Archives for April 2016

Një histori Ilire në Shkup

April 17, 2016 by dgreca

Gazetari i Top Channel dhe autori i emisioneve “Shqipëria tjetër”, ka tronditur Maqedoninë me emisionin e tij të radhës: ”Shkupi, një histori Ilire”

Mema u ndal tek Shkupi dhe nga fakti sesi aty janë kryer investimet – nga ana e shqiptare dhe ajo e banuar nga maqedonas.

Investimi dhe falsifikimi i historisë e bën dallimin në mes Shkupit shqiptar dhe Shkupit maqedonas.

”Shkupi, një histori Ilire” nxjerr disa sekuenca nga emisioni të filmuara me kamerë amatore, ku Mema dhe ekipi i tij kontrollohen nga Policia dhe nga njësiti special “Alfa”.Mema ka thënë se ka shumë të vërteta që emisioni do ti zbulojë.

“Novosti”: Serbia në alarm për rishfaqje të AKSH-së në Kosovë

April 17, 2016 by dgreca

Serbët e Kosovës janë të brengosur, pas një riviste të pjesëtarëve të Armatës Kombëtare Shqiptare, të armatosur deri në dhëmbë, të cilët kanë bërë thirrje për mobilizim të anëtarëve të saj, për të “mbrojtur interesat kombëtare”, shkruan sot “Novosti” i Beogradit.

Drejtori i Zyrës për Kosovën në Qeverinë e Serbisë, Marko Gjuriq, duke reaguar nga kësaj paraqitjeje të saj, i tha kësaj gazete se KFOR-i dhe komuniteti ndërkombëtar duhet të ofrojnë garanci se këso dukurish në, siç citohet të ketë thënë ai, krahinën tonë jugore nuk do të ndodhin.

“Do të bisedojmë me përfaqësuesit e komunitetit ndërkombëtar, para së gjithash me përfaqësuesit e KFOR-it, meqë shfaqja e grupeve të tilla të armatosura është e palejueshme”, citon “Novosti Gjuriqin.

Pas disa muajsh, kur sipas medieve në gjuhën shqipe të Kosovës u shfaqën në segmentin e rrugës Prishtinë – Podujevë dhe Prishtinë – Mitrovicë, pjesëtarë të armatosur të Armatës Kombëtare Shqiptare janë tubuar para disa ditësh në rajonin e Mitrovicës, me ç’rast “komandanti” anonim i kësaj organizate ilegale ka akuzuar “strukturat paralele serbe” në Mitrovicë se po torturojnë shqiptarët dhe se nuk po i lejojnë të kthehen në shtëpitë e veta. Serbët posaçërisht i ka shqetësuar deklarata e njërit nga “liderët”, i cili ka thënë se pjesëtarët e AKSH-së janë të organizuar dhe mirë të stërvitur që “shumë shpejt edhe të mobilizohen”

“Komuniteti ndërkombëtar, që është përgjegjës për sigurinë në Kosovë, duhet me urgjencë të reagojë dhe të ndalë vringëllimat e tilla me armë dhe kërcënimet e shqiptarëve të armatosur. Prandaj i bëjmë thirrje komunitetit ndërkombëtar, para së gjithash KFOR-it, që është përgjegjës për sigurinë në Kosovë e Metohi, që të mos i mbyll më sytë para kërcënimeve të hapura të shqiptarëve dhe të mos tolerojë armatosjen dhe organizimin e tyre me qëllim të shkaktimit të trazirave”, cition “Novosti” kryetarin e Mitrovicës veriore, Goran Rakiqin.

Dhe ndërsa tërheq vërejtjen se rivista e shqiptarëve të armatosur përbën dëshminë se në Kosovë vazhdon të ketë sasi të madhe armesh ilegale, Rakiq përmend shqetësimin shtesë për shkak të thirrjes së pjesëtarëve të kësaj organizate ilegale për mobilizim, që mund të provokojë destabilitet dhe përshkallëzim të dhunës, shkruan kjo gazetë.(Sipas Bota Sot)

Qytetarët e Kosovës dhe Maqedonisë kalojnë kufirin me letërnjoftime

April 17, 2016 by dgreca

Në njoftim thuhet se në hapësirën ndërmjet pikës së kalimit kufitar të Hanit të Elezit dhe Bllacës, është mbajtur ceremonia për hyrjen në fuqi të Marrëveshjes ndërmjet Qeverisë së Republikës së Kosovës dhe Qeverisë së Republikës së Maqedonisë, për kushtet e udhëtimit me letërnjoftime për shtetasit e të dy vendeve.

