Archives for July 2016

Themelim apo ndërrim emri?!

July 12, 2016 by dgreca

Nga Prof.dr. Eshref Ymeri/Kolumbus, Ohajo/

Përmes faqes së internetit“Lapsi.al” të datës 11 korrik 2016, u njoha me ftesën e mëposhtme që Kryetari i Partisë Socialiste dhe Kryeministri Edi Rama, i ka dërguar anëtarësisë së saj:“25 vjet prej themelimit të Partisë Socialiste, e bëjnë festën e ditëlindjes së këtij viti një moment të posaçëm ritakimi mes brezash, për të kremtuar së bashku arritjet dhe sfidat e familjes sonë të madhe politike. Me dëshirën që të ndajmë këtë moment të gëzuar së bashku, shpresoj të takohemi në mjediset e shtëpisë sonë në Tiranë”.

Vëllazërisht

Edi Rama

E martë, 12 korrik, ora 19:00

Lulishtja pranë Selisë së Partisë Socialiste”.

Me këtë rast, dëshiroj, së pari, të theksoj se më bëri shumë përshtypja fjala “themelim” që përmend Kryeministri Rama në ftesën e vet. Të rinjtë socialistë poshtë moshës 25-vjeçare janë të bindur se Partia Socialiste është themeluar në vitin 1991. Ata nuk e dinë që mbarë populli shqiptar është dëshmitar i drejtpërdrejtë i daljes në skenë të Partisë Socialiste më 12 qershor 1991. Kjo parti, pikërisht në këtë datë, në Kongresin e dhjetë të Partisë së Punës të Shqipërisë, thjesht ndërroi emrin nga Parti e Punës në Parti Socialiste. Pra, nuk pati kurrfarë themelimi. Se themelimi i një partie politike ka një tjetër ecuri. Në atë kongres nuk u deklarua shpërbërja dhe shpërndarja e Partisë së Punës, e cila periudhën mes viteve 1980-1990 e mbylli me një dështim shembullor në qeverisjen e vendit, të shoqëruar me një varfërim të mbarë popullit deri në përmasa mitike, si në asnjë tjetër vend socialist të Evropës Lindore. Një gjë e tillë nuk ndodhi. Pra, u bë vetëm ndërrimi i emrit të një partie komuniste në parti socialiste. Dhe anëtarët e saj, me në krye krerët komunistë, u gdhinë komunistë dhe në pasditen e 12 qershorit u ngrysën socialistë. Faktikisht, nga komunistë, u shndërruan në neokomunistë, por tashmë në kushtet e pluralizmit politik.

Së dyti, meqë do të mblidheshin në shtëpinë e tyre, siç e quan Kryeministri Rama selinë e Partisë Socialiste, për të festuar 25-vjetorin e ndërrimit të emrit, normalisht, nuk duhej të harronin të ftonin në festën e tyre edhe fqinjin që kanë në shtëpinë pranë. Se ne e kemi zakon që kur kemi festë, fqinjin e shtëpisë gjithmonë e ftojmë të ndajmë gëzimin me të. Pra, e kam fjalën për fqinjin e shtëpisë socialiste, Janullatosin, të cilit Ramiz Alia, udhëheqësi shpirtëror i socialistëve shqiptarë, në takimin me Micotaqisin më Tiranë më 13 janar 1991, pranoi t’i dorëzonte fronin e kishës ortodokse fanoliane. Do të ishte një rast ideal për të parë se si socialistët, duke filluar nga Kryeministri Rama, si gjithmonë,do të puthnin me radhë veladonin e Janullatosit. Se, ashtu si edhe Ramiz Alinë, edhe Janullatosin e kanë udhëheqës shpirtror. Prandaj jo më kot, në Projektkushtetutën e vitit 1998, ata hoqën nenin e Projektkushtetutës së vitit 1994, sipas të cilit krerët e kulteve fetare duhet të jenë me gjak, me prejardhje dhe me shtetësi shqiptare, duke i çelur shtegun ardhjes së Jalullatosit në krye të kishës dhe hedhjes në harresë të veprës së lavdishme të Fan Nolit.

Së treti, në ftesën e vet Kryeministri Rama e fton anëtarësinë socialiste të kremtojnë së bashku arritjet dhe sfidat e familjes së madhe politike.

