Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova, veç UNESCO-s do të aplikojë për anëtarësim edhe në shumë organizata të tjera

by

-Selimi për “Danas”: “Ne do të kërkojnë anëtarësimin edhe në organizata të tjera”/
Nga Behlul Jashari/ Prishtinë, 23 korrik 2015 – Zëvendësministri i Punëve të Jashtme të Republikës së Kosovës, Petrit Selimi, ka dhënë një intervistë për të përditshmen beogradaase “Danas”, ku është shprehur se “ne jemi të vetëdijshëm se, veç UNESCO-s, Kosova do të aplikojë për anëtarësim edhe në shumë organizata të tjera të rëndësishme ndërkombëtare.
Më poshtë po ua sjellim përmbajtjen e plotë:
Kosova është njohur nga 111 shtete anëtare të UNESCO-s. Shumë shtete të tjera mosnjohëse gjithashtu votojnë për Kosovën në organizata multilateral, siç bënë për anëtarësimin e saj në FMB dhe Bankën Botërore. Ne e kemi vërtetuar këtë gjashtë muaj më parë, kur aplikuan për statusin e vëzhguesit në Organizatën Ndërkombëtare të Frankofonisë. Pavarësisht reagimeve histerike dhe të trishtuara të diplomatëve serbë që u përpoqën për të bllokuar Kosovën në Senegal, të gjithë anëtarët vendosën me konsensus të pranojnë Kosovën.
Ishte një rrëfim i ngjashëm me Komitetin Olimpik Ndërkombëtar. Kjo është një betejë e vështirë, por është shqetësues fakti që Serbia po lufton për të mbajtur Kosovën të izoluar. Politikat përmes së cilave synohet izolimi i kosovarëve janë politika që kanë dështuar në të shkuarën dhe madje kontraproduktive për vet Serbinë. Kështu, Serbia do të jetë ajo që do të humbasë sërisht, thotë Petrit Selimi, zëvendësshef i diplomacisë së Kosovës në një intervistë për “Danas”, përkitazi me synimin e Kosovës për t’u anëtarësuar në UNESCO.
Danas: Pse është Prishtina e sigurt së, këtë vjeshtë, votimi do të jetë në favor të Kosovës në bordin ekzekutim dhe konferencën e përgjithshme të UNESCO-s?
PS: Kemi punuar me shumë maturi në bashkërendim me të gjithë partnerët ndërkombëtarë të Kosovës dhe gjithmonë duke vlerësuar momentin optimal për të aplikuar. Pas një shqyrtimi të kujdesshëm, ne qysh në janar kishim vendosur për të aplikuar tani kështu që kërkesa jonë të mund të trajtohet në mbledhjen e nëntorit të Konferencës së Përgjithshme të UNESCO-s. Siç theksoi zëvendëskryeministri i parë, Hashim Thaçi, javën e kaluar, mbi 130 delegacione janë angazhuar dhe ne kemi caktuar takime me 20 të tjera gjatë këtij muaji kështu që pasi që të vërtetojmë disponimin dhe interesimin e delegacioneve kombëtare, besojmë se Kosova përfundimisht do të ketë një shans shumë të mire për t’u bërë anëtare e re e UNESCO-s pikërisht në përvjetorin jubilar të kësaj organizate. UNESCO do të kremtojë 70-vjetorin e ekzistencës së saj këtë vit dhe Kosova do të jetë një dhuratë e bukur për ditëlindjen e saj. Është një betejë e vështirë, por interesi ynë shtetëror është që kosovarët të kenë mundësi të barabartë, instrumente të njëjta për zhvillim dhe të njëjtën pozitë si të gjithë popujt e tjerë në Ballkan.
Danas: Cila është përgjigja e Prishtinës në pyetjen e bërë nga ana e Serbisë se si do të mbrohen monumentet historike dhe fetare në Kosovë nga ata që i kanë shkatërruar ato sistematikisht nën protektoratin e OKB-së – qeveria e Kosovës asnjëherë nuk ka dënuar shkatërrimin e kishave – mbi 150 sosh, shumica e të cilave janë mesjetare?
PS: Para se gjithash, është një gënjeshtër e pështirë të thuhet se Qeveria e Kosovës asnjëherë nuk e ka dënuar shkatërrimin e disa objekteve kishtare. Në të vërtetë, Qeveria e Kosovës ka ndarë miliona euro për të riparuar ato pas trazirave të marsit të vitit 2004. Sot, është Policia e Kosovës që ruan 95% të të gjitha pronave të Kishës Ortodokse Serbe dhe ato po vizitohen në siguri të plotë nga turistë nga e gjithë bota.
