Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Jamie Shea: Debati duhet të bëhet në parlament

by

Ish zëdhënësi i NATO-s, Jamie Shea, aktualisht ndihmës sekretar i NATO-s, tha të enjten në Prishtinë se debatet duhet të zhvillohen në parlament e jo jashtë tij.

Ai i bëri këto komente gjatë një ceremonie në kolegjin AAB në Prishtinë, ku u nderua me çmimin ndërkombëtar për të drejtat e njeriut “për kontributin e dhënë në ndihmën, përkrahjen dhe shpëtimin e refugjatëve dhe popullatës civile në Kosovë gjatë periudhës mars – qershor 1999”.

Zoti Shea u shpreh i prekur nga lidhja qe ruajnë qytetarët e Kosovës me periudhën e ndërhyrjes së NATO-s në vitin 1999 dhe misionin e KFOR-it. Duke perifrazuar filozofin francez Voltaire, se “çdo njeri ka dy shtëpi”, ai tha se për të janë dy po ashtu, “një në Kosovë dhe një në Mbretërinë e Bashkuar“.

Ai ritheksoi përkushtimin e NATO-s për paqen dhe sigurinë në Kosovë. “Më lejoni t;u garantojë se për aq kohë sa do të keni nevoje për në që t’u ndihmojmë për ta bërë lirinë, demokracinë dhe përparimin tuaj edhe më të përsosur, ne do të jemi këtu që t’ju ndihmojmë“, tha ai.

Ai tha se në botë aktualisht ka ende shume vuajtje duke përmendur konfliktet në Lindjen e Mesme dhe situatën në Krime dhe gjetiu.

Çështja e të drejtave të njeriut është punë e papërfunduar, tha ai, “Sot mund të kremtohet puna e kryer mirë në vitin 1999 kur u ndalua situata, që unë besoj që pa ndërhyrjen e NATO-s, mund të çonte në situata tragjike si në Bosnjë, në Srebrenicë edhe në masakrat tjera të tmerrshme. Prandaj, jam krenar që NATO-ja mësoi nga Bosnja dhe ndërhyri shpejt dhe me vendosmëri, asisoj që nuk mund të ndalnim vuajtjet, por të paktën i kufizuam kundruall asaj që mund të ndodhte“.

Zoti Shea tha se një nga arsyet që ende është shumë i ngazëllyer me pavarësinë e Kosovës dhe faktin që NATO-ja bëri punë të mirë në vitin 1999, është edhe, siç tha besimi i tij se Kosova do të jetë vend madhështor.

“Nuk duhet të jeni vend i madh për të qenë madhështor“, tha zoti Shea duke theksuar se është punë e vështirë të ndërtohet një demokraci e përkryer në vetëm tetë vjet. Por, Kosova, tha ai, mund të bëjë me shumë, duke përmendur rastet si Singapori apo Koreja Jugore, të cilat siç tha në vitet e 50-ta të shekullit të kaluar, të ardhurat individuale ishin baras me Egjiptin dhe Nigerinë. Në ditët e sotme tha ai, të dyja këto vende kanë 20 herë më shumë të ardhura për kokë banori sesa Egjipti dhe Nigeria.

“E tëra është bërë nga udhëheqësit e mirë që luftuan korrupsionin. Është bërë nga politikat e mira demokratike që nënkupton argumente të mira, por debatet janë bërë brenda parlamentit, jo jashtë tij. Dhe debatet janë bërë nga njerëzit me argumentet më të mira dhe jo megafonat më të mëdhenj“, tha mes tjerash zoti Shea, duke nënvizuar se Kosova është e pavarur dhe është përgjegjësi e saj dhe askush tjetër nuk mund të fajësohet nëse gjërat shkojnë keq.

“Sa më shumë që përmbushni reformat thelbësore dhe u shtrini dorën fqinjëve, pavarësisht sa e vështirë është, aq më e lehtë do të jetë për ë gjithë ne që t’u ndihmojmë ta bëni Kosovën Singaporin evropian të së ardhmes“, tha zoti Shea, i cili në Kosovë gëzon një simpati të posaçme për shkak të rolit të tij si zëdhënës i NATO-s gjatë bombardimeve të saj kundër objektivave serbe në vitin 1990, por edhe qëndrimit të tij në mbështetje të pavarësisë së Kosovës, pa të cilën kishte deklaruar ai para shpalljes së saj, misioni i NATO-s nuk mund të quhej i përfunduar.(Zeri i Amerikes)

