Archives for May 2013

Mali i Zi e do Plavë-Gucinë pa shqiptarë

May 14, 2013 by dgreca

Nga Ramiz Lushaj/
1. Në tokën arbnore të krahinës komunare të Plavë-Gucisë shqiptarët etnikë (të vetëdeklaruar si të tillë) renditen të dytët për nga popullsia dhe janë ma të përqëndruar në Vuthaj, Martinaj, Hot i Vendit (Hoti mbi Plavë), Kukaj-Krushevë-Vishnjevë-Hakaj, në qytetet Guci e Plavë, etj. Shqiptarët etnikë rradhavijnë pas boshnjakëve (ma së shumtit shqiptarë të asimiluar) dhe dalin para serbëve dhe malazezëve, që janë komunitete kulturore-etnike të ardhun si kolonë e ma së forti të rritun numerikisht me asimilime të shqiptarëve katolik e muslimanë në kohëna të trinjakërisë krajloviçe kundërshqiptare: Nikolla I, Tito e Gjukanoviçi.
Nistue nga numri i përgjithshëm i popullsisë etnike shqiptare përcaktohet edhe përqindja shqiptare e përfaqësimit dhe e punësimit në shtetin e pavarur të Malit të Zi të pas 2006-tës, si në institucione shtetërore e lokale që varen zyrtarisht nga Podgorica apo komuna e Plavë-Gucisë, sipas kërkesave e praktikave të përbotshme demokratike, sipas kushteve e kritereve për antarësim euro-atlantik në BE e në NATO. Politika shtetërore kundërshqiptare e Malit të Zi gjukanoviçian mbetet tejet diskriminuese ndaj shqiptarëve etnik në Plavë-Guci (realisht – mbi 20 për qind e popullsisë së saj) pasi niveli i përfaqësimit e i punësimit në këtë komunë është mbi katër herë ma i vogël se sa përqindja e duhur zyrtarisht.
2. Shifrat flasin vetë për këtë komunë alpine me 486 km2 e 14.000 banorë, me tri qendra lokale (Plavë, Guci, Murinë) dhe shtatë bashkësi lokale. Në territorin e Plavë-Gucisë janë gjithsej 959 vende pune republikane apo komunare, të cilat plotësohen nga Podgorica ose Plava sipas kritereve të tyne publike e ajzberige. Shqiptarët etnikë, sipas rregullave demokratike shtetërore dhe arsyes njerëzore, iu takon të kenë mbi 200 vende pune gjithsej në të gjitha nivelet zyrtare të atyshme. Deri kohët e fundit, sipas të dhanave nga burime të ndryshme zyrtare, partiake e qytetare, del se në krejt Plavë-Gucinë janë të punësuar mbi 50 shqiptarë. Rritja e përfaqësimit e punësimit të shqiptarëve në Plavë-Guci është tepër e ngadaltë, gjithsesi e pakët, në nivel të ulët, pavarësisht se së fundit po ndihet një erë e lehtë ndryshimi. Mjafton veç ky fakt që të shqetësoj me reflektime Bashkimin Europian e Amerikën, po veçmas edhe dy shtetet kufitare të Shqipërisë e Kosovës, që ta kushtëzojnë Malin e Zi në marrëdhaniet e integrimit e të fqinjësisë me zgjidhjen e këtij problemi përditsor të shqiptarëve plavë-gucias. Askush nuk po i kërkon askujt që të veprojnë açik, veçse siç po ban Mali i Zi që e ka njoft shtetin e ri të Kosovës, po nuk janë vendos në Prishtinë e në Podgoricë misionet diplomatike, pasi e kushtëzon me zgjiedhjen e disa çështjeve të (pa)arsyeshme malazeze.
