Nga XHAVIT ÇITAKU/
Geteborg, 22 prill- Lëvizja e re naziste e Suedisë dje organizoj një demonstratë në qendër të Stokholmit, me kërkesat dhe kundërshtimin e tyre tashmë të njohur kundër të huajve. Sipas të dhënave të mjeteve suedeze të informimit dhjetra anëtarë të kësaj Lëvizjeje së pari u tubuan në sheshin “ Mynttorget” për të marshuar më pastaj përgjatë gjithë rrugës “ Drottningsgatan” që kalon afër Parlamentit të këtij shteti skandinav. Ndërkohë, me një shpejtësi të madhe u organizuan kundërshtarët e paraqitjeve ekstremiste dhe naziste, të cilët kishin marrë vesh për këtë demonstrim nga faqet sociale. Këto dy grupe u takuan afër Pallatit Shtetëror, të cilat filluan të gjuajnë gjësende të ndryshme në drejtim të tyre. Policia bënte përpjekje që t’i shpërndaj demonstruesit për të mos pasur pasoja më të rënda. Sipas mediave të këtushme Lëvizja naziste nuk e kishte lejen nga policia për të demonstruar në kryeqendrën suedeze. Rreth orës 16 situata u qetësua dhe demonstruesit e të dy grupeve u shpërndan.