Së dyti, qeveria e vetme në Ballkan e cila është angazhuar në shkatërrimin sistematik dhe të organizuar nga shteti të trashëgimisë fetare është qeveria dhe ushtria e Serbisë, siç u dëshmua pas shumë vendimeve të Tribunalit Ndërkombëtar në Hagë. Ushtria dhe policia serbe shkatërruan plotësisht mbi 300 xhami, duke përfshirë edhe xhaminë e Çarshisë së vitit 1761, Xhaminë e Halil Efendisë së vitit 1526, teqet bektashiane në Gjakovë të vitit 1790, e kështu me radhë. Andaj, është jashtëzakonisht cinike dhe e pështirë të dëgjosh Gjuriqin apo Daçiqin duke folur për shkatërrimin e pronës fetare.
Danas: Atëherë, pse Këshilli i Evropës këmbëngulë se kishte ndarë mjete financiare për riparimin e objekteve të shenjta ortodokse serbe të shkatërruara në trazirat e marsit, gjë që i ishte bartur Qeverisë së Kosovës, që përbënte një formulë të dakorduar më 2005 nga Kisha Ortodokse Serbe e cila nënshkroi një memorandum mirëkuptimi për riparimin e kishave dhe manastire të shkatërruara ortodokse serbe?
PS: Nuk mendoj se Këshilli i Evropës është duke thënë një gjë të tillë. Ne kemi komunikim në baza ditore me Këshillin e Evropës. Dihet se qeveria e Kosovës i ka ndarë 5 milionë euro për riparimin e kishave. Duhet theksuar se synimin ynë për anëtarësimin në UNESCO nuk ka për qëllim provokimin e Kishës Ortodokse Serbe, apo për të pretenduar se trashëgimia ëshët shqiptare, por për të mundësuar zhvillimin e Kosovës në fushat e arsimit, shkencës dhe kulturës. Trashëgimia përbën një pjesë të vogvl të punës së UNESCO-s. E kuptojmë se trashëgimia është një çështje e rëndësishme dhe objektet mesjetare në Kosovë që janë në listen e Trashëgimisë së UNESCO-s do të jenë gjithmonë pronë e Kishës Ortodokse Serbe. Plani i Ahtisaari-t dhe Kushtetuta e Kosovën sigurojnë një mbrojtje të rëndësishme kushtetuese për Kishën Ortodokse Serbe. Peshkopi Teodosije, Ati Save dhe shumë klerikë të tjerë të kishës në Kosovë mbeten mbështetës të pajtimit dhe ne duhet të ruajmë miqësinë dhe respektin për njëri-tjetrin. Deklaratat e qeverisë serbe lidhur me aplikimin e Kosovës për në UNESCO nuk janë mënyrë e duhur për të ndërtuar marrëdhënie të mira fqinjësore. Anëtarësimi i Kosovës në UNESCO do të kërkojë një përpjekje të madhe nga diplomacia e Kosovës, por është një betejë që do ta fitojmë sepse përpjekjet tona nuk kanë të bëjnë me politikë por për synojnë që t’u mundësojnë qytetarëve të Kosovës, pavarësisht nga përkatësia e tyre fetare apo etnike, që të kenë qasje në standardet dhe mekanizmat më të lartë ndërkombëtare në fusha të rëndësishme të zhvillimit njerëzor.
Nganjëherë mendoj se qeveria serbe ka filluar të besojë në propagandën e saj të rreme. Kosova tashmë është anëtare e dy agjencive të OKB-së të “sistemit Bretton Ëoods”, përkatësisht Bankës Botërore dhe Fondit Monetar Ndërkombëtar. Po ashtu, në shtator 2010, pasi që Vuk Jeremiç u detyroi të heq dorë nga propozimi i tij për bisedime të mëtutjeshme për statusin, Asambleja e Përgjithshme e OKB-së votoi mbi një rezolutëtë sponsorizuar nga Bashkimi Evropian përmes së cilës u pranua opinion i Gjykatës Ndërkombëtare të Drejtësisë se Shpallja e Pavarësisë së Kosovës nuk e kishte shkelur Rezolutën 1244 apo çfarëdo ligji të aplikueshëm ndërkombëtar, dhe ky hap mbylli, njëherë e përgjithmonë, çdo diskutim në lidhje me statusin e Kosovën. Kosova dhe Serbia tani po bisedojnë në Bruksel se si t’i normalizojnë marrëdhëniet si dy shtete të pavarura. Si rrjedhojë, aplikimi ynë për anëtarësim në UNESCO nuk përbën asnjë zhvillim befasues, zhvillim i cili do të shoqërohet me aplikim në shumë organizata të tjera.

