Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Pandeli Majko në Kosovë-28 Nëntori – Urimie për të gjithë shqiptarët

by

-Pandeli Majko në Kosovë: Festa e 28 Nëntorit na fton të reflektojmë. Ajo nuk është një festë që nxit ndarje, por nxit bashkëpunim dhe negociata/-Kryetari i Kuvendit të Republikës së Kosovës, Kadri Veseli priti sot në takim ish-kryeministrin e Republikës së Shqipërisë, Pandeli Majko/Nga Behlul Jashari/ PRISHTINË, 24 Nëntor 2015/ Ish-kryeministri i Shqipërisë, Pandeli Majko, i cili ishte në krye të qeverisë shqiptare në kohën e luftës në Kosovë gjatë viteve 1998-99, sot në Prishtinë dha mesazhin se, Festa e 28 Nëntorit na fton të reflektojmë, ajo nuk është një festë që nxit ndarje, por nxit bashkëpunim dhe negociata.Kryetari i Kuvendit të Republikës së Kosovës, Kadri Veseli priti sot në takim ish-kryeministrin e Republikës së Shqipërisë, Pandeli Majko.Në prag të 28 Nëntorit, Veseli dhe Majko përcollën mesazhe urimi për të gjithë shqiptarët, me porosinë që ajo të shënohet në frymën e mirëkuptimit vëllazëror dhe mirëbesimit ndërqytetar.Në takim zyrtar, njëkohësisht edhe midis miqsh, u evokuan kujtimet e përbashkëta të kohës së Luftës çlirimtare dhe këmbyen ide për gjendjen në rajon dhe tejkalimin e situatës në Kuvendin e Kosovës.Kryetari Veseli falënderoi ish-kryeministrin Majko për kontributin e tij të jashtëzakonshëm për Kosovën nga të gjitha pozitat e tij drejtuese, në kohë dhe rrethana të ndryshme, që nga Lufta çlirimtare, kur Majko ishte në krye të ekzekutivit shqiptar.Kryeparlamentari Veseli çmoi lart bashkëpunimin që Kosova dhe Shqipëria kanë ndërmjet tyre, duke e konsideruar atë shembull për vendet e tjera në rajon. Kreu i Kuvendit shfaqi interesimin dhe gatishmërinë për t’i vazhduar marrëdhëniet e tilla me Tiranën zyrtare në të gjitha fushat, duke i kultivuar dhe intensifikuar më tej ato, në të mirë të të dyja vendeve, veçanërisht lëmin parlamentar.

Lidhur me zhvillimet aktuale në skenën politike të Kosovës, ishte dakordim i përbashkët nevoja e komunikimit midis subjekteve politike, i cili do t’i hapte rrugë arritjes së një konsensusi të përbashkët, në të mirë të qytetarëve të Kosovës dhe përmirësimit të jetës sociale e ekonomike të tyre, zhvillimit të shtetit ligjor dhe demokracisë parlamentare.

Ish-kryeministri Majko, nga ana e tij, tha se çdo vizitë në shtëpinë e tij të dytë, siç e konsideroi ai Kosovën, përcillet me emocion të veçantë, ndërsa këtë radhë, edhe me shqetësim për situatën e krizës politike në Prishtinë, e cila shpesh herë, sipas tij, eksportohet si kulturë nga Tirana zyrtare. Por, ai u shpreh i bindur se gjërat do të shkojnë në drejtimin e duhur.
“Ne kemi një varg shumë të bukur te Himni Kombëtar, ‘Rreth flamurit të përbashkuar’. Mendoj se 28 nëntori nuk është një festë që nxit ndarje, por nxit bashkëpunim dhe negociata, sepse shqiptarët kanë ditur që në momentet më të vështira për vendin të falin edhe gjakun, e jo më të tejkalojnë inatet politike të natyrave të ndryshme, nga më të drejtat, deri në më të gabuarat. Festa e 28 Nëntorit na fton të reflektojmë”, theksoi Majko.
Ai shprehu optimizmin se të gjithë ata që janë pjesë e kujtimeve të tij, e që sot veprojnë nëpër parti të ndryshme politike, kanë mundësitë që në prag të Festës së Flamurit të gjejnë një gjuhë të përbashkët, me qëllim që t’i japin Kosovës atë që meriton, një ëndërr për të nesërmen, për të vazhduar rrugën e cila ka të bëjë jo vetëm me Kosovën, por me të gjithë shqiptarët.
Ndërsa, pas takimit, kryetari i Kuvendit të Kosovës, Kadri Veseli, ka shkruar në ‘facebook’:
“Në takim me mikun tim, ish kryeministrin dhe tash deputet i Kuvendit të Shqipërisë, Pandeli Majkon, evokuam kujtimet e përbashkëta të kohës së Luftës çlirimtare dhe këmbyem ide për gjendjen në rajon dhe tejkalimin e situatës në Kuvendin e Kosovës.
Po ashtu, së bashku, ua uruam shqiptarëve kudo që janë, Ditën e Flamurit, që kjo festë të shënohet në frymën e mirëkuptimit vëllazëror dhe mirëbesimit ndërqytetar”.

