Haradinaj – Page 3 – Dielli

Kosova falënderuese për gjithë kontributin që ka dhënë Amerika

September 25, 2018 by dgreca

-Kryeministri Haradinaj gjatë vizitës zyrtare që është duke e zhvilluar në Shtetet e Bashkuara të Amerikës vizitoi Akademinë Ushtarake “West Point”/

1 Thaci nderimi

Washington, 25 Shtator 2018-Gazeta DIELLI/

Kryeministri i Republikës së Kosovës, Ramush Haradinaj, gjatë vizitës zyrtare që është duke e zhvilluar në Shtetet e Bashkuara të Amerikës, është pritur në Akademinë Ushtarake “West Point” nga Gjeneral Lejtnant Darryl A. Williams me bashkëpunëtorë.
Me këtë rast, Kryeministri Haradinaj, falënderoi Gjeneralin Williams për pritjen dhe për ndihmën që është duke e dhënë kjo Akademi për ngritjen e kapaciteteve të Forcës së Sigurisë së Kosovës, përmes ofrimit të studimeve për kadetët kosovarë, e që aktualisht këtë Akademi janë duke u shkolluar dy kadetë të FSK-së, Arnela Shala dhe Ylli Dalladaku.
“Vendi ynë është falënderues për gjithë kontributin që ka dhënë Amerika, si në kohë lufte poashtu edhe paqeje. Jemi përherë mirënjohës që i kemi aleat të fuqishëm Shtetet e Bashkuara të Amerikës”, tha Kryeministri Haradinaj.
Ndër të tjerash, Kryeministri Haradinaj, duke folur para përfaqësuesve të “West Point Academy”, për transformimin e FSK-së në ushtri, tha se Kosova është e gatshme që ta ketë ushtrinë, e cila do t’i kontribuonte paqes dhe sigurisë në vend dhe më gjerë.
Gjeneral Lejtnant Darryl A. Williams, pasi falënderoi Kryeministrin Haradinaj për vizitën, tha se Kosova do ta ketë mbështetjen e parezervë të këtij institucioni përmes ofrimit të trajnimeve dhe studimeve ushtarake për pjesëtarët e FSK-së.Nga Gjenerali Williams, Kryeministri Haradinaj ka pranuar një dhuratë me simbolet e Akademisë Ushtarake “West Point”, ndërsa kryeministri Haradinaj e ka nderuar Gjeneralin Williams me medaljen e Skënderbeut.

Në Akademinë Ushtarake “West Point” ishte e pranishme edhe ambasadorja e Kosovës në SHBA, Vlora Çitaku. /b.j/

Ambasadorit Amerikan Delawie “Harta e Artë e Kosovës”

August 29, 2018 by dgreca

-Kryeministri i Kosovës, Ramush Haradinaj, takim falënderues me ambasadorin e Shteteve të Bashkuara të Amerikës në Prishtinë, Greg Delawie: Partneriteti strategjik SHBA-Kosovë do vazhdojë të thellohet/

1ambasad Delaw Haradinajok.JPG

-Ambasadori Delawie pritet të pasohet nga diplomati veteran Philip Kosnett, i emëruar nga Presidenti i SHBA si ambasador i ardhshëm amerikan në Kosovë/

PRISHTINË, 29 Gusht 2018-Gazeta DIELLI/ Kryeministri i Republikës së Kosovës, Ramush Haradinaj, ka pritur sot në takim falënderues ambasadorin e Shteteve të Bashkuara të Amerikës në Kosovë, Greg Delawie, me të cilin ka biseduar për gjendjen politike në Kosovë dhe më gjerë.

Gjatë takimit kryeministri ka falënderuar ambasadorin Delawie për angazhimin dhe kontributin e tij të madh dhënë gjatë shërbimit të tij në Kosovë, duke thënë se Kosova dhe populli i saj janë mirënjohëse për mbështetjen e SHBA-së në të gjitha fushat, duke e ndihmuar vendin në proceset e rëndësishme politike, ekonomike dhe të sigurisë.

“Në shumë fusha Shtetet e Bashkuara të Amerikës kanë ndihmuar Kosovën duke përfshirë shtetndërtimin, zhvillimin ekonomik, arsimin, shëndetësinë, sistemin e drejtësisë, bujqësinë dhe për këtë u jemi mirënjohës popullit amerikan dhe SHBA-ve”, tha kryeministri Ramush Haradinaj, në takim me ambasadorin e Shteteve të Bashkuara të Amerikës në Kosovë, Greg Delawie.

