Archives for June 2016

Përkrahje për zhvillimin e agroturizmit në Istog

June 9, 2016 by dgreca

-Kryeministri Mustafa: Projekt që nxjerr në pah vlerat dhe bukuritë që i ka Komuna e Istogut/

-Përfaqësuesi i BE-së, Zhbogar: Dëshmohen efektet e asistencës së BE-së në Komunën e Istogut/

ISTOG, 9 Qershor 2016 – Gazeta DIELLI-B.Jashari/ Kryeministri i Republikës së Kosovës, Isa Mustafa, mori pjesë në ceremoninë inauguruese të projektit “Mbështetja e agroturizmit, bizneseve dhe zhvillimit ekonomik në Istog”.Të pranishëm në këtë ngjarje ishin shefi i Zyrës së BE-së në Kosovë / përfaqësues Special i BE-së, Samuel Zhbogar, kryetari i Komunës së Istogut, Haki Rugova, zëvendësministri i Mjedisit dhe Planifikimit Hapësinor, Mendim Rugova dhe qytetarë të shumtë të Istogut dhe më gjerë.

Kryeministri Mustafa tha se ky projekt nxjerr në pah vlerat dhe bukuritë që i ka Komuna e Istogut.

“Është një projekt shumë i rëndësishëm, një projekt shumëdimensional që qet në pah vlerat turistike dhe bukuritë natyrore të veçanta që i ka Istogu dhe Kosova, që qet në pah bukuritë dhe mrekullitë njerëzore, sepse ata krijojnë këtë mrekulli dhe e mbajnë atë dhe këta janë qytetarët e kësaj ane. Por, po ashtu edhe njerëzit shumë punëtorë të cilët i kanë shfrytëzuar mjetet e këtij projekti për bujqësi dhe produkte bujqësore, të cilat i pamë ne sot këtu dhe që është një iniciativë shumë e rëndësishme për ne. Ky projekt flet edhe për një perfeksionim të detyrave, të punimeve dhe të objektivave tona, sepse deri më tani jemi marrë me ndërtimin e rrugëve, trotuareve, ndriçimit, të infrastrukturës shkollore, kulturore dhe Istogu ka bërë një përparim tepër të madh, por sot po kulmojmë me një projekt shumë të bukur”, tha kryeministri.

Kryeministri Mustafa ftoi qytetarët e Kosovës, por edhe të vendeve fqinje që të vizitojnë Istogun dhe të shikojnë bukuritë dhe natyrën e bukur të kësaj komune.

“Uroj që qytetarët ta përdorin dhe ta shfrytëzojnë sa më shumë këtë stazë dhe këto bukuri natyrore, të cilat janë edhe të shëndetshme edhe relaksuese, por janë edhe produktive për zhvillimin tonë ekonomik dhe social”, tha kryeministri Mustafa.

Shefi i Zyrës së BE-së në Kosovë / Përfaqësues Special i BE-së, Samuel Zhbogar, tha se me këtë projekt po dëshmohen efektet e vërteta të asistencës së BE-së në Komunën e Istogut.

“Ky projekt të cilin e ka mbështetur Zyra e BE-së me gati 400 mijë euro, është një prej shembujve të shumtë të asistencës tonë për zhvillimin ekonomik të regjioneve të ndryshme të Kosovës. Përmes tij, BE-ja ka mbështetur mjedisin biznesor dhe potencialin e agroturizmit që ka Istogu, zhvillimin ekonomik dhe gjenerimin e vendeve të punës në ato vende në të cilat ka pasur investime më të vogla”, tha Zhbogar. Kryetari i Komunës së Istogut, Haki Rugova, e vlerësoi të rëndësishëm këtë projekt për Komunën e Istogut.

“Shpreh kënaqësinë time për një projekt i cili jo vetëm që më ka bërë krenar mua si kryetar komune, por kam përshtypjen se i ka bërë krenarë gjithë qytetarët e Istogut, sepse po e shoh çdo ditë frekuentimin e kësaj pike të rëndësishme të Komunës së Istogut, që ka qëllim të promovoj edhe vlerat turistike të Istogut, por edhe të promovoj bizneset, të promovoj zhvillimin e agrokulturës dhe produkteve çfarë i ka në potencial Komuna e Istogut”, tha kryetari Rugova, duke falënderuar kryeministrin për përkrahjen e vazhdueshme për Komunën e Istogut.