KOSOVA, VERË ME SHUMË PUNË TË INSTITUCIONEVE SHTETËRORE

by

-Priten edhe ndryshiumet kushtetuese drejt FAK-ut e Speciales/
-Shpërbëhet “Mbrojtja Civile” në komunat veriore me shumicë serbe/
– Para pesë vitesh, në 22 korrik, Gjykata Ndërkombëtare e Drejtësisë ka konkluduar se miratimi i Deklaratës së Pavrësisë së Kosovës në 17 Shkurt 2008 “nuk e ka shkelur të drejtën e përgjithshme ndërkombëtare, as rezolutën 1244 të Këshillit të Sigurimit e as Kornizën Kushtetuese”/
Nga Behlul Jashari/ PRISHTINË, 22 Korrik 2015/ Vera e Kosovës me shumë vapë është edhe me shumë punë për institucionet shtetërore, që do kenë në axhenda edhe ndryshimet kushtetuese drejt transformimit të FSK në FAK, për të cilin ka kushtëzime nga Lista Srpska dhe krijimit të Gjykatës Speciale, për të cilën ka mungesë votash në Kuvend.
Te merkuren paradite është mbledhur qeveria, e pasdite për vazhdimin e seancëns plenare të ndërprerë për shkak të mungesës së kuorumit, në 16 korrik, u mbidh Kuvendi i Kosovës, i cili nesër do të ketë edhe seancë të re.
Kryetari i Partisë Demokratike të Kosovës, Hashim Thaçi, njëherit zëvendëskryeministër e ministër i Jashtëm, i ka thirrur deputetët e partisë së tij për të diskutuar sot paradite rreth themelimit të Gjykatës Speciale. “Kuvendi i Kosovës nuk duhet të mbyllë sesionin pa përmbyllur këtë proces të rëndësishëm”, u shpreh ai pas takimit.
Në 26 qershor, Kuvendi i Kosovës me 75 vota pro, 7 kundër, 2 abstenime nuk e miratoi propozim-amendamentin nr. 24 në Kushtetutën e Republikës për krijimin e Gjykatës Speciale. Votat kundër dhe abstenim ishin nga pozita – PDK, ndërsa opozita nuk mori pjesë në votim. Për miratim mungonin 5 vota, duheshin së paku 80 vota të Kuvendit 120 anëtarësh, përfshirë këtu edhe dy të tretat e 20 deputetëve të komuniteteve pakicë, prej tyre10 serbë.
Në Kuvendin e Kosovës pritet që qeveria të riprocedojë për votim amendamentin kushtetues që ka të bëjë me Gjykatën Speciale pasi për këtë edhe të sigurohet numri i nevojëshm prej dy të tretave, ndërkohë që mesazhet e partnerëve ndërkombëtarë të theksuara edhe sot në ballinat e shtypit kosovar janë se, shtyrja e votimit të Speciales është e dëmshme për Kosovën.
“Pres themelimin e Gjykatës Speciale. Shpresoj se do të bëhet së shpejti, dhe jo me vonesë dhe shpresoj që kjo do të na ndihmojë të gjithëve që të shohim Kosovën duke bërë progres në rrugën drejt integrimit në Bashkimin Evropian”, ka deklaruar dje në Prishtinë Ministrja e Shtetit në Ministrinë e Punëve të Jashtme të Mbretërisë së Bashkuar dhe Përfaqësuese Speciale e Kryeministrit për Parandalimin e Dhunës Seksuale në Konflikt, Baroneshën Joyce Anelay.