3. Njihet (ndër)kombëtarisht kontributi politik e plebishitar i shqiptarëve në shpalljen e Pavarësisë së Malit të Zi, ku ka peshën e vet të randësishme edhe krahina e Plavë-Gucisë, e treta komunë për nga popullsia shqiptare, pas asaj të Ulqinit e të Tuzit. Shteti malazez ka mos mirënjohje të pafalshme ndaj shqiptarëve, nuk i vlerëson denjësisht si qytetarë të tij dhe në sjelljet e tij kolonizatore i sheh dhe i trajton shqiptarët si “popull i rendit të dytë apo të tretë”(!) Kjo duket qartë tek ky fakt skandaloz: policia kufitare në Plavë-Guci i ka 157 vende pune, po dekteri vonë nuk ka shqiptarë të punësuar në radhët e saj, ndërkohë që vijëkufini me dy shtetet shqiptare fqinjë, Shqipërinë Londineze dhe Kosovën dardane, shtrihet në rreth 80 km gjatësi. Një tjetër qëndrim tepër racist e mosbesues ndaj shqiptarëve: shteti malazez i merr tre qytetarë të komunitetit boshnjakë në Plavë-Guci dhe i çon në kurse kualifikime për të mësue shqipen, pasi iu duhen për me komunikue me shqiptarët në anën tjetër të kufinit, ndërkohë që shqiptarët etnikë plavë-gucias mbeten pa punë dhe kalojnë si muhaxhir nëpër këto pika kontrolli kufitar tue marrë rrugët e mërgimit të prejkohshëm, ma së shumti në Amerikën përtej Adriatikut e Atlantikut.
Sjelljet koloniale mesjetare të shtetit malazez keqshfaqen edhe në mos përfaqësimin e shqiptarëve etnikë në Plavë-Guci në organet e drejtësisë. Është vetëm një prokuror dhe asnjë gjyqtar. Në zyra të shërbimit informativ malazez të atyshëm nuk ka asnjë shqiptar. Në këto raste kemi përjashtim ekstrem të faktorit e përqindjes shqiptare në këto organe, duke mos pasë në përbërje të tyre të paktën një shqiptar-përkthyes, etj. Ndërkohë që ndihet e domosdoshme pasi numri i hetimeve e i gjykimeve ndaj shqiptarëve është disi i lartë në krahasim me boshnjakët, serbët apo malazezët, edhe për arsyen e thjeshtë se përndiqen shpesh e diferencohen gjithkund për shkak të etnisë shqiptare.
Në policinë e shërbimeve publike nga 83 punonjës (policë e punëtorë administrativ) shqiptarët punësohen vetëm rreth 4 për qind, pavarësisht faktit që shqiptarët janë të dytët në popullsinë e përgjithshme të komunës dhe ka bashkësi lokale si në Vuthaj, Martinaj, etj. me mbi 90 për qind mono-etnike shqiptare. Edhe aty ku jepen dokumente personale edhe për shqiptarët ka 15 të punësuar të komuniteteve të tjera etno-kulturore, ndërsa shqiptarët nuk përfillen në përqindje zyrtare! Një dukuri e tillë negative raciste kaq ekstremiste nuk ndodh as në disa shtete nga ma diktatorialet në botë, si në Afrikë apo në Azi. Këto dëshmojnë se shteti malazez sillet si pushtues, është neo-kolonizator mesjetar.
Absurditete që nuk kanë astenjë shfajësim politik, moral apo zyrtar: në Entin e Punësimit në Plavë nuk ka shqiptar dhe atëherë si mund të thonë se ka interes shtetëror, partiak e komunar për punësimin e shqiptarëve?! Në Drejtorinë e Pyjeve ka 37 vetë të punësuar, kurse shqiptarët zënë vetëm mbi 6 për qind dhe ende ka vende të lira për punësimin e tyre. Paradoksale: në Organin për Kundërvajtje, në Qendren Sociale, në Postë, etj. nuk ka shqiptarë, në Qendrën Parashkollore vetëm 1 shqiptar, etj. Në institucionet e larta presidenciale, parlamentare e qeveritare në Podgoricën e Çetinë dhe në selitë e partive politike shqiptare në Ulqin e Podgoricë, e mirëdijnë këtë gjendje të randë në Plavë-Guci, po nuk ndërmarrin hapa të plotë me vullnet politik e njerëzor që ta ndryshojnë realitetin katastrofal të kësaj komune nga ma të varfrat e Europës.