Mori fund bojkoti i opozitës, Votohet rezoluta ne Parlament

by

*PD thyen bojkotin, hyn në Kuvend, miratohet me 126 vota rezoluta për bashkëpunimin PS-PD/
*PALOKA NE KUVEND: REZOLUTA SHPETON POLITIKEN NGA ZHYTJA NE LLUMIN E KRIMIN/
* Berisha: Dita e sotme historike, sakrifikuam por e rivendosëm demokracinë në Kuvend
* DODA: DUHET TE ISHIM KTHYER ME PARE/
TIRANE – Mazhoranca dhe opozita kanë miratuar me 126 vota pro, asnjë kundër dhe asnjë abstenim, rezolutën e përbashkët, për të cilën ranë dakord pas negociatave me eurodeputetët Kukan dhe Fleckenstein, të cilët u angazhuan për normalizimin e jetës parlamentare në Shqipëri. Përpara votimit, me kërkesë të Palokës, kryetari i Kuvendit Ilir Meta lexoi “Projekt/rezolutën e marrëveshjes politike mes mazhorancës dhe opozitës në Kuvendin e Republikës së Shqipërisë”. Dakordësia e arritur për miratimin e rezolutës, bëri që Partia Demokratike të thyente bojkotin 6-mujor dhe të zinte vendet e saj në Kuvend.
Përpara rikthimit të demokratëve pati edhe disa kundërshti lidhur me rendin e ditës së seancës plenare. Demokratët kërkuan ndryshimin e rendit të ditës, duke propozuar që seanca të niste me miratimin e rezolutës dhe më pas të votoheshin vetëm marrëveshjet ndërkombëtare, të cilat nuk kërkojnë debat politik. Por Kuvendi vijoi punimet sipas rendit të ditës, pa bërë asnjë ndryshim, madje pa mbërritur deputetët e opozitës, të cilët ishin ende në mbledhjen e grupit në selinë e PD-së dhe zunë vendet e tyre në Kuvend disa minuta me vonesë.
PALOKA NE KUVEND: REZOLUTA SHPETON POLITIKEN NGA ZHYTJA NE LLUMIN E KRIMIN
Në fjalën e tij përpara ligjvënësve, kreu i grupit të PD-së, Edi Paloka theksoi se marrëveshja e arritur është në favor të të gjitha palëve dhe “një mundësi e mirë për të shpëtuar politikën shqiptare nga zhytja në llumin e krimit dhe korrupsionit”.
Paloka nënvizoi arsyet që e shtynë opozitën drejt bojkotit parlamentar, ndërsa tha se “deputetët rikthehen me kokën lart me vullnetin dhe dëshirën që parlamenti të kthehet në tempullin e demokracisë, mbrojtjes së lirisë dhe të drejtave të qytetarëve”.
“Bojkoti për ne u bë një zgjedhje e detyruar, pasi ky parlament u kthye në vendin ku u shkelën dhe u dhunuan të drejtat e deputetëve. Nuk vumë kushte, as nuk kërkuam favore nga mazhoranca, kërkuam vetëm që kjo mazhorancë të mos bënte sikur nuk e dinte se çfarë kërkonte opozita.Bojkoti sado i padëshiruar nga ne tërhoqi vëmendjen e partnerëve tanë ndërkombëtare, të cilët i dhanë vlerësimin e duhur situatës në Shqipëri.Kjo rezolutë u jep përgjigje shqetësimeve madhore që opozita ngriti dhe që imponoi largimin tonë nga parlamenti. Kjo marrëveshje është jo vetëm në interes të demokracisë shqiptare, të qytetarëve shqiptarë por edhe në interes të partive politike. Ne besojmë realisht se kjo marrëveshje është në favor të të gjitha palëve. Për ne kjo qeveri e ka mbyllur ciklin e saj dhe duhet të ikë në shtëpi. Garantojmë qytetarët se interesi i tyre është i vetmi interes i yni. Do të jemi në parlament për të mbrojtur deri në fund këtë interes”- deklaroi Paloka.
PS-PD MBLEDHIN GRUPIN PARLAMENTAR
Përpara fillimit të seancës plenare, kreu i PD-së Lulzim Basha ka thirrur grupin parlamentar, në një mbledhje me dyer të mbyllura ku është vendosur që deputetët të rikthehen në Kuvend. Menjëherë pas mbledhjes së grupit, kreu i grupit Edi Paloka ka propozuar në mbledhjen e Konferencës së Kryetarëve ndryshimin e rendit të ditës, duke kërkuar që seanca të niste me miratimin e rezolutës dhe më pas të votoheshin vetëm marrëveshjet ndërkombëtare, të cilat nuk kërkojnë debat politik. Edhe Partia Socialiste ka zhvilluar një mbledhje grupi, përpara fillimit të seancës parlamentare, ku është vendosur që të miratohet rezoluta e përbashkët, por pa pranuar kërkesën e opozitës për ndryshimin e rendit të ditës.
PALOKA: TE MIRATOHET VETEM REZOLUTA