Kryeministri Haradinaj tha se partneriteti strategjik ndërmjet Kosovës dhe Shteteve të Bashkuara të Amerikës do të vazhdojë të thellohet, duke kërkuar mbështetjen e mëtutjeshme të shtetit mik për fuqizimin e subjektivitetit ndërkombëtar dhe anëtarësimin në organizatat ndërkombëtare.Kryeministri Haradinaj në shenjë respekti për kontributin e tij dhënë gjatë misionit në Kosovë, ia ka dhuruar ambasadorit Delawie “Hartën e Artë të Kosovës”.“Është nder që në emrin tim, të Qeverisë dhe të popullit të Republikës së Kosovës t’ua dorëzoj ‘Hartën e Artë të Kosovës’, të cilën kam kënaqësinë t’ua dhurojë për shërbimin tuaj në shtetin tonë”, ka thënë kryeministri Haradinaj.

Ambasadori i Shteteve të Bashkuara të Amerikës në Kosovë, Greg Delawie, falënderoi kryeministrin Haradinaj për bashkëpunimin, duke shprehur gatishmërinë e SHBA-së që të vazhdojë mbështetjen edhe më tutje për Kosovën në forcimin e sundimit të ligjit.Ambasadori i Shteteve të Bashkuara të Amerikës në Kosovë, Greg Delawie, ka dorëzuar letrat kredenciale në 21 gusht 2015, pasi ka mbërritur një ditë më parë në Prishtinë.Ambasada Amerikane në Prishtinë në 30 mars 2015 njoftonte se, Presidenti Obama ka nominuar Greg Delawie-n që të shërbejë si ambasadori i SHBA-ve në Kosovë.Ambasadori Delawie pritet të pasohet nga diplomati veteran Philip Kosnett, i emëruar nga Presidenti i SHBA si ambasador i ardhshëm amerikan në Kosovë./b.j/

Shqiptarët, mirënjohës studiuesve të huaj të shqipes

August 20, 2018 by dgreca

-Kryeministri Haradinaj: Gjuha shqipe meriton të njihet nga shumë studiues të botës/

-Ministrja Nikolla: Albanologjia, rol në konsolidimin e kombit shqiptar/

-Në Prishtinë nis Seminari XXXVII Ndërkombëtar për Gjuhën, Letërsinë dhe Kulturën Shqiptare. Historiku…/

Gazeta DIELLI nga korrespondenti në Kosovë Behlul Jashari/

PRISHTINË, 20 Gusht 2018/ Në Prishtinë, në sallën e madhe të Fakultetit të Filologjisë të Universitetit Publik, u zhvillua sot ceremonia solemne e hapjes së punimeve të Seminarit XXXVII Ndërkombëtar për Gjuhën, Letërsinë dhe Kulturën Shqiptare, i cili vijon deri në 31 gusht, ndërsa që gjatë ditës së djeshme janë mirëpritur seminaristët. Kryeministri i Kosovës Ramush Haradinaj dhe Ministrja e Arsimit e Republikës së Shqipërisë, Lindita Nikolla, morën pjesë në hapjen e Seminarit. “Në kohërat e errëta të jetës tonë, një dritë e shqipes është shpërndarë nga këtu në botë, dhe atë jo nga ne, por nga ata që kanë ardhur të njohin më për së afërmi dhe të transmetojnë shqipen dhe shqiptarët te popujt tjerë”, tha kryeministri Haradinaj.

Para seminaristëve nga e mbarë bota, Kryeministri Haradinaj tha se shqiptarët kudo që janë çdoherë dhe gjithë jetën u janë mirënjohës studiuesve të huaj të shqipes, atyre që kanë ardhur dhe kanë qëndruar me ne, që janë njoftuar me shqipen e shqiptarët dhe i kanë njoftuar të tjerët me shqipen dhe shqiptarët.

“Nuk është kohë e lëvdatave të mëdha, meqenëse shqipja dhe shqiptarët kanë vështirësitë e zhvillimit të vet, qoftë si gjuhë, qoftë si kulturë, qoftë si komb, në rrethanat nëpër të cilat po kalojmë, por një gjë nuk ka ndryshuar, jemi vlerë universale, i takojmë këtij globi. Gjuha jona është prej më të hershmëve në botë dhe njëkohësisht është e pasur dhe si e tillë e meriton që ta njohin më shumë, meriton që sa më shumë studiues ta njohin për së afërmi”, tha kryeministri Haradinaj.

Kryeministri Haradinaj tha se Qeveria e Kosovës, jo vetëm tash, por çdoherë duhet t’i jep përkrahje seminarit të gjuhës shqipes dhe të gjithë atyre që e bëjnë të mundur që shqipja dhe shqiptarët të njihen për së afërmi nga studiuesit nga e mbarë bota.

