Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

SOT, DITËLINDJA E 78-TË E PRESIDENTIT HISTORIK DR. IBRAHIM RUGOVA

by

KOMBI SHQIPTAR PËRKUJTON NË DITËLINDJEN E 78-TË PRESIDENTIN HISTORIK DOKTOR IBRAHIM RUGOVA

Sot i gjithë kombi shqiptar përkujton në ditëlindjen e tij të 78-të Presidentin Dr. Ibrahim Rugova, udhëheqësin, shtetarin, filozofin dhe themeluesin e Kosovës së pavarur e moderne.

Doktor Rugova ishte një mendje brilante dhe një kapacitet intelektual ndërkombëtar. Ai e ktheu Kosovën në një çështje ndërkombëtare duke bindur dhe mahnitur me urtësinë e tij politike dhe filozofinë e tij kancelaritë në Europën Perëndimore dhe diplomacinë në Uashington. Doktor Rugova kaloi një jetë në shërbim të atdheut, një mision në shërbim të kombit, një synim të vetëm jetësor për shtetndërtimin e institucioneve të forta e rritjes së mirëqënies së qytetarëve në Kosovën e lirë. Gjithçka në Kosovë lidhet dhe mban emrin e Presidentit historik Ibrahim Rugovës. Jeta dhe veprimtaria e tij ishin kurdoherë në shërbim të shtetit dhe çështjes kombëtare. Për çdo shqiptar Ibrahim Rugova do të jetë një udhëheqës dhe një burrë shteti në kufijtë e një lideri të pavdekshëm, të një miti të pazëvëndësueshëm. Doktor Rugova ishte prijësi historik dhe lideri shpirtëror në krejt hapësirat shqipfolëse dhe jo vetëm. Emri i tij është gërmëzuar me shkronja ari në historinë e lavdishme të Kosovës së bekuar. Kosova sot kalon ditë jo të mira. Luftëtarët e lirisë janë ende në kërkim të drejtësisë ndërkombëtare. Një pikëpyetje e madhe europiane është ngritur rreth shtetit më të ri në Europë. Asnjëherë më shumë se sot Kosovës dhe kombit shqiptar i nevojitet testamenti filozofik i Presidentit Rugova: unifikim shtetëror e kombëtar, bashkëpunim dhe dashuri mes njëri-tjetrit. Dr. Rugova dhe veprimtaria e tij patriotike, politike e diplomatike do të mbahet mend për jetë të jetëve, në memorien e çdo shqiptari si politikani legjendar që vuri themelet e Shtetit të lirë e të pavarur të Kosovës. Doktor Rugova ia arriti qëllimit në realizimin e ëndrrës për liri falë urtësisë, zgjuarsisë e vizionit të tij largpamës për mënyrën sesi udhëhoqi Kosovën, si dhe për ndërtimin e demokracisë dhe të pluralizmit politik në Kosovë. Vepra e lartë patriotike dhe diplomatike i bën nder të gjithë shqiptarëve, veçanërisht qytetarëve të Kosovës. Vendimi dhe vendosmëria e tij percaktuan fatet e historisë dhe udhëtimin e pandalur të Kosovës së Lirë dhe të Pavarur. Falë mbështetjes së miqve ndërkombëtar të Kosovës, veçanërisht miqësisë së përjetshme të SHBA-se, Kosova fitoi Lirinë e Pavarësinë. Veprimtaria politike e Dr. Rugovës frymëzoi mendimin kritik, të vizionit pro perëndimor dhe antikomunist. Ky përvjetor ditëlindjeje na bën të ndiejmë dhimbje për mungesën e madhe, por njëkohësisht krenarë dhe dinjitozë për veprën që Dr. Rugova na trashëgoi ne. Motoja e Dr. Rugovës që mobilizoi shoqërinë ishte e thjeshtë, domethënëse dhe frymëzuese: Liri, Pavarësi e Demokraci. Mirënjohje e nderime të përjetshme për liderin historik të LDK, për veprën e çmuar patriotike, diplomatike e politike të Presidentit të I-rë të Kosovës, Dr. Ibrahim Rugova.

Në Shekuj të shekujve, i paharruar përkujtimi për Presidentin historik, filozofin dhe shtetarin e madh të Kosovës e kombit shqiptar Dr. Ibrahim Rugova.

