Behlul Jashari – Page 23 – Dielli

Kosova, bashkëpunim të plotë në çështjet nga Marrëveshja në Washington

October 12, 2020 by dgreca

-Ministri Kuçi në takim të veçantë me ndihmës zv.sekretarin e Energjisë në SHBA, Matthew Zais, përpos që i ofroi bashkëpunim të plotë në çështjet e dala nga Marrëveshja e 4 Shtatorit në Washington, ai i kërkoi përkrahje në zbatimin e Kornizën e Strategjisë së re të Energjisë në Kosovë. Intensifikohet puna me ekspertët amerikanë që do të punojnë në fizibilitetin e Liqenit të Ujmanit/

PRISHTINË, 12 Tetor 2020-Gazeta DIELLI nga korrespondenti në Kosovë/ Ministri i Ekonomisë dhe Ambientit, Blerim Kuçi ka marrë pjesë në takimin bilateral me delegacionin e Qeverisë së SHBA-ve, të udhëhequr nga i dërguari special për dialogun Kosovë – Serbi, Richard Grenell, bashkë me Kryeshefin Ekzekutiv të Korporatës Ndërkombëtare të Financave dhe Zhvillimit në SHBA (DFC) Adam Boehler, përfaqësues të USAID, Kryetarin e Bankës së Eksport-Importit të Shteteve të Bashkuara (EXIM), si dhe zyrtarë të tjerë të lartë të qeverisë nga Departamentet e Energjisë dhe Tregtisë në SHBA.

Në margjina të takimit mes dy delegacioneve, ministri Kuçi është takuar me zëvendës sekretarin për Energji në Departamentin e Shtetit, Matthew Zais.

Takimi me z. Zais kishte për qëllim pranim-dorëzimin e letrës së sekretarit për Energji në Departamentin e Shtetit, Dan Brouillette. Kjo letër përmban një njoftim se në muajt e ardhshëm do të intensifikohet puna me ekspertët amerikanë që do të punojnë në fizibilitetin e Liqenit të Ujmanit, si pjesë e Marrëveshjes së 4 Shtatorin në Washington.

Mes tjerash në këtë takim është diskutuar për Strategjinë e re të Energjisë në Kosovë, modalitet e ecjes përpara me energji dhe sfidat që po kalon Kosova në këtë sektor. Këto sfida lidhen me sigurinë e furnizimit dhe mundësinë e diversifikimit të burimeve të gjenerimit.

Përtej harmonizimit të hapave të mëtutjeshëm dhe bashkëpunimit të ndërsjellë, Kuçi dhe Zais u shprehën të kënaqur se tash ka edhe një instrument financiar mbështetës, siç është Korporata Ndërkombëtare e Financave dhe Zhvillimit në SHBA (DFC).

Ministri Blerim Kuçi ndër të tjera i ka prezantuar zëvendës sekretarin për Energji në Departamentin e Shtetit, kornizën mbi të cilën do të ndërtohet Strategjia e re e Energjisë, e bazuar në burimet e Energjisë së Ripërtritshme, burimet e Linjitit, burimet e Gazit dhe aplikimi i masave efiçiente të energjisë.

Si përfundim, ministri Kuçi përpos që i ofroi bashkëpunim të plotë në çështjet e dala nga Marrëveshja e 4 Shtatorit në Washington, ai i kërkoi përkrahje në zbatimin e Kornizën e Strategjisë së re të Energjisë në Kosovë.

KOSOVË-RIFILLON USHTRIMI “SHPATA E ARGJENDTË”

October 10, 2020 by dgreca

-Forca e Kosovës (KFOR) e udhëhequr nga NATO-ja ushtrime për reagim ndaj situatave emergjente. Deri në vitin 2019, këto ushtrime ishin planifikuar dhe mbajtur nën udhëheqjen e KFOR-it, por këtë vit u vendos që institucionet në Kosovë të trajnohen dhe stërviten për t’i mundësuar atyre që të planifikojnë ushtrimin e tyre të shkallës së gjerë të reagimit ndaj situatave emergjencave dhe të shfaqin publikisht kapacitetet e tyre/

PRISHTINË, 10 Tetor 2020-Gazeta DIELLI nga korrespondenti në Kosovë/ Pas një ndërprerjeje për shkak të Covid-19, ushtrimi i KFOR-it “Shpata e Argjendtë” rifilloi këtë javë. Që nga viti 2012, Forca e Kosovës (KFOR) e udhëhequr nga NATO-ja ka mbajtur ushtrimin vjetor, i cili ka për qëllim të testojë dhe përmirësojë bashkëpunimin e institucioneve të ndryshme në Kosovë, si dhe Organizatave të Sigurisë të Kosovës bashkë me njësitë e KFOR-it në fushën e reagimit emergjent.

