “Ambienti Biznesor në Kosovë 2016”, si dhe i zhvilloi punimet paneli diskutues, ku ishin të pranishëm përfaqësuesit e institucioneve, organizatave ndërkombëtare financiare si dhe ekspertë të ekonomisë.Në sesionin e pasdites, do të bëhet prezantimi i punimeve shkencore të ekspertëve të ekonomisë vendorë dhe ndërkombëtarë./b.j/

Kosovë-Trashëgimia Kulturore pa Kufij – Shqipëri (CHwB Albania)

by

1 Muzeu2 Kulture pa kufij

 -Kampi Rajonal i Restaurimit nga Fondacioni “Trashëgimia Kulturore pa Kufij – Shqipëri” (CHwB Albania), me temë “Konservimi dhe interpretimi i objekteve muzeale”, me 20 profesionistë të rinj dhe 8 ligjerues e konservues nga Ballkani dhe Europa/
 PRISHTINË, 15 Maj 2017-Gazeta DIELLI/ Në Muzeun e Kosovës, ka filluar sot Kampi Rajonal i Restaurimit nga Fondacioni “Trashëgimia Kulturore pa Kufij – Shqipëri” (CHwB Albania), me temë “Konservimi dhe interpretimi i objekteve muzeale”, me 20 profesionistë të rinj dhe 8 ligjerues e konservues nga Ballkani dhe Europa.
Pjesëmarrësit do të fokusohen në konservimin e objekteve dhe interpretim në Muzeun e Kosovës. Ligjëratat dhe ushtrimet që do të mbahen përgjatë Kampit do të mbulojnë tema si: konservimi dhe rijetëzimi i objekteve muzeale, principet dhe metodat e dokumentimit, si dhe teori dhe ushtrime të interpretimit të trashëgimisë. Pjesëmarrësit do të punojnë nën drejtimin e një ekipi restauratorësh ndërkombëtarë dhe stafit të Muzeut të Kosovës. Objektet e punës variojnë nga ato të gurit, qeramikës, metalit, tekstilit, si dhe objekte të bëra nga materiale të përzier. Ky Kamp Rajonal i Restaurimit organizohet në partneritet me Muzeun e Kosovës, si dhe mbështetet financiarisht nga Shteti i Suedisë.
Kampi do të zgjatë deri më 26 Maj 2017 (ora 09:00-18-00).
 *** 
Sot, në ditën e tretë ka filluar të marr formë murali “Ne jemi trashëgimia”, i cili prezanton kreativitetin e nxënësve të inspiruar nga thesari muzeor duke e pasqyruar atë në kontekstin artistik. Ky mural, është pjesë e programit edukativ mes Muzeut të Kosovës dhe Shkollës Teknike “28 Nëntori”, në Prishtinë. Murali në fjalë, pritet të përfundojë me 18 Maj 2017, në Ditën Ndërkombëtare të Muzeve./b.j/

KOSOVA PËRGATITET PËR ZGJEDHJE

by

-Qeveria në detyrë pas mocionit të mosbesimit zhvillon mbledhjen e pare/

*QEVERIA E KOSOVËS, 4.944.900 EURO PËR ORGANIZIMIN E ZGJEDHJEVE NË 11 QERSHOR /

2 qeveria kosove

 -Pas shpërndarjes së Kuvendit të Kosovë, Kryesia në mbledhjen e pare/ 
 -KQZ në mbledhjen e dytë për përgatitjet e zgjedhjeve të parakohshme parlamentare të 11 qershorit/
-PERIUDHA E APLIKIMIT PËR REGJISTRIM PËR VOTIM JASHTË KOSOVËS
15 MAJ – 22 MAJ 2017/
 
