Behlul Jashari – Page 89 – Dielli

KOSOVË-Do rikthehet NEWBORN

February 15, 2018 by dgreca

-Prishtinë-Newborn i zhvendosur, do rikthehet me pamje të 10 vjetorit të Pavarësisë së Kosovës/

Gazeta DIELLI nga korrespondenti në Kosovë Behlul Jashari/

PRISHTINË, 15 Shkurt 2018/ Simboli i Pavarësisë së Kosovës, Newborn, në Sheshin Medlin Olbrajt në kryeqytet, Prishtinë, i vendosur para 10 viteve, ka ditë që nuk është në vendin e vet.Do rikthehet në prag të 17 Shkurtit, ditës së jubileut të 10 vjetorit të shpalljes së Pavarësisë, aty ku ishte, me pamje të re festive.Derisa po zhvendosej Newborn, në fillim të këtij muaji shkurt bëhej e ditur se po dërgohej për t’ia hequr ndryshkun e ngjyrat e pamjeve të viteve të kaluara dhe do rikthehet edhe më i bukur, me pamje të re, ashtu si është bërë traditë.

Në 10 vjetorin e Pavarësisë në Kosovë po zhvillohen aktivitete festive 10 ditëshe, nga 8 deri në 18 shkurt.Pavarësia e Kosovës, e shpallur në 17 Shkurtin historik 2008 deri tani është njohur nga 115 shtete anëtare të OKB-së.

Gjatë 10 viteve, Republika e Kosova ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jo-rezidentë në rreth 60 shtete.

Ansambli i Forcave Ajrore të SHBA në Festën e Kosovës

February 14, 2018 by dgreca

-Kosova 10 vjet pavarësi, në festë vjen Ansambli i Forcave Ajrore të SHBA-ve për Evropë/

Gazeta DIELLI nga korrespondenti në Kosovë Behlul Jashari/

PRISHTINË, 14 Shkurt 2018/ Ambasada Amerikane në Prishtinë deklaroi sot se mirëpret Ansamblin e Forcave Ajrore të SHBA-ve për Evropë (USAFE), i cili do të interpretojë me rastin e festimeve të Dhjetëvjetorit të Pavarësisë së Kosovës.“Kemi nderin që na është dhënë mundësia për të interpretuar në këtë ngjarje të veçantë,” tha nënkoloneli Don Schofield, komandant i Ansamblit USAFE, i cili do të shoqërojë përafërsisht 15 muzikantë gjatë këtij udhëtimi.“Interpretimet si ky krijojnë mundësi për ndërtimin e marrëdhënieve mes SHBA-ve dhe Kosovës duke forcuar mirëkuptimin dhe vlerësimin kulturor të ndërsjellë përmes angazhimeve popull-me-popull, partneriteteve, dhe miqësive”, u shpreh ai.Gjatë qëndrimit në Kosovë ansambli poashtu do të vizitojë trupat e SHBA-ve dhe të koalicionit në kuadër të Forcës së Kosovës, i njohur si KFOR, që është një forcë ndërkombëtare paqeruajtëse e udhëhequr nga NATO, e që gjendet në këtë vend që nga viti 1999. Orari i interpretimeve publike të ansamblit gjatë vizitës është si vijon:

Të enjten e 15 shkurtit në ora 20:00 në Bulevardin “Nënë Tereza” në Prishtinë dhe të dielën e 18 shkurtit në “Sheshin Shadërvan” në Prizren në orën 12:00, si dhe në kinemanë “Jusuf Gërvalla” në Pejë në orën 19:00.

14 February 2018

U.S. AIR FORCES IN EUROPE BAND IN KOSOVO

U.S. Embassy Pristina welcomes The United States Air Forces in Europe Band, who will perform at Kosovo’s 10^th Anniversary of Independence Celebrations.

“We’re honored to have the opportunity to play at this special event,” said Lt. Col. Don Schofield, USAFE Band commander, who will accompany approximately 15 musicians on the trip. “Performances like this provide an opportunity to build on U.S.-Kosovo relations by strengthening mutual understanding and cultural appreciation through people-to-people engagements, partnerships and friendships.”