Deri në vitin 2019, këto ushtrime ishin planifikuar dhe mbajtur nën udhëheqjen e KFOR-it, por këtë vit u vendos që institucionet në Kosovë të trajnohen dhe stërviten për t’i mundësuar atyre që të planifikojnë ushtrimin e tyre të shkallës së gjerë të reagimit ndaj situatave emergjencave dhe të shfaqin publikisht kapacitetet e tyre.

Ushtrimi ‘Shpata e Argjendtë’ do të përfshijë përsëri Këshillin e Sigurisë së Kosovës, Agjencinë për Menaxhimin e Emergjencave, Policinë e Kosovës, Kryqin e Kuq të Kosovës dhe Forcën e Sigurisë së Kosovës, të cilat tashmë kishin marrë pjesë në module trajnimi që rezultuan të dobishme në aspektin e koordinimit për të reaguara në situate reale emergjente të shkaktuara nga Covid19.

Faza e re e ushtrimit ‘Shpata e Argjendtë 2020-2021′ rifilloi më 6 – 8 tetor, në Akademinë e Kosovës për Siguri Publike, në Vushtrri, paralelisht me dorëzimin e përgjegjësive nga zëvendës-komandanti i KFOR-it në largim, gjeneralbrigade Laurent Michaud i Ushtrisë Zvicerane që drejtoi stërvitjen deri më tani, te gjeneralbrigade Guenter Schoepf. Fokusi i fazës së re ishte rifreskimi i trajnimit të mëparshëm dhe dy koncepte më të rëndësishme: Procesi i Mësimeve të Mësuara dhe Komunikimi i përbashkët institucional për të promovuar kapacitetet dhe bashkëpunimin e Institucioneve në Kosovë dhe Organizatave të Sigurisë së Kosovës.

Faza tjetër do të përfshijë katër Ngjarje Kryesore që kanë një Pandemi si temë paralele dhe do të zhvillohen në muajt e ardhshëm. Ushtrimi i konceptit është planifikuar në gjysmën e parë të vitit 2021 dhe do të pasohet nga përgatitjet e të gjithë pjesëmarrësve në nivelin taktik në funksion të stërvitjes së planifikuar për në Shtator 2021.Ushtrimi ‘Shpata e Argjendtë 2020-2021’ do të përmbyllet me Raportin Përfundimtar të Ushtrimit, i cili do të mbledhë të gjitha përvojat në mënyrë që të përmirësojë procedurat dhe strukturat e secilës organizatë dhe gjithashtu për të përmirësuar Planin për Reagim Kombëtar.

MINISTRI I JASHTËM I GREQISË NË KOSOVË

October 9, 2020 by dgreca

FORCOHEN RAPORTET NË DREJTIM TË ASPIRATËS PËR NJOHJE-

-“Roli mbështetës i Greqisë për Kosovën është tepër i rëndësishëm, ngaqë është vend anëtar i BE-së dhe NATO-s, organizata këto që Kosova aspiron të jetë pjesë e tyre”, tha kryeministri Hoti/

-Kryeparlamentarja Osmani ka falënderuar Greqinë për mbështetjen, duke shpresuar që ajo të konkretizohet me njohjen formale të shtetit të Kosovës/

-“Me Greqinë na lidh edhe miqësia e përbashkët me SHBA-të, e cila është element i jashtëzakonshëm në ndërtimin dhe konsolidimin themeleve të forta të marrëdhënieve tona”, u shpreh Ministrja Haradinaj-Stublla/

Gazeta DIELLI nga korrespondenti në Kosovë Behlul Jashari

PRISHTINË, 9 Tetor 2020/ Ministri i Punëve të Jashtme të Greqisë, Nikos Dendias, sot në mëngjes u prit me ceremoni zyrtare në Aeroportin Ndërkombëtar të Prishtinës “Adem Jashari” nga Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla.