 PRISHTINË, 15 Maj 2017-Gazeta DIELLI-Behlul Jashari/ Për miratimin e buxhetit për zgjedhjet e parakohshme parlamentare, qeveria e Kosovës zhvilloi sot mbledhjen e 145-të, të 20-tën në 2017-tën, ndërsa të parën si qeveri në detyrë pasi u rrëzua në 10 maj në seancën e Kuvendit me 78 vota pro mocionit të mosbesimit, 34 kundër e 3 abstenime, derisa në sallë  ishin 115 deputetë të parlamentit 120 anëtarësh.
Mbledhja e qeverisë së Kosovës ishte paralajmëruar për të hënën e para një jave, të 8 majit, por u shty derisa në kohën e nisjes nuk kishin shkuar zëvëndëskryeministri e ministrat nga partia më e madhe e koalicionit qeverisës, PDK, e lideri i saj e kryeparlamentari Kadri Veseli ndodhej në takim me liderin e partisë së dytë të koalicionit, LDK, kryemunistrin Isa Mustafa.
“Pas diskutimeve të partnerëve të koalicionit qeverisës PDK-LDK, ku ishin të pranishëm edhe përfaqësuesit e Shteteve të Bashkuara të Amerikës, u arrit dakordimi që mbledhja e kabinetit qeveritar ku do të shqyrtohet Projektligji për Ratifikimin e Marrëveshjes për Kufirin Shtetëror ndërmjet Republikës së Kosovës dhe Malit të Zi, të mbahet pas seancës së Kuvendit të Republikës së Kosovës, që do të zhvillohet të mërkurën”, bëhej e ditur para një jave në komunikatën për shtyp nga Kryeministria.
 Por, në mbledhjen e sotme të qeverisë nuk ishte në axhendë Projektligji për Ratifikimin e Marrëveshjes për Kufirin Shtetëror ndërmjet Republikës së Kosovës dhe Malit të Zi e as procedimi i tij, pasi votimi me shumicë pro mocionit të mosbesimit ishte edhe vetëshpërndarje e Kuvendit. Menjëherë pas seancës së mosbesimit ndaj qeverisë, shpërndarja e Legjislaturës së pestë të Kuvendit të Kosovës u dekretua në 10 maj nga Presidenti i Republikës, Hashim Thaçi,  i cili më tej, pas konsultimieve me partitë në 11 maj dekretoi shpalljen e zgjedhjeve të parakohshme parlamentare për t’u mbajtur pas një muaji – në 11 qershir 2017.
Caktimi i datës së zgjedhjeve menjëherë mobilizoi për përgatitjet Komisionin Qendror Zgjedhor të Kosovës, i cili zhvilloi mbledhje edhe sot.
Ndërsa, sipas vendimit të KQZ-së të 11 majit për caktimin e afateve të aktiviteteve, aplikimi i  subjekteve politike dhe kandidatëve për zgjedhje ka nisur që atë ditë dhe përfundon për një javë në 19 maj 2017.
Afati i tërheqjes së shortit për renditjen në fletëvotim do të jetë 27 maji 2017.
Afati për të caktuar kufizimin e shpenzimeve për fushatë filloi në 11 maj dhe mbaron në 15 maj 2017.
Fushata zgjedhore si dhe afatet për tubimet zgjedhore do të fillojnë në 31 maj dhe do të përfundojnë në 9 qershor 2017.
Dorëzimi i kërkesave për akreditimin e organizatave për vëzhgimin e zgjedhjeve dhe vëzhgueseve me fillim në 11 maj përfundon në 4 qershor 2017.
Aplikimi për regjistrim si votues jashtë Kosovës fillon në 15 maj dhe do të përfundojë në 22 maj 2017.
Për organizimin e zgjedhjeve të parakohshme parlamentare Komisioni Qendror i Zgjedhjeve, duke u mbështetur në ligj, mori vendim që të shkurtojë afatet kohore në përputhje me rrethanat, miratoi Planin Operacional dhe Planin e Buxhetit në vlerën 4 milionë e 944 mijë e 900 euro.
Sipas Ligjit për Zgjedhjet e Përgjithshme, dita kur duhet të mbahen zgjedhjet e parakohshme duhet të jetë ditë e diel, jo më herët se 30 ditë dhe jo më vonë se 45 ditë nga shpërndarja e Kuvendit.
Në Kosovë, zgjedhjet e parakohshme parlamentare të 11 qershorit 2017 do jenë të gjashtat në liri, të tretat në pavarësi, ndërsa zhvillohen tre vjet pas zgjedhjeve të kaluara të 8 qershorit 2014, që ishin poashtu të parakohshme pas vetëshpërndarjes së Kuvendit.
Në Kosovën e lirë nga qershori 1999, të parat zgjedhje parlamentare u mbajtën në 17 nëntor 2001.
Legjislatura e tretë ishte ajo që ka hyrë në histori me shpallen e Pavarësisë së Kosovës në 17 shkurt 2008.
Pas zgjedhjeve të parakohshme parlamentare në këtë pranverë, Kosova këtë vit, në vjeshtë, mban edhe zgjedhje lokale, në afat të rregullt, katër vjet pas zhvillimit të tyre në 3 nëntorin 2013.
Në deklarata e biseda para shpërndarjes së Kuvendit të Kosovës një nga alternativat ishte që nëse koalicioni qeverisës nuk do qëndronte deri në fund të mandatit në vitin 2018, zgjedhjet parlamentare dhe lokale të mbahen përnjëherë edhe në 2017-tën, ashtu si kanë ndodhur edhe më parë para 10 viteve,  në 17 nëntor 2007, që kështu të kishte edhe kursim buxheti, që mos të mbahen njëherë të parat e pastaj të dytat brenda një viti, në pak muaj distancë.
Tash në largim pas mocionit të mosbesimit, qeveria e Kosovës, e koalicionit të dy partive më të madha, PDK e LDK, ku përfshihen edhe parti të vogëla dhe minoritetet, është zgjedhur në 9 dhjetor 2014 në Kuvendin kosovar të konstituuar një ditë më parë, gjashtë muaj pas zgjedhjeve të parakohëshme parlamentare të 8 qershorit.
Kuvendi i Kosovës, në seancën e 10 majit 2017 me shumë debate, replika e përplasje, me votat edhe të grupit parlamentar të partisë më të madhe e koalicionit qeverisës PDK miratoi mocionin e mosbesimit ndaj qeverisë së Republikës së Kosovës, të propozuar nga tre grupet parlamentare opozitare: Nisma për Kosovën, Aleanca për Ardhmërinë e Kosovës dhe Lëvizja Vetëvendosje, mbështetur me nënshkrime nga 42 deputetë.
 