While in Kosovo, the band will also visit U.S. and coalition troops at Kosovo Force, known as KFOR, a NATO-led international peacekeeping force which has been in the country since 1999.

The public schedule for the visit is as follows:

Thursday, February 15

20:00

Performance on Mother Teresa Blvd, Pristina

Open to the public

Sunday, February 18

12:00

Performance at Shadervan Square in Prizren

Open to the public

19:00

Performance at Jusuf Gërvalla Cinema in Peja

Open to the public

Amerika fuqishëm përkrahje Kosovës

February 13, 2018 by dgreca

-Kryeministri Ramush Haradinaj në mbledhjen e qeverisë: Mesazh i fuqishëm përkrahje i SHBA-ve për Kosovën/

-Qeveria ndanë 600,000 euro për shënimin e 10 vjetorit të pavarësisë së Kosovës/

Gazeta DIELLI nga korrespondenti në Kosovë Behlul Jashari/

PRISHTINË, 13 Shkurt 2018/ Kryeministri Ramush Haradinaj, sot pasdite në mbledhjen e qeverisë së Kosovës njoftoi kabinetin qeveritar për vizitën në Shtetet e Bashkuara të Amerikës, të cilën e ka vlerësuar të suksesshme. “Delegacioni i Kosovës ka pasur takime të rëndësishme dhe ka marrë një mesazh të fuqishëm të autoriteteve të Shteteve të Bashkuara të Amerikës se do të vazhdojë përkrahja dhe mbështetja e ecjes së Kosovës përpara”, theksoi Haradinaj në mbledhjen e qeverisë pas kthimit nga SHBA.Qeveria vendosi të ndajë 600,000 euro për realizimin e programit të Këshillit Organizativ për shënimin e 10 vjetorit të pavarësisë së Republikës së Kosovës.

Kryeministri Ramush Haradinaj deklaroi se sot ka marrë vendimin që në vendin e quajtur “Te rrethi” në hyrje të Prishtinës të vendoset flamuri i Kosovës. “17 Shkurti është data më e madhe e Kosovës, dhe ajo do të nderohet në mënyrën më dinjitoze”, u shpreh kreu i qeverisë duke folur për festimet 10 vjetorit të pavarësisë.

Në mbledhjen e qeverisë u themelu edhe Këshilli organizativ për manifestimin gjithëpopullor për shënimin e Epopesë së Ushtrisë Çlirimtare të Kosovës dhe u ndanë 100 mijë euro për organizoimin që do jetë nën patronatin e kryeministrit të Republikës së Kosovës.

Zëvendëskryeministri, Fatmir Limaj, njoftoi kabinetin qeveritar për situatën e rëndë të Kompleksit Memorial “Adem Jashari” në Prekaz, nga mungesa e investimeve për konservimin e objekteve të kullave të Jasharajve. Ai theksoi se deri në mbledhjen e ardhshme do të analizohet situata e krijuar dhe do t’i rekomandohen qeverisë hapat që duhet të ndërmerren në mbrojtjen e këtij kompleksi që shënon një vlerë sublime të luftës çlirimtare.

Qeveria miratoi Projektligjin për Ndryshimin dhe Plotësimin e ligjit për statistikat zyrtare të Republikës së Kosovës. Ky projektligj është në përputhje me legjislacionin evropian.

Më tej në mbledhjen e qeverisë u miratun dy nisma të Ministrisë së Financave për arritjen e marrëveshjeve ndërkombëtare të granteve me Bakën Evropiane për Rindërtim dhe Zhvillim dhe me Bankën Gjermane për Zhvillim.

Miratimin e qeverisë e mori edhe Rregullorja për organizimin e brendshëm dhe sistematizimin e vendeve të punës në Ministrinë e Diasporës dhe Investimeve Strategjike.