Në 27 qershor, në një mbledhje konsultative të qeverisë u paralajmërua riprocedim dhe për këtë bashkërendësim e bisedime edhe me opozitën që nuk votoi në Kuvend ndryshimet kushtetuese, por në 30 qershor tre partitë opozitare kosovare së bashku deklaruan se, “vendimi i Kuvendit të Republikës së Kosovës për refuzimin e ndryshimeve kushtetuese për themelimin e Gjykatës Speciale, i datës, 26 qershor 2015 është përfundimtar dhe i pakthyeshëm”.
Sipas opinionit të opozitës, të theksuar edhe sot, “riprocedimi i Speciales përmbys rendin kushtetues”. Shefi i grupit parlamentar të Lëvizjes Vetëvendosje, Glauk Konjufca, cituar nga shtypi, “e ka ftuar qeverinë e Kosovës ta respektojë votën kundër të deputetëve për Gjykatën Speciale dhe të mos e riprocedojë këtë çështje më në Kuvendin e Kosovës”.
Ndërkohë, para se të futen në axhendë seance plenare të Kuvendit propozim-amendamentet kushtetuese të propozuara nga qeveria për transformimin e Forcës së Sigurisë së Kosovës në Forca të Armatosura të Kosovës, me kërkesë të shumicës së përfaqësuesve të subjekteve politike, Kryesia e Kuvendit të hënën vendosi “t’u japë kohë partnerëve të koalicionit të zhvillojnë konsultimet”.
Lista Srpska, me 10 deputetë, pjesë e koalicionit qeverisës në deklarata për media ka shprehë qëndrimin se, “nuk do të votojë transformimin e Forave të Sigurisë së Kosovës në Forca të Armatosura të Kosovës derisa të përmbushen katër kushte”, të cilat janë: Formimi i Bashkësisë së Komunave Serbe, emërimi nga komuniteti serb i zëvendësdrejtorit të Agjencisë Kosovare të Inteligjencës, zëvendësi i komandantit të FSK-së të jetë poashtu nga radhët e komunitetit serb si dhe ndërprerja e privatizimit nëpër komuna, përfshirë Brezovicën (qendër turistike) dhe Trepçën (kombinatin xehtaro metalurgjik kimik ).
Ndërsa, nga ana e opozitës që e përbëjnë tre parti shqiptare, u deklarua se ka lëshuar mbledhjen e Kryesisë së Kuvendit pasi nuk u pajtua “me vendimin e mazhorances që t’i tërheq nga pika e rendit të ditës ndryshimet kushtetuese për themelimin e Forcave të Armatosura të Kosovës”.
Derisa nuk dihet kur do jenë në axhendë të seancave plenare ndryshimet Kushtetuese drejt FAK-ut e Speciales, sot dhe nesër në Kuvendin e Kosovës shqyrtohen e diskutohen çështje të tjera.

QEVERIA E KOSOVËS, KONKLUZIONE TË DIALOGUT NË BRUKSEL PËR SHPËRBËRJEN E “MBROJTJES CIVILE”