Ministrja e Arsimit e Republikës së Shqipërisë, Lindita Nikolla, tha se në gjithë këtë rrugëtim përmes studimeve dhe hulumtimeve keni treguar se si një popull duhet të nxjerrë në pah dhe mbrojë gjithë shenjat dhe burimet e veta shpirtërore për atë çka jemi, për gjuhën, kulturën, historinë, letërsinë, folklorin, identitetin tonë.

Ajo tha se albanologjia ka luajtur një rol të vyer në konsolidimin e kombit shqiptar.

“Gjuha shqipe fatmirësisht nuk hynë në gjuhët e rrezikuara të Europës për të cilat BE ndanë fonde, por edhe pse kjo është e mirë, na takon qeverive të dy vendeve tona, Kosovës dhe Shqipërisë, që t’iu mbështesim juve, të jemi krahë jush, për të patur seminare të tilla të standardeve të larta. Unë jam shumë e lumtur që kësaj nisme të Fakultetit të Filologjisë i është bashkuar edhe Universiteti i Tiranës”, theksi Ministrja Nikolla.

Sipas saj, nga ky vit edhe Universiteti i Bolonjës mundëson që gjuhën shqipe ta ketë pjesë të ofertës akademike për shumë studentë dhe studiues.

Lindita Rugova, dekane e Fakultetit të Filologjisë në Prishtinë, tha se ka qenë një rrugëtim i vështirë me shumë peripeci, por gjithnjë në kërkim të ngritjes dhe avancimit të dijes, në kërkim të forcimit të bashkëpunimit ndërakademik dhe në kërkim të promovimit të vlerave tona në botë.

Ajo më tej, tha se falë miqve tanë seminaristë, albanologjia vazhdon të studiohet dhe të mësohet në Pragë, Kozencë, Shën Petërburg, Sofje, Mynhen, Napoli, e shumë qarqe të tjera botërore.

“Investimi në një seminar si ky i yni është investim në ardhmërinë e një shteti”, tha dekanja Rugova, duke theksuar se dyert e Fakultetit të Filologjisë të Universitetit të Prishtinës janë të hapura për të gjithë seminaristët ngado që vijnë.Drejtori i Seminarit të 37-të Ndërkombëtar për Gjuhën, Letërsinë dhe Kulturën Shqiptare, Rrahman Paqarizi, foli për punën dhe angazhimin e të gjithëve që është bërë në përgatitjen dhe mbajtjen e seminarit, duke thënë ju seminaristë të dashur jeni shtylla kurrizore e seminarit e arbëreshët tanë të dashur janë shpirti dhe emblema e tij.

Ai vlerësoi lartë punën që kanë bërë figurat e ndritura të albanologjisë Idriz Ajeti, Rexhep Ismajli, Besim Bokshi, Zejnullah Rrahmani, profesor Imri Badallaj, Sabri Hamiti dhe studiuesit e tjerë.
Para të pranishmëve një fjalë e mbajti edhe dekani i Fakultetit të Historisë dhe Filologjisë të Universitetit të Tiranës, prof. Sabri Laçi, i cili uroi studentët dhe studiuesit e shqipes.

“Është rasti që në kuadër të këtij seminari, të gjithë pjesëmarrësit, të përfitojnë risi, të përfitojnë arritjet më të fundit të studimeve shkencore në këto fusha”, u shpreh prof. Laçi.

Programi bazë i Seminarit është: Kurse intensive të mësimit të shqipes (tre nivele); Ligjërata të veçanta të gjuhësisë; Ligjërata për letërsinë shqiptare; Ligjërata për kulturën shqiptare; Referime shkencore; Ligjërata të përgjithshme; Tryeza të rrumbullakëta; Tryeza e doktorantëve; Program kulturor plotësues për t’i njohur seminaristët me bukuritë natyrore, me veprimtaritë kulturore e të mira të tjera në qendra të Kosovës.