Zëvendësministri i Punëve të Brendshme i Kosovës, Valdet Hoxha,theksoi se sot me këtë ceremoni po formalizohet në praktikë realizimi i marrëveshjes për kushtet e udhëtimit me letërnjoftime për shtetasit e të dy vendeve.

Ai ka shtuar se ky bashkëpunim po bëhet me qëllim të shërbimit të politikave lehtësuese në frymën e bashkëpunimit rajonal dhe më gjerë.

Ndërsa, zëvendësministri i Punëve të Brendshme të Maqedonisë, Agim Nuhiu, tha se kjo tregon për bashkëpunimin e vendosur dhe të institucionalizuar bilateral ndërmjet të dyja vendeve.

Ai ka shtuar se me fillimin e funksionalizimit e marrëveshjes do të ketë lehtësim të udhëtimit për qytetarët e të dyja vendeve, duke i marrë parasysh edhe lidhjet e afërta tradicionale, familjare dhe miqësore, si dhe nevoja për kalim më të shpeshtë të kufirit të personave të zonës kufitare, thuhet ndër të tjera në komunikatën e Ministrisë së Punëve të Brendshme të Kosovës.

Klasa politike, helmi i shoqërisë shqiptare

April 17, 2016 by dgreca

Nga Aurenc Bebja, Francë/*

Në Lindje apo Perëndim, përveç konflikteve gjeopolitike, feja në raste të shumta është faktor ndarës i shoqërive duke vështirësuar kështu bashkëjetesën mes tyre. Shqipëria, ky komb i vjetër evropian, deri tani mbetet shembulli më i mirë i bashkëjetesës fetare, por fatkeqësisht ka një problem tepër të madh me politikën, më saktësisht me klasën e saj politike, e cila çdo ditë përçan qytetarët e saj dhe u shuan shpresat për një jetë më të mirë.

Me gjithë ndërhyrjen e diplomatëve evropianë dhe amerikanë, Shqipëria bie në sy për politikën e saj të çrregullt e të çorientuar, që i ngjan më shumë një kopjeje sesa një modeli politik perëndimor. Politikanët shqiptarë, vullnetarisht ose jo, dallojnë se duan t’i vënë barriera progresit, zhvillimit dhe stabilitetit të vendit, me qëllim që të qëndrojnë sa më gjatë të jetë e mundur në karriget (kolltuqet) e tyre politike dhe kështu të kënaqin egot personale.

Është interesante të analizosh sjelljen e kandidatëve para dhe pas zgjedhjeve politike. Gjatë fazës ‘parazgjedhore’, ata/ato sillen si « engjuj » të vërtetë, të cilët i duan të mirën popullit, por në fazën ‘paszgjedhore’, demonët e tyre të vjetër rishfaqen dhe kështu ata/ato heqin maskat dhe bëhen « djaj ». Harrojnë premtimet e tyre elektorale, shpërfillin qytetarët dhe i distancojnë nga jeta politike. Fatkeqësisht, konsultimi apo debati publik në lidhje me projekte madhore apo çështje që prekin interesat e shoqërisë civile nuk janë të demokratizuar.

« Divide ut imperes » është një « formulë » e aplikuar në mënyrë perfekte në Shqipëri. Politika është e përhapur në të gjithë shoqërinë, si në shtresën e varfër dhe atë të pasur, si në klasën punëtore dhe atë intelektuale, si në mjedisin privat dhe atë publik. Klasa politike postkomuniste, si ajo komuniste dikur, ka arritur të infiltrohet në familjet shqiptare, qofshin ato në qytetet e mëdha apo në fshatrat më të izoluar të vendit. Qëllimi i saj është sigurimi i votës, por edhe krijimi i një lloj vartësie politike, e cila u mundëson të manipulojë më lehtë qytetarët.