Ndërsa, qeveria e Kosovës në mbledhjen e sotme ka aprovuar konkluzionet e dakorduara për shpërbërjen e të ashtuquajturës “Mbrojtje Civile” e cila funksionon në komunat veriore me shumicë serbe dhe integrimi i tyre në institucionet e Kosovës. Këto konkluzione janë arritur në kuadër të dialogut në Bruksel.
Vendimi i sotëm është pjesë e përmbushjes së obligimeve të qeverisë së Kosovës që dalin nga dialogu dhe ofron bazën legale për institucionet e Kosovës që të bëjnë integrimin e 483 personave në institucionet legjitime të Republikës së Kosovës dhe shuarjen e këtyre strukturave ilegale.
Kryeministri Isa Mustafa e ka vlerësuar si hap shumë të rëndësishëm shuarjen e këtyre strukturave që kanë vepruar në veri të vendit, dhe integrimin sipas ligjeve të Kosovës në institucionet e Republikës së Kosovës.
“Natyrisht që është një kosto shtesë sepse është fjala për 483 punonjës, mirëpo, poashtu jemi konsultuar edhe me Ministrinë e Financave. Ne kemi një hapësirë të punësimit për këtë vit, dhe natyrisht edhe buxhetit të punësimit. Ne duhet të zbatojmë një vendim të tillë, në mënyrë që t’i integrojmë këto struktura, dhe pastaj do të bëjmë shuarjen e tyre, dhe poashtu do të bëjmë edhe shfrytëzimin e të gjitha objekteve dhe hapësirave që janë shfrytëzuar për ato qëllime, për institucionet legale të Republikës së Kosovës, që veprojnë në veri të vendit”, tha kryeministri Mustafa.
Ai shtoi se ky është edhe një obligim edhe ndaj Bashkimit Evropian dhe ndaj Shteteve të Bashkuara të Amerikës, me të cilat janë quar përpara këto procese, duke shprehur besimin se po përmbyllet ky proces dhe se do t’i përmbyllen edhe proceset tjera që janë përpara.
Qeveria e Kosovës njoftonte në 26 mars 2015 se, me ndërmjetësimin e Bashkimit Evropian ishte arritur Marrëveshja për çështjen e të ashtuquajturës “Mbrojtja civile”. Me këtë rast ministrja për Dialogun Edita Tahiri, e cila ka udhëhequr negociatat për këtë çështje ka deklaruar se, “arritja e kësaj marrëveshje mes tre palëve, Kosovës, Serbisë dhe BE-së e cila është përmbyllur ka një rëndësi të madhe sepse i jep fund strukturës ilegale të ashtuquajtur ‘Mbrojtja Civile’ dhe mundëson integrimin e ish-pjesëtareve të sajë në institucionet e Republikës së Kosovës”.
“Marrëveshja parasheh procesin e zhbërjes së kësaj strukture paramilitare dhe procesin e integrimit të individëve në institucionet civile të shtetit të Kosovës, specifikon obligimet e palëve dhe afatet kohore të zbatimit. Marrëveshja parasheh mbylljen e të gjitha objekteve, zyrave dhe depove që kanë qenë në shfrytëzim nga kjo strukturë ilegale në komunat veriore të Kosovës dhe dorëzimin e tyre institucioneve të Republikës së Kosovës. Kjo marrëveshje duhet të zbatohet deri më 1 shtator 2015”, theksonte ministrja Tahiri.