4. Çështja shtrohet edhe kështu: nëse në organet e drejtësisë, të sigurisë shtetërore e të policisë kufitare e të shërbimeve, të tatimeve, etj. Emnimet i ka në dorë edhe Podgorica, kryeqëndra zyrtare e shtetit malazez, po komuna e Plavë-Gucisë me mbi 100 punonjës pse ka vetëm mbi 10 për qind shqiptarë në zyrat e saj?! Në ente e organizma në varësi të kësaj komune përfaqësimi e punësimi i shqiptarëve kap rreth 8 për qind, një shifër ende e ulët, pasi flitet zyrtarisht për rreth 60 vende pune të mundshme. Përndryshe: nga 73 vende pune në organizatat komunale të Plavë-Gucisë mund të punësohen rreth 20 shqiptarë, po janë në punë të ndryshme veç nja 5 për qind e tyne. Tjetra: nga 24 vende pune në shërbimin zjarrfikës nuk ka astenji shqiptar, ndërkohë që përqindja i kërkon 6 vende pune. Në dhomat e kulturës në këtë komunë ka 27 vende në organikë dhe në to duhet të punësohen deri në 7 shqiptarë etnikë. Komuna, pavarësisht nga vështirësitë e (pa)dituna, i ka mundësitë edhe për shtimin e vendeve të reja të punës në shtrirjen gjeo-administrative të Plavë-Gucisë, si në mirëmbajtjen e liqenit të Plavës, në Parkun Nacional, në sektorin e pastrimit e deponimit të mbeturinave (që po i hedhin keqas gjithandej, paturpësisht edhe mbi varret e luftëtarëve të legjendares “Luftë e Nokshiqit”).
5. Mos përfaqësimi e mos punësimi i rreth 200 shqiptarëve etnikë të Plavë-Gucisë në vendet e tyre të ligjshme brenda përqindjeve të kuotave zyrtare të kushtëzuara nga numri i popullsisë së saj ka problematikat e veta politike, etnike, fetare, etj. Një prej tyne është zania e vendeve të punës të planifikuara për shqiptarët etnikë me të tjerë të etnisë boshnjake, serbe e malazeze. Gjithashtu ka ndikue edhe fakti se ndërvite as Podgorica dhe as Plava nuk kanë pasë vullnet politik e njerëzor për përgatitje perspektive të shqiptarëve etnikë të atyshëm nëpërmjet shkollimit e kualifikimeve të ndryshme për disa vende pune si në shëndetësi, arsim, polici, etj. Mbi të gjitha theksojmë se mos përfaqësimi e mos punësimi i shqiptarëve etnikë plavë-gucias dhe mos zhvillimi i kësaj krahine komunare të prapambetur ka të bajnë me vetë politikën shtetërore shovene raciste të Malit të Zi që don t’i shpërngulin shqiptarët për në botën e jashtme, që këta ta lëshojnë tokën e vet etnike shqiptare, etj. Realisht Mali i Zi me demagogji e vello “demokratike” kërkon ta kryejnë përfundimisht proçesin e kolonizimit në Plavë-Guci nëpërmjet shpërnguljeve e spastrimit etnik të shqiptarëve trojenik. Shifrat flasin vetë: në vitin e pushtimit malazez të Plavë-Gucisë në tetor 1912 popullsia shqiptare ishte mbi 77 për qind dhe pas një shekulli shohim se shqiptarët etnikë janë 4 herë ma pak, ndërkohë që janë mbi trefishue etnitë e tjera si boshnjakët (mbi 44 për qind), serbët (rreth 20 për qind) e malazezët (mbi 14 për qind). Gjithçka tashma po dihet dhe shihet: Mali i Zi po lufton ta kthejnë Plavë-Gucinë në një në një vend pa shqiptarë dhe bota shqiptare e ajo euro-atlantike nuk duhet të heshtin ndaj këtij kolonizimi mesjetar në Europën moderne.

