UKRAINË – Aeroportet e Krimesë nën kontrollin e autoriteteve vendase

February 28, 2014 by dgreca

KIEV, 28 shkurt /ATSH-AFP – Aeroportet e Krimesë, ku patrullonin persona të armatosur prorusë, janë përsëri nën kontrollin e autoriteteve qendrore të Ukrainës, njoftoi sot në Kiev drejtori i Këshillit kombëtar të sigurisë dhe mbrojtjes, Andriij Paroubiij.

“Pati një tentativë për të marrë aeroportet e Simferopolit dhe të Sevastopolit, por tashmë ata janë përsëri nën kontrollin e forcave ukrainase të sigurisë”, deklaroi ai. Gadishulli rusishtfolës i Krimesë është përfshirë nga tensione separatiste. Krimeja i përkiste fillimisht Rusisë, në kohën e BRSS-së, përpara se t’i bashkohej Ukrainës në vitin 1954. Në të ndodhet flota ruse e Detit të Zi në Sevastopol./

UKRAINË – Opozita pranon propozimet e presidentit

February 21, 2014 by dgreca

KIEV- 21 Shkurt- Opozita vendosi sot të nënshkruajë një marrëveshje me presidentin ukrainas Viktor Janukoviç, bëri të ditur njëri nga liderët e saj kryesorë, Oleg Tiagnibok, i cituar nga agjencia ruse e lajmeve, Interfax.

Presidenti ukrainas njoftoi sot disa lëshime të mëdha përballë opozitës, ndër të cilat organizimi i zgjedhjeve të parakohshme presidenciale, formimi i një qeverie koalicioni dhe një reformë kushtetuese, pas akteve të dhunës që shkaktuan rreth 80 të vdekur që prej të martës.

UKRAINE: 25 TE VRARE: Urdhër për zbarkimin e trupave parashutiste

February 19, 2014 by dgreca

Ministri ukrainas i mbrojtjes, Pavlo Lebedev, lajmëroi sot se ka urdhëruar dërgimin e trupave paraushtarake në Kiev, skenë e përleshjeve të përgjakshme ndërmjet policisë dhe protetuesve anti-qeveritar. Lebedev bëri të ditur se po zhvendos trupat parashutiste nga qyteti lindor Dnipropetrovsk për në kryeqytet, për t’i ruajtur depot ushtarake, ku janë të magazinuara sasi të armatimit dhe municionit.

Ish-ministri i mbrojtjes Anatoly Hrytsenko shkroi në rrjetin social Facebook se 500 forca nga Brigada e 25-të Parashutiste e Dnipropetrovsk do të zbarkojnë në Kiev.
Kjo është hera e parë që ushtria përfshihet në protestat që kanë dridhur Ukrainën prej nëntorit të vitit të kaluar, të cilat u nxitën nga refuzimi i presidentit Viktor Yanokovych që të përafrohet me Bashkimin Evropian.
Ndryshe, së paku 25 vetë janë vrarë në përleshjet e mbrëmshme ndërmjet protestuesve antiqeveri dhe policisë. Në mesin e viktimave janë edhe 7 policë, për të cilët thuhet të jenë vrarë nga të shtënat me armë.
Presidenti i Ukrainës, Viktor Yanukovich, ka kërkuar nga liderët e opozitës që të distancohen nga “radikalët”, duke u tërhequr vërejtjen se nëse këtë nuk e bëjnë, ai do të “bisedojë ndryshe” me ta.
Në deklaratën e zotit Yanukovich theksohet se disa pjesëtarë të opozitës e kanë kaluar kufirin, kur ata, siç ka dyshime, kërkuan nga mbështetësit të sjellin armë për demonstruesit në sheshin kryesor në kryeqytetin Kiev.
Presidenti Yanukovich këta njerëz i cilësoi si “kriminelë”dhe tha se ata do të ballafaqohen me drejtësi në gjykatë.
Ai ka theksuar se “ende nuk është shumë vonë për ta përfunduar konfliktin”.

Tre të vrarë gjatë protestave në Ukrainë

January 22, 2014 by dgreca

Perëndimi dënon me forcë dhunën që çon në humbjen e jetës së protestuesve/

Zyrtarët në Ukrainë thonë se tre protestues kanë humbur jetën në kryeqytetin Kiev gjatë përleshjeve me policinë. Njoftohet se dy protestues kanë marrë plagë nga armët e zjarrit. Një zyrtar mjekësor tha se një aktivist tjetër po ashtu gjeti vdekjen në skenën e përleshjeve. Tre udhëheqës të partive opozitare kanë fajsuar presidentin Viktor Yanukovych për dhunën.
Sipas njoftimeve, policia po përpiqej të hiqte kampin e protestuesve sot dhe përdori gazin lotsjellës ndaj demostruesve të cilët u kundërpërgjigjën duke qëlluar policinë me gurë dhe mjete shpërthyese të prodhuara në rrugë artizanale.
Ministrja e Drejtësisë së Ukrainës e vlerësoi punën e policisë duke thënë se ajo ishte krenare për kurajon dhe tolerancën e treguar nga ata. Olenka Lukash foli me diplomatët e huaj gjatë një takimi në Ministrinë e Jashtme.
“Forcat policore duke rrezikuar jetën e tyre, demostruan durim të madh me ekstremistët.”
Por ajo u gjend përballë një reagimi shumë kritik nga ambasadori gjerman në Ukrainë, Cristof Weil.
“Nuk është vetëm formulimi i ligjeve kundër protestave, por shpirti i ligjeve që na bën të ndjehemi të zhgënjyer. Ne i lexojmë ligjet tuaja por gjithashtu duam të theksojmë procedurën e diskutueshme përmes të cilës u futën në zbatim dhe kontekstin tejet të politizuar përmes së cilës u miratuan ato.”
Ambasadori gjerman tha se të pranishmëve u kishte bërë përshtypje se askush nga qeveria nuk kishte shprehur keqardhje për dy të vrarët e një natë më parë.
Ndërkohë, ambasada amerikane në Kiev tha përmes një deklerate sot se kishte anuluar vizat për disa shtetas ukrainas që kanë lidhje me dhunën atje.
Policia e specializuar për protestat ndërmori një aksion mbrëmë kundër qindra protestuesve për t’i larguar ata nga kampi me tenda të ndërtuar në Qendren Pavarësia.
Shefja e politikës së jashtëme të Bashkimit Evropian Catherine Ashton bëri thirrje sot për dhënien fund menjëherë të dhunës në Ukrainë. Ajo dënoi me forcë dhunën që çoi në humbjen e jetës së protestuesve.
Ndërsa në Uashington, Bordi i Guvernatorëve të Transmetimeve Amerikane, që mbikëqyr edhe Zërin e Amerikës, reagoi ashpër ndaj sulmeve të përgjakëshme nga policia ndaj dhjetëra gazetarëve në Kiev, përfshi dy gazetarëve të Radios Evropa e Lirë. Ata po mbulonin protestat të hënën kur u rrahën dhe goditën nga pjestarë të forcave speciale.
Protestat masive në kryeqytetin ukrainas Kiev shpërthyen pasi presidenti Viktor Yanukovych refuzoi një marrëveshje me Bashkimin Evropian dhe zgjodhi në vend të saj lidhje më të ngushta me Rusinë. Kjo e fundit i ofroi atij një hua prej 15 miliardë dollarësh.