DY KADETËT SHQIPTARË TË AKADEMISË USHATRAKE NË WEST POINT-NEW YORK, MYSAFIRË TË KRYETARIT TË VATRËS, Z. ELMI BERISHA/

– Kryetari i Vatrës z. Elmi Berisha shtroi drekë në nderim dhe respekt për të sapodiplomuarit Arelena Shala dhe Ylli Dalladaku, dy Kadetët Shqiptarë të Akademisë Ushatrake West Point, NY-, më e vjetra dhe më e famshmja në botë -/

Nga Dalip Greca/

              Shqiptarët, kudo ku jetojnë, në trojet etnike apo në mërgim, e kanë përjetuar me krenari lajmin e gëzuar të diplomimit të dy kadetëve shqiptarë nga Kosova; Arelena Shala dhe Ylli Dalldaku, në Akademinë 218 vjeçare të West Point në New York.

          Akademia federale 4 vjeçare në West Point mbart një histori interesante.Fillimisht West Point, u konceptua si një fortesë strategjike natyrale, gjatë Luftës së Revolucionit Amerikan, me pamje mbi lumin Hudson, 50 milje në veri të New York City. Fillimisht ishte Gjenerali George Washington, që e konstatoi faktin se West Point, me syrin e strategut të luftës, ishte një pozicion dominat lufte dhe aty vendosi komandën e tij më 1779, dhe britanikët nuk arritën asnjëherë të bëheshin zot të saj.

        Akademia e ka zanafillën historike që në fillim të viteve 1801-1802, kur Presidenti Thomas Jefferson projektoi akademinë e ardhshme, duke nënshkruar legjislacionin e nevojshmë për themelimin e Akademisë(1802), që, edhe sot pas 218 vitesh, vazhdon të mbartë historinë dhe famën.

Kampusi i Akademisë me ndërtesat e stilit Norman, të ndërtuara me granit  gri dhe zi, është edhe një destinacion turistik, me qendrën e vizitorëve dhe me muzeun më të vjetër të Ushtrisë të shteteve të Bashkauar të Amerikës.

         Kandidatët që synojnë këtë akademi duhet të aplikojnë në mënyrë të drejtëpërdrejtë në Akademi. Mësimet për kadetët financohen plotësisht nga Ushtria Amerikane, në këmbim të një detyrimi aktiv të shërbimit pas diplomimit. Rreth 1.300 kadetë hyjnë në Akademi çdo korrik, dhe arrijnë të diplomohen rreth 1000-1100.

Edhe pse sivjet momenti i diplomimit të 1100 kadetëve u krye në kushtet e Pandemisë,- parada në Parkun e kampusit, u krye me maska në fytyrë, por gjithsesi kadetët u ndjenë krenarë, aq më shumë se gëzimin e shtoi edhe Presidentit  Donald Trump.

…..Në drekën familjare që kryetari i Vatrës z. Elmi Berisha, shtroi në restorantin e tij PATSY’S, që ndodhet në Wappingers Falls,jo larg Akedemisë West Point, kishte ftuar edhe ambasadoren e Republikës së Kosvës në Washington Vlora Çitaku me zëvendësen e saj, biznesmenin e njohur Jim Xhema, një ndër kontributorët e mëdhenj të Çështjes së Kosovës në Washington, por edhe një dhurues i përhershëm në Komunitet,-kirurgun e njohur dr. Rifat Latifi dhe nga media: Halil Mula nga TV 21, Adem Belliu-TV Kultura Shqiptare dhe Kryeredaktorin e Gazetës “Diellit” Dalip Greca etj.

Dy kadetët, të shoqëruar nga roja të sigurisë prej akademisë, arritën në restorant rreth orës dy të pasdites të së premte, 19 qershor 2020. Ata u pritën sipas traditave shqiptare dhe u nderuan nga mikpritësit. Z. Elmi Berisha me djemtë ka dalë para restorantit dhe i ka shoqëruar, duke i prezantuar me të pranishmit. Me nga një gotë shampanjë u është uruar mirëseardhja, ndërkohë që tavolina është e mbushur sipas traditës shqiptare. Ishte fillimisht Ambasadorja Vlora Çitaku, që ka shprehur krenarinë e të gjithë shqiptarëve për diplomimin suksesshëm të dy kadeteve shqiptarë prej Kosove, Arelena Shala dhe Ylli Dalladaku, të parët e racës shqiptare, që u diplomuan në këtë akademi të famshme.- Na keni nderuar!-iu tha ajo!