Domosdo. Partia Socialiste, gjatë këtyre 25 vjetëve që kanë kaluar pas ndërrimit të emrit, ka se çfarë tëkremtojë si arritje të shënuara në qeverisjen e vendit. Le të mos shkojmë larg, por të ndalemi në këto tre vjetët e fundit të qeverisjes së saj.

Pas zgjedhjeve të qershorit të vitit 2013, Partia Socialiste trashëgoi nga Partia Demokratike plantacionet e drogës së Lazaratit. Brenda këtyre tre vjetëve, qeveria socialiste e lazaratizoi krejt territorin e vendit. Kjo është me të vërtetë një arritje e madhe që ka kërkuar shumë mund dhe djersë për t’u realizuar, pasi për eksportimin e drogës jashtë vendit, nuk mjaftonin vetëm mjetet e transportit tokësor dhe detar, por duheshin përdorur edhe fluturakët e vegjël që endeshin poshtë e përjetë qiellit shqiptar

Gjatë qeverisjes socialiste është vënë re vjedhja e thesarit dhe grabitja e bankave ditën për diell. Sigurisht që vjedhje dhe grabitje të tilla kërkojnë esnafë të kalibrit të lartë, të cilët vetëm shteti di si t’i organizojë dhe t’ua fshehë gjurmët me merak.Prandaj edhe kriminelët e këtyre vjedhjeve dhe grabitjeve kanë mbetur të pazbuluar deri tani. Sepse kur krimi nuk zbulohet, autor i tij është vetë shteti

Gjatë këtyre tre vjetëve të fundit,është vënë re një braktisje masive e vendit nga ana e qytetarëve të thjeshtë, për të kërkuar azil ekonomik në vendet e Bashkimit Evropian. Kur u liberalizua heqja e vizave gjatë viteve që qeveriste Partia Demokratike dhe deri në zgjedhjet e qershorit të vitit 2013, nuk u vu re anjë braktisje e vendit nga qytetarët shqiptarë. Madje anjëri prej atyre që shkonin në Evropën Perëndimore për të takuar të afërmit dhe fëmijët, nuk kërkoi azil, por u kthye në atdhe. Krejtësisht e kundërta ndodhi me rikthimin në pushtet të Partisë Socialiste në qershor të vitit 2013: sipas të dhënave që janë bërë publike në mjetet e informimit masiv, këto tre vjetët e fundit vendin e kanë braktisur mbi 100 mijë qytetarë.

Në këto tre vjet të qeverisjes socialiste, me shtrenjtimin e energjisë elektrike dhe shtimin e taksave, qytetarëve po u kanoset varfëria e viteve ’80, të cilën ua imponoi me dhunë diktatura komuniste.

Pra, rezulton se Partia Socialiste, si pasardhëse e drejtpërdrejtë e Partisë së Punës, nuk mund të heqë dot dorë nga politika e varfërimit të shtresave të gjera të popullit, sepse, sipas këndvështrimit të saj komunist, sa më i varfër të jetë populli, aq më i bindur dhe më i nënshtruar bëhet ai dhe, për pasojë, aq më afatgjatë bëhet qeverisja e saj. Pikërisht sipas modelit të qeverisjes së Putinit në Rusi.Ёshtë me të vërtetë paradoksale kur e mendon që neokomunistët shqiptarë me mantel socialist, kërkojnë që vendi ynë të anëtarësohet në Bashkimin Evropian, por ama të qeverisin sipas modelit putinian.

Prandaj, në këtë 25-vjetor të ndërrimit të emrit, socialistët kishin se me çfarë të krenoheshin gjatë qeverisjes së fundit trevjeçare. Sepse neokomunistët, ashtu si edhe etrit e tyre komunistë, nuk i njohin disfatat.

