Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Shqipëria, krah i fuqishëm për Kosovën

by

-Presidenti i Shqipërisë, Bujar Nishani theksoi se Shqipëria i gëzohet progresit që po bënë Qeveria e Kosovës për të zhvilluar shtetin në planin e brendshëm dhe të jashtëm, në të mirën e gjithë qytetarëve/-Ministrja Edita Tahiri u takua me Presidentin e Shqipërisë, Bujar Nishani/

1 Nishani

PRISHTINË, 8 Prill 2017-Gazeta DIELLI/Ministrja për Dialog e Republikës së Kosovës,  Edita Tahiri u takua me Presidentin e Shqipërisë, Bujar Nishani me të cilin biseduan për zhvillimet e fundit në të dyja shtetet si dhe rritjen e bashkëpunimit në kuadër të angazhimeve të përbashkëta për integrimet euroatlantike.

Në këtë takim që u zhvillua në Stamboll me rastin e pjesëmarrjes në Samitin ekonomik euroaziatik, ministrja Edita Tahiri vlerësoi lartë mbështetjen e Shqipërisë për forcimin e shtetit të Kosovës, rritjen e njohjeve si dhe përshpejtimin e integrimit të Kosovës në strukturat euroatlantike. Ajo theksoi se Shqipëria është krah i fuqishëm për Kosovën në rrugëtimin shtetëror dhe kombëtar, ndërkaq theksoi rëndësinë e thellimit të bashkëpunimit për të përballuar sfidat e reja të sigurisë për Kosovën, Shqipërinë por edhe gjithë rajonin.

Presidenti i Shqipërisë, Bujar Nishani theksoi se Shqipëria i gëzohet progresit që po bënë Qeveria e Kosovës për të zhvilluar shtetin në planin e brendshëm dhe të jashtëm, në të mirën e gjithë qytetarëve. “Përparimet e Kosovës drejt integrimit evropian, nënshkrimi i Marrëveshjes Stabilizim Asocim janë tregues që Kosova është në rrugën e drejt. Shqipëria mbështet fuqishëm perspektivën euroatlantike të Kosovës dhe ne do jemi në një bashkëpunim dhe bashkërendim të veprimtarisë tonë së bashku për realizimin e këtij qëllimi madhor” tha presidenti Nishani.

Gjatë këtij takimi u rikonformua rëndësia e bashkëpunimeve në fushat konkrete në të mirën e të dyja shteteve dhe kombit shqiptar në përgjithësi.

Gjatë qëndrimit në Stamboll, ministrja Edita Tahiri zhvilloi edhe një varg takimesh me qeveritar dhe politikan nga vende të ndryshme. Ajo u takua me Natiq Aliyev, Ministër i Energjisë së Azerbajxhanit, me ish-ministrin e Mbrojtjes së Austrisë, Werner Fasslabend, ish zëvendëskryeministrin e Malit të Zi, Jusuf Kalamperovic, me deputetin e Parlamentit të Turqisë, Selahattin Minsolmaz, me një delegacion nga India të përfaqësuar nga Këshilli Ekonomik i Bizneseve, me Aziz Sahin, President i Këshillit Evropian të Bashkëpunimit të Bizneseve të Turqisë dhe i Iniciativës për Binjakëzimin e Qyteteve, etj.

Takimi me ish-ministrin e Mbrojtjes së Austrisë, Werner Fasslabend, ishte i veçantë për faktin se ai ka qenë Ministër i mbrojtjes së Austrisë në periudhën dhjetë vjeçare të çlirimit të Kosovës , ku biseda u përqendrua në evokim kujtimesh të bashkëpunimit nga ajo kohë, ndërsa ministrja Tahiri e falënderoi atë dhe Austrinë për gjithë mbështetjen për Kosovën, duke përmendur edhe faktin se Austria kontribuoi edhe me aplikimin për kodin telefonik shtetëror për Kosovën pranë ITU-së dhe se Kosova ka tashmë kodin e vet telefonik./b.j/