PERIUDHA E APLIKIMIT PËR REGJISTRIM PËR VOTIM JASHTË KOSOVËS
15 MAJ – 22 MAJ 2017 
Komisioni Qendror i Zgjedhjeve njofton se Periudha e Aplikimit për Regjistrim për Votim jashtë Kosovës ka filluar sot, 15 maj dhe do të përfundojë më 22 maj 2017.
Gjatë kësaj periudhe, keni mundësi të aplikoni për tu regjistruar si votues jashtë Kosovës, përmes tri mundësive: përmes postës; përmes e-mailit dhe përmes fax-it.
Nëse ju aplikoni për tu regjistruar përmes e-mailit, aplikacionin duhet ta dërgoni vetëm për veten tuaj, përmes llogarisë elektronike personale (e-mail) dhe më së shumti, ju njoftojmë se aplikacioniet mund t’i dërgoni për rrethin e ngushtë familjarë dhe jo për personat tjerë.
Për më shumë informacione vizitojeni faqen e KQZ-së: www.kqz-ks.org
PAS SHPËRNDARJES SË KUVENDIT TË KOSOVË, KRYESIA NË MBLEDHJEN E PARË
 
Kryesia e Kuvendit të Kosovës zhvillon sot mbledhjen e parë pas mocionit të mosbesimit për qeverinë e shpërndarjes së legjislaturës së pestë në seancën e fundit plenare të mërkurën e javës së kaluar.
Në njoftimin e dërguar nga Kuvendi nuk bëhet e ditur axhenda. Edh pas shpërndarjes së Kuvendit të Kosovës vazhdojnë funksionet në kryerje të detyrës kryeparlamentari dhe Kryesia.

QEVERIA E KOSOVËS, 4.944.900 EURO PËR ORGANIZIMIN E ZGJEDHJEVE NË 11 QERSHOR /

-Qeveria e Kosovës mbajti mbledhjen e rregullt/

PRISHTINË, 15 Maj 2017-Gazeta DIELLI/ Qeveria e Republikës së Kosovës, e drejtuar nga kryeministri Isa Mustafa, ka zhvilluar mbledhjen e rregullt, të 145-tën me radhë, në të cilën ka miratuar vendime nga fusha e përgjegjësive kushtetuese dhe ligjore.

Në mbledhjen e sotme, Qeveria miratoi kërkesën e Komisionit Qendror të Zgjedhjeve lidhur me ndarjen e mjeteve financiare për organizimin e zgjedhjeve të parakohshme, në vlerë prej 4.944.900 euro, të cilat janë të nevojshme për organizimin e zgjedhjeve më 11 qershor.

Miratimin e kabinetit qeveritar e mori edhe koncept-dokumenti për qasje në dokumentet publike, që ka për qëllim të ofrojë informata të mjaftueshme për problemet që janë hasur në këtë fushë dhe mënyrën se si do të rregullohet kjo fushë. Është rregulluar në plotni edhe qasja në dokumente publike në përputhje të plotë me politikat qeveritare.

Në këtë koncept-dokument propozohet edhe ndryshimi i dy ligjeve të tjera: Ligji për Qasje në Dokumente Publike dhe Ligji për Mbrojtjen e të Dhënave Personale. “Jam i bindur se në hartimin e plotë të këtyre dy projektligjeve, do të merren parasysh edhe opinionet e rekomanduara nga grupi i ekspertëve, të cilët do të mundësojnë një transparencë të plotë dhe qasje në dokumente publike për qytetarët tonë”, tha zëvendëskryeministri Hajredin Kuçi.