Në një deklaratë për mediat përpara nisjes së seancës, kreu i grupit parlamentar të PD-së, Edi Paloka bëri të ditur se demokratët kërkojnë ndryshim të rendit të ditës, duke propozuar që seanca të nisë me miratimin e rezolutës dhe më pas të votohen vetëm marrëveshjet ndërkombëtare të cilat nuk kërkojnë debat politik.
“Nuk mund ta konsiderosh një ngjarje të zakonshme rikthimin e opozitës në parlament. Eshtë bërë pas një bojkoti të gjatë e negociatave të gjata mes palëve. Kërkuam që konferenca e kryetarëve të përcaktojë mënyrën se si do procedojmë. Eshtë e logjikshme të trajtohet fillimisht rezoluta në parlament. Pa u miratuar kjo rezolutë nuk do të ishte e logjikshme që ne të hyjmë në parlament. Që të futen në diskutim pr/ligje të rëndësishme, ndërkohë që jemi në një situatë të veçantë nuk është normale. Kërkuam që këto pr/ligje të shtyhen për një seancë tjetër. Sot të miratohet rezoluta. Pas një ore vendosëm të fillojë seanca”- deklaroi Paloka.
DODA: DUHET TE ISHIM KTHYER ME PARE
Përpara se të futej në Kuvend, deputetja demokrate Mesila Doda tha se opozita duhet të ishte kthyer më parë në parlament, për të mbrotjur interesat e qytetarëve.“Besoj se do duhet të ishim kthyer që në seancat e para. Megjithatë sot ka një rezolutë që duhet te miratohet, është diçka pozitive që duhet të përgëzohet. Qytetarët shqiptarë kanë nevojë për normalitet në jetën e tyre politike. Fjala bojkot duhet të zhduket nga fjalori politik.”- deklaroi Doda.
NEGOCIATAT
Taulant Balla e Genc Pollo udhëhoqën negociatat që në mesnatë sollën marrëveshjen me 4 pika. Orë të shumta negociatash vazhduan me debate deri në mesnatë dhe deputetët e mazhorancës dhe opozitës kanë rënë dakord për draft-rezolutën e përbashkët të hartuar nga dy eurodeputetët Kukan dhe Fleckenstein. Balla dhe Pollo konfirmuan në prag të mesnatës se ishte arritur një akord i përbashkët: rezoluta e eurodeputetëve do miratohet pa ndryshime.
4 PIKAT E DRAFTIT
Pika e parë: “Opozita kthehet në parlament dhe rimerr plotësisht funksionet e saj parlamentare, duke iu shmangur bojkotit të parlamentit dhe komisioneve të tij. Mazhoranca qeverisëse nuk do të përdorë shumicën e cilësuar prej tre të pestave, duke anashkaluar opozitën, por do të punojnë së bashku me opozitën për të gjetur konsensus për reforma të rëndësishme sa herë që është e mundur”.
Pika e dytë: “Të gjitha palët do të kontribuojnë për dialogun politik, i cili duhet të bëhet së pari në parlament dhe të respektojnë Kushtetutën dhe zbatimin sistematik të vendimeve të Gjykatës Kushtetuese. Mazhoranca qeverisëse dhe opozita do të angazhohen të rishikojnë rregullat që kanë të bëjnë me funksionimin efikas të komisioneve parlamentare hetimore, të bazuar në praktikat më të mira ndërkombëtare”.
Pika e tretë: “Opozita dhe mazhoranca qeverisëse angazhohen të punojnë së bashku në mënyrë konsensuale, me ndihmën e Bashkimit Europian, për çështjen e individëve me rekorde kriminale, që kërkojnë të zgjidhen ose të emërohen për poste publike, bazuar në standardet europiane dhe me asistencën e Komisionit të Venecias”.
Pika e katërt: “Përfaqësuesit e grupeve më të mëdha parlamentare në
Parlamentin Europian, socialdemokratët dhe Partia Popullore Europiane do të mbështesin një marrëveshje të tillë politike”.
RENDI I DITES
Kuvendi u mblodh sot në mesditë në seancën plenare, që është dhe e fundit për këtë sesion. Rendi i ditës i Kuvendit përfshin diskutimin e disa projektligjeve, si dhe votimin e disa çështjeve të tjera. Mes tyre veçohen ndryshimet në ligjin “Për huamarrjen shtetërore, borxhin shtetëror dhe garancitë shtetërore”; ato në ligjin “Për vlerësimin e ndikimit në mjedis”, ndryshimet në ligjin e ‘prokurimit publik’, etj.
Gjithashtu, Kuvendi pritet të miratojë dhe tre kandidaturat për anëtarë të Bordit të Agjencisë së Mbikëqyrjes Financiare dhe të Drejtorit e Nëndrejtorit të Përgjithshëm Ekzekutiv të AMF-së; miratimin e kandidaturave për anëtar të Këshillit Mbikëqyrës të Bankës së Shqipërisë; pr/rezolutën “Për njohjen dhe forcimin e rolit të shoqërisë civile në procesin e zhvillimeve demokratike të vendit”, si dhe pr/vendimin “Për mënyrën e trajtimit të deputetëve”.