Drejtori Ekzekutiv i Organizatës “Syri i Vizionit”, Veton Mujaj, tha se qëllimi i këtij projekti ka qenë që të bëhet e mundur që vizitorët të qëndrojnë sa më shumë në Istog, që të përfitojë ekonomia lokale, të ndihmohen bizneset dhe fermerët, që produktet e tyre të bëhen më konkurrentë në treg.

“Ne kemi intervenuar edhe në infrastrukturë, që ka gjeneruar lidhshmëri mes ofertave të ndryshme turistike dhe që ka bërë që vizitorët të kenë qëndrim interesant në Istog. Kemi bërë shumë për të përkrahur dhe promovuar produktet dhe shërbimet lokale, përfshirë këtu edhe gjenerimin e punësimit”, tha Mujaj.

“RRUGA” GREKE DHE QORRSOKAKU SHQIPTAR

June 9, 2016 by dgreca

-Analizë lidhur me vizitën e këtyre ditëve të Ministrit të Jashtëm të Greqisë në Shqipëri/

Dr. Islam LAUKA/

Ish Drejtor i Përgjithshëm në Drejtorinë e Organizatave Ndërkombëtare në MPJ të Shqipërisë, Ish ambasador i Shqipërisë në Kosovë./

Vizita dyditore e Ministrit te Jashtëm të Greqisë, Nikos Kotzias, në Shqipëri, u përmbyll. Nuk mund të pretendohet që një vizitë e këtij niveli t’i japë zgjidhje gjithë problematikës së marrëdhënieve dypalëshe midis Shqipërisë dhe Greqisë, të grumbulluar ndër vite. Megjithatë, nuk mund të mos shtrohet pyetja se çfarë u arrit konkretisht gjatë këtyre dy ditëve, a u zgjidh ndonjë prej problemeve të mbetura pezull, ose të paktën, a pati lëvizje në ndonjë prej tyre?

Në konferencën e shtypit, të dy ministrat folën për “paketë zgjidhjesh të problemeve dypalëshe”. Ministri Bushati shkoi edhe më tej, duke përmendur krijimin e “mekanizmave të përbashkët” të zgjidhjes së tyre, pa e sqaruar se çfare përfaqësojnë këto mekanizma. Në mënyrë të veçantë, ai u ndal tek “harta e rrugës” që, duket, se ai e mendon si instrumentin çudibërës për t’u dhënë fund problemeve në marrëdhëniet midis dy vendeve tona.

Politikanë e analistë pro qeverisë u shprehën të entuziasmuar se “për herë të parë, Shqipëria u paraqit para palës greke me dosje të plotë”. Të habitur edhe vetë më “guximin” që “ia zbrazën grekut të gjitha në tavolinë”, drejtuesit tanë të politikës e të diplomacisë filluan të zihen me njëri tjetrin se kush ishte i pari që ia “zbrazi problemet grekut”, jo vetëm në Tiranë, por edhe në mes të Athinës, jo vetëm sot, por që para 15-20 vitesh.

Ndërkohë, “patatet e nxehta” midis dy vendeve tona, pavarësisht “trimërisë dhe mençurisë” së drejtuesve tanë të lartë shtetërorë, mbetën siç kanë qenë, pa u ftohur. Pas 76 vjetësh, Athina zyrtare ende mban në fuqi ligjin absurd të luftës me Shqipërinë. Camët nuk mund të lëvizin lirisht për të shkuar në trojet e tyre autoktone, në Greqi. Po përfundon afati 20 vjeçar i Traktatit të Miqësisë dhe Bashkëpunimit midis Shqipërisë dhe Greqisë dhe komisionet e parashikuara për çështjet e pronësisë, për ujërat kufitare, për arsimin etj. ose nuk u ngritën fare, ose edhe ato që u ngritën, nuk funksionuan kurrë.

Tani, Ministri ynë i Jashtëm, Ditmir Bushati, na ofron çelësin magjik të “hartës së rrugës”. Në fakt, ky çelës, nuk është i panjohur. Është përdorur, tash 60 e sa vjet, në konfliktin midis Palestinës dhe Izraelit, por pa sukses. Ka 25 vjet që Athina po e përdor për të gjetur zgjidhjen e problemit të emrit me Maqedoninë, përsëri pa sukses. Në vitin 2007, Moska zyrtare e pati ofruar çelësin e ndryshkur të “hartës së rrugës” si alternativë ndaj pavarësisë së Kosovës.