Njihuni me Gjeneralin me 4 yje, James Mattis

by

*Kush është James Mattis, Sekretar i ardhshëm i Mbrojtjes i SHBA?/

*Gjeneral Mattis gjatë kryerjes së detyrës në Irak dhe Afganistan, ka pasur në vartësi dhe kontigjente të ushtarakëve shqiptarë/

gjeneral-me-4-yje-ames_mattisNga Shefqet Kercelli/Presidenti i ri i SHBA, Donald Trump, zgjodhi Gjeneralin me 4 yje, James Mattis, në detyrën e Sekretarit të Mbrojtjes. Gjenerali në pension, ka një karrierë të gjatë e të ndritur në Forcat e Armatosura të SHBA, madje njihet dhe si studjues i cështjeve strategjike. Gjenerali Mattis, ka shërbyer si Komandant i Komandës Qëndrore Amerikane, e cila drejton operacionet në Lindjen e Mesme, si dhe Komandant i Forcave supreme të NATO-s. Përkushtimi ndaj misionit që ka treguar përballë forcave kundërshtare në Irak dhe Afganistan, ishte arësyeja që Gjenerali mori nofkën “Qen i tërbuar”, një epitet, që në anglisht reflekton reputacionin dhe respektin që Ai gëzonte si një komandant që nuk njihte sprapsje, që nuk mposhtej kollaj. “Si ushtarak, si marins, ai ka vepruar gjithnjë me besnikëri ndaj kontigjentit të tij, ndaj marinsave që shërbenin me të. “Kur e takova për herë të parë në Nangahar të Afganistanit, në v.2006, në një kohë që kishte shpërthyer një betejë e ashpër, pashë që Mattis ishte një komandant me një fuqi të madhe frymëzuese. Unë gjeja frymëzim prej tij”, kujton Gjenerali John Nicholson. Ndërkohë ekspertët thonë se, Gjeneral Mattis është edhe ushtarak edhe studjues. “Ai konsiderohet si një ndër njerzit me bagazhin më të madh të njohurive, si nga librat që ka studjuar, ashtu dhe nga eksperienca në terren, në këtë brez gjeneralësh”, thotë Michael O’ Hanlon, i Institutit pëer studime strategjike “Brookings”. Gjithashtu, analisti Michael O’Hanlon, beson se eksperienca dhe përgatitja e tij shumëvjecare, e kanë bërë Gjeneral Mattis, më praktik se shumë komandantë të tjerë, lidhur me vlerën dhe mungesat e fuqisë ushtarake. “Është gjë e mirë, që një ushtarak me përvojën dhe kredibilitetin e Gjeneralit Mattis, po këshëllon zotin Donald Trump, pasi zoti Trump do t’ja dëgjojë fjalën një njeriu të tillë. Mendoj se do jetë më i prirur të bindet nga një argument për të mos përdorur forcën, nëse ja sugjeron dikush si Gjeneral Mattis”, nënvizon analisti O’Hanlon. Mbas konfirmimit të kandidaturës së Gjeneral Mattis, Kongresi duhet të miratojë një përjashtim nga ligji që ndalon emërimin e gjeneralëve në postin e Shefit të Pentagonit, pa mbushur shtatë vjet në pension nga karriera ushtarake. Mattis është në pension prej tre vjetësh. Ndërkohë ligji synon të krijojë një shkëputje kohore mes shërbimit ushtarak dhe udhëheqjes civile të Departamentit. Kongresi e ka bërë një përjshtim të tillë kur lejoi Gjeneralin e Luftës së II Botërore, George Marshall, të shërbente si Sekretar i Mbrojtjes. Kjo praktikë gjykohet të zbatohet dhe me Gjeneralin Mattis.

Shenim: Sqarojmë lexuesit se, Gjeneral Mattis gjatë kryerjes së detyrës në Irak dhe Afganistan, ka pasur në vartësi dhe kontigjente të ushtarakëve shqiptarë, të cilët ai i ka vlerësuar për profesionalizmin dhe përkushtimin e treguar gjatë operacioneve të kryera kundër terroristëve.

Më gjerësisht për këtë bashkëpunim unikal, lexuesit shqiptaro-amerikanë dhe më gjerë do njihen vitin e ardhshëm 2017, me librin më të ri “Dy shqiponja në një mision”, i cili do jetë në shqip dhe anglisht.