“Me Greqinë na lidh edhe miqësia e përbashkët me SHBA-të, e cila është element i jashtëzakonshëm në ndërtimin dhe konsolidimin themeleve të forta të marrëdhënieve tona”, u shpreh Ministrja Haradinaj-Stublla, ndërkohë që takimin zyrtar me homologun grek e zhvilloi në mesditë në Ministrinë e Punëve të Jashtme dhe të Diasporës.

KRYEMINISTRI HOTI: ROLI MBËSHTETËS I GREQISË PËR KOSOVËN ËSHTË TEPËR I RËNDËSISHËM

Kryeministri i Republikës së Kosovës, Avdullah Hoti, ka pritur sot ministrin e Punëve të Jashtme të Greqisë, Nikos Dendias, me të cilin ka diskutuar për zhvillimet politike në vend, thellimin e bashkëpunimit ndërmjet dy vendeve, kryesisht në fushën ekonomike, si dhe procesin e dialogut final ndërmjet Republikës së Kosovës dhe asaj të Serbisë, i cili duhet të përfundojë me njohje reciproke.

“Roli mbështetës i Greqisë për Kosovën është tepër i rëndësishëm, ngaqë është vend anëtar i BE-së dhe NATO-s, organizata këto që Kosova aspiron të jetë pjesë e tyre”, tha kryeministri Hoti.

Po ashtu, kryeministri Hoti dhe ministri Dendias u zotuan në thellimin e bashkëpunimit ekonomik ndërmjet Kosovës dhe Greqisë, me theks të veçantë në fushën e energjisë.

Ministri Dendias, duke e falënderuar kryeministrin Hoti për pritjen, theksoi se Greqia mbetet e përkushtuar që ta ndihmojë Kosovën në rrugëtimin e saj euro-atlantik, si dhe në begatimin e mëtejmë të bashkëpunimit ekonomik ndërmjet dy vendeve.

KRYEPARLAMENTARJA OSMANI KA NJOFTUAR MINISTRIN GREK DENDIAS PËR KONSTITUIMIN E GRUPIT TË MIQËSISË ME GREQINË

Kryetarja e Kuvendit të Kosovës, dr.Vjosa Osmani sot u takua me ministrin e jashtëm të Greqisë, Nikos Dendias.

Zonja Osmani ka falënderuar Greqinë për mbështetjen, duke shpresuar që ajo të konkretizohet me njohjen formale të shtetit të Kosovës.

Në takim u diskutua për bashkëpunimin bilateral ndërmjet të të dy vendeve, me fokus të posaçëm në sferën e ekonomisë, shëndetësisë dhe arsimit.

Për më tepër, u diskutua edhe për zhvillimet në fushën e dialogut dhe procesin e integrimit evropian, me ç’rast falënderoi Greqinë për mbështetje në procesin e liberalizimit të vizave.

Kryetarja Osmani theksoi se Kuvendi i Kosovës ka përcaktuar vijat e kuqe në raport me dialogun me Serbinë.

Të dy bashkëbiseduesit folën edhe për situatën me menaxhimin e pandemisë, efekteve të saj si dhe vështirësitë ekonomike.

Më tej, kryetarja e Kuvendit ka shfaqur interesimin për zhvillimin e bashkëpunimit ndërparlamentar dhe në këtë kontekst e ka njoftuar ministrin grek për konstituimin e Grupit të miqësisë me Greqinë.