Hetohet Associated Press

May 14, 2013 by dgreca

Agjencia e lajmeve Associated Press thotë se qeveria amerikane ka sekuestruar të dhënat telefonike të dy muajve për shumë nga gazetarët dhe redaktorët e saj.
Agjencia e lajmeve Associated Press thotë se qeveria amerikane ka sekuestruar të dhënat telefonike të dy muajve për shumë nga gazetarët dhe redaktorët e saj.
Shefi ekzekutiv i organizatës, Gary Pruitt, e quajti këtë veprim “një ndërhyrje masive dhe të paparë” në operacionet faktmbledhës të AP-së.
Z. Pruitt tha të hënën se Associated Press mësoi nga Departamenti i Drejtësisë të premten se agjencia qeveritare mblodhi të dhëna për më shumë se 20 linja të veçanta telefonike të zyrave të AP-së dhe gazetarëve të saj.
Ai tha se të dhënat mbulojnë një periudhë dy-mujore në fillim të vitit 2012 dhe përfshijnë zyrat e Associated Press në Nju Jork, Uashington dhe Hartford të shtetit Connecticut.
Një raport i Associated Press mbi këtë çështje thotë se qeveria nuk ka dhënë asnjë shpjegim pse të dhënat telefonike janë konfiskuar.
Megjithatë, raporti vëren se zyrtarët amerikanë kanë thënë më parë se Departamenti i Drejtësisë po kryen një hetim mbi një artikull të AP-së në maj, 2012, në lidhje me një operacion të CIA-s në Jemen për të zbuluar një komplot të al-Kaidës.
Zyra e Prokurorit të SHBA-së në Uashington tha në një deklaratë të hënën se prokuroria është “gjithmonë e kujdesshme”, kur ka të bëjë me çështjet e shtypit, por nuk përmendi në mënyrë specifike çështjen e Associated Press.

KFOR-i s’e përjashton mundësinë e partneritetit me Mbrojtjen Civile Serbe

May 14, 2013 by dgreca

“Mbrojtja Civile Serbe” që vepron në pjesën veriore të Kosovës, mund të jetë partner i paqeruajtësve të NATO-së në të ardhmen, sinjalizon komandanti i KFOR-it Volker Halbauer, sipas të cilit baza juridike për cilëndo organizatë në Kosovë duhet të sqarohet paraprakisht.
Gjeneral-Majori gjerman që udhëheq misionin e NATO-së në Kosovë, tha të martën se gjëja kryesore në përzgjedhjen e partnerëve në terren, është që ata t’i përshtaten mandatit të KFOR-it për ruajtjen e një mjedisi të qetë dhe të sigurt.
“Unë nuk do të argumentoj rreth bazës ligjore të cilësdo organizatë në Kosovë. Kushdo që ka bazë ligjore, kjo është çështje tjetër, dhe vendimi duhet të merret nga autoritetet tjera. Për ne si KFOR, kushdo që kontribuon për një mjedis të qetë dhe të sigurt, është partner joni, e kush nuk e bënë këtë gjë, nuk është partner i joni”, u përgjigj Halbauer kur është pyetur rreth një partneriteti të mundshëm me “Mbrojtjen Civile”.
Ky trup, të cilin autoritetet në Prishtinë e konsiderojnë si ilegal, është shfaqur në nëntor të vitit të kaluar në publik në pjesën veriore të Mitrovicës.
Pjesëtarët e saj janë të uniformuar, dhe komandohen nga Kërstimir Pantiq, që është shef i shtabit të Mbrojtjes Civile matanë lumit Ibër.(Kortezi Fatmir Aliu Europa e Lire0
Pantiq ka pati deklaruar për mediet serbe se kjo organizatë është e formuar në kuadër të ligjit për situata të jashtëzakonshme të Republikës së Serbisë, dhe në përputhje me Konventën e Gjenevës, si një organizatë komunale nën kontroll të autoriteteve lokale.
Por për komandantin e KFOR-it Volker Halbauer përveç çështjeve ligjore që duhet të definohen për “Mbrojtjen Civile Serbe”, një gjë është e qartë se kjo organizatë nuk ka të drejtë të bartë armë.