Me respekt të veçantë

Përulësisht

Kryetari i VATRËS

Elmi Berisha

FALENDERIM DHE MIRËNJOHJE NGA VATRA

by



Të dashur vatranët e mi të shtrenjtë

Të nderuar patriotë shqiptarë të Amerikës, Kanadasë, Europës e Trojeve Etnike

Të respektuar Autoritete Shtetërore, Autoritete Diplomatike, Klerikë, Shoqata, Organizata e Klube Patriotike në mërgatën e Amerikës

Në emrin tim personal, të bashkëpunëtorëve më të ngushtë, të çdo vatrani ju falënderoj përzemërsisht për pjesëmarrjen tuaj në festimet për 110 vjetorin e Pavarësisë së Shqipërisë dhe festën e Flamurit Kombëtar.
Vatra u priu festimeve madhështore, me aktivitete patriotike e shkencore si kurrë më parë. Pjesëmarrja juaj i dha festës sonë një kuptim dhe dimension më të fuqishëm dhe arsye për të çuar përpara këtë traditë e sukses si detyrë patriotike ndaj atdheut, kombit e njëri-tjetrit.
Të dashur miq e bashkëpunëtorë të ngushtë pa punën intensive, angazhimin profesional, seriozitetin maksimal, energjitë e pa shtershme tuajat, kjo festë kombëtare nuk do kishte kaq hijeshi e madhështi.
Ju shpreh mirënjohje dhe përulem përpara punës suaj të ndershme dhe devotshmërisë suaj.
Të gjithëve emër për emër dua të ndaj me ju përshpirtshmërinë, respektin e vlerësimin maksimal për punën e mrekullueshme: Gëzim Nikën si kryetar të organizimit të Darkës Gala dhe stafit të tij, emër për emër.
Mirënjohje për Angjelina Nika dhe grupin e saj Rozafati për performancën e shkëlqyer, kontributin ndër vite dhe gatishmërinë për të ndihmuar Vatrën e komunitetin shqiptar në Amerikë.
Dr. Paulin Markun dhe ekipin e tij të Simpoziumit Shkencor, Anton Rajën, Ylli Doskun, Ilir Cubin e çdo vatran që kontribuoi.
Mirënjohje për miqtë e veçantë që ishin aktivë, kontribuan fuqishëm në organizim e bënë rrugë të gjatë për të festuar me ne: Alfons Grishaj, Mondi Rakaj, Kolec Ndoja e çdo shqiptar që festoi me ne, gëzoi me ne në festën e Flamurit tonë Kombëtar.

Falenderim të përzemërt për Ravesa Bajo që ndihmoi në organizimin e ceremonisë së ngritjes së Flamurit në New York.
Mirënjohje dhe për gazetën Dielli, Kryeditorin Sokol Paja, Editoren e gjuhës angleze Rafaela Prifti për profesionalizmin dhe përkushtimin në ndjekjen dhe pasqyrimin e shkëlqyer të aktiviteteve.

Me gëzim e mirënjohje

Kryetari i Vatrës

Elmi BERISHA 

Kryetari i Vatrës u takua me Deputetin e Kuvendit të Shqipërisë Shpëtim Idrizi

by

New York, 28 Nëntor 2022- Kryetari i Federatës Pan-Shqiptare të Amerikës VATRA z.Elmi Berisha zhvilloi një takim vëllazëror me deputetin e Kuvendit të Republikës së Shqipërisë z.Shpëtim Idrizi. I ardhur në New York për festën e Flamurit Kombëtar, z.Idrizi u mikprit nga z.Berisha i cili i garantoi se Vatra do të kërkojë gjithmonë drejtësi për Çamërinë dhe se çështja Çame do jetë ndër prioritetet e Vatrës. Z.Idrizi e falenderoi kryetarin e Vatrës për punën kolosale që Vatra po bën në dobi të çështjes kombëtare dhe shprehu mirënjohje për kontributin historik të Vatrës në historinë e shtetit dhe kombit shqiptar. Z.Berisha dhe Z.Idrizi diskutuan ndër të tjera situatën në Veriun e Kosovës, situatën politike në Shqipëri, rolin e jashtëzakonshëm të mërgatës shqiptare të Amerikës në proceset e vështira ku kalon shteti e kombi ynë.

Fjala përshëndetëse e kryetarit të Vatrës Elmi Berisha në darkën gala kushtuar 110 vjetorit të shpalljes së Pavarësisë së Shqipërisë

by

Të nderuar zonja dhe zotërinjë, Vatranë të dashur,

Mysafirë nderi, zyrtarë të lartë, klerikë, të dashur bashkëkombas, 

Vëllezër dhe motra,

Kam kënaqësinë dhe nderin të përkujtojmë bashkë me ju sot ditën e pavarësisë së Shqipërisë dhe të flamurit kombëtar.