Në të gjitha këto raste, “harta e rrugës” është sinonim i qorrsokakut, i bllokimit apo zvarritjes pa fund të zgjidhjes së problemeve. Në rastin e marrëdhënieve shqiptaro – greke, qorrsokaku është për palën shqiptare, sepse Greqia ka vazhduar e vazhdon në “rrugën” e vet, në mbrojtje të interesave të saj, kombëtare e shtetërore. Siç i mbron çdo shtet serioz.

Në takimin që pati me drejtuesit me të lartë shtetërorë, por edhe me opozitën, Ministrit Kotzias i’u kërkua me “guxim” që “t’i adresojmë çështjet dypalëshe pa paragjykime” dhe që midis Shqipërisë e Greqisë “të rriten raportet e besimit”. Sikur ligji i luftës ekzistuaka, tash 76 vjet, për shkak të paragjykimeve greke ndaj Shqipërisë, apo të mungesës së raporteve të besimit midis dy vendeve tona!!!

Përtej këtyrë hamendjeve naive, duhet kuptuar që, nga ana e Athinës, ligji i luftës nuk mbahet kot në fuqi. Ekziston një interes i qartë dhe tejet i rëndësishëm politik dhe ekonomik, i Greqisë për të mos e hequr atë. Ky interes ka të bëjë me sekuestron konservative mbi pronat e shqiptarëve çamë në Greqi, që kapin shifrën e rreth 10 miliardëve euro; me mohimin e të drejtave e lirive themelore të çamëve, individuale dhe kolektive, si grup etnik, midis të cilave edhe atë për t’u kthyer në trojet e tyre në Greqi.

Interesi ynë shtetëror, ekonomik dhe politik, jo vetëm nuk përputhet me atë grek, por është në kundërshtim me të. Kjo është e vërteta dhe ajo u duhet thënë hapur grekëve. Me eufemizma nuk mund të mbrohen interesat kombëtare dhe shtetërore. Ministri Kotzias nuk iu referua ndonjë eufemizmi, kur në takimin me studentët e Universitetit të Tiranës, deklaroi se rruga e Shqipërisë për në BE kalon nga Athina dhe se nuk duhen nënvlerësuar mundësitë dhe intrumentet që, ende, i disponon Greqia. Përse Athina paska të drejtë t’i mbrojë interesat e veta, kurse ne nuk paskemi të drejtë t’i mbrojmë interesat tona? Nuk paska Shqipëria asnjë mundësi apo instrument që ta shfrytëzojë në favor të interesave të veta? Natyrisht që ka. Midis të tjerash, e drejta ndërkombetare dhe praktika e saj janë në anën tonë. Por instrumenti ynë kryesor është çlirimi nga ndjenja e inferioritetit ndaj Athinës, jo me fjalë, por me vepra.

Në këtë kuadër, duket se është i pamjaftueshëm “guximi” për “t’ua zbrazur grekëve në tavolinë problematikën e marrëdhënieve tona”. Është e domosdoshme që të jemi të vendosur në veprime. Në kushtet kur Traktatit të mëparshëm të Miqësise dhë Bashkëpunimit po i përfundon afati, ripërtëritja e tij ose nënshkrimi i një traktati të ri, nuk duhet bërë, pa vënë kushtet tona, të cilat duhet të jenë konkrete dhe të formuluara qartë – heqjen e ligjit të luftës dhe shfuqizimin e të gjitha akteve ligjore e normative që kanë rrjedhur prej tij; njohjen e cështjes çame si çështje e pazgjidhur e një grupi etnik, e krijuar si pasojë e dëbimit kolektiv të popullsisë shqiptare nga trojet e veta në Greqi, mbi bazën e akuzave të fabrikuara për “bashkëpunim më fashizmin”.

Jashtë këtij qëndrimi, ka rrezik që dy vendet tona të përsërisin historinë – Greqia të vazhdojë në “rrugën” e mbrojtjes pa kompromis të interesave të saj, ndërsa Shqipëria, ashtu si deri më tani, në qorrsokakun e vet.

