Kosovë-Gjermani – Dielli

Kapitull i ri i Kosovës me Gjermaninë për bashkëpunimin ekonomik

July 21, 2016 by dgreca

-Ministri i Punëve të Jashtme të Republikës së Kosovës, Enver Hoxhaj, viziton Berlinin/

Berlin, 21 korrik 2016/ Ministri i Punëve të Jashtme të Republikës së Kosovës, Enver Hoxhaj ka nisur një vizitë zyrtare në Gjermani ku në fokus të axhendës së tij janë takimet me homologun e tij gjerman, Walter Steinemier, zyrtarë në Ministrinë e Punëve të Brendshme dhe udhëheqës të tjerë politik dhe ekonomik.

Nga Berlini MPJ kosovare në njoftimin e sapodërgur thekson se, në ditën e parë të vizitës Hoxhaj ka takuar Michael Harms, Drejtor i Komitetit Lindor të Ekonomisë Gjermane për të diskutuar mundësinë e rritjes së investimeve gjermane dhe njëkohësisht thellimin e bashkëpunimit në këtë drejtim. Hoxhaj ka deklaruar pas takimeve, se po e viziton Berlinin për të shtyrë përpara një kapitull të ri të bashkëpunimit që në fokus ka zhvillimin ekonomik të Kosovës.

“Jam për vizitë në Berlin si një mik i Gjermanisë dhe për të konfirmuar lidhjet e ngushta që ekzistojnë mes dy vendeve. Pas përkrahjes së madhe në çlirimin, rindërtimin dhe shtet ndërtimin e Kosovës nga ana e Gjermanisë, konsideroj se duhet të hyjmë në një fazë të re të marrëdhënieve e që ka si prioritet bashkëpunimin ekonomik. Dhe për këtë do të angazhohem me të gjitha kapacitetet e mija” ka deklaruar Hoxhaj.

Kryediplomati kosovar, ka zhvilluar një takim edhe me Frank Priess, zëvendësdrejtor i Konrad Adenauer Stiftung për Evropë dhe Bashkëpunim Ndërkombëtar, me të cilin ka diskutuar për nevojën e zgjerimit të fushë-veprimtarisë dhe përfshirjes edhe më të madhe të Fondacionit KAS në Kosovë.Hoxhaj, ka thënë se “përvoja dhe ndihma e këtij fondacioni do të ishte shumë e rëndësishme për forcimin e demokracisë, shoqërisë civile dhe të partive politike. Ministri Hoxhaj gjatë ditës ka takuar edhe Prof. Dr. Michael Stürmer, botues, kryeredaktor dhe historian i njohur gjerman dhe përkrahës i çështjes së Kosovës. Në agjendë të vizitës së tij, Hoxhaj do të takohet të premten edhe me ministrin e Jashtëm të Gjermanisë, Walter Steinmeier./b.j/

Kosovë-Gjermani, drejt dy marrëveshjeve

July 13, 2016 by dgreca

-Ministri Avdullah Hoti pritet nga ministri i Financave të Gjermanisë Wolfgang Schäuble/

PRISHTINË, 13 Korrik 2016-B.Jashari/ Ministri kosovar i Financave Avdullah Hoti po qëndron për vizitë zyrtarë në Berlin, Gjermani, me ftesë të ministrit të Financave të Republikës Federale të Gjermanisë Wolfgang Schäuble.

Njoftimi i dërguar thekson se, gjatë kësaj vizite ministri Hoti dhe homologu i tij Wolfgang Schäuble kanë diskutuar për marrëdhëniet bilaterale financiare ndërmjet dy vendeve, me theks të veçantë për Marrëveshjen Kornizë për Bashkëpunim teknik financiar 2016 – 2017, e cila pritet të nënshkruhet nga të dy qeveritë gjatë vjeshtës së këtij viti. Me këtë marrëveshje parashihet bashkëpunimi dhe financimi i projekteve të ndryshme në fusha prioritare, si në: Infrastrukturë publike (ujëra dhe energji), zhvillimin e qëndrueshëm ekonomik dhe promovimin e punësimit, demokraci, shoqëri civile dhe administratë publike, si dhe edukim.

Në këtë takim u diskutua edhe për Inicimin e marrëveshjes për eliminimin e Tatimit të Dyfishtë ndërmjet dy vendeve, si dhe për idenë e krijimit të një mini-berze.

Ministri Hoti, duke falënderuar lartë mikpritjen e homologut të tij Schäuble, tha se shteti gjerman është një ndër donatorët dhe bashkëpunëtorët më të rëndësishëm të Republikës së Kosovës, të cilët ndër vite kanë mbështetur qeverinë kosovare në projekte të ndryshme për përmirësimin e standardit jetësor të qytetarëve të Kosovës.