 

Presidenti Thaçi në NATO, kërkon që Kosova të bëhet pjesë e Aleancës

by

-“Kosova është e vendosur që të bëhet anëtare e NATO-s”, u shpreh presidenti Thaçi/

-Sekretari i Përgjithshëm i NATO-s, Jens Stoltenberg, theksoi se KFOR-i do të vazhdojë misionin e tij për një ambient të sigurt në Kosovë dhe do të garantojë lirinë e lëvizjes për aq kohë sa është e nevojshme/

 PRISHTINË, 8 Qershor 2016-B.Jashari/ Presidenti i Republikës së Kosovës, Hashim Thaçi, në ditën e parë të vizitës së tij në Bruksel, ka zhvilluar sot një takim me Sekretarin e Përgjithshëm të NATO-s, Jens Stoltenberg. Në takim u bisedua për mundësinë e inicimit të një dialogu politik ndërmjet Kosovës dhe NATO-s, si dhe për bashkëpunimin e Forcave të Sigurisë së Kosovës (FSK) me Aleancën Veri-Atlantike. Njoftimi i sapodërguar nga Brukseli i Presidencës kosovare thekson se, të dy liderët konfirmuan interesin e tyre për zhvillimin e mëtejmë të marrëdhënieve ndërmjet NATO-s dhe Kosovës. Presidenti Thaçi u shpreh se FSK-ja është e gatshme që të marrë pjesë në manovrat, por edhe të kontribuojë në misionet paqeruajtëse të NATO-s, sidomos në fushat ku është specializuar dhe ka bërë përvojë FSK-ja. “Kosova është e vendosur që të bëhet anëtare e NATO-s”, u shpreh presidenti Thaçi.

Sekretari Stolteberg dhe presidenti Thaçi biseduan edhe për përkushtimin e Kosovës për sfidat e sigurisë – radikalizmin dhe terrorizmin. Me këtë rast, presidenti Thaçi u shpreh se Kosova do të mbetet e vendosur që të luftojë pa kompromis çdo ekstremizëm dhe radikalizëm.Nga ana tjetër, Sekretari i Përgjithshëm i NATO-s, Jens Stoltenberg, theksoi se KFOR-i do të vazhdojë misionin e tij për një ambient të sigurt në Kosovë dhe do të garantojë lirinë e lëvizjes për aq kohë sa është e nevojshme.

Sekretari i Përgjithshëm vlerësoi se çfarëdo reduktimi i numrit të forcave të NATO-s në Kosovë do të bazohej në përmirësimin e kushteve në terren.Në këtë takim, u bisedua edhe për themelimin e Forcave të Armatosura të Kosovës. Gjatë vizitës, në selinë qendrore të NATO-s, presidentit Thaçi iu organizua edhe një vizitë informuese për historinë e Aleancës Veri-Atlantike.

Kosova me President të ri – Hashim Thaçi sot dha betimin, nesër inaugurohet

by

-Ligji për Presidentin e Republikës së Kosovës në “Neni 5 Mandati dhe Betimi” përcakton edhe tekstin e betimit:Betohem se tërë fuqinë time do t’ia kushtoj ruajtjes së pavarësisë, sovranitetit dhe integritetit territorial të Republikës së Kosovës, sigurimit të lirive dhe të të drejtave njerëzore e qytetare, respektimit dhe mbrojtjes së Kushtetutës dhe ligjeve, ruajtjes së paqes dhe mirëqenies së të gjithë qytetarëve të Republikës së Kosovës dhe me ndërgjegje e përgjegjësi do t’i kryej të gjitha detyrimet e mia/

Nga Behlul Jashari/PRISHTINË, 7 Prill 2016/ “Betimi i Presidentit të Republikës së Kosovës, Shkëlqesia e Tij, Hashim Thaçi”, ishte në axhendën e seancës soleme të Kuvendit kosovar, sot nga ora 11:00.

Ashtu siç është e paraparë me Ligjin për Presidentin dhe Kushtetutën e vendit, presidenti i zgjedhur i Republikës së Kosovës, Hashim Thaçi, në seancën solemne të Kuvendit të Kosovës, e cila u mbajt sot nën kryesimin e kryeparlamentarit Kadri Veseli, ka dhënë betimin para deputetëve.

Ligji për Presidentin e Republikës së Kosovës në “Neni 5 Mandati dhe Betimi” përcakton edhe tekstin e betimit.