*Mesila Doda: Bojkoti të zhduket nga fjalori i politikanëve/

Deputetja demokrate, Mesila Doda më parë dha një deklaratë për mediat, duke premtuar se qytetarët shqiptarë do të kenë një opozitë të fortë dhe reale në Parlament.

Ajo mendon se Partia Demokratike duhet të ishte kthyer më herët në Kuvend dhe bojkoti duhet të zhduket në fjalorin politik. “Ne do të kthehemi në Kuvend për të mbrojtur dhunën dhe autoritarizmin që po ushtohet mbi qytetarët. Opozita duhet të ishte kthyer që në seancat e para, por fatmirësisht tashmë për këtë ka një rezolutë, e cila sqaron punën në Parlament.
Kjo është pozitive dhe duhet theksuar. Qytetarët shqiptarë kanë nevojë për normalitet politik. Bojkoti duhet të zhduket nga fjalori i politikanëve. Do ketë një opozitë shumë të fortë dhe reale”, tha deputetja e PD-së.

Kukan përshëndet votimin e rezolutës
Europarlamentari Eduard Kukan, njëherësh dhe një nga hartuesit e rezolutës ka përshëndetur finalizimin e marrëveshjes mes palëve politike.

Përmes rrjetit social Twitter, Kukan shpreson që ky bashkëpunim në Kuvend të vazhdojë.“Misioni i fundit i suksesshëm, urime miqve shqiptarë.Miqtë shqiptarë finalizuan marrëveshje të rëndësishme.Shpresoj që bashkëpunimi në Parlament të vazhdojë” shkruan ai.
Rezoluta e firmosur mes palëve e që i dha fund bojkotit opozitar u firmos pas negociatave të gjata.
Berisha: Dita e sotme historike, sakrifikuam por e rivendosëm demokracinë në Kuvend
TIRANË-Ish-kreu i Partisë Demokratike, deputeti Sali Berisha sapo ka dalë nga seanca e kuevdnit ka komentuar gjerësisht bojkotin 6 mujor të opozitës ndaj punimeve të parlamentit. Sipas tij, opozita me anë të bojkotit korri një fitore të madhe historike në emër të gjithë opozitave. Në vijim ai rikthye gjuhës së akuzave ndaj Qeverisë dhe maxhorancës, për të cilën tha se qëndron mbi krimin dhe korrupsionin duke krijuar 3/5 e votave në Kuvend, duke blerë në mënyrë flagrante deputetë, gjë që Parlamenti Europian (PE) nuk e kapërdin. Akuzat nuk i kurseu dhe ndaj kryeministrit Rama…
Z Berisha, cfare mund te na thoni per kete seance te pare pas 6 muajve bojkot…
“Kjo është një ditë historike për demokracinë shqiptare se për herë të dytë në 23 vjet, PD shpëton nëpërmjet një marrëveshje demokracinë parlamentare të vendit. Kjo ndodhi në vitin 2001, kur dhjetra e dhjetra mandate u morën nga kjo shumicë, por pastaj me një proces të paprecedent ne rikthyem frymën dhe vendosëm në mënyrë fraxhile të brishtë normat e demokracisë në Kuvend. Kjo që ndodhi këtë vit, kur për shkak të lidhjeve të pazgjidhshme me krimin të Edvin Ramës në parlamentin shqiptar, ndodhi ajo që s’ka ndodhur në asnjë vend tjetër të paktën në vitet 50 e deri sot. Kreu i qeverisë organizoi dhunë ndaj një deputeti guximtar të opozitës. Ndodhi në këtë parlament që maxhoranca të shkelmojë në mënyrë të papërgjegjshme të drejtat themelore të krijimit të komisioneve parlamentare.
Ndaj e kam quajtur të ligjshëm komplet bojkotin tonë, duke deklaruar se bojkoti i opozitës shqiptare është tjetër krahasuar me opozitat e tjera, ndërmori mbështetjen e vendeve më të larta të Parlamentit Evropian, nisëm që synon nëpërmjet kësaj Rezolute të rivendosë standartet themelore të parlamentarizmit. Në këtë nisëm dhe në bazën e kësaj Rezolute, maxhoranca aktuale sot nuk mundet kurrë të bojkotojë më kurrë komisionet parlamentare të opozitës. U votua një standard evropian, do vendoset një standart i ri evropian.
Së dyti, kjo maxhorancë qëndron mbi krimin dhe korrupsionin ka krijuar 3/5 duke blerë në mënyrë flagrante deputetë, gjë që Parlamenti Europian (PE) nuk e kapërdin. Ne nuk synojmë kurrë të bllokojmë një shumicë të cilësuar. Por të blejë me drogë e krim mandate, t’ia marrsha ato opozitës që të bësh ligjin e shtetit policor kjo është e patolerueshme për standardet e BE.
Së treti, dekriminalizimi. Ju duhet të dini se cdo gjë e mirë mbi tokë ka në themel, sakrificën. Ne vërtet sakrifikuam por kjo është kthyer në një mirësi të vërtetë, për cdo shqiptar, për demokracinë shqiptare dhe kjo do shënojë një pikë kthese për të ardhmen e demokracisë. Në themel të gjithë kësaj që ndodhi janë lidhjet e Edvin Kristaq Ramës me krimin që datojnë qysh para fillimit të tij në politikë e deri më sot.
Me këto lidhje Shqipëria nuk ecen drejt Europës, por drejt greminës. Një vit kur filloi ky parlament para kamerave i thashë, këto fjalë. ‘Zotëri, cdo shqiptar e di që lidhjet e tua me krimin janë nga më të tmerrshmet, me bandat e Rrugës së Kavajës, Hakmarrja për Drejtësi. Ty shqiptarët të votuan, të amnistuan për lidhjet që ke, por duhet të ndërpresësh këto lidhje. Por e vërteta është se ai është skllav i tyre. Por mesazhi i Europës është se nuk ecet para nëse kuvendi nuk dekriminalizohet.
Së fundmi, është rënë dakort që këto ligje dhe këto marrëveshje të zbatohen dhe formulohen nga ata të cilët janë dhe gardianët kryesorë të standardeve evropiane jo vetëm në vendet e BE, por dhe në vetë vendet e BE që është parlamenti. Ata meritojnë një mirënjohje të thellë nga cdo shqiptar. Nga kjo marrëveshje nuk ka asnjë të humbur, përvec ata që për pushtet janë të gatshëm të bëjnë gjithcka.
Tani ne jemi në një bashkëpunim të gjerë dhe nuk na përket ne. Ne na përket të negociojmë një nga fenomenet më të paimagjinueshme në këtë parlament, është krenari, është e hidhur kjo, por ama jemi vendi i parë që bëjmë përpjekje për dekriminalizimin e kuvendit.
Por zoti Berisha, edhe ju keni bojkotuar dikur…
Kemi bojkotuar dhe në vitin 2001, parlamenti me miratimin e plotë të partive evropiane njësoj si tani. Ata nuk na kërkuan të rikthehemi në parlament pa u vendosur e drejta. Nuk ka akt më të dhimbshëm për një deputet se bojkoti. Por më i strukturuari dhe më i qëndrueshmi si bojkot ka qenë ky. Jemi të vendosur të punojmë në parlament për vlerat e demokracisë.
Po në grupin tuaj parlamentar, z Berisha nuk ka asnjë të inkriminuar?
Në dijeninë time nuk ka asnjë deputet të inkriminuar. Por cilido të ketë dokumentin më të vogël, jo vetëm për deputetë, por dhe për strukturat e PD është i ftuar ta publikojë. Unë nuk mund të bisedoj për rekorde kriminale nëse nuk ekziston një dokument juridik se për hamendje pastaj, kjo nuk ndalet kjo.
Paloka mbajti një fjalim të ashpër sot. Përmendi prangat…
Unë e kam denoncuar këtë akt. Zoti Rama pas kthimit nga Brukseli i ka thënë z Meta se ‘më kanë kërkuar arrestimin tuaj’. Por ka një problem këtu, shpesh kam dëgjuar se e thonë.
Por ju e keni mbrojtur Ilir Metën
Për herë të parë them se, unë nuk e kam mbrojtur Ilir Metën. Ka patur një dokument për 700 mijë euro që flitej në regjistrim. Ai dokument ekzistonte në letrën që sipërmarrësi i dërgonte Dritan Priftit se dëmi që i shkaktohej ishte 700 mijë euro. Prifti nuk e ka mohuar se ekziston ky dokument. E gjithë akuza që i bëhet Sali Berishës është se nëse ekziston ky dokument. Nëqoftëse dosja do të ishte e plotë dhe nuk do ishte shqyrtuar nga ekspertë, askush nuk do i kërkonte atij arrestimin e Ilir Metës.
Pas largimit të LSI nga koalicioni i djathte…
Absolutisht jo, se ato dy vota mor zotëri u përdorën vetëm për të futur në zgjedhje dhe për të mos hyrë në kaos. Këta përdorin votat e blera për të instaluar shtetin policor. Nuk ka asnjë lidhje, pse unë cfarë alternative kisha.
Pse zgjodhët të heshtnit sot në parlament?
Foli sot kryetari i grupit parlamentar dhe mbajti një fjalim të shkëlqyer. Maxhoranca nuk foli e kishte vendosur që të kalonin rezolutën pa diskutime. Por derisa ishte e realizuar ne e respektuam atë. Natyrisht këtu do jemi. Gëzuar Krishtlindjet