Ndërsa, temat bosht të Seminarit për sesionet shkencore që zhvillohen në 30 e 31 gusht janë:
1. Gjuhësi: Shqipja në diasporë – diasporat e shqipes – Përshkrimi gjuhësor i të folmeve të kolonive shqiptare; Rreziku i zhdukjes së të folmeve të shqipes; Kontekstet gjuhësore të të folmeve të kolonive; Shqipja në mërgatën e re; Bilinguizmi në të folmet e kolonive dhe mërgatës së re shqiptare; Vdekja e gjuhëve; Ndryshimi i statusit të gjuhës shqipe i kushtëzuar nga faktorë politike; Integrimet evropiane – sfidat dhe mundësitë e shqipes.
2. Letërsi: Topika e letërsisë shqipe –
Topika mitike në letërsinë shqipe; Topika e trashëgimisë retorike në letërsinë shqipe; Topika e heronjve arketiporë në letërsinë shqipe; Topika e rashëgimisë folkloristike; Topika e simbolizmit religjioz në letërsinë shqipe; Topika e vendeve dhe e hapësirave në letërsinë shqipe; Topika etnike e historike në letërsinë shqipe; Topika klasik, moderne e postmoderne në letërsin shqipe.
3. Kulturologji: Kultura në epokën digjitale –
Kultura e digjitalizuar; Ndikimi i internetit në “kulturimin” dhe akulturimin; Sfera publike në epokën digjitale; Shpërndarja e informatës dhe cilësia e saj përmes internetit; Kultura në rrjetet sociale dhe në medien online; Media në epokën e internetit – gjendja dhe sfidat; Ristrukturimi i medies dhe i skenës mediale.

Seminari Ndërkombëtar për Gjuhën, Letërsinë dhe Kulturën Shqiptare është themeluar pranë Fakultetit të Filologjisë (atëherë Fakulteti Filozofik) të Universitetit të Prishtinës, në vitin 1974. Ishte viti i Kushtetutës që avanconte të drejtat e shqiptarëve të Kosovës si element konstituiv me të drejtë vetoje, i federatës së atëhershme.

Seminarit në vitin 1991 është ndërprerë veprimtaria e tij nga organet e dhunshme serbe. Në vitet 1995 e 1996 sesionet e këtij seminari u mbajtën në Tiranë në bashkëpunim me Institutin e Gjuhësisë e të Letërsisë të Akademisë së Shkencave të Shqipërisë.

Pas çlirimit të Kosovës në qershorin 1999, nga viti 2000 Seminari zhvillohet sërish në Prishtinë. Sesionet 19 dhe 20 (2000-2001) janë organizuar në bashkëpunim me Institutin e Gjuhësisë dhe të Letërsisë të Akademisë së Shkencave të Shqipërisë.

Haradinaj falenderon Fondin Kosovar-Amerikan për Edukim

July 23, 2018 by dgreca

-Kryeministri Haradinaj ka falënderuar përfaqësuesit e KAEF dhe ShBA-të për ndihmën që kanë dhënë në krijimin e mundësive për shkollim e të rinjve kosovarë/

3Fondi per ed Haradinaj

PRISHTINË, 23 Korrik 2018-Gazeta DIELLI/ Kryeministri i Republikës së Kosovës, Ramush Haradinaj, ka pritur në takim përfaqësuesit e Fondit Kosovar – Amerikan për Edukim (KAEF) të kryesuar nga Dale Pfeiffer, themelues i këtij fondi dhe udhëheqës i parë i USAID-it, në Kosovë.

Kryeministri Haradinaj ka falënderuar përfaqësuesit e KAEF dhe ShBA-të për ndihmën që kanë dhënë në krijimin e mundësive për shkollim e të rinjve kosovarë, përmes bursave në nivelin master të studimeve në universitete më prestigjioze amerikane.

“Jemi duke punuar me përkushtim në ngritjen e cilësisë në arsim në të gjitha nivelet, andaj ndihma juaj në ofrimin e mundësive për studentët tanë, që studimet e tyre t’i ndjekin në universitetet më të mira amerikane, do të jetë ndihmë e drejtpërdrejtë në forcimin e zhvillimit të gjithanshëm të vendit”, tha kryeministri Haradinaj.

Gjatë takimit, kryeministri Haradinaj tha se programet dhe bashkëpunimet e tilla janë të mirëseardhura për ngritjen e kualitetit në arsim dhe në të gjitha fushat, që do të ketë ndikim në zhvillimin ekonomik të vendit.

Ndërkaq, përfaqësuesit e Fondit Kosovar – Amerikan për Edukim (KAEF), shprehën gatishmërinë e tyre që edhe në të ardhmen të vazhdojnë bashkëpunimin e tyre në të mirë të shoqërisë në Kosovë.

KAEF deri tash ka mbështetur mbi 95 studentë kosovarë për studimet master në universitete të ndryshme amerikane./b.j/

Kosovë-Maqedoni, takim i liderëve shqiptarë

May 29, 2018 by dgreca

Përmirësohet edhe pozicioni i shqiptarëve në Maqedoni/

-Ali Ahmeti takson: Presidentin Thaçi, Kryeministrin Haradinaj dhe Kryeparlamentarin Veseli/

I-Presidenti Thaçi priti liderin e BDI-së, Ali Ahmetin/

Prishtinë, 29 Maj 2018-Gazeta DIELLI/

Presidenti i Republikës së Kosovës, Hashim Thaçi, sot ka pritur liderin e Bashkimit Demokratik për Integrim të Maqedonisë, Ali Ahmetin.Presidenti Thaçi dhe kryetari Ahmeti kanë diskutuar për bashkëpunimin ndërmjet Kosovës e Maqedonisë dhe rëndësinë e integrimit euroatlantik të dy vendeve tona.