I BASHKOI APO I NDAU SERBET E VERIUT VUCIQ?

May 14, 2013 by dgreca

Vizita e zëvendëskryeministrit të parë të Serbisë Aleksandër Vuçiq, me 12 maj në veri të Kosovës, ndonëse nuk ishte pritur me simpati nga serbët e kësaj pjese të vendit, megjithatë ka zvogëluar hendekun ndërmjet autoriteteve të Beogradit dhe liderëve serb të veriut të vendit, vlerësojnë disa prej këtyre liderëve.
Hendeku dhe tensionimi i raporteve, siç thonë ata, ishin krijuar pas arritjes së marrëveshjes së 19 prillit në Bruksel, ndërmjet kryeministrit të Kosovës, Hashim Thaçi dhe kryeministrit serb Ivica Daçiq, të cilën serbët e veriut e kanë kundërshtuar dhe vazhdojnë ende ta bëjnë këtë.
Lideri i serbëve të veriut, Milan Ivanoviq nga Këshilli Nacional Serb, thotë për Radion Evropa e Lirë se gjatë takimit të së dielës, edhe autoritetet e Beogradit por edhe përfaqësuesit e serbëve të veriut të Kosovës, pavarësisht mospajtimeve, kanë ardhur në përfundim se nuk mund të bëjnë pa njëri tjetrin.
“Megjithatë, është kuptuar nevoja se nuk mund të bëjmë pa njëri tjetrin dhe ky përfundim është pranuar me plot seriozitet. Ne u pajtuam për këtë dhe ka pasur propozime që ti qetësojmë emocionet dhe siç thuhet, ta lëshojmë topin në tokë, gjë që në pjesën e parë të takimit të hapur nuk pati sukses”, ka thënë Millan Ivanoviq.
Por lideri tjetër i serbëve të veriut, Oliver Ivanoviq, ish zyrtar në qeverinë e mëparshme serbe, duke folur për Radion Evropa e Lirë, ka theksuar se vizita e Vuçiqit në veri të Kosovës dhe takimi i tij me liderët e atjeshëm ka ndikuar në përafrimin e qëndrimeve ndërmjet tyre dhe autoriteteve të Beogradit.
“Gjëja themelore është se ka qenë e dukshme që disa kanë qëndrime negative, por shumica kanë ndjenjën e fuqishme të brengosjes se si do të ndikojë marrëveshja në jetët e tyre të përditshme. Mendoj se një pjesë të përgjigjes e kanë marrë, ndërkaq një pjesë tjetër e përgjigjes është çështje e kohës”.
“Mendoj se në periudhën që është para nesh, duhet të ketë më tepër kontakte, sidomos të linjës shtetërore dhe të mos barten informacionet përmes linjave partiake, sepse kjo e fundit është treguar si një zgjidhje e keqe. Fundja edhe Vuçiqi ka pasur mundësinë që të shoh se cili është populli në Kosovë, cilët janë përfaqësuesit e serbëve në veri dhe ka pasur mundësinë që edhe ai të mësoj diçka”, tha Oliver Ivanoviq.