VENDIMI I GJND PARA 5 VITEVE, VULË E LEGALITETIT TË SHTETËSISË SË KOSOVËS

Zv/kryeministri e ministri i Jashtëm kosovar, Hashim Thaçi, përkujton se sot shënojmë pesëvjetorin e opinionit këshillëdhënës të Gjykatës Ndërkombëtare të Drejtësisë për Deklaratën e Pavarësisë së Kosovës.
“Ky vendim dëshmoi se aspiratat e popullit të Kosovës për pavarësi ishin legjitime, derisa akti i shpalljes ishte në përputhje të plotë me çdo normë të zbatueshme të së drejtës ndërkombëtare. Edhe sot u jemi mirënjohës të gjitha shteteve mike që na përkrahën në këtë fitore të madhe ndërkombëtare, që përbën edhe vulën e legalitetit të shtetësisë së Kosovës”, thekson Thaçi.
Para pesë vitesh, në 22 korrik, Gjykata Ndërkombëtare e Drejtësisë ka konkluduar se miratimi i Deklaratës së Pavrësisë së Kosovës në 17 Shkurt 2008 “nuk e ka shkelur të drejtën e përgjithshme ndërkombëtare, as rezolutën 1244 të Këshillit të Sigurimit e as Kornizën Kushtetuese”.
“Prandaj, miratimi i kësaj deklarate nuk e ka shkelur asnjë rregull të aplikushme të së dretës ndërkombëtare”, theksohej më tej.
Menjëherë pas këtij zhvillimi me rëndësi historike, në një deklaratë të anëtarëve të Grupit Drejtues Ndërkombëtar për mendimin këshillues të Gjykatës Ndërkombëtare të Drejtësisë rikonfirmohej mbështetjetja e palëkundur për pavarësinë e pakthyeshme të Kosovës dhe bëhej thirrje për njohje.
“Grupi Drejtues Ndërkombëtar rikonfirmon mbështetjen e palëkundur të tij për pavarësinë e pakthyeshme të Kosovës demokratike dhe shumetnike në kufijtë e saj të tanishëm dhe i bën thirrje shteteve tjera që të njohin Kosovën. Ai po ashtu përshëndet përkushtimin e vazhdueshëm të Kosovës dhe progresin e konsiderueshëm në zbatimin e Propozimit Gjithëpërfshirës për Statusin dhe do të vazhdojë të mbështesë Kosovën në punën për realizimin e perspektivës së saj evropiane”, theksohej në deklaratë.
Grupi Drejtues Ndërkombëtar (ISG) për Kosovën, i cili përbëhej nga vendet që e kanë njohur Pavarësinë, ishte formuar më 28 shkurt të vitit 2008 dhe synonte të orientojë dhe mbikëqyrë zhvillimin demokratik të Kosovës, të nxisë qeverisjen e mirë dhe shumetnicitetin, bazuar në Propozimin Gjithëpërfshirës të emisarit të posaçëm të OKB-së, kryenegociatorit për statusin, Martti Ahtisaari.

Kosova, drejt përmbylljes së dialogut për liberalizim të vizave

by

PRISHTINË, 20 Korrik 2015/-Ministria për Integrim Evropian e qeverisë së Kosovës deklaroi sot se, së bashku me institucionet e tjera do të vazhdojë angazhimin për përmbylljen e dialogut për liberalizim të vizave brenda vitit 2015.
Përfaqësues të grupeve punuese teknike për procesin e liberalizimit të vizave nga të gjitha institucionet përkatëse, kanë diskutuar sot për punën e misionit faktmbledhës të Komisionit Evropian për liberalizim të vizave, ekspertët e të cilit qëndruan në Kosovë nga 13-17 korrik, duke konstatuar se organizimi i misioni ishte i suksesshëm.
Me gjithë përmbushjen e përgjithshme të kritereve, u konstatua që përkushtimi i institucioneve duhet të vazhdojë në nivelin e njëjtë. Përderisa një numër i vogël i kritereve kërkon ende punë për tu përmbyllur përfundimisht, një numër i tyre u tha se kërkon zbatim të vazhdueshëm.
Me këtë rast, zëvendësministri i Integrimit Evropian, Ramadan Ilazi, ka falënderuar të gjithë përfaqësuesit institucionalë për kontributin e dhënë dhe i ka përgëzuar për bashkëpunimin që patën me ekspertët e misionit faktmbledhës. Ilazi ka përsëritur se rëndësia e këtij misionit vlerësues është qenësore sepse raporti që do të hartohet nga ekspertët do të hap rrugë për përmbylljen e procesit të liberalizimit të vizave.
Ndërsa, Fisnik Rexhepi, këshilltar i lartë politik i ministrit për Integrim Evropian dhe njëherësh koordinator teknik i procesit të liberalizimit , ka bërë të ditur se ekspertët kanë zhvilluar mbi 50 takime dhe vizita në terren me përfshirje të mbi 100 përfaqësuesve institucionalë, me ç’rast janë prezantuar të arriturat në adresimin e kritereve teknike të cilat janë vlerësuar nga ekspertët. /B.Jashari/

KOSOVA KULTIVON ME SHUMË RESPEKT TRADITËN E TOLERANCËS NDËRFETARE DHE NDËRKULTURORE

by

-Festohet Bajrami, mesazhe kundër çdo ekstremizmi dhe terrorizmi në emër të fesë/
Nga: Behlul Jashari/ PRISHTINË, 17 Korrik 2015/- Në Kosovë festohet Bajrami i Madh, drejtuesit institucionalë e politikë të shtetit më të ri evropian në mesazhet e tyre kanë uruar paqe, solidaritet dhe mirëkuptim me njëri-tjetrin, duke theksuar vlerat e tolerancës ndërfetare dhe ndërkulturore.
“Të punojmë çdo ditë, me shumë përkushtim, për ndërtimin e të ardhmes më të mirë për vendin tonë, si pjesë e familjes së madhe evropiane, duke kultivuar me shumë respekt traditën e tolerancës ndërfetare dhe ndërkulturore si vlerat me të çmuara të shoqërisë sonë”, theksohet në Kosovë, në mesazhet e urimit në festën e Bajramit të Madh.