MINISTRJA HARADINAJ-STUBLLA: FORCOHEN RAPORTET MIDIS DY VENDEVE NË DREJTIM TË ASPIRATËS PËR NJOHJE

Ministrja e Punëve të Jashtme dhe Diasporës e Republikës së Kosovës, Meliza Haradinaj – Stublla, pasi i shprehu mirëseardhje në Aeroport, ka zhvilluar në Ministri një takim shumë miqësor dhe produktiv me homologun e saj grek, Nikos Dendias, me të cilin ka diskutuar tema të rëndësishme për raportet midis dy vendeve, domosdoshmërinë për forcimin dhe avancimin e tyre, sidomos në sferat e interesit të përbashkët, por edhe çështje politike me ndikim në rajon.
“E kuptojmë pozicionin e Greqisë ndaj pavarësisë së Kosovës, dhe kjo është një arsye shtesë përse jemi të interesuar në zhvillimin dhe avancimin e raporteve tona ekzistuese. Natyrisht, ne do të mirëprisnim vendimin e Greqisë për njohjen e Kosovës, mirëpo jemi të përkushtuar t’i forcojmë raportet eksizstuese, si dhe t’i thellojmë në drejtim të duhur”, i tha Ministrja Haradinaj Stublla homologut të saj.
Ministrja Haradinaj-Stublla kërkoi nga homologu i saj që Greqia si një vend me ndikim jo vetëm në rajon, por edhe si vend anëtar i Bashkimit Evropian, të ndihmojë qartësinë e objektivit final dhe afatit kohor nën lehtësimin evropian të dialogut Kosovë – Serbi, me qëllim të zgjidhjes përfundimtare që nuk mund të jetë më pak se njohja e ndërsjellë në kufijtë ekzistues.
“Marrëveshja e Uashingtonit për Normalizimin Ekonomik me Serbinë e lehtësuar nga SHBA-të dhe Presidenti Trump është një hap i madh drejt zgjidhjes finale. Kjo marrëveshje mbi të gjitha është hap i rëndësishëm për zhvillimin e rajonit, prandaj si Kosovë jemi të përkushtuar për të përmbushur të gjitha pikat e saj dhe presim që edhe Serbia do të implementojë zotimet e saj karshi SHBA-ve dhe Republikës së Kosovës”, shtoi Ministrja Haradinaj-Stublla.

Nga ana e tij, Ministri i Jashtëm i Greqisë ka falëndëruar homologen e tij për mikëpritjen e veçantë, si dhe ka mirëpritur angazhimin e shtuar të Kosovës për të zgjeruar dhe shfrytëzuar momentumin politik për rajonin, dhe për dy vendet tona, për të fuqizuar dialogun ekonomik dhe tregtar dhe në veçanti jetësimin e projekteve energjetike sipas Marrëveshjes së Uashingtonit, që në të ardhmen pritet të jenë edhe një lidhje tjetër e rëndësishme mes Kosovës dhe Greqisë. Ministri poashtu konfirmoi mbështetjen e plotë të Greqisë në jetësimin e liberalizmit të vizave për qytetarët e Kosovës si dhe në përgjithësi për drejtimin Evropian të Kosovës.

KOSOVA, ÇMIME NË FUSHËN E MUZIKËS

October 6, 2020 by dgreca

-Çmimi Kombëtar për Vepër Jetësore “Niketë Dardani” i është dhënë kompozitorit Vinçenc Gjini, me motivacionin “Profesionist i shumanshëm dhe me kontribute të shquara gjysmëshekullore në muzikë, me vështrim kozmopolit”. Në një ceremoni sot në Ministrinë e Kulturës, Rinisë dhe Sportit janë ndarë edhe çmime tjera në fushën e muzikës/

PRISHTINË, 6 Tetor 2020-Gazeta DIELLI/ Në Kosovë, në një ceremoni të organizuar sot, në kabinetin e Ministres së Kulturës, Rinisë dhe Sportit, Vlora Dumoshi, janë ndarë çmimet në fushën e muzikës.

Çmimi Kombëtar për Vepër Jetësore “Niketë Dardani” i është dhënë kompozitorit Vinçenc Gjini, me motivacionin “Profesionist i shumanshëm dhe me kontribute të shquara gjysmëshekullore në muzikë, me vështrim kozmopolit”, vlerësim ky që është bërë nga Juria Profesionale në përbërje të: Prof. dr. Vasil Tole, kompozitor, kryetar i jurisë, Prof. Rafet Rudi, kompozitor dhe Baki Jashari, kompozitor dhe dirigjent, të dy anëtarë.