Qeveria e Kosovës miratoi edhe Raportin e pasqyrave preliminare financiare për ekzekutimin e buxhetit gjatë vitit 2017. Kabineti qeveritar në mbledhjen e sotme themeloi edhe Komitetin Drejtues Ndërministror për zhvillimin e projektit “Autostrada Istog-Pejë-Deçan-Gjakovë-Prizren”.Qeveria emëroi Ekrem Kastratin në pozitën e Sekretarit të Përgjithshëm të Ministrisë së Arsimit Shkencës dhe Teknologjisë.

President Donald Trump, Letër Thaçit për 10 Vjetorin

February 13, 2018 by dgreca

1 Thaci dhe Trump

Donald Trump: Kosova, partnere e rëndësishme e Amerikës/

-Kosova 10 vjet pavarësi, presidenti Thaçi pranoi një letër urimi nga presidenti i SHBA-së, Donald Trump/

Gazeta DIELLI nga korrespondenti në Kosovë Behlul Jashari/

PRISHTINË, 13 Shkurt 2018/ Presidenti i Republikës së Kosovës, Hashim Thaçi, në prag të shënimit të dhjetëvjetorit të pavarësisë, përmes ambasadorit amerikan në Kosovë ka pranuar një letër urimi nga Presidenti i SHBA-së, Donald Trump.

Letra e plotë:

I nderuar z. President,
Në emër të popullit amerikan, e përgëzoj Kosovën në përvjetorin e dhjetë të pavarësisë së saj.

Gjatë dhjetë vjetëve të fundit, Kosova ka bërë hapa të mëdhenj në forcimin e sovranitetit dhe demokracisë shumetnike. Ndërkohë që duhet bërë edhe më shumë punë, ne përgëzojmë përparimin tuaj.
Ndërsa vendi juaj po hyn në dekadën e dytë të shtetësisë, Shtetet e Bashkuara janë të përkushtuara për të ndihmuar Kosovën që të ndërtojë themele të forta të parimeve të përbashkëta demokratike, bashkëpunimit rajonal dhe sundimit të së drejtës. Duke vepruar kështu, Kosova do të ndërmarrë hapa të mëtejshëm drejt integrimit në Komunitetin Perëndimor të Kombeve.

Ne e shikojmë Kosovën si një partnere të rëndësishme të Shteteve të Bashkuara. Në këtë rast historik i uroj gjithë të mirat qytetarëve të Kosovës.
Sinqerisht,

Donald Trump

***

LETRËN E URIMIT E SOLLI AMBASADORI I SHBA

Letrën e urimit të presidentit Trump e solli në Presidencën e Kosovës, i pritur nga presidenti Thaçi, ambasadori i SHBA në Prishtinë, Greg Delawie.

“Sot pranova një letër urimi nga Presidenti i SHBA-së, Donald Trump, në prag të shënimit të dhjetëvjetorit të pavarësisë. E falënderoj presidentin Trump për urimet e përzemërta dhe përkushtimin e tij për Kosovën. Populli ynë është me shumë me fat që ka një shtet mik kaq të fuqishëm, si SHBA-të”, është shprehur Thaçi.

Kosova përgatitet për festë-10 dite festime

February 11, 2018 by dgreca

Kosova plot flamuj feste në 10 vjetorin e Pavarësisë/

-Ekspozita Rrënjët e Shtetit e hapur në Sheshin Nënë Tereza në Prishtinë/

-Pjesë e veprimtarive festive për 10 vjetorin e pavarësisë, në Prishtinë kishte edhe spektakël parashutistësh të Federatës Aeronautike me flamuj të shtetit të Kosovës/

Kosova në 10 vjetorin e pavarësisë 10 ditë festime /

-Ekspozita Rrënjët e Shtetit e hapur në Sheshin Nënë Tereza në Prishtinë/

-Pjesë e veprimtarive festive për 10 vjetorin e pavarësisë, në Prishtinë kishte edhe spektakël parashutistësh të Federatës Aeronautike me flamuj të shtetit të Kosovës/

PRISHTINË, 11 Shkurt 2018- Gazeta DIELLI-Behlul Jashari/ Kosova me plot flamuj feste në 10 vjetorin e Pavarësisë pret ditën e 17 shkurtit të pas një jave me shumë festime, që po zhvillohen edhe sot, duke nisur në mengjes me “Vrapimi i pavarësisë” përgjatë 50 kilometrave nga Klina deri në Gllogjan, për të përfunduar në Koshare. Axhenda e festimeve të ditës së sotme përmbyllet në mbrëmje me ekspozitën multimediale “Midis ëndërrës dhe realitetit”, të Eliza Hoxhës, në Galerinë e Ministrisë së Kulturës dhe me muzikë me DJ në Sheshin “Zahir Pajaziti” në Prishtinë.