Kosova: Kusht për Asociacionin, shuarja e strukturave të mbetura paralele të Serbisë

June 8, 2016 by dgreca

-Ministrja Tahiri edhe një herë ka përsëritur qëndrimet e qeverisë së Republikës së Kosovës që dialogu i Brukselit duhet të përmbyllet me njohjen reciproke mes dy shteteve para se secila të anëtarësohet në BE/

–Takim në Bruksel me drejtoren Angelina Eichhorst në Shërbimin e Jashtëm të Bashkimit Evropian/

Bruksel, 8 Qershor 2016/ Ministrja kosovare për Dialog, Edita Tahiri, është takuar sot në Bruksel me Angelina Eichhorst, drejtore për Evropën Perëndimore, Ballkanin Perëndimor dhe Turqinë në Shërbimin e Jashtëm të Bashkimit Evropian.Në këtë takim, thekson njoftimi i dërguar, ministrja për Dialog ka diskutuar për bllokadat që Serbia po ia bënë zbatimit të marrëveshjes për kodin telefonik shtetëror të Kosovës, për nisjen e punës së KOSTT-it si sistem i pavarur i transmisionit të energjisë si dhe vonesat e dukshme për heqjen e barrikadës dhe revitalizimin e Urës mbi lumin Ibër të Mitrovicës. Ajo po ashtu ka folur për angazhimet e Kosovës për të zbatuar marrëveshjet e Brukselit, duke thënë se Kosova ka përmbushur të gjitha obligimet zbatuese dhe do të vazhdojë të jetë e përkushtuar, mirëpo pa u hequr bllokadat që Serbia po ia bënë këtij procesi nuk mund të ketë progres në zbatimin e marrëveshjeve. Ajo në veçanti theksoi se Kosova pa e marrë kodin telefonik shtetëror dhe pa filluar KOSTT të veprojë i pavarur nuk do të ndërmarrim asnjë veprim zbatues në lidhje me Asociacionin dhe se kusht për Asociacionin është shuarja e strukturave të mbetura paralele të Serbisë në Kosovë.

Ministrja Tahiri në takim ka theksuar po ashtu se dialogu i Brukselit ka ndihmuar për arritjen e Marrëveshjes së Stabilizim Asociim mes Kosovës dhe BE-së dhe rekomandimin e BE-së për liberalizimin e vizave duke falënderuar BE-në për angazhimet në dialogun e Brukselit që po i shërben paqes dhe stabilitetit në rajon dhe fqinjësisë së mirë.

Ministrja Tahiri edhe një herë ka përsëritur qëndrimet e qeverisë së Republikës së Kosovës që dialogu i Brukselit duhet të përmbyllet me njohjen reciproke mes dy shteteve para se secila të anëtarësohet në BE.

Ministrja Tahiri më foli gjerësisht për arritjet e Kosovës në zbatimin e marrëveshjeve duke përfshirë marrëveshjen për drejtësi me të cilën Kosova po shtrinë sistemin e vet unitar të drejtësisë në veri të vendit të munguar një kohë të gjatë, për shuarjen e të ashtuquajturës ‘mbrojtja civile’ dhe integrimin e ish personelit në sistemin e Kosovës, etj.

Në veçanti, ministrja Tahiri ngriti shqetësimet për ngecjet në heqjen e barrikadës dhe revitalizimin e urës së Ibrit për të cilin tha se nuk është duke u vërejtur progres i dukshëm për shkak të pengesave të Serbisë. Serbia, tha ajo, po arrin që madje ta pengoj edhe BE-në përkatësisht zyrën e BE-së në Kosovë e cila është e autorizuar që të realizoj heqjen e barrikadës dhe ta revitalizojë urën e Ibrit për të krijuar kushtet e lëvizjes së lirë për të gjithë. Ministrja Tahiri theksoi se Serbia po vazhdon me obstruksione duke mos e lejuar kryetarin e komunës veriore të Mitrovicës që ta nënshkruajë memorandumin e mirëkuptimit me Ministrinë e Ambientit dhe Planifikimit Hapësinor me të cilin konfirmohet se linja administrative në mes të komunës jugore dhe asaj veriore të Mitrovicës është në përputhje me hartat dhe zonat kadastrale të definuara sipas planit të Ahtisaarit.