Çmimet e tjera vjetore u ndanë për laureatët:

Valton Beqirit iu dha çmimi për vepra vokalo-instrumentale, konkretisht për veprën “Rrugëtimi”, e cila e trajton motivin e qëndresës përmes larmisë muzikore të etnosit shqiptar;

Kreshnik Aliçkajt iu dha çmimi për veprën “Koncert” për kitarë dhe orkestër, me motivacionin e krijimit të marrëdhënies dinamike mes instrumentit dhe orkestrës, në fushën e veprave orkestrale-simfonike dhe koncertante;

Për vepra kamertale, çmimi iu nda Drinor Zymberit për veprën “Trance” për orkestër harqesh, për kompaktësinë dhe gjetjen kompozicionale;

Çmimi për vepër korale iu dha Hajrullah Sylës për veprën “Ubi Caritas” për kor miks me motivacionin e evidentimit të thelbit antifonal të krijimit përmes strukturave kompozicionale të thjeshta dhe emocionale;

Dhe çmimi për veprat solistike dhe duo iu dha kompozitorit Mendi Mengjiqi për veprën “Discantus” për risjelljen e stilit mesjetar të të kënduarit në kohën moderne duke zbuluar tingëllimat e reja.

Në rolin e nikoqires së ceremonisë, ministrja Vlora Dumoshi, i uroi laureatët për krijimet dhe punën e tyre, duke pohuar se çmimet e ndara nga MKRS-ja janë vetëm një vlerësim modest institucional për vlerat e mëdha të cilat i përçojnë veprat e kompozitorëve dhe muzikantëve të Kosovës.

“Kosova ka krijues të talentuar në fushën e artit e të kulturës, e posaçërisht në fushën e muzikës dhe si shoqëri ne krenohemi me vlerat që kemi, ndonëse si popull me një të kaluar të vështirë historike, kemi arritur të nxjerrim gjithherë vepra të mëdha. Si ministre, jam e nderuar dhe e përkushtuar të përkrah dhe të shtyjë përpara veprat që kanë vlera të mirëfillta e të cilat vlerësohen nga profesionistët dhe kritikët e fushave përkatëse të artit”, tha ndër të tjera ministrja Dumoshi, duke e falënderuar edhe Jurinë Profesionale për vlerësimin dhe punën e tyre.

Baki Jashari pjesë e jurisë, tha se “Gjini pa dyshim e meriton çmimin për veprimtarinë e tij dhe për kontributin e tij shumëvjeçar në muzikë.”

Ndërkaq motra e kompozitorit Viçenc Gjinit, Maria Gjini Kurti tregoi se për arsye shëndetësore ai sot nuk ishte i pranishëm në ndarjen e çmimeve.

Kompozitori Valton Beqiri fitues për veprën orkestrale-instrumentale për vitin 2019 për veprën “Rrugëtimi” falënderoi ministren Dumoshi për angazhimin e saj si dhe jurinë për vlerësimin.

“Kjo dëshmon se çmimi është duke e dhënë rezultatin e vet dhe falënderoj ministren për angazhimin e saj dhe shpresoj që në të ardhmen të ketë vepra më të mëdha”, ka thënë ai.

Kosovë-Ministria e Kulturës ndau çmimet për teatër

October 2, 2020 by dgreca

-Fituesit e çmimeve falënderuan për përkrahjen e vazhdueshme dhe marrjen e çmimeve e vlerësuan si një mirënjohje institucionale dhe një inkurajim për të punuar edhe më shumë në krijimtarinë e tyre artistike/

PRISHTINË, 2 Tetor 2020-Gazeta DIELLI/ Në Kosovë Ministria e Kulturës ndau çmimet vjetore për teatër.

Sot, zëvendësministrat e Ministrisë së Kulturës, Rinisë dhe Sportit Engelbert Zefaj dhe Halil Matoshi, në një ceremoni solemne, kanë bërë ndarjen çmimeve për teatër për vitin 2019.