Në disa raste, politikanët shqiptarë shkojnë më tej në mendimet e tyre politike. Gjatë muajit mars 2016, anëtarët e një partie në pushtet deklaruan së vinin partinë mbi Shqipërinë. Këto dalje publike tregojnë qartësisht dëmin që krijon politika në një shoqëri ende në tranzicion. A mund të ketë Shqipëria një të ardhme të sigurtë, kur klasa politike udhëheqëse mban apo toleron të tilla fjalime (qëndrime) ? A mund të kemi besim në udhëheqësa të tillë dhe a duhet që shqiptarët të vazhdojnë t’i mbështesin ?

Përsa i përket udhëheqësve të lartë politikë të vendit, shtypi i shkruar dhe televiziv evokuon shpesh akuza korrupsioni, krimi apo abuzimi me pushtetin, por si zakonisht, asnjeri nuk dënohet. Duket sikur sistemi policor (prokuror) dhe gjyqësor janë të « paralizuar », domethënë të paaftë të reagojnë ndaj politikanëve.

Cfarë të themi për seancat e të enjtes në Parlament (Kuvend), vend i cili është transformuar prej kohësh në teatrin e komedianëve « të talentuar », në cirkun e kllounëve, ku pjesmarrësit « shquhen » vetëm për skenat e turpshme të komunikimit. Aty, deputetët, të cilët kanë në dorë fatin e popullit, prodhojnë debate sterile, domethënë flasin por nuk dëgjojnë, shahen dhe akuzohen me njëri me tjetrin për çështje nga më të rëndat, pa propozuar apo gjetur rrugëzgjidhje për programin (premtimet) që janë votuar.

Si rrjedhojë, populli shqiptar, edhe pse e ka votuar apo rivotuar ndër vite këtë klasë politike, mbetet si gjithmonë viktima kryesore e saj. Shqiptarët nuk e kanë gjetur akoma antidotin i cili do t’i shpëtojë nga helmi apo virusi i kësaj lloj « specie » politikanësh. Duke shpresuar që vendi i shqiponjave të gjejë në një ditë sa më të afërt një lider të ri apo lidere të re politike, përse jo si kryeministri i Kanadasë, Justin Trudeau, i cili do të dojë dhe do të dijë të motivojë, të krijojë besim në popull, dhe të ketë vullnetin e plotë për t’a nxjerrë atë nga situata në të cilën ndodhet.

France– 17 Prill 2016

Burimi : http://www.darsiani.com/opinion/(E dergoi per DIELLIN autori)

SHQIPËRI-ITALI, FESTË NË LAC

April 17, 2016 by dgreca

*FESTOHET 25-VJETORI I KRIJIMIT TË SHOQATËS KOMBËTARE TË MIQËSISË E BASHKËPUNIMIT SHQIPËRI-ITALI/

*Në Laç-Kurbin, ishte një delegacion i ShShASh “Papa Klementi XI-Albani”, Suedi/

Nga: MURAT GECAJ/

1.Nuk është hera e parë që përfaqësues të Shoqatës së Shkrimtarëve dhe Arstitëve Shqiptarë “Papa Klementi XI-Albani”, Suedi, bëjnë vizitë në Shqipëri. Kësaj here, ata kishin edhe një motiv më shumë për ta bërë këtë gjë, pra sollën me vete dy libra të rinj. I pari është vepra “Thesar Kombëtar i Mërgatës Shqiptare në Suedi”, Nr.4 dhe Vepra-1 (Vlerësime, Opinione, Intervista e Recensione”, me autor Hysen Ibrahimin. Kopje të këtyre veprave ata lanë në Bibliotekën kombëtare e ua dhuruan mjaft lexuesve, si në Tiranë e Durrës dhe, sidomos, në qytetin e Laçit.

Pasi bënë vizita e takime të vlefshme dhe me interes në kryeqytetin Tiranë, ditën e djeshme ata ishin të ftuar dhe pjesëmarrës në festën e bukur, që u organizua në Laç-Kurbin, me rastin e 25-vjetorit të krijimit të Shoqatës Kombëtare të Miqësisë e Bashkëpunimit Shqipëri-Itali, me president Nikollë Lleshin. Në delegacionin e ShShASh “Papa Klementi XI-Albani”, ishin kryetari i saj, Hysen Ibrahimni dhe juristja Saranda Iseni, ardhur posaçërisht nga Suedia, si dhe “Anëtarë-Nderi” të kësaj Shoqate, prof.Murat Gecaj e shkrimtari i mirënjohur Viron Kona.

