OKB – NEW YORK : Këshilli i Sigurimit, pritet të mblidhet që të diskutojë raportin e rregullt tremujor mbi Kosovën, më 27 maj, kjo për shkak, se në 8 qershor në Kosovë, do të mbahen zgjedhjet e përgjithëshme parlamentare.
Kështuqë, Këshilli i Sigurimit të OKB-së, do të mblidhet më 27 të këtij muaji – për të diskutuar raportin e radhës për Kosovën të Sekretarit të Përgjithshëm të OKB-së Ban Ki-moon, kështu të paktën kan thënë burime diplomatike nga Nju Jorku.
Këtë radhë, për herë të parë, të dyja vendet do të prezantohen në nivel presidencial – prej se kur të dy presidentët janë zgjedhur. Kësisoj, presidentja e Republikës së Kosovës Atifete Jahjaga, do të jetë në këtë debat rutinë të Këshillit të Sigurimit të OKB-së, me presidentin serb – Tomislav Nikolic.
Raporti i sekretarit të Përgjithshëm të Këshillit të Sigurimit, thuhet se u është dorëzuar shteteve anëtare në fillim të këtij muaji. Burimet diplomatike nga Nju Jorku, kan thënë se në këtë raport nënvizohet se ende mbesin disa sfida në zbatimin e plotë të Marrëveshjes së Brukselit ndërmjet Kosovës dhe Serbisë, sidomos për krijimin e Asociacionit të Komunave Serbe.
“I inkurajoj të dyja palët që të vazhdojnë punën e tyre, në besim të ndërsjellë për zbatimin e marrëveshjes dhe që ta krijojnë Asociacionin në vullnet të mirë. Megjithatë, moszgjidhja e problemeve për zbatimin e plotë të marrëveshjes së 19 prillit, nuk duhet të minimizojnë përparimin e bërë që nga fillimi i dialogut”, citohet të ketë thënë Sekretari i Përgjithshëm të OKB-së Ban Ki-moon.
Organizata e Kombeve të Bashkuara, ka deklaruar, gjithashtu, se ajo nuk do të përzihet në çështjen e krijimit të Ushtrisë së Kosovës – FAK.
Zëdhënësi i OKB-së, Farhan Hak, ka thënë për agjencitë e lajmeve ndërkombëtare, në fillim të këtij muaji se nuk i përket OKB-së të përzihet në çështjet që kanë të bëjnë me sigurinë në Kosovë.
Deklarimet e zyrtarëve të OKB-së vijnë pas reagimit të Serbisë se do të kërkonte mbledhje urgjente të Këshillit të Sigurimit për çështjen e krijimit të ushtrisë së Kosovës./Beqir SINA/