Ndërsa, për regjistrimin e popullsisë në katër komunat veriore të cilat nuk kanë marrë pjesë në regjistrimin e vitit 2011, e që është paraparë të mbahet në muajin tetor 2016, ministrja Tahiri kërkoi nga BE që të sigurojë mosndërhyrjen e Serbisë në pengimin e këtij procesi, për të cilin qeveria kosovare ishte dakorduar me kryetarët e komunave të veriut në fillim të vitit 2014 në takim të përbashkët ku kanë marrë pjesë edhe ambasada amerikane dhe zyra e BE-së në Kosovë.

Drejtoresha Angeline Eichhorst nga ana e saj theksoi se Bashkimi Evropian po përcjellë me vëmendje zhvillimet në procesin e dialogut të Brukselit si dhe është e ndërgjegjshme për pengesat dhe sfidat e këtij procesi sidomos ato të periudhës së fundit. Ajo tha më tej se për arsye të zhbllokimit të procesit të zbatimit ka qëndruar në një vizitë në Beograd me ç’rast me autoritetet e Serbisë ka diskutuar për të gjitha çështjet si dhe ka kërkuar angazhime nga Serbia për të zbatuar obligimet nga dialogu i Brukselit. Eichhorst siguroi Tahirin se Bashkimi Evropian do të vazhdojë të këmbëngulë në zbatimin e marrëveshjeve duke potencuar se Bashkimi Evropian e sheh dialogun mes Kosovës dhe Serbisë jo vetëm në interesin e fqinjësisë mes vendeve por edhe në dobi të paqes dhe stabilitetin në rajon dhe të integrimeve evropiane për të dyja shtetet. Ajo shprehu bindjen se proceset zbatuese do të vazhdojnë duke paralajmëruar takime të radhës që nga java e ardhshme./b.j/

DEKLARATE E AMBASADES AMERIKANE NE TIRANE

June 8, 2016 by dgreca

Deklaratë e Ambasadës së Shteteve të Bashkuara të Amerikës (8 qershor 2016)/

Ambasada e Shteteve të Bashkuara shpreh zhgënjimin e saj që takimi i 6 qershorit mes Kryeministrit Rama dhe Liderit të Opozitës Basha nuk arriti një vendim përfundimtar mbi reformën në drejtësi. Qeveria shfaqi fleksibilitet, por, në fund, opozita nuk bëri të njëjtën gjë. Prandaj, Qeveria e Shteteve të Bashkuara mbështet përpjekjet e Qeverisë shqiptare për ta çuar draftin drejt miratimit. Do të jetë përgjegjësia e anëtarëve individualë të parlamentit të vendosin nëse duan të mbajnë sistemin e sotëm të drejtësisë të korruptuar dhe të politizuar apo nëse do ta mbështesin këtë reformë. Për më shumë se 18 muaj, ekspertë vendas dhe ndërkombëtarë, politikanë, shoqëria civile, dhe publiku, janë angazhuar në një debat të rëndësishëm mbi reformën e drejtësisë në Shqipëri. Ky proces shterues e ka përmirësuar draft-paketën e reformës dhe e afroi qeverinë dhe opozitën drejt një marrëveshjeje. Kjo reformë, të cilën e mbështesin shumica dërrmuese e shqiptarëve, mbetet një prioritet kyç për Shtetet e Bashkuara. Shtetet e Bashkuara do të punojnë për t’u siguruar që drafti përfundimtar i paraqitur në Komisionin e Posaçëm për Reformën në Drejtësi dhe në Parlament, të jetë një draft i drejtë, që përfaqëson idetë më të mira të ekspertëve vendas, ekspertëve ndërkombëtarë, dhe Komisionit të Venecias.

Hillary Clinton feston fitoren në Bruklin, Nju Jork

June 8, 2016 by dgreca

Nga Beqir SINA – Brooklyn New York/

Grupe shqiptarësh, po i qëndrojnë besnik në mbështetjen tyre deri në Shtëpinë e Bardhë /

BROOKLYN NYC : Në vazhdën e Super të Martës, kandidatja për Presidente e SHBA, Hillary Rodham Clinton, mbasi fitojë në fillore në Kaliforni, New Jersey, South Dakota, dhe New Mexico, triumfalisht doli në skenën madhështore të bazës detare Navy Yard në Brooklyn mbrëm për të festuar së bashku me përkrahsit e saj, fitoren e emrimit nga Partia Demokrate.