TURP- Rrihen deputetët shqiptar në kuvendin e Maqedonisë

by

Gjatë debatit për rishikimin e buxhetit, ka ndodhur rrahje mes deputetëve shqiptarë , atyre të BDI-së dhe PDSH-së.
Ata mes vete shkëmbyen grushte dhe përfunduan të gjakosur. Për tejkalimin e situatës intervenoi sigurimi i parlamentit.
Skandaloze, konfrontohen fizikisht deputetët e BDI-së dhe PDSH-së
Ndryshimet kushtetuese në Parlamentin e Maqedonisë si duket sot kanë filluar me konfrontime fizike mes deputetëve shqiptarë të pozitës dhe opozitës.
Në seancën e sotme të disa komisioneve në parlamentin maqedonas, fillimisht në konflikt verbal e më pas edhe fizik ka pasur mes deputetëve shqiptarë.
Gjithmonë duke u bazuar në burime akoma jozyrtare në këtë konflikt fizik kanë qenë të përfshirë ish ministri i mbrojtjes Talat Xhaferi tashmë shef i grupit parlamentar të BDI-së si dhe deputeti i PDSH-së, Orhan Ibrahimi.Arsyeja e këtij konfrontimi fizik akoma nuk dihet se ku e ka pasur qëllimin por ditën e djeshme ka pasur vërtetë deklarata shumë të forta dhe të rënda nga opozita shqiptare në drejtim të pozitës.

Rexhail Ismaili i BDI-së në spital
Deputeti i BDI-së, Rexhail Ismaili ka përfunduar në Klinikën “Shn. Naum Ohridski” përballë Parlamentit, pas rrahjes që shpërtheu sot në Komisionin për financim dhe buxhet.
Deputeti siç mësohet ka lëndime nën syrin e majtë. Këtë informacion në konferencë për shtyp e ka konfirmuar deputeti i BDI-së dhe shef i kabinetit të Ahmetit, Artan Grubi.

Demokratët në protestë para Kuvendit,debat ne Parlament

by

Prej orës 10:30 minuta mbështetës të Partia Demokratike ndodhen para Kuvendit. Nga “Ura e Elbasanit” deri tek “Ushtari i Panjohur”, protestuesit kanë mbushur rrugën, ndërsa thirrja e tyre është vetëm një: Rama dorëhiqu! Protesta vazhdon e qetë ndërsa protestuesit shpesh thërrasin “Rama ik”
Më herët ish-kryeministri pak para se të largohej nga selia e PD-se tha për Ora News se protesta e sotme është vetëm 1 “Rama ik”.
Pas ndërprerjes së seancës për të zhvilluar mbledhjen e kryetarëve, disa deputetë demokratë u bashkuan me protestuesit.
Mesila Doda: Rama fajtor zëvendësoi shtetin e ligjit me krimin
“Fitoren e parë e arritëm shtynë seancën. Kjo nuk është fitorja jonë por e juaja. E duam Shqipërinë si Europa. Rama ësht fajtor se zëvendësoi shtetin e ligjit me shtetin e krimit. Po ndërpret rrugën tonë drejt Europës. Stop shtetit kriminal. Të gjithë të rezistojmë derisa kjo qeveri të na japë dorëheqjen. I kërkoj ish të përndjekurve, ish pronarëve dhe studentëve të Dhjetorit të na bashkohen.Tani ne do të rifutemi në seacën e parlamentit dhe nuk do dalim prej atje deri ta çojmë zërin tuaj”.
Kreshnik Çollaku: Kjo është beteja e shqiptarëve kundër mafias
“Kauza jonë e thjeshtë është një, duam një vend demokratik, një Shqipëri drejt Europës, nuk duam të na ndërtohet një Kolumbi mes Ballkanit. Çdo shqiptar që ka parë këto ditë ngjarjet ka arsye të besojë dhe dyshojë fort se Ministri i Brendshëm, kryeministri shqiptar, janë të implikuar në skandalin më të madh në Ballkan dhe Europë, në trafikun ndërkombëtar të drogës. Kemi vetëm dy rrugë, o të detyrojmë këta mafiozë të largohen, ose ky vend nuk është më i jetueshëm. Unë shpresoj shumë që Edi Rama dhe Saimir Tahiri po na ndjekin, se dinë të kuptojnë mesazhin e forcën e qytetarëve, kjo është një pikë nga ku nuk do tërhiqemi më. Shqipëria ka dy rrugë, ose drejt Europës, ose drejt Kolumbisë. Edi Rama do të ikë ose sot me çmim të lirë, ose nesër me çmim të shpejtë. Ju ftoj të gjithëve të qëndrojmë fort, të flisni me njërëzit, nuk është vetëm një betejë e mbështetësve tanë. Kjo është betejë e shqiptarëve kundër mafias dhe krimit të organizuar. Ne do ta fitojmë këtë betejë. Rama tërhiqu shpejt. Nesër do jetë shumë vonë për ty dhe grupin që të mbështesin”.
Më herët
Vonesa për nisjen e seancës plenare, ka irrituar deputetët e Partisë Demokratike në Kuvend. Një grup i tyre u ngjit në podiumin e ngritur para parlamentit, ku zakuan dyshen Rama-Meta se po e bëjnë qëllimisht, pasi kanë frikë nga protestat.
“Edi Rama dhe Ilir Meta kanë frikë të nisin seancën plenare, kanë frikë prej jush, kanë një orë që nuk nisin seancën, nuk duan të përballen me protestën. Rama ik! Rama ik!” tha Aldo Bumçi.
“Kemi dalë këtu, për ‘tju treguar se ne atje jemi zëdhënësit tuaj. Jemi këtu për të t’ju garantuar, për të ngritur zërin në emër tuaj, nuk pranojmë të qeverisemi nga një qeveri narkotrafikantësh. Ky është vetëm fillimi, fitoren e parë e korrëm, ata nuk i shpëtojnë dot së vërtetës. Minutat që po fitojnë ndërkohë, janë minutat e fundit të tyre” u tha protestuesve , Genti Strazimiri.

