Nga Gaspër Marku/ – Besimtarë të shumtë katolike të qytetit të Shkodrës, si dhe të rrethinave, ishin pjesë e një marshimi tradicional që Kisha Katolike organizon për çdo vit në mes të muajit mars në malin e Taraboshit. Aktiviteti qe njihet me emrin “Udha e Kryqit”, është ritual i përvitshëm për të krishteret në mbarë boten para kremtimit të festes së Pashkes, që shënon ringjalljen, fitoren e jetes mbi vdekjen.

Të prirë nga famullitari i Shkodrës, Dom Gjovalin Sukaj, grupi i besimtarëve ka përshkuar mes për mes malin e Taraboshit, ku duke përkujtuar mundimet e Jezusit , janë kryer edhe 14 ndalesat e Udhës së Kryqit duke u lutur në sejcilen prej tyre. Pjesë e kësaj ceremonia ka qënë edhe vetë Arqipeshkvi Metropolit i Shkodër-Pult, Imzot Angelo Massafra, i cili gjatë një prononcimi për ATSH-në tha se “kjo ngjitje ne malin e Taraboshit, si dhe 14 ndalesat e lutjes, janë një prej kënaqësive që ndjen besimtari katolik në periudhën gjatë kohës së Kreshmëve”. Sipas tij, në pjesëmarrjen e “Udhës së Kryqit”, besimtari përkujton jo vetem mundimet dhe vdekjen e Jezu Krishtit në Kryq, por edhe u jep forcë për të përballuar vështirësitë e kësaj jete, të cilat nuk janë asnjëherë të pakta.

E veçanta e këtij aktiviteti është se nga ndalesa në ndalesë, prijësi i karvanit që ka privilegjin të mbajë edhe kryqin e drujtë me mbishkrimet që përkujtojnë ngjitjen e Jezusit në mal të Kalvarit, ndalen duke ftuar të gjithë pjesëmarrësit të luten dhe të thonë uratë në detikim të Jezu Krishtit.