Ajo doli në skenë së bashku me bashkëshortin e saj Presidentin Bill Clinton, dhëndrrin dhe vajzën shtatëzën Chelsea, duke u thënë përkrahësve të ngazëllyer se fitorja e saj historike, është vazhdimi i betejave, të filluar nga pionierët e të drejtave të grave në SHBA, gjatë shekullit të 19-të në Seneca Falls, New York “.

“Sonte, po kurorëzohet një udhëtim i mrekullueshëm — një ujdhëtim shumë, shumë i gjatë, i gjatë”, tha Hillary Clinton duke shtuar se “U detyrohemi kaq shumë atyre që erdhën përpara nesh, por e sontmja ju përket e gjitha juve” tha Clinton.

Shanci i Hillary Clintonit të jetë gruaja e parë për të fituar një nominim partisë më të madhe presidenciale tani duket se eshte i sigurt, por dhe sondazhet tregojnë se ka mundësi që ajo të fitojë edhe ndaj Donald Trump, në zgjedhjet e përgjithshme, megjithse asgje nuk eshte e sigurt dhe pritet 6 nentori.

“Falë jush, ne kemi arritur në një moment historik”, tha Clinton mbështetësve., dhe shtoje se: “Fitorja sonte nuk është në lidhje me një person. I përket brezave të grave dhe burrave që luftuan dhe sakrifikuan dhe e bëra këtë moment të mundshëm.”, tha ajo.

Clinton, gjithashtu sinjalizoi se pret me padurim tani për të bashkuar edhe partinë Demokratike, pas një beteje të gjatë me Bernie Sanders, duke pretenduar se ata të dy gjatë fushatës paraprake patën “debate rigoroze” të cilat sipas saj kan qenë “shumë të mirë për Partinë Demokratike dhe Amerikën.”

Përfaqësuesit e të dy fushatave, pra Clinton dhe Sanders, thuhet se janë takuar, sot për të diskutuar mbi unitetin e partisë.

Sanders i cili fitoi dje, Super të Martën në Montana dhe North Dakota, duke folur për mbështetësit e tij, dukej të jetë i gatshme të pranojë humbjen dhe të premtoi se do të vazhdojë për të “luftuar shumë për të fituar” në primaren e fundit, e cila do të jetë në District of Columbia javën e ardhshme, megjithëse nuk i jep atij, asnjë lloj shnaci të dalë në krye të Demokratëve.

Por, simbas shtypit këtu ai gjithashtu pranoi: “Unë jam shumë i mirë në aritmetikë, dhe unë e di se lufta para nesh është një “luftë” shumë, shumë e madhe, prandaj ne do të vazhdojmë të luftojmë për çdo votë dhe çdo delegat që ne mund të marrim.”

Clinton deri mbrëmë ka fituar shumicën e 4,051 delegatëve , dhe ka pretendimet e mbështetjes nga 571 superdelegatëve, në krahasim me Sanders, që thuhet se ka 48 Superdelgatë. Afërsisht 100 Superdelegatë, thonë anlaistët e këtyre zgjedhjeve, mbeten të paangazhuar, dhe Sanders është duke aspiruar për të i fituar ata gjatë Konventës së Partisë Demokrate.

Tani Sanders ka në plan për të hequr nga “puna” të paktën gjysmën e stafit të tij të fushatës, dhe ka një takim të planifikuar me Presidentin Obama të enjten, me kërkesë të tij. Strategjisti i fushatës së tij manaxheri Mark Ruffalo, shkruajn gazetat sot duket dha dorëheqjen, mbas fitores së Hillary Clinton mbrëm.

Ndërkohë, në Mordor, kandidati Republikan Donald Trump, i cili ka ka siguruar më parë fitoren në fillimore nga Republikanët, fitoi në California, Montana, New Jersey, New Mexico, dhe South Dakota, në thelb duke triumfuar mbi askënd.