Çmimi Kombëtar për Vepër Jetësore, që u ndahet personaliteteve të shquara në fushën e teatrit, për suksesin, të arriturat gjatë karrierës, risitë dhe kontributin e veçantë në avancimin e teatrit, në mënyrë unanime iu nda aktorit dhe regjisorit Luan Daka. Ky çmim iu nda atij duke u bazuar në kreativitetin e thellë, inovacionin dhe origjinalitetin që ai përfaqëson në fushën e artit dramatik, si në teatër, film, televizion dhe radio. Daka në rrafshin artistik është autor i teksteve skenike, regjisor i shfaqjeve, regjisor i radiodramave, aktor i suksesshëm i teatrit dhe filmit, ekspert i fushës teatrore dhe filmike, anëtar i jurive profesionale dhe në rrafshin akademik nga viti 1988 me përkushtimin dhe profesionalizmin tij pedagogjik ka nxjerrë me dhjetëra gjenerata të suksesshme të aktorëve.

Çmimi vjetor për shfaqjen më të mirë, që ndahet për shfaqjen që ka treguar sukses të jashtëzakonshëm për nga vlerat, profesionalizmi, shikueshmëria dhe suksesi në prezantimin kombëtar gjatë vitit paraprak, me tri vota pro dhe dy kundër iu nda shfaqjes “ERVEHEJA” e regjisores Drita Begolli, me arsyetimin se kjo shfaqje është një vepër e jashtëzakonshme që korrespondon me realitetin e të gjitha kohërave. Shfaqja ka koncept, thellësi, guxim dhe art të nivelit të lartë.

Çmimi vjetor për regjinë më të mirë, që ndahet për regjinë kreative, inovative dhe origjinale, në mënyrë unanime iu nda regjisores Elmaze Nura për shfaqjen “KOPRRACI”. Këtë çmim juria e ka ndarë duke u bazuar në nivelin e lartë artistik, kreativitetin e thellë, inovacionin teatror, përkushtimin profesional dhe mjeshtërinë e lartë regjisoriale. Suksesi i jashtëzakonshëm i kësaj shfaqjeje si në rrafshin ndërkombëtar dhe atë vendor është arritur kryekëput në saje të regjisë së Nurës, e cila këtë art të sentencës e sjellë në mënyrë origjinale, të pëlqyeshme dhe me vlera të reja estetike. Me shfaqjen “KOPRRACI” Kosova është përfaqësuar në festivale të rëndësishme ndërkombëtare dhe mbarëkombëtare, duke marrë edhe shpërblim për regjinë më të mirë.

Çmimi vjetor për aktorin/aktoren më të mirë, që i ndahet aktorit/aktores që ka pasur performancë të shkëlqyeshme në një rol ose disa role teatrore, me shumicë votash, iu nda aktorit Adrian Morina për rolin në shfaqjen “Unë jam vetë grua”.

Me shfaqjen “Unë jam vetë grua” Adrian Morina ka sjellë në skenë rrëfimin e shkëlqyer të transgjinorit dhe përmes karakterit të tij ka sjellë një rol të kompletuar.

Çmimi vjetor për prezantim të suksesshëm ndërkombëtar, që u jepet produksioneve teatrore, regjisorit, aktorit, dramaturgut, skenografit apo krijuesit për performancën dhe suksesin në prezantimin ndërkombëtar, në mënyrë unanime iu nda organizatës kulturore “Qendra Multimedia”, e cila realizoi disa prezantime ndërkombëtare në festivale prestigjioze dhe në të njëjtën kohë ka bërë edhe prezantimin e Kosovës në fushën e teatrit.

Gjatë kësaj ceremonie zëvendësministri Zefaj e vlerësoi lart ndarjen e këtyre çmimeve dhe tha se “kam kënaqësinë që jemi të gjithë bashkë në këtë ditë të rëndësishme për teatrin ku ashtu siç është edhe tradita Ministria e Kulturës, Rinisë dhe Sportit shpërblen laureatët.”

Duke i uruar të gjithë për çmimet zëvendësministri Zefaj tha se “ndarja e këtyre çmimeve është një lloj respekti dhe mirënjohje nga ana e institucioneve për angazhimin dhe punën kreative të artistëve, andaj sot uroj që puna dhe sukseset të mos mungojnë as në vitet e ardhshme”.

Ndërsa, fituesit e këtyre çmimeve falënderuan ministren Dumoshi dhe zëvendësministrat Zefaj e Matoshi për përkrahjen e vazhdueshme dhe marrjen e çmimeve edhe ata e vlerësuan si një mirënjohje institucionale dhe një inkurajim për të punuar edhe më shumë në krijimtarinë e tyre artistike.