-Me ndihmën e Zyrës për Bashkëpunim Mbrojtës të Ambasadës së SHBA-ve në Prishtinë (ODC)/
Nga Behlul Jashari/ PRISHTINË, 16 Tetor 2015/ Forca e Sigurisë së Kosovës zhvillon ushtrimin “Shqiponja IV” me ndihmën e Zyrës për Bashkëpunim Mbrojtës të Ambasadës së SHBA-ve në Prishtinë (ODC). Çdo vit FSK-ja zhvillon një ushtrim të madh trajnues në shtator dhe tetor. Këtë vit “Shqiponja IV” përqëndrohet në një rast të ndihmës humanitare/reagimit ndaj fatkeqësisë, në kuadër të cilit ata do të veprojnë. Ky është viti i katërtë me radhë që Zyra për Bashkëpunim Mbrojtës e Ambasadës së SHBA-ve në Prishtinë e përkrahë stërvitjen “Shqiponja”. Gjatë tërë vitit ODC ka mbajtur ngjarje të shumta për të përgatitur “Shqiponja IV”, e ka mbështetur këtë ushtrim duke sjellë ekipe për të zhvilluar trajnimin për komunikim, trajnimin HAZMAT (për materiale të rrezikshme), konferenca dhe ngjarje për planifikimin e shumëfishtë, si dhe seminare. Përveç këtyre, ODC ka mbështetur stërvitjen “Shqiponja IV” të FSK-së edhe duke zhvilluar ushtrime të shumta tavoline në shtator si provë.
Dita e Vizitorëve të Dalluar u mbajt sot në zonën e ushtrimit në Ferizaj.
Presidentja e Republikës, Atifete Jahjaga, ministri i Forcës së Sigurisë së Kosovës, Haki Demolli, komandanti i FSK-së, gjenerallejtënant Rrahman Rama dhe Komandanti i KFOR-it, gjeneral major Francesco Paolo Figliuolo vizituan sot operacionet përfundimtare të Ushtrimit fushor “Shqiponja 4” të Forcës së Sigurisë së Kosovës, në Jezerc të Ferizajt.
Me këtë rast, Komandantja e përgjithshme, Jahjaga pasi pa nga afër demonstrimet e njësive të specializuar u shpreh tejet e lumtur mbi të arriturat profesionale të njësive dhe pjesëtarëve gjatë zhvillimit të operacioneve, me motivimin , disiplinën dhe përkushtimin për të realizuar detyrat sipas skenarit të paraparë për ushtrim.
Presidentja Jahjaga tha se të gjithë duhet të krenohemi për të arriturat dhe për përparimin e Forcës së Sigurisë së Kosovës dhe punën e palodhshme të pjesëtarëve të kësaj force.
“Për shkak të këtyre të arriturave, për shkak të këtij përparimi dhe për shkak të këtij vullneti, duhet të arrijmë qëllimin tonë drejt transformimit të FSK-së në Forca të Armatosura të Kosovës, proces ky i cili e përmbyll edhe infrastrukturën e sigurisë së Republikës së Kosovës dhe konsolidimin tonë si shtet”, tha Jahjaga në një prononcim për media.
Presidentja, përgëzoi Komandantin e FSK-së, Gjeneral Rrahman Ramën dhe Ministrin e FSK-së, Haki Demolli, për realizimin e suksesshëm të ushtrimit fushor.
Aktivitetet e ushtrimit i vizituan edhe ambasadorët e SHBA-ve, Shqipërisë, Turqisë, pastaj atashetë ushtarakë të vendeve partnere, gjithashtu edhe kryetarët e komunave Ferizaj dhe Suharekë si dhe oficerë nga Policia e Kosovës dhe peronalitete vendore dhe nderkombëtarë.
Në Ushtrimi fushor “Shqiponja 4” të Forcë së Sigurisë së Kosovës, i cili u zhvillua nga data 11 deri më 16 tetor 2015, në lokacionin e Jezercit , komuna e Ferizajt, ishin të angazhuar rreth 400 trupa me rreth 65 automjete.
Ushtrimi fushor i Forcës së Sigurisë së Kosovës “Shqiponja 4” ka për qëllim realizimin e operacioneve komplekse dhe përmirësimin e komunikimit dhe koordinimit në mes të të gjitha institucioneve dhe mekanizmave të sigurisë të Republikës së Kosovës.