DEKLARATË E FEDERATËS PANSHQIPTARE TË AMERIKËS “VATRA” MBI SITUATËN NË KOSOVË

by

Vatranët në Shtetet e Bashkueme të Amerikës, si të gjithë shqiptarët në përgjithsi, janë të alarmuem për gjendjen kritike të krijueme në Kosovë.Pamjet e shëmtueme të dy ditëve të fundit, transmetue direkt nga Prishtina, nuk i ngjajshin nji vendi ku populli i lirë ka mendue se ka zgjedhë e dërgue ma të përshtatshmit me e udhëheqë drejt konsolidimit të shtetit dhe mirëqenjes së qytetarëvet, dhe ma të mirët për të përfaqsue interesat e tij në Parlament.
Kuvendi i ngjante ma tepër një arene sportive me tifozë të dalun kontrollit se sa një institucioni ku vendosen fatet e Kosovës, në kundërshtim me odat tradicionale të burravet, ku palët kundërshtuese ndigjoheshin me rend, argumentet shqyrtoheshin me gjakftoftësi dhe konfliktet zgjidheshin me arsye e drejtësi, si u ka hije njerëzve të civilizuem.
Pamjet jashtë Kuvendit sjellshin memorjen e kohëve jo të largëta të konfrontimevet me policët serbomalazez dhe nuk i ngjajshin një popull që i gëzohet lirisë së fitueme me aq shumë gjak e sakrifica.
Nuk mund të pajtohemi me metodat e dhunës me prirje anarkike të opozitës, që janë të papranueshme në nji shoqni të civilizueme, të dënueshme si antidemokratike dhe, në anë tjetër, komprometojnë randë kauzën të cilës don t’i dalë zot, sado kauzë e drejtë të jetë ajo.
Koalicioni qeveritar nuk i shpëton përgjegjësisë për situatën e krijueme që asht shkak i një dëshprimi shpërthyes. Korrupsioni i përhapun deri në rrethet ma të nalta qeveritare e parlamentare, zyrtarët e zgjedhun a të emnuem pasunohen “mbrenda natës”si me u pikë parja prej qiellit, ndërsa populli vorfnohet gjithnjë e ma tepër, papunësia rritet, rinija mbetet rrugëvet pa shpresë për të ardhmen dhe mija familjesh lëshojnë trojet e marrin arratinë, manipulimet politike dhe etja e teprueme për pushtet dhe për pasunim të pa kufi, janë disa nga ankesat e zashme të popullit, që asht sovrani të cilit duhet t’i shërbejnë zyrtarët, qofshin qeveritarë ose përfaqësuesa të tij në parlament.
Situata ka shkue tue u keqsue në vend që të përmirësohet dhe ka mbërrijtë në një nivel alarmues mbas nënshkrimit të dy marrëveshjeve që ka ba qeverija me Serbinë për “Zajednicat” dhe me Malin e Zi për përcaktimin e vijës kufitare. Opozita e akuzon qeverinë për lëshime të randa në dam të Kosovës, ndërsa qeverija pohon të kundërtën, dhe kështu çashtja ka kalue në Gjykatën Kushtetuese. Asht e arsyeshme që opozita të ketë durim dhe t’i japi kohë Gjykatës të veprojë.
Për të dalë nga situata e rrezikshme që asht krijue në Kosovë, mendojmë se, së pari, duhet të merret vendim dhe të organizohet sa ma shpejt një referendum për marrëveshjet, për të cilat populli duhet të informohet në mënyrë shumë të qartë dhe t’i kuptojë mirë, kështu që ai, sovrani, në kushte të qeta sigurije, të vendosi në se i pranon ose i shtyn ato për negociata të reja. Së dyti, të shqyrtohet me seriozitet mundësia e shkuemjes në zgjedhje të parakohshme.
Kemi shpresë se të gjithë faktorët politikë, për interesin e popullit e të shtetit të Kosovës, do të zgjidhin mosmarrëveshjet dhe do të krijojnë klimën e gjakftoftësisë, që të ecet përpara drejt stabilitetit dhe përparimit të vendit e mirëqenjes së popullit. Këtë ua dëshirojmë me sinqeritetin tonë vëllaznor.
Kryesia (New York, 18 nandor 2015)