Por, a kanë arritur ndonjë pajtim konkret përfaqësuesit e serbëve të veriut me autoritetet e larta të Beogradit lidhur me domosdoshmërinë e zbatimit të marrëveshjes së Brukselit, të 19 prillit?
Të dy këta liderë të serbëve të veriut kanë pikëpamje të ndryshme lidhur me këtë çështje.
Milan Ivanoviq vlerëson se serbët e veriut nuk do të pranojnë një gjë të tillë, ndërkaq që e ironizon insistimin e Beogradit zyrtarë se marrëveshja e obligon atë dhe se ajo duhet të zbatohet.
“Fatkeqësisht, duhet vetëm të vdiset, asgjë tjetër nuk duhet. Kështu që, çështja e marrëveshjes është relative. Ka të tilla që zbatohen, por ka edhe të tilla që nuk zbatohen. Por në këtë rast, kemi mbetur në pozicione të kundërta me Beogradin. Kështu që, sa i përket ndonjë zbatimi të kësaj marrëveshje dhe mundësisë që në këtë moment të arrihet diçka në këtë drejtim, nga ana jonë, lidhur me këtë nuk ka pasur ndonjë pajtim”, tha Millan Ivanoviq.
Por, Oliver Ivanoviq, thekson se në takimin me Vuçiqin, nuk kanë qenë të gjithë përfaqësuesit e serbëve të veriut të Kosovës të zëshëm në kundërshtimin e marrëveshjes.
“Ka qenë e dukshme që kundërshtim të fuqishëm kanë treguar vetëm përfaqësuesit e opozitës parlamentare të Serbisë, ndërkohë që gjithë të tjetrit kanë qenë goxha të heshtur. Prandaj, kjo është e dukshme për ata që vëzhgojnë prej anash. Do të shohim se çfarë do të ndodhë në periudhën që është para nesh, por unë nuk jam përkrahës i vendimeve të shpejta dhe të lehta të Qeverisë së Serbisë”.
“Pra, ajo duhet ta kuptojë se ekziston frika tek të gjithë serbët që jetojnë këtu, pavarësisht se cilës parti i takojnë. Vetëm disa prej tyre janë të zëshëm për këtë,. Disa të tjerë po e shfrytëzojnë këtë situatë për promovimin e programeve të partive të tyre, ndërkohë që shumica e serbëve janë të brengosur se si do të dukej zbatimi i marrëveshjes”, tha Oliver Ivanoviq.
Ndryshe, gjatë vizitës të së dielës në veri të Kosovës, Vuçiq ka theksuar se me përfaqësuesit e serbëve të veriut është arritur pajtimi për koordinim të aksioneve të ardhshme dhe për veprim të përbashkët me ta.
Siç ka theksuar ai, marrëveshja e Brukselit nuk është e përsosur, por me të nuk duhet frikësuar popullin.(Kortezi Bekim Bislimi)