Kolumbus, Ohajo

12 korrik 2016

Sot ti socialist

July 12, 2016 by dgreca

Nga Ilir Levonja/ Florida/

Sot partia socialiste feston 25-vjetorin e krijimit. Duhej ta kish bërë këtë një muaj më parë. Por nuk e bëri! Kjo për ato arsye që në konteksin shqiptar janë uzurpimi i karrikes prej individit. Paçka se lart e poshtë shiten si çështje teknike në lidhje me vizitat e punës, brenda dhe jashtë vendit etj. Në përgjithësi, uzurpatorët shqiptarë janë më të papunët. Ata më shumë shpërdorojnë kohë duke plotësuar tekat e grupeve të interesit, se sa hallet e një e vendi. Këtë përshembull e konstaton letra e hapur e deputetit Vladimir Kosta, i qarkut të Gjirokastrës. Ajo letër, është këto orë jetë, ndofta gajasja më e madhe, mllefi më i madh i sojit të këtyre burrave uzurpues. Në të njëjtën kohë edhe fatkeqësia që ne e mbulojmë me humor, me mbajtje anësh, pa e kuptuar asnjëherë se sa shpesh e më shpesh e ridënojmë veten. Në fakt spektri ynë politik është i mbushur me kësisoj shembujsh. Ndarja e fondeve kthehet në një luftë të ashpër, nga e cila vetëm uzurpatorët nuk humbasin. Ata që humbasim jemi ne. Madje edhe të drejtën për të jetuar. Uzurpatorët veçse na hedhin karafila për sipër. Të tjerat i mbajnë për vete. Eshtë një histori njëzetë e pesë vjeçare, nga e cila unë si demokrat dhe ti si socialist, mësuam të urrejmë. Mësuam të ndahemi, t’i hamë kokën njëri-tjetrit me lista dhe kundër lista fushatash. Eshtë një histori njëzetë e pesë vjeçare, nga e cila unë si demokrat dhe ti si socialist dimë vetëm të bërtasim. Të pështyjmë njëri-tjetrin. Deri të ta vrasim njëri-tjetrin në emër të shefave. Eshtë një histori njëzetë e pesë vjeçare, nga e cila unë si demokrat të shajë nga nëna ty si socialist. Dhe po të njëjtën gjë bën ti me mua. Aq sa edhe fëmijët tanë dinë vetëm një gjë të thonë…, y ai demokrati, y ai socialisti. Eshtë një histori njëzetë e pesë vjeçare, nga e cila unë si demokrat dhe ti si socialist, kemi përzënë dhe po përzëmë rregullisht shqiptarët prej vendit të tyre. Duke kthyer në të vobektë, pa nerv, njerëz të kuq ose blu… në komunistë e demokratë, ata që kanë mbetur aty. Eshtë një histori njëzetë e pesë vjeçare, nga e cila unë si demokrat komunist dhe ti si socialist komunist. E kemi mbushur vendin me ferexhe arabie, me mjekra dhe bankete syfyresh. E kemi mbushur me kisha dhe teqe, aq sa industria më e madhe janë kurbanët, pelegrinazhet fetare. Sa sot vendi ynë të ngjan herë si Afganistani, herë si mali i shenjtë i Atosit. Apo dhe si një kasapanë e bagëtive të imta, keca, delesh etj. Eshtë një histori njëzetë e pesë vjeçare, nga e cila unë si demokrat dhe ti si socialist. Kemi zbuluar, demaskuar, treguar me gisht veç armiq të klasës. Megjithëse në trekëndsha, në sheshe publike kemi varur veç njëri-tjetrin. Jo uzurpatorët. Eshtë një histori ku sot përshembull Sali Berisha na thotë ne demokratëve se, Nano dhe klani i Zemunit janë reformatorët e vërtetë të partisë komuniste. Dhe se ky neobllokmeni i ri, Rama dhe klika e tij, e uzurpuan PS-ën. Kur në fakt ne u vramë në 98-ën, ti socialist dhe unë si demokrat. Për zgjedhjet dhe politikat e Nanos dhe klanit të Zemunit. Pikërisht pasi Nano na e solli si peshqesh nga gjirizet e Parisit, këtë rilindasin ”perëndimor” me video taksitë e pashait nga Stambolli. Eshtë një histori, ku e drejta e përcaktimit të së bardhës që është e bardhë. Dhe e zeza e zezë. Eshtë privilegj i uzurpatorit, jo i imi, i yti. Ne vetëm vazhdojmë të dëgjojmë të njëjtën muzikë. Unë demokrat i ndyrë. Ti socialist i poshtër. Kur akoma kërkojmë eshtra. Dhe akoma i reklamojmë me spotet uzurpatorësh se si tmerret e Enverit janë përkthyer dhe gjënden në anglisht, librarive të botës. Kur akoma ngelëm viktima dhe kasnecë të teserës. Të mëndjes më mirë një mik se sa një çiflig. Kur akoma shihemi në gjyqe, mbyllemi në shtëpi, marrim arratinë për shkak të hasmit. Akoma jemi turmë e shfrenuar. Akoma vdesim për të parë shoqi-shoqin duke vdekur. Dhe akoma nuk e dimë se cilët jemi? Sot ti socialist u bëre njëzetë e pesë vjeç. Të uroj të lash xhamat. Të hedhësh ujë me shumicë. Të pastrosh llumin, zhulin. Skorjet e jetës tonë. Ato që unë, vazhdojë t’i harrojë.

