Archives for July 2016

SHBA-Kosovë, bashkëpunim i ngushtë

July 27, 2016 by dgreca

-Zëvendëskryeministri Kuçi priti shefin e Zyrës Politike dhe Ekonomike në Ambasadën Amerikane, Steve Banks/

PRISHTINË, 27 Korrik 2016-Gazeta DIELLI/ Zëvendëskryeministri i parë i Republikës së Kosovës, Hajredin Kuçi, priti sot në takim shefin e Zyrës Politike dhe Ekonomike në Ambasadën Amerikane në Kosovë, Steve Banks.Gjatë takimit, zëvendëskryeministri Kuçi dhe z. Banks, diskutuan për zhvillimet aktuale në Kosovë, për bashkëpunimin dhe përkrahjen e mëtejme të SHBA-ve për Kosovën.

Zëvendëskryeministri Kuçi, e njoftoi për progresin e arritur në proceset eurointegruese, për punët që po bëhen për rritjen e zhvillimit ekonomik dhe fuqizimin e shtetit ligjor.

Në këtë takim, zëvendëskryeministri Kuçi dhe shefi i Zyrës Politike dhe Ekonomike, Banks, konfirmuan vazhdimin e bashkëpunimit të ngushtë në mes të Ambasadës Amerikane dhe Qeverisë së Republikës së Kosovës në fushat e interesit të përbashkët, posaçërisht në fushën e sundimit të ligjit./b.j/

Presidenti Obama për sulmin kibernitik

July 27, 2016 by dgreca

Presidenti amerikan Barack Obama nuk e mohoi të martën mundësinë që homologu i tij rus, Vladimir Putin, të jetë duke u përpjekur të ndikojë në zgjedhjet presidenciale amerikane në favor të kandidatit republikan Donald Trump. Komentet e tij vijnë vetëm pak pasi zyrtarë të qeverisë thanë gjatë kësaj jave se, ka prova të mjaftueshme që sulmi kibernetik ndaj të dhënave të Komitetit Kombëtar Demokratik të jetë kryer nga “hacker”-a që punojnë në favor të shërbimeve sekrete ruse. “Gjithçka është e mundshme”, u përgjigj Obama kur u pyet gjatë një interviste nëse rusët janë duke punuar apo jo për të influencuar garën mes kandidatit republikan Trump dhe kandidates demokrate, Hillary Clinton. “Donald Trump ka përsëritur vazhdimisht admirimin e tij për Vladimir Putin”, tha Obama gjatë intevistës për “NBC News”. “Ndërsa unë mendoj se Trump ka marrë një mbulim mjaftueshëm favorizues në Rusi”. Demokratët pretendojnë se Putin po synon të ndikojë në garën për Shtëpinë e Bardhë, pasi “WikiLeaks” publikoi “e-mail”-e dëmtuese për Komitetin Demokratik pas sulmit kibernetik. Ky sulm ndodhi thuajse në të njëjtën kohë me ato ndaj sistemeve të qeverisë amerikane në Departamentin e Shtetit dhe në Shtëpinë e Bardhë. Analistë nga Agjencia për Sigurinë Kombëtare (NSA) dhe Byroja Federale e Hetimit (FBI) zbuluan shenja në këto sulme, që i drejtojnë ata edhe në ndërhyrje të tjera jashtë qeverisë, përfshi atë në Komitetin Kombëtar Demokrat.Të dhënat të drejtojnë te të paktën një grup “hacker”-ash që janë të njohur për kundërzbulimin amerikan, thonë zyrtarët. I njëjti grup është përfshirë në sulme kibernetike ndaj sistemeve të “e-mail”-eve jo të klasifikuara në DASH, Shtëpinë e Bardhë, por edhe agjenci të tjera federale. Hetuesit besojnë se inteligjenca ruse fshihet pas kësaj vale sulmesh kibernetike ndaj organizatave politike, madje edhe ndaj “think tank”-eve në Uashington. Edhe pse “WikiLeaks” mohon që dokumentet e publikuara prej saj t’i ketë marrë nga qeveria ruse, ai nuk bën të ditur burimin se nga kanë ardhur ato. Në intervistën për NBC, Obama tha gjithashtu se “ajo që dimë ne aktualisht, është se rusët kanë sulmuar sistemet tona. Jo vetëm sistemet e qeverisë, por edhe sistemet private”. Komenti i presidentit amerikan rezulton të jetë më i ashpri që qeveria amerikane ka bërë publik deri më tani, duke fajësuar Rusinë për kryerjen e sulmeve kibernetike ndaj Shteteve të Bashkuara.