Në veprimtaritë e 10 ditëve të festimeve të 10 vjetorit të pavarësisë është edhe ekspozita “Rrënjët e Shtetit” e hapur në Sheshin “Nënë Tereza” në Prishtinë, e cila paraqet 50 vjet të rrugëtimit të Kosovës, nga demonstratat e vitit 1968 ku kërkohej statusi i Republikës deri në shpalljen e pavarësisë në 2008-tën, përmes ballinave e faqeve tjera të gazetave botërore që raportonin për zhvillimet në Kosovë.

Edhe sot në sheshet e kryeqytetit, Prishtinës, vazhdonin të ngriheshin flamujt e shtetit të shpallur në 17 Shkurtin historik 2008, e të njohur deri tani nga 115 vende anëtare të OKB-së.

Pjesë e veprimtarive festive për 10 vjetorin e pavarësisë në Prishtinë ishte edhe një spektakël parashutistësh të Federatës Aeronautike me flamuj të shtetit të Kosovës.

“Fluturimi i lirisë, një spektakël i shkëlqyer në qiell i anëtarëve të Federatës Aeronautike të Kosovës”, është shprehur me vlerësim presidenti i Republikës, Hashim Thaçi, nën patronatin e të cilit mbahen festimet e 10 vjetorit të shpalljes së pavarësisë, e në kuadër të të cilave këtë javë për jubileun e parë të shtetit iu adresua qeverisë në mbledhjen ku kryeminsitri Ramush Haradinaj njoftoi për përgatitjet.

“Rrugëtimi ynë, i Kosovës, është i qartë, i saktë dhe me vizion euroatlantik”, theksoi presidenti i Republikës, ndërsa bëri tre propozime: Për ndërtimin e një Kompleksi rezidencial të institucioneve shtetërore, të Muzeut të Pavarësisë dhe Obeliskut të Lirisë në Prishtinë.

“Në kuadër të manifestimeve për 10 vjetorin e Pavarësisë së Kosovës, gjatë 10 ditëve, nga 8 deri në 18 shkurt, organizohen një sërë aktivitetesh kulturore, sportive dhe politike. Në këto aktivitete do marrin pjesë zyrtarë të lartë shtetërorë dhe të institucioneve të ndryshme ndërkombëtare”, theksojnë në Presidencë.

Me mbështetje e organizim nga Ministria kosovare e Punëve të Jashtme, gjatë fundjaves së kaluar në Prishtinë janë mbledhur dhjetëra wikipedianë vullnetarë nga Shqipëria, Kosova e Maqedonia, ndërkohë që javën vijuese edhe nga vende tjera evropiane për ta pasuruar enciklopedinë e lire wikipedia me artikuj dhe fotografi mbi Kosovën.

Ky aktivitet, është organizuar me rastin e shënimit të vitit jubilar të 10-të vjetorit të Pavarësisë së Kosovës, ndërkohë që synohet që të vazhdojë të shtrihet në gjithë Kosovën, duke përfshirë vullnetarë të ri dhe kreativë.

Wikipedianët vullnetarë nëpërmjet Wiki-Academy Kosovo 2018 kanë pasuruar enciklopedinë Wikipedia me qindra artikujt dhe fotografi, ndërkohë që po aq pritet të shtohen edhe gjatë ditëve të ardhshme të punës dhe brenda dy punëtorive të radhës këtë fundjavë në Qendrën e Inovacionit të Kosovës.

Sipas Ministrisë së Jashtme, Kosova e pavarur deri tani ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jo-rezidentë në rreth 60 shtete.