Rilindja, 31 Dhjetor 2004: KOSOVA PRET VITIN E PAVARËSISË/

 -Lajmi i vitit 2005 në Kalendarin e Rilindjes: KOSOVA VLERËSOHET SUKSES NË STANDARDE NJIHET PAVARËSIA E KOSOVËS/

-Presidenti historik Dr. Ibrahim Rugova: Vit i progresit më  të madh të Kosovës/

-Kryeministri i Kosovës, Ramush Haradinaj: Sigurt do të arrijmë suksesshëm në vlerësimin pozitiv të Standardeve/

Ne Foto: Behlul Jashari me Shefin Misionit të Zyrës Amerikane në Prishtinë, Philip Godlberg/

-Shefit të Misionit të Zyrës Amerikane në Prishtinë, Philip Godlberg: Shtetet e Bashkuara të Amerikës vazhdojnë ta mbështesin një Kosovë demokratike dhe tolerante/

SPECIALE-Gazeta DIELLI nga korrespondenti në Kosovë Behlul JASHARI

PRISHTINË, 8 Janar 2017/ “KOSOVA VLERËSOHET SUKSES NË STANDARDE NJIHET PAVARËSIA E KOSOVËS”, ky ishte titulli – “Lajmi i vitit 2005 në Kalendarin e Rilindjes”, që e botonte edhe në ballinë gazeta tradicionale e Kosovës Rilindja në numrin special të 31 dhjetorit 2004, festiv, në prag të Vitit të Ri.

Lajmi i plotë ishte ky:

Në Shqyrtimin Gjithpërfshirës në Këshillin e Sigurimit, në Grupin e Kontaktit, etj. Kosova vlerësohet sukses në Standarde. Burimet e “Rilindjes” janë të sigurta se bisedimet për statusin final të Kosovës do të sjellin Pavarësinë, madje vlerësimi sukses i standardeve ka mundësi të pasohet me fillimin edhe më të shpejtë të njohjes së Pavarësisë së Kosovës nga SHBA-të, vende të BE-së dhe fqinje.

“Njohja e Pavarësisë së Kosovës që tani nga SHBA-të dhe BE-ja do të lehtësonte edhe bisedimet për çështjet e tjera me Beogradin”, thekson udhëheqja kosovare.

“Pavarësia e Kosovës është interesi dhe garancia për të gjithë qytetarët, për të gjitha komunitetet e saj, mundëson një zhvillim më të shpejtë dhe perspektivat e integrimeve euroatlantike, si dhe qetëson rajonin”. Ky është qëndrimi unanim i institucioneve të Kosovës, që pavarësinë e kanë vullnetin, mandatin dhe besimin e popullit, të votës së lirë të zgjedhjeve të vlerësuara ndërkombëtarisht demokratike.

“KOSOVA PRET VITIN E PAVARËSISË”, ishte kryetitulli në ballinën e gazetës Rilindja, ku në mesazhin e Vitit të Ri 2005 Presidenti historik Dr. Ibrahim Rugova e vlerësonte VIT I PROGRESIT MË  TË MADH TË KOSOVËS.

Në pritjen tradicionale të fundvitit, Presidentit Rugova i dhurova ekzemplarët e parë të Kalendarit të Rilindjes me simbolet e Vitit historik të Pavarësisë së Kosovës dhe 600-vjetorit të Skënderbeut, të vitit 2005 të jubileut të 60-vjetorit të gazetës tradicionale, siç theksohet në shënimin nën foton në ballinë. Presidetni Rugova përgëzoi në këtë rast Rilindjen në Jubileun e saj dhe siguroi për zgjidhjen që do të bëhet për gazetën, kryeredaktor dhe kryetar i Këshillit Drejtues i së cilës isha.