Kosovë, buqeta lulesh te Ambasada e Francës

by

PRISHTINË, 14 Nëntor 2015/ Kryetari i Kuvendit të Kosovës, Kadri Veseli, në shenjë të nderimit për viktimat e sulmeve terroriste që ndodhën dje në Paris, vendosi sot buqeta me lule tek Ambasada e Francës në Prishtinë.
Me këtë rast kryetari Veseli në emër të Kuvendit të Kosovës, përmes ambasadores Maryse Daviet, u shprehu ngushëllime familjarëve të viktimave të sulmeve terroriste në Paris. Kryetari Veseli i tha ambasadores Daviet se “këto sulme barbare kanë lënduar zëmrat e të gjithë neve, sepse një mik i madh i Kosovës, Franca është sulmuar, por vlerat mbi të cilat bazohet Franca dhe ne popujt tjerë që i ndajmë këto vlera franceze, qëndrojnë të palëkundura përgjithmonë”.
“Liria dhe të drejtat e njeriut do të fitojnë edhe këtë betejë me terrorizmin e motivuar nga fanatizmi fetar, ashtu sikurse i fituan edhe betejat me fanatizmat e shekullit të kaluar, fashizmin e komunizmin”, theksoi me këtë rast kryeparlamentari Veseli.
Ambasadorja Daviet, nga ana e saj, falenderoi kryetarin Veseli për ndjenjat e solidaritetit që ai dhe populli i Kosovës po shprehin në këto momente të rënda për popullin francez.

Para Ambasadës së Francës në Prishtinë, në nderim të viktimave të sulmeve terroriste që ndodhën të premten në Paris, në emër të kryeministrit të Republikës së Kosovës, Isa Mustafa, një buqetë me lule është vendosur nga shefja e stafit në Kryeministri, Vlora Dumoshi.

Dumoshi, po ashtu, është takuar me ambasadoren franceze, Maryse Daviet, duke i përcjell ngushëllimet më të sinqerta të kryeministrit Mustafa, për familjarët e viktimave, popullin dhe Qeverinë Franceze, në këto momente të vështira.

THAÇI: KOSOVA BASHKËNDJEN ME POPULLIN E FRANCËS

Prishtinë, 14 nëntor 2015/ Zëvendëskryeministri i parë, Hashim Thaçi, njëherësh ministër i Jashtëm i Republikës së Kosovës, në emër të qytetarëve të Kosovës i ka shprehur ngushëllime homologut të tij dhe qeverisë franceze për humbjen e jetës së qindra qytetarëve francezë nga sulmet e mbrëmshme terroriste në Paris.

Në telegramin e tij, Thaçi ka thënë se populli dhe institucionet e Republikës së Kosovës bashkëndjejnë me popullin francez në këto çaste të rënda për Francën dhe familjet e viktimave.
Qeveria e Republikës së Kosovës qëndron fuqishëm përkrah koalicionit global në luftën kundër terrorizmit dhe mbetet e angazhuar për mbrojtjen e vlerave dhe mirëqenien kudo në botë nga aktet e tilla mizore të terroristëve. /b.j/