Fillimisht më lejoni që nga këtu në cilësinë e Kryetarit të organizatës më të vjetër në tokën e bekuar të Amerikës t’u uroj ju dhe gjithë shqiptarëve për 110 vjetorin e shpalljes së pavarësisë së Shqipërisë. Urime dita e flamurit kombëtar, flamurit më të mirë në botë; flamurit kuq e zi! Me këtë flamur, për këtë flamur, rreth këtij flamuri të përbashkuar kemi qëndruar e triumfuar gjithmonë, sepse ishim në të drejtën e tokën tonë.

Çdo vit e çdo përvjetor ka rëndësinë e vet. Në këtë përvjetor nderojmë së pari veprën dhe rrugëtimin e gjatë e të vështirë të një armate me patriotë shqiptarë dhe përpjekjet e gjithë brezave për arritjen dhe mbrojtjen e pavarësisë. Ju përulemi me respekt për kontributin, sakrificën, qëndrueshmërinë dhe atdhedashurinë e tyre që falë këtyre veprave shqiptarët sot janë në familjen e kombeve të lira dhe të pavarura.

Jemi mbledhur në këtë mbrëmje festive të Vatrës sepse Vatra e ka ditur jo vetëm sa e shtrenjtë është liria, por edhe sesi t’a fitojë atë. Themeluesit e Vatrës kishin jo vetëm dëshira e ëndrra por edhe vizionin e largpamësinë për t’i arritur ato. Prandaj ideatorët dhe krijuesit e Vatrës ishin gjithashtu edhe farkëtuesit e ndërgjegjes kombëtare dhe ju lanë trashëgimi brezave sesi duhet luftuar dhe punuar për kombin tonë.

Prandaj ata luftuan edhe me pushkë edhe me penë. 

Prandaj Vatra kishte një strategji mbarëkombëtare. 

Prandaj në Vatër kishte dijetarë eruditë, diplomatë por edhe edukatorë, kishte oratorë por edhe vullnetarë lufte, kishte intelektualë por edhe punëtorë krahu që mësonin shqip kur ktheheshin nga puna. Prandaj kishte njerëz të biznesit por edhe kontributorë që jepnin nga rroga e tyre mujore që atdheu i tyre, vendi i shqipeve të jetë i lirë dhe i pavarur. Atdheun e ndihmonin të gjithë që nga Përfaqësuesit e Lartë në konferenca ndërkombëtare dhe emisarët politikë deri te anëtarët e klubeve sportive dhe instrumentistët e bandës muzikore. Kjo është trashëgimia e Vatrës e cila është vërsnike me Pavarësinë e Shqipërisë. Në historinë 110 vjeçare të pavarësisë, si Vatra ashtu edhe atdheu e krejt trojet shqiptare kanë përjetuar sfida, kanë kaluar stuhi dhe acare politike, por kanë parë edhe pranvera. Sakrifica, atdhedashuria, përkushtimi, pena e pushka janë emërues i përbashkët i ecjes së shqiptarëve në këtë epokë 110 vjeçare.

Sot Shqipëria feston 110 vjetorin e mvetësisë, Kosova është shtet i pavarur dhe sovran, shqiptarët e trojeve etnike në Maqedoninë veriore janë element shtetformues dhe garancë e ekzistencës së këtij shteti, shqiptarët e Luginës dhe ata në trojet etnike në Mal të Zi janë në pozitë më të favorshme në realizimin e aspiratave kombëtare. Në datat e shënuara si kjo, duhet të jemi edhe më të bashkuar dhe më të motivuar dhe mos të ndalemi kurrë që trungu ynë kombëtarë të jetë në mesin e kombeve të zhvilluara dhe prosperuese.

Sot historia është me ne sepse platforma shumëdimensionale mbarëkombëtare e Vatrës në 1912 është frymëzimi dhe udhërrëfyesja e Vatrës në vitin 2022. 

Një nga firmëtarët e pavarësisë së Shqipërisë dhe luftëtari e strategu i shquar Isa Boletini ka thënë: “Unë jam mirë kur është mirë Shqipëria”.

Le ta festojmë këtë përvjetor jubilar duke dëshiruar edhe më shumë për Shqipërinë dhe shqiptarët. Le të jemi krenarë për rrugën në të cilën kemi ecur dhe shumë të vetëdijshëm për rrugën që kemi përpara.