“Betohem se tërë fuqinë time do t’ia kushtoj ruajtjes së pavarësisë, sovranitetit dhe integritetit territorial të Republikës së Kosovës, sigurimit të lirive dhe të të drejtave njerëzore e qytetare, respektimit dhe mbrojtjes së Kushtetutës dhe ligjeve, ruajtjes së paqes dhe mirëqenies së të gjithë qytetarëve të Republikës së Kosovës dhe me ndërgjegje e përgjegjësi do t’i kryej të gjitha detyrimet e mia”, u shpreh Thaçi gjatë betimit në Kuvend.

Për të përcjellë nga afër këtë akt, pas të cilit presidenti i ri i vendit do të fillojë mandatin e tij, në sallën e Kuvendit ishin të pranishëm edhe përfaqësuesi i Bashkimit Evropian në Kosovë, Samuel Zbogar, ambasadori amerikan në Kosovë, Greg Delaëie, si dhe shumë ambasadorë të tjerë të shteteve mike.

E pranishme gjatë zhvillimeve të kësaj mbledhjeje ishte edhe presidentja në largim, Atifete Jahjaga.

Nuk ishin të pranishëm deputetët opozitarë, VV, AAK dhe Nisma.

Mbledhja filloi me ceremoninë e betimit, e më pas është intonuar himni shtetëror.

Pas kësaj, presidenti i ri i vendit, Thaçi, të pranishmëve u është drejtuar me një fjalë përshëndetëse, për mes së cilës shpalosi objektivat dhe përqendrimin në punën e tij gjatë mandatit.

Me këtë rast, Presidenti Thaçi tha: “Të nderuar qytetarë të Republikës së Kosovës, sot është një moment i veçantë në jetën time. Moment i krenarisë dhe përgjegjësisë. Karriera ime politike dhe jetësore pasqyron zhvillimet nëpër të cilat ka kaluar Kosova në tri dekadat e fundit”.

 Jam angazhuar, tha ai në vijim, në të gjitha proceset që kanë sjellë lirinë dhe pavarësinë e Kosovës.

Duke shprehur konsideratën e tij për të gjithë ata që u flijuan për lirinë e vendit, Presidenti Thaçi, me këtë rast theksoi e vlerësoi sakrificën legjendare të komandantit Adem Jashari, si dhe kontributin e Presidentit historik të Kosovës, Ibrahim Rugova.

Presidenti i ri i Kosovës foli më pas edhe për aspiratat e vendit, duke nënvizuar përpjekjen për integrimin në strukturat evropiane dhe në NATO.

Ai foli po ashtu edhe për dialogun me Serbinë, të cilin e konsideroi si të pa alternativë, duke theksuar se, “të kaluarën nuk mund ta ndryshojmë, por, nuk do ta përsërisim”.

Presidenti Thaçi u zotua se do të luaj rol unifikues për arritjen e konsensusit të spektrit politik dhe të qytetarëve, ndërsa u shpreh i lumtur se Kosova është shndërruar në faktor paqeje dhe stabiliteti në rajon.

Ai vlerësoi lart edhe faktin se Kosova është rreshtuar në Bllokun Antiterrorist në botë.

Në përfundim të fjalës së tij, Presidenti i ri i vendit Thaçi, tha:

“Në angazhimet e mia do të respektoj Kushtetutën dhe ligjet e Kosovës, traditën e mirë të qytetarisë, kriteret dhe vlerat euro-atlantike. Gjithmonë do të nisem nga oferta ime për dialog politik ndërpartiak, për komunikim me shoqërinë civile, me mediat, biznesin dhe me iniciativat e lira. Do të ruaj, kultivoj dhe përfaqësoj unitetin e popullit të Republikës së Kosovës”.

Në fund, kreu i Kuvedit, Kadri Veseli, duke i uruar suksese dhe punë të mbarë Presidentit Thaçi, ai po ashtu, falënderoi Presidenten në largim, Atifete Jahjaga, për kontributin e deritanishëm në rolin e saj si Presidente.

Presidentja në fund të mandatit, Atifete Jahjaga, e zgjedhur në krye të shtetit në 7 prill 2011, e para Presidente Republike në Kosovë e në vendet fqinje,  detyrën ia dorëzon Presidentit të ri të zgjedhur, Hashim Thaçi, i cili do të inaugurohet me një ceremoni në Sheshin Skënderbeu në Prishtinë, në 8 prill, pas betimit sot në Kuvend, ku u votua nga deputetët në 26 shkurt 2016.