MIRENJOHJE PER SHQIPTARET

by

E dini shumë mirë që aq shumë shqiptaro-amerikanë shërbejnë në qeverinë tonë dhe në forcat tona të armatosura. Janë sipërmarrës e mësues, inxhinierë dhe artistë, udhëheqës fetarë, si dhe drejtojnë disa prej restoranteve më të mira në botë. Kultura shqiptare është një përbërës i pasur i jetës amerikane./

Nga Hillary CLINTON*/

Jam shumë e lumtur që jam këtu dhe kam mundësinë që të flas përpara këtij parlamenti të një Shqipërie të lirë, të pavarur, sovrane e demokratike. Z. President, Zonja Kryetare, Z. Kryeministër, anëtarë të parlamentit, nderi është edhe më i madh sepse bashkohem me ju për të festuar jubileun tuaj – 100 vjet pavarësi. Ka qenë një fitore për të cilën keni luftuar shumë. Teksa po hyja me – më pëlqen shumë të them Zonjën Kryetare – me Kryetaren Topalli nëpër korridore, pashë fotot e paraardhësve tuaj. Në 100 vitet e fundit ka ndodhur aq shumë, por një gjë ka qenë e pandryshuar: Shtetet e Bashkuara të Amerikës kanë qenë miku dhe partneri juaj dhe për këtë jemi shumë krenarë. Lidhjet tona vetëm sa janë forcuar dhe shumëfishuar. Dhe nuk ka ndodhur vetëm mes qeverive tona; ka ndodhur mes popujve tanë. Populli amerikan dhe populli shqiptar ndajnë kapacitetin për të demonstruar zhdërvjelltësi dhe vendosmëri. Ju, ashtu si ne, keni qenë të vendosur për të qenë të lirë, për të ndërtuar një demokraci të gjallë dhe një ekonomi në lulëzim. Ju, ashtu si ne, zotëroni dëshirën e zjarrtë për të lënë pas përplasjet e vjetra dhe për të arritur një të ardhme paqeje dhe mundësie për të gjithë. Jam shumë mirënjohëse për këtë partneritet dhe për miqësinë tonë historike, ashtu siç jam mirënjohëse për kontributet që mijëra shqiptarë kanë dhënë për vendin tim. E dini shumë mirë që aq shumë shqiptaro-amerikanë shërbejnë në qeverinë tonë dhe në forcat tona të armatosura. Janë sipërmarrës e mësues, inxhinierë dhe artistë, udhëheqës fetarë, si dhe drejtojnë disa prej restoranteve më të mira në botë. Kultura shqiptare është një përbërës i pasur i jetës amerikane. Arrita ta njoh këtë mirë si senatore nga Nju Jorku për tetë vite. Dhe, Z. President, u ndjeva thellësisht e nderuar që mora sot Urdhrin e Flamurit Kombëtar. Këtë do ta adhuroj përgjithmonë. Ishte një tjetër simbol i miqësisë së fortë që kemi mes nesh. Njëqind vjet më parë si këtë muaj, Presidenti i SHBA Udrou Uillson mbrojti pavarësinë e Shqipërisë dhe ndaloi ndarjen e vendit tuaj gjatë pasojave të Luftës së Parë Botërore. Në dhjetëvjeçarët që pasuan, udhëheqësit amerikanë, si demokratë ashtu edhe republikanë, në mënyrë të përsëritur u ngritën për të mbështetur të drejtat dhe liritë tuaja, jo vetëm këtu në Shqipëri por anekënd rajonit. I vlerësova shumë fjalët e Kryetares mbi rolin që Shtetet e Bashkuara kanë luajtur duke rivendosur shpejt marrëdhëniet me Shqipërinë në vitin 1991, në kohën e Presidentit Xhorxh H. Ë. Bush. Dhe, sigurisht, isha e nderuar dhe shumë e lumtur që dëgjova edhe një herë tjetër se çfarë kishte bërë im shoq, duke ngritur fondin e sipërmarrjeve. Si President, Presidenti Klinton themeloi një fond sipërmarrjeje për të sjellë investime amerikane në Shqipëri, për të mbështetur zgjedhjet demokratike këtu, dhe punoi me Shqipërinë dhe aleatët tanë në NATO për të mbrojtur Kosovën dhe për të rivendosur stabilitetin në rajon. Më pas, pesë vjet më parë, Presidenti Xhorxh Bush u bë presidenti i parë në detyrë që vizitonte Shqipërinë. Dhe, në vitin 2009, Presidenti Obama ishte krenar që ju mirëpriti juve, sëbashku me Kroacinë, si anëtarët tanë më të rinj në NATO. Jam sot këtu, në këtë çast historik në historinë tuaj me një mesazh për popullin e Shqipërisë. Shtetet e Bashkuara qëndruan me ju për 100 vitet e para të pavarësisë dhe do të qëndrojmë me ju edhe për 100 vitet e ardhshme, dhe për 100 të tjera pas tyre, dhe ato 100 pas këtyre. Teksa isha ulur në karrigen këtu pas meje, duke ju vështruar të gjithëve juve dhe duke parë fytyrat tuaja e duke menduar për prindërit e gjyshërit e stërgjyshërit tuaj dhe gjithçka që kanë hequr – pushtime, diktaturën komuniste, privime të ashpra – është e vështirë të besosh sot që jo shumë kohë më parë, Shqipëria ishte vendi më i izoluar në Europë. Nuk kishit asgjë nga ato që keni sot: liri politike dhe shoqërore, vetë-vendosje, dhe shanse. Aq shumë shqiptarëve iu desh të braktisnin familjet e vendet e dashura për t’i kërkuar tjetërkund. Megjithatë, tani keni aq shumë për të festuar. Ky jubile nuk ka të bëjë vetëm me të kaluarën. Është edhe një sfidë se çfarë do të bëheni në të ardhmen. Njëzetë vite më parë, sapo po dilnit nga zgjedha e komunizmit; tani, përfaqësuesit e zgjedhur të popullit përfshihen në debate dhe votojnë hapur ligjet e vendit, veprimtari