Në këtë përvjetor të madh kur themi “Gëzuar Pavarësinë” le t’i kujtojmë vetes dhe fëmijve tanë si edhe fëmijve të fëmijve se vepra e një brezi ju takon brezave që vijnë pas dhe se duke ecur në gjurmët e tyre ne jemi pasardhës të denjë të paraardhësve tanë.

Gëzuar Pavarësia!

Zoti Bekoftë Amerikën!

Zoti i bekoftë Shqipërinë dhe shqiptarët në të gjitha trojet etnike!

Allow me to speak a few words in English now: 

Dear Vatrans, Honored Guests, Dignitaries, Clergy and Fellow Albanians,

It is my privilege and pleasure to gather with you at this joyous night of celebrating a landmark event. The 110 anniversary of Albania’s Independence serves as a reminder of the high price of freedom and recognition of the sacrifices made by generations before us. Vatra is also 110 years old this year. Vatra and Albania’s Independence share the same birth year and that’s no coincidence. 

The founders of Vatra developed a comprehensive national agenda around which Vatra activists and envoys rallied the Albanian community in the US, diaspora and Albanians in Albania. It sparked a national movement that brought forth the declaration of independence. We are extremely proud of Vatra’s legacy that continues to be the inspiration and guidance of many generations. In the span of 110 years there have been successes and setbacks, obstacles and immense hurdles on the way, yet the mission to promote and advance the Albanian cause has stayed the same.

We raise our glasses to celebrate Albania’s Independence and salute the sacrifices of our predecessors as we carry further the aspirations of the Albanian nation and people.

God Bless America! 

God Bless Albanians and the Albanian nation. 

God Bless You and Your Families!  

I ask the distinguished guests to say along with all of us one word: GËZUAR!

Kuvendi i Kosovës nënshkruan Memorandum Mirëkuptimi me Federatën Pan-Shqiptare “Vatra”

by

Kuvendi i Republikës së Kosovës nënshkroi sot Memorandum Mirëkuptimi me Federatën Pan-Shqiptare “Vatra”, për bashkëpunim për krijimin dhe hartimin e një strategjie mbarëkombëtare.

Memorandumi i Mirëkuptimit u nënshkrua nga kryetari i Kuvendit të Republikës së Kosovës, Glauk Konjufca dhe kryetari i Federatës Pan-Shqiptare “Vatra”, Elmi Berisha.

Kryetari Konjufca me këtë rast tha se Federata Pan-Shqiptare Vatra ka lënë gjurmë në shtetndërtimin e Kosovës, duke dhënë kontribut të vazhdueshëm për pavarësinë e Kosovës dhe për gjithçka që ka qenë e mirë dhe e nevojshme për bërjen e shtetit.

Konjufca shtoi se dyert e Kuvendit gjithnjë do të jenë të hapura për këtë Federatë dhe inkurajon që të vazhdojë njëjtë me punën e saj sikur deri më tani.

Ndërsa kryetari i Federatës “Vatra”, Elmi Berisha, tha se tash është koha më e mirë që të kanalizohen energjitë tona, intelektuale dhe lobuese, në mënyrë që të formalizohet njohja reciproke me Serbinë.

Sipas tij, kjo energji duhet të përdoret nga shqiptarët me të gjitha institucionet e tjera në Shtetet e Bashkuara të Amerikës.

Përmes këtij memorandumi Kuvendi i Republikës së Kosovës dhe Federata “Vatra” zotohen se do të bashkëpunojnë në aktivitete, duke pasur parasysh pikat e interesit të përbashkët. Kuvendi do të mbështes aktivitetet e kësaj Federate dhe promovimin e tyre, ndërsa Federata “Vatra”, sipas nevojës do të ofrojë mbështetje për Ministrinë e Jashtme dhe të Diasporës, me qëllim rakordimin e politikës së jashtme të Republikës së Kosovës me Departamentin Amerikan të Shtetit dhe lobimit në favor të Kosovës.

Sipas Memorandumit po ashtu Federata Pan-Shqiptare “Vatra” do të shërbejë si promovuese dhe garantuese e hapësirave dhe mundësive që ofron ekonomia dhe tregu i Republikës së Kosovës për komunitetet shqiptaro-amerikane të biznesit në Amerikë, ndërsa Kuvendi i Kosovës dakordohet të bashkëpunojë në fushën e sigurisë kombëtare, politikës së jashtme, ekonomisë dhe biznesit, si dhe në fusha të tjera të interesit të përbashkët, gjithmonë duke pasur primare interesat kombëtare dhe ndërkombëtare në bashkëpunim me politikën e SHBA-ve dhe BE-së.