“Është shumë e rëndësishme që të ecim përpara si rajon, sepse vetëm kështu e forcojmë paqen dhe stabilitetin në tërë Ballkanin Perëndimor”, u shpreh presidenti Thaçi, duke shtuar se Kosova i përkrah përpjekjet për zgjidhjen e kontestit rreth emrit të Maqedonisë.

“Zgjidhja e kontestit të emrit e rrjedhimisht edhe hyrja e Maqedonisë në NATO është në interes të paqes në tërë rajonin tonë”, pohoi presidenti Thaçi.

Ndërsa, lideri i BDI-së, Ali Ahmeti, theksoi se bashkëpunimi i afërt i lidershipit shqiptar ka bërë që të përmirësohet edhe pozicioni i shqiptarëve në Maqedoni.

Presidenti Thaçi dhe kryetari Ahmeti kanë folur edhe për rëndësinë e autoudhës Prishtinë-Shkup, e cila do t’i afrojë edhe më shumë qytetarët tanë me njëri-tjetrin.

***

-Kryeministri i Kosovës, Ramush Haradinaj pret në takim liderin e BDI-së në Maqedoni, Ali Ahmetin/

Kryeministri i Republikës së Kosovës, Ramush Haradinaj, ka pritur sot në takim kryetarin e Bashkimit Demokratik për Integrim, Ali Ahmeti, me të cilin ka biseduar për temat më të rëndësishme për Kosovën dhe Maqedoninë. Kryeministri Haradinaj vlerësoi rolin konstruktiv të kryetarit Ahmeti dhe të shqiptarëve në Maqedoni, për të gjitha proceset nëpër të cilat po kalon Kosova, Maqedonia por edhe rajoni.Kryeministri e njoftoi për progresin që ka arritur Kosova dhe hapat që është duke ndërmarrë Qeveria e Kosovës në proceset integruese evropiane dhe euroatlantike si dhe për zhvillimin ekonomik të vendit dhe hapjen e perspektives për të rinjtë.“U dakorduam që të angazhohemi bashkërisht që t’u gjejmë zgjidhje shumë çështjeve të rëndësishme, të cilat presin prej kohësh”, tha kryeministri Haradinaj duke vlerësuar raportet e mira ndërfqinjësore të cilat janë në funksion të paqes dhe zhvillimeve demokratike në rajon.Edhe kryetari Ahmeti theksoi rëndësinë e bashkëpunimit të të dyja vendeve dhe mundësinë e thellimit të raporteve bilaterale, në të gjitha fushat e interesit të përbashkët për popujt e të dyja vendeve.

Kryeparlamentari Veseli takoi kryetarin e BDI-së, Ali Ahmeti

Kryeparlamentari Kadri Veseli ka pritur sot në takim kryetarin e Bashkimit Demokratik për Integrim (BDI) në Maqedoni, Ali Ahmeti, me të cilin ka diskutuar për zhvillimet aktuale në Kosovë e Maqedoni, si dhe për mënyrat e thellimit të mëtejshëm të bashkëpunimit ndërmjet dy vendeve. Të dy bashkëbiseduesit vlerësuan lart raportet ndërfqinjësore dhe theksuan nevojën e kultivimit të mëtejmë të tyre e të bashkëpunimit me interes reciprok, si në fushën e ekonomisë, ashtu edhe të arsimit e të kulturës.Veseli e Ahmeti konsideruan se Kosova dhe Maqedonia, si dy faktorë të rëndësishëm paqeje dhe stabiliteti në rajon, tashmë kanë hyrë në rrugën e pandalshme të integrimit euro-atlantik, si perspektivë e vetme për të ardhmen e të dyja vendeve.Kryetari i Kuvendit, Kadri Veseli, vlerësoi rolin e faktorit shqiptar në Maqedoni, si në ruajtjen e stabilitetit të brendshëm, ashtu edhe në orientimin euro-atlantik të Maqedonisë.Nga ana e tij, kryetari i BDI-së, Ali Ahmeti, vlerësoi lart hapat që ka bërë Kosova në konsolidimin e institucioneve shtetërore dhe rritjen e përfaqësimit e të njohjes ndërkombëtare të saj.