Ministri gjerman i Financave Wolfgang Schäuble, duke vlerësuar lartë bashkëpunimin me qeverinë e Republikës së Kosovës, tha se Gjermania e konsideron Kosovën si njërin nga vendet më të rëndësishme për bashkëpunim dhe shprehi gatishmërinë e shtetit të tij për të vazhduar këtë bashkëpunim edhe më tej.

Kosovë-Gjermani, marrëveshje për Efiçiencë në Energji

January 22, 2016 by dgreca

-Nga kjo marrëveshje me KfW (Banka Gjermane për Zhvillim) do të përfitojnë qytetarët e komunave e Gjilanit, Gjakovës, Prishtinës dhe Ferizajt/
PRISHTINË, 22 Janar 2016/ Qeveria e Republikës së Kosovës dhe KfW (Banka Gjermane për Zhvillim) nënshkruan sot Marrëveshjen për masat e Efiçiencës në Energji për nivelin Komunal.
Marrëveshja u nënshkrua nga ministri kosovar i Financave, Avdullah Hoti dhe Drejtori i KfW-së për Evropën Juglindore e Turqinë, Christoph Tiskens, ndërsa pjesëmarrës ishin edhe ministri i Zhvillimit Ekonomik Blerand Stavileci, si dhe kryetarët e komunave përfituese, kryetari i komunës së Prishtinës Shpend Ahmeti, kryetarja e komunës së Gjakovës Mimoza Kusari – Lila, kryetari i komunës së Gjilanit Lutfi Haziri, si dhe kryetari i komunës së Ferizajt Muharrem Sfarqa.
Ministri i Financave Avdullah Hoti, duke falënderuar qeverinë gjermane, BE-në dhe KfW për bashkëpunimin e shkëlqyer të ofruar gjatë të gjitha këtyre proceseve, bëri të ditur se nga kjo marrëveshje do të përfitojnë qytetarët e komunave e Gjilanit, Gjakovës, Prishtinës dhe Ferizajt.
“Kjo marrëveshje vije në sajë të bashkëpunimit të shkëlqyer që kemi me Gjermaninë dhe BE-në. Marrëveshja për këtë projekt kap vlerën prej 7.5 milionë euro, ku 5 milionë euro janë grant, 2.5 nga qeveria gjermane dhe 2.5 nga WBIF. Pjesa e kredisë përfshinë vlerën prej 2.5 milionë euro nga KfW-ja me një grejs periudhe 3 vjeçare dhe me afat amortizimi deri në vitin 2028, me këste që paguhen dy herë brenda vitit”, tha ministri Hoti.
Ai vijoi se, marrëveshja për këtë projekt edhe më tutje konfirmon përpjekjet e qeverisë së Republikës së Kosovës dhe partnerëve ndërkombëtarë për përmirësimin e jetës së qytetarëve të Republikë së Kosovës, pasi që nga ky projekt direkt do të përfitojnë institucionet më të rëndësishme të këtyre qyteteve, siç janë shkollat fillore dhe të mesme dhe shëndetësia primare.
“Kjo marrëveshje vije pas nënshkrimi të marrëveshjes me Bankën Botërore për të njëjtin qëllim për nivelin qendror, i cili njëherit paraqet edhe synimin e qeverisë së Republikës së Kosovës dhe miqve ndërkombëtarë drejt përmirësimit të sistemi të energjisë, si një sektor kyç për zhvillimin e vendit dhe inkuadrimin e mëtutjeshëm në strukturat ndërkombëtare”, theksoi ministri Hoti.
Ndërsa, drejtori i KfW-së për Evropën Juglindore e Turqinë,. Christoph Tiskens, tha se “qëllimi i këtij programi është përmirësimi i kushteve të jetesës për banorët e komunave të Prishtinës, Gjakovës, Gjilanit dhe Ferizajt dhe është i bazuar në studimin e fizibilitetit, i përfunduar në vitin 2012 dhe i financuar nga Korniza Investuese për Ballkanin Perëndimor, ku janë identifikuar 30 ndërtesa në komuna të ndryshme që kanë nevojë për rehabilitimin e masave të efiçiencës energjetike, në ndërrim të dritareve, izolim, sisteme të ngrohjes, të shkollave, kopshteve të fëmijëve, spitaleve dhe qendrave mjekësore. Kostoja e zbatimit është rreth 7.5 Milionë Euro”./b.j/