Në Kishën e Mjedës, u promovua kolana e 10 vëllimore “Mjeda” e studiuesit Mentor Quku

May 13, 2013 by dgreca

Ministri i Kulturës Visar Zhiti : “Puna e studiuesit të njohur shkodran Mentor Quku-t, është një vepër që e ka lartësuar poetin, albanologun, politikanin e klerikun Mjeda, në majët me të larta të albanologjisë.” /
Nga Leonora Laçi/
KUKEL – SHKODER : Në kuadër të Jubileut të 100-vjetorit të Kishës së Mjedës në Kukel, komuna e Bushatit, të shtunën më 11 maj , u organizua promovimi i 10 vëllimeve të monografisë seriale Mjeda. Në këtë aktivitet morën pjesë personalitete të lartë shtetërore dhe të qeverisjes lokale, akademike nga Qendra e Studimeve Albanologjike(QSA), klerikë të dalluar, profesorë nga Universiteti Shkodrës “Luigj Gurkauqi”, e studiues të tjerë, si dhe dashamires të shumtë të artit e kulturës shqiptare. Në mesin e pjesmarrësve të shumtë, dallohej edhe pjesëmarrja e klerikut dhe atdhetari të shquar, për fe e atdhe Dom Anton Kçira i cili për shume vite më radhë punoj dhe udhëhoqi pa u lodhur në famullinë e më të madhe shqiptare në Shtetet e Bashkuara, atë të Shën Palit në Rochester – Detroit.
Aktiviteti promovues e përkujtimorë filloi më vendosjen e buqetave me lule të freskta pranë shtatores së poetit Ndre Mjeda. Një buqet me lule në emër të Parlamentit të Shqipërisë u vundosë nga Kryetarja e Parlamentit Znj. Jozefina Topalli, sikurse në emër të Ministrisë së Kulturës, nga ministri Visar Zhiti , dhe studiuesi i Mjedës, Mentor Quku, shoqëruar edhe nga drejtori i Qendrës Muzeore Dom Nikë Ukgjini.
Më pas një aktivitet i pasur( moderuar nga autoria e këtij reportazhi – studentja e universitetit të Shkodrës, Leonora Laçi), u mbajtë në njërin e ambienteve të Kishës 100- vjeçare, tashmë të restauruar e ndërtuar dhe projektuar nga vet Mjeda. Drejtuesia, në emër organizatorëve falënderoi të pranishmit duke vlerësuar shumë lart punën e studiuesit Mentor Qukut në punën e tij kërkimore e studimore për Mjedën ” Kolana shumëvëllimëshe e punuar më shumë dashuri dhe shije, do të thoshte oratoria, znj. Laçi, vjen si rezultat i punës kërkimore e studimore e një përkushtim për 40 vite më radhë, dhe natyrisht që na jep sot arritjen më të madhe në fushën e zbulimi të jetës dhe veprës së gjeniut të letrave shqipe Dom Ndre Mjedës”.
Në ndërkohë fjalën e mori edhe Drejtori i Qendrës Muzeore “Ndre Mejda” Dom Nikë Ukgjini , i cili u rrëfye se ai është duke punuar me përkushtim shumë të madh, për kthimin në identitet të plotë, edhe të shtëpisë së poetit Mjeda. Kleriku studies, Dom Nikë Ukgjini, ndër të tjera tha se: ” Jemi mbledhur për të promovuar një vepër unikale në llojin e vet, në fushën e albanologjisë, ku gjithësesi studiuesi i njohur Mentor Quku, me veprën e realizuar, na i ka hapur dyert për një fushë të re albanologjike, atë të Mjedologjisë.”
Kryeparlamentaria e Shiqpërisë, Znj. Jozefina Topalli në fjalën teksa vlerësoj lart personalitetin e Ndre Mjedës, në disa këndëshikimi, është ndalur tek Mjeda, si një politikan – deputet dhe veprimtarin e tij për t’i shërbyer çështjes Kombëtare. Në vijim të këtij aktiviteti foli poeti i shquar Ministri i Kulturës zoti Visar Zhiti, ish i burgosur politik, duke u shprehur se : “Puna e studiuesit të njohur shkodran Mentor Quku-t, është një vepër që e ka lartësuar poetin, albanologun, politikanin e klerikun Mjeda, në majët me të larta të albanologjisë.”
Gjithashtu, Ministri i Kulturës Visar Zhiti, premtoi që brenda një kohe të shkurtër, tryeza e Mjedës do kthehet në vendin e vet, si u shpreh ai” aty ku peshon me tepër në Shtëpin-Muze të poetit lirik Mjeda në Kukël.”
