-Delegacioni i Prokurorisë së Përgjithshme të Shqipërisë, i kryesuar nga Prokurori i Përgjithshëm, Adriatik Llalla, takoi Kryeprokurorin e Shtetit të Kosovës, Aleksandër Lumezi. Zhvillon takime edhe me Presidenten e Republikës së Kosovës, Atifete Jahjaga dhe Ministrin e Drejtësisë, Hajredin Kuçi/

 PRISHTINË, 10 Mars 2016-B.Jashari/Në Kosovë po qëndron një delegacion i Prokurorisë së Përgjithshme të Shqipërisë, i kryesuar nga Prokurori i Përgjithshëm, Adriatik Llalla, me ftesë të Kryeprokurorit të Shtetit të Kosovës, Aleksandër Lumezi.Në takimin e zhvilluar në mes të dy kryeprokurorëve është biseduar për bashkëpunimin në mes të dy institucioneve që ata udhëheqin. Prokurori  Llalla tha se dy prokuroritë kanë  bashkëpunim të mirë dhe do ta vazhdojmë këtë bashkëpunim edhe në të ardhmen duke forcuar sistemin ligjor në dy vendet, me qëllim të integrimit sa më të shpejt në Bashkimin Evropian.

Delegacioni i Prokurorisë së Përgjithshme të Shqipërisë gjatë qëndrimit të Kosovë, do të zhvillojë takime me Presidenten e Republikës së Kosovës, Atifete Jahjaga dhe Ministrin e Drejtësisë, Hajredin Kuçi.

Njoftimi i dërguar thekson se, Kryeprokurori i Shtetit, Aleksandër Lumezi, ka njoftuar delegacionin e prokurorëve nga Shqipëria me funksionimin e sistemit prokurorial të Kosovës.

Gjatë këtij takimi, Lumezi dhe Llalla kanë biseduar lidhur me sfidat kryesore të dy sistemeve prokuroriale.

Lumezi, ka thënë se sfidë kryesore për Prokurorin e Shtetit të Kosovës është trajtimi i lëndëve të krimeve të luftës, korrupsionit, krimeve ekonomike. Po ashtu, ai njoftoi delegacionin e prokurorëve nga Shqipëria se në kuadër të Prokurorisë Speciale të Republikës së Kosovës, është themeluar Departamenti për Krime Lufte.

Po ashtu, Lumezi bëri me dije se Prokurori i Shtetit ka bërë planin strategjik për luftimin  e korrupsionit dhe se në kuadër të Prokurorisë Themelore të Prishtinës është themeluar Njësiti për luftimin e këtyre lëndëve. Në takimin e zhvilluar në mes të dy delegacioneve të dy prokurorive i pranishëm ishte edhe kryesuesi i Këshillit Prokurorial të Kosovës, Blerim Isufaj, i cili ka prezantuar funksionimin e Këshillit, si dhe ka thekuar se vizitat si kjo do të ndikojnë në thellimin e bashkëpunimit mes dy sistemeve. Kryesuesi Isufaj, po ashtu ka folur edhe për ndryshimet tjera që ka pësuar Këshilli Prokurorial me plotësim-ndryshimin e Ligjit për Këshillin Prokurorial dhe Prokurorin e Shtetit.