2.Në veprimtarinë, që u organizua në sallën kryesore të Pallatit të Kulturës së Laçit, ishin të pranishëm anëtarë të Shoqatës Kombëtare të Miqësisë e Bashkëpunimit Shqipëri-Itali, si dhe të ftuar nga disa rrethe të vendit, si Tirana, Vlora, Durrësi, Lezha, Shkodra etj. Ndër ta, ishin edhe kryetari i Bashkisë së Kurbinit, Artur Bardhi dhe kryetarja e këshillit bashkiak, Edlira Lleshi; ish-drejtori i Teatrit Kombëtar të Operas e Baletit, Zhani Ciko; presidenti i Federatës Shqiptare të Futbollit, Armando Duka; zv.drejtori i TVSH, Engjell Ndocaj; ish-kryetari i parë i kësaj Shoqate, Ylli Malaj, Padre Gjovani, famulltar i Milotit etj

Për udhën 25-vjeçare të kësaj Shoqate foli presidenti i saj, Nikollë Lleshi, i cili u ndal shkurtimisht në veprimtaritë kryesore, që janë zhvilluar. Gjithashtu, shfaqi mendime për përmirësimin e punës në të ardhmen. Ndër të tjera, ngriti shqetësimin për ngritjen e shkollave në gjuhën amtare për fëmijët e emigrantëve shqiptarë në Itali, për vazhdimin e botimit të revistës “Miqësia”, me kryeredaktor Vlash Prendin etj. Në mbyllje, ai falënderoi të gjithë bashkëpunëtorët dhe sponsorët, të cilat janë ndodhur kurdoherë pranë Shoqatës së tyre.

Pjesë e rëndësishme e kësaj veprimtarie festive ishte shpërndarja e “Mirënjohjeve” dhe e dëshmive për “anëtarët e nderit”, që janë pranuar në këtë Shoqatë, kohët e fundit. Kështu, me ceremoni iu dorëzuan dokumentet përkatëse: Saranda Isenit, Zhani Cikos, Amando Dukës etj., të cilët e falënderuan përzemërisht kryesinë e Shoqatës Kombëtare të Miqësisë e Bashkëpunimit Shqipëri-Itali, për nderin që iu bë.

Sipas programit, që e drejtoi Isuf Myrtaj, në vazhdim, kjo festë u gjallërua dhe u bë më të gëzueshme nga këngët e vallet e bukura popullore. Ato u luajtën me shkathtësi e bukuri nga djem e vajza, por dhe të moshuar të ansamblit amator të krahinës së Kurbinit.

3.Me mjaft interes ishte, për një pjesë të pjesëmarrësve në këtë veprimtari mbresëlënëse, sidomos për mysafirët nga Suedia, vizita në lartësinë e malit mbi qytetin e Laçit, ku ndodhet kisha e lashtë dhe e njohur e Delbnishtit. Unë, Vironi e Martini e falënderojmë përzemërsisht Pjetër Nikollën, si për shoqërimin me mjetin e tij dhe shpjegimet e bëra gjatë udhës, për historinë e kësaj ane të malësisë së Kurbinit. Ashtu si gjatë tërë kësaj feste, por sidomos aty, u bënë filmime dhe fotografi të përbashkëta, që do të mbeten kujtim i paharruar. Simbolikë e bukur ishte çasti, kur Hysen Ibrahimi dhe Saranda Iseni mbollën një ulli, në oborrin e kësaj kishe.

Pas zbritjes në qytet, kryesia e Shoqatës mikpritëse shtroi një drekë në mjediset e Hotel-Restoranit “Ambasador”, që u sponsorizua nga pronari Sandër Ndoci.

Të gjithë të ftuarit u larguan nga qyteti i Laçit, pra dhe mysafirët nga Suedia, të mbushur me kënaqësi, emocione dhe me falënderime për organizatorët dhe tërë mbështetësit e kësaj veprimtarie mbresëlënëse, me rastin e 25-vjetorit të krijimit të Shoqatës Kombëtare të Miqësisë e Bashkëpunimit Shqipëri-Itali.

Tiranë, 17 prill 2016