Sipas Ligjit për Presidentin, “Presidenti i Republikës së Kosovës fillon mandatin pasi të ketë dhënë betimin para Kuvendit të Kosovës”.

 Poashtu  me Ligj përcaktohet: “Mandati i Presidentit është pesë (5) vjet. Ky mandat nuk ndërlidhet dhe nuk është i përputhshëm me mandatin e institucioneve të tjera” dhe “pas përfundimit të mandatit të parë, Presidenti mund të rizgjidhet vetëm edhe për një mandat”.

Hashim Thaçi merr detyrën si Presidenti i pestë i Kosovës së lirë nga qershori 1999 – afër 17 vite. Nga katër paraardhësit,  i pari ishte Presidenti historik Ibrahim Rugova, pas tij Fatmir Sejdiu, pastaj Behgjet Pacolli që qëndroi vetëm një muaj në këtë post, si dhe Presidentja në përfundim të mandatit Atifete Jahjaga.

Kuvendi i Kosovës, i përbërjes aktuale, është konstituuar plot gjashtë muaj pas zgjedhjeve të parakohëshme parlamentare të 8 qershorit 2014 – në 8 dhjetor, ndërsa të nesërmen ka zgjedhur qeverinë e Kosovës, të koalicionit të dy partive më të madha PDK e LDK, ku përfshihen edhe komunitetet pakicë.

Në dokumentin e marrëveshjes së koalicionit, të 8 dhjetorit 2014,  sipas së cilës postin e kryeministrit e mori kryetari i LDK-së, Isa Mustafa, theksohej se, “për pozitën e Presidentit të Republikës së Kosovës do të votohet kandidati i propozuar nga PDK-ja, pas përfundimit të mandatit aktual në përputhje me Kushtetutën – Hashim Thaçi”.

Marrëveshja përcaktonte edhe se, deri në zgjedhjen President Thaçi do ta udhëheqë politikën e jashtme për më shumë se një vit, duke qenë zv/kryeministër i parë dhe ministër i Punëve të Jashtme i Republikës së Kosovës.

Thaçi ka dhënë dorëheqje nga këto dy funksione në qeveri, si dhe nga kryetari i PDK-së, partisë që e themeloi në tetor të vitit të parë të lirisë 1999 dhe e udhëheqte deri në shkurt 2016,  pasi Kushtetuta prcakton se, “pas zgjedhjes, Presidenti nuk mund të ushtrojë asnjë funksion në parti politike”.

Në qeverinë e Kosovës, e cila zhvilloi dje mbledhjen e 83-të, të 16-tën në vitin 2016, së shpejti pritet të emërohen zëvendëskryeministri dhe ministri Punëve të Jashtme, të cilat poste i mbante presidenti i zgjedhur.

Më parë, gjatë karrierës politike, Hashim Thaçi ishte i zgjedhur tre herë kryeministër i Kosovës. Thaçi u zgjodh kryeministër i Kosovës në 9 janar 2008, pas fitores së PDK-së në zgjedhjet parlamentare të 17 nëntorit 2007, dhe u rizgjodh pas fitores së dytë në zgjedhjet e 12 dhjetorit 2010, të cilat ishin të parat pas shpalljes së pavarësisë në 17 shkurt 2008, të njohur deri tani nga 111 shtete anëtare të OKB-së.
Nga marsi 1999 deri në janar të vitit 2000, Thaçi ishte kryeministër i qeverisë së përkohshme të Kosovës (Qeverisë së Unitetit).

Në 12 dhjetor 2014, kryeministri Hashim Thaçi i dorëzoi detyrën kryeministrit të sapozgjedhur, Isa Mustafa, me të cilin nënshkruan marrëveshjen për bashkëqeverisje të Kosovës, duke dhënë kështu edhe mesazhin si dy liderë të partive më të mëdha kosovare se, rivaliteti politik edhe kur është më i madhi i mundshëm nuk është armiqësi dhe përtej interesave partiake edhe mund t’i bëjë bashkë për interesat madhore të shtetit, kombit e të ardhmes zhvillimore dhe euroatlantike.