KOSOVE-SHQIPERI, MEMORANDUM BASHKEPUNIMI MES DY POLICIVE

July 27, 2016 by dgreca

Lezhë-Policitë e Shqipërisë e Kosovës nënshkruajnë memorandum bashkëpunimi/

– Policia e Kosovës do të dërgojë në Shqipëri disa zyrtarë policorë të cilët do të merren me ruajtjen e rendit dhe sigurisë publike në disa qytete, si në Durrës, Lezhë dhe në Shkodër/

LEZHË- PRISHTINË,, 27 Korrik 2016-Gazeta DIELLI/ Policia e Shtetit të Shqipërisë dhe Policia e Republikës së Kosovës nënshkruan memorandum bashkëpunimi.

Komunikata e dërguar thekson se, me qëllim të vazhdimit të avancimit të bashkëpunimit ndërpolicor ndërmjet dy vendeve, si dhe me qëllim të intensifikimit të marrëdhënieve përmes planifikimeve dhe zbatimit të masave të përbashkëta policore, sot, gjatë një takimi të mbajtur në Lezhë, Shqipëri, Naim Rexha, Zëvendësdrejtor i Përgjithshëm i Policisë së Kosovës dhe Rebani Jaupi, Zëvendësdrejtor i Policisë së Shtetit të Shqipërisë, nënshkruan një memorandum për bashkëpunim gjatë sezonit turistik 2016 në ruajtjen e rendit dhe sigurisë publike.

Qëllimi i këtij memorandumi është vendosja e bashkëpunimit sa më cilësor policor në trajnime të avancuara në procesin e shkëmbimit të praktikave policore në ruajtjen e rendit dhe sigurisë publike, parandalimin e kriminalitetit, veçanërisht në format komplekse të krimit të organizuar, krimit me elemente ndërkombëtare si dhe veprave tjera penale.

Si rezultat i kësaj marrëveshje bashkëpunimi Policia e Kosovës do të dërgojë në Shqipëri disa zyrtarë policorë të cilët do të merren me ruajtjen e rendit dhe sigurisë publike në disa qytete, si në Durrës, Lezhë dhe në Shkodër.

Me rastin e nënshkrimit të këtij memorandumi të dy zëvendësdrejtorët, Rexha dhe Jaupi vlerësuan marrëdhëniet e shkëlqyera të dy policive, jo vetëm në fushën e rendit publik, por edhe të policimit rrugor si dhe në format tjera të luftimit të kriminalitetit./b.j/

Turqia, Erdogan dhe analisti Buzhala

July 27, 2016 by dgreca

Opinion nga Suzana Tahiri/

Askush nuk e mendonte se një shaka në rrjetin social Facebook, e publicistit të njohur Berat Buzhala, do të shoqërohej me një kërcënim qeveritar e diplomatik, madje me një notë të ashpër të ambasadës turke në Prishtinë për burgosjen e gazetarit.

Kjo notë ngjalli zemërim në kancelaritë perëndimore, sidomos në Bruksel e Uashington dhe mori një përgjigje të merituar nga Ministri i Jashtëm i Kosovës Enver Hoxhaj.

Akoma më ashpër ajo u dënua nga komunitetet dhe organizatat e gazetarëve dhe institucionet ndërkombëtare të mbrojtjes së lirive dhe të drejtave njerëzore.

Megjithatë kjo ndodhi dhe më shumë se dëmtoi analistin Buzhala, ishte një argument më shumë që regjimi i sotëm i Ankarasë është autokratik, shtypës i të drejtave dhe lirive njerëzore, denigrues ndaj shtypit dhe medias së lirë, një rudiment i shoqërive të prapambetura.

