Foto Gazeta Dielli: Presidenti i Kosoves, Hashim Thaçi me korrespondentin ne Kosove te Gazetes Dielli, Behlul Jashari/

– Presidenti i Republikës së Kosovës, Hashim Thaçi: Për Ditën Botërore të Lirisë së Shtypit, takova ata që me punën e tyre bëjnë që shoqëria jonë, institucionet tona të jenë më të përgjegjshme/

-Asociacioni i Gazetarëve të Kosovës zotohet se të vazhdojë angazhimin maksimal në mbrojtjen e të drejtave-

 Nga Behlul Jashari/ PRISHTINË, 3 Maj 2016/ Në Kosovë, në Ditën Botërore të Lirisë së Shtypit krerët e shtetit drejtojnë sot mesazhe për mediat dhe gazetarët. Presidenti i Republikës së Kosovës, Hashim Thaçi, në mbrëmje organizoi pritje për përfaqësuesit e ftuar të mediave, ndërsa mesazhe gazetarëve u kanë drejtuar edhe kryeministri Isa Mustafa e kryeparlamentari Kadri Veseli.“Për Ditën Botërore të Lirisë së Shtypit, takova ata që me punën e tyre bëjnë që shoqëria jonë, institucionet tona të jenë më të përgjegjshme”, u shpreh Presidenti Kosovar Thaçi.

 Kryeministri Mustafa, në Ditën Ndërkombëtare të Lirisë së Shtypit, ka theksuar rëndësinë jetike që ka liria e shprehjes për fuqizimin dhe demokratizimin e mëtejmë të shoqërisë kosovare.
Ai thotë se këtë instrument të rëndësishëm e sheh si shtytës për qeverisje të përgjegjshme dhe nxitës të përmbushjes së standardeve të përafrimit euroatlantik të Kosovës.“Si kryeministër, unë zotohem t’i përkrahë gazetarët në përpjekjet e tyre të vazhdueshme për të qenë të lirë e të pavarur. Në këtë ditë të veçantë për të gjithë gazetarët dhe mediat, unë i mbështesë të gjithë ata në përkushtimin e tyre që të kryejnë misionin për të cilin janë përcaktuar. Qeveria që unë drejtoj dëshiron partneritet me median në funksion të përmbushjes së obligimeve që kemi të dyja palët karshi publikut”, thekson kryeministri Mustafa.

Kryetari i Kuvendit, Veseli me rastin e Ditës Ndërkombëtare të Lirisë së Shtypit shpreh urimet e sinqerta për të gjitha gazetarët, analistët, botuesit dhe punonjësit e ndryshëm të mediave që veprojnë në Kosovë. 

“Mediat e lira, të paanshme dhe profesionale luajnë një rol vendimtar e të pazëvendësueshëm në konsolidimin e demokracisë dhe sundimit të ligjit në vend. Prandaj unë i uroj punë të mbarë dhe i siguroj se do të mbetem një mik i vërtetë i tyre”, shprehet kryeparlamentari Veseli. 

Në aktivitetet tjera të ditës do jetë prezantimi  në Prishtinë i  një sondazhi dhe një tryezë diskutimi për besueshmërinë e mediave në Kosovë.

Asociacioni i Gazetarëve të Kosovës në një deklaratë pak më parë shprehu shqetësim për keqësimin e gjendjes së lirisë së shtypit në Kosovë.

Në Ditën Ndërkombëtare të Lirisë së Shtypit, AGK rikujton se të bërit gazetari në Kosovë po bëhet gjithnjë e më e vështirë pasi gazetarët po përballen me presion të shtuar dhe ngushtim të hapësirës së veprimit të lirë.

Vetëm gjatë viteve 2014 dhe 2015 në AGK janë raportuar 27 respektivisht 24 raste të sulmeve, kërcënimeve, presioneve, fyerjeve dhe pengimit në punë të gazetarëve, që tregon për rritje të numrit krahasuar me rastet e raportuara në vitet paraprake ku kanë qenë 15 deri 18 raste.

AGK rikujton se përveç sulmeve kërcënimeve dhe presionit të jashtëm nga politika, grupet e interesit dhe institucioneve të tjera, gazetarët janë të privuar nga të drejtat elementare të punës.

Deklarata thekson se, sipas statistikave, nga rreth 400 anëtarët e AGK-së, 30 përqind e kolegëve gazetarë punojnë në medie pa kontrata pune dhe paguhen jo dinjitetshëm për punën që bëjnë. 

Bazuar në raportet ndërkombëtare për lirinë e medies, Kosova vazhdon të mbetet një shtet gjysmë i lirë me liri të pjesshme të të shprehurit dhe ambient të pa favorshëm për ushtrimin e profesionit të gazetarisë.

Duke marr parasysh këtë gjendje, AGK kërkon nga institucionet e Kosovës që t’i zbatojnë mekanizmat ligjor për mbrojtjen e gazetarëve dhe krijimin e një ambienti të përshtatshëm për zhvillimin e lirisë së shprehjes, si një ndër elementet fundamentale të demokracisë.

AGK konsideron se mungesa e zbatimit të ligjit dhe mosfunksionimi i institucioneve të drejtësisë ka inkurajuar të pakënaqurit me punën e gazetarëve që ta marrin drejtësinë në duar. 

Asociacioni i Gazetarëve të Kosovës zotohet se të vazhdojë angazhimin maksimal në mbrojtjen e të drejtave të garantuara të gazetarëve dhe krijimin e hapësirës që mediat në Kosovë, të jenë të lira dhe të pavarura në punën e tyre.

Në raportin “Liria e Shtypit në Botë 2016” të “Freedom House” Kosova radhitet në vendin e 96-të dhe hyn në listën e vendeve “pjesërisht të lira”, një përmirësim shumë i vogël nga pozita e 98-të, në të cilën radhitej vitin e kaluar.