BASHKË PËR VLERAT NË INTERES TË NJERËZIMIT DHE PAQES
Kryeministri i Republikës së Kosovës, Isa Mustafa, me rastin e Fitër – Bajramit, vizitoi sot Bashkësinë Islame të Kosovës, ku u prit nga myftiu i Kosovës, Naim Tërnava.
Duke uruar myftiun Tërnava dhe të gjithë besimtarët myslimanë të Kosovës, kryeministri Mustafa, theksoi se Festa e Bajramit është një ditë e cila i bashkon të gjithë besimtarët dhe përkujton se duhet të zhvillohet solidariteti, toleranca e të punohet bashkërisht për të mirën e njerëzimit.
“Ne erdhëm sot të vizitojmë Bashkësinë Islame, t’i urojmë myftiut dhe të gjithë bashkëpunëtorëve të tij, por edhe të gjithë besimtarëve islamë Ditën e Bajramit. Një ditë që është shumë e rëndësishme për ne të gjithë, sepse është një ditë e cila na bashkon edhe në familje, na bashkon edhe me miqtë, na bashkon edhe me të gjithë të tjerët që nuk kemi mundësi që t’i shohim dhe t’i vizitojmë shpesh, por edhe na përkujton me faktin se ne duhet të zhvillojmë solidaritetin, duhet të zhvillojmë tolerancën, duhet të punojmë bashkërisht për të mirën e njerëzimit”, tha kryeministri Mustafa.
Duke vlerësuar punën që Bashkësia Islame po bën në edukimin e popullatës dhe në aktivitetin e përditshëm për të zhvilluar paqen e mirëkuptimin, jo vetëm në Kosovë por në tërë botën, kryeministri kosovar Mustafa theksoi përkushtimin që të punohet bashkërisht për thellimin e këtyre vlera dhe që të punohet në interes të njerëzimit dhe në interes të paqes.
Gjatë vizitës në Bashkësinë Islame të Kosovës, bashkë me kryeministrin Isa Mustafa, ishin edhe zëvendëskryeministri i parë, njëherësh ministri i Jashtëm, Hashim Thaçi, ministri i Mjedisit dhe Planifikimit Hapësinor, Ferid Agani, ministri i Forcës së Sigurisë së Kosovës, Haki Demolli dhe ministri i Financave, Avdullah Hoti.