Shtypi amerikan shkruan se ai ka në plan të japë një fjalim javën e ardhshme për të folur sipas tyre : ”Të gjitha gjërat që kanë ndodhur me Clintonët,” dhe bëri një uverturë për mbështetësit Sanders që ndjehen simbas tij të “lënë jashtë në të “ftohtë”, nga një sistem i manipuluar i demokratëve amerikan.”

Mbrëmë, kur Hillary, doli në skenën madhështore të bazës detare Navy Yard në Brooklyn për të festuar së bashku me përkrahsit e saj fitoren, e emrimit nga Partia Demokrate, në një natë historike dhe emocionale, para një turme mbështetësish që brohorisnin në Bruklin, Nju-Jork, natyrishtë, që nuk munguan edhe veprimtarët shqiptaro amerikan, të cilët kan kontribuar shumë gjatë fushatës fillimore në Partinë Demokratike që nga nisja e fushatës .

Njëri prej tyre, në qendrën e bazës detare Navy Yard në Brooklyn, për të festuar së bashku me një grup tjetër shqiptarësh ishte mbreme, edhe veprimtari i njohur dibran Ibrahim Kolari, ish Kryetari i Shoqates Atdhetare Dibra, dhe anëtarë i kryesisë së Federatës PanShqiptare Vatra.

Kandidatja demokrate për Presidente të ShBA-ve, në fillim të fushatës fillimore nga Partia Demokrate, pati marrë pjesë në një mbrëmje për rritjen e fondeve nga biznismenin shqiptar Selim Rusi, që njihet si Sal Rusi, në shtëpinë e tij, që këtu në Nju Jork, njihet si “Shtëpia e Bardhë”, për nga ndërtimi dhe madhësia .

Madje emri i shtëpisë, shkruajti shtypi amerikan i “ndjellë” mirë Hillary-t ngaqë ajo quhet “Shtëpia e Bardhë”, vendi i cili synohet tashmë që ajo ka fituar emërimin e saj nga Partia Demokrate, nga ish-zonja e parë që nga viti 1994 deri në vitin 2000, kur burri i saj Bill Clinton ishte president, të bëhet ndoshta me 6 Nëntor 2016 edhe Presidentja e parë grua në historinë e Shteteve të Bashkuara .

Rusi, i cili është Shqiptaro-Amerikan, me origjinë nga Dibra e Madhe, me një grup shqiptarësh, megjithëse, thone se është i regjistruar Republikan, është “hedhur” në përkrahje të Demokratëve në këto zgjedhje, dhe konkretishtë të Hillary Rodham Clinton.

Sipas gazetës New York Daily News, Rusi kishte thënë: “Kjo, po ndodhë ngaqë Clinton u ka ndihmuar shumë, shqiptarëve, sidomos për Kosovën, por edhe për komunitetit shqiptar dhe kam kënaqësinë, që mund t’i ndihmojë zonjës Clinton dhe komunitetit të saj”.

Hillary Clinton shkruan shtypi amerikan mbrëmë me familjen e saj, duket se ka përjetuar momentin e saj me të lumtur në jetën e saj, duke u bërë gruaja e parë në historinë e 240-vjeçare të Shteteve të Bashkuara, një grua kandidate për Presidente, për të udhëhequr një biletë presidenciale prej një partie e cila është nga më te mëdhat politike, në vend .

“Falë jush, ne kemi arritur në një moment historik”, tha ajo gjatë një fjalimi në Bruklin. “Fitorja sonte nuk është në lidhje me një person. I përket brezave të grave dhe burrave që luftuan dhe sakrifikuan dhe e bëra këtë moment të mundshëm.”

Pas tre dekadash në qendër të politikës amerikane si pioniere – dhe shumë të diskutueshëm – ikonë feministe, fitorja e saj sjell, mendojne analistet e ketyre presidencialevene Shtetet e Bashkuara, se u jep fund edhe atyre, plasaritjeve partiake “më të lartat, dhe më e vështirat prej krjimit të Partisë Demokratike “

Ish-Zonja e Parë, Senatore nga Nju Jorku dhe ish -Sekretare e Shtetit, tani Hillary Rodham Clinton, tani pret të përballet për të “paragjykuar” kandidatin republikan Donald Trump, në një betejë të përgjithshme elektorale qe nukdo te jet aspak e lehte, që tashmë është formësuar si një nga fushatat nastiest- “më të këqijat” në historinë moderne të SHBA-së.