që dikur ishin të pamundura. Në atë kohë, ekonomia juaj ishte e mbyllur dhe keni punuar fort për ta hapur, për të krijuar kushtet për sipërmarrje, tregti e investime, hedhjen e themeleve për mundësi edhe më të mira në të ardhmen. Në atë kohë, Shqipëria ishte vendi i qindra mijëra bunkerëve prej betoni, një provë e mosbesimit që udhëheqësit komunistë kishin jo vetëm ndaj kombeve të tjera, por edhe ndaj popullit të vet. Tani jeni anëtarë të vlefshëm të NATO-s, pjesëmarrës të suksesshëm në Forcën Ndërkombëtare të Sigurisë në Afganistan, dhe shpreh ngushëllimet e mia për humbjen e parë të një ushtari shqiptar atje. Po ecni drejt integrimit të plotë në Europë teksa kërkoni hyrjen në Bashkimin Europian. Të gjitha këto janë baza për festë. Por mendoj që amerikanët dhe shqiptarët nuk mund të jenë kurrë të kënaqur. Na duhet të pyesim veten, ç’mund të bëjmë më shumë? Si mund t’i përmirësojmë jetët e atyre të cilëve iu shërbejmë? Nuk mund të ndaleni tani. Keni potencialin të bëheni model, jo vetëm për këtë rajon, jo vetëm për Europën, por për të gjithë botën. Dhe Shtetet e Bashkuara kanë interes të madh në suksesin tuaj. Jo vetëm duam të shohim marrëdhënien tonë të rritet edhe më e fortë, por duam t’ju shohim edhe juve të rriteni më të fortë. Duam të shohim ekonominë tuaj, demokracinë tuaj të shkaktojë zili tek kushdo tjetër. Mbështesim plotësisht aspiratat e Shqipërisë për në BE sepse mendojmë që kjo do t’ju bëjë më të fortë. Do të jetë diçka e mirë edhe për Europën dhe, ndonëse nuk kemi votë në atë aplikim për anëtarësim, do t’i themi kujtdo që do të dëgjojë se sa fort ju mbështesim. Shqipëria dhe populli shqiptar meritojnë një vend në familjen europiane të kombeve. Kjo është diçka jo vetëm për të mirën tuaj, por do ta bënte këtë kontinent më të paqtë e të sigurt. Por që kjo të ndodhë, muajt që vijnë paraqesin disa vendime kritike për ju që jeni në këtë sallë, për qeverinë tuaj dhe për popullin tuaj. Si mike dhe adhuruese e Shqipërisë, janë veçanërisht disa sfida që shpresoj do t’i përmbushni. Janë jetike për përparimin tuaj afatgjatë. Së pari, ju lutem të punoni për të siguruar që zgjedhjet tuaja të ardhshme të jenë të lira dhe të ndershme dhe që të shihen si të tilla nga e gjithë bota. Në radhë të parë, kjo duhet në mënyrë që populli i Shqipërisë të mund të ketë besim tek rezultati dhe tek ju si udhëheqësit tuaj. Është po ashtu një sinjal i rëndësishëm për BE-në që politika shqiptare mund të funksionojë paqësisht dhe pa konflikte. E di që shumë prej jush jeni përqendruar në këtë çështje dhe po ndërmerrni tani hapa për të ngritur një proces të qartë dhe të efektshëm dhe për këtë ju përgëzoj. Si dikush që ka qenë në politikë e ka kandiduar në zgjedhje me kundërshti, në të cilat disa i kam fituar e disa jo, e di se sa e vështirë mund të jetë politika në botën moderne. Mund të dëshmoj edhe se si zgjedhjet tërheqin vëmendjen e botës sepse me TWitter dhe Facebook dhe komunikime të çastit, duhet të marrësh parasysh që gjithçka do mësohet, do shihet, çka është e mirë për demokracinë, por vendos një barrë shtesë mbi ne që jemi në drejtim. Ndaj, nxis jo vetëm udhëheqësit e Shqipërisë, por popullin, qytetarët e Shqipërisë, që të punojnë fort për t’i shndërruar këto zgjedhje të ardhshme një sukses që pasqyron thellësinë e përkushtimit tuaj ndaj demokracisë. Në të njëjtën kohë, është gjithmonë me rëndësi t’i kujtojmë vetes që konsolidimi i demokracisë kërkon më shumë se sa thjesht zgjedhjet. Kërkon sundimin e ligjit. Kërkon institucione të forta, përfshi një gjyqësor të efektshëm dhe të paanshëm. Kërkon që qeveria të jetë e hapur në mënyrë që qytetarët të na kërkojnë neve, drejtuesve, llogari. Atribute të tilla si këto sigurojnë që demokracia të japë rezultate konkrete për njerëzit. Dhe kur këto minohen, duhet dhënë llogari. Së dyti, ju nxis të përballeni me problemin që ndikon aq shumë demokraci në botë sot, dhe pikërisht korrupsionin. Kjo është një luftë që çdo vend duhet ta kryejë dhe të fitojë sepse në mbarë botën, korrupsioni është një kancer që gërryen shoqëritë. Shteron burimet, bllokon rritjen ekonomike, është mburojë për udhëheqës të paaftë dhe joetikë, dhe ndoshta më e keqja, krijon një kulturë pandëshkueshmërie që iu gërryen njerëzve vullnetin për të përmirësuar jetët dhe komunitetet e tyre. Për këtë nuk ka përgjigje të lehtë. Është po aq i vjetër sa natyra njerëzore. Jam e sigurt që nëse do të kishte një përgjigje të lehtë, bota do ta kishte zgjidhur këtë problem kohë më parë. Çrrënjosja e korrupsionit kërkon përpjekje të pandalshme dhe një përkushtim të përbashkët. Pavarësisht cilës parti i përkisni, pavarësisht cilat janë mosmarrëveshjet tuaja, nxis të gjithë udhëheqësit