“SIGURT DO TË ARRIJMË SUKSESSHËM NË VLERËSIMIN POZITIV TË STANDARDEVE”, ishte titulli po në ballinë të Rilindjes i një interviste që kam zhvilluar në fundvitin 2004 me Ramush Haradinaj, në kohën kur ishte kryeministër – gjatë 100 ditëve të qeverisjes, ku shprehte besimin se pavarësia e Kosovës do të shënojë edhe një fillim të ri për shumë çështje që e preokupojnë rajonin sikurse që është integrimi i shpejtë në strukturat evropiane dhe ato veriatlantike.“Ne bisedat i konsiderojmë si punë e mëtejme për t’i shpjeguar bashkësisë ndërkombëtare dhe të gjithëve edhe vendeve të rajonit se njohja apo  pranimi i vullnetit politik të popullit të Kosovës për pavarësi, pra njohja e pavarësisë së Kosovës është zgjidhja e vetme dhe që siguron ose shënon edhe më tej ndihmesë në stabilitetin e Kosovës dhe të rajonit”, theksonte Haradinaj.Kryeministri i Kosovës Ramush Haradinaj shprehej optimist se Kosova do të arrijë me sukses e me kohë në cakun e caktuar për mesin e vitit 2005 për Vlerësimin Gjithpërfshirës të Standardeve dhe fillimin e bisedimeve për statusin final të Kosovës

“Dinamika jonë, angazhimi ynë, reflekton edhe te UNMIK-u dhe mund të them se sigurt do të arrijmë suksesshëm në maj, pra në gjysmën e vitit që vjen me vlerësimin pozitiv. Veç tani ka sinjale të një sigurie të këtillë edhe nga pala ndërkombëtare duke vërejtur seriozitetin me të cilin ne po angazhohemi për zbatimin e standardeve për Kosovën”, theksonte Haradinaj.  Intervista ekskluzive me kryeministrin Haradinaj u zhvillua pasditën e 30 dhjetorit të vitit 2004 dhe u botua të nesërmen në numrin festiv të Rilindjes të Vitit të Ri 2005, në të cilin gazeta tradicionale e Kosovës kishte jubileun e 60-vjetorit. Me këtë rast të jubileut, kryeministri Haradinaj në zyrën e tij në ambientet e Qeverisë së Kosovës priti për intervistë kryetarin e Këshillit Drejtues e kryeredaktorin e Gazetës  Rilindja, Behlul Jashari, tash korrespondent në Kosovë i Gazetës Dielli.Në këtë numër special botohej edhe intervista ekskluzive e Shefit të Misionit të Zyrës Amerikane në Prishtinë, Philip Godlberg, që më dha për gazetën tradicionale të Kosovës Rilindja në jubileun e saj të 60-vjetorit.

“SHTETET E BASHKUARA TË AMERIKËS VAZHDOJNË TA MBËSHTESIN NJË KOSOVË DEMOKRATIKE DHE TOLERANTE”, citohej diplomati amerikan në ballinë e në titull të intervistës,  ku Godlberg theksonte: “Standardet, të cilat i ka specifikuar komuniteti evroatlantik janë idealet dhe vlerat me të cilat ne jetojmë çdo ditë dhe në të cilat ne thellësisht besojmë. Këto janë idealet të cilat e përfaqësojnë Evropën e shekullit 21”. “Viti 2005 do të mund të ishte një vit shumë vendimtar për Kosovën pasi që është vit kur ne do të lëvizim drejt një faze të re të procesit në Kosovë. Në kuptimin që mesi i vitit 2005 është koha kur do të bëhet Shqyrtimi Gjithpërfshirës i progresit në standarde, dhe me shpresë se prej kësaj do të rezultojë edhe fillimi i bisedave për statusin”, shprehej diplomati amerikan Godlberg.

NË BALLINË TË RILINDJES paralajmëroheshin edhe: “Mesazhi i kryetarit të Kuvendit të Kosovës, Akademik Nexhat Daci – Vit i realizimit të synimeve të Kosovës”, “Intervistë ekskluzive me Akademik Idriz Ajetin – Shkencës së gjuhësisë s’mund t’i dalësh zot pa njohur parimet e shëndosha të metodës shkencore”, “Ekskluzivisht shkruajnë minsitrat Lutfi Haziri e Qemajl Ahmeti”, “RILINDJA 60 VJET MONOGRAFI – Shtojcë speciale – Numri i parë: 12 Shkurt 1945, Prizren”.

Dhe, në këndin lart në ballinë: “RILINDJA” në “JUBILE 60 VJET” uronte “GËZUAR VITIN E RI 2005”.