Letër e Shoqates”Rugova” dhe e Komunitetit Shqiptar ne Nju Jork Për Deputetët e Kosovës

July 12, 2016 by dgreca

Shoqata Rugova me seli në New York dhe komuniteti Shqiptaro Amerikan në Shtetet e Bashkuara të Amerikës, u drejton publikisht këtë letër dhe kërkesë deputetëve të Parlamentit të Republikës së Kosovës.

…

Të Nderuar Deputetë të Kuvendit të Republikës së Kosovës:

Komuniteti Shqiptaro Amerikan me shqetësim të madh përcjellë situatën e fundit të krijuar lidhur me kufirin Kosovë-Mali i Zi, pikërisht rreth ratifikimit të marrëveshjes për demarkacionin kufitar.

Kërkojmë nga Kuvendi dhe deputetët e Republikës së Kosovës që të mos ratifikojnë marrevëshjen e cila i dëmton trojet Shqiptare.

Jemi kundër cdo pazari të bërë me tokat tona.

Jemi në një kohë kur duhet të tregoheni sa më vigjilent dhe t’i leni me një anë politikat ditore.

Shpresojmë dhe besojmë që do mbaheni mend ndër gjenerata si legjislativ i cili nuk ratifikon çfarëdo marrëveshje që dëmton trojet Shqiptare.

Me respekt,

Shoqata Rugova

Federata Pan Shqiptare VATRA

Mark Gjonaj, Asambleist i Shtetit të New Yorkut

Lidhja Qytetare Shqiptaro Amerikane

Batalioni Atlantiku

Këshilli Shqiptaro Amerikan

Shoqata Malësia e Madhe

Fondacioni Plavë e Guci

Shoqata Atdhetare Dibra

Shoqata Shqiptaro Amerikane Ana e Malit

Shoqata Peja

Shoqata Drenica

Komuniteti Shqiptaro Amerikan Hasan Prishtina, CT

12 Korrik, 2016, New York

…

Kosovë-LDK: Duhet të vazhdohet me ratifikimin e demarkacionit

July 12, 2016 by dgreca

-Anëtarët e Kryesisë së LDK-së biseduan për çështjen e shënjimit të kufirit ndërmjet Republikës së Kosovës dhe Malit të Zi.Njëzëri u pajtuan që duke u bazuar në punën e komisionit shtetëror, vlerësimin e komisionit ndërkombëtar të krijuar nga ish-Presidentja Jahjaga, si dhe qëndrimin e Presidentit Amerikan Barack Obama, të Departamentit të Shtetit të SHBA-ve dhe mesazheve të qarta të ndihmës sekretares amerikane Victoria Nuland e personaliteteve të tjera evropiane, duhet të vazhdohet me ratifikimin në Kuvend të kësaj marrëveshje, e cila do t’i hap rrugë lëvizjes së lirë të qytetarëve të Kosovës në vendet e BE-së dhe proceseve tjera integruese dhe zhvillimore./
-Gjatë takimit, u bisedua edhe për procesin e riformatimit të kabinetit qeveritar të Kosovës/