e Shqipërisë të gjejnë vullnetin politik për të punuar sëbashku, për t’u përballur me këtë kërcënim ndaj pavarësisë suaj. Dhe kjo na drejton tek sfida e fundit që dua të ngre para jush, një sfidë që ka lidhje me gjithçka tjetër që përmenda. Që demokracia e Shqipërisë të lulëzojë, udhëheqësve të Shqipërisë do t’iu duhet të ndërtojnë një kulturë bashkëpunimi që kapërcen dallimet politike, ajo që Aleksis de Tokvil, historiani i madh i viteve të hershme të Amerikës, e quante zakonet e zemrës. Ato qëndrojnë në thelbin e çdo demokracie të suksesshme. Tani, kjo është një sfidë që disa vende nuk janë kurrë në gjendje ta kapërcejnë, por unë besoj se Shqipëria mundet. Përsëris që kam përvojë personale me këtë. Si senatore demokrate, kam punuar shpesh me republikanë në çdo krah për të zgjidhur probleme, për t’u përballur me çështje që ndikonin shtetin tim dhe vendin tim. Dhe mund të keni vënë re që tani shërbej si Sekretare Shteti për Presidentin Obama, ish-rivalin tim. Njerëz përreth botës vazhdojnë të më pyesin se si mundet që Presidenti Obama dhe unë të punojmë sëbashku çdo ditë si partnerë pasi kemi luftuar aq fort kundër njëri-tjetrit. Më besoni, kam bërë gjithçka për ta mundur. Por ai fitoi dhe pastaj më kërkoi të isha Sekretare Shteti e tij. Ndaj, kur më pyesin se si munden dy njerëz që nuk kanë lënë gjë pa thënë për njëri tjetrin, që kanë harxhuar dhjetëra miliona dollarë reklama kundër njëri tjetrit, mbështetësit e të cilëve përballeshin kudo – kundër njëri tjetrit, si mund të punoni bashkë ju të dy? Do t’jua tregoj, është një përgjigje shumë shumë e thjeshtë. Të dy e duam vendin tonë. Dhe e di që nuk ka asnjë shqiptar këtu që nuk e do Shqipërinë. Ndaj shpresoj që edhe ju do mund të gjeni rrugën tuaj për bashkëpunim të sinqertë e të qëndrueshëm. Ruajini besimet e ndryshme politike, besoni që mund të jeni një udhëheqës më i mirë se sa tjetri. Politika kështu e ka. Nuk do merreshit me të nëse nuk do besonit këtë për veten. Por në fund, vendosja e interesave vetiake dhe interesave partiake prapa interesave kombëtare është ajo që iu kërkohet udhëheqësve demokratikë. Megjithëse populli shqiptar mund t’i gjejë rrënjët e historisë mijëra vjet pas, kjo periudhë që vjen mund të jetë një prej periudhave më me pasoja me të cilat jeni përballur, për sa i përket mënyrës se si do të konsolidoni përgjithmonë dhuratën e demokracisë për brezat e ardhshëm. Dhe ka pyetje që ju, dhe vetëm ju, do duhet të ngrini dhe t’iu përgjigjeni: A do vazhdojë Shqipëria të ngrejë tullat e qeverisjes së mirë? A do të vazhdojnë udhëheqësit që të fitojnë besimin e njerëzve dhe të sigurojnë që qeveria të prodhojë rezultate? A do të lini mënjanë politikën personale dhe politikën partiake për të mirën e vendit? A do të kryeni reformat që mbështesin rritjen ekonomike duke krijuar mundësi për të gjithë shqiptarët? A do ta luftoni korrupsionin që iu vjen për shtat një pakice në kurriz të shumicës? A do të vazhdoni të bëni punën e madhe që kërkohet për të hyrë në Bashkimin Evropian, duke pranuar që ai ofron një rrugë të paqes dhe përparimit afatgjatë për qytetarët tuaj? A do të vazhdoni të shërbeni si model për rajonin dhe botën? Toleranca fetare që ekziston këtu në Shqipëri është një dhuratë e çmuar. Është e vështirë ta gjesh këtë në shumë vende në rajon dhe tjetërkund. Vlerësojeni atë. Përdoreni si një tjetër argument në favor të unikalitetit të këtij vendi të madh. Këto janë pyetje të vështira për t’iu përgjigjur. Nuk vij me përgjigjet këtu. Vij me pyetjet. Por vij edhe me një ndjenjë të thellë besimi tek ju. Dhe më lejoni të them që ndërsa merrni vendimet e vështira që kërkohen për përparimin tuaj të mëtejshëm drejt Bashkimit Evropian, aty ku ju takon, Shtetet e Bashkuara do t’ju mbështesin në këto vendime të vështira. Ne besojmë që jemi bashkë në këtë, Shtetet e Bashkuara dhe Shqipëria. E dimë se çfarë lloj bote duam për fëmijët tanë dhe për brezat e ardhshëm. Është një botë mundësish dhe tolerance dhe përfshirjeje. Është një botë e të drejtave të njeriut ku përfshihen të gjithë, që i japin çdo njeriu një shans për të përmbushur potencialin e dhënë nga perëndia. Dhe si udhëheqës të demokracive në shekullin e 21-të, është detyrimi ynë solemn për t’i dhënë këto rezultate për njerëzit që na kanë dhënë besimin. Ju shoh juve dhe shoh të ardhmen. Besoj që do të përballeni me sfidat dhe do të rrokni mundësitë e shekullit që kemi përpara. Dhe, të paktën unë, do t’ju nxis dhe do t’i tregoj kujtdo që do të dëgjojë se nëse doni të shihni demokracinë e vërtetë në veprim, shkoni në Shqipëri.
Urime dhe Perëndia ju bekoftë juve dhe Perëndia e bekoftë Shqipërinë.

Fjalimi ne Parlamentin e Shqiperise

Tirane, 1 Nentor 2012