Akademiku Kolec Topalli, që njihet si një nga përfaqësuesit më të shquar të albanologjisë, në Shqipëri, lëshoi kumtin rreth serisë monografike “Mjeda” më temën: “Dom Ndre Mjeda dhe pasurimi i gjuhës shqipe” . Prof. Koleci, me këtë rast lexoi dhe letrën përshëndetëse të Prof. Ardian Marashi-t Drejtorit te QSA, i cili për shkak të obligimeve nuk ndodhej në Shqipëri.
Në vazhdim të këtij aktiviteti shumë të bukur, sipas programit fjala ju dha studiuesit të talentuar Dr. Gazmend Krasniqi-t, i cili u kthye në Kukël mbas një periudhe 30-vjeçare, dhe lexoi kumtesën më temën: “Një studiues i identifikuar më objektin”.
Në mesin e folësve, ishte dhe Dr. Virion Graçi nga QSA, me kumtesën e tij me temën: “Ringjallja tokësore e Dom Ndre Mjedes”. Ndërkohë, që tudiuesi i njohur i Fishtës, krijuesi i shkencës më të re albanologjike – Fishtollogjisë, Dr. Tonin Cobani, mbajti një kumtesë më një temë mjaft interesante, ku u ndal në disiplinën shkencore Mjedologjin më temën: “Mjedollogjia e Mentor Quku-t si provokim”.
Prof. Dr Begzad Baliu, nga Universiteti i Prishtinës, kishte dërguar kumtesën me titull: “Nga mjedologjia te institucioni i saj”.
Në veprimtarin kushtuar Mjedës, në Kukel, e mori fjalën edhe studiuesia suksesshme, pedagogia veterane dhe e palodhur të Univeristetit të Shkodrës “Luigj Gurakuqi” Prof. Dr. Fatbardha Hoxha, e cila doli para të pranishmeve me kumtesën me temë : “Personaliteti dhe vepra e Mjedës në kolanën e Mentor Quku-t” . Profesoresha Hoxha, u ndal kryesisht ne Bibliografinë e përdorur nga Mentor Quku, si dhe bëri kërkesë publike drejtuar përfaqësueseve të qeverisjes që studiuesit Mentor Quku-t, ti jepej vlerësimi më titullin “Mjeshtër i Madh”.
Një tjetër pedagoge e Universitetit të Shkodrës, ishte dhe Dr. Elinda Ramdani shefe e katedrës së Letërsisë, një studiuese e re, e cila referoi me temën: “Binomi Mjeda -Quku kontribute dhe risi” ku ndër të tjera u shpreh se – :”studiuesi Mentor Quku, është mëshiruar më Mjedën, Ai në çdo qelize të tij ka Mjedë-n dhe vetëm një studiues i tillë mund ta studioi aq shumë dhe mund të shkruaj aq bukur më aq finesë, përkushtim e dashuri, për poetin tonë kombëtar.” u shpreh Dr. Elinda Ramdani.
Dhe si “qershia për mbi tortë” ishte fjala e studiuesit të njohur shkodran, zotit Quku, i cili duke mbyllë ketë aktivitet ri-solli të përjetësuar thënjen e Mjedës” Ma mirë me kenë se mu dukë”. Professor Quku, me thjeshtësinë dhe modestin që e karakterizon, atë u shpreh me këtë rast se – ai ndjehet i nderuar që studiuesit e vlerësojnë punën dhe veprën e tij – Ai kërkoi që kjo punë studimore e nisur prej tij , nuk duhet te vlerësohet vetëm sot, por duhet të punohet dhe në të ardhmen, kur studiuesit do të thellohen edhe me tepër në punën studimore, të nisur prej tij për Mjedën.
Studiuesi i palodhur Mentor Quku dhe pse punoi 40-vite për gjeniun e letrave Shqipe, ende nuk e quan punën e tij të përfunduar, mbasi ai “fsheh” disa projekte të tjera ambicioze të cilat e presin Kishën dhe Shtepinë Muzeore të Mjedës, që në një të ardhme jo të largët të kthehen në Qendër Studimore për studiues shqiptare e të huaj.
Këtë e ka pohuar edhe kleriku dhe atdhetari të shquar, për fe e atdhe Dom Anton Kçira, i cili për shumë vite më radhë punoj dhe udhëhoqi pa u lodhur në famullinë e më të madhe shqiptare në Shtetet e Bashkuara, atë të Shën Palit në Rochester – Detroit, teksa thotë se :” Sikur të mos ishte Mentor Quku, nuk do ishte nxjerr në pah madhështia e figurës së Mjedës, ashtu siç kanë mbetur në pluhurin e harresës shumë figura të tjera të cilat presin të mëshirohen nga studiuesit te rinj”.