OBLIGIM I SHENJTË TA RUAJMË VATANIN TONË SI SYTË E BALLIT, E KEMI AMANET ATDHETAR E FETAR

Mesazhi i Bashkësisë Islame të Kosovës kundër çdo ekstremizmi dhe terrorizmi në emër të fesë është shprehur edhe sot në festën e Fitër Bajramit, për të cilën u janë drejtuar urime të gjithë shqiptarëve kudo që janë, besimtarëve myslimanë.
Në faljen në Xhaminë e Madhe në Prishtinë, kryetari i Bashkësisë Islame të Kosovës, myftiu Naim Tërnava u shpreh se, “nuk ka asgjë më me rëndësi në një shoqëri sesa përkushtimi i të gjithëve për siguri, paqe, harmoni, mirëbesim, respekt e nderim ndaj njëri-tjetrit”.
“Duhet të tregohemi shumë syçelë ndaj asaj që po ndodhë sot nëpër disa shtete nëpër botë, si luftë, terror e vrasje, në mënyrë që kjo të mos reflektohet edhe në vendin tonë”, vijoi ai.
“E kemi obligim të shenjtë ta ruajmë vatanin tonë si sytë e ballit, ngase këte e kemi amanet atdhetar e fetar. Nuk guxojmë me asnjë çmim të lejojmë që dikush t’i bëj keq vendit tonë, duke futur pasiguri, mosbesim e vëllavrasje mes nesh”, theksoi myftiu i Kosovës.
“Nga ky vend i bekuar, me tërë fuqinë e zemrës, shpirtit dhe të fjalëve tona, rikonfirmojmë edhe një herë përkushtimin e Bashkësisë Islame të Republikës së Kosovës dhe të besimtarëve myslimanë se jemi kundër çdo ekstremizmi të çfarëdo ngjyrimi fetar qoftë dhe kundër terrorizmit në emër të fesë”, tha kryetari i Bashkësisë Islame të Kosovës, Tërnava.
“Vetëm të bashkuar e unikë në qëllimet tona për mbrojtjen e atdheut tonë do të pengojmë me kohë çdo përpjekje për destabilizimin e shoqërisë sonë nga kushdoqoftë. Siguria, mirëqenja dhe interesi i vatanit do të jetë mbi interesat tona, se përndryshe nuk e kemi kryer amanetin e marrë nga i madhi Zot”, tha myftiu i Kosovës, Tërnava.
Ai u lut “për një Kosovë të sigurt, që Zoti ta ruajë prej kriminelëve, terroristëve dhe prej të gjithë atyre që dëshirojnë t’u bëjnë keq trojeve etnike shqiptare”.
Në Xhaminë e Madhe në Prishtinë manifestimi qendror për festën e Fitër Bajramit për Republikën e Kosovës filloi herët në mëngjes me faljen e namazit të sabahut.
Faljes së namazit të Fitër Bajramit i priu kryeimami i Kosovës, Sabri Bajgora.
Hytben e Fitrër Bajramit e mbajti myftiu i Kosovës, Naim Tërnava, i cili edhe iu drejtua opinionit me mesazhin e festës.
Me rastin e festës së Fitër – Bajramit, sot gjatë paraditësa organizohet edhe pritja tradicionale e përurimit në selinë e Kryesisë së Bashkësisë Islame të Kosovës, në Prishtinë.

Kosova aplikon për UNESCO, anëtarësimi pritet në nëntor

by

Nga Behlul Jashari/ PRISHTINË, 16 Korrik 2015/- Kosova aplikon për anëtarësim në organizatën e Kombeve të Bashkuara UNESCO, anëtarësimi pritet në nëntor.
“Sapo aplikuam për anëtarësi në UNESCO, agjencionin e OKB për arsim, shkencë dhe kulturë”, bën të ditur zv/kryeministri i parë e ministri i Jashtëm i Kosovës, Hashim Thaçi.
“Ky veprim vjen pas një konsultimi me partnerë dhe pas 130 takimeve me delegacione të UNESCO-s që kemi zhvilluar vetëm këtë vit”, thekson ai.
“Është ky një hap që fuqimisht zgjëron interaksionin tonë global”, vlerëson kreu i qeverisë së Kosovës.
“Presim që në nëntor të hyjmë në këtë organizatë shumë të rëndësishme”, është paralajmërimi i kryediplomatit kosovar, Thaçi.
Ndërsa, më pas kryeministri Isa Mustafa bëri të ditur se sot ishte njoftovar nga Ministria e Punëve të Jashtme se Kosova ka aplikuar për anëtarësim në UNESCO.
“Përgëzoj ministrin e Jashtëm, ministrin e Arsimit, Shkencës dhe Teknologjisë dhe ministrin e Kulturës, Rinisë dhe Sportit për një punë të madhe dhe me përkushtim”, është shprehur ai.
“Në takime me liderë evropianë dhe botërorë kam marrë zotime se Kosova do të përkrahet fuqishëm në këtë proces. Jemi zotuar, po ashtu , se edhe ne do të përmbushim detyrimet tona ndaj bashkësisë ndërkombëtare. Ky është një zhvillim i rëndësishëm diplomatik për Kosovën”, thekson Mustafa.
Kosova, shteti më i ri evropian, me pavarësinë e shpallur para shtatë vitësh, në 17 shkurtin historik 2008, deri tash është njohur nga mëse 110 vende anëtare të OKB-së.