Në mbledhjen e sotme, u miratua edhe rregullorja për Organizimin e Brendshëm dhe Sistematizimin e Vendeve të Punës në Agjencinë për Barazi Gjinore.

Ky Agjencion funksionon në kuadër të Zyrës së Kryeministrit dhe ka për qëllim që të bëhet një sistematizim më i mirë i kësaj Agjencie, me qëllim që të përcaktojë qartë misionin, qëllimin dhe përgjegjësitë, si dhe strukturën organizative të Agjencionit për Barazi Gjinore.

Edhe vendimi për ndryshimin dhe plotësimin e vendimit të Qeverisë nr.10/104 të datës 10.08.2016 për emërimin e Komisionit për Kompensimin e Viktimave të Krimit, mori miratimin e kabinetit qeveritar.

Kabineti qeveritar miratoi edhe koncept-dokumentin për Organizimin e Administratës Publike të Republikës së Kosovës, i cili vendos opsione për zgjidhjen e problemeve që janë identifikuar në aspektin e organizimit të Administratës Publike, duke i mundësuar Qeverisë në këtë rast që të vendos për zgjidhjen më të mirë të shpalosur në pjesën e rekomandimeve të këtij koncept dokumenti.

Koncept-dokumenti propozon zgjidhje në katër segmente kryesore:

1) Vendosjen e rregullave për themelimin e agjencive të pavarura sipas Nenit 142 të Kushtetutës, kuadrin e përgjegjshmërisë për institucionet kushtetuese të pavarura dhe agjencitë e pavarura dhe rregulla minimale për organizimin e brendshëm të këtyre institucioneve e të cilat mundësojnë zbatimin e ligjit të shërbimit civil dhe të pagave;

2) Rregulla për administratën shtetërore në aspekt të vendosjes së parimeve themelore, themelimin e organeve në varësi të Zyrës së Kryeministrit dhe ministrive, organizimit të brendshëm, organizimit territorial, mbikëqyrjen dhe delegimin;

3) Rregulla për administratën komunale që përfshinë organizmin e brendshëm, ofrimin e shërbimeve publike të drejtpërdrejta për qytetarë dhe delegimin;

4) Rregulla për menaxhimin e tranzicionit.

Me rekomandimet e këtij koncept-dokumenti mëtohet të bëhet qartësimi dhe zgjidhja më e mirë për organizimin e administratës publike, siç janë: themelimi, përgjegjshmëria, organizimi, standardet dhe llogaridhënia.

Miratimin e kabinetit qeveritar, e mori edhe koncept-dokumenti për Shërbimin Civil, i cili propozon zgjidhje për qartësimin e fushëveprimit të shërbimit civil si dhe vendosjen e rregullave minimale për të punësuarit tjerë në sektorin publik, rregulla më të mira për rekrutimin dhe përfshirjen e rekrutimit në grup dhe në mënyrë të centralizuar për degën e ekzekutivit, rregulla për ngritjen e trupës së nivelit të lartë drejtues, përmirësimin dhe qartësimin e mëtutjeshëm të rregullave për karrierën dhe klasifikimin e vendeve të punës, menaxhimin e burimeve njerëzore, vlerësimin e rezultateve në punë, ngritjen e kapaciteteve, pezullimin e marrëdhënies së punës, disiplinës dhe mënyrës së zgjedhjes së ankesave.

Kryeministri Isa Mustafa tha se të dy këto koncept-dokumente janë të lidhura me kërkesat nga Bashkimi Evropian për pakon e ligjeve që ndërlidhet pastaj edhe me ligjin për pagat, ndërkohë që ministritë mund të punojnë në përgatitjen e tyre dhe pasi të bëhet konstituuimi i Qeverisë së re të procedohet.

Në mbledhjen e sotme, u miratua edhe kërkesa për ndarjen e mjeteve financiare për Shoqatat Familjare të të Zhdukurve të Kosovës. Për Shoqatën e Krushës së Vogël, u ndanë 3.000 euro, për Shoqatën “Thirrjet e nënave” në Gjakovë, 2.000 euro dhe për Shoqatën “Ngritja e Zërit” në Skenderaj, 500 euro.

Qeveria mori vendim edhe për ndarjen e mjeteve në shumë prej 90.499 euro për Panelin Zgjedhor për Ankesa dhe Parashtresa, për realizimin e procesit ankimor lidhur me mbajtjen e zgjedhjeve të parakohshme për Kuvendin e Kosovës./b.j/