Ambientalistët kanë zhvilluar sot një protestë para selisë së Kryeministrisë kundër shkatërrimit të armëve kimike siriane në Shqipëri.

Ata kanë kërkuar nga qeveria të mos lejojë shkatërrimin të këtyre armëve në vendin tonë pasi përbëjnë rrezik për qytetarët.

“Jemi kundër shkatërrimit të armëve kimike në Shqipëri. Shëndeti i familjeve është i rëndësishëm. Shqipëria nuk është kosh plehrash i Europës” theksoi Sazan Guri.

Ndërsa analisti Mustafa Nano, i rikujtoi qeverisë premtimet e bëra gjatë fushatës elektorale për moslejimin e importit të mbetjeve në vendin tonë.

“Përpara zgjedhjeve, opozita e atëhershme që sot është mazhorancë, ngriti zërin kundër importit të mbetjeve, dhe është logjikë e çmendur të na kërkojnë të pranojmë mbetje kimike”, tha Mustafa Nano.