Edhe pse zgjedhjet parlamentare të 8 qershorit 2014 ishin të parakohshme, kryeministri Hashim Thaçi përmbushi të plotë mandatin e dytë, që është katërvjeçar, pasi zgjedhjet e jashtëzakonshme ishin mbajtur pikërisht para katër viteve, në 12 dhjetor 2010.
Në Kosovën e lirë nga qershori 1999, PDK, tre herë fituese e zgjedhjeve, para koalicionit të tanishëm me LDK ishte edhe dy herë të tjera në koalicion-bashkëqeverisje me këtë parti, si dhe me AKR-në, por asnjëherë deri tash nuk e kishte Presidentin në ndarjen e posteve.

NGA DEBATI NË KUVENDIN E KOSOVËS-OPOZITA, JO PRESIDENT, POR PARLAMENT TE RI

by

Seanca e Kuvendit të Kosovës për Presidentin e Republikës pas pauzës që zgjati më shumë se që u dha 15 minuta  vazhdoi me paraqitjen e raportit të Komisionit për verifikimin, sipas të cilit  u konstatua se të dy kandidatët Thaçi e Rama i plotësojnë kushtet për t’u zgjedhur.Grupet parlamentare të pozitës nuk morën fjalën, ndërsa në emër të grupit parlamentar të VV fjalën e mori kryetari i këtij subjekti, Visar Ymeri, i cili theksoi kundërshtimin e opozitës së bashkuar. Kundërshtimin në emër të grupit parlamentar të subjektit të dytë opozitar, AAK e shprehu deputetja Donika Kadaj Bujupi. Kundërshtimin e vazhdoi në emër të grupit parlamentar Nisma, subjektit të tretë të opozitës së bashkuar, deputeti Zafir Berisha, i cili ftoi të dëgjohen thirrjet e protestuesëve rreth këtij Kuvendi. Lista Serbe nuk  deshi të marrë fjalën.

Deputetja e LDK, Melihate Tërmkolli, replikoi me opozitën, e iu kundërpërgjigj Daut Haradinaj i AAK. Shefi i grupit parlamentar të PDK, Adem Grabovci, vazhdoi me replikën duke u shprehur se këtu në institucione mbrohen interest e Kosovës.

Grupi parlamentar Gjashtë Plus i komuniteteve pakicë nuk deshi ta marrë fjalën, dhe seanca vijoi me debat, në të cilin fjala iu dha deputetetit të VV Ismail Kurteshi, i cili kundërshtoi zgjedhjen e Presidentit dhe ftoi të mos votohet.

Në vazhdim fjalën e mori Fatmir Limaj, kryetar i Nismës, i cili tha “jemi sot në një situatë krize të thellë politike, të shkaktuar nga qeveria dhe sot Kuvendi është para sfidës ta nxjerrë vendin nga kriza duke e cuar vendin në zgjedhje të jashtëzakonshme” me mosvotimin e Presidentit.

Deputetja Time Kadrijaj e AAK ritheksoi kundërshtimin e partisë së saj dhe të opozitës së bashkuar, e cila tha se “më e nevojshme për Kosovën sot është moszgjedhja e Presidentit”.

Deputeti Rexhep Selimi i VV tha se i drejtohej nga foltorja e Kuvendit edhe me zërin e masës protestuese rreth Kuvendit  dhe kërkoi që “fjalën e vet ta thonë edhe deputetët që janë votuar nga ajo masë kundërshtimi”.

Deputeti Enver Hoti i Nismës në kundërshtimin e tij theksoi asociacionin e komunave me shumicë serbe dhe  demarkacionin e kufirit me Malin e Zi e zgjidhja tha është të refuzohet zgjedhja e Presidentit.

Ilir Deda i VV nuk e deshti fjalën, ndërsa Teuta Haxhiu e AAK tha se kandidati për president  nuk është person unifikues, ndërsa përkujtoi edhe mospranimin në UNESCO.

Deputeti i VV, Albin Kurti, tha se “Kosova sot nuk ka nevojë për një president të ri nga ky Kuvend i vjetër i gazit, ka nevojë për zgjedhje parlamentare e Kuvend të ri, e pastaj për President të ri, qeveri të re”.