Pikërisht nga kjo ndodhi dhe nga shumë të tjer,a shumë më të rënda, Turqia ka nevojë të ç’burgoset sepse një shtet demokratik, anëtar i NATO-s, do të kontribuonte më mirë në paqen dhe stabilitetin e rajonit, Europës dhe më gjerë.

Këtë më mirë se kushdo lypset ta kuptojë opozita turke, shtresat më të përparuara të shoqërisë turke, të cilat ndjejnë në kurriz peshëm e një parti që qeveris prej 14 vjetësh dhe të një njeriu që e bën kushtetutën jo në përputhje me standardet demokratike, por në funksion të pushtetit të tij absolut.

Asnjë diktaturë dhe asnjë sistem autokratik nuk ka mundur të jetojë gjatë, por zgjatja e kësaj status quo je rëndon mbi popullsinë 80 milionshe që gjendet brenda një izolomi të madh e të gjithmbarshëm.

Kosovë-Trepça, në proces të riorganizimit

July 27, 2016 by dgreca

-Delegacioni i Komisionit Parlamentar për Zhvillim Ekonomik viziton Agjencinë Kosovare të Privatizimit, ku gjatë një takimi u diskutua për procesin e riorganizimit të Ndërmarrjes Trepça dhe studimin e fizibilitetit për këtë, që është në proces e sipër, si dhe për çështje tjera/

PRISHTINË-B.Jashari/Anëtarët e Komisionit për Zhvillim Ekonomik, Infrastrukturë, Tregti dhe Industri të Kuvendit të Kosovës vizituan sot Agjencinë Kosovare të Privatizimit, ku gjatë një takimi u diskutua për procesin e riorganizimit të Ndërmarrjes Trepça dhe studimin e fizibilitetit për këtë, që është në proces e sipër, si dhe për çështje tjera.

Kryesuesi i Bordit të Drejtorëve i Agjencisë Kosovare të Privatizimit, Petrit Gashi, priti delegacionin nga Komisioni për Zhvillim Ekonomik, Infrastrukturë, Tregti dhe Industri të Kuvendit të Republikës së Kosovës, të kryesuar nga Muhamet Mustafa, kryetar i këtij Komisioni.Kryetari i Komisionit Parlamentar, Muhamet Mustafa si dhe anëtarët e Komisionit, Besim Beqaj dhe Raif Qela, shprehën interesim për një varg çështjesh, për të cilat u informuan nga Kryesuesi i Bordit, Petrit Gashi dhe anëtarët e tjerë të Bordit, Bajram Zejnullahu, Haxhi Arifi, Ismail Januzi, Ranko Djokiç, si dhe nga Zëvendësdrejtorët Menaxhues të Agjencisë, Valbona Dibra dhe Avni Jashari.

Në takim u diskutuan çështje që vazhdojnë të jenë sfiduese për Agjencinë e Privatizimit. Kryesuesi i Bordit të Drejtorëve, Petrit Gashi i informoi anëtarët e komisionit për zhvillimet dhe aktivitetet dhe çështjet të cilat ndërlidhen me rritjen e efikasitetet të punës së Agjencisë.

U diskutua edhe lidhur me progresin e shpërndarjes së 20% për punëtorët e ndërmarrjeve shoqërore të privatizuara, pagesën e kërkesave të kreditorëve të ndërmarrjeve shoqërore. U theksua se, vetëm brenda 5 muajsh janë aprovuar shpërndarjet e pagesave për kreditorët e 93 ndërmarrjeve shoqërore me totalin e pagesave prej 13.5 milionë euro.

Po ashtu, u diskutua për procesin e lirimit të pronave të uzurpuara në të gjithë territorin e Republikës së Kosovës, për ndryshimin e ligjit të Agjencisë Kosovare të Privatizimit dhe përmirësimin e legjislacionit dhe procedurave, si dhe për mundësinë e përshpejtimit në trajtimin e lëndëve të ndërlidhura për Agjencinë nga Dhoma e Posaçme e Gjykatës Supreme.