Oda Ekonomike Amerikane në Kosovë organizon Konferencë

by

“A jemi gati për MSA?”/
PRISHTINË, 10 Nëntor 2015-B.Jashari/ Marrëveshja për Stabilizim Asociim e nënshkruar në 27 tetor në Strasburg mes Bashkimit Evropian dhe Kosovës është me përfitime të shumta për ekonominë e vendit, por nevojitet angazhim më i madh i institucioneve kosovare për zbatimin e mirëfilltë të saj, u theksua sot në një konferencë në Prishtinë.
“MSA mund t’i sjellë përfitime të shumta bizneseve dhe ekonomisë kosovare, por megjithatë shteti i Kosovës mund të mos jetë i gatshëm plotësisht për zbatimin e plotë të kësaj marrëveshje. Që zbatimi i plotë të ndodhë është i nevojshëm bashkëpunimi i ngushtë i institucioneve publike dhe sektorit privat me qëllim të përshpejtimit të reformave ligjore dhe institucionale në përputhje me kërkesat që dalin nga MSA dhe kërkesat e tjera në rrugën e integrimit evropian të Kosovës”, janë konkluzionet e konferencës së organizuar nga Oda Ekonomike Amerikane në Kosovë me titull “A jemi gati për MSA?”.
Në konferencë diskutimet u zhvilluan në tre panele për temat: “Pronësia Intelektuale dhe Industriale”, “Prokurimi Publik dhe Konkurrenca”, si dhe “Tregtia”.
Në diskutime u shpreh shqetësim lidhur me kapacitetet e kufizuara njerëzore që pamundësojnë zbatimin e duhur të legjislacionit në fuqi në fushën e mbrojtjes së pronësisë intelektuale dhe industriale, por edhe për vonesën në funksionalizimin e Komisionit për Mbrojtjen e Konkurrencës, si një trup jashtëzakonisht i rëndësishëm në garantimin e zbatimit të plotë të konkurrencës së drejtë në vend.
Një konkluzion i përgjithshëm i konferencës është se, për përmirësim të fushave në të cilat momentalisht bizneset përballen me shumë probleme, është më se e domosdoshme rritja e efikasitetit të gjyqësorit kosovar.
Raporti i Progresit për Kosovën i Komisionit Evropian, i publikuar sot, ka vlerësuar tre të arritura kryesore, mes të cilave është nënshkrimi i Marrëveshjes së Stabilizim Asociimit me Bashkimin Evropian.

Kosovë-Vizia të pelegrinëve serbë në Kishën e qytetit të Gjakovës

by

-Qeveria përshëndet përfundimin pa asnjë incident të vizitave të pelegrinëve serbë/
PRISHTINË, 7 Nëntor 2015/ Qeveria e Republikës së Kosovës përshëndet përfundimin pa asnjë incident të vizitave të pelegrinëve serbë në Kishën e qytetit të Gjakovës dhe në kisha, manastire dhe varreza nëpër disa qytete të tjera të Kosovës.
Qeveria e Kosovës çmon lartë sjelljen e qytetarëve dhe të pelegrinëve gjatë këtyre vizitave si dhe përkushtimin e kryetares së Komunës së Gjakovës dhe autoriteteve lokale të Pejës, Deçanit, Suharekës, Prishtinës, Mitrovicës dhe komunave të tjera, ku kanë qëndruar pelegrinët serbë, si dhe Policinë e Kosovës, për profesionalizmin e dëshmuar.
Qeveria e Republikës së Kosovës vlerëson se kjo është dëshmia më e mirë reale e bashkëjetesës dhe tolerancës tradicionale që karakterizon qytetarët e Kosovës, të të gjitha etnive dhe besimeve fetare.
Deklarata thkson se, “Republika e Kosovës dhe qytetarët e saj, janë të përkushtuar për të respektuar të gjitha vlerat demokratike evropiane, për të qenë pjesë e botës demokratike dhe e të gjitha organizatave ndërkombëtare që kanë të bëjnë me trashëgiminë, kulturën, arsimin e shkencën dhe avancimin e marrëdhënieve dhe bashkëpunimit të gjithanshëm ndërmjet kombeve në botë”.
Me këtë rast, qeveria e Kosovës vlerëson se pranimi i Kosovës në Organizatën e Kombeve të Bashkuara për Arsim, Shkencë dhe Kulturë (UNESCO), ditën e hënë, do të ishte një hap i rëndësishëm për fuqizimin e këtyre vlerave. “Republika e Kosovës e meriton dhe është e gatshme të jetë anëtare e denjë e UNESCO-s, pasi që ndan dhe beson në vlera të njëjta me misionin e kësaj organizate”, thekson deklarata e qeverisë kosovare./b.j/ Foto: Kortezi Zeri