PRISHTINË, 12 Korrik – Gazeta DIELLI/* Kryesia e Lidhjes Demokratike të Kosovës mbajti sonte mbledhjen e rregullt, të udhëhequr nga kryetari i LDK-së, njëherësh kryeministër i Republikës së Kosovës, Akademik Isa Mustafa.
Komunikata e sapodërguar thekson se, gjatë takimit u bisedua për proceset aktuale në vend dhe për orientimet e LDK-në në zhvillimin e mëtejmë të vendit.
Anëtarët e Kryesisë, biseduan për çështjen e shënjimit të kufirit ndërmjet Republikës së Kosovës dhe Malit të Zi.
Pas diskutimeve shterruese, anëtarët e Kryesisë së LDK-së, njëzëri u pajtuan që duke u bazuar në punën e komisionit shtetëror, vlerësimin e komisionit ndërkombëtar të krijuar nga ish-Presidentja Jahjaga, si dhe qëndrimin e Presidentit Amerikan Barack Obama, të Departamentit të Shtetit të SHBA-ve dhe mesazheve të qarta të ndihmës sekretares amerikane Victoria Nuland e personaliteteve të tjera evropiane, duhet të vazhdohet me ratifikimin në Kuvend të kësaj marrëveshje, e cila do t’i hap rrugë lëvizjes së lirë të qytetarëve të Kosovës në vendet e BE-së dhe proceseve tjera integruese dhe zhvillimore.
Gjatë takimit, u bisedua edhe për procesin e riformatimit të kabinetit qeveritar të Kosovës, me ç’rast ka dominuar mendimi se kabineti qeveritar mund të fuzionohet dhe të fuqizohet me potenciale të reja, të cilat do të fuqizonin edhe më tutje procesin e reformave që po zhvillohen nga qeveria e Kosovës.
Anëtarët Kryesisë së LDK-së u pajtuan që në mbledhjen e radhës të vijnë me propozime konkrete në këtë drejtim, të cilat do të diskutohen me partnerët e koalicionit me qëllim të fuqizimit të këtij procesi.
Temë tjetër e takimit ishin edhe çështjet që lidhen me buxhetin e Republikës së Kosovës dhe nevojën e adresimit të disa çështjeve të rëndësishme në këtë drejtim./b.j/

*Foto: Dielli-Arkiv

VATRA- DEPUTETËVE TË KOSOVËS: MOS RATIFIKONI ASNJË MARRËVESHJE QË DËMTON TROJET KOMBËTARE!

July 12, 2016 by dgreca

Deputetë të Kuvendit të Kosovës: Shpresojmë dhe besojmë që do mbaheni mend ndër gjenerata si legjislativ i cili nuk ratifikon çfarëdo marrëveshje që dëmton trojet Shqiptare./

Federata Panshqiptare e Amerikës”VATRA”, ashtu si shumë organizata e fondacione Shqiptaro Amerikane në SHBA, me shqetësim të madh ka përcjellë situatën e fundit të krijuar në Kosovë lidhur me kufirin Kosovë-Mali i Zi, pikërisht rreth ratifikimit të marrëveshjes për demarkacionin kufitar.

Pjesë të mëdha nga trojet shqiptare, përgjatë historisë, padrejtësisht i janë shkëputur trungut Kombëtar duke ua dhuruar fqinjëve tanë. Nuk kemi toka të tepërta për të dhuruar, qoftë edhe si “haraç” për rrugëtimin drejt Bashkimit Evropian.

Federata “Vatra” për më shumë se 100 vjet ka qenë dhe mbetet edhe për këtë shekull avokatja e mbrojtjes së trojeve etnike. Askush nuk ka të drejtë që të “dhurojë” atë ç’ka brezat paraardhës e mbrojtën edhe me jetë. Nuk është vendi dhe koha të shesim patriotizëm, por me gjakftohtësi të dëgjojmë zërin e ndërgjegjes kombëtare, para se të merret një vendim, që nesër nuk mund të korrigjohet.

Vatra është kundër rrugës anarkiste të përdorimit të gazit lotsjellës në Parlament ashtu siç është edhe kundër demonstrimeve shkatërruse në rrugë, por ka mjete demokratike për ta kundërshtuar një vendim të padrejtë.

Kërkojmë nga Kuvendi dhe deputetët e Republikës së Kosovës që të mos ratifikojnë asnjë marrevëshje që dëmton trojet Shqiptare.

Jemi kundër çdo pazari të bërë me tokat tona.

Rrugëtimi drejt Bashkimit Evropian na dikton maturi, dhe t’i lëmë mënjanë politikat ditore, që nuk të çojnë asgjëkundi.

U bëjmë thirrje shtetarëve, deputetëve, politikanëve, që të mendojnë dhe të veprojnë me ndërgjegje kombëtare në ushtrimin e funksioneve dhe mandateve.

Shpresojmë dhe besojmë që do mbaheni mend ndër gjenerata si legjislativ i cili nuk ratifikon çfarëdo marrëveshje që dëmton trojet Shqiptare.