Përmes emocionesh, duke iu drejtuar të dy kadeve, ambasadorja Çitaku, tha se shpirtërisht ajo dhe ambasada, kishin qenë pranë tyre dhe me ta, gjatë të katër viteve, kur ata përgatiteshin në Akademinë  West Point dhe përballonin programet e vështira.Ne, tha ambasadorja, jemi ndjerë krenarë që në kohën kur ju e fituat konkurimin e vështirë për t’u bërë pjesë të kësaj akademie. Me aftësitë tuaja, me inteligjencën tuaj, ju arritët që ta përballonit konkurencën e ashpër dhe shumë rigoroze. Përfundimi me sukses i akademisë prej të dy studentëve shqiptarë(ata u përfshin në 5 përqindshin e kadeteve më të mirë, që arritën rezultate shkëlqyeshëm), i kalon kufijtë e gëzimit dhe të krenarisë. Të gjithë , tha ambasadorja, ndjehemi krenarë për ju! Paçit suksese në Jetë!

         Një urim të veçantë u ka drejtuar kadetëve edhe biznesmeni Jim Xhema, duke i përgëzuar ata për përfaqësimin dinjitoz që i bënë Kosovës dhe Kombit Shqiptar,në akademinë  West Point.

Dr. Rifat Latifi, i  uroi dhe i përgëzoi kadetët për rezultate e shkëlqyera që arritën gjatë studimeve në akdeminë ushtarake, më të mirën në Botë, dhe i këshilloi ata, që edhe në jetë ta mbajnë lartë emrin e akademisë, ku u shkolluan.Ju ishit të parë shqiptarë që u diplomuat aty dhe kjo ka shumë rëndësi, por edhe në jetë ju duhet të jeni përherë në lartësinë e akademisë ku u diplomuat. Ju do te jëni Elita e ushtrisë së Kosovës!

Kryetari i Vatërs, z. Elmi Berisha, duke i uruar kadetët, tha se ndjehej krenar, dhe shpirtngrohtë, që ata ishin mysafirët e tij. Ju, tha ai, na keni nderuar dhe ne ndjehemi krenarë për Kosovën dhe mqiësinë me Shtete e Bashkuara të Amerikës. Pranimi juaj dhe diplomimi në Akademinë West Point, mbart shumë simbolika të lidhjeve të Kombit tonë me Popullin amerikan dhe këtë vend të bekuar. Ne shpresojmë shumë se diplomimi juaj në këtë akademi historike, do t’i shërbejë së ardhmes së Kosovës dhe forcimit të marrdhënieve të miqësisë së Kosovës me Amerikën. Kombi shqiptar përherë ka hedhur vështirimin drejt Amerikës për mbrojtje e ndihmë. Federata Vatra e ka bazuar luftën për mbrojtjen e Pavarërisë së Shqipërisë tek Washingtoni. Edhe presidenti historik i Kosovës dr. Ibrahim Rugova, këtu e shihte shpëtimin e Kosovës….

Duke iu drejtuar Kadeteve, z. Berisha, u tha: Unë ju shoh, ju, si vazhdimësi të kontributit të djemve shqiptaro-amerikanëve, që nën emrin e Batalionit”Atlantiku” shkuan për të luftuar për lirinë e Kosovës. Madje edhe më larg në histori, ju shoh  ju, si vazhdimësi e djemëve të Vatrës që në uniforma ushtarake, të stërvitur për 4 vite në SHBA(1916-1920),në vitin 1920, lanë Amerikën dhe shkuan në Shqipëri, për të mbrojtë kufijtë jugorë nga fqinji, madje arritën deri në Luftën e Vlorës, së bashku me Bandën Kombëtare”VATRA”. Kjo është vazhdimësi historike…Ndjehemi sinqerisht krenarë për Ju!

Ju falenderoj shumë që sot na dhatë kënaqësinë që të ishit mysafirët tanë. Z. Berisha falenderoi ambasadoren Vlora Çitaku, z. Jim Xhema, Dr. Rifta Latifi, median, që ishin pjesë e kësaj dreke familjare.

Gjatë drekës u bisedua për të ardhmen e kadetëve në shërbim të Kosovës, për familjet e tyre, për rujatjen e miqësive të fituara gjatë katër viteve në Akademi, por edhe për një vizitë të mundshme të kadetëve në Vatër, nëse e lejojnë rrethat etj.

Arelena Shala e lindur në Prizren, ndjehej krenare jo vetëm pse ka pasë nderin të përfaqësojë Kosovën dhe Kombin shqiptar në akademinë presitigjioze, por edhe se është e para femër e racës shqiptare që diplomohet në Akademinë e famshme. Ajo u diplomua në fushën e inteligjencës gjeo-hapsinore. Ndërsa kadeti Ylli Dalladaku, i lindur në Ferizaj,u diplomua për inxhinieri dhe aeronautikë.

Në Akademinë West Point është duke studiuar dhe një tjetër kadet nga Shqipëria. Ai është Enea Hilaj, që u pranua në qershor 2018.

Urojmë që të tjerë studentë shqiptarë të konkurojnë dhe të fitojnë të drejtën për të studuar në akademinë  West Point në New York.